Il-Kelma taʼ Ġeħova Hi Ħajja
Punti Prinċipali mit-Tieni Ktieb tas-Salmi
BĦALA l-qaddejja taʼ Ġeħova, aħna nistennew li nġarrbu l-provi. “Kulmin jixtieq jgħix bid-devozzjoni lejn Alla fi sħubija maʼ Kristu Ġesù jkun persegwitat ukoll,” kiteb l-appostlu Pawlu. (2 Timotju 3:12) X’se jgħinna nissaportu l-provi u l-persekuzzjonijiet, u b’hekk nagħtu prova taʼ l-integrità tagħna lejn Alla?
It-tieni ġabra mill-ħames ġabriet tas-salmi tagħtina din l-għajnuna. Salm 42 sa 72 juruna li jekk irridu nissaportu l-provi b’suċċess, għandna npoġġu l-fiduċja sħiħa tagħna f’Ġeħova u nitgħallmu nistrieħu fuqu għall-ħelsien. X’lezzjoni mill-aqwa għalina! Il-messaġġ tat-Tieni Ktieb tas-Salmi, bħall-kumplament tal-Kelma t’Alla, hu tassew ‘ħaj u qawwi’ saħansitra llum.—Ebrej 4:12.
ĠEĦOVA HU “KENN U QAWWA” GĦALINA
(Salm 42:2–50:23 [42:1–50:23, NW ])
Levita jinsab fl-eżilju. Imnikket għax ma jistax imur fis-santwarju taʼ Ġeħova biex jagħti qima, hu jfarraġ lilu nnifsu billi jgħid: “Għaliex tintelaq, ruħ tiegħi, u titħawwad ġewwa fija? Ittama f’Alla.” (Salm 42:6, 12 [42:5, 11, NW ]; 43:5) Dan il-vers ripetut jgħaqqad it-tliet stanzi taʼ Salm 42 u 43 f’poeżija waħda. Salm 44 hu talba għal Ġuda—ġens li jinsab f’hemm kbir, forsi taħt it-theddida taʼ l-invażjoni Assirjana fi żmien is-Sultan Ħeżekija.
Salm 45, li huwa għanja dwar tieġ taʼ sultan, jipprofetizza dwar is-Sultan Messjaniku. It-tliet salmi taʼ wara jiddeskrivu lil Ġeħova bħala “kenn u qawwa,” “sultan kbir fuq l-art kollha,” u “sur qawwi.” (Salm 46:2 [46:1, NW ]; 47:3 [47:2, NW ]; 48:4 [48:3, NW ]) B’mod mill-isbaħ, Salm 49 juri li ebda bniedem “ma jistaʼ jifdi lilu nnifsu”! (Salm 49:8 [49:7, NW ]) L-ewwel tmien salmi mit-tieni ġabra jingħad li nkitbu minn ulied Koraħ. Id-disaʼ wieħed, Salm 50, ikkomponieh Asaf.
Mistoqsijiet Skritturali Mweġbin:
44:20 (44:19, NW )—X’kienet “art il-klieb selvaġġi”? Is-salmista forsi kien qed jirreferi għal art tal-battalja, fejn dawk li jinqatlu jsiru ikel għall-klieb salvaġġi.
45:14, 15a (45:13, 14a, NW )—Min hi “bint is-sultan” li “għand is-sultan jeħduha”? Hi bint is-“Sultan taʼ l-eternità,” Alla Ġeħova. (Rivelazzjoni 15:3) Hi tirrappreżenta lill-kongregazzjoni glorifikata taʼ 144,000 Kristjan, li Ġeħova jadotta bħala wliedu billi jidlikhom bl-ispirtu tiegħu. (Rumani 8:16) Din il-“bint” taʼ Ġeħova, “imħejjija bħal għarusa mżejna għal żewġha,” se tittieħed għand l-għarus—is-Sultan Messjaniku.—Rivelazzjoni 21:2.
45:15b, 16 (45:14b, 15, NW )—Lil min jirrappreżentaw “ix-xbejbiet”? Huma l-“folla kbira” taʼ qaddejja veri li jingħaqdu mal-fdal midluk u jappoġġawh. Peress li huma se jkunu “ħarġu mit-tribulazzjoni l-kbira” ħajjin, huma se jkunu fuq l-art meta ż-żwieġ tas-Sultan Messjaniku jseħħ fis-sema. (Rivelazzjoni 7:9, 13, 14) F’din l-okkażjoni, huma se jkunu mimlijin “ferħ u hena.”
45:17 (45:16, NW )—F’liema sens se jilħqu l-ulied minflok missirijiet is-sultan? Meta Ġesù twieled fuq l-art, hu kellu missirijiet taʼ l-art. Huma se jsiru wliedu meta hu jirxoxtahom mill-mewt matul ir-Renju tiegħu t’Elf Sena. Xi wħud minnhom se jkunu fost dawk maħturin bħala “kapijiet fuq l-art kollha.”
