तपाईं व्यक्तिगत इलाका लिएर प्रचार गर्न चाहनुहुन्छ कि?
१. व्यक्तिगत इलाका भनेको के हो?
१ व्यक्तिगत इलाका भनेको के हो? आफ्नो मण्डलीसित प्रशस्त इलाका छ भने आफूलाई पायक पर्ने ठाउँ, जस्तै आफ्नै टोल वा टोल नजिकैको ठाउँलाई व्यक्तिगत इलाका बनाउन सक्नुहुन्छ। हाम्रो राज्य सेवकाई, फ्रेब्रुअरी २००७, पृष्ठ ७ मा यस्तो लेखिएको छ: “पायक पर्ने ठाउँलाई व्यक्तिगत इलाका बनाउँदा क्षेत्र सेवामा बिताइने समयको धेरै भन्दा धेरै सदुपयोग हुन्छ। व्यक्तिगत इलाका छ भने, अरू प्रकाशकलाई बोलाएर आफूसँगै प्रचार लैजान पनि सकिन्छ।”
२. व्यक्तिगत इलाका लिंदा मण्डलीको प्रचारकार्यलाई कसरी टेवा पुऱ्याउन सकिन्छ?
२ मण्डलीको प्रचारकार्यलाई टेवा पुऱ्याउन: आफ्नो काम गर्ने ठाउँनजिकै व्यक्तिगत इलाका लिनुभयो भने खाजा खाने समयमा अथवा घर फर्कनुअघि प्रचार गर्न सक्नुहुन्छ। यस्तो बेला नजिकै काम गर्ने कोही प्रकाशकसित सँगै जान सक्नुहुन्छ। आफ्नो घरनजिकै व्यक्तिगत इलाका लिनुभयो भने तपाईं र तपाईंको परिवारलाई साँझमा प्रचार गर्न पायक पर्न सक्छ। क्षेत्र सेवाको सभामा उपस्थित हुनुभएको छैन भने प्रचारकार्य सुरु गर्नअघि प्रार्थना गरेर यहोवाको डोऱ्याइ माग्नु उचित हो। (फिलि. ४:६) साथै, व्यक्तिगत इलाकामा प्रचार गर्न अनि मण्डलीले प्रबन्ध गरेको क्षेत्र सेवामा भाग लिन कति समय बिताउने हो, त्यस सन्दर्भमा सन्तुलित हुनुपर्छ। विशेषगरि सप्ताहन्तमा सम्पूर्ण मण्डली क्षेत्र सेवामा भेला हुँदा तपाईंले पनि त्यस प्रबन्धलाई सक्दो साथ दिनु राम्रो हो।
३. व्यक्तिगत इलाका लिनुका फाइदाहरू के-के हुन्?
३ फाइदा: व्यक्तिगत इलाका छ भने समय पाउनेबित्तिकै प्रचार गर्न सक्नुहुन्छ। यात्रा गर्न धेरै समय खर्च गर्नुपर्दैन, बरु प्रचारकार्यमा बढी समय बिताउन सक्नुहुन्छ। यस प्रबन्धले गर्दा कसै-कसैले सहायक अथवा नियमित अग्रगामी सेवा गर्न सकेका छन्। साथै, चासो देखाउने मानिसहरूलाई पुनःभेट अनि बाइबल अध्ययन सञ्चालन गर्न सजिलो हुन्छ। आफ्नो व्यक्तिगत इलाका फिर्ता गर्नुअघि पटक-पटक सोही इलाकामा गएर प्रचार गरेका छौं भने घरधनीहरूसित चिनजान बढाउन अनि उनीहरूको भरोसा जित्न सकेको थुप्रैले अनुभव गरेका छन्। आफूलाई सुम्पिइएको सेवाको काम राम्ररी पूरा गर्न के तपाईं र तपाईंको परिवारलाई व्यक्तिगत इलाकाले मदत गर्नेछ?—२ तिमो. ४:५.