Il-​Kelma taʼ Ġeħova Hi Ħajja

Punti Prinċipali mill-​Ewwel Ktieb tas-​Salmi

LIEMA titlu jkun adattat għal ktieb Bibliku li fil-​biċċa l-​kbira jikkonsisti f’tifħir lil Alla Ġeħova, il-​Ħallieq tagħna? L-​iktar titlu mistħoqq ikun Salmi, jew Tifħir. Dan l-​itwal ktieb tal-​Bibbja jiġbor fih għanjiet b’kompożizzjoni mill-​isbaħ li jirrakkontaw dwar il-​kwalitajiet meraviljużi t’Alla u l-​atti setgħana tiegħu u jsemmu għadd taʼ profeziji. Ħafna mill-​għanjiet jesprimu s-​sentimenti li l-​kittieba ħassew meta kienu għaddejjin minn xi għawġ. Dawn l-​espressjonijiet ikopru perijodu taʼ xi elf sena​—minn żmien il-​profeta Mosè sa wara l-​eżilju. Il-​kittieba kienu Mosè, is-​Sultan David, u oħrajn. Il-​qassis Esdra kien il-​wieħed li rranġa l-​ktieb għall-​mod kif nafuh illum.

Sa minn żmien twil ilu, il-​ktieb tas-​Salmi kien maqsum f’ħames ġabriet, jew sezzjonijiet, t’għanjiet: (1) Salm 1-​41, (2) Salm 42-​72, (3) Salm 73-​89, (4) Salm 90-​106, u (5) Salm 107-​150. Dan l-​artiklu se jikkunsidra l-​ewwel ġabra. Is-​salmi kollha f’din is-​sezzjoni, ħlief tlieta, inkitbu mis-​Sultan David taʼ Iżrael tal-​qedem. Il-​kittieba taʼ Salm 1, 10, u 33 m’humiex identifikati.

“ALLA TIEGĦI, IL-​BLATA TIEGĦI”

(Salm 1:1–​24:10)

Wara li l-​ewwel salm jiddikjara hieni lil dak li jitgħaxxaq bil-​liġi taʼ Ġeħova, it-​tieni salm iwassal għat-​tema tas-​Saltna.a Ħafna minn dan il-​grupp taʼ salmi huma suppliki lil Alla. Per eżempju, f’Salm 3-5, 7, 12, 13, u 17 insibu suppliki għall-​ħelsien mill-​għedewwa. Salm 8 jenfasizza l-​kobor taʼ Ġeħova meta mqabbel maċ-​ċokon tal-​bniedem.

Filwaqt li jiddeskrivi lil Ġeħova bħala l-​Protettur tal-​poplu tiegħu, David ikanta: “Alla tiegħi, il-​blata tiegħi, li fih nistkenn.” (Salm 18:​2, Karm Żammit) F’Salm 19, Ġeħova jitfaħħar bħala l-​Ħallieq u l-​Wieħed li jagħti l-​liġijiet, f’Salm 20 jitfaħħar bħala s-​Salvatur, u f’Salm 21 jitfaħħar bħala s-​Salvatur tas-​Sultan midluk tiegħu. F’Salm 23 jidher bħala r-​Ragħaj il-​Kbir, filwaqt li f’Salm 24 jidher bħala Sultan glorjuż.

Mistoqsijiet Skritturali Mweġbin:

2:​1, 2, KŻ​—Il-​ġnus dwar liema “ħwejjeġ fiergħa” jibqgħu jreddnu? Il-​“ħwejjeġ fiergħa” li jikkonċernaw kontinwament lill-​gvernijiet umani huma ż-​żamma taʼ l-​awtorità tagħhom stess. Dan huwa fieragħ għax l-​iskop tagħhom żgur li m’huwiex se jirnexxi. Jistgħu verament il-​ġnus ikollhom suċċess “kontra l-​Mulej, u l-​Midluk tiegħu”?

2:7​—X’inhu “d-​digriet tal-​Mulej”? Dan id-​digriet huwa l-​patt għal Saltna li Ġeħova għamel maʼ Ġesù Kristu, il-​maħbub Ibnu.—Luqa 22:​28, 29.

