JULHO

Dhaatedhene Yesu awogiliye ni eriliyena — enavolowelavo matikiniho, oliye atajhiha mohihiyedhedha makalelo owubuwela ni thagaraga anna babe. (Juwa. 14:9) Nnahudhera ddi ni matikiniho a Yesu? Yesu ni Yehova enonidhivela vanlubale. Yesu agali velaboni ya vati, oliye ahoniha wihina owadhivela vanlubale athu, wodhela wawerana matikiho wihina awobole mugoyini. Nlabo dhaala alobwana abiili ohona, oloba wi Yesu aakavihere. (Mat. 20:30-34.) Yesu ‘waweddela thagaraga’ alobwana ale, bumwahaya adhe aavulumusege. Versu ela ni eGerego, madhu owi ‘waweddela thagaraga’, enagana thagaraga dhinadhela vati va murima, dhinamuthukulela muthu okala owukuwene. Si thagaraga dhendha, dhinathukulela wooniha odhivela, dhaamuthukulele Yesu wavaha yoojha aredda ni wavulumusa aliba maranya. (Mat. 15:32; Mar. 1:41) Bumwahaya, kananganyedhe wihina Yehova, Mulugu a ‘thagaraga’ ni mwanaye Yesu, enonidhivela vanlubale ni enowukuwa yanonaga nifwanyiwaga makathamiho. (Luk. 1:78; 1 Ped. 5:7) Nihikanna ebaribari wihina Yehova ni mwanaye Yesu, enoofuna vanlubale wamariha makathamiho enanifwanya! Namasugwera 04/23 epaddi 3 ddima 4-5

Nnohowela werana dhatedhene nnandihu wihina nisukume mubuwelo ni dhithu dha elabo ela ya Saddana. Namwilerigi ni naamuhudheraga Bibiliya, nnodhaaliha mu buwelo wehu ni dhithu dhapama ni dhowogowa. Odhowa omutugumanoni ni wapara mabasa olaleya, winere onikavihera obarela mubuwelo wehu. Nimakalelo yala, Yehova anere wakwanihedha mpaganyo waye wohunihiya wehiwa ni dhithu nahinandihu ovilelana. (1 Kor. 10:12, 13) Ola mudhidhi kadda muthu wa iyo nnahowelihu omuloba Yehova wihina anikavihere odhowagave nikalaga ororomeleya malabo yala orusa. Yehova anafuna wihina ‘ninfugulele murima dhehu.’ (Sal. 62:8) Omutamalelege ni omuthithimihege Yehova wodhela dhithu dhatedhene uwereliye. Omulobe nikavihero wihina okale oliba murima wakala mmalaleyelo. Malabo aamateene omulobege Yehova wihina ukavihere wawanana makathamiho ni wanda ogonjhiha yoweha si yoweha enufwanye osogolo. Kuhiye ethu newene muthu wuhiha olobela wa Yehova. Namasugwera 05/23 epaddi 7 ddima 17-​18

Mwahaya bwaddi nigadhowa omutugumanoni? Ethu enlubaleya fumuthithimiha Yehova. (Sal. 26:12; 111:1) Teto, kanajhomba omutugumani wihina nilibihane mmodha ni mukwaye mudhidhi yola worusa nnakalihu. (1 Tes. 5:11) Bumwahaya navenyihaga moono wihina naakule, ninna werana dhithu ndha biili. Mbwenye nafunaga ovaha dhowakula, iyo podi obajhaga woova. Noovaga ovenyiha moono wihina naakule obe ofunaga ovaha dhowakula dhehu dila dhowinjhivadhene, mbwenye nahitonyiwaga ninga mwafunelihu. Nnawanena aavi makathamiho ala? Murumiwi Pawulo alebenliye akudda Eberewu egi: ‘Mulibihanege mmodha ni mukwaye.’ Vano, noonelamo wihina dhowakula dhehu dhokweya dhinowalibiha amodha, nnokanna efunelo yovaha dhowakula dhimodha. Teto naarive nahitonyiwaga ninga mwafunelihu, nnohagalala nawonaga addibila amodha evahaga dhowakula dhewa dila dhowinjhivadhene. — 1 Ped. 3:8. Namasugwera 04/23 epaddi 20 ddima 1-3

Mwene ovuwiha egi maJudewu yaali muudharini elabo yoBabiloniya muwari mwa yaka 70, yere ohogolowela elabo yewa wIzarayeli. (Esd. 1:2-4) Mwebaribareene di Yehova eeddiha dhithudha, mwaha wi akudda Babiloniyu kiyanna elemelelo yowahiya adhaari ewa ohogolowela elabo yewa. (Isa. 14:4, 17) Teto mwene ahanle vampaddoni weenya wihina maJudewu ehogolowele elabo yewa. Vano kadda muJudewu thabwathabwa anamaholela a emudhi yohowela othoma ohogolowela elabo yewa obe okalagave oBabiloniya. Yothoma ela kiyaali yokweya. Mwaha maJudewu owinjhiva yahimala wuluvala, bumwahaya weedda olenddo ole kiyakale ethu yokweya. Teto maJudewu owinjhiva yaali mento yabaliwe oBabiloniya ni ele yaali elabo yewa. Monelo wewa Izarayeli yaali elabo yamakolo ewa. MaJudewu amodha podi wera yahikanna dhoreela dhewa oBabiloniya. Bumwahaya kiyakale ethu yokweya aliwa ohiya dhoorela dhewa wihina ebajhe dhithudha dila yanabiili elabo yahanonniwa. Namasugwera 05/23 epaddi 14 ddima 1-2

