Mue Kuya Yehova ku Mutima Ni?

1. Visinganieka vika ve kulua navio vamo vangamba va Yehova?

MUA VUSUNGA, ku tantekeya nguetu Yehova ue ku viukilila na vangamba vendi, ce ku tu vuisa ndzolela! Mbimbiliya nguayo: “Yehova a viukilila vantu veni.” (Visa. 149:4) Vintsimbu vimo, vamo ve ku uila mu vusiua ngeci ce ku va kaluuila ku tava nguavo ve kuya Yehova ku mutima. Vamo vangamba va Yehova va va tumbula mu Mbimbiliya, vintsimbu vimo va kele na kulua na citanga caco.—1 Sam. 1:​6-10; Yombi 29:​2, 4; Visa. 51:11.

2. Veya ve kuya Yehova ku mutima?

² Mbimbiliya ya muesa ha toma ngecize, vutuhu ka tua tantulukile, vunoni tu hasa kuya Yehova ku mutima. Tu hasa ku lingamo, nga tu muesa lutsilielo muli Yesu na ku tu mbatiza. (Yoa. 3:16) Kaha tue ku muesa ku mbunga ngecize tua liveye vipi vietu na ku kulahesa Njambi nguetu tu linga cizango cendi. (Vili. 2:38; 3:19) Yehova ue ku viukilila mu tue ku linga cose tu likuate vusamba nendi. Nga tu lihakela kapandi ka ku puisamo cikulaheso cetu ca ku mu pangela, tue ku muya ku mutima kaha ue ku tu puisa vavusamba vendi.—Visa. 25:14.

3. Vihula vika vitatu tu kumbulula mu cilongesa cino?

³ Omo lia vika vamo vintsimbu vimo ve ku liziva ngecize, ka ve kuya Njambi ku mutima? Vati Yehova ue ku muesa ngecize tue ku muya ku mutima? Vati Mukua Kilistu a hasa, ku kala na vusunga ngecize ue kuya Njambi ku mutima?

OMO LIA VIKA VAMO VE KU LIVUA NGECIZE KA VE KUYA YEHOVA KU MUTIMA?

4-5. Ambe nga tu pinda na visinganieka via ku livua vungoco, vusunga vuka tu hasa ku kala navuo?

⁴ Cingi cetu, tue ku pinda na visinganieka via ku livua vungoco tunde ku vunike. (Visa. 88:15) Muanetu Adrián nguendi: “Nja kele na ku livua vungoco ntsimbu yose. Tele nji kanike, nja vundilile nguange vusoko vuange vu ka yoyele mu Citungu, vutuhu nja livuile nguange ka nja fuililile ku yoyelamo.” Kaha muanetu Tony visemi vendi ka va puile Vakaleho. Ua handekele nguendi: “Visemi vange, na limo litangua liahi va nji lekele nguavo va nji lema ni vene ku nji sangala. Kaha omo liaco, nja livuile ngue viose vi nja kele na ku linga ka via kele na ku vaya ku mutima.”

⁵ Vintsimbu vimo nga tu pinda na visinganieka via ku livua vungoco, tu hasa ku vuluka ngecize Yehova ikeye ua tu koka. (Yoa. 6:44) Ue ku mona vifua vietu via cili vize ka tue ku mona. Kaha a tu tantekeya vuino ku hiana etu vavene. (1 Sam. 16:7; 2 Miz. 6:30) Ngeci mukemuo, tu hasa ku mu tsiliela nga a tu leka ngueni, tua mu ya ku mutima. (1 Yoa. 3:​19, 20)

6. Vati Paulu ua livuile ku tuala ha vupi vua lingile laza?

⁶ Ntsimbu kanda tu lilongese vusunga, cingi cetu tua lingile viuma vie ku tu lingisa ku livua mulonga na lelo lino. (1 Pet. 4:3) Ambe Vakua Kilistu va kuhia, navo ve ku pinda na vitanga viaco. Amba enu co? Vuno vintsimbu vimo mue ku livua nguenu Yehova ka ka miecelani? Nga mukemuo, tantekeyenu ngecize kati yenu lika mue ku livuamo. Vangamba va Yehova va ku laza navo va pindile na visinganieka viaco. Ca ku muenako, kapostolo Paulu ua vuile vungoco mua singaniekele visevuka via lingile. (Loma 7:24) Mua vusunga, Paulu ualulukile na ku mu mbatiza. Vunoni kasi ua limuene ku pua “ua mundendende ha kati ka vapostolo” kaha ua “hiana” ku vupi.—1 Kol. 15:9; 1 Tim. 1:15.

