തിരമാ​ല​കൾക്ക​ടി​യി​ലുള്ള ലോകം സുരക്ഷി​ത​മാ​യി പര്യ​വേ​ക്ഷണം ചെയ്യൽ

ഓസ്‌ട്രേലിയായിലെ ഉണരുക! ലേഖകൻ

താരത​മ്യേന ചുരുക്കം ചിലർ മാത്രം നേരിട്ടു കണ്ടിട്ടുള്ള വിസ്‌മ​യി​പ്പി​ക്കുന്ന ഒരു ലോക​മുണ്ട്‌. അതു സമു​ദ്രോ​പ​രി​ത​ല​ത്തി​നു തൊട്ട​ടി​യിൽ സ്ഥിതി​ചെ​യ്യു​ന്നു. അതു തിരമാ​ല​കൾക്ക​ടി​യിൽ നിങ്ങൾ വന്നു നിരീ​ക്ഷി​ച്ച​റി​യാൻ ഒരുങ്ങി​നിൽക്കുന്ന ലോക​മാണ്‌. ‘അത്തരം ഒരു യാത്ര എത്ര സുരക്ഷി​ത​മാണ്‌?’ എന്നു നിങ്ങൾ ചോദി​ച്ചേ​ക്കാം. ‘എനിക്കു വെള്ളത്തി​ന​ടി​യി​ലുള്ള ഈ വിസ്‌മ​യി​പ്പി​ക്കുന്ന ലോകം സന്ദർശി​ക്കാൻ കഴിയു​ന്ന​തി​നു മുമ്പു ഞാൻ വിദഗ്‌ധ​നായ ഒരു നീന്തൽക്കാ​രൻ ആകേണ്ട​തു​ണ്ടോ? എനിക്ക്‌ ഒട്ടും നീന്താൻ കഴിയി​ല്ലെ​ങ്കിൽ എന്നെ ഒഴിവാ​ക്കു​മോ?’

പര്യ​വേ​ക്ഷ​ണ​ത്തി​നുള്ള രണ്ടു വിധങ്ങൾ

വെള്ളത്തി​ന​ടി​യി​ലുള്ള ലോകം പര്യ​വേ​ക്ഷണം ചെയ്യു​ന്ന​തി​നു രണ്ട്‌ അടിസ്ഥാന രീതികൾ പ്രചാ​ര​ത്തി​ലുണ്ട്‌—സ്‌നോർകെ​ലിം​ങ്ങും സ്‌കൂബാ ഡൈവി​ങ്ങും.a

ഒരു നീന്തൽക്കാ​രൻ വെള്ളത്തിൽ മുഖം മുക്കി ജലോ​പ​രി​ത​ല​ത്തിൽ നീന്തു​മ്പോൾ അയാളു​ടെ വായിൽ ചേർന്നി​രി​ക്കു​ന്ന​തും മറ്റേ അറ്റം വെള്ളത്തി​നു മുകളിൽ പൊങ്ങി​നിൽക്കു​ന്ന​തു​മായ ഒരു വളഞ്ഞ കുഴൽ ഉൾപ്പെട്ട ഒരു ഉപകര​ണ​മാ​ണു സ്‌നോർകെൽ. അതു നീന്തൽക്കാ​രൻ ശ്വാസ​മെ​ടു​ക്കാൻ തല വെള്ളത്തി​നു മുകളിൽ ഉയർത്താ​തെ ശ്വസി​ക്കുക സാധ്യ​മാ​ക്കു​ന്നു. ഒരു മുഖം​മൂ​ടി അയാളു​ടെ കണ്ണുകളെ സംരക്ഷി​ക്കു​ന്നു.

നേരേ​മ​റിച്ച്‌, സ്‌കൂബാ ഒരു ശ്വസ​നോ​പ​ക​ര​ണ​ത്തോ​ടു ബന്ധിപ്പിച്ച വായു നിറച്ച സിലി​ണ്ട​റോ സിലി​ണ്ട​റു​ക​ളോ അടങ്ങുന്ന ഒരു സജ്ജീക​ര​ണത്തെ പരാമർശി​ക്കു​ന്നു. അതു​കൊണ്ട്‌ സ്‌കൂബാ ഡൈവിങ്ങ്‌ ഉപരി​ത​ല​ത്തി​നു വളരെ അടിയി​ലേക്കു പോകാൻ താത്‌പ​ര്യ​മു​ള്ള​വർക്കു​വേ​ണ്ടി​യുള്ള​താണ്‌. അതു കൂടുതൽ സങ്കീർണ​വും ചെലവു​കൂ​ടി​യ​തു​മാണ്‌.

ഏറെ ലളിത​വും ചെലവു കുറഞ്ഞ​തു​മായ സ്‌നോർകെ​ലിങ്‌ വിനോ​ദം ഉപരി​ത​ല​ത്തിൽനി​ന്നു​പോ​ലും വെള്ളത്തി​ന​ടി​യി​ലുള്ള ലോക​ത്തി​ലെ കൗതു​കങ്ങൾ കാണാൻ നിങ്ങളെ പ്രാപ്‌ത​രാ​ക്കും. ഉത്സാഹി​യായ ഒരു സ്‌നോർകെലർ അയാളു​ടെ ആദ്യ അനുഭവം വിവരി​ക്കു​ന്നത്‌ ഇങ്ങനെ​യാണ്‌: “ഞാൻ 14 വയസ്സുള്ള ഒരു കുട്ടി​യാ​യി​രു​ന്ന​പ്പോൾ, ആയിര​ക്ക​ണ​ക്കി​നു ചെറു​മ​ത്സ്യ​ങ്ങ​ളു​ടെ ഒരു കൂട്ടത്തി​ലൂ​ടെ ആദ്യമാ​യി സ്‌നോർകെൽ ചെയ്‌തത്‌ ഞാൻ ഇപ്പോ​ഴും വ്യക്തമാ​യി ഓർക്കു​ന്നു. ഞാൻ ഇഴഞ്ഞു നീങ്ങി​യ​പ്പോൾ മത്സ്യം ജീവനുള്ള ഒരു തുരങ്കം എനിക്കു​വേണ്ടി നിർമി​ക്കു​ന്ന​തു​പോ​ലെ തോന്നി. അവയുടെ തിളങ്ങുന്ന ശരീരങ്ങൾ മനോ​ഹ​ര​മായ ഒരു ദൃശ്യം സൃഷ്ടി​ച്ചു​കൊണ്ട്‌ സൂര്യ​പ്ര​കാ​ശം പ്രതി​ഫ​ലി​പ്പി​ച്ചു. ഞാൻ ഹർഷോ​ന്മാ​ദ​ത്തി​ലാ​യി. അങ്ങനെ സ്‌നോർകെ​ലി​നോട്‌ ഒരു ആജീവ​നാന്ത പ്രണയ​ബന്ധം തുടങ്ങി.”