Bibiliya anowoniha wihina nnohowela okala oovilela, woniha odhivela ni woniha thagaraga Lukaji 21:19 anihina: “Mwaha woovilela weenyu munere ovulusa eguminyu.” Kolosense 3:12 anihina: ‘Muware thagaraga.’ Teto 1 Tesalonisense 4:9, 10 anihina: ‘Makalelo oodhivelana mmodha ni mukwaye. . . . Iyo nnowukongomedhani wihina mudidele wenjhedhedha odhivela weenyu.’ Madhu ala yalebeliwe makiristawu yanna ni yoniha ovilela, odhivela ni thagaraga. Naarive dhigaali ndho aliwa yohowela odhowagave yonihaga dhikalelo ndha. Ni iyoya nnohowela werana emodhave. Wihina wande woniha dhikalelo ndha, osugwe makalelo makiristawu oobajha yonihiliwa dhikalelo ndha. Ni makalelo yaal onere woona makalelo owatajhiha makiristawu ala wihina okale owiwegeredhene mahoso manlubale wahinafiye. Nabajha ovilela ovanene, enere okala yokweya ovilela mahoso manlubale wafiya. Namasugwera 07/23 epaddi 3 ddima 4, 8

Naarive akala nili makiristawu othikitheliwa obe a “mambila mamodha” aatene iyo nnohowela odhowagave neddaga dila yela. Mwaha eyo enere onikavihera odhowagave nimwebedhaga Yehova ovanene ni osogolo nawakela mareeliho enaadhena Omwene wa Mulugu. (Juwa. 10:16) Okuma yaka ya 1919, matxikwi ni matxikwi aathu, enna okuma mBabiloniya Munlubale anoniwe ninga dhigereja dhowoota, vano enna ohara “Dila Yoweela.” Yehova ahapaganya maJudewu wihina eere wabarela wi ehapadduwele ethu-sithu yakumaga oBabiloniya. (Isa. 57:14) Nerege malabo yaala enopadduwa emodhave ni “Dila Yoweela?” Hee enopadduwa. Yakadhene mundduli yahinafiye yaka ya 1919, Yehova ahaalabihedha alobwana ororomeleya wihina yakavihere amodha okuma mBabiloniya Munlubale. (Omusugwe Isaías 40:3) Alobwana ala, yahegeredha dila wihina athu enna murima wapama yande ohiya dhigereja dhowoota wihina emwebedhege Yehova vamodha ni nlogo naaye. Namasugwera 05/23 epaddi 15-16 ddima 8-9

Yehova kanafuna wihina neregena dhithu mwaha owaddihedhiwa, mbwenye anafuna wihina neregena ni murima wehu waatene. (2 Kor. 9:7) Akala kunna efunelo yowakwanihedha yoluba yawo, yere owomela wiiwaddihedha wihina wakwanihedhe? Kasugwa yotajhiha ya murumiwi Pawulo, oliye ohuwoga egi: ‘Ginosumulula mwiili waaga ni ginoweddiha ninga mudhaari.’ (1 Kor. 9:25-27, nota.) Pawulo owiwaddihedha werana ele eli yapama naarive ahinna efunelo yowerana. Ki Yehova oonamo aavi? Yehova ahihagalala vanlubale wodhela ndhe erana Pawulo ni ahimureeliha mwaha wilibihedha waye. (2 Tim. 4:7, 8) Yehova onohagalala anonaga nilibihedhaga wihina naakwanihedha dholuba dhehu naarive nihinna efunelo. Enamuthukulela ohagalala sowihina, oliye ohunona wihina kannerana wihina nakwanihe baahi mutholoya, mbwenye mwaha nnomudhivela oliye. Ndala ninga Yehova amurelihiye Pawulo, Yehova aneere onreeliha mwaha wilibihedha wehu. (Sal. 126:5) Noonaga wihina Yehova ononireeliha, eyo enonithukulela iyo wilibihedha okanna efunelo yowakwanihedha dholuba dhehu. Namasugwera 05/23 epaddi 29 ddima 9-10

Murumiwi Pawulo aaladdanihe ale yahinavuluwe va nlabo na Yehova ni athu enagona. Aliwa kinoona wihina mudhidhi onoovira ni kinoona dhithu dhinapadduwa. Mwaha wa eyo, aliwa kinawedha wonelamo dhithu dhofuneya dhaapadduwaga ni enoodidela ohikosa ethu-sithu. Athu owinjhiva peeno ehigonelavo epaddi yomuzimuni. (Rom. 11:8) Aliwa kinarumedha wihina nnakalawo ‘malabo okuthula’ ni wihina ohoseya winlubale wihaddamela. (2 Ped. 3:3, 4) Mbwenye iyo nnowonelamo wi nlabo nno, ninna waddamela ni nnokala mento. (1 Tes. 5:6) Bumwahaya nnohowela okala omaleya, ni werana dhothoma dhapama. Mbwenye mwahaya bwaddi eyo ekala ethu yathima? Sathima werana eyo, mwaha enere onikavihera ohivolosiha ni muselu dha pulitika ni dhithu dha mwilaboni. Mudhidhi nnaddamelihu nlabo na Yehova, enerege othabwa oniwaddihedha wihina nivolowele muselu ndha. Mudhidhi nnaddamelihu nlabo na Yehova, enerege othabwa oniwaddihedha wihina nivolowele muselu ndha. Mbwenye kanithuwathuwe. Muzimu wa Yehova anere onikavihera okala oomaleyene ni werana dhothoma dhapama. — Luk. 12:11, 12. Namasugwera 06/23 epaddi 10 ddima 6-7

