Baŵa si Fulu

Hadia no irai örasoi wa abua wangoromaʼö foloʼö? No irai irasoi daʼö Razo Dawido, irege mangandrö ia khö Lowalangi, ”Asogö khögu waʼaoha gölö ba woloʼö niwaʼöu.” (Si. 51:12) Iʼomasiʼö sibai Yehowa Dawido. Hizaʼi, itaria moguna iforege wangoromaʼö foloʼö ba moguna göi tafalua zimane daʼö. Hadia mbörö? Si oföna, börö me lö moʼahonoa ita no tohöna so ba dödöda walömoloʼö. Si dua, lö iböhöli Satana ba wondrönisi tödöda enaʼö mamadaö ita khö Lowalangi simane nifaluania. (2 Ko. 11:3) Si tölu, no ifasui ita ”lala wangera-ngera samaelungu tödö niha si lö moloʼö”. (Ef. 2:2) Moguna sibai taforege wolawa falömoʼahonoada, fondrönisi dödö moroi khö Gafökha hegöi ulidanönia. Ba taforege woloʼö niwaʼö Yehowa hegöi niha nibeʼenia noro dödö. w23.10 6 ¶1

Hadia wamahaʼö si tola tahalö ba dandra sahöli-höli dödö nifalua Yesu me alua walöwa ba Kana? Tola tafahaʼö ita wa moguna so khöda wangide-ngideʼö. Lö ihöni-höni ia Yesu ba waʼamofozu si no ifalua. Lö irai ihöni-höni ia samösa. Hizaʼi, si fao fangide-ngideʼö lö tebulö ifolakhömi Namania. (Yoh. 5:​19, 30; 8:28) Simane Yesu, moguna göi so khöda wangide-ngideʼö. Gofu hadia ia waʼamofozu si no takhamö ba wangai halöwö khö Yehowa, tebai tahöni-höni ita samösa. Hizaʼi, omasi ita tasuno Lowalangi sabölö, si no mangoromaʼö khöda faʼasökhi dödö me ibeʼe khöda ginötö ba wamosumange yaʼia. (Yer. 9:​23, 24) Börö daʼö, yalötebulö tafolakhömi Yehowa. Tatörö tödöda, wa tola mofozu fefu halöwö nifaluada börö wanolonia. (1 Ko. 1:​26-31) Na so khöda wangide-ngideʼö, lö tafatunö ba niha böʼö hadia manö zi sökhi si no tafalua. Omuso dödöda börö me iʼila ba iʼameʼegö tödö wamorege nifaluada Yehowa. (Fareso göi Mataiʼo 6:​2-4; Heb. 13:16) Tatu omasi ia na taʼoʼö wangide-ngideʼö niʼokhögö Yesu.—1 Fe. 5:6. w23.04 4 ¶9; 5 ¶11-12

Ibeʼe wanuturu lala Lowalangi khö Waulo ba woʼamenesi niha Keriso enaʼö laʼameʼegö tödö zoguna ba niha böʼö. Hewisa woloʼöda mene-mene andrö ba gangowuloa? Yaʼia daʼö na tatörö tödöda wa omasi göi niha böʼö ba wameʼe mbua gera-erara simane yaʼita. Angeragö atö. Ba ginötö fahuhuo ndraʼugö khö ndra awö-awömö, hadia ha yaʼugö manö zi fahuhuo ba lö öbeʼe ginötö ba niha böʼö fahuhuo? Tatu omasiʼö öbeʼe khöra ginötö enaʼö fahuhuo ira. Simane daʼö göi ba gangowuloa. Omasi ita tabeʼe ginötö ba niha böʼö ba wamaʼema mbua gera-erara. Sambua lala si sökhi ba wangaroʼö ira talifusöda yaʼia daʼö na tabeʼe khöra ginötö ba wamatunö famatira. (1 Ko. 10:24) Börö daʼö tatatugöi enaʼö adogo-dogo mbua gera-era nifaʼemada, irege so ginötö ba niha böʼö ba wamaʼema mbua gera-erara. Na öbeʼe mbua gera-era sadogo-dogo, böi oya sibai nitutunömö. Na ötutunö fefu zi so ba ngenoli, lö hadöi inötö ba niha böʼö ba wameʼe mbua gera-era. w23.04 22-23 ¶11-13

Na alua waʼatebulö ba waʼaurida, böi olifu ita ba wanolo niha böʼö mendrua manö weʼamöi manuriaigö. Moguna taʼokhögö gamuata faʼalöfatandro ba wanuriaigö. Niha nifalukhaisida ba halöwö fanuriaigö, oi faböʼö-böʼö nifaduhusira tödö hegöi lala waʼaurira. Tola tafahaʼö ita moroi ba duma-duma zinenge sotöi Faulo sangokhögö amuata faʼalöfatandro. Imane Yesu wa Faulo andrö ”sinenge nifatenge ba soi böʼö”. (Rom. 11:13) Börö daʼö, manuriaigö Waulo ba niha Yahudi, niha Yunani, niha salawa sekola, niha si toʼölö, niha si so faka, hegöi khö ndra razo. Iforege Faulo ba wamalua hadia ia enaʼö tofakha ba dödö niha böʼö duria nifaʼemania. (1 Ko. 9:​19-22) Inehegö zi toʼölö lafalua, lala waʼaurira, hegöi nifaduhusira tödö enaʼö tola ifaudugö lalania ba wanuriaigö. Tola göi mofozu ita ba halöwö fanuriaigö na lö fatandro ita ba tafaudugö lalada wanuriaigö si tefaudu ba zoguna khöra. w23.07 23 ¶11-12

