CIPANDE CA KUSAMBILILAMO 49
Uzye Yeova Alaasuka Mapepo Yane?
“Mulampunda nu kumpapata, nga nani ndamuvwa.” —YELE. 29:12.
LWIMBO NA. 41 Si Uvwa Ipepo Lyane
VINO TUMASAMBILILAPOa
1-2. U mulandu ci uno tungalolela kwati Yeova asikwasuka mapepo itu?
“Walonda ukuzangila muli Yawe, nga nawe alakupeela ivikalonda umwenzo wako.” (Masa. 37:4) Ulayo uu usuma sana. Nomba uzye tulinzile ukulaelenganya ukuti Yeova alatupeela vyonsi vino twaleenga papo kwene sile? U mulandu ci uno icicindamila ukuzya iuzyo lii? Elenganyini pa vintu vii ivyalondelelapo. Nkazi akupepa ukuti akazanweko ukwi Sukulu Lyakwe ya Kakosoola ya Wene. Lelo papita imyaka iingi ukwaula ukuti yamwame. Umwina uwacance akupepa ukuti Yeova amupozye uku ulwale uwipisye pakuti angaombako imilimo iingi umu cilongano. Lelo ulwale uwo usikupola. Avyazi Aina Klistu yakupepa ukuti umwana wao akatwalilile ukuya umu cumi. Lelo umwana wao wasoololapo ukuta ukuombela Yeova.
2 Limwi namwe mwatala mwalengapo vimwi kuli Yeova, nomba mutapokeelela ivintu vivyo. Cii cingalenga limwi mwaelenganya ukuti Yeova akaasuka mapepo yakwe yamwi, ainu foo. Nanti limwi mungaelenganya ukuti kwaya vimwi vino mwaluvyanya. Nkazi Janiceb wayuvwilepo vivyo. Wene pamwi na ya iya yapepanga ukuti yakaombeleko pa Betele. Walanzile ukuti: “Namanyile ukuti yali nu kutwama zuwa apa Betele.” Lelo patipapita imyaka iingi, atwalane yaa yatayama apa Betele. Ya Janice yalanzile ukuti: “Nuvwile sana uyi nupya navulunganyiziwe. Natandike ukwelenganya ndi cakuti kwali vino naluvyanyizye Yeova. Napepanga sana ukuti nkaombele pa Betele. U mulandu ci uno atasukila ipepo lyane?”
3. I vyani vino tumasambilila umu cipande cii?
3 Insita zimwi tungasakamala ndi cakuti Yeova akauvwa mapepo itu. Na aonsi kwene acisinka aaliko mpiti yayuvwanga vivyo kwene. (Yobo 30:20; Masa. 22:2; Haba. 1:2) I vyani ivingalenga musininkizye ukuti Yeova akauvwa mapepo inu? (Masa. 65:2) Pakuti twasuke iuzyo lii, lekini twasuke mauzyo yaa yatatu: (1) I vyani vino tukaenekela Yeova ukutucitila? (2) I vyani vino Yeova akaenekela ukuti twacita? (3) U mulandu ci uno insita zimwi tulinzile ukusenula vino tukapepelapo?
I VYANI VINO TUKAENEKELA YEOVA UKUTUCITILA?
4. Ukulingana na Yelemiya 29:12, i vyani vino Yeova walaya?
4 Yeova walaya ukukutika uku mapepo itu. (Belengini Yelemiya 29:12.) Leza witu watemwa ya kapepa yakwe acisinka, fwandi wayalaya ukuti alakutika amapepo yao. (Masa. 10:17; 37:28) Lelo cii cisipiliula ukuti alatupeela vyonsi vino twamulenga. Vimwi vino tukaleenga tulatwalilila ukuloleela ukufika umu nsi ipya lino alatupeela ivintu vivyo.