Ethu baani onubuweliwe wiwaga ndina na Sansawu? Mohanganyedha, ethu yobajha enadha mmubuweloni mwawo sowihina Sansawu aali mulobwana akopolo. Eyo ebaribari, mbwenye oliye aherana dhothoma dhabure. Mwaha wa yeyo ahifwanyiwa makathamiho. Mbwenye naarive dhigaali ndo, Yehova aapwasendhe osugwa dhithu dhapama erilena Sansawu. Yehova ohenya wihina yopadduwa yaye elebiwe mBibiliyani wi enikavihere. Yehova ahimulabihedha Sansawu wi eerena dhithu dhotikiniha wihina aakavihere amwaana Ezarayeli. Nuuvira yakadhene Sansawu agakwile, Yehova onvethela murumiwi Pawulo oleba ndina na Sansawu va listani naathu yonihile nroromelo nooliba. (Ebe. 11:32-34) Yopadduwa ya Sansawu podi onlibiha. Oliye ahimuroromela Yehova naarive afwanyiwaga makathamiho owinjhiva. Yopadduwa ya Sansawu enonilibihiha ni enonihudhiha. Namasugwera 09/23 epaddi 2 ddima 1-2

Iyo podi olibiha ovilela wehu wodhela olobela wa Yehova ni owoga dhithu dhaatene dhinanithuwathuwiha. (1 Tes. 5:17) Podi wera movanene kunafwanyiwe makathamiho manlubale. Naarive dhigaali ndo, we onolobela wa Yehova omulobaga wihina okale oovilela watakaleliwa, wanyanyuwa obe wahinonaga ethu onafuniwe werana? Akala ohukanna elemelelo yomuloba nikavihero Yehova wafwanyiwaga makathamiho a kadda labo, we onere werana emodhave wafwanyiwaga makathamiho manlubale. Teto onere okanna ebaribari wihina Yehova ohunona mudhidhi ni makalelo anukaviheriye wahowelaga. (Sal. 27:1, 3) Nabajha ovilela ovanene, enere okala yokweya ovilela mahoso manlubale wafiya. (Rom. 5:3) Mwahaya bwaddi nigawoga ndo? Addibila owinjhiva ehonelamo wihina yafwanyiwaga dhoweha enokanna kopolo wihina yande ogonjhiha dhoweha dhimodha dhinaharela. Yafwanyiwaga makathamiho ni yandaga ovilela, nroromelo enniwana wi Yehova nnothabwa oliba. Nroromelo nenno nnowakavihera wagonjhiha makathamiho enaharela. (Tiya. 1:2-4) Namasugwera 07/23 epaddi 3 ddima 7-8

Wiyeviha ni thagaraga anna Yehova dhinomuthukulela okala ookweya. Motajhiha, Yehova ohoniha wiyeviha waye mudhidhi afunaga watolosa athu oSodoma ni Gomora. Aalabihedhaga angero aye Yehova owoga ni Lo wihina athawele omwangoni. Mbwenye mwaha wa woova oliye kaafuna odhowa. Vano Lo oloba wihina oliye vamodha ni emudhaye ethawele oZowar, luwani dhaala eng’ono Yehova aathomiliye ogujhula. Yehova ahafune, eere omuwaddihedha Lo ohara dhoholela dhaye, mbwenye Oliye orumedha moonelo wa Lo ni othoma ohigujhula luwani ele. (Gén. 19:18-22) Vasogolova nuuvira yaka dhowinjhivadhene, Yehova waweddela thagaraga athu oNinive woodhela omuruma namavuhulela Jonasi wihina awaddele wi luwani ele yere ogujhuliwa. Mbwenye athu oNinive nuutwaruwa, Yehova waweddela thagaraga, wodhela ohugujhula luwani ele. — Jonas 3:1, 10; 4:10, 11. Namasugwera 07/23 epaddi 21 ddima 5

Yotajhiha ya Jeyowaji enanihudhiha ddi? Musisi dha muthanko dhahitibeleya pama, muthankoya onohowela oseyihiwa ni ethu-sithu wihina wahimothe. Mbwenye ethu ele eseyihiwiwana yavenyihiwavo, nipevo nadhaaga muthanko ole onere omotha. Emodhave empadduwele Jeyowaji. Oliye akaviheriwa ni Jeyoyada, mbwenye Jeyoyada nuukwa teto mwaha olekethiwa naapostata Jeyowaji ahimotha epaddi yaye yomuzimuni vano ohiya okala oororomeleya wa Yehova. Nladdaniho nna nnowoniha wi iyo kanimwebedhege Yehova mwaha wi makolo ehu ni addibila mmulogoni enowerana emodhave ni enonikongomedha omwebedha oliye. Akala nnafuna wi nikanne wandana woliba ni Yehova, nnohowela olibiha odhivela ni omoova wehu Yehova, wodhela omuhudhera Bibiliya, opendda ndhe dhinilerihu ni olobela. (Jer. 17:7,8; Kol. 2:6, 7) Mwebaribarene dhithu dhinaniloba Yehova kadhinarusa. Ethu oliye anafuniye siila enafwanyeya va Eclesiastes 12:13, anihina: ‘Omoovege Mulugu eebaribari ni wawiwelelege malamulo aye, mwaha ola mutholo wa kadda muthu.’ Namoovaga Yehova, nnere wanda owanana yoweha si yoweha enanifwanye osogolo. Kawo muthu newene ethu-sithu enanoonge wandana wehu ni Yehova. Namasugwera 06/23 epaddi 19 ddima 17-19

