ജീവിത-സേവന യോഗ​ത്തി​നുള്ള പഠനസ​ഹാ​യി—പരാമർശ​ങ്ങൾ

© 2024 Watch Tower Bible and Tract Society of Pennsylvania

സെപ്‌റ്റം​ബർ 2-8

ദൈവ​വ​ച​ന​ത്തി​ലെ നിധികൾ | സങ്കീർത്തനം 79-81

യഹോ​വ​യു​ടെ മഹനീ​യ​നാ​മ​ത്തോ​ടു സ്‌നേഹം കാണി​ക്കു​ക

w17.02 9 ¶5

മോച​ന​വില—പിതാ​വി​ന്റെ ‘തികവുറ്റ സമ്മാനം’

⁵ യഹോ​വ​യു​ടെ പേരിനെ സ്‌നേ​ഹി​ക്കു​ന്നെന്നു നമുക്ക്‌ എങ്ങനെ കാണി​ക്കാ​നാ​കും? നമ്മൾ ജീവി​ക്കുന്ന വിധത്തി​ലൂ​ടെ! നമ്മൾ വിശു​ദ്ധ​രാ​യി​രി​ക്കാൻ യഹോവ ആവശ്യ​പ്പെ​ടു​ന്നു. (1 പത്രോസ്‌ 1:15, 16 വായി​ക്കുക.) യഹോ​വയെ മാത്രമേ ആരാധി​ക്കാ​വൂ എന്നും മുഴു​ഹൃ​ദ​യ​ത്തോ​ടെ യഹോ​വയെ അനുസ​രി​ക്ക​ണ​മെ​ന്നും ആണ്‌ അതിന്റെ അർഥം. ഉപദ്രവം സഹി​ക്കേ​ണ്ടി​വ​ന്നാൽപ്പോ​ലും യഹോ​വ​യു​ടെ നീതി​യുള്ള തത്ത്വങ്ങൾക്കും നിയമ​ങ്ങൾക്കും ചേർച്ച​യിൽ ജീവി​ക്കാൻ കഴിയു​ന്ന​തെ​ല്ലാം നമ്മൾ ചെയ്യും. നീതി​യുള്ള പ്രവൃ​ത്തി​ക​ളി​ലൂ​ടെ നമ്മൾ വെളിച്ചം പ്രകാ​ശി​പ്പി​ക്കു​ക​യും അങ്ങനെ യഹോ​വ​യു​ടെ പേരിനു മഹത്ത്വം കൊടു​ക്കു​ക​യും ചെയ്യുന്നു. (മത്താ. 5:14-16) വിശു​ദ്ധ​ജ​ന​മായ നമ്മൾ നമ്മുടെ ജീവി​ത​ത്തി​ലൂ​ടെ യഹോ​വ​യു​ടെ നിയമ​ങ്ങ​ളാ​ണു ശരി​യെ​ന്നും സാത്താന്റെ ആരോ​പ​ണങ്ങൾ വ്യാജ​മാ​ണെ​ന്നും തെളി​യി​ക്കു​ന്നു. എന്നാൽ നമുക്കു തെറ്റുകൾ പറ്റു​മ്പോ​ഴോ? ആത്മാർഥ​മാ​യി പശ്ചാത്ത​പി​ക്കു​ക​യും യഹോ​വ​യു​ടെ പേര്‌ കളങ്ക​പ്പെ​ടു​ത്തുന്ന പ്രവൃ​ത്തി​കൾ ഉപേക്ഷി​ക്കു​ക​യും ചെയ്യും.—സങ്കീ. 79:9.

ijwbv 3 ¶4-5

റോമർ 10:13—‘കർത്താ​വി​ന്റെ നാമം വിളി​ച്ച​പേ​ക്ഷി​ക്കുക’

ബൈബി​ളിൽ “യഹോ​വ​യു​ടെ പേര്‌ വിളി​ച്ച​പേ​ക്ഷി​ക്കുക” എന്നു പറയു​ന്ന​തി​ന്റെ അർഥം വെറുതേ ആ പേര്‌ അറിയു​ന്ന​തോ ആരാധ​ന​യിൽ ആ പേര്‌ ഉപയോ​ഗി​ക്കു​ന്ന​തോ മാത്രമല്ല. (സങ്കീർത്തനം 116:12-14) ദൈവ​ത്തിൽ വിശ്വാ​സം അർപ്പി​ക്കു​ന്ന​തും സഹായ​ത്തി​നാ​യി ദൈവ​ത്തി​ലേക്കു നോക്കു​ന്ന​തും അതിൽ ഉൾപ്പെ​ടു​ന്നുണ്ട്‌.—സങ്കീർത്തനം 20:7; 99:6.

യേശു​ക്രി​സ്‌തു ദൈവ​ത്തി​ന്റെ പേര്‌ വളരെ പ്രധാ​ന​പ്പെ​ട്ട​താ​യി കണ്ടു. താൻ പഠിപ്പിച്ച മാതൃ​കാ​പ്രാർഥ​ന​യി​ലെ ആദ്യത്തെ വാക്കു​കൾതന്നെ “സ്വർഗ​സ്ഥ​നായ ഞങ്ങളുടെ പിതാവേ, അങ്ങയുടെ പേര്‌ പരിശു​ദ്ധ​മാ​യി​രി​ക്കേ​ണമേ”എന്നാണ്‌. (മത്തായി 6:9) ദൈവ​ത്തെ​ക്കു​റിച്ച്‌ ശരിക്കും അറിയു​ക​യും ദൈവത്തെ അനുസ​രി​ക്കു​ക​യും ആ ദൈവത്തെ സ്‌നേ​ഹി​ക്കു​ക​യും ചെയ്‌താൽ മാത്രമേ നമുക്കു നിത്യ​ജീ​വൻ നേടാൻ കഴിയു​ക​യു​ള്ളൂ എന്നും യേശു പറഞ്ഞു.—യോഹ​ന്നാൻ 17:3, 6, 26.

ആത്മീയരത്നങ്ങൾ

it-2-E 111

യോ​സേഫ്‌

യോ​സേഫ്‌ എന്ന പേരിന്‌ പ്രാധാ​ന്യം കിട്ടുന്നു. യാക്കോ​ബി​ന്റെ പുത്ര​ന്മാ​രിൽ യോ​സേ​ഫിന്‌ ഒരു പ്രമു​ഖ​സ്ഥാ​ന​മു​ണ്ടാ​യി​രു​ന്നു. അതു​കൊണ്ട്‌ ചില​പ്പോ​ഴൊ​ക്കെ ഇസ്രാ​യേ​ലി​ലെ എല്ലാ ഗോ​ത്ര​ങ്ങ​ളെ​യോ (സങ്ക 80:1) വടക്കേ രാജ്യ​ത്തി​ന്റെ ഭാഗമായ ഗോ​ത്ര​ങ്ങ​ളെ​യോ പരാമർശി​ക്കാൻ യോ​സേ​ഫി​ന്റെ പേര്‌ ഉപയോ​ഗി​ച്ചി​രി​ക്കു​ന്നു. ബൈബിൾപ്ര​വ​ച​ന​ങ്ങ​ളി​ലും അദ്ദേഹ​ത്തിന്റ പേര്‌ കാണാൻ കഴിയും.—യഹ 47:13; 48:32, 35; 37:15-26; ഓബ 18; സെഖ 10:6; വെളി 7:8.

സെപ്‌റ്റം​ബർ 9-15

ദൈവ​വ​ച​ന​ത്തി​ലെ നിധികൾ | സങ്കീർത്തനം 82-84

നിങ്ങൾക്കുള്ള നിയമ​ന​ങ്ങളെ വിലമ​തി​ക്കു​ക

wp16.6-E 8 ¶2-3

ആകാശ​ത്തി​ലെ പക്ഷിക​ളിൽനി​ന്നുള്ള പാഠങ്ങൾ

യരുശ​ലേ​മി​ലെ ആളുകൾക്ക്‌ കെട്ടി​ട​ങ്ങ​ളു​ടെ വക്കുക​ളിൽ കൂടു കൂട്ടി​യി​രുന്ന മീവൽപ്പ​ക്ഷി​കളെ അറിയാ​മാ​യി​രു​ന്നു. ചില മീവൽപ്പ​ക്ഷി​കൾ ശലോ​മോ​ന്റെ ആലയത്തിൽപ്പോ​ലും കൂടു കൂട്ടി​യി​രു​ന്നു. ഒരുപക്ഷേ ആലയം സുരക്ഷി​ത​മാ​ണെ​ന്നും മറ്റു ശല്യങ്ങ​ളി​ല്ലാ​തെ കുഞ്ഞു​ങ്ങളെ വളർത്താ​നാ​കു​മെ​ന്നും അറിയാ​വു​ന്ന​തു​കൊ​ണ്ടാ​യി​രി​ക്കണം അവ അവിടെ കൂടു കൂട്ടി​യി​രു​ന്നത്‌.

84-ാം സങ്കീർത്തനം എഴുതി​യത്‌ കോര​ഹു​പു​ത്ര​ന്മാ​രിൽ ഒരാളാണ്‌. ആറു മാസത്തിൽ ഒരു ആഴ്‌ച അദ്ദേഹം ആലയത്തിൽ ജോലി ചെയ്‌തി​രു​ന്നു. ആലയത്തി​ന്റെ പരിസ​ര​ത്തുള്ള മീവൽപ്പ​ക്ഷി​ക​ളു​ടെ കൂടുകൾ അദ്ദേഹം ശ്രദ്ധിച്ചു. ആ പക്ഷിക​ളെ​പ്പോ​ലെ യഹോ​വ​യു​ടെ ഭവനത്തിൽ സ്ഥിരമാ​യി താമസി​ക്കാൻ അദ്ദേഹം ആഗ്രഹി​ച്ചി​രു​ന്നു. അതു​കൊ​ണ്ടാണ്‌ സങ്കീർത്ത​ന​ക്കാ​രൻ ഇങ്ങനെ പറഞ്ഞത്‌, “സൈന്യ​ങ്ങ​ളു​ടെ അധിപ​നായ യഹോവേ, അങ്ങയുടെ മഹനീ​യ​മായ വിശു​ദ്ധ​കൂ​ടാ​രം എത്ര മനോ​ഹരം! യഹോ​വ​യു​ടെ തിരു​മു​റ്റത്ത്‌ എത്താൻ ഞാൻ എത്ര കൊതി​ക്കു​ന്നു! അതിനാ​യി കാത്തു​കാ​ത്തി​രുന്ന്‌ ഞാൻ തളർന്നു. . . . എന്റെ രാജാ​വും എന്റെ ദൈവ​വും ആയ സൈന്യ​ങ്ങ​ളു​ടെ അധിപ​നായ യഹോവേ, അങ്ങയുടെ മഹനീ​യ​യാ​ഗ​പീ​ഠ​ത്തി​നു സമീപം ഒരു പക്ഷിക്കു​പോ​ലും കൂടു കൂട്ടാ​നാ​കു​ന്നു; കുഞ്ഞു​ങ്ങളെ പരിപാ​ലി​ക്കാൻ മീവൽപ്പക്ഷി അവിടെ കൂട്‌ ഒരുക്കു​ന്നു.” (സങ്കീർത്തനം 84:1-3) സഭയിൽ ദൈവ​ജ​ന​ത്തോ​ടൊ​പ്പം സമയം ചെലവ​ഴി​ക്കു​ന്ന​തിൽ നമുക്കും നമ്മുടെ കുട്ടി​കൾക്കും ഇതേ ആഗ്രഹ​വും വിലമ​തി​പ്പും ഉണ്ടോ?—സങ്കീർത്തനം 26:8, 12.

w08 7/15 30 ¶3-4

ന്യായ​മായ പ്രതീ​ക്ഷകൾ വെച്ചു​പു​ലർത്തി സന്തോഷം കണ്ടെത്തൂ

വാർധ​ക്യ​വും അനാ​രോ​ഗ്യ​വും നിമിത്തം ദൈവ​സേ​വ​ന​ത്തിൽ പണ്ടത്തെ​പ്പോ​ലെ​യൊ​ന്നും ചെയ്യാ​നാ​കു​ന്നി​ല്ലെന്നു പരിത​പി​ക്കുന്ന ഒരാളാ​ണോ നിങ്ങൾ? ‘ഉള്ള സമയവും ആരോ​ഗ്യ​വു​മെ​ല്ലാം കുട്ടി​ക​ളു​ടെ പുറകെ നടന്ന്‌ തീരു​ക​യാണ്‌, പഠിക്കാ​നും മീറ്റി​ങ്ങു​കൾക്കു തയ്യാറാ​കാ​നും അതിൽ നന്നായി പങ്കുപ​റ്റാ​നു​മൊ​ന്നും സാധി​ക്കു​ന്നില്ല’ എന്നു ചിന്തി​ക്കുന്ന ഒരു മാതാ​വോ പിതാ​വോ ആണോ നിങ്ങൾ? എന്നാൽ നമ്മുടെ പ്രയാ​സ​ങ്ങ​ളി​ലും ബുദ്ധി​മു​ട്ടു​ക​ളി​ലും അമിത​മാ​യി ശ്രദ്ധയൂ​ന്നു​ന്നത്‌, നമുക്കു ചെയ്യാ​നാ​കുന്ന കാര്യ​ങ്ങ​ളിൽനി​ന്നു നമ്മുടെ ശ്രദ്ധയ​ക​റ്റി​യേ​ക്കാം.