5. I vyani vino Yeova akalola lino akukutika mapepo itu? Londololini
5 Yeova akalola ndi cakuti vino tukuleenga vikuvwana nu kulonda kwakwe. (Eza. 55:8, 9) Icintu conga cino akalonda, u kulenga insi ukuzulamo antu acuvwila, ansansa, nupya alemane. Lelo Satana akalanda ukuti antu yangaya ni nsansa ndi cakuti yakuitungulula. (Utan. 3:1-5) Pakuti Yeova asinile Satana ukuti uwa ufi, wazumilizya antunze ukulaitungulula. Lelo imiteekele iya untunze yalenga kuye intazi izingi zino tukakwata ndakai. (Kasa. 8:9) Twamanya ukuti Yeova atalafumyapo intazi zyonsi zii ndakai. Ndi cakuti wafumizyepo intazi ndakai, antu aatazumila muli Leza yangaelenganya ukuti antunze yakwata amaka akumala intazi, nu kuti yangaitungulula ningo.
6. U mulandu ci uno tulinzile ukusininkizizya ukuti Yeova akaomvya kutemwa nu mulinganya lino akwasuka amapepo itu?
6 Yeova angasuka mapepo ali yamwi umu nzila izipusane pusane. Wakwe, lino Umwene Hezekiya walwile sana, wapapasile Yeova ukuti amwazwe. Nupya Yeova waswike ipepo lyakwe lino wamupozizye. (2 Yamw. 20:1-6) Nomba lino Paulo wapapasile Yeova ukuti amufumizye “umunga umu mwili,” uno ufwile wali uulwale, Yeova atamufumizizyepo intazi ii. (2 Kol. 12:7-9) Nupya elenganyini pali vino vyacitikiile umutumwa Yakobo nu mutumwa Petulo. Umwene Helodi walondanga ukuyakoma yonsi yoili. Amu cilongano yapepelanga Petulo na Yakobo kwene. Nanti ciye vivyo, Yakobo yamukomile, lelo Petulo wene yamupuswisye kuli malaika mu cizungusyo. (Mili. 12:1-11) Limwi tungayuzya ukuti, ‘U mulandu ci uno Yeova wapususizye Petulo, Yakobo foo?’ Baibo italandapo ivili vyonsi pali cii.c Lelo tungasininkizya ukuti Yeova “aataya nu lufyengo.” (Malan. 32:4) Nupya twamanya ukuti Yeova watemilwe Petulo na Yakobo kwene. (Kuso. 21:14) Insita zimwi Yeova atanga asuke mapepo itu ukulingana na vino tukwenekela. Pa mulandu wakuti twamanya ukuti lyonsi Yeova akalanga ukutemwa nu mulinganya lino akwasuka mapepo itu, tusiilizyanya ndi cakuti wasuka mapepo itu umu nzila ino tusikwenekela.—Yobo 33:13.
7. I vyani vino tutalinzile ukucita nupya u mulandu ci?
7 Tukaezya ukukanakolanya ivikutucitikila kuli vino vikucitikila yauze. Wakwe, tungalenga Yeova ukuti atwazwe umu kulungatika pa ntazi imwi, lelo vino tukuleenga ivikana ukucitika. Lyene pa cisila, itwiza tuvwa ukuti umwi wapefile kuli Yeova apa ntazi ili imwi nupya vino wapepilepo vyacitiike. Vikwene ivyacitikiile nkazi Anna. Nkazi wii wapepanga ukuti ya iya, ya Matthew, yapole uku ulwalwe wakwe kansa. Pa nsita ili imwi kwene, ya nkazi yaili aali akalamba pali ya iya yakwe ya Anna, yakweti kansa. Ya Anna yapepelangako sana ya iya na ya nkazi yaili. Ya nkazi yaya yaili yapozile, lelo ya Matthew yafwile. Pa kutandika ya Anna yayuzyanga ndi cakuti Yeova aliwe wazwile ya nkazi yaya yaili ukupola. Ndi cakuti Yeova u wazwile ya nkazi yaya ukupola, u mulandu ci uno atapozizye na iya? Kwene tutamanyile icalenzile ya nkazi yaya ukupola. Lelo cino twamanya icakuti Yeova alasisyapo ukucula konsi, nupya akalondesya ukutuutulula yacuza yakwe afwa.—Yobo 14:15.