Omambelelo wa versu 5 vinihina: ‘Ole akiratile vampaddoni wera.’ (Ovuhu. 21:5a) Madhu ala bavayekiwa mwaha wihina mwinnyene Yehova uhasoriha dila tharu mu livuru na Apocalipse. Kahiyo Yesu newene mungero anaasoriha madhu ala, mbwenye di mwinnyene Yehova aasorihile! Eyo enowoniha pamadhene wi iyo podi waroromela madhu enafwanyeya omagomihedho wa versu 5. Mwaha wa ddi? Mwaha wihina Yehova ‘kahiyo Mulugu owoota.’ (Tito 1:2) Bumwahaya iyo podi waroromela madhu enadha va Apocalipse 21:5 ni 6. Madhu ooharela Yehova anawogiye baala, ‘kasugwa!’ Madhu owi ‘kasugwa!’ ni egerego enolabihedhiwa dila dhowinjhivadhene mulivuru na Apocalipse. Ki ethu baani Mulugu awogiliye voharela? Oliye anowoga egi: ‘Gihisaddula dhithu dhatedhene vano dhixa.’ Masadduwo ala, Yehova anawerena osogolo, mbwenye Oliye ohukanna ebaribari wihina anere wakwaneliha mpaganyo ndha onfiyedha owoga ninga dhinna wakwanela. — Isa. 46:10. Namasugwera 11/23 epaddi 3-4 ddima 7-8

Dhahikalawo dhithu dhamurusa murumiwi Peduru epaddi yomuzimuni. Kasugwa dhotajhiha ndha: Yesu nuwoga wihina oohowela okwa wihina akwanelihe dhovuhulela dha mBibiliyani, Peduru omwakula Yesu wihina eyo kiyapadduwe. (Mar. 8:31-33) Teto dila dhowinjhivadhene Peduru vamodha ni anamahara amodha yookanganesa wihina enone baani aali athima vaari vewa. (Mar. 9:33, 34) Emahiyu Yesu ahinathi okwa Peduru ahikanna marulu ofiyedha ogwadda nibaru na mulobwana dhaala. (Juwa. 18:10) Teto emahiyu yele, Peduru obajha woova ofiyedha omukoodda Yesu dila tharu. (Mar. 14:66-72) Ele yahimuthukulela oliye wunla vanlubale. Peduru ahithabwa wukuuwa, naarive dhigali ndo Yesu kaamusukumme. Nuvenyihiwa muukwani Yesu ahinvaha Peduru ofuru wihina oonihe odhivela anniyena ni Yesu. Ohiya eyo Yesu ahinvaha Peduru mutholo muxa, wihina akale namakukula owiyeviha teto aasamalelege mambila aye. (Juwa. 21:15-17) Peduru werana ele Yesu aamulobiliye. Peduru aali oJeruzale nlabo na pentekoste. Teto aali mmodha wa athu oobajha wakela muzimu wotxena. Namasugwera 09/23 epaddi 22 ddima 6-7

Murumiwi Peduru anowakongomedha anamaholela mulogo egi: ‘Mwaakukulege mambila a Mulugu.’ (1 Ped. 5:1-4) Akala we oli namaholela mulogo, iyo nihinona wi onowadhivela vanlubale addibila ni onofuna wakavihera. Mbwenye malabo mamodha we podi okala oopinyaminyeya obe okala oogomene ofiyedha ohanda wakwaneliha mutholo wawo. Akala siyeyo enupadduwela onere ddi? Omwaaddele Yehova makalelo oliwe. Murumiwi Peduru ohuleba egi: ‘Muthu anavahiwa mabasa aaparege mabasaya ni kopolo anavahiwiye ni Mulugu.’ (1 Ped. 4:11) Addibila podi ofwanyiwaga makathamiho enaamale baahi navolowa elabo exa, mbwenye kudduwale wihina “namakukula munlubale,” Yesu Kiristu podi wakavihera addibila wupitha we. Oliye podi werana eyo mwilaboni yela obe mwilaboni exa. Ethu Yehova anafuniye wihina anamaholela mulogo yeregena fuwadhivela baahi addibila, wakukula ni okala “yotajhiha yapama vamentoni vewa.” Namasugwera 09/23 epaddi 29-30 ddima 13-14

Iyo nnohowela orabela makalelo owubuwela aathu ehinamwiwelela Mulugu. Nakanna mubuwelo mmodhave ni waathu ehinawiwelela malamulo a Yehova, iyo nnere okala ninga aliwa. (1 Kor. 3:19) “Mubuwelo wa elabo” malabo owinjhiva onowathukulela athu ohawiwelela malamulo a Yehova. Makiristawu amodha oPergamu ni oTiyatira yahivoloweliwa ni mubuwelo waathu yawapeele yawerana mararuwo ni yawebedha amulugu owoota. Yesu ahasumulula mwaha aliwa yowawenya mararuwo. (Ovuhu. 2:4, 20) Peeno, nnowaddihedhiwa vanlubale wihina nikanne monelo wa elabo. Amudhihu vamodha naale eninonne podi owogaga wihina nnothabwiha dhithudha ni wihina kawo muladdu nalupa malamulo a Yehova. Motajhiha, malabo mamodha aliwa podi owoga wihina kahi ethu yabure werana ele nnafunihu teto malagano a mBibiliyani bakale. Malabo mamodha iyo podi wubuwelaga wihina malamulo a Yehova kinoneleyamo. Teto iyo podi wehiwa wihina ‘nalupe malamulo’ nubuwelaga wihina kahi ethu yabure. — 1 Kor. 4:6. Namasugwera 07/23 epaddi 16 ddima 10-11