ആയിര​ക്ക​ണ​ക്കി​നു വർഷങ്ങൾക്കു​മുമ്പ്‌ ജീവി​ച്ചി​രുന്ന ഒരു ലേവ്യന്റെ കാര്യം പരിചി​ന്തി​ക്കാം. ഒരിക്ക​ലും സഫലമാ​കി​ല്ലെന്ന്‌ അറിയാ​മാ​യി​രു​ന്നി​ട്ടും യഹോ​വ​യു​ടെ ആലയത്തിൽ സ്ഥിരമാ​യി സേവി​ക്ക​ണ​മെന്ന ആഗ്രഹം അവൻ പ്രകടി​പ്പി​ച്ചു. (സങ്കീ. 84:1–3) വർഷത്തിൽ രണ്ടാഴ്‌ച ആലയത്തിൽ സേവി​ക്കാ​നുള്ള പദവി അവന്‌ അപ്പോൾത്തന്നെ ഉണ്ടായി​രു​ന്നു. ഒരു ദിവസ​മെ​ങ്കിൽ ഒരു ദിവസം യഹോ​വ​യു​ടെ ആലയത്തിൽ സേവി​ക്കാ​നാ​കു​ന്നത്‌ വലി​യൊ​രു പദവി​യാ​ണെന്നു തിരി​ച്ച​റി​ഞ്ഞത്‌, തന്റെ സേവനം പരിമി​ത​മാ​യി​രു​ന്നി​ട്ടു​കൂ​ടി അതിൽ സന്തോഷം കണ്ടെത്താൻ അവനെ സഹായി​ച്ചു. (സങ്കീ. 84:4, 5, 10) അതു​പോ​ലെ, നമ്മുടെ പരിമി​തി​കൾ നമ്മുടെ സന്തോഷം കവർന്നെ​ടു​ക്കാൻ അനുവ​ദി​ക്കാ​തെ, നമുക്കു ലഭ്യമാ​യി​രി​ക്കുന്ന അവസരങ്ങൾ തിരി​ച്ച​റി​യു​ക​യും അവയെ വിലമ​തി​പ്പോ​ടെ കാണു​ക​യും വേണം.

w20.01 17 ¶12

നിങ്ങളു​ടെ ദൈവ​മായ യഹോ​വ​യ്‌ക്കു നിങ്ങൾ വില​പ്പെ​ട്ട​വ​രാണ്‌

¹² നിങ്ങൾക്ക്‌ ഇപ്പോൾ എന്തെങ്കി​ലും രോഗ​മു​ണ്ടെ​ങ്കിൽ, നിങ്ങളു​ടെ കഷ്ടപ്പാ​ടു​കൾ യഹോവ കാണു​ന്നെന്ന്‌ ഉറപ്പു​ണ്ടാ​യി​രി​ക്കുക. ‘എന്നെ ഒന്നിനും കൊള്ളില്ല’ എന്നു ചിന്തി​ക്കു​ന്ന​തി​നു പകരം നമ്മുടെ സാഹച​ര്യ​ത്തെ​ക്കു​റിച്ച്‌ ശരിയായ ഒരു വീക്ഷണം വളർത്തി​യെ​ടു​ക്കാ​നുള്ള സഹായ​ത്തി​നാ​യി പ്രാർഥി​ക്കുക. യഹോവ ദൈവ​വ​ച​ന​ത്തിൽ നിങ്ങൾക്കാ​യി സൂക്ഷി​ച്ചി​രി​ക്കുന്ന നല്ല വാക്കുകൾ കണ്ടെത്തുക. യഹോവ തന്റെ ദാസരെ വിലമ​തി​ക്കു​ന്നെന്നു കാണി​ക്കുന്ന ബൈബിൾഭാ​ഗ​ങ്ങൾക്കു പ്രത്യേ​ക​ശ്രദ്ധ കൊടു​ക്കുക. യഹോ​വയെ വിശ്വ​സ്‌ത​മാ​യി സേവി​ക്കുന്ന എല്ലാവ​രോ​ടും യഹോവ നന്മ ചെയ്യു​മെന്നു നിങ്ങൾക്കു മനസ്സി​ലാ​കും.—സങ്കീ. 84:11.

ആത്മീയരത്നങ്ങൾ

it-1-E 816

പിതാ​വി​ല്ലാത്ത കുട്ടി

ഇസ്രാ​യേ​ലിൽ പിതാ​വി​ല്ലാത്ത കുട്ടി​ക​ളോ​ടു കാണി​ക്കുന്ന പരിഗണന ആ ദേശത്തി​ന്റെ ആത്മീയാ​രോ​ഗ്യ​ത്തി​ന്റെ ഒരു തെളി​വാ​യി​രു​ന്നു. (സങ്ക 82:3; 94:6; യശ 1:17, 23; യിര 7:5-7; 22:3; യഹ 22:7; സെഖ 7:9-11; മല 3:5) പിതാ​വി​ല്ലാത്ത ഒരു കുട്ടിയെ കഷ്ടപ്പെ​ടു​ത്തുന്ന ഒരാൾ യഹോ​വ​യാൽ ശപിക്ക​പ്പെ​ട്ട​വ​നാ​കു​മാ​യി​രു​ന്നു. (ആവ 27:19; യശ 10:1, 2) യഹോവ അനാഥർക്കു​വേണ്ടി എപ്പോ​ഴും കരുതു​ന്നു. (സുഭ 23:10, 11; സങ്ക 10:14; 68:5; ആവ 10:17, 18; ഹോശ 14:3; സങ്ക 146:9; യിര 49:11) മാതാ​പി​താ​ക്ക​ളി​ല്ലാ​ത്ത​വ​രോ​ടു സ്‌നേ​ഹ​വും പരിഗ​ണ​ന​യും കാണി​ക്കു​ന്നത്‌ സത്യ​ക്രി​സ്‌ത്യാ​നി​ക​ളു​ടെ ഒരു അടയാ​ള​മാണ്‌.—യാക്ക 1:27.

സെപ്‌റ്റം​ബർ 16-22

ദൈവ​വ​ച​ന​ത്തി​ലെ നിധികൾ | സങ്കീർത്തനം 85-87

സഹിച്ചു​നിൽക്കാൻ പ്രാർഥന സഹായി​ക്കും

w12 5/15 25 ¶10

നിങ്ങൾ യഹോ​വ​യു​ടെ തേജസ്സ്‌ പ്രതി​ഫ​ലി​പ്പി​ക്കു​ന്നു​ണ്ടോ?

¹⁰ യഹോ​വ​യു​ടെ തേജസ്സ്‌ പ്രതി​ഫ​ലി​പ്പി​ക്കാൻ നാം “പ്രാർഥ​ന​യിൽ ഉറ്റിരി​ക്കു”കയും വേണം. (റോമ. 12:12) സ്വീകാ​ര്യ​മായ വിധത്തിൽ ദൈവത്തെ സേവി​ക്കാ​നുള്ള സഹായ​ത്തി​നാ​യി നാം പ്രാർഥി​ക്കേ​ണ്ട​തുണ്ട്‌. പരിശു​ദ്ധാ​ത്മാ​വി​നും കൂടുതൽ വിശ്വാ​സ​ത്തി​നും പ്രലോ​ഭനം ചെറു​ക്കാ​നുള്ള കരുത്തി​നും “സത്യവ​ച​നത്തെ ശരിയാം​വണ്ണം കൈകാ​ര്യം” ചെയ്യാ​നുള്ള പ്രാപ്‌തി​ക്കും വേണ്ടി യഹോ​വ​യോ​ടു യാചി​ക്കാ​വു​ന്ന​താണ്‌. (2 തിമൊ. 2:15; മത്താ. 6:13; ലൂക്കോ. 11:13; 17:5) ഒരു കുട്ടി തന്റെ പിതാ​വിൽ ആശ്രയി​ക്കു​ന്ന​തു​പോ​ലെ, നാം നമ്മുടെ സ്വർഗീയ പിതാ​വായ യഹോ​വ​യിൽ ആശ്രയി​ക്കണം. ദൈവത്തെ കൂടുതൽ നന്നായി സേവി​ക്കാൻ വേണ്ട സഹായ​ത്തി​നാ​യി യാചി​ച്ചാൽ അവൻ അതു നൽകു​മെന്ന കാര്യം ഉറപ്പാണ്‌. നമ്മുടെ പ്രാർഥ​നകൾ അവനൊ​രു ശല്യമാ​കു​മെന്ന്‌ ഒരിക്ക​ലും ചിന്തി​ക്ക​രുത്‌! പകരം പ്രാർഥ​ന​യിൽ നമുക്ക്‌ അവനെ സ്‌തു​തി​ക്കാം, അവനു നന്ദി നൽകാം, അവന്റെ വിശുദ്ധ നാമത്തി​നു മഹത്ത്വം കരേറ്റുന്ന വിധത്തിൽ അവനെ സേവി​ക്കാൻ സഹായം അഭ്യർഥി​ക്കാം, അവന്റെ മാർഗ​നിർദേ​ശ​ത്തി​നാ​യി യാചി​ക്കാം—വിശേ​ഷിച്ച്‌ പരി​ശോ​ധ​നകൾ ഉണ്ടാകു​മ്പോൾ.—സങ്കീ. 86:12; യാക്കോ. 1:5-7.

w23.05 13 ¶17-18

യഹോവ എങ്ങനെ​യാ​ണു നമ്മുടെ പ്രാർഥ​ന​കൾക്ക്‌ ഉത്തരം തരുന്നത്‌?

¹⁷ സങ്കീർത്തനം 86:6, 7 വായി​ക്കുക. യഹോവ തന്റെ പ്രാർഥന കേട്ട്‌ അതിന്‌ ഉത്തരം തരുന്നു​ണ്ടെന്നു സങ്കീർത്ത​ന​ക്കാ​ര​നായ ദാവീ​ദിന്‌ ഉറപ്പാ​യി​രു​ന്നു. നിങ്ങൾക്കും അതേ ഉറപ്പു​ണ്ടാ​യി​രി​ക്കാ​നാ​കും. നമ്മുടെ പ്രാർഥ​ന​യ്‌ക്ക്‌ ഉത്തരമാ​യി യഹോവ ജ്ഞാനവും സഹിച്ചു​നിൽക്കാ​നുള്ള ശക്തിയും തരും. കൂടാതെ, നമ്മളെ സഹായി​ക്കു​ന്ന​തി​നു​വേണ്ടി സഹോ​ദ​ര​ങ്ങ​ളെ​യോ ഇപ്പോൾ സത്യാ​രാ​ധകർ അല്ലാത്ത ആളുക​ളെ​പ്പോ​ലു​മോ ഉപയോ​ഗി​ക്കാ​നും യഹോ​വ​യ്‌ക്കാ​കും.

¹⁸ ഈ ലേഖന​ത്തിൽ കണ്ട അനുഭ​വ​ങ്ങ​ളൊ​ക്കെ അതാണു തെളി​യി​ക്കു​ന്നത്‌. പ്രാർഥ​ന​യ്‌ക്കു നമ്മൾ പ്രതീ​ക്ഷി​ക്കുന്ന ഉത്തരം യഹോവ എപ്പോ​ഴും തരില്ലാ​യി​രി​ക്കും. പക്ഷേ, ഉത്തരം തരു​മെന്ന്‌ ഉറപ്പാണ്‌. നമുക്ക്‌ എന്താണോ വേണ്ടത്‌ അതായി​രി​ക്കും യഹോവ തരുന്നത്‌, അതും ഏറ്റവും ആവശ്യ​മായ സമയത്തു​തന്നെ. അതു​കൊണ്ട്‌ വിശ്വാ​സ​ത്തോ​ടെ തുടർന്നും പ്രാർഥി​ക്കുക. ഇപ്പോൾത്തന്നെ യഹോവ നിങ്ങളു​ടെ ആവശ്യ​ങ്ങൾക്കു​വേണ്ടി കരുതു​മെ​ന്നും വരാനി​രി​ക്കുന്ന പുതിയ ലോക​ത്തിൽ ‘ജീവനു​ള്ള​തി​ന്റെ​യെ​ല്ലാം ആഗ്രഹം തൃപ്‌തി​പ്പെ​ടു​ത്തു​മെ​ന്നും’ ഉള്ള ഉറപ്പോ​ടെ നിങ്ങൾക്ക്‌ അതു ചെയ്യാ​നാ​കും.—സങ്കീ. 145:16.

ആത്മീയരത്നങ്ങൾ

it-1-E 1058 ¶5

ഹൃദയം

“പൂർണ​ഹൃ​ദ​യ​ത്തോ​ടെ” സേവി​ക്കുക. ഇതു കാണി​ക്കു​ന്നത്‌ ഒരു വ്യക്തി​യു​ടെ ആലങ്കാ​രി​ക​ഹൃ​ദയം വിഭജി​ത​മാ​യേ​ക്കാം എന്നാണ്‌. (സങ്ക 86:11) അങ്ങനെ​യുള്ള ഒരു വ്യക്തി അർധഹൃ​ദ​യ​മുള്ള ഒരാളാ​യി​രി​ക്കാം. മനസ്സി​ല്ലാ​മ​ന​സ്സോ​ടെ ആയിരി​ക്കാം അയാൾ ദൈവത്തെ സേവി​ക്കു​ന്നത്‌. (സങ്ക 119:113; വെളി 3:16) അല്ലെങ്കിൽ അയാൾ ഇരുമ​ന​സ്സുള്ള ഒരാളാ​യി​രി​ക്കാം. അതായത്‌, രണ്ടു യജമാ​ന​ന്മാ​രെ സേവി​ക്കാൻ ശ്രമി​ക്കു​ക​യോ ഒരു കാര്യം പറയു​മ്പോൾ മറ്റൊന്നു മനസ്സിൽ വെച്ചു​കൊ​ണ്ടി​രി​ക്കു​ക​യോ ചെയ്യുന്ന ഒരാൾ.—1ദിന 12:33; സങ്ക 12:2, അടിക്കു​റിപ്പ്‌.

സെപ്‌റ്റം​ബർ 23-29

ദൈവ​വ​ച​ന​ത്തി​ലെ നിധികൾ | സങ്കീർത്തനം 88-89

യഹോ​വ​യു​ടെ ഭരണമാണ്‌ ഏറ്റവും നല്ലത്‌

w17.06 28 ¶5

യഹോ​വ​യു​ടെ പരമാ​ധി​കാ​രത്തെ പിന്തു​ണ​യ്‌ക്കുക!

