Talifusöma Ono Matua—Yatobali Ami Niha Keriso Saro ba Wamati

1. Hadia zinangea lafalua ira talifusöda ira matua enaʼö mofozu ira?

IMANE Razo Dawido khö Zelomo, ”Yaʼabölö ndraʼugö ba enaʼö hulö nono matua.” (1 Ra. 2:1-3, nis.) Fefu ndra talifusöda ira matua iadaʼa, moguna laforege ba wamalua mene-mene daʼö. Enaʼö tola mofozu ira, lö tola löʼö lafahaʼö ira ba woloʼö oroisa Lowalangi ba lafalua goi-goi Zura Niʼamoniʼö ba waʼaurira. (Luk. 2:52) Hana wa moguna laforege ira talifusöda ono matua enaʼö tobali ira niha Keriso saro ba wamati?

2-3. Hana wa moguna iforege talifusöda ono matua enaʼö tobali ia niha Keriso saro ba wamati?

² Oya noro dödö nitema ndra talifusöda ira matua, he yomo ba nomo mazui ba mbanua niha Keriso. Yaʼami ira talifusöma ono matua, tatu no irai göi miʼangeragö sanandrösa ba noro dödö niʼokhögömi ba zi so miföna. Tola manö omasiʼö mangai halöwö safönu inötö, tobali enoni mazui satua sokubaloi. Mazui te omasiʼö mangowalu ba so nonomö. (Ef. 6:4; 1 Ti. 3:1) Enaʼö tola mofozu ndraʼugö ba wogamö ohitö dödö daʼö, moguna tobali ndraʼugö niha Keriso saro ba wamati.b

³ Hewisa enaʼö tobali ndraʼugö niha Keriso saro ba wamati? Hadia manö zinangea öfahaʼö yaʼugö? Ba hadia zinangea öfalua iadaʼa ba wamaʼanö yaʼugö enaʼö mofozu ba wamalua noro dödö niʼokhögömö ba zi so miföna?

LALA ENAʼÖ TOBALI NIHA KERISO SARO BA WAMATI

4. Hezo ösöndra duma-duma si sökhi sinangea öʼoʼö? (Faigi göi gambara.)

⁴ Fili duma-duma si sökhi sinangea öʼoʼö. Ba Zura Niʼamoniʼö, ato ndra si bohou ebua si tobali duma-duma si sökhi khöda sinangea taʼoʼö. Laʼomasiʼö sibai Lowalangi ba laʼameʼegö tödö noro dödö nitemara ba wondrorogö ono mbanuania. Tola göi öfahaʼö ndraʼugö ba duma-duma si sökhi niforomaʼö ndra talifusöda ira matua saro ba wamati si so ba gangowuloa mazui yomo ba nomo. (Heb. 13:7) Tola göi öʼoʼö duma-duma soʼahonoa, yaʼia daʼö Yesu Keriso. (1 Fe. 2:21) Sagötö tatutunö dania daʼa, nehegö hadia manö mbua-bua si tola öʼoʼö moroi khöra. (Heb. 12:1, 2) Aefa daʼö, angeragö hewisa lalamö ba woloʼö duma-dumara.

5. Hewisa enaʼö öʼokhögö wangera-ngera si sökhi, ba hana wa moguna sibai daʼö? (Sinunö 119:9)

⁵ Okhögö ba ’rorogö wangera-ngera si sökhi’. (Amd. 3:21) Ira matua sangokhögö fangera-ngera si sökhi, ihaogö iʼangeragö fatua lö ifalua hadia ia. Börö daʼö, forege wangokhögö ba rorogö wangera-ngera simane daʼö. Hadia mbörö? Börö me ato nono matua ba gulidanö iadaʼa sangodaligö lala wangera-ngerara samösa hegöi nirasoira ba wangai angetula. (Amd. 7:7; 29:11) Aefa daʼö, tola tedönisi wangera-ngera hegöi nifaluamö ba ngawalö niforomaʼö ba TV, film, Internet mazui media sosial. Hizaʼi, hewisa enaʼö öʼokhögö lala wangera-ngera si sökhi? Fahaʼö ndraʼugö ba goi-goi Zura Niʼamoniʼö ba angeragö hadia mbua nitemamö na öfalua daʼö. Ogunaʼö goi-goi daʼö ba wangai angetula sangomusoiʼö tödö Yehowa. (Baso Zinunö 119:9.) Na öʼokhögö lala wangera-ngera si sökhi, daʼö zanolo yaʼugö enaʼö tobali niha Keriso saro ba wamati. (Amd. 2:11, 12; Heb. 5:14) Angeragö hewisa wangera-ngera si sökhi moguna ia ba zi dombua ngawalö andre: (1) ba ginötö fariawö ndraʼugö khö ndra talifusöda ira alawe, hegöi (2) ba ginötö öhalö gangetula sanandrösa ba wonukha hegöi gaya mbu nifilimö.

