बाइबल अध्ययन सुरु गर्न तयार पारिएको एउटा नयाँ शृङ्खला
१. प्रहरीधरहरा-को जनसंस्करणमा कुन नयाँ शृङ्खला आउनेछ र यो किन तयार पारिएको हो?
१ यस महिनाको सुरुदेखि प्रहरीधरहरा-को जनसंस्करणमा बाइबल अध्ययन सुरु गर्नको लागि हामीलाई मदत गर्ने एउटा नयाँ शृङ्खला पाउनुहुनेछ। त्यसको मुख्य शीर्षक हुनेछ:- “पवित्र शास्त्रबाट सिक्नुहोस्।” इलाकाका कसै-कसैलाई यस शृङ्खलाका प्रत्येक लेख आफै पढ्न पक्कै रमाइलो लाग्नेछ। तथापि यी लेखहरू विशेषगरि घरधनीसित छलफल गर्न तयार पारिएका हुन्।
२. यस लेखका केही विशेषता के-के हुन्?
२ विशेषताहरू: छलफलको दौडान घरधनीलाई सोध्न सकियोस् भनेर यसका शीर्षक र उपशीर्षकहरू प्रश्नको रूपमा दिइएका छन्। घरधनीले बाइबलबाटै सिक्न सकून् भन्नको लागि मुख्य शास्त्रपदहरू उद्धरण गरिएका छैनन्। घरको ढोकैमा छलफल गर्न सकियोस् भनेर अनुच्छेदहरू पनि छोटो पारिएका छन्। प्रत्येक लेखको अन्तमा ‘थप जानकारीको लागि बाइबलले सिकाउँछ किताब हेर्नुहोस्’ भनेर बताइएको छ। त्यसैले उपयुक्त मौका हेरेर पत्रिकाबाट छलफल गर्न रोकेर त्यस लेखमा दिइएको सुझावित अध्यायबाट अध्ययन सुरु गर्न सकिन्छ।
३. घरघरको प्रचारकार्यमा जाँदा घरको ढोकैमा बाइबल अध्ययन सुरु गर्न यो शृङ्खला कसरी प्रयोग गर्न सकिन्छ?
३ कसरी प्रस्तुत गर्ने: पत्रिका प्रस्तुत गर्दा कुनै एउटा लेखबाट घरधनीको चासो जगाउने प्रश्न सोध्न सक्नुहुन्छ। जस्तै:- जुलाई-सेप्टेम्बर अङ्कको पत्रिकाको पवित्र शास्त्रबाट सिक्नुहोस्—साँचो भगवान्बाट किन सिक्नुपर्छ? भन्ने लेखमा बाइबलको महत्त्वबारे छलफल गरिएको छ। तपाईं यस्तो प्रश्न सोध्न सक्नुहुन्छ: “तपाईंलाई बाइबल परमेश्वरको वचन हो जस्तो लाग्छ कि एउटा राम्रो किताब मात्र हो जस्तो लाग्छ? [जवाफ दिने मौका दिनुहोस् ] यसबारे म तपाईंलाई केही रोचक कुरा बताऊँ कि?” त्यसपछि त्यस लेखको पहिलो प्रश्न देखाउनुहोस् र त्यसको अनुच्छेद पढ्नुहोस्। अनि दिइएको शास्त्रपद पनि पढ्नुहोस्। जवाफको लागि पहिलो अनुच्छेदको प्रश्न फेरि एक चोटि घरधनीलाई सोध्नुहोस्। सङ्ख्याद्वारा इङ्गित गरिएका प्रश्नहरू प्रयोग गर्दै सकेजति छलफल गर्नुहोस्। अन्तमा, अर्को पटक छलफल गरिने प्रश्नमाथि ध्यान खिच्नुहोस् अनि फेरि आएर छलफल गर्न निश्चित प्रबन्ध मिलाउनुहोस्। प्रत्येक हप्ता त्यस लेखबाट छलफल गर्न फेरि जानुहोस्। अथवा अर्को तरिका, जिज्ञासु घरधनीलाई सीधै बाइबल अध्ययनको प्रस्ताव राख्नुहोस्। अनि त्यस शृङ्खलाको लेखबाट कसरी अध्ययन गर्न सकिन्छ, देखाउनुहोस्।
४. पुनःभेट गर्दा यो नयाँ शृङ्खला कसरी प्रयोग गर्न सकिन्छ?
४ यो नयाँ शृङ्खला तपाईंले आफ्नो पत्रिका रुट र पुनःभेटहरूमा प्रभावकारी तरिकामा प्रस्तुत गर्न पनि सक्नुहुन्छ। तपाईंले यसो भने पुग्छ: “प्रहरीधरहरा-मा एउटा नयाँ शृङ्खला आएको छ। यो कसरी छलफल गर्न सकिन्छ, तपाईंलाई देखाऊँ?” यस नयाँ शृङ्खलाले थुप्रै मानिसलाई “सत्यको सही ज्ञान” लिन मदत पुगोस् भनी हामी प्रार्थना गर्दछौं।—१ तिमो. २:४.