7. Vika ka tua pandele ku suva ku tuala ha vupi vu tua lingile?

⁷ Tatetu ua muilu ua tu kulahesa ku tuecela nga tu liveya. (Visa. 86:5) Ngeci mukemuo, nga tua liveyele mpundu vupi vu tua lingile, tu hasa ku kala na vusunga nguetu Yehova na tuecela mpundu.—Kolo. 2:13.

8-9. Vika tua pande ku linga mangana kati tu singanieke nguetu ka tue kuya Yehova ku mutima?

⁸ Tu vose tua tonda ku pangela Yehova na ndzili yetu yose. Vunoni, vamo ve ku livua nguavo ka ve ku hasa kuya Yehova ku mutima. Ndumbuetu Amanda nguendi: “Ntsimbu yose nje ku singanieka nguange ku pangela Yehova na ndzili yange yose, ca lomboloka ngecize ntsimbu yose nja pande ku linga via vingi. Ngeci mukemuo, nje ku lavelela kuli ange ivene vize ka nji hasa ku puisamo. Kaha mu nje ku hona ku vi puisamo, nje ku singanieka nguange Yehova na luvala nange.”

⁹ Vika tua pande ku linga mangana kati tu singanieke nguetu ka tue kuya Yehova ku mutima? Vulukenu ngecize, Yehova ka puile ua mukalu. Ke ku lavelela tu linge viuma ka tu hasa. Vunoni ue ku tava viose vi tue ku mu lingila na ndzili yetu yose. Cikuavo naua, hilulenu malungano a mu Mbimbiliya a vantu va pangelele Yehova na mutima uose. Ca ku muenako, singaniekenu ha lungano lua Paulu. Ua fuitanganene cikuma mu miaka ya yingi, mu kuenda mangendzi na ku tumbika vikungulukilo via vingi. Vunoni, muono ueni ualulukile kaha ka hasele naua kuambulula cikuma ngue mua lingile laza. Vuno ca lomboloka ngecize ka ile naua Yehova ku mutima ni? Houe. Ua tualeleho ku linga via hasele, kaha Yehova ua mu vezikisile. (Vili. 28:​30, 31) Na vuno vene, vi tue ku lingila Yehova vi hasa kualuluka. Vunoni, kuli ikeye ca seho vusunga vue ku tu lingisa ku mu pangela. Tu talenu vati Yehova ue ku muesa ngecize tue ku muya ku mutima.

VATI YEHOVA UE KU MUESA NGECIZE TUE KU MUYA KU MUTIMA?

10. Vati tu hasa “kuivua” Yehova a tu leka ngueni tue ku muya ku mutima? (Yoano 16:27)

¹⁰ Ku hitila mu Mbimbiliya. Yehova ue ku muesa ngecize ua lema vangamba veni, kaha ve ku muya ku mutima. Mbimbiliya ya muesa ngecize, Yehova ua lekele Yesu ngueni ua mu lema, kaha ue ku muya ku mutima. (Mat. 3:17; 17:5) Nenu mu tonda Yehova a mi leke ngueni mue ku muya ku mutima ni? Yehova ke ku handeka netu ku fuminina muilu, vunoni ue ku lingamo ku hitila mu Mbimbiliya. Tu hasa ku kuivua Yehova a tu leka ngueni tue ku muya ku mutima, nga tu tanda via lekele Yesu ku vandongesi veni. Muomu ca pua vene ngue Yehova ali na ku tu leka mezi aco. (Tandenu Yoano 16:27.) Yesu ua tambuluisile vuntu vua Ise. Ngeci mukemuo, mu tue ku tanda vati Yesu ua muesele ngecize vandongesi veni va mu ile ku mutima, tu hasa ku singanieka ngue Yehova mpundu ali na ku tu leka mezi aco.—Yoa. 15:​9, 15.

11. Omo lia vika ku hita mu visoti ka ca lombolokele ngecize ka tuesi na kuya Yehova ku mutima? (Tiango 1:12)

¹¹ Ue ku tu hana vi tua tondeka. Yehova ua kala na cizango ca kama ca ku tu kuasa na ku tu hana viose via tu kambela. Vintsimbu vimo, Yehova ue ku tavesa tu hite mu visoti ngue mua lingile na Yombi. (Yombi 1:​8-11) Ku hita mu visoti, ka ca lombolokele ngecize ka tuesi na kuya Njambi ku mutima. Vunoni, visoti vie ku tu hana vukovelelo vua ku muesa ngecize tua lema Yehova na ku mu kulahela. (Tandenu Tiango 1:12.) Mu ntsimbu ya visoti tue ku limuena cilemo ca Yehova, kaha ue ku tu kuasa ku kolesa.

