प्रचारकार्यमा अझै उन्‍नति गर्ने—व्यापारिक इलाकामा साक्षी दिनुहोस्‌

यसो गर्नु किन महत्त्वपूर्ण छ? थुप्रै मानिस लामो समयसम्म काममा व्यस्त हुने भएकोले उनीहरूलाई सुसमाचार सुनाउने सबैभन्दा राम्रो तरिका उनीहरूको काम गर्ने ठाउँमै गएर सुनाउनु हो। व्यापारिक इलाकामा प्रचार गर्दा रमाइलो हुनुका साथै यसले राम्रो नतिजा पनि ल्याउन सक्छ किनकि त्यहाँ कसै न कसैलाई पक्कै भेटिन्छ। कामदारहरूले सबैलाई आफ्नो सम्भाव्य ग्राहकको रूपमा हेर्ने भएकोले उनीहरू अरूसँग शिष्ट व्यवहार गर्छन्‌। यस्तो इलाकामा प्रभावकारी प्रचारक हुनको लागि प्रकाशकहरूले विवेक चलाउनुपर्छ र आफ्नो पहिरन तथा कोरीबाटीमा ध्यान दिनुपर्छ। (२ कोरि. ६:३) व्यापारिक इलाकामा कत्तिको प्रचार गरिएको छ र कसले प्रचार गरेको छ, सेवा निरीक्षकले त्यसको रेखदेख गर्नुपर्छ।

हामी कसरी यसो गर्न सक्छौं?

छोटो प्रस्तुति तयार पार्नुहोस्‌। कामदारको धेरै समय लियौं भने हामीलाई पछि तिनीसित कुरा गर्ने मौका नदिइन सक्छ।
व्यापार त्यति नहुने समयमा भेट्‌न जानुहोस्‌; जस्तै पसल वा अफिस खोल्ने समयमा।
सुरुमा मुख्य व्यक्‍तिसित कुराकानी गर्ने प्रयास गर्नुहोस्‌। न्यानो र मिजासिलो हुनुहोस्‌। तपाईं यसो भन्‍न सक्नुहुन्छ: “मानिसहरूलाई घरमा भेट्‌न गाह्रो भएकोले हामी उनीहरूसित काम गर्ने ठाउँमै छोटो कुराकानी गर्दै छौं।” छोटो कुराकानी गर्नुहोस्‌ र पर्चा, पत्रिका वा अरू कुनै साहित्य दिनुहोस्‌। हामी सामान बेच्न आएका मानिसहरू होइनौं भनेर बुझाउन अनुदानको प्रबन्धबारे नबताउनु नै राम्रो हो। तर कसैले हाम्रो सङ्‌गठनको खर्च कसरी बेहोरिन्छ भनेर सोधेमा बताउन सकिन्छ।
मुख्य व्यक्‍ति मिजासिलो छन्‌ भने अरू कामदारसित पनि कुरा गर्न सकिन्छ कि भनेर अनुमति माग्नुहोस्‌। कामदारहरूले खाना खाने वा आराम गर्ने ठाउँमा केही साहित्यहरू छोड्‌न सकिन्छ कि भनेर सोध्नु पनि कतै-कतैचाहिं राम्रो हुन सक्छ।
विवेक चलाउनुहोस्‌ र परिस्थितिअनुसार छाँटकाँट गर्न तयार हुनुहोस्‌। जस्तै, कुनै कामदार आफ्नो ग्राहकसित कुराकानी गर्दै छन्‌ वा व्यस्त छन्‌ भने केही समय पर्खनुहोस्‌।

यो महिना यसो गरे कसो होला?

व्यापारिक इलाकामा कसरी साक्षी दिन सकिन्छ, अर्को पटकको साँझको पारिवारिक उपासनामा अभ्यास गर्नुहोस्‌।