2:​12, KŻ​—Il-​ħakkiema tal-​ġnus b’liema mod se ‘jbusu l-​Iben’? Fiż-​żminijiet Bibliċi, il-​bews kien sinjal taʼ ħbiberija jew lealtà. Kien ukoll mod kif tilqaʼ lill-​mistidnin. Is-​slaten taʼ l-​art ġew kmandati biex ibusu lill-​Iben​—jiġifieri, jilqgħuh bħala s-​Sultan Messjaniku.

3:1 (3:sopraskrizzjoni, NW )​—X’inhu l-​iskop tas-​sopraskrizzjoni li tidher f’ċerti salmi? Kultant is-​sopraskrizzjoni tidentifika min hu l-​kittieb u/jew tipprovdi informazzjoni dwar iċ-​ċirkustanzi li nkiteb fihom is-​salm, bħalma hu fil-​każ taʼ Salm 3. Is-​sopraskrizzjoni għandha mnejn tispjega wkoll l-​iskop jew l-​użu taʼ xi għanja partikulari (Salm 4 u 5) kif ukoll tagħti xi istruzzjonijiet mużikali (Salm 6).

3:​2, KŻ​—X’inhi “Sela”? Dan it-​terminu ġeneralment huwa maħsub li jirrappreżenta pawsa għal meditazzjoni fis-​skiet, jew għall-​kant biss jew għall-​kant u l-​mużika strumentali. Il-​pawsa kienet tintuża wkoll sabiex tenfasizza xi ħsieb jew emozzjoni li tkun għadha kif ġiet espressa. Din il-​kelma m’għandhiex għalfejn titlissen waqt il-​qari pubbliku tas-​Salmi.

11:3​—Liema sisien inqalbu? Dawn huma proprju dawk is-​sisien li s-​soċjetà umana sserraħ fuqhom​—il-​liġi, l-​ordni, u l-​ġustizzja. Meta fost dawn ikun hemm konfużjoni, fis-​soċjetà jkun hemm diżordni u jkun hemm nuqqas taʼ ġustizzja. F’kundizzjonijiet bħal dawn, “il-​bniedem ġust” irid jafda kompletament f’Alla.—Salm 11:​4-7.

21:4 (21:​3, NW )​—X’hemm daqshekk sinifikanti dwar il-​“kuruna taʼ deheb fin”? Ma jingħadx jekk il-​kuruna kinitx letterali jew simbolu taʼ iktar glorja li David irċieva minħabba r-​rebħ li kellu. Madankollu, dan il-​vers jipponta b’mod profetiku lejn il-​kuruna tas-​saltna li Ġesù rċieva mingħand Ġeħova fl-​1914. Il-​fatt li l-​kuruna hija magħmula mid-​deheb juri li l-​ħakma tiegħu hi taʼ l-​aqwa kwalità.

22:​2, 3 (22:​1, 2, NW )​—David għal liema raġuni setaʼ ħass li Ġeħova kien telqu? David tant kien għaddej minn pressjoni kbira minħabba l-​għedewwa tiegħu li ‘qalbu kienet bħal xemgħa ddub ġewwa fih.’ (Salm 22:15 [22:​14, NW]) Għalih setaʼ deher li Ġeħova kien abbandunah. Meta kien imsammar maʼ zokk, Ġesù wkoll ħassu hekk. (Mattew 27:46) Kliem David juri r-​reazzjoni naturali minħabba s-​sitwazzjoni diffiċli li kien fiha. Madankollu, mit-​talba tiegħu mniżżla f’Salm 22:​17-22 (22:​16-21, NW), jidher ċar li David ma kienx tilef il-​fidi tiegħu f’Alla.

Lezzjonijiet Għalina:

1:1. M’għandniex nagħmluha maʼ dawk li ma jħobbux lil Ġeħova.—1 Korintin 15:33.

1:2. M’għandniex inħallu li tgħaddi ġurnata mingħajr ma nkunu ħsibna fuq l-​affarijiet spiritwali.—Mattew 4:4.

4:5 (4:​4, NW ). Meta nkunu rrabjati, ikun għaqli li nisktu sabiex ma ngħidux xi ħaġa li iktar tard jiddispjaċina li nkunu għednieha.—Efesin 4:26.