Na lö alio mofönu zi samösa niha, tenga daʼö geluahania wa lö khönia faʼabölö. Daʼö gamuata sanolo yaʼia ba wangoromaʼö faʼahono gera-era ba ginötö si basaki. Falöʼalio mofönu no sambua moroi ba ’mbua-bua geheha’. (Gal. 5:​22, 23) Ngawua wehede Yunani nifoʼeluaha tobali ”falöʼalio mofönu” asese muʼogunaʼö ia ba wanutunö kudo gatua si no mufauwu. Khalaigö atö kudo sabölö si no mufauwu. Eluahania lö alio fatifa mazui molawa ia. Hewaʼae no mauwu ia, lö tebulö waʼabölönia. Hewisa göi wondrouʼöda amuata falöʼalio mofönu ba lö tebulö abölö ita? Tebai taʼodaligö waʼabölöda samösa. Moguna taʼandrö geheha Lowalangi ba wanolo yaʼita enaʼö tola taʼokhögö gamuata si sökhi andrö. Ato zi no mofozu wamahaʼö yaʼia ba wangoromaʼö falöʼalio mofönu. Duma-dumania, ato ndra talifusöda sangoromaʼö wa lö alio mofönu ira na so zomasi fabuʼa-buʼa khöra. Daʼö zanolo niha böʼö ba wangokhögö fangera-ngera si sökhi sanandrösa khö ndra Samaduhuʼö Yehowa.—2 Ti. 2:​24, 25. w23.09 14 ¶3

Ba gangilata sahöli-höli dödö niʼila zinenge sotöi Yohane, so 24 zatua sokubaloi ba zorugo no latuhi danö ba wanuno Yehowa. Lasuno Lowalangi börö me lafaduhuʼö ’waʼabölönia, ba no sinangea itema lakhömi hegöi sumange’. (Fam. 4:10, 11) Oya göi dane-dane khö ndra malaʼika si lö faröi ba wanuno Yehowa. Fao ira khö Yehowa ba zorugo ba no aboto ba dödöra sanandrösa khönia. Tola laʼila gamuata si sökhi niʼokhögö Yehowa me lanehegö hadia ia nifaluania. Buania, tefarou dödöra ba wanuno yaʼia. (Yob. 38:​4-7) Moguna tasuno Yehowa ba wangandröda. Tola tatutunö khönia hadia mbörö wa taʼomasiʼö ia ba taʼameʼegö tödö gamuatania. Ba ginötö öbaso Zura Niʼamoniʼö ba öfahaʼö ndraʼugö, tandraigö nehegö gamuata Yehowa sabölö omasiʼö. (Yob. 37:23; Rom. 11:33) Aefa daʼö, tutunö khö Yehowa hadia nirasoimö sanandrösa ba gamuatania andrö. Tola göi tasuno Yehowa ba zi no ifalua khöda hegöi khö ndra talifusöda.—1 Sa. 2:​1, 2. w23.05 3-4 ¶6-7

Me döfi 1919, teʼefaʼö nono mbanua Lowalangi moroi ba Mbabilona Sebua. Ba ndröfi daʼö, tebayoini ”zawuyu si lö faröi ba satua-tua” ba latolo niha satulö tödö enaʼö ibörögö latörö ”Lala Niʼamoniʼö”. (Mat. 24:​45-47; Yes. 35:8) Famaʼanö si no lafalua ba zilalö ira niha samosumange Lowalangi, möi fanolo ba niha satulö tödö enaʼö itugu oya lafahaʼö ira sanandrösa ba gohitö dödö Yehowa. (Amd. 4:18) Latolo göi ira ba wamalua fombulöʼö enaʼö tola tefaudu lala waʼaurira ba goi-goi Yehowa. Lö itötöna Yehowa ba nono mbanuania enaʼö ha samuza lafalua wombulöʼö. Hizaʼi, izara-zara ba wamohouni ono mbanuania. Fefu ita, tatu omuso dödöda me taʼila wa tola taʼomusoiʼö dödö Lowalangi sagötö faʼara ba zi so miföna! Ero sambua lala, moguna murorogö ero inötö. Simanö göi ”Lala Niʼamoniʼö”. Iʼotarai me döfi 1919, lö tebato halöwö ba wondrorogö ”Lala Niʼamoniʼö” enaʼö itugu ato niha zondröi Mbabilona Sebua. w23.05 17 ¶15; 19 ¶16

Labeʼe wamomaha ira Boto Solohe khö ndra asisten moroi ba ngawalö panitia ndra Boto Solohe. Iadaʼa, lö faröi ndra asisten andre ba wamalua halöwöra ba organisasi. No lafaʼanö ira wanohugö halöwö ba wondrorogö biri-biri Yesu. Fatua lö teʼasiwai wamakao sabölö-bölö, no ahori tefazawa niha nibayoini ba zorugo. Hewaʼae simanö, lö aetu wamalua famosumange satulö ba gulidanö andre. Lö tebulö itolo ira Yesu, Sondröniaʼö yaʼira irege lö labato wamosumange Lowalangi. Atulö sa, ba ginötö daʼö dania tohare Gogi moroi ba Magogi yaʼia daʼö angowuloa soi sanuwö ono mbanua Lowalangi. (Hez. 38:​18-20) Hizaʼi, ha sabata waʼaluania ba tebai isaisi nono mbanua Lowalangi ba wamosumange Yehowa. Ba gangilata zinenge sotöi Yohane, oroma khönia ”ngawawa sato” biri-biri tanö böʼö khö Keriso, ba irongo wa teʼorifi ira moroi ba ”wamakao sabölö-bölö”. (Fam. 7:​9, 14) Faduhu dödöda wa hasambalö iʼefaʼö nono mbanuania Yehowa! w24.02 5-6 ¶13-14