Mariya, maye Yesu ohowela kopolo wihina ande wakwaneliha ndhe Yehova amulobiye. Kubuwela makalelo oliye aaliye oothuwathuwa mwaha wakela mutholo ole woorusa aaddeliwiye ni mungero Gabiriyeli. Oliye kaateliwe, mbwenye eere okanna wari. Oliye kanamulelege mwaana, mbwenye oliye oohowela omulela mwaana aakale Mesiya. Woona wi oliye kanagonege ni mulobwana ande aavi omwaddela mwenddaye Juze? (Luk. 1:26-​33) Mariya andile aavi okanna kopolo? Oliye ahisayela nikavihero naathu amodha. Motajhiha, oliye ahimuloba mungero Gabiriyeli dhoholela wodhela mutholo akenliye. (Luk. 1:34) Voharela, Mariya omaruwa mowaguva odhowa murudda dhaala womwangoni luwani yoJuda wihina amwaredhele mmudhaye Elizabeti. Elizabeti ahimuthethela Mariya ni ahivetheliwa ni Yehova wihina awoge yovuhulela wodhela mwaana aabaliwe ni Mariya. (Luk. 1:39-45) Mariya owoga wihina Yehova ‘aherana dhithu dhakopolo ni moono waye.’ (Luk. 1:46-51) Yehova omulabihedha Gabiriyeli ni Elizabeti wihina emulibihe Mariya. Namasugwera 10/23 epaddi 14-15 ddima 10-12

Athu ang’onove dinna oneti woothikitheliwa ni muzimu wotxena, teto mwaha wa yeyo aliwa ehikanna wandana wavayekiwa ni Yehova. A 144.000 ala eneere olaba ni vamodha ni Yesu odhulu ninga anamakutha. (Ovuhu. 14:1) Mburo Woweela wa tabernakulu, enatapulela ekalelo yewa yokala aana a Mulugu oomuzimuni wula egaali elabo yavati. (Rom. 8:15-17) Mburo Wothabwa Weela, winatapulela odhulu wili Yehova. Vano “kurtina” yahiyaniha mburo Woweela ni mburo Wothabwa Weela, enatapulela mwiili wa Yesu. Mudhidhi aaliye velaboni yavati, kanna oneti wovolowa odhulu ni okala namakutha munlubale a tempulu yomuzimuni. yahiyaniha mburo Woweela ni mburo Wothabwa Weela, enatapulela mwiili wa Yesu. Nuuvelela egumaye ninga mukutho, Yesu ofugula dila wihina makiristawu oothikitheliwa ekanne oneti wodhowa odhulu. Ndala ninga Yesu, makiristawu oothikitheliwa enohowela ohiya mwiili wewa wemuthu wihina emwakele padamari ewa odhulu. ​—⁠ Heb. 10:19, 20; 1 Cor. 15:50. Namasugwera 10/23 epaddi 28 ddima 13

Jideyawu ahikala opwaseya mudhidhi alobwana owEfrayim nubajha omuwogela obure. (Juí. 8:1-3) Jideyawu kanyanyuwile. Oliye ahoniha wi aali owiyeviha wodhela wavuruwana alobwana ale yawogiwa, nuupwaseya oliye wakurumusa murima. Sapama anamaholela mulogo ohara yotajhiha ya Jideyawu yawogeliwaga obure, wodhela ovuruwana museluya nuupwaseya. (Tiya. 3:13) Ni makalelo yaala aliwa enookavihera odhana murenddele mmulogoni. Jideyawu nuutamaleliwa mwaha wobola nlogo mmadani mwakudda Midiya, oliye onvaha nthithimiho naatene Yehova. (Juí. 8:22, 23) Anamaholela mulogo enamutajhihe aavi Jideyawu? Aliwa podi onvaha nthithimiho naatene Yehova wodhela dhithu dhatedhene eneriwana. (1 Kor. 4:6, 7) Motajhiha, namaholela mulogo atamaleliwa mwaha makalelo aye ohudhiha, oliye podi owoga wihina andile owoga pama mwahaye nnikavihero na dhoholela dha madhu a Mulugu obe nnikavihero na dhoxagiha nnakelihu munikuruni mwa Yehova. Malabo mamodha anamaholela mulogo enohowela wipendda akala enothabwa withithimiha, ohiya omuthithimiha Yehova. Namasugwera 06/23 epaddi 4 ddima 7-8