⁵ ഭരിക്കാ​നുള്ള അവകാശം യഹോ​വ​യ്‌ക്കാ​ണെന്നു പറയു​ന്ന​തി​നു മറ്റൊരു കാരണ​മുണ്ട്‌. തന്റെ അധികാ​രം പൂർണ​നീ​തി​യോ​ടെ​യാ​ണു ദൈവം പ്രയോ​ഗി​ക്കു​ന്നത്‌. യഹോവ ഇങ്ങനെ പറയുന്നു: ‘യഹോവ എന്ന ഞാൻ ഭൂമി​യിൽ അചഞ്ചല​മായ സ്‌നേ​ഹ​വും നീതി​യും ന്യായ​വും കാണി​ക്കുന്ന ദൈവ​മാണ്‌. ഈ കാര്യ​ങ്ങ​ളി​ലാ​ണു ഞാൻ പ്രസാ​ദി​ക്കു​ന്നത്‌.’ (യിരെ. 9:24) അപൂർണ​രായ മനുഷ്യർ എഴുതി​ത്ത​യ്യാ​റാ​ക്കിയ ഏതെങ്കി​ലും നിയമ​സം​ഹി​ത​യു​ടെ അടിസ്ഥാ​ന​ത്തി​ലല്ല ദൈവം നീതി​യും ന്യായ​വും തീരു​മാ​നി​ക്കു​ന്നത്‌. പകരം, യഹോ​വ​ത​ന്നെ​യാ​ണു നീതി​യു​ടെ നിലവാ​രങ്ങൾ വെക്കു​ന്നത്‌. തന്റെ കുറ്റമറ്റ നീതി​ബോ​ധ​ത്തി​ന്റെ അടിസ്ഥാ​ന​ത്തിൽ യഹോവ മനുഷ്യർക്കു നിയമങ്ങൾ കൊടു​ക്കു​ക​യും ചെയ്‌തു. “നീതി​യും ന്യായ​വും (ദൈവ​ത്തി​ന്റെ) സിംഹാ​സ​ന​ത്തി​ന്റെ അടിസ്ഥാ​നം” ആയതു​കൊണ്ട്‌ യഹോ​വ​യു​ടെ എല്ലാ നിയമ​ങ്ങ​ളും തത്ത്വങ്ങ​ളും തീരു​മാ​ന​ങ്ങ​ളും നീതി​യു​ള്ള​താ​ണെന്നു നമുക്ക്‌ ഉറപ്പു​ണ്ടാ​യി​രി​ക്കാം. (സങ്കീ. 89:14; 119:128) എന്നാൽ സാത്താന്റെ കാര്യ​മൊ​ന്നു ചിന്തി​ക്കുക. യഹോ​വ​യു​ടെ ഭരണം കൊള്ളി​ല്ലെന്ന്‌ അവൻ വാദിച്ചു. പക്ഷേ ഈ ലോക​ത്തിൽ ഇതുവരെ നീതി കൊണ്ടു​വ​രാൻ അവനു കഴിഞ്ഞി​ട്ടു​ണ്ടോ?

w17.06 29 ¶10-11

യഹോ​വ​യു​ടെ പരമാ​ധി​കാ​രത്തെ പിന്തു​ണ​യ്‌ക്കുക!

¹⁰ യഹോവ അടിച്ച​മർത്തി ഭരിക്കുന്ന ഒരാളല്ല. ദൈവ​ത്തി​ന്റെ ഭരണത്തി​നു കീഴ്‌പെ​ടു​ന്ന​വർക്കു സ്വാത​ന്ത്ര്യ​മാ​ണു തോന്നു​ന്നത്‌, അവർ സന്തോ​ഷ​മു​ള്ള​വ​രു​മാണ്‌. (2 കൊരി. 3:17) ദാവീദ്‌ അതെക്കു​റിച്ച്‌ ഇങ്ങനെ പറഞ്ഞു: “തിരു​സ​ന്നി​ധി മഹത്ത്വ​വും തേജസ്സും കൊണ്ട്‌ ശോഭി​ക്കു​ന്നു; ദൈവ​ത്തി​ന്റെ വാസസ്ഥ​ലത്ത്‌ ബലവും ആനന്ദവും ഉണ്ട്‌.” (1 ദിന. 16:7, 27) അതു​പോ​ലെ, സങ്കീർത്ത​ന​ക്കാ​ര​നായ ഏഥാൻ ഇങ്ങനെ എഴുതി: “ആഹ്ലാദാ​ര​വ​ങ്ങ​ളോ​ടെ അങ്ങയെ സ്‌തു​തി​ക്കു​ന്നവർ സന്തുഷ്ടർ. യഹോവേ, അവർ അങ്ങയുടെ മുഖത്തി​ന്റെ പ്രകാ​ശ​ത്തിൽ നടക്കുന്നു. ദിവസം മുഴുവൻ അവർ അങ്ങയുടെ നാമത്തിൽ ആനന്ദി​ക്കു​ന്നു; അങ്ങയുടെ നീതി​യാൽ അവർക്ക്‌ ഉന്നമന​മു​ണ്ടാ​യി​രി​ക്കു​ന്നു.”—സങ്കീ. 89:15, 16.

¹¹ യഹോ​വ​യു​ടെ ഭരണമാണ്‌ ഏറ്റവും നല്ലതെന്ന നമ്മുടെ ബോധ്യം ശക്തമാ​ക്കാൻ ഒരു വഴിയുണ്ട്‌: യഹോ​വ​യു​ടെ നന്മയെ​ക്കു​റിച്ച്‌ കൂടെ​ക്കൂ​ടെ ചിന്തി​ക്കുക. എങ്കിൽ, “തിരു​മു​റ്റത്തെ ഒരു ദിവസം വേറെ ആയിരം ദിവസ​ത്തെ​ക്കാൾ ഉത്തമം!” എന്നു പറഞ്ഞ സങ്കീർത്ത​ന​ക്കാ​ര​നെ​പ്പോ​ലെ നമുക്കും തോന്നും. (സങ്കീ. 84:10) അതിൽ ഒട്ടും അതിശ​യോ​ക്തി​യില്ല. കാരണം നമ്മളെ രൂപക​ല്‌പന ചെയ്‌ത​തും സൃഷ്ടി​ച്ച​തും യഹോ​വ​യാ​യ​തു​കൊണ്ട്‌ നമുക്കു സന്തോഷം തരുന്നത്‌ എന്താ​ണെന്ന്‌ യഹോ​വ​യ്‌ക്ക്‌ അറിയാം. യഹോവ അത്തരം ആവശ്യങ്ങൾ സമൃദ്ധ​മാ​യി നിറ​വേ​റ്റു​ക​യും ചെയ്യുന്നു. യഹോവ ആവശ്യ​പ്പെ​ടുന്ന ചില കാര്യങ്ങൾ ചെയ്യാൻ നമ്മുടെ ഭാഗത്ത്‌ ത്യാഗങ്ങൾ വേണ്ടി​വ​ന്നേ​ക്കാം എന്നതു ശരിയാണ്‌. എന്നാൽ യഹോവ എന്ത്‌ ആവശ്യ​പ്പെ​ട്ടാ​ലും അതു നമ്മുടെ പ്രയോ​ജ​ന​ത്തി​നു​വേ​ണ്ടി​യാ​ണെന്ന്‌ ഓർക്കുക. ആത്യന്തി​ക​മാ​യി അതു നമുക്കു സന്തോഷം തരും.—യശയ്യ 48:17 വായി​ക്കുക.

w14 10/15 10 ¶14

ദൈവ​രാ​ജ്യ​ത്തിൽ അചഞ്ചല​മായ വിശ്വാ​സ​മു​ണ്ടാ​യി​രി​ക്കുക

¹⁴ ദാവീ​ദിക ഉടമ്പടി​യി​ലൂ​ടെ പുരാതന ഇസ്രാ​യേ​ലി​ലെ ദാവീദ്‌ രാജാ​വിന്‌ യഹോവ കൊടുത്ത വാഗ്‌ദാ​നം പരിചി​ന്തി​ക്കുക. (2 ശമൂവേൽ 7:12, 16 വായി​ക്കുക.) ദാവീദ്‌ യെരു​ശ​ലേ​മിൽ ഭരിച്ചു​കൊ​ണ്ടി​രു​ന്ന​പ്പോ​ഴാണ്‌ അവന്റെ വംശപ​ര​മ്പ​ര​യിൽ മിശിഹാ വരുമെന്ന ഈ ഉടമ്പടി യഹോവ ചെയ്‌തത്‌. (ലൂക്കോ. 1:30-33) അങ്ങനെ, സന്തതി വരുന്ന വംശാ​വലി യഹോവ കുറച്ചു​കൂ​ടെ വ്യക്തമാ​ക്കി. മിശി​ഹൈ​ക​രാ​ജ്യ​ത്തി​ന്റെ സിംഹാ​സ​ന​ത്തിന്‌ “അവകാ​ശ​മു​ള്ളവൻ” ദാവീ​ദി​ന്റെ വംശത്തിൽ വരു​മെന്ന്‌ അത്‌ സ്ഥിരീ​ക​രി​ച്ചു. (യെഹെ. 21:25-27) യേശു​വി​ലൂ​ടെ ദാവീ​ദി​ന്റെ രാജത്വം “എന്നേക്കും സ്ഥിരമാ​യി​രി​ക്കും.” ദാവീ​ദി​ന്റെ സന്തതി “ശാശ്വ​ത​മാ​യും അവന്റെ സിംഹാ​സനം . . . സൂര്യ​നെ​പ്പോ​ലെ​യും ഇരിക്കും.” (സങ്കീ. 89:34-37) അതെ, മിശി​ഹാ​യു​ടെ ഭരണം ഒരിക്ക​ലും ഒരു ദുർഭ​ര​ണ​മാ​യി അധഃപ​തി​ക്കു​ക​യില്ല. അതിന്റെ ഭരണ​നേ​ട്ടങ്ങൾ നിത്യം നിലനിൽക്കും!

ആത്മീയരത്നങ്ങൾ

cl 281 ¶4-5

“നീ മാത്ര​മാ​കു​ന്നു വിശ്വ​സ്‌തൻ”

⁴ എബ്രായ തിരു​വെ​ഴു​ത്തു​ക​ളിൽ ഉപയോ​ഗി​ച്ചി​രി​ക്കു​ന്ന​പ്ര​കാ​രം “വിശ്വ​സ്‌തത” എന്ന പദം, ഒരു സംഗതി​യോട്‌ അല്ലെങ്കിൽ വ്യക്തി​യോട്‌ സ്‌നേ​ഹ​പൂർവം പറ്റിനിൽക്കു​ന്ന​തും ആ സംഗതി​യോട്‌ അല്ലെങ്കിൽ വ്യക്തി​യോട്‌ ബന്ധപ്പെട്ട ഉദ്ദേശ്യം സാധി​ക്കു​ന്ന​തു​വരെ വിട്ടു​പോ​കാ​ത്ത​തു​മായ ദയയെ അർഥമാ​ക്കു​ന്നു. വിശ്വ​സ്‌ത​നായ ഒരു വ്യക്തി സ്‌നേ​ഹ​സ​മ്പ​ന്ന​നു​മാ​യി​രി​ക്കും. രസാവ​ഹ​മാ​യി, സങ്കീർത്ത​ന​ക്കാ​രൻ ചന്ദ്രനെ “ആകാശ​ത്തി​ലെ വിശ്വ​സ്‌ത​സാ​ക്ഷി” എന്ന്‌ വിളി​ക്കു​ക​യു​ണ്ടാ​യി. (സങ്കീർത്തനം 89:37) ചന്ദ്രൻ രാത്രി​യിൽ ക്രമമാ​യി പ്രത്യ​ക്ഷ​പ്പെ​ടു​ന്ന​തു​കൊ​ണ്ടാണ്‌ അവൻ അതിനെ അപ്രകാ​രം വിശേ​ഷി​പ്പി​ച്ചത്‌. ഈ അർഥത്തിൽ ചന്ദ്രൻ ആശ്രയ​യോ​ഗ്യത പ്രകട​മാ​ക്കു​ന്നു. എന്നാൽ ഒരു വ്യക്തി വിശ്വ​സ്‌തത കാണി​ക്കുന്ന അതേ അർഥത്തിൽ ചന്ദ്രൻ വിശ്വ​സ്‌തത കാണി​ക്കു​ന്ന​താ​യി പറയാൻ സാധി​ക്കില്ല. എന്തു​കൊണ്ട്‌? എന്തു​കൊ​ണ്ടെ​ന്നാൽ ഒരു വ്യക്തി പ്രകട​മാ​ക്കുന്ന വിശ്വ​സ്‌തത സ്‌നേ​ഹ​ത്തി​ന്റെ ഒരു തെളി​വാണ്‌—അതു നിർജീവ വസ്‌തു​ക്കൾക്കു പ്രകട​മാ​ക്കാൻ കഴിയാത്ത ഒന്നാണ്‌.

⁵ തിരു​വെ​ഴു​ത്തിൽ ദ്യോ​തി​പ്പി​ക്കു​ന്ന​പ്ര​കാ​രം, വിശ്വ​സ്‌തത ഊഷ്‌മ​ള​മാണ്‌. അതിന്റെ പ്രകട​നം​തന്നെ ഈ ഗുണം പ്രകട​മാ​ക്കുന്ന വ്യക്തി​ക്കും അതിന്റെ പ്രയോ​ജനം അനുഭ​വി​ക്കുന്ന വ്യക്തി​ക്കും ഇടയിൽ ഒരു ബന്ധം സ്ഥിതി​ചെ​യ്യു​ന്നു എന്നു സൂചി​പ്പി​ക്കു​ന്നു. അത്തരം വിശ്വ​സ്‌തത അസ്ഥിരമല്ല. കാറ്റത്ത്‌ ഗതിമാ​റി​പ്പോ​കുന്ന തിരമാ​ല​കൾപോ​ലെയല്ല അത്‌. മറിച്ച്‌, ഏറ്റവും പ്രയാ​സ​ക​ര​മായ പ്രതി​ബ​ന്ധ​ങ്ങളെ പോലും തരണം ചെയ്യാ​നുള്ള സ്ഥിരത​യും കരുത്തും അതിനുണ്ട്‌.