Hadia nifaluada enaʼö taʼokhögö waʼabölö geheha niʼamoniʼö? Tola taʼandrö khö Yehowa, tafahaʼö ita ba Daromali, ba tatuhini organisasinia nituturu geheha niʼamoniʼö. Na tafalua daʼö, tola tadouʼö ’mbua-bua geheha’. (Gal. 5:​22, 23) Ibeʼe gehehania Lowalangi ha ba niha si lö raʼiö fangera-ngera hegöi amuata, lö ibeʼe na taʼangeragö mazui tafalua zogoro ia. (1 Te. 4:​7, 8) Enaʼö lö tebulö taʼokhögö waʼabölö geheha niʼamoniʼö, moguna ’böi taʼaohasi ba dödö zi no mufaʼeleʼö’. (1 Te. 5:20) ’Wamaʼeleʼö’ nitutunö ba daʼa yaʼia daʼö fehede Lowalangi nifaʼema geheha niʼamoniʼö, tefarahu ba daʼö wamangelama sanandrösa wa no ahatö ngaluo Yehowa. Böi so ba wangera-ngerada wa ngaluo Yehowa andrö mazui Hamagedo, ara nasa alua ia mazui tawaʼö lö alua ia ba götöda andre. Hizaʼi, faduhu dödöda wa hasambalö tohare ngaluo daʼö, irege lö tebulö tafalua zatulö ba ’tafosumange Lowalangi soroi ba dödö’.—2 Fe. 3:​11, 12. w23.06 12 ¶13-14

Yaʼita niha Keriso, hadia zinangea tafalua na oroma gambara zohorö ba HP-da ba zi lö tadöna-döna? Moguna iʼanemaiʼö taheta daʼö! Aoha khöda wamalua yaʼia na itörö tödöda wa ebua sibai mböli wahuwusada khö Yehowa. Moguna göi tatimbagö ngawalö gambara hewaʼae na tenga pornografi daʼö, hizaʼi tola ifatumbuʼö ba wangera-ngerada gamuata fohorö. Hadia mbörö? Börö me gambara simane daʼö, tola ifarou ita ba wamalua horö bakha ba dödö. (Mat. 5:​28, 29) Imane si samösa zatua sokubaloi sotöi David moroi ba Thailand, ”Imane tödögu, ’hewaʼae gambara andrö tenga pornografi, hadia omasi Yehowa na lö tebulö ufaigi daʼö?’ Börö me uʼokhögö lala wangera-ngera simane daʼö, tola uhalö gangetula si fao faʼatua-tua.” Na taʼataʼufi Yehowa soroi ba dödö, mazui ataʼu ita ba wangafökhöiʼö tödönia, tola tahalö gangetula si fao faʼatua-tua. Imane Sura Niʼamoniʼö, ”Böröta waʼatua-tua, fangataʼufi Yehowa.” w23.06 23 ¶12-13

’Bateʼe tanö bakha’ tola manö daʼö geluahania banua niha Keriso. No ifabuʼu khöda Yehowa wa hasambalö ilumöʼö ita sagötö alua wamakao sabölö-bölö na lö tebulö teʼosambuaʼö ita khö ndra talifusöda. Andrö, iʼotarai iadaʼa moguna teforege ba wangoromaʼö faʼomasi khö ndra talifusö soroi ba dödö. Daʼö zotatugöi hadia teʼorifi ita mazui löʼö! ”Ba ngaluo sebua andrö khö Yehowa” tefakao dania fefu niha gulidanö. (Zef. 1:​14, 15) Tola manö göi lataögö waʼabasaki ono mbanua Yehowa. Hizaʼi, na no tafaʼanö ita iʼotarai iadaʼa, lö tebulö taʼokhögö waʼahono dödö ba tola tatolo niha böʼö. Lö tebulö anau gölöda hewaʼae tataögö ngawalö wolohi. Na so ndra talifusöda si sara lala wamati sinangea mutolo, taforomaʼö khöra waʼahakhö dödö ba taforege ba wameʼe fanolo. Börö me taʼomasiʼö ndra talifusöda, lö tebulö teʼosambuaʼö ita khöra. Buania, ibeʼe khöda waʼauri si lö aetu Yehowa ba gulidanö si lö hadöi bencana hegöi famakao.—Yes. 65:17. w23.07 7 ¶16-17

Asese iwaʼö Sura Niʼamoniʼö wa ono mbanua Yehowa si lö faröi no niha sagabölö. Hewaʼae niha sagabölö ira, lö sagötö faʼara larasoi zimanö. Duma-dumania, Razo Dawido no irai irasoi wa faʼabölönia ”simane faʼabölö hili” hizaʼi ba ginötö tanö böʼö no irai irasoi ’waʼataʼu’. (Si. 30:7) Duma-duma tanö böʼö yaʼia daʼö Simesono sanema faʼabölö moroi ba geheha Lowalangi, hizaʼi ifaduhuʼö na lö hadöi eheha niʼamoniʼö ’alö waʼabölönia ba atata dölania simane niha sato’. (Sangu. 14:​5, 6; 16:17) Tola laʼokhögö waʼabölö ira niha si lö faröi andre börö me Yehowa zameʼe khöra faʼabölö. Ifaduhuʼö göi sinenge sotöi Faulo wa moguna khönia waʼabölö moroi khö Yehowa. (2 Ko. 12:​9, 10) No irai mofökhö ia. (Gal. 4:​13, 14) Itaria göi irasoi wa abua wamalua satulö. (Rom. 7:​18, 19) No irai ataʼu ba aombö dödönia ba woʼangeragö si lö alua nasa. (2 Ko. 1:​8, 9) Hizaʼi ba ginötö ambö faʼabölönia, ba daʼö itema waʼabölö. Hadia mbörö? Börö me Yehowa zameʼe faʼabölö soguna khönia. w23.10 12 ¶1-2