50:2, Karm Żammit—Ġerusalemm għala hi msejħa “l-perfezzjoni tas-sbuħija”? Dan ma kienx minħabba l-apparenza tal-belt. Imma għaliex Ġeħova użaha u taha l-ġmiel billi għażilha bħala l-post għat-tempju tiegħu u l-belt kapitali għas-slaten midlukin tiegħu.
Lezzjonijiet Għalina:
42:2-4 (42:1-3, NW ). Bħalma għażżiela, jew ċerva, tixxennaq għall-ilma f’art niexfa, bl-istess mod il-Levita xxennaq għal Ġeħova. In-niket tar-raġel, minħabba li ma setax jaqdi lil Ġeħova fis-santwarju Tiegħu, tant kien kbir li ‘d-dmugħ lejl u nhar sar l-ikel tiegħu’—ma kellux ġuħ. M’għandniex aħna wkoll nikkultivaw apprezzament profond għall-qima taʼ Ġeħova flimkien maʼ sħabna fit-twemmin?
42:5, 6, 12 (42:4, 5, 11, NW ); 43:3-5. Jekk għal xi raġuni li m’għandniex kontroll fuqha niġu mifrudin temporanjament mill-kongregazzjoni Kristjana, il-memorji tal-ferħ li nkunu gawdejna f’din is-sħubija fil-passat jistgħu jsostnuna. Waqt li dan għall-ewwel jistaʼ jżidilna l-uġigħ tas-solitudni, ifakkarna wkoll li Alla hu l-kenn tagħna u li għandna nistennew lilu għall-ħelsien.
46:2-4 (46:1-3, NW ). Minkejja kwalunkwe problema li nistgħu niffaċċjaw, għandu jkollna fiduċja li ma titħarrikx li “kenn u qawwa hu Alla għalina.”
50:16-19. Kulmin jitkellem bil-qerq u jipprattika affarijiet moqżieża m’għandu l-ebda dritt li jirrappreżenta lil Ġeħova.
50:20. Minflok ma noqogħdu nxandru bil-ħerqa n-nuqqasijiet t’oħrajn, għandna nagħlqu għajnejna għalihom.—Kolossin 3:13.
“F’ALLA BISS IL-MISTRIEĦ TAʼ RUĦI”
(Salm 51:3–71:24 [51:1–71:24, NW ])
Dan il-grupp taʼ salmi jibda bit-talba mill-qalb taʼ David wara d-dnub tiegħu maʼ Batseba. Salm 52 sa 57 juru li Ġeħova se jeħles lil dawk li jixħtu t-tagħbija tagħhom fuqu u jistennewh għas-salvazzjoni. Salm 58-64 juru li David jagħmel lil Ġeħova l-kenn tiegħu fl-hemm kollu tiegħu. Hu jkanta: “F’Alla biss il-mistrieħ taʼ ruħi, għax mingħandu tiġini t-tama.”—Salm 62:6 (62:5, NW ).
L-intimità mal-Ħellies tagħna għandha tqanqalna ‘ngħannu s-sebħ taʼ ismu.’ (Salm 66:2) Ġeħova hu mfaħħar bħala l-wieħed li jipprovdi b’mod ġeneruż f’Salm 65, bħala Alla t’atti taʼ salvazzjoni f’Salm 67 u 68, u bħala l-Ħellies f’Salm 70 u 71.
Mistoqsijiet Skritturali Mweġbin:
51:14 (51:12, NW )—David talab għall-appoġġ taʼ l-“ispirtu qalbieni” taʼ min? Dan la jirreferi għall-fatt li Alla kien lest li jgħin lil David u lanqas ma jirreferi għall-ispirtu taʼ Ġeħova, imma għall-ispirtu taʼ David stess—għall-inklinazzjoni mentali tiegħu. Hu qed jitlob lil Alla biex jagħtih ix-xewqa ħalli jagħmel dak li hu sewwa.
53:2 (53:1, NW )—Wieħed li jiċħad l-eżistenza t’Alla kif inhu “iblah”? Hawnhekk, il-bluha ma tfissirx li hemm nuqqas taʼ intelliġenza. Nistgħu naraw li dan l-individwu hu iblah moralment minħabba l-kollass morali li jirriżulta kif inhu deskritt f’Salm 53:2-5 (53:1-4, NW ).
58:4-6 (58:3-5, NW )—Il-ħżiena b’liema mod huma bħal serp? Il-gideb li jgħidu fuq oħrajn huwa bħall-velenu taʼ serpent. Huma jivvelenaw ir-reputazzjoni tajba tal-vittmi tagħhom. ‘Bħal lifgħa truxa li ssodd widnejha,’ il-ħżiena ma jisimgħux mill-gwida jew il-korrezzjoni t’oħrajn.