എന്നാൽ അതു യഥാർഥ​ത്തിൽ സുരക്ഷി​ത​മാ​ണോ?

ഇരുപ​തി​ല​ധി​കം വർഷം സുരക്ഷി​ത​മാ​യി സ്‌നോർകെ​ലിങ്‌ ആസ്വദിച്ച ഒരു അത്യാ​സക്തൻ, തീര​ത്തേക്കു കാർ ഓടിച്ചു ചെല്ലു​ന്ന​താണ്‌ ഏറ്റവും അപകടം​പി​ടിച്ച സംഗതി എന്ന്‌ അഭി​പ്രാ​യ​പ്പെ​ടു​ന്നു! വെള്ളത്തിൽ ആയിരി​ക്കു​മ്പോൾ സുരക്ഷി​ത​ത്വം ആശ്രയി​ച്ചി​രി​ക്കു​ന്നതു പ്രവർത്ത​ന​ത്തെ​ക്കാ​ള​ധി​കം വ്യക്തി​യെ​യാണ്‌. നിങ്ങൾ വിദഗ്‌ധ​നായ ഒരു നീന്തൽക്കാ​ര​ന​ല്ലെ​ങ്കിൽ ശാന്തവും ആഴക്കു​റ​വു​ള്ള​തു​മായ വെള്ളത്തി​ല​ല്ലാ​തെ തുനി​ഞ്ഞി​റ​ങ്ങ​രുത്‌, നിങ്ങൾക്കു നിലയി​ല്ലാ​ത്ത​ട​ത്തേക്ക്‌ ഒരിക്ക​ലും പോക​യു​മ​രുത്‌. വാസ്‌ത​വ​ത്തിൽ, ഒരു മീറ്റർ ആഴമുള്ള വെള്ളത്തിൽപോ​ലും വളരെ​യ​ധി​കം കാണാ​നു​ണ്ടാ​കും. നിങ്ങൾ വൈദ​ഗ്‌ധ്യ​വും ആത്മവി​ശ്വാ​സ​വും നേടി​ക്ക​ഴി​യു​മ്പോൾ, കൂടുതൽ ആഴമുള്ള വെള്ളത്തി​ലേക്കു നിങ്ങൾക്കു സുരക്ഷി​ത​മാ​യി നീങ്ങാൻ കഴിയും. എന്നാൽ അപ്പോൾപ്പോ​ലും പ്രാപ്‌ത​നായ ഒരു ചങ്ങാതി എപ്പോ​ഴും നിങ്ങ​ളോ​ടൊ​പ്പം ഉണ്ടായി​രി​ക്കണം. പരിച​യ​സ​മ്പ​ന്ന​രായ മിക്ക ഡൈവർമാ​രും തീരത്തു​നിന്ന്‌ അകലേ​ക്കോ ആഴമുള്ള വെള്ളത്തി​ലേ​ക്കോ ഒരിക്ക​ലും ഒറ്റക്കു പോകു​ക​യി​ല്ലെന്നു നിർണ​യി​ക്കു​ന്നു. സുരക്ഷി​തത്വ സംഗതി​ക്കു പുറമേ, ഒരു ചങ്ങാതി​യു​മൊ​ത്തു സ്‌നോർകെ​ലിങ്‌ അനുഭവം പങ്കിടു​ന്നതു കൂടുതൽ വിശ്ര​മ​ദാ​യ​ക​വും ആസ്വാ​ദ്യ​വു​മാണ്‌.

വെള്ളത്തിൽ മുങ്ങി​ക്കി​ട​ന്നു​കൊ​ണ്ടു സ്‌നോർകെ​ലി​ലൂ​ടെ ശ്വസി​ക്കു​ന്ന​തിന്‌ അൽപ്പം പരിചയം വേണ​മെ​ന്നു​ള്ളതു ശരിതന്നെ. എന്നാൽ നിങ്ങൾ സ്ഥിരപ​രി​ശ്രമം ചെയ്യു​ന്നെ​ങ്കിൽ അതു യഥാർഥ​ത്തിൽ പ്രയാ​സ​ക​ര​മ​ല്ലെന്നു നിങ്ങൾ കണ്ടെത്തും. ചില തുടക്ക​ക്കാർ ഒരു നീന്തൽക്കു​ള​ത്തി​ലോ കടൽതീ​രത്തു തിരക​ളി​ല്ലാത്ത ആഴംകു​റഞ്ഞ ഭാഗങ്ങ​ളി​ലോ പരിച​യി​ക്കു​ന്നു. ചിലർ ഒരു സ്‌നാ​ന​ത്തൊ​ട്ടി​യിൽപ്പോ​ലും പരിച​യി​ക്കു​ന്നു.

നിങ്ങൾക്ക്‌ ആവശ്യ​മുള്ള സജ്ജീക​ര​ണം

സ്‌നോർകെ​ലി​ങ്ങിന്‌ ആവശ്യ​മുള്ള സജ്ജീക​രണം താരത​മ്യേന ലളിത​വും ചെലവു കുറഞ്ഞ​തും ആണ്‌. ഒരു മുഖം​മൂ​ടി​യും രണ്ടു ഡൈവിങ്‌ ചിറകു​ക​ളും സ്‌നോർകെൽ തന്നെയും. തണുപ്പു​കാ​ല​ത്തോ കൂടുതൽ തണുപ്പുള്ള വെള്ളത്തി​ലോ സ്‌നോർകെൽ നടത്താൻ നിങ്ങൾ പദ്ധതി​യി​ടു​ന്നെ​ങ്കിൽ തണുപ്പി​നെ ചെറു​ക്കുന്ന ഒരു ഉടുപ്പു നിങ്ങൾക്ക്‌ ആവശ്യ​മാ​യി വന്നേക്കാം, ഇതു ചെലവു ഗണ്യമാ​യി വർധി​പ്പി​ക്കും. തുടങ്ങാൻ ആവശ്യ​മായ മൂന്ന്‌ അടിസ്ഥാന ഇനങ്ങൾ മാത്രം നമുക്കു പരിചി​ന്തി​ക്കാം.

