के तपाईं स्वास्थ्यसम्बन्धी आकस्मिक अवस्थाको लागि तयार हुनुहुन्छ?
स्वास्थ्यसम्बन्धी आकस्मिक अवस्था अचानक अनि चेतावनीबिना आइपर्न सक्छ। (याकू. ४:१४) त्यसकारण बुद्धिमान् व्यक्तिले त्यस्तो अवस्थाको लागि सकेजति तयारी गर्छ। (हितो. २२:३) के-कस्तो उपचारविधि अपनाउने भनेर के तपाईंले निर्णय गरिसक्नुभयो र आफ्नो निर्णय लिखित रूपमा राखिसक्नुभयो? तपाईंलाई मदत होस् भनेर रक्तविहीन उपचारका विकल्पहरू—वृत्तचित्रको शृङ्खला (अङ्ग्रेजी) भन्ने डीभीडी-को दोस्रो प्रस्तुति, रक्तक्षेपणको वैकल्पिक उपचार—बिरामीको हकहितलाई ध्यान दिने भिडियो तयार पारिएको छ। यो भिडियो हेरिसकेपछि यहाँ दिइएका प्रश्नको जवाफ दिन सक्नुहुन्छ कि, विचार गर्नुहोस्। यस भिडियोमा शल्यक्रियाका छोटो-छोटो दृश्य भएकोले कलिला छोराछोरीलाई भिडियो देखाउँदा विचार पुऱ्याउनुपर्छ।
(१) रगत लिनु स्वास्थ्यको लागि राम्रो हो कि होइन, चिकित्सकहरू फेरि किन विचार गर्दैछन्? (२) रगत नलिई गरिएका शल्यक्रियाका तीनवटा उदाहरण दिनुहोस्। (३) हजारौं चिकित्सक तथा शल्य-चिकित्सकहरू बिरामीलाई रगत नदिई उपचार गर्न किन इच्छुक भएका छन्? (४) अस्पतालमा हालै भइरहेका अध्ययनहरूले रगतको प्रयोगबारे के देखाएको छ? (५) रगत लिंदा के-कस्ता हानि हुन सक्छन्? (६) वैकल्पिक उपचारबाट हुने फाइदाबारे थुप्रै विशेषज्ञले के भनेका छन्? (७) रक्तअल्पताको कारण के हो र शरीरमा रगत कम हुँदा के गर्न सकिन्छ? (८) रातो रक्तकोषको सङ्ख्या कसरी बढाउन सकिन्छ? (९) शल्यक्रिया गर्दा रगत धेरै खेर जान नदिन कस्ता उपायहरू अपनाइँदैछन्? (१०) केटाकेटीहरूमा वा रगत नलिई नहुने गम्भीर अवस्थामा पनि के वैकल्पिक उपचार उपयुक्त हुन सक्छ? (११) उपचार गर्दा चिकित्सकहरूले ध्यान दिनुपर्ने एउटा प्रमुख नैतिक सिद्धान्त के हो?
भिडियोमा प्रस्तुत गरिएका केही उपचारविधि स्वीकार गर्ने वा नगर्ने, त्यो हरेकले आफ्नो अन्तस्करणअनुसार निर्णय गर्नुपर्ने कुरा हो। त्यसकारण कुन उपचारविधि स्वीकार्ने वा कुन नस्वीकार्ने, पक्का गरिहाल्नुहोस्; आकस्मिक अवस्थासम्म नकुर्नुहोस्। परमेश्वरको प्रेम किताबको अध्याय ७ र त्यहाँ उल्लेख गरिएका स्रोत-सामग्रीका साथै नोभेम्बर २००६ अङ्कको हाम्रो राज्य सेवकाई-मा दिइएको परिशिष्टले तपाईंलाई राम्ररी सोचेर अनि बुझेर निर्णय गर्न मदत गर्नेछ। बप्तिस्मा गरिसक्नुभएको छ भने यी सामग्री पढिसकेपछि स्थायी अख्तियारनामा कार्डमा (डीपीए) आफ्नो छनौट लेख्नुहोस् र यो कार्ड सधैं आफूसितै राख्नुहोस्।
[पृष्ठ ३-मा भएको ठूलो अक्षरको क्याप्सन]
के-कस्तो उपचारविधि अपनाउने भनेर के तपाईंले निर्णय गरिसक्नुभयो र आफ्नो निर्णय लिखित रूपमा राखिसक्नुभयो?