Na itaria tarasoi wa lö eluaha waʼaurida, tola tatörö tödöda wa Yehowa zondröni yaʼita khönia. (Yoh. 6:44) Iʼila mbua-bua si sökhi niʼokhögöda, ba abölö aboto ba dödönia hewisa ita zindruhunia. (2 Ng. 6:30) Börö daʼö, tola tafaduhusi tödö ia me iwaʼö wa ebua sibai mbölida fönania. (1 Yo. 3:​19, 20) Fatua lö tafahaʼö ita ba zindruhu, so ösa ba gotaluada zamalua horö irege itegu-tegu manö ita tödöda irugi iadaʼa. (1 Fe. 4:3) So göi niha Keriso si lö faröi mamosumange Yehowa, hizaʼi lö tebulö lalawa walömoʼahonoara. Hewisa ndraʼugö? Hadia itaria örasoi wa lö iʼefaʼö zalamö Yehowa? Na simanö, tatu terara dödömö me öʼila wa so nono mbanua Yehowa tanö böʼö samorege ba wolawa fangera-ngera simane daʼö. Duma-dumania, tefakao sibai Waulo me ifuli itörö tödönia walömoʼahonoania. (Rom. 7:24) Tatu manö, no ifalalini gera-erania Faulo ba no tebayagö ia idanö. Hizaʼi ba wamaiginia, yaʼia andrö ’sinenge fondrege zide-ide’ ba ’fondrege zebua horö’.—1 Ko. 15:9; 1 Ti. 1:15. w24.03 27 ¶5-6

Moroi ba gangetula si fasala nihalö Yehoasi, tafahaʼö ita wa moguna tafili zi fahuwu khöda sangomasiʼö hegöi sangomusoiʼö tödö Yehowa. Yaʼira zanolo yaʼita enaʼö lö tebulö tafalua ngawalö zi sökhi. Tola fahuwu ita ba niha salawa döfi mazui sabölö awuyu-wuyu moroi khöda. Böi olifu ita wa abölö awuyu-wuyu ndröfi Yehoasi moroi khö Yehoyada. Ba ginötö öfili zi fahuwu khömö, angeragö: ’Hadia latolo ndraʼo ba wangaʼaroʼö famatigu khö Yehowa? Hadia lafarou ndraʼo ba wamaudugö faʼaurigu ba goi-goi Lowalangi? Hadia asese ladunö-dunö sanandrösa khö Yehowa hegöi ngawalö zi no lafahaʼö yaʼira moroi ba Zura Niʼamoniʼö? Hadia so khöra waʼabarani ba woʼamenesi yaʼo ba ginötö moguna ia khögu?’ (Amd. 27:​5, 6, 17) Sindruhunia, na tenga sangomasiʼö Yehowa zi fahuwu khömö, lö moguna fariawö ndraʼugö khöra. Hizaʼi, na fahuwu ndraʼugö ba niha sangomasiʼö Yehowa, aroʼö wahuwusau khöra börö me daʼö zanolo yaʼugö ba wamalua ngawalö zi sökhi!—Amd. 13:20. w23.09 9-10 ¶6-7

Alafa ba Omega yaʼia daʼö hurufo siföföna ba safuria ba abjad Yunani. Börö daʼö, me iwaʼö Alafa ndraʼo ba Omega, omasi Yehowa ba wamaduhuʼö wa hadia zi no ibörögö hasambalö iʼasiwai. Me no aefa iwöwöi Gadamo hegöi Khawa, imane khöra, ’Miʼoʼono ba miʼoyaʼö ami, mifoʼösi gulidanö ba mifatörö ia.’” (1 Mo. 1:28) Me ifatunö gohitö dödönia andrö Yehowa, amaedola no imane ”Alafa”. Ba zi so miföna, ngaʼötö Gadamo si lö faröi ba soʼahonoa, lafönui gulidanö ba labaliʼö ia tobali Faradaiso. Ba luo daʼö, amaedola no imane Yehowa ”Omega”. Me föna, me no awai iwöwöi ’mbanua hegöi tanö awö nösinia maʼafefu’, ifaduhuʼö Yehowa wa hasambalö alua gohitö dödönia. Eluahania, no mofozu fefu gohitö dödönia ba niha hegöi ulidanö ba gangohorita ngaluo si fitu.—1 Mo. 2:​1-3. w23.11 5 ¶13-14