Akala ethu nimulobilihu Yehova kinapadduwa ninga mwafunelihu, nnohowela wikoha, ‘Ethu yela ginalobimi ginohowela mwebaribarene?’ Malabo owinjhiva nnubuwela wihina nihinona ethu eli yapama wa iyo. Mbwenye podi wera ethu nnalobihu ovanene kinanikavihere osogolo. Akala nnolobela nlobaga wihina Yehova amarihe muladdu, podi wera ehikalawo makalelo mamodhaya oweddiha muselu ole. Teto ethu emodhaya sowihina dhithu dhimodha nnamulobihu Yehova podi wera kadhiniwanana ni efunelo yaye. (1 Juwa. 5:14) Kubuwela yotajhiha ya abaabi yamulobile Yehova wihina mwaniwa akaleve mwibaribarini. Enakala ninga yoloba ela kahi yabure mbwenye Yehova kadha amuwaddihedha muthu omulabela. Oliye anafuna wihina aatene iyo vamodha ni aniihuya, esakule omulabela Oliye. (Deut. 10:12, 13; 30:19, 20) Bumwahaya ohiya oloba wihina mwaniwa akaleve mwibaribarini, abaabi podi omuloba Yehova wihina aakavihere odahinya murima wa mwaniwa ni omukongomedha omudhivela Yehova ni wandana nuliye. — Pro. 22:6; Efe. 6:4. Namasugwera 11/23 epaddi 21 ddima 5; epaddi 23 ddima 12

Mwahaya bwaddi sathima walibiha addibilihu ni arogolihu? Livuru dhaala na referensiya nnowatapulela madhu aawogile murumiwi Pawulo wodhela ‘olibiha’ negi: “Olibiha enatapulela okala epaddi ya muthu wihina omulibihe oliye aafwanyiwaga makathamiho oorusa ovilelana.” Bumwahaya iyo naalibihaga addibilihu, nnowakavihera wihina evenye ni edhowegeeve yeddaga dila yeegumi. Mudhidhi wamutene nnamukaviherihu ddibilihu anafwanyiwa makathamiho, nnowoniha wihina nnomudhivela vanlubale. (2 Kor. 7:6, 7, 13) Muthu aamukalelaga nthebwa mukwaye anoona goyi anere ofuna omulibiha ni omukavihera. Bumwahaya voobajha iyo namukalela nthebwa vano vasogolova nnomulibiha muthuya. Kabeni noone makalelo murumiwi Pawulo iwanananihiye nthebwa na Yehova ni makalelo ananilibihiye. Murumiwi Pawulo ohuwoga wihina Yehova ‘Baabi anthebwa ni Mulugu a olibiha watene.’ — 2 Kor. 1:3. Namasugwera 11/23 epaddi 9-10 ddima 8-10

Anamahara aatene a Yesu podi ofwanyiwa makathamiho. Kasugwa yotajhiha ya murumiwi Pawulo. Oliye ohuwoga ni makiristawu oTesalonika egi: ‘Mudhidhi nigaali ni nyu, iyo nowuwaddelani wihina nnere ofwanyiwa mahoso, teto ninga munonilinyu siyeyo enanipadduwela.’ (1 Tes. 3:4) Ni ahalebela akudda Korintiyu egi: ‘Nnafuna munone makathamiho nnafwanyiwihu . . .  ofiyedha ohunivaha ejhehedho wi nnere odhawo ni egumi.’ (2 Kor. 1:8; 11:23-27) Ni iyowa peeno nnojheha ofwanyiwa makathamiho bi makathamiho. (2 Tim. 3:12) Mwaha okala mukiristawu akwawo obe amudhawo podi obajha wuweddiha mwamakalelo abure. Onofwanyiwa makathamiho omabasani mwaha okala oororomeleya? (Ebe. 13:18) Podi wera Onooharahariwaga ni anamathonga mwaha wapara mabasa oolaleya. Mbwenye naarive ofwanyiwaga makathamiho bi makathamiho, Pawulo onowoga wihina iyo podi ohagalala. Namasugwera 12/23 epaddi 10-11 ddima 9-10

Ohiya eyo Jako ahifwanyiwa makathamiho mamodha. Oliye ahikanna emudhi enlubale, mbwenye anaaye kiyiwanana. Aliwa yahifiyedha omuguliha ddibiliwa mmodha obaliwana, Juze, ninga mudhaari. Teto, ahima abili a Jako, Simiyawu ni Levi, yahitakaliha ndina na emudhi ni na Yehova. Ohiya eyo, Rakeli mwadha Jako akwile okodde mudhidhi ambalaga mwana anabili. Mwaha wa dala yaali oKana, naarive aguluvale, Jako owaddihedhiwa odhowa elabo yo Wijipitu. (Gén. 35:16-19; 37:28; 45:9-11, 28) Naarive dhigampadduwele dhatedhene dhendha, Jako kanahiyege okala ororomeleya wa Yehova ni mpaganyo dhaye. Teto, Yehova omooniha Jako wi omurumedha vamentoni vaye. Motajhiha, Yehova kaahiya omureeliha Jako ni dhithu dhomwilini. Teto Jako, ahimutamalela vanlubale Yehova nuugumana ni mwanaye Juze — yamulekethiwa wi ohukwa yakadhene mundduli! Wandana woliba Jako aaniyena ni Yehova fwamukavihere ovilelana makathamiho matene yanfwanye. (Gén. 30:43; 32:9, 10; 46:28-30) Nihiyowa nadidelave okanna wandana woliba ni Yehova, nnere wanda wagojhiha makathamiho nahinajhehedhihu. Namasugwera 04/23 epaddi 15 ddima 6-7