6. Hewisa wangera-ngera si sökhi möi fanolo dalifusöda ono matua ba wamosumange talifusöda ira alawe?

⁶ Fangera-ngera si sökhi zanolo yaʼugö ba wangoromaʼö wa öfosumange ndra alawe. No si toʼölö ba sinangea na adöni dödö zi samösa talifusöda ono matua fahuwu khö dalifusöda ira alawe. Hizaʼi, ono matua sangokhögö lala wangera-ngera si sökhi, na lö omasi ibaliʼö ngambatönia dalifusöda andrö, tatu lö iwaʼö, isura mazui ifalua gofu hadia ia zi tola mamatumbuʼö ba dödö dalifusöda ira alawe wa omasi khönia dalifusöda andrö. (1 Ti. 5:1, 2) Na fakawa ia khö zi samösa talifusöda ira alawe, moguna irorogö döi si sökhi dalifusöda andrö ba lö fao-fao manö ira na lö awö-awöra.—1 Ko. 6:18.

7. Hewisa wangera-ngera si sökhi möi fanolo dalifusöda ira matua ba ginötö ifili nukha mazui gaya mbunia?

⁷ Oroma göi wa iʼokhögö wangera-ngera si sökhi talifusöda ono matua moroi ba lagu wonukha mazui gaya mbunia. Sasesenia, niha samazökhi hegöi sohöni-höni lagu wonukha si bohou, lö lafosumange Yehowa ba lasawö goi-goi sanandrösa ba gamuata. Börö daʼö, nukha nifazökhira si toʼölönia no fandroli-ndroli mazui hulö nukha ndra alawe. Ba ginötö ifili nukha niʼogunaʼönia si samösa ono matua somasi tobali niha Keriso saro ba wamati, moguna iʼalui goi-goi Zura Niʼamoniʼö ba iʼoʼö duma-duma si sökhi ba mbanua niha Keriso. Tola isofu khönia samösa, ’Moroi ba nifiligu andre, hadia oroma wa uʼokhögö wangera-ngera si sökhi ba uʼangeragö nirasoi niha böʼö? Moroi ba lagu wonukhagu, hadia laʼila niha wa yaʼodo andre samosumange Lowalangi?’ (1 Ko. 10:31-33; Tit. 2:6) Ono matua sangokhögö fangera-ngera si sökhi, hasambalö lafosumange ia ira talifusöda ba omuso dödö Namania si so ba zorugo khönia.

8. Hadia zinangea ifalua talifusöda ono matua enaʼö tobali ia niha si tola muʼodaligö?

⁸ Tola muʼodaligö. Ono matua si tola muʼodaligö, owölö-ölö ia ba wamalua fefu noro dödö nitemania. (Luk. 16:10) Nehegö duma-duma soʼahonoa nibeʼe Yesu. Lö irai iʼosiwawöi mazui iʼaohasi ba dödö halöwö nibeʼe khönia. Ifalua fefu halöwö nibeʼe Yehowa khönia, hewaʼae itaria abua wamalua daʼö. Iʼomasiʼö fefu niha, mendrua manö ira nifahaʼönia ba si fao faʼaoha gölö ibeʼe waʼaurinia salahira. (Yoh. 13:1) Ba woloʼö duma-duma Yesu, moguna öforege wamalua fefu halöwö nitemamö. Na lö öʼila sibai hewisa wamalua yaʼia, si fao fangide-ngideʼö andrö wanolo moroi khö ndra talifusö saro ba wamati. Böi asala noa wamaluamö halöwömö. (Rom. 12:11) Asiwai halöwömö ba falua ia ”hulö na khö Yehowa, tenga ba niha”. (Kol. 3:23) Tatu manö tenga niha soʼahonoa ndraʼugö. Börö daʼö, foromaʼö wangide-ngideʼö ba faduhuʼö hadia zala nifaluamö.—Amd. 11:2.