Lö aoha lala nitörö iʼotarai Mbabilona numalö ba Gizaraʼeli, ba tola manö muʼogunaʼö ginötö mato öfa waŵa waʼara ba lala. Hizaʼi, ifabuʼu Yehowa wa fefu daha-taha nitaögöra sagötö wofanöra hasambalö iheta daʼö. Aboto ba dödö niha Yahudi si lö faröi wa ebua sibai howu-howu nitemara na mangawuli ira ba Gizaraʼeli töra moroi ba zi no latehegö. Howu-howu sabölö ebua nitemara moʼamakhaita daʼö ba lala wamosumange. Hizaʼi lö hadöi osali Yehowa ba Mbabilona. Lö hadöi naha wanunu sumange si tola laʼogunaʼö iraono Gizaraʼeli ba wameʼe sumange simane nisura ba Goroisa Moze. Lö hadöi göi ira ere sangai halöwö ba wameʼe sumange. Baero daʼö, abölö ato zamosumange lowalangi faya ba si lö moʼameʼegö tödö Yehowa hegöi goi-goinia. Börö daʼö—ngafulu ribu niha Yahudi sangomasiʼö Yehowa—omasi sibai ira na mangawuli ba soira enaʼö tola lafalua wamosumange satulö. w23.05 15 ¶3-4

Moguna khöda wanolo moroi ba geheha niʼamoniʼö enaʼö ’lö taböhöli wanörö lala haga’. Hadia mbörö? Börö me lö aoha wondrorogö faʼalöraʼiö ba gulidanö safönu amuata fohorö andre. (1 Te. 4:​3-5, 7, 8) Tola itolo ita eheha niʼamoniʼö ba wolawa lala wangera-ngera gulidanö si lö tefaudu ba lala wangera-ngera Lowalangi. Tola göi itolo ita eheha niʼamoniʼö ba wamalua ”ngawalö zi sökhi [ba] faʼatulö”. (Ef. 5:9) Sambua lala enaʼö tatema geheha niʼamoniʼö yaʼia daʼö na taʼandrö ia. Iwaʼö Yesu wa ”ibeʼe [Yehowa] geheha niʼamoniʼö ba niha sangandrö khönia”. (Luk. 11:13) Tola göi tatema ia na fao ita khö ndra talifusöda ba wanuno Yehowa ba gangowuloa. (Ef. 5:​19, 20) Bua moroi ba geheha niʼamoniʼö, daʼö zanolo yaʼita ba wamaudugö faʼaurida ba lala sangomusoiʼö tödö Lowalangi. w24.03 23-24 ¶13-15

Hadia moguna ödouʼö waʼebolo dödöu? Na moguna, ohe ba wangandrö. Faʼebolo dödö andrö no bua moroi ba geheha niʼamoniʼö. (Gal. 5:​22, 23) Börö daʼö, tola taʼandrö geheha niʼamoniʼö hegöi fanolo moroi khö Yehowa enaʼö tola taʼokhögö waʼebolo dödö. Na alua gabula dödö sanandraigö faʼebolo dödöda, ’böi taböhöli wangandrö’ eheha niʼamoniʼö enaʼö tola taforomaʼö waʼebolo dödö. (Luk. 11:13) Taʼandrö göi wanolo moroi khö Yehowa enaʼö tola taʼokhögö lala wangera-ngerania. Na no aefa mangandrö, moguna göi taforege ba wangoromaʼö faʼebolo dödö ero maʼökhö. Na lö mamalö mangandrö ita enaʼö so khöda waʼebolo dödö hegöi ba wangoromaʼö amuata andrö, hasambalö itolo ita Yehowa enaʼö tedou waʼebolo dödöda, hewaʼae na tenga niha sebolo tödö ita mböröta. Baero daʼö tola möi göi fanoloda na taʼangerönusi duma-duma si so ba Zura Niʼamoniʼö. Oya duma-duma niha sebolo tödö nisura ba Zura Niʼamoniʼö. Na taʼangerönusi duma-duma andrö, tola tafahaʼö ita hadia manö lalada ba wangoromaʼö faʼebolo dödö. w23.08 22-23 ¶10-11

Ifaduhuʼö Yesu khö Wetero wa hasambalö ibönökhi zoguna khönia Yehowa. Me no aefa tesusugi Yesu, iforomaʼö khö Wetero hegöi ira sinenge tanö böʼö dandra sahöli-höli dödö ba wangalui iʼa. (Yoh. 21:​4-6) Daʼa zamaduhuʼö tödö Wetero wa aoha khö Yehowa ba wombönökhi soguna khönia. Te itörö tödönia wehede Yesu wa hasambalö ibönökhi Yehowa zoguna ba niha ’sangofönaiʼö wangalui Famatörönia’. (Mat. 6:33) Börö daʼö, iʼofönaiʼö Fetero ba wamalua halöwö fanuriaigö, tenga ba wangalui iʼa. Me luo Wendrakose 33 M, manuriaigö ia si fao faʼabarani, ba ribu niha nitolonia irege latemaʼö duria somuso dödö. (Hal. 2:​14, 37-41) Baero daʼö, itolo göi niha Zamaria hegöi niha moroi ba soi böʼö enaʼö tobali soloʼö khö Keriso. (Hal. 8:​14-17; 10:​44-48) Sindruhu-ndruhu iʼogunaʼö ia Yehowa ba wondröni niha moroi ba ngawalö soi enaʼö farahu ira ba mbanua niha Keriso. w23.09 20 ¶1; 23 ¶11