Va Salmo 23, Davidi ohoniha wihina oororomela wi Yehova eere omusamalela. Oliye ahiwoga wodhela wandana woliba anniyena ni Yehova ni ahimwithana Yehova Namakukula aye. Davidi aali oobareleyene mwaha onona wihina di Yehova anamuholela, teto oomuroromela ni murimaye waatene. Davidi ahinona wihina Yehova erege omoniha odhivela waye malabo aamatene. Ethu yamuthukulela Davidi omuroromela Yehova yaali ddi? Davidi oowonelamo wihina Yehova oomusamalela malabo aamatene, mwaha wihina kavo ethu yamuhalela, ohiya eyo Davidi ahinona wihina Yehova aali mukwaye ni oomurumedha vamentoni vaye. Bumwahaya Davidi ahinona wihina naarive epadduwe ethu-sithu osogolo, Yehova erege omusamalela. Nroromelo anniyena nowihina Yehova anomudhivela, naali nooliba opitha ethu-sithu. Teto naali nroromelo nenna namuthukulela Davidi okanna murenddele ni ohagalala ni ele anniyena. — Sal. 16:11. Namasugwera 01/24 epaddi 29 ddima 12-13

Okuma mudhidhi wa koddo yanabili ewaniwe wapela elabo yaatene yavati, nlogo na Yehova nnowanda wapara mabasa oolaleya yahiharahariwaga vanlubale ninga kale. Mwebaribarene mabasa ala oolaleya enna othabwa wenjhedhedheya wapela elabo yaatene. Peeno, addibila a Nikuru Nolamulela enna odhowave eharaga dhoholela dha Yesu. Aliwa enowerana eyo wodhela werana dhothoma dhiniwanana ni efunelo ya Yesu. Ohiya eyo, Anameeddela mulogo ni anamaholela mulogo enolabihedhiwa wihina yawaddele addibila ammulogoni dhoholela enakeliwa nNikuru Nolamulela. Anamaholela mulogo ethikitheliwe omuzimuni eli ‘nlada noojha’ na Yesu. (Ovuhu. 2:1) Ebaribari wi anamaholela aatene kilogomanne ni enoviriganiha. Moyizeji ni Jozuwe yoviriganiha malabo mamodha ni arumiwiya yoviriganiha. (Núm. 20:12; Jos. 9:14, 15; Rom. 3:23) Naarive dhigaali ndo, iyo nnowanda woona pamadhene wihina Yesu anomuholela mudhaari oororomeleya ni anamaholela mulogo, teto anerege walabihedha alobwana ala. Bumwahaya nnohowela ororomela dhoholela Yesu ananivahiye alabihedhaga alobwana ala oororomeleya. Namasugwera 02/24 epaddi 23-24 ddima 13-14

Nihiyoya podi onvuwiha Yehova nawogaga wodhela Oliye nuudhivela vamodha ni omutamalela. Nakala mmalaleyelo nnohowela wubuwela wi ethu yathimaya fuwakavihera athu omwaddamela Yehova ni wakavihera aliwa omoonaga Yehova ninga Babi oodhivela. (Tiya. 4:8) Iyo nnohagalala vanlubale wawoniha athu mBibiliyani wi Yehova Mulugu oodhivela, owoogowa, athotho, akopolo ni ohukanna dhikalelo dhimodha dhotikiniha. Makalelo mamodhaya onvuwiha ni oomuhagalasa Yehova fuudhela wilibihedha wihina nimutajhihe. Neragana ndo athu amodha enere woona wihina nihiyana ni athu owinjhiva. (Mat. 5:14-16) Nakala naliwa kadda labo, podi wera nnere opatha mudhidhi wihina nawonelihemo mwahaya bwaddi nikala oohiyana ni athu amodhaya ni nnowathukulela athu amodha enna efunelo ofunaga ohudhera wodhela Mulugu ehu. Nanvuwihaga Yehova ni makalelo yala Oliye anohagalala vanlubale. — 1 Tim. 2:3, 4. Namasugwera 02/24 epaddi 10 ddima 7

Wihina okale mukiristawu owithwelavo epaddi yomuzimuni, onere ohowela ohudhera dhithu dhinukavihere. Dhithu ndho dhinere wukavihera wanda osamalela mutholo mmulogoni ni wanda wafwanya mabasa enukavihere wisamalela wamwinnyo ni wasamalela amudhawo, teto dhinere wukavihera okanna wandana wapama ni athu amodha. Motajhiha, ohudhere wileri ni oleba pama. Bibiliya anihina wawileri ni wapendda madhu a Mulugu malabo aamatene winomukavihera mulobwana okala oohagalala ni dhaye omweddelaga pama. (Sal. 1:1-3) Bibiliya malabo aamatene winere wukavihera onona pamadhene mubuwelo wa Yehova. Ni makalelo yayo, onerege wubuwela pamadhene, onerege onona opendda ni oparihedha mabasa dholaga dha mBibiliyani. (Pro. 1:3, 4) Mulogo onowahowela addibila enonne ohudhiha pama wihina ehudhihe ni evahege dholaga dhinakumela mBibiliyani. Wanona wileri ni oleba pama, onerege wanda wegeredha pamadhene mwaha dhawo ni dhowakula dhawo mmutugumanoni dhinalibihe nroromelo naaddibila. Teto onerege wanda olebela dhithu dhathima onahudheriwe dhinukavihera olibiha nroromelo nawo ni walibiha athu amodha. Namasugwera 12/23 epaddi 26-27 ddima 9-11