മുഖം​മൂ​ടി നന്നായി ചേർന്നി​രി​ക്കു​ന്ന​തും വെള്ളം അരിച്ചു​ക​യ​റാ​ത്ത​തും സുഖക​ര​വും ആയിരി​ക്കണം. മുഖം​മൂ​ടി​ക്കു വെളി​യി​ലൂ​ടെ മൂക്കു ഞെക്കി​പ്പി​ടി​ക്കാൻ കഴിയുന്ന ഒരു സംവി​ധാ​ന​വും അതിനു​ണ്ടാ​യി​രി​ക്കണം. അതിന്റെ കാരണം പിന്നീടു വിശദീ​ക​രി​ക്കു​ന്ന​താണ്‌. മുഖം​മൂ​ടിക്ക്‌ ഒരു നല്ല ദൃഷ്ടി​ക്ഷേ​ത്രം ഉണ്ടായി​രി​ക്കണം. അകത്തുള്ള വായു​വി​ന്റെ അളവ്‌ ഏറ്റവും കുറച്ചു​കൊണ്ട്‌ സ്‌ഫടി​കം മുഖ​ത്തോ​ടു ചേർന്നി​രി​ക്കു​ന്ന​തും ആയിരി​ക്കണം. ഏറ്റവും സുഖക​ര​മായ മുഖം​മൂ​ടി​കൾ സിലി​ക്കോൺകൊ​ണ്ടു നിർമി​ച്ച​വ​യാണ്‌. ഹ്രസ്വ​ദൃ​ഷ്ടി​യുള്ള ആളുകൾക്കു കാഴ്‌ച​ശക്തി ശരി​പ്പെ​ടു​ത്തിയ മുഖം​മൂ​ടി​കൾപോ​ലും ഇന്നു ലഭ്യമാണ്‌.

അടുത്ത​താ​യി ചിറകു​ക​ളാണ്‌, ഓരോ കാലി​നും ഒന്നു വീതം. സാധാ​ര​ണ​ഗ​തി​യിൽ അവ റബ്ബർകൊ​ണ്ടു നിർമി​ച്ച​തും നീന്തലിൽ വേഗത കിട്ടാൻ കാലിൽ ധരിക്കു​ന്ന​തു​മായ തുഴ​പോ​ലുള്ള ഉപകര​ണ​ങ്ങ​ളാണ്‌. തിര​ഞ്ഞെ​ടു​ക്കാൻ രണ്ടു തരമുണ്ട്‌: കാലിൽ മൊത്തം അണിയു​ന്ന​തും കണങ്കാ​ലിൽ പിടി​പ്പി​ക്കു​ന്ന​തും. ആഴമുള്ള വെള്ളത്തിൽ എത്തുന്ന​തി​നു മുമ്പു മുരിങ്ങു പറ്റിപ്പി​ടി​ച്ചി​രി​ക്കുന്ന പാറയി​ലൂ​ടെ​യോ പവിഴ​പ്പു​റ്റു​ക​ളി​ലൂ​ടെ​യോ നടക്കാൻ നിങ്ങൾക്കു പാദര​ക്ഷകൾ ആവശ്യ​മാ​ണെ​ങ്കിൽ, അപ്പോൾ കണങ്കാ​ലിൽ പിടി​പ്പി​ക്കു​ന്ന​ത​ര​മാണ്‌ ആവശ്യം. ഇതു ചിറകു​കൾ നിങ്ങളു​ടെ പാദര​ക്ഷ​യു​ടെ മീതെ വലിച്ചിട്ട്‌ സ്‌നോർകെൽ തുടങ്ങാൻ നിങ്ങളെ പ്രാപ്‌ത​നാ​ക്കും. കാലിൽ മൊത്തം അണിയുന്ന ചിറക്‌ അതിനു​പു​റമേ മറ്റു പാദരക്ഷ ആവശ്യ​മി​ല്ലാ​ത്ത​പ്പോൾ ഉപയോ​ഗി​ക്കാൻ കഴിയും.

അവസാ​ന​മാ​യി സ്‌നോർകെൽ തന്നെയും. J-ആകൃതിയിലുള്ള സ്‌നോർകെ​ലാണ്‌ ഉത്തമം, വിശേ​ഷിച്ച്‌ തുടക്ക​ക്കാർക്ക്‌. കാരണം, ഏറ്റവും പ്രധാ​ന​പ്പെട്ട സംഗതി ശ്വസി​ക്കാ​നുള്ള എളുപ്പ​മാണ്‌. ദ്വാര​ത്തിന്‌ 2 സെൻറി​മീ​റ്റ​റെ​ങ്കി​ലും വ്യാസ​മു​ള്ള​തും 30-35 സെന്റീ​മീ​റ്റർ നീളമു​ള്ള​തു​മാണ്‌ ഏറ്റവും യോജി​ച്ച​തെന്നു ഡൈവിങ്‌ സംബന്ധിച്ച ഒരു ചെറു​പു​സ്‌തകം അഭി​പ്രാ​യ​പ്പെ​ടു​ന്നു.