12. Vika tu lilongesa ku muzimbu ua muanetu Dmitrii?

¹² Aci singaniekenu via lihitile navio muanetu Dmitrii ua ku Ásia. Mu va mu tundisile ku vipanga, ua kele vingonde via vingi ca ku hona ku uana vipanga vikuavo. Ngeci ua kulahelele muli Yehova mu ku vueza ku cipanga ca kuambulula, ku hiana mua kele na ku panga. Mua hitile vingonde via vingi, vunoni kasi ka uanene vipanga. Kaha ua vavalele cikuma, ka hasele ambe vene ku katuka ha muhela. Ngeci ua putukile ku singanieka nguendi ka puile naua yala na cisemi ua cili, kaha Yehova na luvala nendi. Tangua limo, munendi ua tuhuile lipapelo ha kele mezi a ku Isaya 30:​15, nguauo: “Mu ku holoka kulu na mu ku tsiliela mu ka kala ngolo yenu.” Ua tualele lipapelo liaco kuli ise na ku mu leka nguendi: “Tata, nga mu livua vungoco, vulukenu ou mukanda.” Ngeci muanetu Dmitrii ua nongonuene ngecize, omo lia vukuasi vua Yehova, vusoko vueni kasi vua kele na via kulia, vuzalo, kaha na ndzivo. Ivene nguendi: “Nja pandele lika ku simpa mutima na ku kulahela muli Njambi.” Nga nenu muli na ku pinda na cisoti caco, kalenu na vusunga nguenu Yehova ua mi lema kaha a ka mi kuasa ku kolesa.

13. Veya ue ku pangesa Yehova mu ku tu hana vusunga ngecize tue ku muya ku mutima, kaha vati ue ku lingamo?

¹³ Ku hitila muli vamuanetu. Ku hitila muli vamuanetu Yehova ue ku muesa ngecize, tue ku muya ku mutima. Ca ku muenako, a hasa ku pangesa vamuanetu va tu kaniamese ha ntsimbu i tu tondeka. Vikevio via solokelele umo ndumbuetu ua ku Ásia mua hitile mu visoti. Va mu tundisile ha vipanga, kaha naua ua vavale cikuma. Mu nima yaco, yalieni ua lingile vupi vua kama, ngeci va mu tambuile citeli ca vukuluntu. Ndumbuetu ua handekele nguendi: “Ka njevuisisile omo lia vika visoti viaco via nji solokelele. Ngeci nja singaniekele nguange halumo nja lingile via ku pihia, kaha ka nja kele naua na kuya Yehova ku mutima.” Ndumbuetu ua lambelele Yehova a mu hane vusunga ngecize ue ku muya ku mutima. Vati Yehova ua mu kumbuluile? Ndumbuetu nguendi: “Vakuluntu mu cikungulukilo va simutuilile nange, na ku nji kuasa ku mona nguange Yehova kasi ua nji lema.” Mu nima ya ntsimbu, ua vundilile naua vukuasi vua Yehova. Ivene nguendi: “Litangua liaco, nja tambuile mikanda ya vamuanetu mu cikungulukilo. Kaha mu nja i tandele, nja muene nguange Yehova ua nji kumbuluile mpundu.” Mua vusunga, vintsimbu via vingi Yehova ue ku tu hana vusunga ngecize, tue ku muya ku mutima ku hitila mu mezi a vamuanetu.—Visa. 10:17.

14. Njila ika ikuavo Yehova ue ku muesa ngecize tue ku muya ku mutima?

¹⁴ Yehova ue ku muesa naua ngecize tue ku muya ku mutima ku hitila mu vimamuna vi tue ku tambula ku vamuanetu. Ca ku muenako, Yehova ua huiminine kapostolo Paulu a sonekele vamuanaye mikanda 14. Ku hitila mu mikanda yaco, Paulu ua mamuine vamuanaye ca ku hona ku vongoloka, vunoni ua lingilemo na ngozi. Omo lia vika Yehova ua huiminine Paulu a va mamune? Muomu Yehova ua pua cisemi ua cili, kaha ue ku sungamesa vana veni vaze ve ku “viukilila” navo. (Visi. 3:​11, 12) Ngeci mukemuo, nga va tu hana cimamuna ca ku fuma mu Mbimbiliya, ka ca lombolokele ngecize Yehova na luvala netu. Vunoni ca muesa ngecize kasi ua tu lema. (VaHe. 12:6) Vika vikuavo via muesa ngecize tue kuya Yehova ku mutima?