Mato Dua fakhe me no ladudugö Yeruzalema ira niha Mbabilona. Razo Mbabilona sotöi Nebukanesa, iʼangifigö nadu sebua sataʼu niha famaigi. Iʼandrö khö ndra niha sagatua-tua, farahu ba daʼö Danieli, ba wanutunö fangifinia andrö awö geluahania. Na lö laʼila lafalua daʼö, hasambalö ibunu ira fefu. (Dan. 2:​3-5) Na lö iʼanemaiʼö ifalua daʼö Danieli, ato niha si mate. Andrö wa ”möi [ia] khö Razo ba iʼandrö enaʼö mubeʼe khönia ginötö ba wanutunö eluaha wangifi Razo”. (Dan. 2:16) Moguna wamati hegöi faʼabarani khö Danieli börö me lö si tesura ba Zura Niʼamoniʼö wa no irai ifoʼeluaha wangifi. Iʼandrö khö ndra si fahuwu khönia ”enaʼö laʼangaröfili Lowalangi si so ba zorugo ba wangandrö faʼahakhö dödö ba wanutunö si tobini andrö”. (Dan. 2:18) Ibeʼe wanema li Yehowa ba wangandröra. Börö wanolo moroi khö Lowalangi, tola ifoʼeluaha Danieli wangifi Nebukanesa. Teʼorifi Danieli hegöi ira awönia. w23.08 3 ¶4

Angeragö mbua nitemau na öforomaʼö waʼebolo dödö. Na so khöda waʼebolo dödö, hasambalö tarasoi waʼomuso dödö hegöi faʼahono dödö. Lö göi alio mofökhö ita ba lö fawuka gera-erada. Na ebolo dödöda ba niha böʼö, tola taʼokhögö wahuwusa si sökhi khöra ba itugu teʼosambuaʼö göi mbanua niha Keriso si farahu yaʼita. Na so zangandrö fönuda, lö alio aukhu ita ba lö taʼebua-buaʼö gabula dödö andrö. (Si. 37:​8, nis.; Amd. 14:29) Hizaʼi sabölö tohude, na so khöda waʼebolo dödö, no taʼoʼö Namada si so ba zorugo ba itugu ahatö ita khönia. Faʼebolo dödö andrö no amuata si sökhi sibai ba oya mbua nitemada na taʼokhögö ia! Hewaʼae abua ba wangokhögö faʼebolo dödö, hizaʼi börö wanolo moroi khö Yehowa tola tadouʼö ita ba wangoromaʼö amuata andrö. Ba sagötö wombaloida ulidanö si bohou si fao faʼebolo dödö, tola faduhu dödöda wa ”hörö Yehowa zondrorogö niha samosumange yaʼia, sanötöna faʼomasinia si lö faröi”. (Si. 33:18) Datahalö gangetula ba wangoromaʼö faʼebolo dödö. w23.08 22 ¶7; 25 ¶16-17

Itutunö Yakobo wa tola manö iwaʼö zi samösa niha mamati ia, hizaʼi lö tefaudu daʼö ba mbua-buania. (Yak. 2:​1-5, 9) Itutunö göi Yakobo sanandrösa khö zi samösa niha sangila ’dalifusönia si lö nukha ba lö balazo’, hizaʼi lö itolo ira. Hewaʼae na iwaʼö niha daʼö wa mamati ia, hizaʼi lö ifalua hadia ia. Sindruhunia tenga niha samati ia. (Yak. 2:​14-16) Itutunö göi Yakobo duma-duma Rakhaba sangoromaʼö famati ba gamuatania. (Yak. 2:​25, 26) No irongo Rakhaba sanandrösa khö Yehowa ba iʼila hewisa wolumöʼönia ndraono Gizaraʼeli. (Yos. 2:​9-11) Hadia nifalua Rakhaba? Ilumöʼö zi darua samauze enaʼö lö mate ira. Ba gafuriata, tefotöi ia niha satulö simane Aberahamo hewaʼae lö moʼahonoa ia ba tenga moroi ba gotalua ndraono Gizaraʼeli. Ba daʼa taʼila wa moguna muforomaʼö wamati ba gamuata. w23.12 5 ¶12-13

Yaʼita niha Keriso, moguna aboto ba dödöda dane-dane wamahaʼö moroi ba Zura Niʼamoniʼö. Hizaʼi lö ibönö na ha daʼö manö. Börö wanolo geheha niʼamoniʼö, omasi ita taʼokhögö waʼaboto ba dödö sanandrösa ba ”wangera-ngera Lowalangi sabölö abakha”. (1 Ko. 2:​9, 10) Tandraigö alui hadia manö zi tola mangahatöʼö yaʼugö khö Yehowa. Duma-dumania, tola öʼalui hewisa Yehowa wangoromaʼö faʼomasi khö ndra enoninia ba götö föna, ba hadia zangoromaʼö wa iʼomasiʼö göi ndraʼugö iadaʼa. Baero daʼö, tola öfahaʼö ndraʼugö ba goi-goi nitatugöi Yehowa mböröta ba ndraono Gizaraʼeli, hewisa lala wamosumange yaʼia ba faedogö daʼö ba goi-goi nibeʼenia ba mbanua niha Keriso. Mazui alui wamaʼeleʼö sanandrösa khö Mesia, hadia manö zi no alua sagötö faʼaurinia me mangai halöwö ia ba gulidanö. Tandraigö alui ba ogunaʼö Indeks Publikasi Menara Pengawal mazui Fanuturu Lala ba Wamalua Riset khö Ndra Samaduhuʼö Yehowa. Itugu örasoi waʼomuso dödö na simane daʼö wamahaʼöu yaʼugö ba Zura Niʼamoniʼö. Tola ”ösöndra waʼaboto ba dödö sanandrösa khö Lowalangi” ba öʼokhögö wamati saro.—Amd. 2:​4, 5. w23.10 19 ¶4-5