ഒരു സ്‌നോർകെൽ ഉപയോ​ഗി​ക്കു​ന്ന​തി​നു സഹായ​ക​ര​മായ സൂചനകൾ

മുമ്പു വിശദീ​ക​രി​ച്ച​തു​പോ​ലെ, ജലോ​പ​രി​ത​ല​ത്തിൽ മുങ്ങി നീന്തു​മ്പോൾ തല ഉയർത്താ​തെ ശ്വസി​ക്കാൻ സ്‌നോർകെൽ നിങ്ങളെ സഹായി​ക്കു​ന്നു. ഉപരി​ത​ല​ത്തി​ന​ടി​യി​ലേക്കു നീർക്കാ​ങ്കു​ഴി​യി​ടു​മ്പോൾ എന്ത്‌? അതിനും കഴിയും, എന്നാൽ നിങ്ങൾ ആദ്യം ഒരു ദീർഘ​ശ്വാ​സം എടുക്കേണ്ട ആവശ്യ​മുണ്ട്‌. സ്‌നോർകെൽ ഉപരി​ത​ല​ത്തി​ന​ടി​യി​ലേക്കു താഴു​മ്പോൾ അതിൽ വെള്ളം കയറു​മെ​ന്നതു ശരിതന്നെ. ഒരു മുങ്ങൽകാ​രൻ ഉപരി​ത​ല​ത്തി​ലേക്കു വരു​മ്പോൾ അയാളു​ടെ സ്‌നോർകെ​ലിൽനി​ന്നു വെള്ളം പുറന്ത​ള്ളു​ന്നതു നിങ്ങൾ കണ്ടിട്ടു​ണ്ടാ​യി​രി​ക്കാം. ഇതിനെ വെള്ളം പുറന്ത​ള്ളു​ന്ന​തി​നുള്ള ഊത്തു​രീ​തി എന്നു വിളി​ക്കു​ന്നു. അതു പഠിക്കാൻ വളരെ എളുപ്പ​മാ​ണെ​ങ്കി​ലും അതിനു ശക്തമായ ഉച്ഛ്വാ​സ​വാ​യു ആവശ്യ​മാണ്‌. അതു​കൊണ്ട്‌ നിങ്ങളു​ടെ സ്‌നോർകെൽ വിജയ​ക​ര​മാ​യി ജലവി​മു​ക്ത​മാ​ക്കു​ന്ന​തി​നു നിങ്ങളു​ടെ ശ്വാസ​കോ​ശ​ങ്ങ​ളിൽ വേണ്ടു​വോ​ളം വായു​വു​മാ​യി നിങ്ങൾ മുകളി​ലേക്കു വരണം.

ചിലർ തള്ളൽരീ​തി കൂടുതൽ മെച്ചമാ​യി കണക്കാ​ക്കു​ന്നു, എന്നാൽ അതിനു കുറച്ചു​കൂ​ടെ പരിചയം ആവശ്യ​മാണ്‌. ഈ രീതി എങ്ങനെ​യാ​ണു പ്രവർത്തി​ക്കു​ന്നത്‌? നീർക്കാ​ങ്കു​ഴി​യി​ട​ലി​നു​ശേഷം നിങ്ങൾ ഉപരി​ത​ല​ത്തി​ലേക്കു വരു​മ്പോൾ മുഖം മുകളി​ലേ​ക്കാ​ക്കുക; നിങ്ങളു​ടെ സ്‌നോർകെ​ലി​ന്റെ അഗ്രം ഇപ്പോൾ അല്‌പം കീഴോ​ട്ടാ​കും. നിങ്ങളു​ടെ തല ഈ നിലയിൽ പിടി​ച്ചു​കൊണ്ട്‌ സ്‌നോർകെ​ലിൽ നിറഞ്ഞി​രി​ക്കുന്ന വെള്ളം പുറന്ത​ള്ളാൻ ചെറി​യൊ​ര​ളവ്‌ ഉച്ഛ്വാ​സ​വാ​യു മാത്രം മതി. നിങ്ങളു​ടെ മുഖം ഉപരി​ത​ല​ത്തി​നു മുകളിൽ വരാറാ​കു​ന്ന​തു​വരെ നിങ്ങളു​ടെ തല ഈ നിലയിൽ നിർത്തുക. നിങ്ങളു​ടെ മുഖം കീഴോ​ട്ടാ​ക്കു​ക​യും ഉച്ഛ്വസി​ക്കു​ക​യും ചെയ്യുക. സ്‌നോർകെൽ ജലവി​മു​ക്ത​മാ​യി​ത്തന്നെ നിലനിൽക്കും. ആയാസം കൂടാതെ ശ്വസി​ക്കാൻ കഴിയു​മെന്നു നിങ്ങൾ കണ്ടെത്തു​ക​യും ചെയ്യും.

നിങ്ങൾ ഉപരി​ത​ല​ത്തി​ലാ​യി​രി​ക്കെ​പോ​ലും കടന്നു​പോ​കുന്ന ഒരു തിരമാ​ല​യിൽനിന്ന്‌ ഇടയ്‌ക്കി​ടെ സ്‌നോർകെ​ലിൽ വെള്ളം കയറി​യാൽ പരി​ഭ്ര​മി​ക്ക​രുത്‌. അതു സംഭവി​ച്ചാൽ, ശക്തമായി ഒന്ന്‌ ഊതുക, സ്‌നോർകെ​ലിൽനിന്ന്‌ വെള്ള​മെ​ല്ലാം പുറത്തു​പോ​കും.

നിങ്ങളു​ടെ സ്‌നോർകെ​ലിങ്‌ ആസ്വദി​ക്കു​ക

ഉപരി​ത​ല​ത്തി​ലാ​യി​രി​ക്കെ നിഷ്‌ഠ​യോ​ടെ ശ്വസി​ക്കാൻ പഠിക്കുക—ദീർഘ​ശ്വാ​സം എടുക്കുക, ശക്തമായി ഉച്ഛ്വസി​ക്കുക. നിങ്ങളു​ടെ ശ്വാസ​കോ​ശ​ങ്ങൾക്ക്‌ അതിന്റെ പ്രയോ​ജനം അനുഭ​വ​പ്പെ​ടും. ആസ്വാ​ദ്യ​മായ സ്‌നോർകെ​ലി​ങ്ങി​ന്റെ രഹസ്യം നിങ്ങൾ എത്ര വേഗത്തിൽ നീന്തുന്നു എന്നതല്ല, നിങ്ങൾ പോകു​മ്പോൾ എത്രമാ​ത്രം കാണു​ക​യും നിരീ​ക്ഷി​ക്കു​ക​യും ചെയ്യുന്നു എന്നതാ​ണെന്ന്‌ ഓർക്കുക. നിങ്ങൾ അടിയി​ലേക്കു നീർക്കാ​ങ്കു​ഴി​യി​ടാൻ ആഗ്രഹി​ക്കു​മ്പോൾ വിശ്ര​മി​ക്കാ​നും കഴിവ​തും ഓക്‌സി​ജൻ പിടി​ച്ചു​നിർത്താ​നും പഠിക്കുക, കാരണം അപ്പോൾ നിങ്ങൾക്കു ദീർഘ​സ​മയം അടിയിൽ തങ്ങാൻ കഴിയും. എന്നാൽ മുങ്ങി​ക്കി​ട​ക്കു​ന്ന​തിൽ റിക്കാർഡ്‌ സ്ഥാപി​ക്കാൻ ശ്രമി​ക്ക​രുത്‌!

