प्रचारकार्यमा अझै उन्‍नति गर्ने—बाइबलले सिकाउँछ किताब चलाएर बाइबल अध्ययन कसरी गरिन्छ भनेर घरधनीलाई देखाउनुहोस्‌

यसो गर्नु किन महत्त्वपूर्ण छ? हामीले निश्‍शुल्क बाइबल अध्ययन सञ्चालन गर्छौं भन्दा सायद धेरैले बुझ्दैनन्‌। तिनीहरू बाइबल अध्ययन भन्‍ने बित्तिकै कुनै समूहमा भेला भएर बाइबल पढ्‌ने होला अथवा स्वदेश वा विदेशमा कतै चिठ्ठी पठाएर बाइबल सिक्ने होला भन्ठान्छन्‌। त्यसैले सीधै अध्ययनको प्रस्ताव राख्नुभन्दा अध्ययन कसरी गरिन्छ भनेर देखाउनु भए कसो होला? केही मिनेटभित्रै ढोकैमा पनि घरधनीलाई बाइबल अध्ययन गर्नु सजिलो र शिक्षामूलक छ भनेर देखाउन सक्नुहुन्छ।

हामी कसरी यसो गर्न सक्छौं?

परिचय दिएपछि घरधनीलाई तिनी भविष्यबारे चिन्तित छन्‌ कि भनेर सोध्नुहोस्‌।
थुप्रै मानिसहरूलाई त्यस्तै चिन्ताले सताउँछ भनेर बताउनुहोस्‌ र तिनलाई बाइबलले सिकाउँछ किताबको विषयसूची देखाउनुहोस्‌। यस किताबमा सजिलै बुझ्न सकिने अध्यायहरू छन्‌ र ती अध्यायहरूमा भविष्य र अरू थुप्रै विषयबारे बाइबलले के सिकाउँछ भनेर चर्चा गरिएको छ भनी बताउनुहोस्‌। अनि तिनलाई चासो लागेको कुनै अध्याय छ कि, सोध्नुहोस्‌।
घरधनीलाई किताबको एक प्रति दिनुहोस्‌ र तिनले छानेको अध्याय पल्टाउनुहोस्‌। अध्यायको सुरुमा सोधिएका प्रश्‍नहरूको जवाफ त्यसपछिका अनुच्छेदहरूमा पाइन्छ भनेर बताउनुहोस्‌।
यदि तिनी अप्ठेरो मान्दैनन्‌ भने तिनलाई पहिलो अनुच्छेद पढ्‌न आग्रह गर्नुहोस्‌। त्यसपछि अनुच्छेदको प्रश्‍न पढ्‌नुहोस्‌ र जवाफ सँगै मिलेर छलफल गर्नुहोस्‌। जवाफलाई समर्थन गर्ने उल्लेख गरिएका शास्त्रपदहरू पढ्‌नुहोस्‌ अनि छलफल गर्नुहोस्‌। जवाफमा तपाईंले कसरी चिन्ह लगाउनुभएको छ, आफ्नै किताबबाट घरधनीलाई देखाउनुहोस्‌।
अर्को अनुच्छेदमा जानुहोस्‌। तर यस पटक घरधनीलाई आफ्नै शब्दमा जवाफ दिन आग्रह गर्नुहोस्‌।
तिनको प्रशंसा गर्नुहोस्‌ र त्यो अध्यायको बाँकी भाग छलफल गर्न पुनःभेटको प्रबन्ध मिलाउनुहोस्‌।
मिल्छ भने jw.org मा भएको बाइबल अध्ययन कसरी गरिन्छ? भन्‍ने भिडियो देखाउनुहोस्‌।

यो महिना यसो गरे कसो होला?

नयाँ बाइबल अध्ययन सुरु गर्न तपाईंले गर्नुहुने प्रयासमा आशिष्‌ दिनुहोस्‌ भनेर यहोवा परमेश्‍वरलाई प्रार्थना गर्नुहोस्‌।—फिलि. २:१३.
बाइबलले सिकाउँछ किताब चलाउँदै बाइबल अध्ययन कसरी गरिन्छ भनेर घरधनीलाई देखाउने प्रयास गर्नुहोस्‌ अथवा प्रचारमा जाँदा कम्तीमा एक चोटि बाइबल अध्ययन कसरी गरिन्छ? भन्‍ने भिडियो देखाउनुहोस्‌।