സെപ്‌റ്റം​ബർ 30–ഒക്ടോബർ 6

ദൈവ​വ​ച​ന​ത്തി​ലെ നിധികൾ | സങ്കീർത്തനം 90-91

യഹോ​വ​യിൽ ആശ്രയി​ക്കുക, ദീർഘാ​യു​സ്സു നേടുക

wp19.3 5 ¶3-5

ആയുസ്സ്‌ കൂട്ടാ​നുള്ള അന്വേ​ഷ​ണം

വയസ്സാ​കു​ന്നതു തടയാൻ ഇന്നു ധാരാളം ചികി​ത്സ​ക​ളു​ണ്ടെ​ങ്കി​ലും അവയൊ​ന്നും മനുഷ്യ​ന്റെ ആയുസ്സ്‌ അതിന്റെ പരിധി​ക്ക​പ്പു​റം വർധി​പ്പി​ക്കു​ന്നി​ല്ലെ​ന്നാ​ണു ചില ശാസ്‌ത്രജ്ഞർ പറയു​ന്നത്‌. 19-ാം നൂറ്റാ​ണ്ടു​മു​തൽ മനുഷ്യ​ന്റെ ആയുർ​ദൈർഘ്യം വർധി​ച്ചി​ട്ടുണ്ട്‌ എന്നതു സത്യമാണ്‌. എന്നാൽ അതിനു കാരണം സാം​ക്ര​മി​ക​രോ​ഗങ്ങൾ തടയു​ന്ന​തിന്‌ എടുത്തി​രി​ക്കുന്ന വിജയ​ക​ര​മായ നടപടി​ക​ളും ആന്റിബ​യോ​ട്ടി​ക്കു​ക​ളു​ടെ​യും വാക്‌സി​നു​ക​ളു​ടെ​യും ഉപയോ​ഗ​വും നല്ല ശുചി​ത്വ​വും ഒക്കെയാണ്‌. ചില ജനിത​ക​വി​ദ​ഗ്‌ധർ വിശ്വ​സി​ക്കു​ന്നതു മനുഷ്യാ​യുസ്സ്‌ അതിന്റെ പരിധി​യിൽ എത്തിനിൽക്കു​ക​യാണ്‌ എന്നാണ്‌.

ഏതാണ്ട്‌ 3,500 വർഷങ്ങൾക്കു​മുമ്പ്‌ ബൈബി​ളെ​ഴു​ത്തു​കാ​ര​നായ മോശ ഇങ്ങനെ പറഞ്ഞു: “ഞങ്ങളുടെ ആയുസ്സ്‌ 70 വർഷം; അസാധാ​ര​ണ​ക​രു​ത്തു​ണ്ടെ​ങ്കിൽ 80 വർഷവും. പക്ഷേ, അക്കാല​മ​ത്ര​യും കഷ്ടതക​ളും സങ്കടങ്ങ​ളും നിറഞ്ഞ​താണ്‌; അവ പെട്ടെന്നു കടന്നു​പോ​കു​ന്നു, ഞങ്ങൾ ദൂരേക്കു പറന്നക​ലു​ന്നു.” (സങ്കീർത്തനം 90:10) ആയുർ​ദൈർഘ്യം കൂട്ടാൻ മനുഷ്യൻ ഒരുപാട്‌ ശ്രമങ്ങൾ നടത്തി​യി​ട്ടു​ണ്ടെ​ങ്കി​ലും മനുഷ്യ​ന്റെ ആയുസ്സ്‌ മോശ പറഞ്ഞതു​പോ​ലെ​തന്നെ തുടരു​ന്നു.

മറുവ​ശത്ത്‌ കടൽചേ​ന​പോ​ലുള്ള ചില ജീവികൾ 200 വർഷത്തി​ലേറെ കാലം ജീവി​ച്ചി​രി​ക്കു​ന്നു. ആയിര​ക്ക​ണ​ക്കി​നു വർഷമാ​ണു ഭീമൻ സെക്കോ​യ​പോ​ലുള്ള മരങ്ങളു​ടെ ആയുസ്സ്‌. ഇവയോ​ടു നമ്മുടെ ആയുസ്സി​നെ താരത​മ്യം ചെയ്‌തു​നോ​ക്കുക; അത്‌ വെറും 70-ഓ 80-ഓ വർഷം മാത്രം. ജീവിതം എന്നു പറഞ്ഞാൽ ഇത്രയേ ഉള്ളോ എന്നു നമ്മൾ അതിശ​യ​ത്തോ​ടെ ചിന്തി​ച്ചേ​ക്കാം.

wp19.1 5, ചതുരം

ദൈവ​ത്തി​ന്റെ പേര്‌ എന്താണ്‌?

പലരും ചിന്തി​ച്ചി​ട്ടുള്ള ഒരു ചോദ്യ​മാണ്‌ ഇത്‌. ചില​പ്പോൾ നിങ്ങളും ചിന്തി​ച്ചി​ട്ടു​ണ്ടാ​കും. ആ ചോദ്യം ഈ വിധത്തി​ലും ചോദി​ക്കാം: ഈ പ്രപഞ്ച​വും അതിലുള്ള എല്ലാ കാര്യ​ങ്ങ​ളും ഉണ്ടായ​തി​നു പിന്നിൽ ഒരു കാരണ​മോ സ്രഷ്ടാ​വോ ഉണ്ടെങ്കിൽ ദൈവം എങ്ങനെ ഉണ്ടായി?

പ്രപഞ്ച​ത്തിന്‌ ഒരു തുടക്ക​മുണ്ട്‌ എന്നതി​നോ​ടു ശാസ്‌ത്രജ്ഞർ പൊതു​വേ യോജി​ക്കു​ന്നു. ഇതിനു ചേർച്ച​യിൽ ബൈബി​ളി​ലെ ആദ്യവാ​ക്യം ഇങ്ങനെ പറയുന്നു: “ആരംഭ​ത്തിൽ ദൈവം ആകാശ​വും ഭൂമി​യും സൃഷ്ടിച്ചു.”—ഉൽപത്തി 1:1.

ഈ പ്രപഞ്ചം തനിയെ ഉണ്ടായതല്ല. ഒന്നുമി​ല്ലാ​യ്‌മ​യിൽനിന്ന്‌ വന്നതുമല്ല. ഒന്നുമി​ല്ലാ​യ്‌മ​യിൽനിന്ന്‌ ഒന്നും ഉണ്ടാകു​ന്നില്ല. പ്രപഞ്ച​ത്തി​ന്റെ തുടക്ക​ത്തി​നു മുമ്പ്‌ ഒന്നുമി​ല്ലാ​യി​രു​ന്നെ​ങ്കിൽ ഇന്നു പ്രപഞ്ചം ഉണ്ടാകു​മാ​യി​രു​ന്നില്ല. നമുക്കു മുഴു​വ​നാ​യി ഉൾക്കൊ​ള്ളാൻ ബുദ്ധി​മു​ട്ടാ​ണെ​ങ്കി​ലും, പ്രപഞ്ച​ത്തി​ന്റെ ഭാഗമ​ല്ലാത്ത ബുദ്ധി​ശ​ക്തി​യുള്ള ഒരു ആദ്യകാ​രണം എല്ലാ കാലവും ഉണ്ടായി​രു​ന്നേ പറ്റൂ. പരിധി​യി​ല്ലാത്ത ശക്തിയു​ടെ​യും ജ്ഞാനത്തി​ന്റെ​യും ഉടമയായ ഒരു ആത്മവ്യ​ക്തി​യാണ്‌ ആ ആദ്യകാ​രണം. അതു ദൈവ​മായ യഹോ​വ​യാണ്‌.—യോഹ​ന്നാൻ 4:24.

ബൈബിൾ ദൈവ​ത്തെ​ക്കു​റിച്ച്‌ പറയു​ന്നത്‌ ഇങ്ങനെ​യാണ്‌: “പർവതങ്ങൾ ഉണ്ടായ​തി​നു മുമ്പേ, അങ്ങ്‌ ഭൂമി​ക്കും ഫലപു​ഷ്ടി​യുള്ള ദേശത്തി​നും ജന്മം നൽകി​യ​തി​നു മുമ്പേ, നിത്യ​ത​മു​തൽ നിത്യ​ത​വരെ അങ്ങ്‌ ദൈവം.” (സങ്കീർത്തനം 90:2) ദൈവം എല്ലായ്‌പോ​ഴും ഉണ്ടായി​രു​ന്നു. “ആരംഭ​ത്തിൽ” ദൈവം പ്രപഞ്ചം ഉണ്ടാക്കി.—വെളി​പാട്‌ 4:11.

w22.06 18 ¶16-17

യഹോ​വ​യു​ടെ സ്‌നേഹം അറിയൂ, ഭയത്തെ കീഴടക്കൂ!

¹⁶ നമ്മളെ​ല്ലാം നമ്മുടെ ജീവനെ ഒരുപാ​ടു സ്‌നേ​ഹി​ക്കു​ന്നു​ണ്ടെന്നു സാത്താന്‌ അറിയാം. ജീവൻ രക്ഷിക്കാൻവേണ്ടി നമ്മൾ എന്തും ഉപേക്ഷി​ക്കാൻ തയ്യാറാ​കും, യഹോ​വ​യോ​ടുള്ള നമ്മുടെ സ്‌നേ​ഹ​ബ​ന്ധം​പോ​ലും നമ്മൾ വിട്ടു​ക​ള​യും എന്നാണ്‌ അവന്റെ വാദം. (ഇയ്യോ. 2:4, 5) പക്ഷേ സാത്താന്റെ ആ ചിന്ത എത്ര തെറ്റാണ്‌, അല്ലേ? എന്നാലും സാത്താനു ‘മരണം വരുത്താൻ കഴിവു​ള്ള​തു​കൊണ്ട്‌’ മരിക്കാ​നുള്ള നമ്മുടെ ഈ പേടിയെ മുത​ലെ​ടു​ക്കാൻ അവൻ നോക്കും. കാരണം അതിലൂ​ടെ യഹോ​വ​യു​മാ​യുള്ള നമ്മുടെ ബന്ധം തകർക്കാ​നാ​കു​മെന്ന്‌ അവന്‌ അറിയാം. (എബ്രാ. 2:14, 15) അതിനു​വേണ്ടി അവൻ പല രീതികൾ ഉപയോ​ഗി​ച്ചേ​ക്കാം. ചില​പ്പോൾ, ‘വിശ്വാ​സം ഉപേക്ഷി​ച്ചി​ല്ലെ​ങ്കിൽ കൊന്നു​ക​ള​യും’ എന്നുള്ള ഭീഷണി നമുക്കു നേരി​ടേ​ണ്ടി​വ​ന്നേ​ക്കാം. അല്ലെങ്കിൽ ഗുരു​ത​ര​മായ ഒരു രോഗം വരു​മ്പോൾ ദൈവകല്പന ലംഘി​ച്ചു​കൊണ്ട്‌ രക്തം സ്വീക​രി​ക്കാൻ ഡോക്ടർമാ​രോ വിശ്വാ​സ​ത്തി​ലി​ല്ലാത്ത കുടും​ബാം​ഗ​ങ്ങ​ളോ നമ്മളെ നിർബ​ന്ധി​ച്ചേ​ക്കാം. അതല്ലെ​ങ്കിൽ ബൈബിൾത​ത്ത്വ​ങ്ങൾക്കു വിരു​ദ്ധ​മായ ഏതെങ്കി​ലും ചികിത്സ സ്വീക​രി​ക്കാ​നുള്ള സമ്മർദം നമുക്കു നേരി​ട്ടേ​ക്കാം.

¹⁷ മരിക്കാൻ നമ്മളാ​രും ആഗ്രഹി​ക്കു​ന്നില്ല. എന്നാൽ നമുക്ക്‌ ഒരു കാര്യം അറിയാം. നമ്മൾ മരിച്ചു​പോ​യാ​ലും യഹോവ നമ്മളെ തുടർന്നും സ്‌നേ​ഹി​ക്കും. (റോമർ 8:37-39 വായി​ക്കുക.) തന്റെ സ്‌നേ​ഹി​തർ മരിക്കു​മ്പോൾ യഹോവ അവരെ ഓർമ​യിൽ സൂക്ഷി​ക്കു​ന്നുണ്ട്‌, അവർ അപ്പോ​ഴും ജീവ​നോ​ടെ​യു​ണ്ടാ​യി​രു​ന്നാൽ എന്നപോ​ലെ. (ലൂക്കോ. 20:37, 38) അവരെ തിരികെ ജീവനി​ലേക്കു കൊണ്ടു​വ​രാൻവേണ്ടി യഹോവ കാത്തി​രി​ക്കു​ക​യാണ്‌. (ഇയ്യോ. 14:15) നമു​ക്കെ​ല്ലാം ‘നിത്യ​ജീ​വൻ കിട്ടാൻവേണ്ടി’ സ്വന്തം മകനെ​ത്ത​ന്നെ​യാണ്‌ യഹോവ ഒരു വിലയാ​യി കൊടു​ത്തി​രി​ക്കു​ന്നത്‌. (യോഹ. 3:16) യഹോവ നമ്മളെ ഒരുപാ​ടു സ്‌നേ​ഹി​ക്കു​ന്നു​ണ്ടെ​ന്നും നമു​ക്കെ​ല്ലാം​വേണ്ടി കരുതു​ന്നു​ണ്ടെ​ന്നും നമുക്ക്‌ അറിയാം. അതു​കൊണ്ട്‌ ഒരു അസുഖം വരു​മ്പോ​ഴോ വിശ്വാ​സ​ത്തി​ന്റെ പേരിൽ ആരെങ്കി​ലും നമ്മളെ കൊന്നു​ക​ള​യു​മെന്നു ഭീഷണി​പ്പെ​ടു​ത്തു​മ്പോ​ഴോ യഹോ​വയെ ഉപേക്ഷി​ക്കു​ന്ന​തി​നു പകരം ആശ്വാ​സ​ത്തി​നും ജ്ഞാനത്തി​നും ശക്തിക്കും ആയി നമുക്ക്‌ യഹോ​വ​യി​ലേക്കു തിരി​യാം. അതാണു വാലറി​യും ഭർത്താ​വും ചെയ്‌തത്‌.—സങ്കീ. 41:3.

ആത്മീയരത്നങ്ങൾ

wp17.5 3

നിങ്ങൾക്ക്‌ ഒരു കാവൽ മാലാ​ഖ​യു​ണ്ടോ?