നിങ്ങൾ ഒഴുകി നീങ്ങു​മ്പോൾ, നിങ്ങളു​ടെ കൈകൾ വിരിഞ്ഞു കിടക്കട്ടെ. മുട്ടുകൾ അല്‌പം വളച്ച്‌ സാവധാ​നം നിഷ്‌ഠ​യോ​ടെ തുഴയു​ന്ന​തി​നു നിങ്ങളു​ടെ ചിറകു​കൾ മാത്രം ഉപയോ​ഗി​ക്കുക. ആദ്യം ആയാസം​കൂ​ടാ​തെ സാവധാ​നം ഇതു ചെയ്യു​ന്ന​തിന്‌ ഏകാഗ്രത വേണ്ടി​വ​രും, എങ്കിലും കുറച്ചു​ക​ഴി​യു​മ്പോൾ അതു യാന്ത്രി​ക​മാ​യി​ത്തീ​രും. എന്നാൽ നിങ്ങളു​ടെ മുഖം​മൂ​ടി അവ്യക്ത​മാ​കു​ന്നെ​ങ്കിൽ എന്തു ചെയ്യണം? ഇതു തടയു​ന്ന​തി​നുള്ള ഒരു ലളിത​മായ മാർഗം മൂടി ധരിക്കു​ന്ന​തി​നു മുമ്പു സ്‌ഫടി​ക​ത്തിൽ അല്‌പം ഉമിനീർ പുരട്ടുക എന്നതാണ്‌. ഒന്നോ രണ്ടോ നിമി​ഷ​ത്തി​നു​ശേഷം അതു കഴുകി​ക്ക​ള​യുക, ദീർഘ​സ​മ​യ​ത്തേക്കു സ്‌ഫടി​കം തെളി​ഞ്ഞു​നിൽക്കു​ന്ന​താ​യി നിങ്ങൾ കണ്ടെത്തും.

നീർക്കാ​ങ്കു​ഴി​യി​ടു​മ്പോൾ ചില​പ്പോൾ നിങ്ങളു​ടെ ചെവി​ക്ക​കത്ത്‌ വേദന അനുഭ​വ​പ്പെ​ട്ടേ​ക്കാം. ഇതിനെ കർണമർദനം എന്നു വിളി​ക്കു​ന്നു. കർണപ​ട​ത്തിൽ ഉണ്ടാകുന്ന മർദവ്യ​ത്യാ​സ​മാണ്‌ ഇതിനു കാരണം. ഒന്നോ രണ്ടോ മീറ്റർ താഴ്‌ച​യിൽ എത്തു​മ്പോൾ സാധാ​ര​ണ​മാ​യി അതു തുടങ്ങു​ന്നു. അതു മാറി​ക്കൊ​ള്ളും എന്നു കരുതി വേദന അവഗണിച്ച്‌ വീണ്ടും താഴരുത്‌. നിങ്ങൾ കൂടുതൽ ആഴത്തി​ലേക്കു പോകു​മ്പോൾ അതു വഷളാ​കും, നിങ്ങളു​ടെ കർണപടം പൊട്ടി​പ്പോ​വു​ക​പോ​ലും ചെയ്‌തേ​ക്കാം. ഓരോ മീറ്റർ പിന്നി​ടു​മ്പോ​ഴും അതിൽ കുറഞ്ഞാ​ലും കുഴപ്പ​മില്ല, വേദന തുടങ്ങു​ന്ന​തി​നു​മു​മ്പു സമ്മർദം സമതോ​ലനം ചെയ്യാൻ മുങ്ങലു​കാ​രു​ടെ ആനുകാ​ലിക പ്രസി​ദ്ധീ​ക​ര​ണ​മായ പെയ്‌ഡി ഡൈവർ മാനുവൽ ശുപാർശ ചെയ്യുന്നു. നിങ്ങളു​ടെ മൂക്കു ഞെക്കി​പ്പി​ടി​ച്ചു മെല്ലെ ഉച്ഛ്വസി​ച്ചു​കൊണ്ട്‌ ഇതു ചെയ്യുന്നു. മുഖം​മൂ​ടി ധരിച്ചി​രി​ക്കെ​ത്തന്നെ മൂക്കു ഞെക്കാൻ കഴി​യേ​ണ്ട​തി​നു മൂടി​യിൽ ഒരു സംവി​ധാ​നം ഉണ്ടായി​രി​ക്കേ​ണ്ട​തി​ന്റെ ഉദ്ദേശ്യം ഇതാണ്‌. അനുഭ​വ​പ​രി​ച​യം​കൊണ്ട്‌ ഈ നടപടി​ക്രമം വളരെ എളുപ്പം മിക്കവാ​റും ആർജി​ത​ശീ​ലം ആയിത്തീ​രു​ന്നു. ഒരിക്കൽ വേദന തുടങ്ങി​യാൽ, മുകളി​ലേക്കു വരുന്ന​താണ്‌ ഉത്തമം. കാരണം അസ്വസ്ഥത തുടങ്ങി​യ​ശേഷം സമതോ​ല​ന​ത്തി​നുള്ള തുടർച്ച​യായ ശ്രമങ്ങൾ നിഷ്‌ഫ​ല​മാ​യി​രി​ക്കും.

