नयाँ क्षेत्रीय सम्मेलन कार्यक्रम
जनवरी, १९९९ मा सुरु हुने दुई दिने क्षेत्रीय सम्मेलन कार्यक्रमको विषय हो, “आज्ञा पालन गर् र तैंले जीवन पाउनेछस्।” (हितो. ४:४) परमेश्वरको आज्ञा पालन गर्नु किन भार होइन भनेर यसले जोड दिनेछ। यसबाहेक, परमेश्वरको इच्छा गर्दा कसरी भावी आशाका साथसाथै स्फूर्ति र साँचो आनन्द पाइन्छ, त्यो पनि देखाउनेछ।—मत्ती ११:२८-३०; यूह. १३:१७.
येशूको आज्ञाअनुरूप यस सम्मेलनमा बप्तिस्मा लिन चाहनेहरूले मण्डलीका अध्यक्षसित कुरा गर्नुपर्छ र तिनले आवश्यक प्रबन्धहरू मिलाउनेछन्।—मत्ती २८:१९, २०.
एउटा गोष्ठीले हामीलाई परमेश्वर र भाइहरूप्रति प्रेम देखाउनसक्ने व्यवहारिक तरिकाहरू बताउनेछ। (यूह. १३:३४, ३५; १ यूह. ५:३) यस कार्यक्रममा भजन १९ र ११९ को उत्साहबर्धक सल्लाह समावेश गरिनेछ। यी भजनहरूमा भएको प्रेरित सल्लाह हजारौं वर्षअघि लेखिएको भए तापनि आज हाम्रोनिम्ति व्यक्तिगत तवरमा कसरी लाभदायी छ, सो हेर्नेछौं।
जिल्ला निरीक्षकले दिने जनभाषणको विषय हो, “परमेश्वरको भय राख्, र उहाँका आज्ञा पालन गर्।” (उप. १२:१३) क्षेत्रीय निरीक्षकको अन्तिम भाषणले युवाहरू कसरी अत्युत्तम जीवन बिताउनसक्छन् र किन अनन्त जीवनबारे विश्वस्त हुनसक्छन् भनेर देखाउनेछ। जिल्ला निरीक्षकले प्रेमको “शाही व्यवस्थालाई” पालन गर्दा पाइने थुप्रै लाभहरू बताउँदै कार्यक्रम समापन गर्छन्। (याकू. २:८) निस्सन्देह, यो यस्तो सम्मेलन हो जसलाई हामी कसैले पनि छुटाउन चाहँदैनौं!