ഓരോ വ്യക്തി​യെ​യും സംരക്ഷി​ക്കാൻ കാവൽ മാലാ​ഖ​മാ​രു​ണ്ടെന്നു ബൈബിൾ പഠിപ്പി​ക്കു​ന്നില്ല. യേശു ഒരിക്കൽ ഇങ്ങനെ പറഞ്ഞു എന്നത്‌ സത്യമാണ്‌: “ഈ ചെറി​യ​വ​രിൽ ഒരാ​ളെ​പ്പോ​ലും (ക്രിസ്‌തു​വി​ന്റെ ശിഷ്യ​ന്മാ​രെ) നിന്ദി​ക്കാ​തി​രി​ക്കാൻ സൂക്ഷി​ച്ചു​കൊ​ള്ളുക; കാരണം സ്വർഗ​ത്തിൽ അവരുടെ ദൂതന്മാർ എപ്പോ​ഴും സ്വർഗ​സ്ഥ​നായ എന്റെ പിതാ​വി​ന്റെ മുഖം കാണു​ന്ന​വ​രാ​ണെന്നു ഞാൻ നിങ്ങ​ളോ​ടു പറയുന്നു.” (മത്തായി 18:10) ഇവിടെ ഓരോ വ്യക്തി​കൾക്കും ഒരു കാവൽ മാലാഖ ഉണ്ടെന്ന ആശയ​ത്തെ​ക്കു​റി​ച്ചല്ല യേശു പറഞ്ഞത്‌. മറിച്ച്‌ തന്റെ ഓരോ ശിഷ്യ​ന്മാ​രി​ലും ദൂതന്മാർ അഗാധ​മായ താത്‌പ​ര്യം കാണി​ക്കു​ന്നെന്നു സൂചി​പ്പി​ക്കു​ക​യാ​യി​രു​ന്നു. അതു​കൊണ്ട്‌ ദൂതന്മാർ തങ്ങളെ സംരക്ഷി​ച്ചു​കൊ​ള്ളു​മെന്നു വിചാ​രിച്ച്‌ സത്യാ​രാ​ധകർ വിവേ​ക​മി​ല്ലാ​തെ അനാവ​ശ്യ​മോ അപകടം പിടി​ച്ച​തോ ആയ കാര്യങ്ങൾ ചെയ്യാ​റില്ല.

അതിന്റെ അർഥം ദൂതന്മാർ മനുഷ്യ​രെ സഹായി​ക്കു​ന്നി​ല്ലെ​ന്നാ​ണോ? അല്ല. (സങ്കീർത്തനം 91:11) ദൂതന്മാ​രി​ലൂ​ടെ സംരക്ഷ​ണ​വും വഴിന​ട​ത്തി​പ്പും ദൈവം തരുന്നു​വെന്നു ചിലർ ഉറച്ചു വിശ്വ​സി​ക്കു​ന്നു. മുഖ്യ​ലേ​ഖ​ന​ത്തിൽ പറഞ്ഞി​രി​ക്കുന്ന കെന്നറ്റും അങ്ങനെ​തന്നെ വിശ്വ​സി​ക്കു​ന്നു. അത്‌ ഒരുപക്ഷേ ശരിയാ​യി​രി​ക്കാം. യഹോ​വ​യു​ടെ സാക്ഷികൾ അവരുടെ സുവി​ശേഷ പ്രവർത്ത​ന​ത്തിൽ പങ്കെടു​ക്കു​മ്പോൾ ദൂതന്മാ​രു​ടെ ഇടപെടൽ ഉണ്ടാ​യെ​ന്നു​ള്ള​തി​ന്റെ തെളി​വു​കൾ പലപ്പോ​ഴും കണ്ടിട്ടുണ്ട്‌. എന്നാൽ ദൂതന്മാ​രെ നമുക്ക്‌ കാണാൻ കഴിയില്ല. അതു​കൊ​ണ്ടു​തന്നെ പല കാര്യ​ങ്ങ​ളി​ലും ആളുകളെ സഹായി​ക്കു​ന്ന​തി​നു​വേണ്ടി ദൈവം അവരെ എത്ര​ത്തോ​ളം ഉപയോ​ഗി​ക്കു​മെന്ന്‌ നമുക്ക്‌ പറയാ​നും കഴിയില്ല. എങ്കിലും, നമുക്ക്‌ ലഭിക്കുന്ന ഏതൊരു സഹായ​ത്തി​നും സർവശ​ക്ത​നായ ദൈവ​ത്തോ​ടു നന്ദി പറയു​ന്നത്‌ അധിക​മാ​കില്ല.—കൊ​ലോ​സ്യർ 3:15; യാക്കോബ്‌ 1:17, 18.

ഒക്ടോബർ 7-13

ദൈവ​വ​ച​ന​ത്തി​ലെ നിധികൾ | സങ്കീർത്തനം 92-95

യഹോ​വയെ സേവി​ക്കു​ന്ന​താണ്‌ ഏറ്റവും നല്ല ജീവിതം

w18.04 26 ¶5

ചെറു​പ്പ​ക്കാ​രേ, നിങ്ങളു​ടെ ജീവിതം ആത്മീയ​ല​ക്ഷ്യ​ങ്ങളെ കേന്ദ്രീ​ക​രി​ച്ചാ​ണോ?

⁵ യഹോവ നമ്മളോ​ടു കാണി​ക്കുന്ന സ്‌നേ​ഹ​ത്തി​നും നമുക്കു​വേണ്ടി ചെയ്‌തു​ത​ന്നി​രി​ക്കുന്ന കാര്യ​ങ്ങൾക്കും നന്ദി കാണി​ക്കാൻ കഴിയും എന്നതാണ്‌ ആത്മീയ​ല​ക്ഷ്യ​ങ്ങൾ വെക്കു​ന്ന​തി​ന്റെ പ്രധാ​ന​കാ​രണം. സങ്കീർത്ത​ന​ക്കാ​രൻ എഴുതി: “യഹോ​വ​യോ​ടു നന്ദി പറയു​ന്നതു . . . എത്ര നല്ലത്‌! യഹോവേ, അങ്ങയുടെ ചെയ്‌തി​ക​ളാൽ അങ്ങ്‌ എന്നെ സന്തോ​ഷി​പ്പി​ച്ചി​രി​ക്കു​ന്ന​ല്ലോ; അങ്ങയുടെ കൈക​ളു​ടെ പ്രവൃ​ത്തി​കൾ നിമിത്തം ഞാൻ സന്തോ​ഷി​ച്ചാർക്കു​ന്നു.” (സങ്കീ. 92:1, 4) ചെറു​പ്പ​ക്കാ​രേ, യഹോ​വ​യ്‌ക്കു നന്ദി നൽകാൻ നിങ്ങൾക്ക്‌ എത്ര​യെത്ര കാര്യ​ങ്ങ​ളാ​ണു​ള്ളത്‌! നിങ്ങളു​ടെ ജീവൻ, നിങ്ങൾക്കു കിട്ടിയ വില​യേ​റിയ സത്യം, ബൈബിൾ, സഭ, അത്ഭുത​ക​ര​മായ ഭാവി​പ്ര​ത്യാ​ശ എന്നിവ​യെ​ക്കു​റി​ച്ചൊ​ക്കെ ഓർത്തു​നോ​ക്കൂ! ആത്മീയ​കാ​ര്യ​ങ്ങൾക്കു പ്രാധാ​ന്യം കൊടു​ക്കു​മ്പോൾ ഈ അനു​ഗ്ര​ഹ​ങ്ങ​ളെ​ല്ലാം തന്നതിനു നമുക്കു ദൈവ​ത്തോ​ടു നന്ദി കാണി​ക്കാൻ കഴിയും, ദൈവ​ത്തോ​ടു കൂടുതൽ അടുക്കാ​നും സാധി​ക്കും.

w18.11 20 ¶8

ആരാണു നിങ്ങളു​ടെ ചിന്തകൾ രൂപ​പ്പെ​ടു​ത്തു​ന്നത്‌?

⁸ സ്‌നേ​ഹ​മുള്ള ഒരു പിതാ​വി​നെ​പ്പോ​ലെ, തന്റെ മക്കൾ ഏറ്റവും സംതൃ​പ്‌തി​ക​ര​മായ ജീവിതം ആസ്വദി​ക്കാൻ യഹോവ ആഗ്രഹി​ക്കു​ന്നു. (യശ. 48:17, 18) അതു​കൊണ്ട്‌ ധാർമി​ക​നി​ല​വാ​ര​ങ്ങ​ളു​ടെ കാര്യ​ത്തി​ലും മറ്റുള്ള​വ​രോ​ടുള്ള പെരു​മാ​റ്റ​ത്തി​ന്റെ കാര്യ​ത്തി​ലും യഹോവ ചില അടിസ്ഥാ​ന​ത​ത്ത്വ​ങ്ങൾ തന്നിട്ടുണ്ട്‌. ഇക്കാര്യ​ങ്ങ​ളിൽ താൻ ചിന്തി​ക്കു​ന്ന​തു​പോ​ലെ ചിന്തി​ക്കാ​നും തന്റെ മൂല്യങ്ങൾ പകർത്താ​നും യഹോവ നമ്മളെ ക്ഷണിക്കു​ന്നു. ഇത്‌ ഒരിക്ക​ലും നമ്മുടെ സ്വാത​ന്ത്ര്യ​ത്തി​നു തടയി​ടു​ന്നതല്ല, പകരം നമ്മുടെ ചിന്താ​ശേഷി മെച്ച​പ്പെ​ടു​ത്തു​ക​യും വിശാ​ല​മാ​യി ചിന്തി​ക്കാൻ നമ്മളെ സഹായി​ക്കു​ക​യും ചെയ്യുന്നു. നമ്മുടെ ചിന്തകൾ ദൈവി​ക​മായ ഒരു തലത്തി​ലേക്ക്‌ ഉയരു​ക​യും ചെയ്യും. (സങ്കീ. 92:5; സുഭാ. 2:1-5; യശ. 55:9) സ്വന്തമായ വ്യക്തി​ത്വം രൂപ​പ്പെ​ടു​ത്തു​ന്ന​തോ​ടൊ​പ്പം സന്തോ​ഷ​ത്തി​ലേക്കു നയിക്കുന്ന തീരു​മാ​ന​ങ്ങ​ളെ​ടു​ക്കാ​നും അതു സഹായി​ക്കും. (സങ്കീ. 1:2, 3) അതെ, യഹോ​വ​യെ​പ്പോ​ലെ ചിന്തി​ക്കു​ന്ന​താ​ണു നമുക്കു നല്ലത്‌, പ്രയോ​ജ​ന​ക​ര​വും!

w20.01 19 ¶18

നിങ്ങളു​ടെ ദൈവ​മായ യഹോ​വ​യ്‌ക്കു നിങ്ങൾ വില​പ്പെ​ട്ട​വ​രാണ്‌

¹⁸ പ്രായ​മാ​യാ​ലും യഹോ​വ​യ്‌ക്കു​വേണ്ടി നമുക്കു പലതും ചെയ്യാ​നു​ണ്ടെന്ന്‌ ഉറപ്പു​ണ്ടാ​യി​രി​ക്കാം. (സങ്കീ. 92:12-15) നമുക്കു വലിയ കഴി​വൊ​ന്നു​മി​ല്ലാ​യി​രി​ക്കും, അധിക​മൊ​ന്നും ചെയ്യാ​നും കഴിയു​ന്നി​ല്ലാ​യി​രി​ക്കും. എന്നാൽ ദൈവ​സേ​വ​ന​ത്തിൽ നമ്മൾ ചെയ്യുന്ന ചെറിയ കാര്യം​പോ​ലും യഹോവ വിലയു​ള്ള​താ​യി കാണു​ന്നെന്നു യേശു പഠിപ്പി​ച്ചു. (ലൂക്കോ. 21:2-4) അതു​കൊണ്ട്‌ ചെയ്യാൻ കഴിയാത്ത കാര്യ​ങ്ങളല്ല, ചെയ്യാൻ കഴിയുന്ന കാര്യ​ങ്ങ​ളെ​ക്കു​റിച്ച്‌ ചിന്തി​ക്കുക. ഉദാഹ​ര​ണ​ത്തിന്‌, നിങ്ങൾക്ക്‌ ഇപ്പോ​ഴും യഹോ​വ​യെ​ക്കു​റിച്ച്‌ സംസാ​രി​ക്കാ​നും സഹോ​ദ​ര​ങ്ങൾക്കു​വേണ്ടി പ്രാർഥി​ക്കാ​നും മറ്റുള്ള​വരെ പ്രോ​ത്സാ​ഹി​പ്പി​ക്കാ​നും ഒക്കെ കഴിയും. നിങ്ങൾ എത്രമാ​ത്രം ചെയ്യുന്നു എന്നതിന്റെ അടിസ്ഥാ​ന​ത്തി​ലല്ല യഹോവ നിങ്ങളെ തന്റെ സഹപ്ര​വർത്ത​ക​രാ​യി കാണു​ന്നത്‌, പകരം നിങ്ങൾ മനസ്സോ​ടെ യഹോ​വയെ അനുസ​രി​ക്കു​ന്ന​തു​കൊ​ണ്ടാണ്‌.—1 കൊരി. 3:5-9.

ആത്മീയരത്നങ്ങൾ

cl 176 ¶18

‘ഹാ, ദൈവ​ത്തി​ന്റെ ജ്ഞാനത്തി​ന്റെ ആഴമേ!’

¹⁸ അപ്പൊ​സ്‌ത​ല​നായ പൗലൊസ്‌ യഹോ​വ​യു​ടെ ജ്ഞാനത്തി​ന്റെ അതുല്യ​തയെ വെളി​പ്പെ​ടു​ത്തി​യത്‌ എങ്ങനെ​യെന്നു കാണുക: “ഹാ, ദൈവ​ത്തി​ന്റെ ധനം, ജ്ഞാനം, അറിവു എന്നിവ​യു​ടെ ആഴമേ! അവന്റെ ന്യായ​വി​ധി​കൾ എത്ര അപ്ര​മേ​യ​വും അവന്റെ വഴികൾ എത്ര അഗോ​ച​ര​വും ആകുന്നു.” (റോമർ 11:33) വാക്യ​ത്തി​ന്റെ തുടക്ക​ത്തി​ലെ ഹാ, എന്ന ഉദ്‌ഘോ​ഷം ശക്തമായ വികാ​രത്തെ—ആഴമായ ഭയാദ​ര​വി​നെ—സൂചി​പ്പി​ക്കു​ന്നു. “ആഴം” എന്നതിന്‌ പൗലൊസ്‌ തിര​ഞ്ഞെ​ടുത്ത ഗ്രീക്കു​പദം “അഗാധം” എന്നതിന്റെ മൂലപ​ദ​വു​മാ​യി അടുത്തു ബന്ധമു​ള്ള​താണ്‌. അതു​കൊണ്ട്‌ അവന്റെ വാക്കുകൾ ഉജ്ജ്വല​മായ ഒരു മനോ​ചി​ത്രം ഉളവാ​ക്കു​ന്നു. യഹോ​വ​യു​ടെ ജ്ഞാനത്തെ കുറിച്ചു വിചി​ന്തനം ചെയ്യു​ന്നത്‌, അതിരി​ല്ലാത്ത, അടിത്ത​ട്ടി​ല്ലാത്ത ഒരു ഗർത്തത്തി​ലേക്ക്‌, നമുക്ക്‌ ഒരിക്ക​ലും ഗ്രഹി​ക്കാൻ കഴിയാ​ത്തത്ര ആഴവും പരപ്പു​മുള്ള ഒരു മേഖല​യി​ലേക്ക്‌, എത്തി​നോ​ക്കു​ന്നതു പോ​ലെ​യാണ്‌. അതിനെ കൃത്യ​മാ​യി വിവരി​ക്കാ​നോ വർണി​ക്കാ​നോ കഴിയി​ല്ലെന്നു മാത്രമല്ല, അതിന്റെ വിപുലത മനസ്സി​ലാ​ക്കാൻ പോലും നമുക്ക്‌ ഒരിക്ക​ലും സാധി​ക്കു​ക​യില്ല. (സങ്കീർത്തനം 92:5) ഈ ആശയം നമ്മിൽ താഴ്‌മ ഉളവാ​ക്കു​ന്നി​ല്ലേ?