ഒരു വിനോ​ദ​രൂ​പം എന്നനി​ല​യിൽ സ്‌നോർകെ​ലിങ്‌ ആരോ​ഗ്യാ​വ​ഹ​വും വിദ്യാ​ഭ്യാ​സ​പ​ര​വും ഉല്ലാസ​ക​ര​വു​മാണ്‌. മിക്കവാ​റും എല്ലാ പ്രായ​ത്തി​ലു​ള്ള​വർക്കും അതു വ്യായാ​മ​വും ശുദ്ധവാ​യു​വും സൂര്യ​പ്ര​കാ​ശ​വും ഒന്നിച്ച​നു​ഭ​വി​ക്കാ​നുള്ള ഒരു മികച്ച പ്രാ​യോ​ഗിക മാർഗ​മാണ്‌. വെള്ളത്തി​ന​ടി​യി​ലുള്ള ഏതാനും സമു​ദ്ര​ജീ​വി​ക​ളു​ടെ​യെ​ങ്കി​ലും പേരു വേർതി​രി​ച്ച​റി​യാൻ പഠിക്കു​ന്നത്‌ അതിനു ചായ്‌വു​ള്ള​വർക്കു സ്‌നോർകെ​ലിങ്‌ രസകര​വും ഉത്തേജ​ക​വു​മാ​ക്കി​ത്തീർക്കു​ന്നു. എന്നുവ​രി​കി​ലും, ഫിജി​യിൽ സ്‌നോർകെ​ലിങ്‌ നടത്തി തിരി​ച്ചെ​ത്തിയ ടോണി​യെ​പ്പോ​ലെ, മിക്കവർക്കും “പുളക​പ്ര​ദ​മായ നിറങ്ങ​ളു​ടെ മറ്റൊരു ലോക​ത്തിൽ ആയിരി​ക്കു​ന്ന​തി​ന്റെ” സാക്ഷാൽ ആനന്ദം​തന്നെ വേണ്ടു​വോ​ള​മാണ്‌. അയാളു​ടെ സ്‌നേ​ഹി​ത​യായ ലീന സമ്മതി​ച്ചു​പ​റ​യു​ന്നു: “എനിക്കു ചുറ്റും കണ്ട സൗന്ദര്യ​ത്താൽ ഞാൻ വളരെ പുളകി​ത​യാ​യി, ഞാൻ എവി​ടെ​യാ​ണെ​ന്നു​പോ​ലും മറന്നു​പോ​യി!”

സ്‌കൂബാ ഡൈവിങ്‌ സംബന്ധി​ച്ചെന്ത്‌?

നല്ല നീന്തലു​കാ​രും കൂടുതൽ ആഴത്തി​ലുള്ള അത്ഭുത​ങ്ങ​ളാൽ പ്രലോ​ഭി​ത​രും ആയവർക്ക്‌, അല്ലെങ്കിൽ വെള്ളത്തി​ന​ടി​യിൽനി​ന്നു ചിത്ര​മെ​ടു​ക്കാൻ ആഗ്രഹി​ക്കു​ന്ന​വർക്ക്‌, അടുത്ത പടി സ്‌കൂബാ ഡൈവിങ്‌ ആണ്‌. നിങ്ങൾ നല്ല ആരോ​ഗ്യ​വാ​നും നിങ്ങളു​ടെ സജ്ജീക​രണം നല്ല നിലയിൽ സൂക്ഷി​ക്കു​ന്ന​വ​നും അടിസ്ഥാന നിയമങ്ങൾ അനുസ​രി​ക്കു​ന്ന​വ​നും ആണെങ്കിൽ നിങ്ങൾക്ക്‌ ആത്മവി​ശ്വാ​സ​ത്തോ​ടെ വെള്ളത്തി​ലേക്ക്‌ ഇറങ്ങാൻ കഴിയും. എങ്കിലും, നിങ്ങൾ ആദ്യം കുറെ പാഠങ്ങൾ പഠിക്കാ​തെ​യും ആവശ്യ​മെ​ങ്കിൽ പ്രശസ്‌ത​നായ ഒരു ഗുരു​വിൽനിന്ന്‌ ഒരു ലൈസൻസ്‌ സമ്പാദി​ക്കാ​തെ​യും ഒരിക്ക​ലും സ്‌കൂബാ ഡൈവി​ങ്ങി​നു പോക​രുത്‌. അപ്പോൾപോ​ലും, നിങ്ങളു​ടെ ലൈസൻസ്‌ അനുവ​ദി​ക്കുന്ന പരിധി​വിട്ട്‌ ആഴത്തിൽ പോക​രുത്‌. എപ്പോ​ഴും ഒരു ചങ്ങാതി​യോ​ടൊ​പ്പം നീർക്കാ​ങ്കു​ഴി​യി​ടുക. ഓസ്‌​ട്രേ​ലിയ പോലുള്ള ചില രാജ്യ​ങ്ങ​ളിൽ, നിങ്ങൾ അത്തരം ഒരു ഗതി ആരംഭി​ക്കു​ന്ന​തി​നു​മു​മ്പാ​യി ഡൈവിങ്‌ ലക്ഷ്യത്തി​ലുള്ള ഒരു വൈദ്യ​പ​രി​ശോ​ധ​ന​യിൽ വിജയി​ക്ക​ണ​മെന്നു നിയമം നിഷ്‌കർഷി​ക്കു​ന്നു.

സ്‌കൂബാ സജ്ജീക​രണം വളരെ ചെലവു കൂടി​യ​താ​യി​രു​ന്നേ​ക്കാം. സ്‌നോർകെ​ലി​ങ്ങിന്‌ ഉപയോ​ഗി​ക്കുന്ന അടിസ്ഥാന സജ്ജീക​ര​ണ​ത്തി​നു—മുഖം​മൂ​ടി​യും ചിറകു​ക​ളും സ്‌നോർകെ​ലും—പുറമേ നിങ്ങൾക്കു മിക്ക​പ്പോ​ഴും തണുപ്പി​നെ ചെറു​ക്കുന്ന ഒരു ഉടുപ്പും ആവശ്യ​മാ​യി​രി​ക്കും. ചൂടുള്ള ഉഷ്‌ണ​മേ​ഖ​ല​യി​ലെ വെള്ളത്തിൽ അതു വേണ​മെ​ന്നില്ല. നിങ്ങൾക്ക്‌ ഒരു പ്ലവന-നിയന്ത്രണ ഉപകര​ണ​വും ഭാരം കെട്ടാ​നുള്ള ഒരു ബെൽറ്റും ഒരു കത്തിയും ഒരു ശ്വസ​നോ​പ​ക​ര​ണ​വും (കൂട്ടു​കാ​രനു ശ്വാസം കിട്ടാൻ പ്രയാസം നേരി​ട്ടാൽ ഉപയോ​ഗി​ക്കാൻ കഴിയുന്ന രണ്ടാമത്‌ ഒരെണ്ണ​വും) ഒരു സ്‌കൂബാ സംഭര​ണി​യും ആവശ്യ​മാ​യി​വ​രും. ഒരു ഡൈവിങ്‌ ഘടികാ​ര​വും ആഴം അളക്കാ​നുള്ള ഉപകര​ണ​വും വായു എത്രമാ​ത്രം ശേഷി​ക്കു​ന്നു​ണ്ടെ​ന്ന​റി​യാൻ നിങ്ങളു​ടെ സംഭര​ണി​ക്കു​വേണ്ടി വെള്ളത്തിൽ മുക്കാ​വുന്ന ഒരു മർദമാ​പി​നി​യും നിങ്ങളു​ടെ കൈവശം ഉണ്ടായി​രി​ക്കണം. സാധാരണ ഡൈവിങ്ങ്‌ നടക്കുന്ന മിക്ക സ്ഥാനങ്ങ​ളി​ലും ഈ സജ്ജീക​രണം വാടക​യ്‌ക്കു ലഭിക്കും. അതു നിങ്ങൾ കൂടെ​ക്കൂ​ടെ ഡൈവി​ങ്ങി​നു പോകു​ന്നി​ല്ലെ​ങ്കിൽ സ്വന്തമാ​യി വാങ്ങു​ന്ന​തി​നെ​ക്കാൾ കൂടുതൽ ആദായ​ക​ര​മെന്നു തെളി​യു​ന്നു.