Ba li sindruhunia, ngawua wehede ”soroi ba dödö” niʼogunaʼö Wetero, eluahania ”mamadölö tanga”. Aefa daʼö, ifatunö göi khöda ayati daʼö wa na taʼomasiʼö ndra talifusöda soroi ba dödö, tola tabalugö horö nifaluara. Hadia geluahania? Faʼomasi andrö hulö nukha sebolo. Na so meza si no ahori mukhokhoi, tola tebalu fefu daʼö na mubologö khönia nukha sebolo. Simane daʼö göi, na tabologö waʼomasida ba wombalugö horö ndra talifusöda, tenga ha sambua mazui dombua horö nibalugöda, hizaʼi ”oya ibalugö horö faʼomasi andrö”. Eluahania na taʼomasiʼö ndra talifusöda soroi ba dödö, lö tatanö ba dödöda zala hegöi falömoʼahonoara. Moguna aro waʼomasida enaʼö tola taʼefaʼö zala ndra talifusöda si sara lala wamati, hewaʼae itaria abua wamalua daʼö. (Kol. 3:13) Na mofozu ita ba wangefaʼö sala niha böʼö, daʼö zangoromaʼö wa aro waʼomasida ba no taʼomusoiʼö dödö Yehowa. w23.11 10-11 ¶13-15

Me 26 fakhe ndröfi Razo Yosia, ibörögö ba wangehaogö mangawuli osali Lowalangi. Sagötö mufalua halöwö andrö, musöndra ”mbuku Goroisa Yehowa nifaʼemania khö Moze”. Me labaso khö razo mbuku andrö, iʼanemaiʼö ifalua wombulöʼö ba woloʼö si no tesura. (2 Ng. 34:​14, 19-21) Hadia omasiʼö ba wombaso Sura Niʼamoniʼö ero maʼökhö? Te no öbörögö ba wamalua daʼö. Hadia so khöu waʼomuso dödö? Hadia öʼalui ba ösura ayati si tola manö moguna khöu samösa? Te me 39 fakhe ndröfi Yosia, so zala nifaluania irege teʼala waʼaurinia. Abölö iʼodaligö waʼabölönia samösa ba lö iʼandrö wanuturu lala moroi khö Yehowa. (2 Ng. 35:​20-25) So wamahaʼö si tola tahalö. Gofu hawaʼalawa ndröfida mazui no ara tafahaʼö ita ba Zura Niʼamoniʼö, böi tebulö taʼalui Yehowa. Dataʼandrö wanuturu lala moroi khönia ero maʼökhö, tafahaʼö ita ba Daromalinia, ba tatemaʼö mene-mene moroi ba niha Keriso saro ba wamati. Na tafalua daʼö, lö alio tedönisi dödöda ba wamalua sala, ba hasambalö itugu monönö waʼomuso dödöda.—Yak. 1:25. w23.09 12 ¶15-16

Ba Zura Niʼamoniʼö, ato ndra alawe si tobali duma-duma ba wangomasiʼö hegöi ba wamosumange Yehowa. Yaʼira andrö ira alawe sangokhögö amuata si sökhi. Duma-dumania, ’laʼila lafatörö waʼaurira’ ba ”lö faröi ba ngawalö hadia ia”. (1 Ti. 3:11) Ato göi ndra talifusöda ira alawe ba mbanua niha Keriso iadaʼa si tobali duma-duma si sökhi. Yaʼami ono alawe si bohou ebua, hadia so niʼilami ndra talifusöda ira alawe saro ba wamati si tola mibaliʼö duma-duma ba wamalua si sökhi? Nehegö gamuatara si sökhi ba angeragö hewisa woloʼömö duma-dumara. Niha Keriso saro ba wamati moguna laʼokhögö wangide-ngideʼö. Hadia mbörö? Na iʼokhögö wangide-ngideʼö si samösa talifusöda ira alawe, iʼokhögö wahuwusa si sökhi khö Yehowa hegöi ba niha böʼö. Duma-dumania, samösa dalifusöda ira alawe sangomasiʼö Yehowa, tatu si fao fangide-ngideʼö iʼoʼö gamakhoita si no itatugöi Amania ba zorugo ba 1 Korindro 11:3. Itutunö ba ayati daʼö wa no itatugöi Yehowa haniha zi tobali sondröniaʼö ba mbanua niha Keriso hegöi yomo ba nomo. w23.12 18-19 ¶3-5

Itötöna Yehowa khö woʼomo ira matua enaʼö laʼomasiʼö woʼomora, laʼameʼegö tödö zoguna khöra ba mboto, tobali ira si fahuwu ba latolo enaʼö aro gamakhaita woʼomora khö Yehowa. Simane fangera-ngera si sökhi, mangosinangegö ira alawe, ba tola mufaduhusi tödö, möi fanolomö enaʼö tobali foʼomo ira matua si sökhi. Na no mangowalu ndraʼugö, te tobali ndraʼugö samösa ama. Hadia wamahaʼö nihalömö moroi khö Yehowa enaʼö tobali ndraʼugö ama si sökhi? (Ef. 6:4) Lö ibiniʼö Yehowa wamatunö khö Yesu wa iʼomasiʼö sibai ba omuso dödönia khö Nononia andrö. (Mat. 3:17) Na tobali ndraʼugö ama, böi tebulö fatunö khö nonou wa öʼomasiʼö sibai ira. Aseseʼö suno ira ba ngawalö zi sökhi nifaluara. Ama soloʼö duma-duma Yehowa latolo ndraonora enaʼö tobali niha Keriso saro ba wamati. Tola öfaʼanö ndraʼugö ba noro dödö andrö iʼotarai iadaʼa, yaʼia na öʼameʼegö tödö zoguna ba nösi nomomö hegöi ira talifusöda ba gangowuloa, ba öforomaʼö wa öʼomasiʼö ba öfosumange ira.—Yoh. 15:9. w23.12 28-29 ¶17-18