ഒക്ടോബർ 14-20

ദൈവ​വ​ച​ന​ത്തി​ലെ നിധികൾ | സങ്കീർത്തനം 96-99

“സന്തോ​ഷ​വാർത്ത പ്രസി​ദ്ധ​മാ​ക്കു​വിൻ!”

w11-E 3/1 6 ¶1-2

എന്താണ്‌ സന്തോ​ഷ​വാർത്ത?

ക്രിസ്‌ത്യാ​നി​കൾ “ദൈവ​രാ​ജ്യ​ത്തെ​ക്കു​റി​ച്ചുള്ള സന്തോ​ഷ​വാർത്ത” പ്രസം​ഗി​ക്കേ​ണ്ട​തുണ്ട്‌. അതായത്‌, ദൈവ​രാ​ജ്യ​ത്തെ​ക്കു​റിച്ച്‌ മറ്റുള്ള​വ​രോ​ടു പറയു​ക​യും ഭാവി​യിൽ ഭൂമിയെ നീതിയോടെ ഭരിക്കുന്ന ഒരു ഗവൺമെ​ന്റാണ്‌ അതെന്നു വിശദീ​ക​രി​ക്കു​ക​യും ചെയ്യണം. എന്നാൽ “സന്തോ​ഷ​വാർത്ത” എന്ന പ്രയോ​ഗം ബൈബി​ളിൽ പല വിധങ്ങ​ളിൽ ഉപയോ​ഗി​ച്ചി​ട്ടുണ്ട്‌. ഉദാഹ​ര​ണ​ത്തിന്‌, “ദിവ്യ​ര​ക്ഷ​യു​ടെ സന്തോ​ഷ​വാർത്ത” എന്നും (സങ്ക 96:2) “ദൈവ​ത്തിൽനി​ന്നുള്ള സന്തോ​ഷ​വാർത്ത” എന്നും (റോമ 15:16) “യേശു​ക്രി​സ്‌തു​വി​നെ​ക്കു​റി​ച്ചുള്ള സന്തോ​ഷ​വാർത്ത” എന്നും ഉപയോ​ഗി​ച്ചി​രി​ക്കു​ന്നതു കാണാം.—മർ 1:1.

ചുരു​ക്കി​പ്പ​റ​ഞ്ഞാൽ യേശു പറഞ്ഞി​ട്ടു​ള്ള​തും ശിഷ്യ​ന്മാർ എഴുതി​യി​ട്ടു​ള്ള​തും ആയ എല്ലാ സത്യങ്ങ​ളും സന്തോ​ഷ​വാർത്ത​യിൽ ഉൾപ്പെ​ടും. യേശു സ്വർഗാ​രോ​ഹണം ചെയ്യു​ന്ന​തി​നു മുമ്പ്‌ തന്റെ അനുഗാ​മി​ക​ളോട്‌ ഇങ്ങനെ പറഞ്ഞു: “അതു​കൊണ്ട്‌ നിങ്ങൾ പോയി എല്ലാ ജനതക​ളി​ലെ​യും ആളുകളെ ശിഷ്യ​രാ​ക്കു​ക​യും പിതാ​വി​ന്റെ​യും പുത്ര​ന്റെ​യും പരിശു​ദ്ധാ​ത്മാ​വി​ന്റെ​യും നാമത്തിൽ അവരെ സ്‌നാ​ന​പ്പെ​ടു​ത്തു​ക​യും ഞാൻ നിങ്ങ​ളോ​ടു കല്‌പി​ച്ച​തെ​ല്ലാം അനുസ​രി​ക്കാൻ അവരെ പഠിപ്പി​ക്കു​ക​യും വേണം.” (മത്ത 28:19, 20) അതു​കൊണ്ട്‌ സത്യ​ക്രി​സ്‌ത്യാ​നി​കൾ മറ്റുള്ള​വ​രോ​ടു ദൈവ​രാ​ജ്യ​ത്തെ​ക്കു​റിച്ച്‌ പറയുക മാത്രമല്ല, അവരെ ശിഷ്യ​രാ​ക്കു​ക​യും വേണം.

w12-E 9/1 16 ¶1

ന്യായ​വി​ധി ദിവസ​ത്തിൽ എന്താണു സംഭവി​ക്കുക?

ന്യായ​വി​ധി ദിവസ​ത്തെ​ക്കു​റിച്ച്‌ പല ആളുക​ളും സങ്കൽപ്പി​ച്ചു​വെ​ച്ചി​രി​ക്കു​ന്നത്‌ എന്താ​ണെ​ന്നാണ്‌ വലതു​വ​ശത്തെ ചിത്രം കാണി​ക്കു​ന്നത്‌. അവരുടെ വിശ്വാ​സം അനുസ​രിച്ച്‌ മരിച്ച​വ​രു​ടെ ആത്മാക്ക​ളെ​യെ​ല്ലാം ന്യായ​വി​ധി ദിവസ​ത്തിൽ ദൈവ​ത്തി​ന്റെ സിംഹാ​സ​ന​ത്തി​നു മുമ്പാകെ കൂട്ടി​വ​രു​ത്തും. മരിക്കു​ന്ന​തി​നു മുമ്പു​വരെ അവർ ചെയ്‌ത എല്ലാ പ്രവൃ​ത്തി​ക​ളു​ടെ​യും അടിസ്ഥാ​ന​ത്തിൽ ദൈവം അവരെ ന്യായം​വി​ധി​ക്കും. ചിലർക്ക്‌ സ്വർഗ​ത്തിൽ ജീവി​ക്കാ​നുള്ള അവസരം കിട്ടും. മറ്റു ചിലർക്ക്‌ നരകത്തി​ലെ ശിക്ഷാ​വി​ധി​യാ​യി​രി​ക്കും ലഭിക്കു​ന്നത്‌. എന്നാൽ ഇങ്ങനെ​യൊ​രു ആശയമേ അല്ല ബൈബിൾ പഠിപ്പി​ക്കു​ന്നത്‌. ബൈബി​ളിൽ പറയു​ന്ന​ത​നു​സ​രിച്ച്‌ മനുഷ്യ​രെ അനീതി​യിൽനി​ന്നു രക്ഷിക്കുക എന്നതാണ്‌ ന്യായ​വി​ധി ദിവസ​ത്തി​ന്റെ ഉദ്ദേശ്യം. (സങ്കീർത്തനം 96:13) നീതി നടപ്പാ​ക്കുന്ന ന്യായാ​ധി​പ​നാ​യി ദൈവം നിയമി​ച്ചി​രി​ക്കു​ന്നത്‌ യേശു​വി​നെ​യാണ്‌.—യശയ്യ 11:1-5; പ്രവൃ​ത്തി​കൾ 17:31 വായി​ക്കുക.

w12 9/15 12 ¶18-19

സമാധാ​നം—ആയിരം വർഷവും അതിനു ശേഷവും!

¹⁸ സാത്താന്റെ വാക്കു കേട്ട്‌ മനുഷ്യർ യഹോ​വ​യു​ടെ പരമാ​ധി​കാ​ര​ത്തോ​ടു മത്സരി​ച്ച​തോ​ടെ ആ സമാധാ​ന​ബന്ധം തകർന്നു. എന്നാൽ ആ സമാധാ​ന​വും ഐക്യ​വും പുനഃ​സ്ഥാ​പി​ക്കാൻ 1914 മുതൽ മിശി​ഹൈക രാജ്യം ക്രമാ​നു​ഗ​ത​മാ​യി നടപടി​കൾ സ്വീക​രി​ച്ചു​വ​രു​ക​യാണ്‌. (എഫെ. 1:9, 10) ഇന്ന്‌ “കാണാത്ത” പല വിശി​ഷ്ട​കാ​ര്യ​ങ്ങ​ളും ക്രിസ്‌തു​വി​ന്റെ ആയിരം​വർഷ വാഴ്‌ച​യിൽ യാഥാർഥ്യ​മാ​കും. അതിനു ശേഷം “അവസാ​ന​ത്തി​ങ്കൽ,” അതായത്‌ ആ വാഴ്‌ച​യു​ടെ ഒടുവിൽ എന്തു സംഭവി​ക്കും? “സ്വർഗ​ത്തി​ലും ഭൂമി​യി​ലും സകല അധികാ​ര​വും” യേശു​വിന്‌ നൽക​പ്പെ​ട്ടി​ട്ടു​ണ്ടെ​ങ്കി​ലും അവൻ അധികാ​ര​മോ​ഹി​യല്ല, യഹോ​വ​യു​ടെ സ്ഥാനം അവൻ ആഗ്രഹി​ക്കു​ന്നില്ല. താഴ്‌മ​യോ​ടെ അവൻ “രാജ്യം തന്റെ ദൈവ​വും പിതാ​വു​മാ​യ​വനെ ഏൽപ്പി​ക്കും.” അതെ, അവൻ എല്ലായ്‌പ്പോ​ഴും തന്റെ വിശി​ഷ്ട​മായ സ്ഥാനവും അധികാ​ര​വും “ദൈവ​ത്തി​ന്റെ മഹത്ത്വ​ത്തി​നാ​യി” ഉപയോ​ഗി​ക്കു​ന്നു.—മത്താ. 28:18; ഫിലി. 2:9-11.

¹⁹ അപ്പോ​ഴേ​ക്കും ഭൂമി​യിൽ രാജ്യ​ത്തി​ന്റെ പ്രജകൾ പൂർണ​രാ​യി​ത്തീർന്നി​രി​ക്കും. യേശു​വി​ന്റെ മാതൃക അനുക​രി​ച്ചു​കൊണ്ട്‌ താഴ്‌മ​യോ​ടെ യഹോ​വ​യു​ടെ പരമാ​ധി​കാ​രത്തെ അവർ മനസ്സാ അംഗീ​ക​രി​ക്കും. അതിനുള്ള തങ്ങളുടെ മനസ്സൊ​രു​ക്കം തെളി​യി​ക്കാൻ അന്തിമ​പ​രീ​ക്ഷണം അവർക്ക്‌ അവസര​മേ​കും. (വെളി. 20:7-10) മത്സരി​ക​ളായ എല്ലാ മനുഷ്യ​രെ​യും ആത്മജീ​വി​ക​ളെ​യും അതിനു ശേഷം എന്നെ​ന്നേ​ക്കു​മാ​യി നശിപ്പി​ക്കും. എത്രമാ​ത്രം സന്തോ​ഷ​വും ആവേശ​വും അലയടി​ക്കുന്ന സമയമാ​യി​രി​ക്കും അത്‌! ‘എല്ലാവർക്കും എല്ലാമാ​യി​ത്തീ​രുന്ന’ യഹോ​വയെ ആ സാർവ​ത്രി​ക​കു​ടും​ബം സന്തോ​ഷ​ത്തോ​ടെ സ്‌തു​തി​ക്കും.—സങ്കീർത്തനം 99:1-3 വായി​ക്കുക.

ആത്മീയരത്നങ്ങൾ

it-2-E 994

പാട്ട്‌

“പുതിയ പാട്ട്‌” എന്ന പദപ്ര​യോ​ഗം സങ്കീർത്ത​ന​ങ്ങ​ളി​ലും ബൈബി​ളി​ന്റെ മറ്റു ഭാഗങ്ങ​ളി​ലും കാണാം. (സങ്ക 33:3; 40:3; 96:1; 98:1; 144:9; 149:1; യശ 42:10; വെളി 5:9; 14:3) മിക്ക​പ്പോ​ഴും ഇത്തരം പുതിയ പാട്ടുകൾ പാടു​ന്ന​താ​യി ബൈബി​ളിൽ കാണു​ന്നത്‌, യഹോവ തന്റെ അഖിലാ​ണ്ഡ​പ​ര​മാ​ധി​കാ​രം പുതിയ ഒരു വിധത്തിൽ പ്രയോ​ഗി​ക്കുന്ന സന്ദർഭ​ങ്ങ​ളി​ലാണ്‌. ആ സന്ദർഭ​ത്തിൽ യഹോ​വ​യു​ടെ പരമാ​ധി​കാ​ര​വു​മാ​യി ബന്ധപ്പെട്ട, പുതിയ എന്തു സംഭവ​വി​കാ​സ​മാണ്‌ ഉണ്ടായ​തെ​ന്നും അതു സ്വർഗ​ത്തെ​യും ഭൂമി​യെ​യും എങ്ങനെ ബാധി​ക്കു​മെ​ന്നും ഉള്ളതാണ്‌ പൊതു​വെ ഇത്തരം പാട്ടു​ക​ളു​ടെ ഉള്ളടക്കം.—സങ്ക 96:11-13; 98:9; യശ 42:10, 13.

ഒക്ടോബർ 21-27

ദൈവ​വ​ച​ന​ത്തി​ലെ നിധികൾ | സങ്കീർത്തനം 100-102

യഹോ​വ​യു​ടെ അചഞ്ചല​സ്‌നേ​ഹ​ത്തോട്‌ നന്ദിയു​ള്ള​വ​രാ​യി​രി​ക്കുക

w23.03 12 ¶18-19

സ്‌നാ​ന​മേൽക്കാ​നാ​യി എങ്ങനെ ഒരുങ്ങാം?