VUSUNGA VUKUAVO VUA MUESA NGECIZE TUE KUYA YEHOVA KU MUTIMA

15. Veya Yehova ue ku hana sipilitu santu, kaha vusunga vuka tu hasa ku kala navuo?

¹⁵ Yehova ue ku hana sipilitu santu ku vose ve ku muya ku mutima. (Mat. 12:18) Ngeci mukemuo, tu lihulenu nguetu: ‘Vuno nje ku muesa vimo vifua via sipilitu santu ni?’ Vuno mue ku muesa ntsintsa ku vakuenu ku hiana mu mua lingile ntsimbu kanda mu tantekeye Yehova ni? Nga mue ku muesa vifua via sipilitu santu, mu hasa ku kala na vusunga nguenu mue kuya Yehova ku mutima.—Talenu cikasa “Muhako ua Sipilitu Ukeuo . . . ”

16. Veya Yehova ue ku pangesa mu kuambulula muzimbu ua cili, kaha vati mue ku livua omo liaco? (1 Tesalonika 2:4)

¹⁶ Yehova ua kundika cipanga ca kuambulula muzimbu ua cili ku vose ve ku muya ku mutima. (Tandenu 1 Tesalonika 2:4.) Ndumbuetu Jocelyn ua limuenene vusunga vuaco mua kele na kuambuluila vakuavo muzimbu ua cili. Tangua limo, ua zeyele. Ivene nguendi: “Ka nja kele na ndzili, kaha nja livuile vungoco. Vunoni nja puile pioneiro, kaha lia puile litangua lia kuambulula, ngeci nja vundilile na kuya mu kuambulula.” Litangua liaco Ndumbuetu Jocelyn ua uanene umo mpuevo, lizina liendi Mary, kaha ua tavele ku lilongesa Mbimbiliya. Mu nima ya vimo vingonde, Mary ua handekele nguendi ua vundilile kuli Njambi ntsimbu kanda ndumbuetu Jocelyn a mbombole ha mbelo yendi. Vika ndumbuetu Jocelyn ua lilongesele? Ivene nguendi: “Nja livuile ngue Yehova ali na ku nji leka nguendi: ‘Ue ku nji vuisa ndzolela.’” Mua vusunga, kati vose va ka halakana ku muzimbu u tue kuambulula. Vunoni, tu hasa ku kala na vusunga nguetu, Yehova ue kuivua ndzolela mu tue ku lihakela kapandi ka ku kuambuluila vakuetu muzimbu ua cili.

17. Vika mua lilongesa ku mezi a handekele ndumbuetu Vicky ku tuala ha cikombelo? (Visamo 5:12)

¹⁷ Yehova ue ku pangesa cikombelo linga vose vaze ve ku muya ku mutima va tambule vukuasi. (1 Tim. 2:​5, 6) Vati co nga tua tsiliela mu cikombelo kaha va tu mbatiza, vunoni kasi tue ku livua nguetu ka tue kuya Yehova ku mutima? Vulukenu nguenu, ka tu hasa ku kulahela mu cifua ci tue ku livuilamo, vunoni tu hasa ku kulahela muli Yehova ntsimbu yose. Ue ku mona vakua ku tsiliela mu cikombelo ku pua vakua vuviuke, kaha ua kulahesa ku va vezikisa. (Tandenu Visamo 5:12; Loma 3:26) Ndumbuetu Vicky ua uanene vukuasi mua hiluile ha cikombelo. Tangua limo, mu nima ya ku hilula ha cikombelo, ua nongonuene nguendi: “Yehova na nji muesa ntsintsa mu miaka ya yingi. . . . Vunoni ca puile ngue nja kele na ku mu leka nguange: ‘Vukama vua cilemo cove ka vu hasa ku nji heta. Kaha naua, cikombelo ca Muanove ka ci pumo nga nange u nji tandako.’” Vunoni, mua hiluile ha vuana vua cikombelo, amba vuose ua putukile ku livua nguendi Yehova ua mu lema. Na vuno vene, nga tu hilula ha cikombelo tu hasa ku livua nguetu, Yehova ua tu lema kaha tue ku muya ku mutima.

18. Vusunga vuka tu hasa ku kala navuo, nga tu tualelelaho ku lema Tatetu ua muilu?

¹⁸ Vutuhu tu lihakela kapandi ka ku linga vi tua lilongesa mu cilongesa cino, vunoni vintsimbu vimo tu hasa ku livua vungoco na ku singanieka nguetu ka tue kuya Yehova ku mutima. Nga vi mi solokela, vulukenu nguenu “vaze va mu lema” ve ku muya ku mutima. (Tia. 1:12) Ngeci mukemuo, kaniamesenu vusamba vuenu na Yehova, na ku nongonona vinjila vie ku mueselamo ngecize mue ku muya ku mutima. Kaha kati mu suve nguenu, Yehova “kesi ku laako netu vose.”—Vili. 17:27.