FAHAʼÖ NDRAʼUGÖ BA WAʼONEKHE SI TOLA ÖʼOGUNAʼÖ ERO MAʼÖKHÖ

9. Hana wa moguna laforege ira talifusöda ono matua ba wamahaʼö yaʼira ba waʼonekhe si tola laʼogunaʼö ero maʼökhö?

⁹ Enaʼö tobali ndraʼugö niha Keriso saro ba wamati, moguna öfahaʼö ndraʼugö ba waʼonekhe si tola öʼogunaʼö ero maʼökhö. Daʼa zanolo yaʼugö ba wamalua noro dödö ba mbanua niha Keriso, ba wanöndra halöwö si tola mangaʼasogö soguna khöu hegöi ösi nomomö, mazui enaʼö tola öʼokhögö wahuwusa si sökhi ba niha böʼö. Datatutunö duma-dumania.

10-11. Na onekhe dalifusöda ono matua ba wombaso hegöi ba wanura, hadia mbua nitemania ba hadia göi mbua nitema mbanua niha Keriso? (Sinunö 1:1-3) (Faigi göi gambara.)

¹⁰ Fahaʼö ndraʼugö enaʼö itugu onekhe ba wombaso hegöi ba wanura. Itutunö Sura Niʼamoniʼö wa niha somuso tödö hegöi sofozu ba waʼauri yaʼia daʼö niha sangogunaʼö inötönia ba wombaso hegöi ba woʼangerönusi Taromali Lowalangi ero maʼökhö. (Baso Zinunö 1:1-3.) Na ibaso Zura Niʼamoniʼö ero maʼökhö, itugu aboto ba dödö zi samösa niha lala wangera-ngera Yehowa, sanolo yaʼia ba wangokhögö faʼaboto ba dödö hegöi fangera-ngera si sökhi. (Amd. 1:3, 4) Ira matua samalua daʼö, moguna sibai ira ba mbanua niha Keriso. Hadia mbörö?

¹¹ Ira talifusöda ba gangowuloa, moguna khöra wanolo moroi khö dalifusöda ira matua si tola mamahaʼö ba sameʼe khöra mene-mene moroi ba Zura Niʼamoniʼö. (Tit. 1:9) Na onekhe ndraʼugö wombaso hegöi manura, daʼö zanolo yaʼugö ba wamaʼanö huhuo hegöi bua gera-era si tola mangaʼaroʼö famati niha böʼö. Daʼö göi zanolo yaʼugö ba wanura hadia zadöni dödömö ba ginötö öfalua wamahaʼö samösa, mazui na öfondrondrongo huhuo ba gangowuloa, angowuloa sebua ba zi sambua wilayah mazui regional. Fefu nisuramö andrö zanolo yaʼugö ba wangaʼaroʼö famatimö hegöi ba wamarou tödö niha böʼö.

12. Hadia zanolo yaʼugö enaʼö itugu sökhi lagu wahuhuosamö?

¹² Fahaʼö ndraʼugö enaʼö itugu sökhi lagu wahuhuosamö. Moguna ifahaʼö ia talifusöda ira matua enaʼö sökhi lagu wahuhuosania. Moguna göi ifondrondrongo niwaʼö niha böʼö ba iʼameʼegö tödö nirasoira. (Amd. 20:5) Tola ifalua daʼö na ifahaʼö ia ba wombaso note wehede, ngaha-ngaha mboto mazui nidanö mbawa zi samösa niha. Tebai öfalua daʼö na lö asese fariawö ndraʼugö khöra. Na asese öʼogunaʼö alat elektronik ba wahuhuosa ba niha, duma-dumania e-mail mazui SMS, tola manö abua khömö fahuhuo ba niha böʼö na falukha ami. Börö daʼö, na omasiʼö fahuhuo ba zi samösa niha, alui lala hegöi inötö enaʼö falukha ami.—2 Yo. 12.

13. Hadia nasa zinangea ifahaʼö yaʼia talifusöda ono matua? (1 Timoteo 5:8) (Faigi göi gambara.)

¹³ Fahaʼö ndraʼugö ba wombönökhi soguna khöu. Ira talifusöda ira matua saro ba wamati, moguna laʼalui göi zoguna khöra samösa hegöi ösi nomora. (Baso 1 Timoteo 5:8.) Ba soi böʼö misa, so ndraono matua samahaʼö yaʼira ba nekhe-nekhe danga moroi khö namara mazui si fahatö khöra. So göi zamahaʼö yaʼira ba ngawalö halöwö hegöi nekhe-nekhe danga ba zekola. Moguna sibai öfahaʼö ndraʼugö ba nekhe-nekhe danga sanolo yaʼugö ba wanöndra halöwö. (Hal. 18:2, 3; 20:34; Ef. 4:28) Forege wohalöwö ba asiwai halöwö si no öbörögö irege öʼokhögö döi si sökhi. Na öfalua daʼö, aoha khömö ba wanöndra halöwö ba enaʼö lö ahetaʼö ba halöwömö. Bua-bua hegöi nekhe-nekhe danga nitutunöda andre, moguna ia khömö ba wamalua noro dödö nitemamö ba zi so miföna. Datatutunö duma-dumania.