4:​6, KŻ (4:​5, NW ). Is-​sagrifiċċji spiritwali tagħna jkunu “sagrifiċċji tal-​ħaqq” biss meta jkunu mqanqlin minn motivi tajbin jew meta l-​kondotta tagħna tilħaq il-​ħtiġijiet taʼ Ġeħova.

6:6 (6:​5, NW ). Jistaʼ jkun hemm raġuni aħjar għala għandna nkunu rridu nibqgħu ħajjin?—Salm 115:17.

9:​13 (9:​12, NW ). Ġeħova jitħallas tad-​demm billi jikkastiga lil dawk li jxerrdu d-​demm, imma jiftakar “għajat l-​imsejknin.”

15:​2, 3; 24:​3-5. L-​aduraturi veri għandhom jgħidu l-​verità u m’għandhomx jaħilfu ħażin u jimmalafamaw.

15:​4, KŻ. Għandna nagħmlu dak kollu li nistgħu biex inwettqu l-​wegħdi tagħna, anki jekk dan ikun diffiċli għalina biex nagħmluh, sakemm ma nindunawx li dak li nkunu wegħedna jmur kontra l-​iskrittura.

15:5. Bħala l-​aduraturi taʼ Ġeħova, għandna bżonn ngħassu kontra l-​użu ħażin tal-​flus.

17:​14, 15. In-​“nies tad-​dinja” (Saydon) jiddedikaw ruħhom għall-​ġiri wara livell għoli taʼ ħajja, biex irabbu familja, u biex iħallu wirt tajjeb warajhom. Dak li kien jikkonċerna l-​iktar lil David kien li jkollu isem tajjeb m’Alla sabiex ikun jistaʼ ‘jara ’l wiċċu,’ jiġifieri jkollu l-​favur taʼ Ġeħova. Meta ‘jqum’ u jesperjenza l-​wegħdi u l-​assiguranza taʼ Ġeħova, David se ‘jithenna bid-​dehra tiegħu,’ jiġifieri se jkun ferħan li l-​preżenza taʼ Ġeħova se tkun miegħu. Bħal David, m’għandniex aħna niffokaw fuq it-​teżori spiritwali?

19:​2-7 (19:​1-6, NW ). Jekk il-​ħolqien, li la jistaʼ jitkellem u lanqas jirraġuna, jagħti glorja lil Ġeħova, kemm iktar għandna nagħmlu hekk aħna li nistgħu naħsbu, nitkellmu, u nqimu?—Rivelazzjoni 4:11.

19:​8-​12 (19:​7-​11, NW ). Il-​ħtiġijiet taʼ Ġeħova​—kemm huma taʼ benefiċċju għalina!

19:​13, 14 (19:​12, 13, NW ). In-​nuqqasijiet u l-​kburija huma dnubiet li rridu ngħassu kontrihom.

19:15 (19:​14, NW ). Irridu nkunu konċernati mhux biss dwar dak li nagħmlu imma wkoll dwar dak li ngħidu u naħsbu.

“MINĦABBA L-​INTEGRITÀ TIEGĦI INT ŻAMMEJTNI WIEQAF”

(Salm 25:1–​41:14 [25:1–​41:​13, NW])

David kemm jesprimi x-​xewqa sinċiera u d-​determinazzjoni qawwija li jżomm l-​integrità fl-​ewwel żewġ salmi taʼ dan il-​grupp! Hu kanta: “Iżda jien nimxi fl-​integrità tiegħi.” (Salm 26:​11, KŻ ) Meta talab għall-​maħfra tad-​dnubiet, hu ammetta: “Jien bqajt sieket, u nfena ġismi, jiena u nokrob il-​jum kollu.” (Salm 32:3) Lil dawk li huma leali lejn Ġeħova, David jagħti din l-​assiguranza: “Għajnejn il-​Mulej lejn il-​ġusti, u widnejh miftuħa għall-​għajta tagħhom.”—Salm 34:16 (34:​15, NW).