58:8 (58:7, NW )—Il-ħżiena kif “jgħibu bħal ilma li jintrema”? David setaʼ kien qed jaħseb dwar l-ilmijiet f’ċerti widien fl-Art Imwiegħda. Waqt li għargħar kien jgħolli l-livelli taʼ l-ilmijiet f’dawn il-widien, l-ilma malajr kien jinxtorob u jisparixxi. David kien qed jitlob biex il-ħżiena jisparixxu malajr.
68:14 (68:13, NW )—Kif kienu l-‘ġwienaħ tal-ħamiem bħall-fidda b’rixu mżejjen b’deheb safrani’? Ċertu ħamiem taʼ lewn blu fil-griż, fuq xi rix ikollu lwien bħal tal-qawsalla. Meta r-rix tiegħu jkun fid-dawl tax-xemx tiddi, il-kulur jidher qisu xi metall ileqq. Forsi David kien qed ixebbah lill-gwerriera Iżraelin vittorjużi li jiġu minn battalja maʼ ħamiem bħal dan—bi ġwinħajn b’saħħithom u b’dehra brillanti. Bħalma jissuġġerixxu xi studjużi, id-deskrizzjoni tistaʼ tapplika għal xi biċċa xogħol taʼ l-arti, trofew, li tittieħed bħala priża. Hi x’inhi t-tifsira, David kien qed jirreferi għar-rebħiet li Ġeħova ta lill-poplu tiegħu fuq l-għedewwa tagħhom.
68:19 (68:18, NW )—Min kienu ‘l-bnedmin li ħa b’għotjiet’? Dawn kienu rġiel fost dawk li ttieħdu fil-jasar matul il-konkwista taʼ l-Art Imwiegħda. Wara, dawn l-irġiel ġew inkarigati biex jgħinu lil-Leviti f’xogħolhom.—Esdra 8:20.
68:31 (68:30, NW )—Xi tfisser it-talba “ċanfar dik il-bhima fil-qasab”? Minħabba li David kien qed jitkellem b’mod figurattiv dwar l-għedewwa taʼ Ġeħova bħala bhejjem salvaġġi, hu kien qed jitlob lil Alla biex iċanfarhom, jew jikkontrolla l-qawwa tagħhom li jagħmlu l-ħsara.
69:24 (69:23, NW )—X’jiġifieri li “jirtogħdu f’ġenbejhom”? Il-muskoli fil-ġenbejn huma essenzjali biex individwu jagħmel xogħol iebes, bħal per eżempju li jerfaʼ u jġorr xi tagħbija tqila. Il-frażi ġenbejn li qed jirtogħdu turi li hemm nuqqas taʼ ħila. David talab li l-għedewwa tiegħu jitilfu ħilithom.
Lezzjonijiet Għalina:
51:3-6, 19 (51:1-4, 17, NW ). Meta nikkommettu dnub, dan ma jfissirx li bilfors se jħassar ir-relazzjoni tagħna m’Alla Ġeħova. Jekk nindmu, jistaʼ jkollna l-fiduċja fil-ħniena tiegħu.
51:7, 9-12 (51:5, 7-10, NW ). Jekk aħna dnibna, nistgħu nitolbu għall-maħfra taʼ Ġeħova minħabba li writna d-dnub. Għandna wkoll nitolbuh biex inaddafna, jirrestawrana, jgħinna nneħħu tendenzi midinbin minn qalbna, u biex jagħtina spirtu leali.
51:20 (51:18, NW ). Id-dnub taʼ David hedded il-benesseri tal-ġens kollu. Allura hu talab biex Sijon ikollu r-rieda tajba t’Alla. Meta aħna nikkommettu dnub serju, spiss dan iġib tmaqdir fuq isem Ġeħova u fuq il-kongregazzjoni. Hemm bżonn li nitolbu lil Alla biex jirranġa l-ħsara li forsi nkunu kkaġunajna.
52:10 (52:8, NW ). Aħna nistgħu nkunu “bħal siġra taż-żebbuġ li tħaddar fid-dar taʼ Alla”—qrib taʼ Ġeħova u produttivi fis-servizz tiegħu—billi nobduh u billi mill-qalb naċċettaw id-dixxiplina tiegħu.—Ebrej 12:5, 6.
55:5, 6, 13-15, 17-19 (55:4, 5, 12-14, 16-18, NW ). Il-konfoffa taʼ ibnu stess, Absalom, u t-tradiment t’Aħitofel, il-kunsillier fdat tiegħu, ikkaġunaw uġigħ emozzjonali kbir lil David. Madankollu dan ma naqqasx il-fiduċja taʼ David f’Ġeħova. Aħna m’għandniex inħallu wġigħ emozzjonali jdgħajjef il-fiduċja tagħna f’Ġeħova.