8. (a) Ukulingana na Ezaya 43:2, uzye Yeova akatwazwa uli? (b) Uzye ipepo lingatwazwa uli lino tuli ni ntazi? (Lolini vidyo iyakuti: Ipepo Likatwazwa Ukuzizimizya.)
8 Yeova lyonsi akatwazwa. Tata witu Yeova uwaya nu kutemwa, asiuvwa ningo nga tukucula. (Eza. 63:9) Nanti ciye vivyo, asilesya intazi, zino tungakolanya uku luzi nu ku muto, ukutucitikila. (Belengini Ezaya 43:2.) Lelo walaya ukuti alatwazwa nga twakwata intazi. Nupya atalalenga ukuti intazi zino tukakwata zitulenge tute ukuya yacuza yakwe. Yeova akatupeela nu mupasi wakwe uwa muzilo uukatwazwa ukuzizimizya. (Luka 11:13; Filipi 4:13) Na cii cikalenga twataila ukuti lyonsi Yeova alatupeela vino tukulondekwa pakuti tutwalilile ukuzizimizya nu kuya acisinka kuli aliwe.d
I VYANI VINO YEOVA AKAENEKELA UKUTI TWACITA?
9. Ukulingana na Yakobo 1:6, 7, u mulandu ci uno tulinzile ukutailila ukuti Yeova alatwazwa?
9 Yeova akalonda ukuti twamutaila. (Aeb. 11:6) Insita zimwi tungayuvwa ukuti tutanga tuzizimizye intazi zino tukweti. Tungatandika nu kutwisika ndi cakuti Yeova amatwazwa. Lelo Baibo ikatwazwa ukusininkizya ukuti Leza angatupeela amaka akucimvya intazi zino tukakwata. (Masa. 18:29) Fwandi ukucila ukulatwisika, tulinzile ukupepa kuli Yeova nu kutaila ukuti amaasuka mapepo itu.—Belengini Yakobo 1:6, 7.
10. Langililini vino tungacita ivintu ukulingana na vino tukupepelapo.
10 Yeova akalonda twacita ivintu ukulingana na vino tukupepelapo. Wakwe, umwina angalenga Yeova kuti amwazwe ukupoka ulusa uku ncito pakuti akazanwe uku ukongano. Uzye Yeova angasuka uli ipepo lyakwe? Limwi angazwa umwina ukuya umusipe pakuti akalande na yano yamwingizya incito. Nomba umwina angalondekwa ukuya mukulenga ulusa kuli yano yamwingizya incito. Limwi angalondekwa ukucita vivyo imiku ingi. Angalenga ukuti umuomvi muze akamuombele uwanda uno atalayapo. Nanti ukukanapoka amalipilo ya pa wanda kwene uwo.
11. U mulandu ci uno tulinzile ukupepela lyonsi pa vintu ivikutusakamika?
11 Yeova akalonda ukuti twapepa lyonsi pali vino vikutusakamika. (1 Tesa. 5:17) Wakwe vino Yesu walanzile, asi lyonsi lino tungapeelwa vyonsi vino twalenga papo kwene sile. (Luka 11:9) Fwandi mutalinzile ukutoovoka. Mwapepa lyonsi ukufuma pansi ya mwenzo. (Luka 18:1-7) Ndi cakuti twatwalilila ukupepela pali cimwi, tulalanga Yeova ukuti cino tukupepelapo icicindama sana. Tulalanga nu kuti twataila ukuti angatwazwa.
U MULANDU CI UNO INSITA ZIMWI TULINZILE UKUSENWILA VINO TUKAPEPELAPO?