¹⁸ നമുക്ക്‌ ഉണ്ടായി​രി​ക്കാ​വു​ന്ന​തിൽവെച്ച്‌ ഏറ്റവും വിലപ്പെട്ട ഒന്നാണ്‌ യഹോ​വ​യു​മാ​യുള്ള സ്‌നേ​ഹ​ബന്ധം. (സുഭാ​ഷി​തങ്ങൾ 3:3-6 വായി​ക്കുക.) അതു ശക്തമാ​ണെ​ങ്കിൽ ജീവി​ത​ത്തി​ലെ ഏതു പ്രശ്‌ന​ത്തെ​യും വിജയ​ക​ര​മാ​യി നേരി​ടാ​നാ​കും. തന്റെ ദാസന്മാ​രോ​ടുള്ള യഹോ​വ​യു​ടെ അചഞ്ചല​സ്‌നേ​ഹ​ത്തെ​ക്കു​റിച്ച്‌ ബൈബി​ളിൽ പലയി​ട​ത്തും പറഞ്ഞി​ട്ടുണ്ട്‌. അതിന്റെ അർഥം യഹോവ തന്റെ ദാസന്മാ​രെ ഒരിക്ക​ലും ഉപേക്ഷി​ക്കു​ക​യോ സ്‌നേ​ഹി​ക്കു​ന്നതു നിറു​ത്തി​ക്ക​ള​യു​ക​യോ ചെയ്യില്ല എന്നാണ്‌. (സങ്കീ. 100:5) ദൈവ​ത്തി​ന്റെ ഛായയി​ലാ​ണു നിങ്ങളെ സൃഷ്ടി​ച്ചി​രി​ക്കു​ന്നത്‌. (ഉൽപ. 1:26) അതു​കൊണ്ട്‌ നിങ്ങൾക്കും ഈ ഗുണം അനുക​രി​ക്കാ​നാ​കും. അത്‌ എങ്ങനെ ചെയ്യാം?

¹⁹ ആദ്യം​തന്നെ നന്ദിയു​ള്ള​വ​രാ​യി​രി​ക്കാൻ പഠിക്കുക. (1 തെസ്സ. 5:18) ദിവസ​വും നിങ്ങ​ളോ​ടു​തന്നെ ചോദി​ക്കുക: ‘യഹോവ എന്നോട്‌ എങ്ങനെ​യാ​ണു സ്‌നേഹം കാണി​ച്ചി​രി​ക്കു​ന്നത്‌?’ എന്നിട്ട്‌ യഹോവ ചെയ്‌തു​ത​ന്നി​രി​ക്കുന്ന ഓരോ കാര്യ​വും എടുത്തു​പ​റഞ്ഞ്‌ പ്രാർഥ​ന​യിൽ നന്ദി പറയുക. അപ്പോ​സ്‌ത​ല​നായ പൗലോ​സി​നെ​പ്പോ​ലെ യഹോവ സ്‌നേ​ഹ​ത്തോ​ടെ ചെയ്‌തി​രി​ക്കുന്ന ഓരോ കാര്യ​ത്തെ​യും നമുക്കു​വേണ്ടി തന്നിരി​ക്കുന്ന വ്യക്തി​പ​ര​മായ സമ്മാന​മാ​യി കാണുക. (ഗലാത്യർ 2:20 വായി​ക്കുക.) നിങ്ങ​ളോ​ടു​തന്നെ ഇങ്ങനെ​യും ചോദി​ക്കുക: ‘തിരിച്ച്‌ യഹോ​വ​യോ​ടുള്ള എന്റെ സ്‌നേഹം കാണി​ക്കാൻ ഞാൻ ആഗ്രഹി​ക്കു​ന്നു​ണ്ടോ?’ യഹോ​വ​യോ​ടുള്ള സ്‌നേഹം പ്രലോ​ഭ​ന​ങ്ങളെ ചെറു​ത്തു​നിൽക്കാ​നും പ്രശ്‌ന​ങ്ങളെ വിജയ​ക​ര​മാ​യി നേരി​ടാ​നും നിങ്ങളെ സഹായി​ക്കും. കൂടാതെ ആത്മീയ​പ്ര​വർത്ത​നങ്ങൾ മുടക്കം കൂടാതെ ചെയ്യാ​നും എപ്പോ​ഴും ദൈവത്തെ സ്‌നേ​ഹി​ക്കു​ന്നെന്നു തെളി​യി​ക്കാ​നും അതു നിങ്ങളെ പ്രേരി​പ്പി​ക്കും.

w23.02 17 ¶10

“സുബോ​ധ​മു​ള്ള​വ​രാ​യി​രി​ക്കുക; ജാഗ്ര​ത​യോ​ടി​രി​ക്കുക!”

¹⁰ നമ്മൾ ഒഴിവാ​ക്കേണ്ട ചില അപകട​ങ്ങ​ളാ​ണു ശൃംഗാ​രം, അമിത​മായ തീറ്റി​യും കുടി​യും, മുറി​പ്പെ​ടു​ത്തുന്ന സംസാരം, അക്രമം നിറഞ്ഞ വിനോ​ദ​പ​രി​പാ​ടി​കൾ, അശ്ലീലം തുടങ്ങിയ കാര്യങ്ങൾ. (സങ്കീ. 101:3) ശത്രു​വായ പിശാച്‌ യഹോ​വ​യു​മാ​യുള്ള നമ്മുടെ ബന്ധത്തെ തകർക്കാ​നുള്ള അവസരങ്ങൾ തേടി​ക്കൊ​ണ്ടി​രി​ക്കു​ക​യാണ്‌. (1 പത്രോ. 5:8) അതു​കൊണ്ട്‌ സൂക്ഷി​ച്ചി​ല്ലെ​ങ്കിൽ അവൻ നമ്മുടെ മനസ്സി​ലും ഹൃദയ​ത്തി​ലും മത്സരം, സത്യസ​ന്ധ​ത​യി​ല്ലായ്‌മ, അത്യാ​ഗ്രഹം, ശത്രുത, ധാർഷ്‌ഠ്യം, പക എന്നിവ​പോ​ലുള്ള കാര്യ​ങ്ങ​ളു​ടെ വിത്തുകൾ പാകും. (ഗലാ. 5:19-21) അതിന്റെ അപകടം ആദ്യ​മൊ​ന്നും നമ്മൾ തിരി​ച്ച​റി​യി​ല്ലാ​യി​രി​ക്കും. എന്നാൽ അത്തരം തെറ്റായ കാര്യങ്ങൾ മനസ്സിൽനിന്ന്‌ കളയാൻ പെട്ടെന്നു ശ്രമി​ച്ചി​ല്ലെ​ങ്കിൽ അവ അവി​ടെ​യി​രുന്ന്‌ ഒരു വിഷ​ച്ചെ​ടി​പോ​ലെ വളരും. അതു നമുക്ക്‌ അപകടം ചെയ്യും.—യാക്കോ. 1:14, 15.

w11 7/15 16 ¶7-8

യഹോവ നൽകുന്ന വ്യക്തമായ മുന്നറി​യി​പ്പു​കൾ നിങ്ങൾ ശ്രദ്ധി​ക്കു​മോ?

⁷ വ്യാ​ജോ​പ​ദേ​ഷ്ടാ​ക്ക​ളിൽനിന്ന്‌ അകന്നു​നിൽക്കു​ന്ന​തിൽ എന്തെല്ലാം ഉൾപ്പെ​ടു​ന്നു? നാം അവരെ വീട്ടി​ലേക്കു സ്വാഗ​തം​ചെ​യ്യു​ക​യോ അവരെ അഭിവാ​ദ്യം​ചെ​യ്യു​ക​യോ ഇല്ല. അവരുടെ പ്രസി​ദ്ധീ​ക​ര​ണങ്ങൾ വായി​ക്കു​ക​യോ അവർ ഉൾപ്പെ​ടുന്ന ടിവി പരിപാ​ടി​കൾ വീക്ഷി​ക്കു​ക​യോ അവരുടെ വെബ്‌​സൈ​റ്റു​കൾ സന്ദർശി​ക്കു​ക​യോ ഇന്റർനെ​റ്റിൽ (ബ്ലോഗി​ലും മറ്റും) അവർ എഴുതുന്ന കാര്യ​ങ്ങ​ളെ​ക്കു​റിച്ച്‌ അഭി​പ്രാ​യം എഴുതു​ക​യോ ഇല്ല. എന്തു​കൊ​ണ്ടാണ്‌ നാം ഇത്ര കടുത്ത ഒരു നിലപാ​ടെ​ടു​ക്കു​ന്നത്‌? സ്‌നേ​ഹം​നി​മി​ത്തം. “സത്യത്തി​ന്റെ ദൈവ​മായ” യഹോ​വയെ സ്‌നേ​ഹി​ക്കുന്ന നമുക്ക്‌ അവന്റെ സത്യവ​ച​നത്തെ വളച്ചൊ​ടി​ക്കുന്ന ഉപദേ​ശ​ങ്ങ​ളോട്‌ തെല്ലും താത്‌പ​ര്യ​മില്ല. (സങ്കീ. 31:5, ന്യൂ ഇൻഡ്യ ബൈബിൾ ഭാഷാ​ന്തരം; യോഹ. 17:17) യഹോ​വ​യു​ടെ നാമം, അതിന്റെ അർഥം, ഭൂമി​യെ​ക്കു​റി​ച്ചുള്ള ദൈവ​ത്തി​ന്റെ ഉദ്ദേശ്യം, മരിച്ച​വ​രു​ടെ അവസ്ഥ, പുനരു​ത്ഥാന പ്രത്യാശ എന്നിവ ഉൾപ്പെ​ടെ​യുള്ള വിശിഷ്ട സത്യങ്ങൾ നമ്മെ പഠിപ്പി​ക്കാൻ ദൈവം ഉപയോ​ഗിച്ച അവന്റെ സംഘട​ന​യെ​യും നാം സ്‌നേ​ഹി​ക്കു​ന്നു. ഇവയും മറ്റു സത്യങ്ങ​ളും ആദ്യമാ​യി കേട്ട​പ്പോൾ നിങ്ങൾക്കു​ണ്ടായ സന്തോഷം ഓർക്കാ​നാ​കു​ന്നു​ണ്ടോ? ഈ സത്യങ്ങൾ നിങ്ങളെ പഠിപ്പിച്ച സംഘട​നയെ ആരെങ്കി​ലും ദുഷി​ക്കു​ന്നതു കേട്ട്‌ നിങ്ങൾ സത്യം വിട്ടു​പോ​കു​മോ, സംഘട​ന​യ്‌ക്കെ​തി​രെ തിരി​യു​മോ?—യോഹ. 6:66-69.

⁸ വ്യാ​ജോ​പ​ദേ​ഷ്ടാ​ക്കൾ എന്തുതന്നെ പറഞ്ഞാ​ലും നാം അവരുടെ പിന്നാലെ പോകില്ല! അത്തരം പൊട്ട​ക്കി​ണ​റ്റി​ന​രി​കി​ലേക്കു പോകു​ന്നവർ വഞ്ചിക്ക​പ്പെ​ടു​ക​യേ​യു​ള്ളൂ. അവരെ കാത്തി​രി​ക്കു​ന്നത്‌ നിരാ​ശ​യാണ്‌. കാലങ്ങ​ളാ​യി ദൈവ​ത്തി​ന്റെ നിശ്വസ്‌ത വചനത്തിൽനി​ന്നു സത്യത്തി​ന്റെ നവോ​ന്മേഷം പകരുന്ന തെളി​നീർ നൽകി നമ്മുടെ ദാഹമ​ക​റ്റുന്ന സംഘട​ന​യോ​ടും യഹോ​വ​യോ​ടും നമുക്കു വിശ്വ​സ്‌ത​രാ​യി​രി​ക്കാം!—യെശ. 55:1-3; മത്താ. 24:45-47.

ആത്മീയരത്നങ്ങൾ

it-2-E 596

ഞാറപ്പക്ഷി

ധാരാളം ഭക്ഷണം അകത്താ​ക്കി​യ​ശേഷം ഞാറപ്പക്ഷി ശാന്തമായ ഒരു സ്ഥലത്ത്‌ പോയി തല തോളി​ലാ​ഴ്‌ത്തി മണിക്കൂ​റു​ക​ളോ​ളം ദുഃഖ​ഭാ​വ​ത്തിൽ ഇരിക്കും. സങ്കീർത്ത​ന​ക്കാ​രൻ വിജന​ഭൂ​മി​യി​ലെ ഒരു ഞാറപ്പ​ക്ഷി​യോ​ടു തന്നെ താരത​മ്യം ചെയ്‌ത​പ്പോൾ തന്റെ ദുഃഖ​ത്തി​ന്റെ ആഴം എത്രയാ​ണെന്നു പറയു​ക​യാ​യി​രു​ന്നു.—സങ്ക 102:6.