സമു​ദ്ര​ത്തോ​ടും അതിലെ ജീവി​ക​ളോ​ടു​മുള്ള ആദരവ്‌

“ഞാൻ ക്വീൻസ്‌ലണ്ട്‌ സൺഷൈൻ തീരത്തെ കാലോൻഡ്രാ​യ്‌ക്ക​ടു​ത്തു പുറ്റുള്ള ഒരു ഭാഗത്ത്‌ സ്‌നോർകെൽ നടത്തു​ക​യാ​യി​രു​ന്നു, രണ്ടു മീറ്റർ അകലെ​നി​ന്നു നിറപ്പ​കി​ട്ടാർന്ന ചിത്ര​ശലഭ മത്സ്യത്തെ നിരീ​ക്ഷി​ച്ചു​കൊ​ണ്ടു​തന്നെ,” സ്‌നോർകെൽ ഭ്രമക്കാ​ര​നായ പീററർ എടുത്തു​പ​റ​യു​ന്നു. “അപ്പോൾ പെട്ടെന്ന്‌ തിളങ്ങുന്ന ഒരു സ്‌ററീൽ ശൂലം പ്രത്യ​ക്ഷ​പ്പെ​ടു​ന്നു, അത്‌ ഒരു ഭീകര ശബ്ദത്തോ​ടെ നിൽക്കു​ന്നു. ആ ചെറു മത്സ്യം രക്ഷപെ​ടാൻ ശ്രമിച്ചു, പക്ഷേ ഫലമില്ല—അതു ചെകി​ള​യി​ലൂ​ടെ പാറയി​ലേക്കു തുളച്ചു​ക​യറി. കേവലം ഉന്നം അഭ്യസി​ക്കു​ന്ന​തി​നു​വേ​ണ്ടി​യാണ്‌ താൻ ആ മനോഹര മത്സ്യത്തെ കൊന്ന​തെന്ന്‌ ഉത്തരവാ​ദി​യായ കുട്ടി സമ്മതിച്ചു! ഭക്ഷിക്കാൻ കഴിയാ​ത​വണ്ണം അതു തീരെ ചെറു​താ​യി​രു​ന്നു.” നിർഭാ​ഗ്യ​മെന്നു പറയട്ടെ, അത്തരം ചിന്താ​ശൂ​ന്യ​മായ പ്രവൃ​ത്തി​കൾ ലോക​മെ​മ്പാ​ടും വർധി​ക്കു​ക​യാണ്‌.

മലിനീ​ക​ര​ണ​വും പുറ്റു​കളെ ബാധി​ച്ചി​ട്ടുണ്ട്‌. പ്രസി​ദ്ധ​മായ സ്ഥാനങ്ങൾ മിക്ക​പ്പോ​ഴും പ്ലാസ്‌റ​റിക്‌ സഞ്ചിക​ളും ഉപയോ​ഗം കഴിഞ്ഞ പാനീയ പാത്ര​ങ്ങ​ളും​കൊ​ണ്ടു താറു​മാ​റായ ചവറ്റു​കു​ഴി​പോ​ലെ ആയിത്തീർന്നി​രി​ക്കു​ന്നു. ചില രാജ്യ​ങ്ങ​ളിൽ വിനാ​ശ​ക​ര​മായ രാസ ഉച്ഛിഷ്ടങ്ങൾ വർധി​ച്ചു​വ​രുന്ന ഒരു പ്രശ്‌നം ആയിത്തീ​രു​ക​യാണ്‌. ഉപയോ​ഗ​മി​ല്ലാത്ത വസ്‌തു​ക്ക​ളും ഉച്ഛിഷ്ട​ങ്ങ​ളും വർധി​ക്കു​മ്പോൾ മത്സ്യങ്ങൾ മറ്റെവി​ടേ​ക്കെ​ങ്കി​ലും പോകു​ന്നു, പവിഴ​പ്പു​റ്റു​കൾ നശിക്കു​ന്നു.

സ്‌കൂബാ ഡൈവിങ്‌ നടത്തു​മ്പോൾ എല്ലായ്‌പോ​ഴും കയ്യുറ ധരിക്കു​ന്നത്‌ ഒരു നല്ല ശീലമാണ്‌. അപ്പോൾപ്പോ​ലും നിങ്ങൾ എന്തിനെ സ്‌പർശി​ക്കു​ന്നു എന്നതു സംബന്ധിച്ച്‌ ജാഗ്രത പുലർത്തു​ന്നതു മൂല്യ​വ​ത്താണ്‌. ഉദാഹ​ര​ണ​ത്തിന്‌, എപ്പോ​ഴും കാണുന്ന കടൽച്ചൊ​റി​കൾ ആവരണ​മി​ല്ലാത്ത കൈക​ളിൽ തുളച്ചു​ക​യ​റാൻ പ്രാപ്‌ത​മായ സൂചി​പോ​ലുള്ള മുള്ളുകൾ നീട്ടി​ക്ക​ളി​ക്കു​ന്നു. കൂടാതെ, രമണീ​യ​മായ ചിത്ര​ശ​ല​ഭ​കോ​ഡു​കൾ ചെറു​താ​ണെ​ങ്കി​ലും അതിന്റെ ചുവന്ന​തും വെളു​ത്ത​തു​മായ തെളിഞ്ഞ വരകൾ ഗർവോ​ടെ ചലിപ്പി​ക്കു​മ്പോൾ ‘കൂടുതൽ അടുക്ക​രുത്‌. ഇതെന്റെ പ്രദേ​ശ​മാണ്‌!’ എന്ന മുന്നറി​യി​പ്പു കൊടു​ക്കു​ന്ന​താ​യി തോന്നു​ന്നു. അതിന്റെ ചിറകു​ക​ളിൽ വഞ്ചനാ​ത്മ​ക​മാ​യി ഒളിച്ചു​വെ​ച്ചി​രി​ക്കു​ന്നത്‌ വിഷ​ദ്രാ​വ​ക​ത്താൽ ആവരണം ചെയ്യപ്പെട്ട നീണ്ട മുള്ളു​ക​ളാണ്‌. വെറുതെ അവയ്‌ക്കെ​തി​രെ ഉരുമ്മി​പ്പോ​കു​ന്നതു വേദനാ​ജ​ന​ക​മാ​യി​രു​ന്നേ​ക്കാം.