Kemm kien taʼ valur il-​parir li hemm f’Salm 37 għall-​Iżraelin u kemm hu taʼ valur għalina llum, ladarba qed ngħixu “fl-​aħħar jiem” taʼ din is-​sistema dinjija! (2 Timotju 3:​1-5) Filwaqt li tkellem b’mod profetiku dwar Ġesù Kristu, Salm 40:​8, 9 (40:​7, 8, NW) qal: “Hawn jien, ġej. Fil-​bidu tal-​ktieb hemm miktub fuqi li nagħmel ir-​rieda tiegħek. Alla tiegħi, dan jogħġobni; il-​liġi tiegħek ġewwa qalbi.” L-​aħħar salm f’din il-​ġabra huwa dwar meta David talab lil Ġeħova biex jgħinu waqt is-​snin kollhom inkwiet wara d-​dnub tiegħu maʼ Batseba. Hu kanta: “Inkwantu għalija, minħabba l-​integrità tiegħi int żammejtni wieqaf dritt.”—Salm 41:​12, NW.

Mistoqsijiet Skritturali Mweġbin:

26:6​—Bħal David, aħna kif nistgħu nimmarċjaw madwar l-​artal taʼ Ġeħova b’mod figurattiv? L-​artal jirrappreżenta l-​fatt li Ġeħova jaċċetta s-​sagrifiċċju taʼ Ġesù Kristu li tħallas għall-​fidwa taʼ l-​umanità. (Ebrej 8:5; 10:​5-10) Aħna nimmarċjaw madwar l-​artal taʼ Ġeħova billi neżerċitaw fidi f’dan is-​sagrifiċċju.

29:​3-9​—Is-​salmista x’ried juri meta qabbel leħen Ġeħova maʼ maltempata li tqanqal il-​biżaʼ? Sempliċement ried juri dan il-​fatt: Il-​qawwa kbira taʼ Ġeħova!

31:​24, Saydon (31:​23, NW )​—Min hu kburi kif se jitħallas biż-​żjieda? Il-​ħlas hawnhekk jirreferi għall-​kastig. Il-​ħlas li jirċievi min hu ġust għan-​nuqqasijiet li jagħmel mhux apposta huwa d-​dixxiplina minn Ġeħova. Ladarba min hu kburi ma jdurx mit-​triq ħażina tiegħu, hu se jitħallas biż-​żjieda permezz taʼ kastig aħrax.—Proverbji 11:31; 1 Pietru 4:18.

33:6​—X’inhu n-​“nifs,” jew l-​ispirtu, taʼ fomm Ġeħova? Dan l-​ispirtu huwa l-​forza attiva t’Alla, jew l-​ispirtu qaddis, li hu uża meta ħalaq is-​smewwiet fiżiċi. (Ġenesi 1:​1, 2) Jissejjaħ in-​nifs taʼ fommu minħabba li, bħal spirtu, jistaʼ jintbagħat ’il bogħod biex iwettaq xi ħaġa.

35:19​—X’ried ifisser David meta talab biex dawk li jobogħduh ma jehmżux? It-​tehmiż kien se jindika li l-​għedewwa taʼ David kienu se jieħdu pjaċir bis-​suċċess li jirriżulta mill-​pjanijiet mill-​agħar tagħhom kontrih. David talab biex dan ma jseħħx.

Lezzjonijiet Għalina:

26:4. Kemm ikun għaqli jekk nevitaw li nagħmluha maʼ dawk li jaħbu l-​identità tagħhom fiċ-​chat rooms taʼ l-​Internet, maʼ dawk fl-​iskola jew fuq ix-​xogħol li jippretendu li huma l-​ħbieb tagħna għal skopijiet ħżiena, m’apostati li jagħmluha taʼ bir-​ruħhom li huma sinċieri, u maʼ dawk li jgħixu ħajja doppja.

26:​7, 12; 35:18; 40:10 (40:​9, NW ). Għandna nfaħħru lil Ġeħova pubblikament fil-​laqgħat Kristjani tagħna.

26:8; 27:4. Inħobbu aħna nattendu l-​laqgħat Kristjani?