ഒക്ടോബർ 28–നവംബർ 3

ദൈവ​വ​ച​ന​ത്തി​ലെ നിധികൾ | സങ്കീർത്തനം 103-104

“നാം പൊടി​യെന്നു ദൈവം ഓർക്കു​ന്നു”

w23.07 21 ¶5

യഹോ​വയെ അനുക​രി​ക്കുക, വഴക്കം കാണി​ക്കു​ക

⁵ വഴക്കം കാണി​ക്കാൻ യഹോ​വയെ പ്രേരി​പ്പി​ക്കുന്ന രണ്ടു ഗുണങ്ങ​ളാ​ണു താഴ്‌മ​യും അനുക​മ്പ​യും. ഉദാഹ​ര​ണ​ത്തിന്‌ സോ​ദോ​മി​ലെ ദുഷ്ടമ​നു​ഷ്യ​രെ നശിപ്പി​ക്കാൻപോ​കുന്ന സമയത്ത്‌ യഹോവ താഴ്‌മ കാണി​ച്ചത്‌ എങ്ങനെ​യാ​ണെന്നു നോക്കുക. തന്റെ ദൂതന്മാ​രെ അയച്ച്‌ യഹോവ നീതി​മാ​നായ ലോത്തി​നോ​ടു മലനാ​ട്ടി​ലേക്ക്‌ ഓടി​പ്പോ​കാൻ പറഞ്ഞു. പക്ഷേ അങ്ങോ​ട്ടു​പോ​കാൻ ഭയം തോന്നി​യ​തു​കൊണ്ട്‌ അടുത്തുള്ള ചെറിയ പട്ടണമായ സോവ​റി​ലേക്കു പോകാൻ തന്നെയും കുടും​ബ​ത്തെ​യും അനുവ​ദി​ക്ക​ണ​മെന്ന്‌ അദ്ദേഹം അപേക്ഷി​ച്ചു. യഹോ​വ​യ്‌ക്കു വേണ​മെ​ങ്കിൽ ലോത്തി​നോട്‌, ‘ഞാൻ പറയു​ന്ന​തങ്ങ്‌ അനുസ​രി​ച്ചാൽ മതി’ എന്നു പറയാ​മാ​യി​രു​ന്നു. കാരണം ആ പട്ടണവും നശിപ്പി​ക്കാൻ യഹോവ തീരു​മാ​നി​ച്ചി​രു​ന്ന​താണ്‌. എന്നിട്ടും അവി​ടേക്കു പോകാൻ യഹോവ ലോത്തി​നെ അനുവ​ദി​ച്ചു. ആ പട്ടണം നശിപ്പി​ച്ചു​മില്ല. (ഉൽപ. 19:18-22) ഇനി, വർഷങ്ങൾക്കു​ശേഷം നിനെ​വെ​യി​ലെ ആളുക​ളോട്‌ യഹോവ അനുകമ്പ കാണിച്ചു. ആ നഗര​ത്തെ​യും അതിലെ ദുഷ്ടമ​നു​ഷ്യ​രെ​യും പെട്ടെ​ന്നു​തന്നെ നശിപ്പി​ക്കു​മെന്ന്‌ അറിയി​ക്കാൻ യഹോവ യോന പ്രവാ​ച​കനെ അങ്ങോട്ട്‌ അയച്ചു. പക്ഷേ നിനെ​വെ​ക്കാർ മാനസാ​ന്ത​ര​പ്പെ​ട്ട​തു​കൊണ്ട്‌ യഹോ​വ​യ്‌ക്ക്‌ അവരോട്‌ അനുകമ്പ തോന്നു​ക​യും ആ നഗരം നശിപ്പി​ക്കേണ്ടാ എന്നു തീരു​മാ​നി​ക്കു​ക​യും ചെയ്‌തു.—യോന 3:1, 10; 4:10, 11.

w23.09 6-7 ¶16-18

ശിം​ശോ​നെ​പ്പോ​ലെ യഹോ​വ​യിൽ ആശ്രയി​ക്കു​ക

¹⁶ ശിം​ശോ​നു തന്റെ തെറ്റിന്റെ മോശം ഫലങ്ങൾ അനുഭ​വി​ക്കേ​ണ്ടി​വ​ന്നെ​ങ്കി​ലും അദ്ദേഹം യഹോ​വയെ സേവി​ക്കു​ന്നതു നിറു​ത്തി​ക്ക​ള​ഞ്ഞി​ല്ലെന്നു നമ്മൾ കണ്ടു. അതു​പോ​ലെ നമുക്കും ഒരു തെറ്റു പറ്റിയി​ട്ടു തിരുത്തൽ കിട്ടു​ക​യോ സേവന​പ​ദവി നഷ്ടപ്പെ​ടു​ക​യോ ഒക്കെ ചെയ്‌താൽ നമ്മളും യഹോ​വയെ സേവി​ക്കു​ന്നതു നിറു​ത്തി​ക്ക​ള​യ​രുത്‌. കാരണം യഹോവ ഒരിക്ക​ലും നമ്മളെ ഉപേക്ഷി​ച്ചു​ക​ള​യില്ല. (സങ്കീ. 103:8-10) ശിം​ശോ​ന്റെ കാര്യ​ത്തിൽ ചെയ്‌ത​തു​പോ​ലെ തെറ്റു​ക​ളൊ​ക്കെ പറ്റിയാ​ലും തന്റെ ഇഷ്ടം ചെയ്യാൻവേണ്ടി യഹോ​വ​യ്‌ക്കു തുടർന്നും നമ്മളെ ഉപയോ​ഗി​ക്കാ​നാ​കും.

¹⁷ മൈക്കിൾ എന്ന ചെറു​പ്പ​ക്കാ​രന്റെ അനുഭവം നോക്കുക. ഒരു ശുശ്രൂ​ഷാ​ദാ​സ​നും സാധാരണ മുൻനി​ര​സേ​വ​ക​നും ആയി അദ്ദേഹം സഭാകാ​ര്യ​ങ്ങ​ളിൽ തിര​ക്കോ​ടെ പ്രവർത്തി​ക്കു​ക​യാ​യി​രു​ന്നു. എന്നാൽ അദ്ദേഹം ഒരു തെറ്റു ചെയ്‌തു. അങ്ങനെ അദ്ദേഹ​ത്തി​നു തന്റെ സേവന​പ​ദ​വി​ക​ളെ​ല്ലാം നഷ്ടമായി. അദ്ദേഹം പറയുന്നു: “അതുവരെ ദൈവ​സേ​വ​ന​ത്തോ​ടു ബന്ധപ്പെട്ട എന്റെ കാര്യ​ങ്ങ​ളെ​ല്ലാം ഭംഗി​യാ​യി പോകു​ക​യാ​യി​രു​ന്നു. പെട്ടെ​ന്നാണ്‌ എല്ലാം നഷ്ടമാ​യത്‌. യഹോ​വ​യ്‌ക്കു​വേണ്ടി ഇനി ഒന്നും ചെയ്യാ​നാ​കി​ല്ലെന്ന്‌ എനിക്കു തോന്നി. എന്നാൽ, യഹോവ എന്നെ ഉപേക്ഷി​ച്ചു​ക​ള​യി​ല്ലെന്ന്‌ എനിക്ക്‌ അറിയാ​മാ​യി​രു​ന്നു. പക്ഷേ അപ്പോ​ഴും, യഹോ​വ​യു​മാ​യി ആ പഴയ ബന്ധത്തി​ലേക്കു വരാനാ​കു​മോ, മുമ്പ​ത്തെ​പ്പോ​ലെ സഭയിൽ ഉത്തരവാ​ദി​ത്വ​ങ്ങൾ ചെയ്യാൻ പറ്റുമോ എന്നൊക്കെ ഞാൻ ചിന്തിച്ചു.”

¹⁸ എന്തായാ​ലും മൈക്കിൾ യഹോ​വ​യു​ടെ ഇഷ്ടം ചെയ്യു​ന്നതു നിറു​ത്തി​ക്ക​ള​ഞ്ഞില്ല. അദ്ദേഹം ഇങ്ങനെ​യും പറയുന്നു: “യഹോ​വ​യു​മാ​യി പഴയ ബന്ധത്തി​ലേക്കു വരാൻ ഞാൻ ശ്രമം തുടങ്ങി. അതിനു​വേണ്ടി പതിവാ​യി ഉള്ളുതു​റന്ന്‌ പ്രാർഥി​ക്കു​ക​യും ദൈവ​വ​ചനം പഠിക്കു​ക​യും അതെക്കു​റിച്ച്‌ ആഴത്തിൽ ചിന്തി​ക്കു​ക​യും ചെയ്‌തു.” അങ്ങനെ കുറച്ച്‌ കാലം​കൊണ്ട്‌ മൈക്കി​ളി​നു തന്റെ നിയമ​നങ്ങൾ തിരി​ച്ചു​കി​ട്ടി. ഇപ്പോൾ അദ്ദേഹം ഒരു മൂപ്പനും സാധാരണ മുൻനി​ര​സേ​വ​ക​നും ആണ്‌. അദ്ദേഹം പറയുന്നു: “ആ സമയത്ത്‌ സഭയിൽനിന്ന്‌, പ്രത്യേ​കിച്ച്‌ മൂപ്പന്മാ​രിൽനിന്ന്‌, എനിക്കു നല്ല പിന്തു​ണ​യും പ്രോ​ത്സാ​ഹ​ന​വും കിട്ടി. യഹോവ എന്നെ ഇപ്പോ​ഴും സ്‌നേ​ഹി​ക്കു​ന്നു​ണ്ടെന്നു തിരി​ച്ച​റി​യാൻ അത്‌ സഹായി​ച്ചു. എനിക്ക്‌ ഇപ്പോൾ വീണ്ടും ശുദ്ധമ​ന​സ്സാ​ക്ഷി​യോ​ടെ സഭയിൽ സേവി​ക്കാൻ കഴിയു​ന്നു. ഈ അനുഭവം എന്നെ ഒരു കാര്യം പഠിപ്പി​ച്ചു. ആത്മാർഥ​മാ​യി പശ്ചാത്ത​പി​ക്കു​ന്ന​വ​രോട്‌ യഹോവ തീർച്ച​യാ​യും ക്ഷമിക്കും.” നമുക്കു തെറ്റു പറ്റിയാ​ലും അതു തിരു​ത്തു​ക​യും തുടർന്നും യഹോ​വ​യിൽ ആശ്രയി​ക്കു​ക​യും ചെയ്‌താൽ യഹോവ നമ്മളെ വീണ്ടും ഉപയോ​ഗി​ക്കു​ക​യും അനു​ഗ്ര​ഹി​ക്കു​ക​യും ചെയ്യു​മെന്ന്‌ ഉറപ്പാണ്‌.—സങ്കീ. 86:5; സുഭാ. 28:13.

w23.05 26 ¶2

നിങ്ങൾക്ക്‌ ആത്മീയ​ല​ക്ഷ്യ​ങ്ങ​ളിൽ എത്തി​ച്ചേ​രാ​നാ​കും!

² ഒരു ലക്ഷ്യം വെച്ചിട്ട്‌ ഇതുവരെ അതിൽ എത്തി​ച്ചേ​രാ​നാ​യി​ല്ലെ​ങ്കി​ലും നിരാ​ശ​പ്പെ​ട​രുത്‌. ഒരു ചെറിയ ലക്ഷ്യത്തിൽ എത്തി​ച്ചേ​രാൻപോ​ലും മിക്ക​പ്പോ​ഴും ഒരുപാ​ടു സമയവും കഠിന​ശ്ര​മ​വും ആവശ്യ​മാണ്‌. എന്നിട്ടും ലക്ഷ്യത്തിൽ എത്തി​ച്ചേ​രാൻ നിങ്ങൾ ആഗ്രഹി​ക്കു​ന്നു എന്നതിൽനി​ന്നും ഒരു കാര്യം മനസ്സി​ലാ​ക്കാം: യഹോ​വ​യു​മാ​യുള്ള ബന്ധത്തെ നിങ്ങൾ വില​യേ​റി​യ​താ​യി കാണുന്നു, യഹോ​വ​യ്‌ക്ക്‌ ഏറ്റവും നല്ലതു കൊടു​ക്കാൻ ആഗ്രഹി​ക്കു​ന്നു. നിങ്ങളു​ടെ ശ്രമങ്ങളെ യഹോവ വില​പ്പെ​ട്ട​താ​യി കാണു​ന്നുണ്ട്‌. എന്നാൽ നിങ്ങൾ കഴിവിന്‌ അപ്പുറം ചെയ്യാൻ യഹോവ പ്രതീ​ക്ഷി​ക്കു​ന്നില്ല. (സങ്കീ. 103:14; മീഖ 6:8) അതു​കൊണ്ട്‌ സ്വന്തം സാഹച​ര്യ​ങ്ങ​ളെ​ക്കു​റിച്ച്‌ ചിന്തിച്ച്‌ അതിനു ചേരുന്ന ലക്ഷ്യങ്ങൾ വെക്കുക. അതിൽ എത്തി​ച്ചേ​രാൻ എന്തു ചെയ്യാ​നാ​കും? ചില കാര്യങ്ങൾ നോക്കാം.

ആത്മീയരത്നങ്ങൾ

cl 55 ¶18

സൃഷ്ടി​ക്കു​ന്ന​തി​നുള്ള ശക്തി—‘ആകാശ​ത്തി​ന്റെ​യും ഭൂമി​യു​ടെ​യും നിർമാ​താവ്‌’

¹⁸ യഹോവ തന്റെ സൃഷ്ടി​പ്പിൻശക്തി ഉപയോ​ഗി​ക്കു​ന്ന​തിൽനി​ന്നു നാം എന്തു പഠിക്കു​ന്നു? സൃഷ്ടി​യു​ടെ വൈവി​ധ്യം നമ്മിൽ ഭയാദ​ര​വു​ണർത്തു​ന്നു. ഒരു സങ്കീർത്ത​ന​ക്കാ​രൻ ഇങ്ങനെ ഉദ്‌ഘോ​ഷി​ച്ചു: “യഹോവേ, നിന്റെ പ്രവൃ​ത്തി​കൾ എത്ര പെരു​കി​യി​രി​ക്കു​ന്നു! . . . ഭൂമി നിന്റെ സൃഷ്ടി​ക​ളാൽ നിറെ​ഞ്ഞി​രി​ക്കു​ന്നു.” (സങ്കീർത്തനം 104:24) എത്ര സത്യം! ജീവശാ​സ്‌ത്ര​ജ്ഞ​ന്മാർ പത്തു ലക്ഷത്തിൽപ്പരം ജീവി​വർഗ​ങ്ങളെ തിരി​ച്ച​റി​ഞ്ഞി​ട്ടുണ്ട്‌; എന്നാൽ അവയുടെ എണ്ണം ഒരു കോടി​യാണ്‌, മൂന്നു കോടി​യാണ്‌, അതിൽ കൂടു​ത​ലാണ്‌ എന്നിങ്ങനെ വ്യത്യസ്‌ത അഭി​പ്രാ​യ​ങ്ങ​ളുണ്ട്‌. ചില​പ്പോൾ തന്റെ സർഗശക്തി നഷ്ടപ്പെ​ടു​ന്ന​താ​യി ഒരു മനുഷ്യ​ക​ലാ​കാ​രൻ കണ്ടെത്തി​യേ​ക്കാം. അതിൽനി​ന്നു വ്യത്യ​സ്‌ത​മാ​യി, യഹോ​വ​യു​ടെ സർഗശക്തി—പുതി​യ​തും വൈവി​ധ്യ​മാർന്ന​തു​മായ സൃഷ്ടികൾ നടത്താ​നുള്ള അവന്റെ ശക്തി—ഒരിക്ക​ലും നിലച്ചു​പോ​കു​ന്നില്ല.