മറ്റു ജീവികൾ കണ്ണുകളെ കബളി​പ്പി​ക്കു​ന്നു. ഉദാഹ​ര​ണ​ത്തിന്‌, കളകൾപോ​ലെ തോന്നി​ക്കുന്ന കടൽഡ്രാ​ഗൻ പ്രച്ഛന്ന​വേഷം കെട്ടി കബളി​പ്പി​ക്കാൻ വിദഗ്‌ധ​നാണ്‌. ഏതു മുങ്ങലു​കാ​ര​ന്റെ​യും ഔത്സു​ക്യം ഉണർത്തി​ക്കൊണ്ട്‌ അത്‌ ഒരു ചെടി​യാ​ണെന്നു തോന്നി​ക്കു​ന്നു. നേരേ​മ​റിച്ച്‌, മനോ​ഹ​ര​മായ വിശിഷ്ട വർണങ്ങ​ളുള്ള കടലൊച്ച്‌ നിങ്ങളു​ടെ ശ്രദ്ധ പിടി​ച്ചെ​ടു​ക്കും. എന്നാൽ അതു പ്രലോ​ഭി​പ്പി​ക്കുന്ന ഒരു ഭക്ഷ്യവ​സ്‌തു​വാ​ണോ? പിടി​ച്ചു​തി​ന്നു​ന്ന​വർക്ക്‌ ഉടൻ കാര്യം മനസ്സി​ലാ​കും, കാരണം അതു കുറെ അഴുക്കു രാസപ​ദാർഥങ്ങൾ ആയുധ​മാ​യി ധരിച്ചി​രി​ക്കു​ന്നു.

പ്രതി​ഫ​ല​ദാ​യ​ക​മായ അനേകം കാഴ്‌ച​കൾ

സ്‌നോർകെൽ നടത്തു​ന്ന​വർക്കാ​യാ​ലും സ്‌കൂബാ ഡൈവർക്കാ​യാ​ലും, സമുദ്രം വാസ്‌ത​വ​ത്തിൽ ജീവൻകൊ​ണ്ടു സമൃദ്ധ​മാണ്‌. പവിഴ​പ്പു​റ്റു​കൾ നിരവധി ജീവി​ക​ളു​ടെ​യും നിറങ്ങ​ളു​ടെ​യും വിശാ​ല​ദൃ​ശ്യ​മാണ്‌, അതും തീരത്തു​നിന്ന്‌ ഏതാനും തുഴമാ​ത്രം അകലെ. “നിറപ്പ​കി​ട്ടാർന്ന എല്ലാ വലിപ്പ​ത്തി​ലും ആകൃതി​യി​ലു​മുള്ള മത്സ്യങ്ങ​ളാൽ ചുറ്റ​പ്പെ​ടു​ന്ന​തി​ന്റെ, ചിലതു നിങ്ങളു​ടെ കയ്യിൽനി​ന്നു​തന്നെ ആഹാരം കൊത്തി​ത്തി​ന്നു​ന്ന​തി​ന്റെ ആനന്ദം അതുല്യ​മാണ്‌. അതു വളരെ പുളക​പ്ര​ദ​മായ ഒരനു​ഭ​വ​മാണ്‌” എന്ന്‌ ഒരു മുങ്ങലു​കാ​രൻ പറഞ്ഞു. അയാൾ കൂട്ടി​ച്ചേർത്തു: “ഭൂഗു​രു​ത്വം ഒട്ടും​തന്നെ ബാധി​ക്കാ​തെ തുഴഞ്ഞു​നി​ല്‌ക്കു​മ്പോൾ അവരിൽ ഒരാളാ​യി അവിടെ ആയിരി​ക്കു​ന്നതു തീർത്തും അവിശ്വ​സ​നീ​യ​മാണ്‌.”

അതു​കൊണ്ട്‌, സ്‌നോർകെ​ലി​ങ്ങി​നോ സ്‌കൂബാ ഡൈവി​ങ്ങി​നോ നിങ്ങൾക്ക്‌ എന്നെങ്കി​ലും അവസരം ലഭിച്ചാൽ അതു വളരെ സുരക്ഷി​ത​മാ​യി ചെയ്യാൻ കഴിയു​മെന്ന്‌ ഓർക്കുക, പരിച​യ​സ​മ്പ​ന്ന​രായ മുങ്ങലു​കാർ ശുപാർശ ചെയ്യുന്ന ലളിത​മായ മുൻക​രു​ത​ലു​കൾ നിങ്ങൾ സ്വീക​രി​ക്ക​ണ​മെ​ന്നു​മാ​ത്രം. ഒരുപക്ഷേ, ഒരുനാ​ളിൽ നിങ്ങളും തിരമാ​ല​കൾക്ക​ടി​യി​ലുള്ള ലോക​ത്തി​ന്റെ മനോ​ഹാ​രിത പര്യ​വേ​ക്ഷണം ചെയ്യുന്ന ധന്യമായ അനുഭവം ആസ്വദി​ച്ചേ​ക്കാം.

[അടിക്കു​റി​പ്പു​കൾ]

[16-ാം പേജിലെ ചിത്രം]

ബട്ടർഫ്‌ളൈ മത്സ്യം

[17-ാം പേജിലെ ചിത്രം]

ഫ്‌ളമിങ്‌ഗൊ ടങ്‌

[17-ാം പേജിലെ ചിത്രം]

നീല റ്റങ്‌

[17-ാം പേജിലെ ചിത്രം]

പവിഴപ്പുറ്റിലെ കടലൊച്ച്‌

[15-ാം പേജിലെ ചിത്ര​ത്തിന്‌ കടപ്പാട്‌]

By courtesy of Australian International Public Affairs