55:23 (55:22, NW ). Kif nistgħu nixħtu t-tagħbija tagħna fuq Ġeħova? Nistgħu nagħmlu dan (1) billi mmorru għandu bit-talb minħabba kwistjoni li qed tikkonċernana, (2) billi nistrieħu fuq il-Kelma u l-organizzazzjoni tiegħu għall-gwida u l-appoġġ, u (3) billi nagħmlu dak li nistgħu b’mod raġunevoli biex intejbu s-sitwazzjoni.—Proverbji 3:5, 6; 11:14; 15:22; Filippin 4:6, 7.
56:9 (56:8, NW ). Ġeħova mhux biss jaf bis-sitwazzjoni tagħna, imma jaf ukoll l-impatt emozzjonali li din għandha fuqna.
62:12 (62:11, NW ). Alla m’għandux għalfejn jiddependi minn xi sors superfiċjali t’enerġija. Hu s-sors innifsu tal-qawwa. ‘Il-qawwa hi tiegħu.’
63:4 (63:3, NW ). ‘It-tjieba t’Alla aħjar mill-ħajja’ għax mingħajrha l-ħajja hi bla tifsira u bla skop. Inkunu għorrief jekk nikkultivaw ħbiberija maʼ Ġeħova.
63:7 (63:6 NW ). Il-lejl—fis-skiet u bla ebda tfixkil—jistaʼ jkun ħin eċċellenti għall-meditazzjoni.
64:3-5 (64:2-4, NW ). It-tqassis jistaʼ jħassar ir-reputazzjoni tajba taʼ persuna innoċenti. La għandna nisimgħu tqassis bħal dan u lanqas m’għandna nxerrduh.
69:5 (69:4, NW ). Sabiex inżommu l-paċi kultant jistaʼ jkun għaqli li ‘rroddu’ lura billi niskużaw ruħna, anki jekk ma nkunux konvinti li għamilna xi ħaġa ħażina.
70:2-6 (70:1-5, NW ). Ġeħova jismaʼ t-talb urġenti tagħna għall-għajnuna. (1 Tessalonikin 5:17; Ġakbu 1:13; 2 Pietru 2:9) Alla jistaʼ jippermetti li xi prova tkompli, madankollu hu se jagħtina l-għerf biex nittrattaw mas-sitwazzjoni u s-saħħa biex inkampaw. Hu ma jħalliniex niġu ttantati iktar milli nifilħu.—1 Korintin 10:13; Ebrej 10:36; Ġakbu 1:5-8.
71:5, 17. David rabba l-kuraġġ u s-saħħa billi poġġa l-fiduċja tiegħu f’Ġeħova minn meta kien żagħżugħ—saħansitra qabel ma ffaċċja lill-ġgant Filisti Gulija. (1 Samwel 17:34-37) Ikun tajjeb li ż-żgħażagħ jistrieħu fuq Ġeħova f’dak kollu li jagħmlu.
“Timtela l-Art Kollha b’Sebħu”
L-aħħar għanja fit-tieni ġabra tas-salmi, Salm 72, hi dwar il-ħakma taʼ Salamun li turi bil-quddiem il-kundizzjonijiet li se jeżistu taħt il-ħakma tal-Messija. X’barkiet mill-isbaħ huma deskritti hawnhekk—abbundanza taʼ paċi, it-tmiem tal-moħqrija u l-vjolenza, u ħafna qamħ fuq l-art! Se nkunu aħna fost dawk li se jgawdu dawn il-barkiet flimkien maʼ barkiet oħra tas-Saltna? Nistgħu nkunu fosthom jekk aħna, bħas-salmista, inkunu kuntenti li nistennew lil Ġeħova u nagħmluh il-kenn u l-qawwa tagħna.
‘Jintemm it-talb taʼ David’ bil-kliem: “Mbierek il-Mulej, Alla taʼ Iżrael, li waħdu jagħmel ħwejjeġ taʼ l-għaġeb. Mbierek għal dejjem ismu msebbaħ; timtela l-art kollha b’sebħu! Amen! Amen!” (Salm 72:18-20) Ejja bl-istess mod inbierku lil Ġeħova b’qalbna kollha u nfaħħru lill-isem glorjuż tiegħu.
[Stampa f’paġna 9]
Taf int taʼ min tagħti stampa bil-quddiem “bint is-sultan”?
[Stampa f’paġna 10, 11]
Ġerusalemm hi msejħa “l-perfezzjoni tas-sbuħija.” Taf għala?