12. (a) Iiuzyo ci lino tungayuzya apa mapepo itu nupya u mulandu ci? (b) Uzye tungalanga uli ukuti twacindika Yeova lino tukupepa kuli aliwe? (Lolini kambokosi akakuti “Uzye Vino Nkalenga Kuli Yeova Vikalanga Ukuti Namucindika?”)
12 Ndi cakuti vino tukupepelapo visikucitika, tungayuzya amauzyo yaa yatatu. Ilya kutandikilapo, ‘Uzye vikwene avino ndinzile ukupepelapo?’ Ilingi tukaelenganya ukuti itumanya ivingatuzipila. Nomba insita zimwi tungapepela pa vintu ivitanga vitwazwe pa nsita itali. Insita zimwi tungapepela apa nzila yakumalilamo intazi imwi ala kuli ni nzila yuze isuma ino intazi iyo ingasililamo. Nupya insita zimwi vino tukupepelapo vingapusana nu kulonda kwakwe Leza. (1 Yoa. 5:14) Wakwe, elenganyini pa yavyazi yano itulandapo. Yapepanga ukuti Yeova akazwe umwana wao ukutwalilila ukuya umu cumi. Yalolanga kwati ukucita vii kwali sile ningo. Nomba, Yeova asipatikizya ali wensi ukumuombela. Akalonda swensi kwene, kumwi sile na ana, twaisoolwela ukumupepa. (Malan. 10:12, 13; 30:19, 20) Fwandi avyazi yaa yalinzile ukulenga Yeova ukuti ayazwe ukwazwa umwana wao ukutemwa Yeova nu kuya cuza wakwe.—Mapi. 22:6; Efes. 6:4.
13. Ukulingana na Aebele 4:16, a lilaci lino Yeova angatwazwa? Londololini.
13 Iuzyo lyakwe cili ilyakuti, ‘uzye ikwene ali nsita isuma iyakuti Yeova aasuke ipepo lyane?’ Insita zimwi tungalola kwati Yeova alinzile ukwasuka ipepo litu papo kwene sile. Lelo Yeova wamanya insita isuma iyakwasukilapo amapepo itu. (Belengini Aebele 4:16.) Ndi cakuti tutapokelile vino twalenga papo kwene, tungatandika ukwelenganya ukuti Yeova watakana ukwasuka ipepo litu. Nomba limwi ala insita iyakuti atucitile vino tukulonda itatala yafika. Wakwe elenganyini pa mwina uwacance uwapepanga kuli Yeova ukuti amupozye ulwale uwipisye. Ndi cakuti Yeova apozya umwina wii umu cizungusyo, Satana nga watandike ukulanda ukuti umwina wii watwalilile ukuombela Yeova pa mulandu wakuti Yeova wamupozizye. (Yobo 1:9-11; 2:4) Ukulunda pali cii, Yeova wikako insita ilinge lino alafumyapo ukulwala konsi. (Eza. 33:24; Kuso. 21:3, 4) Pali ino nsita tutalinzile ukulaelenganya ukuti Yeova angatupozya umu cizungusyo. Fwandi umwina wii walondekwanga ukulenga amaka nu mutende wa mumelenganyo ukufuma kuli Yeova pakuti atwalilile ukuzizimizya lino akulwala alino nu kutwalilila ukuombela Yeova na ucisinka.—Masa. 29:11.
14. I vyani vino tukusambilila kuli vino vyacitikile ya Janice?
14 Elenganyini pali ya Janice yano itulandapo, apepanga ukuti yakaombeleko pa Betele. Papisile imyaka 5 pakuti yamanye vino Yeova waswike ipepo lyao. Yalanzile ukuti: “Yeova waomvizye insita iya uku kunsambilizya alino nu kungazwa ukuya Umwina Klistu umusuma. Nalondekwanga ukuya nu utailo ukome muli aliwe. Nalondekwanga nu kutandika ukulaisambilizya ningo Baibo. Alino nu kusambilila ukuti ningaya ni nsansa lino nkuombela Yeova asi mulandu ni ntazi zino ningakwata.” Pa cisila, ya Janice na ya iya yatandike ukuomba umulimo wakutandalila ivilongano. Lino ya Janice yiwisye ivyayacitikilanga yalanzile iyati: “Yeova wasukanga amapepo yane umu nzila ino ntenekelanga. Papisile insita pakuti imanye vino Yeova wasukanga amapepo yane, nomba nkataizya sana pali vino wandanga ukutemwa ni cikuuku.”