Wafwanyiwa woova, openddege dhithu Yehova anafuniye werana osogolo Saddana agujhuliwa. Yowoniha dhaala nonilihu vamusonkanoni yaka ya 2014. Emudhi dhaala yubuwela makalelo enakale egumi mparayizu. Aliwa yahubuwela makalelo madhu enafwanyeya va 2 Timóteo 3:1-5 yaakaliwa oohiyana wihina yoonihe makalelo enakale egumi yehu mwilaboni exa: “Nahuna, onone wihina mwilaboni exa, onaakale mudhidhi wohagalasa vanlubale wahinakalegewo. Mwaha athu enerege odhivelana mmodha ni mukwaye, enerege odhivela dhoviteya dhomuzimuni, amanddile, owiyeviha, enerege omuthithimiha Mulugu, enerege wawiwelela makolo ewa, ootamalela, oororomeleya, enerege othabwa wadhivela amudhiwa, enere okala owiwananeyana, enerege wawoga opama akwiwa, oopwaseya, owihiha, enerege odhiveliwa opama, oororomeleya, owiwelela, enakannege mubuwelo wowiyeviha, enerege omudhivela Mulugu ohiya dhohagalasa, enakanne efunelo yomulabela Mulugu; athu yaala owaddamele.” We onothapanya namudhawo obe ni addibila wodhela makalelo enakale egumi elabo exa? Namasugwera 01/24 epaddi 6 ddima 13-14

Solibiha vanlubale onona ele anawoga Bibiliya egi: ‘Yehova anodhivela nlogo naye.’ (Sal. 149:4) Malabo mamodha iyo podi okwerebeya ofiyedha wikohaga: ‘Miyo gihikanna thima vamentoni va Yehova?’ Adhaari owinjhiva oororomeleya a Yehova akale, malabo mamodha yowikoha nimakalelo yala. (1 Sam. 1:6-10; Jó 29:2, 4; Sal. 51:11) Bibiliya anowoniha pamadhene wihina athu oohilogomana podi omuhagalasa Yehova ni orumedhiwa ni Oliye. Nimakalelo baani? Nnohowela woniha wi nnomuroromela Yesu Kiristu ni obaddiziwa. (Juwa. 3:16) Nerana ndala, nnowoniha vaari va anamwinjhi wi nihithwaruwa ni nihimala ompaganya Yehova werana efunelo yaye. (Dho. 2:38; 3:19) Yehova anoothabwa ohagalala vanlubale neragana dhithu ndha wihina ninfiyedhe. Nilibihedhaga wihina nakwanihedhe mpaganyo nerilihuna, Yehova anere onirumedha ni nnakale akwaye nyingala ginyingalevo. — Sal. 25:14. Namasugwera 03/24 epaddi 26 ddima 1-2

Naarive anamathonga enikoddihaga olaleya, iyo podi ohara yotajhiha ya arumiwi wodhela odidela olaleya. Omulobe nikavihero Yehova wihina wande owanana makathamiho. Owinjhiva wa iyo ninna wawanana makathamiho orusa, ohiya epaddive yomaningoni, nnofwanyiwa epaddi ya mubuwelo. Amodha ehaayelela athu yathabwiwa wadhivela, amodha enna ofwanyiwa makathamiho orusa vamuralani, amodha enna oharahariwa ni makathamiho mamodha. Teto yothabwaya, peeno dhithu ninga mutipa ni koddo dhinna othabwiha dhithudha okala dhorusa. Bumwahaya onfugulele Yehova murima wawo, omwaaddele dhatedhene dhinupadduwela, ninga wathapanyaga ni mukwawo. Kuwanganyedhe, ororomele wihina Yehova ‘aneere wukavihera.’ (Sal 37:3, 5) Enaanikavihere ‘wavilelana makathamiho’ fuuhuselela olobela. (Rom. 12:12) Yehova ohaanona makathamiho enaafwanya adhaari aye ‘onowavuruwana yalobaga nikavihero ni onowawobola.’ — Sal. 145:18, 19 Namasugwera 05/23 epaddi 5-6 ddima 12-15

Nafunaga werana yothoma yathima mwigumini mwehu, nnohowela wonelamo ‘efunelo ya Yehova’ namala nerena dhithudha mowiwanana ni efunelo yaye. (Efe. 5: 17) Vano naafwanya malagano a mBibiliyani eniwanana ni ethu nnafunihu othoma, enakala ninga nihifwanya ethu Yehova anubuweliye wodhela muselu yole. Vano naparihedha mabasa malagano a Yehova nnowanda werana dhothoma dhapama. “Mbure,” obe nere mwiddani ehu Saddana anafuna wi nikale oopinyamiyeya ni dhithu dha mwilaboni ofiyedha ohukanna mudhidhi wihina nimulabele Yehova. (1 Juwa. 5:19) Mukiristawu podi othabwaga othuwathuwela dhithu ninga korowa, ohudhera wa vadhulu ni mabasa, ohiya othuwathuwela wawenjhedhedha mabasa aye anampareliye Yehova, ethu ninga yeela yabajha opadduwa eyo enoniha wi muthuya ohambela wubuwela ninga athu a mwilaboni. Ebaribari wihina korowa, ohudhera wa vadhulu ni dhoreela kahiyo dhithu dhabure. Mbwenye kanithabwege osogoliha dhithu ndha mwigumini mwehu. Namasugwera 03/24 epaddi 24 ddima 16-​17