26:​11, KŻ. Filwaqt li esprima d-​determinazzjoni li jibqaʼ jżomm l-​integrità tiegħu, David talab ukoll li jiġi mifdi. Iva, nistgħu nżommu l-​integrità minkejja l-​imperfezzjonijiet tagħna.

29:10. Billi jaħkem fuq l-​għargħar, Ġeħova jindika li għandu kontroll sħiħ tal-​qawwa tiegħu.

30:5. Il-​kwalità dominanti taʼ Ġeħova hija l-​imħabba​—mhux ir-​rabja.

32:9. Ġeħova ma jridniex inkunu bħal xi ħmar li jobdi minħabba l-​ilġiem jew il-​frosta. Minflok, hu jixtieq li aħna nagħżlu li nobduh minħabba li nifhmu r-​rieda tiegħu.

33:​17-​19. L-​ebda sistema li għamel il-​bniedem, hi kemm hi b’saħħitha, ma tistaʼ ġġib salvazzjoni. Il-​fidi tagħna għandha tkun f’Ġeħova u fis-​Saltna tiegħu.

34:11 (34:​10, NW ). Kemm huwa rassiguranti dan għal dawk li jpoġġu l-​interessi tas-​Saltna l-​ewwel f’ħajjithom!

39:​2, 3 (39:​1, 2, NW ). Meta l-​ħżiena jitolbu informazzjoni sabiex jagħmlu ħsara lil sħabna fit-​twemmin, huwa għaqli li ‘nqiegħdu sarima fuq fommna’ u nibqgħu siekta.

40:​2, 3 (40:​1, 2, NW ). Jekk nittamaw f’Ġeħova se niġu megħjunin biex inkampaw mad-​dipressjoni u biex noħorġu “minn qalb il-​ħama u t-​tajn.”

40:​6, 13 (40:​5, 12, NW ). La l-​problemi u lanqas in-​nuqqasijiet persunali, minkejja li jistgħu jkunu ħafna, m’huma se jegħlbuna jekk nibqgħu niftakru li l-​barkiet li għandna ‘huma ħafna biex insemmuhom.’

“Imbierek il-​Mulej”

Kemm huma taʼ faraġ u taʼ inkuraġġiment il-​41 salm taʼ din il-​ġabra! Kemm jekk għaddejjin minn xi provi u kemm jekk imnikktin minħabba kuxjenza ħatja, nistgħu niksbu s-​saħħa u l-​inkuraġġiment minn din is-​sezzjoni fil-​Kelma qawwija t’Alla. (Ebrej 4:12) Dawn is-​salmi fihom informazzjoni li tipprovdi gwida siewja għall-​ħajja. Għal darba wara l-​oħra, niġu rassigurati li huma x’inhuma d-​diffikultajiet li niffaċċjaw, Ġeħova mhux se jitlaqna.

L-ewwel ġabra taʼ salmi tagħlaq b’dan il-​kliem: “Imbierek il-​Mulej, Alla taʼ Iżrael, minn dejjem għal dejjem. Amen! Amen!” (Salm 41:14 [41:​13, NW]) Wara li kkunsidrajna l-​ewwel grupp taʼ salmi, m’aħniex aħna mqanqlin biex inbierku, jew infaħħru, lil Ġeħova?

[Nota taʼ taħt]

[Kumment f’paġna 19]

Jekk il-​ħolqien li ma jistax jitkellem u jirraġuna jagħti glorja lil Ġeħova, kemm iktar għandna nagħmlu hekk aħna!

[Stampa f’paġna 17]

David kiteb il-​biċċa l-​kbira mill-​ewwel 41 salm

[Stampa f’paġna 18]

Taf f’liema salm Ġeħova jidher bħala r-​Ragħaj il-​Kbir?

[Stampa f’paġna 20]

Tħallix li tgħaddi ġurnata mingħajr ma tkun ħsibt fuq l-​affarijiet spiritwali

[Sors tal-Istampa f’paġna 17]

Stilel: Courtesy United States Naval Observatory

[Sors tal-Istampa f’paġna 19]

Stilel, paġni 18 u 19: Courtesy United States Naval Observatory

[Sors tal-Istampa f’paġna 20]

Stilel: Courtesy United States Naval Observatory