Ndi cakuti mwalola ukuti Yeova asikwasuka ipepo linu, mwapepela pali vyuze (Lolini palaglafu 15)f
15. U mulandu ci uno tulinzile ukulapepela apa vintu ivingi? (Loliniko ni vikope.)
15 Iuzyo lwakwe citatu ilyakuti, ‘Uzye ndinzile ukutandika ukupepela pali vyuze?’ Nanti icakuti caya sile ningo ukupepa ipepo ilya mu kulungatika, insita zimwi tungapepela apa vintu ivingi. Elenganyini pali nkazi wino itulandapo apa kutandika, aakapepa ukuti akazanweko ukwi Sukulu Lyakwe ya Kakosoola ya Wene. Nkazi wii akulonda akazanwe ukwisulu lii, pakuti akaombeleko kuno ya kasimikila yacepa. Lino akuloleela ukuti yakamwame, aangalenga Yeova ukuti amwazwe ukulola vino angalundulula imiombele yakwe. (Mili. 16:9, 10) Pa cisila cakupepa, anguzya umwangalizi wa ciputulwa nga kuli icilongano icili umupipi icikulondekwa ya painiya. Nanti ukulemba ukwi ofesi ukuuzya uku kulondekwa yakasimikila.e
16. I vyani vino tungasininkizya?
16 Wakwe vino itusambilila, tungasininkizya ukuti Yeova akalanga ukutemwa nu mulinganya lino akwasuka amapepo itu. (Masa. 4:3; Eza. 30:18) Insita zimwi atanga aasuke ukulingana na vino tukwenekela. Nomba Yeova lyonsi alaasuka amapepo itu. Watutemwa sana. Nupya atalatala atutazyele. (Masa. 9:10) Fwandi twalililini ‘lyonsi sile ukutaila,’ muli aliwe nupya mwamunena vyonsi ivikumucuzya ukupitila umwi pepo.—Masa. 62:8.
LWIMBO NA. 43 Ipepo Lya Kutaizya
a Umu cipande cii tumasambilila vino Yeova akalanga ukutemwa nu mulinganya lino akwasuka amapepo itu.
b Asi mazina yao acumi cumi.
c Lolini icipande icakuti “Uzye Mwataila Ukuti Lyonsi Yeova Akacita Ivintu Ivyampomvu?” umu Lupungu Lwa Mulinzi lwakwe Febuluwale 2022, mapa. 3-6.
d Pakuti mulole vino Yeova akatwazwa ukuzizimizya intazi, yangini pa jw.org mutambe vidyo iyakuti; Ipepo Likatwazwa Ukuzizimizya.
e Pakuti mumanye vino mungacita pakuti mukaombele uku mpanga yuze kuno yakasimikila yacepa, lolini ibuku lyakuti Aiteyanya Ukucita Ukulonda Kwakwe Yeova (od), icipa. 10, mapa. 6-9 umu Ciyemba nanti Iciswahili
f ULONDOLOZI WA CIKOPE: Ya nkazi yaili yakupepa lino yatatala yatandika ukulemba fomu wakuila ukwi Sukulu Lyakwe ya Kakosoola ya Wene. Wenga yamwama umuze wene foo. Wino yatamile, atatoovwike pa mulandu wakuti yatamwamile lelo wasoololapo ukupepa kuli Yeova pa kuti amwazwe ukuzana inzila yuze ino angalundulwilamo imiombele yakwe. Wasoololapo ukulemba kalata ukwi ofesi pakuti angaombelako uku kulondekwa ya kasimikila.