Hewaʼae na samosumange Yehowa ita, hasambalö alua khöda gabula dödö hegöi fökhö simane salua ba niha böʼö. Tola manö göi tataögö wanaisi mazui folohi moroi ba niha si fatuwu ba nono mbanua Yehowa. Hewaʼae na lö ilumöʼö ita Yehowa moroi ba gabula dödö andrö, hizaʼi no ifabuʼu wa hasambalö ibeʼe khöda wanolo. (Yes. 41:10) Börö wanolo moroi khönia, lö tebulö tarasoi waʼomuso dödö, tahalö gangetula si tefaudu ba lö faröi ita hewaʼae na alua khöda gabula dödö sebua. No ifabuʼu Yehowa wa ibeʼe khöda hadia niwaʼö ba Zura Niʼamoniʼö, yaʼia daʼö ”faʼohahau dödö andrö khö Lowalangi”. (Fil. 4:​6, 7) Faʼohahau dödö daʼa eluahania faʼahono dödö hegöi era-era börö me taʼokhögö wahuwusa si sökhi khö Yehowa. Faʼohahau dödö daʼa ’abölö moroi ba gera-era niha fefu’, mazui töra moroi ba zi tola takhalaigö. Duma-dumania, hadia no irai öʼosindruhugö wangandrö khö Yehowa ba aefa daʼö örasoi waʼahono dödö? Daʼö nifotöi ”faʼohahau dödö andrö khö Lowalangi”. w24.01 20 ¶2; 21 ¶4

Niha sangomasiʼö Lowalangi, tefarou dödöra ba wanuno töinia soroi ba dödö. Iʼila Razo Dawido wa fanuno töi Yehowa eluahania manuno Yehowa samösa, börö me moʼamakhaita döi Yehowa andrö ba mbua-buania si sökhi hegöi amuatania sahöli-höli dödö. Ba wamaigi Dawido, teʼamoniʼö sibai döi namania, ba omasi ia isuno daʼö. Omasi ia ifalua daʼö ’soroi ba dödönia maʼasambua’. Simane Dawido, no tobali duma-duma si sökhi göi ndra niha Lewi ba wanuno töi Yehowa. Si fao fangide-ngideʼö lafaduhuʼö wa lö hadöi fehede si tola mangoromaʼö fanuno ba döi Yehowa niʼamoniʼö. (Neh. 9:5) Tatu omuso sibai dödö Yehowa na irongo lasuno ia soroi ba dödö ira niha sangokhögö fangide-ngideʼö. w24.02 9 ¶6

Lö afatö dödö Yehowa na lö mofozu ndraʼugö ba wogamö ohitö dödömö si töra moroi ba waʼabölömö. (2 Ko. 8:12) Fahaʼö ndraʼugö ba zi lö mofozuʼö andrö. Törö tödömö ngawalö zi no ökhamö. Imane Sura Niʼamoniʼö wa ’tenga sa si lö atulö Lowalangi irege olifu ia halöwömö’. (Heb. 6:10) Andrö, moguna itörö tödöu daʼö. Tandraigö angeragö hadia manö zi no ökhamö. Duma-dumania, no örorogö wahuwusamö khö Yehowa, öfatunö ba niha böʼö sanandrösa khönia, mazui no ölulu waʼaurimö ba tebayagö idanö. Irugi iadaʼa, no öforomaʼö waʼatedou ba wogamö ohitö dödö ba wamati. Börö daʼö, tola öforomaʼö nasa waʼatedou ba wamati ba wogamö ohitö dödö si no ötatugöi. Börö wanolo Yehowa, tola mofozu ndraʼugö ba wogamö ohitö dödömö. Ba ginötö öforege ba wogamö ohitö dödömö, omusoiʼö dödömö ba wofanömö. Böi olifu ndraʼugö hewisa Yehowa ba wanolo hegöi ba wamahowuʼö yaʼugö. (2 Ko. 4:7) Na lö awuwu ndraʼugö, hasambalö oya howu-howu nitemamö.—Gal. 6:9. w23.05 31 ¶16-18

Iʼalui lala Yehowa ba wangoromaʼö ba nono mbanuania wa iʼomasiʼö ba omuso dödönia khöra. Ba Zura Niʼamoniʼö, dua kali iwaʼö Yehowa khö Yesu wa iʼomasiʼö ba omuso dödönia khö Nononia andrö. (Mat. 3:17; 17:5) Hadia omasiʼö örongo wehede Yehowa me ifaduhuʼö wa omuso dödönia khömö? Lö fahuhuo khöda Yehowa moroi ba zorugo, hizaʼi iʼogunaʼö Daromalinia, Sura Niʼamoniʼö. Na tabaso wehede Yesu safönu faʼomasi khö ndra nifahaʼönia, no amaedola ”tafondrondrongo” wehede Yehowa khöda. Moʼahonoa Yesu ba woloʼö amuata Namania. Börö daʼö, na tabaso wehedenia khö ndra nifahaʼönia si lö faröi ba si lö moʼahonoa, tola takhalaigö wa no fehede Yehowa khöda daʼö. (Yoh. 15:​9, 15) Na alua khöda gabula dödö, tenga daʼö geluahania wa lö saʼae omuso dödö Yehowa khöda. Sindruhunia, daʼö ginötö khöda ba wangoromaʼö khö Yehowa wa taʼomasiʼö ba sindruhu-ndruhu tafaduhusi tödö ia.—Yak. 1:12. w24.03 27-28 ¶10-11