FAʼANÖ NDRAʼUGÖ WAMALUA HALÖWÖ NITEMAMÖ BA ZI SO MIFÖNA

14. Hadia zinangea ifalua talifusöda ono matua enaʼö tola tobali ia sangai halöwö safönu inötö?

¹⁴ Halöwö safönu inötö. Ato ndra talifusöda ira matua saro ba wamati, no lahalö halöwö safönu inötö iʼotarai ba waʼawuyu-wuyura. Na mangai halöwö tobali perintis, daʼö zanolo yaʼira enaʼö laʼila falulu fohalöwö ba niha si faböʼö-böʼö. Daʼö göi zanolo yaʼira enaʼö atua-tua ba wangogunaʼö hegöi ba wombagi kefe. (Fil. 4:11-13) Sambua lala ba wamörögö halöwö safönu inötö yaʼia daʼö tobali perintis ekstra. Ato zi no tobali perintis ekstra ba zi hauga waŵa, tefaʼanö ira ba wangai halöwö tobali perintis biasa. Na no mangai halöwö ira tobali perintis, daʼö zamokai khöra bawandruhö ba wangai halöwö safönu inötö, duma-dumania mangai halöwö ba Mbetieli mazui ba proyek konstruksi.

15-16. Hadia zanolo talifusöda ono matua enaʼö tobali ia enoni mazui satua sokubaloi?

¹⁵ Enoni sohalöwö mazui satua sokubaloi. Fefu ndra talifusöda ira matua, moguna laforege ba wangai halöwö hegöi ba wangoromaʼö bua-bua si sökhi tobali satua sokubaloi ba mbanua niha Keriso. Iwaʼö Sura Niʼamoniʼö na so ndra matua samorege ba wangai halöwö andre, no ”halöwö si sökhi niʼaluinia”. (1 Ti. 3:1) Fatua lö mangai halöwö tobali satua sokubaloi, si oföna moguna tobali ia enoni sohalöwö. Enoni sohalöwö andre zanolo ira satua sokubaloi ba woʼameʼegö tödö zoguna khö ndra talifusöda ba gangowuloa. Ira satua sokubaloi hegöi enoni, moguna mangai halöwö ira si fao fangide-ngideʼö ba owölö-ölö ira manuriaigö. Tola tobali enoni sohalöwö dalifusöda ono matua, iʼotarai 17 irugi 19 fakhe ndröfira. Ira talifusöda si no tobali enoni sohalöwö, tola tobali ira satua sokubaloi hewaʼae awena 20 fakhe ndröfira.

¹⁶ Hewisa enaʼö tola tobali ndraʼugö enoni mazui satua sokubaloi? So zi no itutunö Sura Niʼamoniʼö sinangea öforege wamalua. Hizaʼi, törö tödöu wa fefu daʼö teʼodane-dane ba Zura Niʼamoniʼö hegöi faʼomasimö khö Yehowa, ba nösi nomo mazui ba mbanua niha Keriso. (1 Ti. 3:1-13; Tit. 1:6-9; 1 Fe. 5:2, 3) Forege enaʼö aboto ba dödöu daʼö fefu ba andrö wanolo khö Yehowa ba wamalua yaʼia.c

17. Hadia zanolo talifusöda ono matua enaʼö tobali ia foʼomo hegöi högö yomo ba nomo? (Faigi göi gambara.)

¹⁷ Foʼomo ira matua hegöi högö yomo ba nomo. Simane nitutunö Yesu, so ösa dalifusöda ira matua si lö mangowalu. (Mat. 19:12) Hizaʼi, na öhalö gangetula mangowalu, so noro dödöu tobali foʼomo ira matua hegöi högö yomo ba nomo. (1 Ko. 11:3) Itötöna Yehowa khö woʼomo ira matua enaʼö laʼomasiʼö woʼomora, laʼameʼegö tödö zoguna khöra ba mboto, tobali ira si fahuwu ba latolo enaʼö aro gamakhaita woʼomora khö Yehowa. (Ef. 5:28, 29) Fefu gamuata hegöi faʼonekhe nitutunöda ba artikel daʼa, simane fangera-ngera si sökhi, mangosinangegö ira alawe, ba tola mufaduhusi tödö, möi fanolomö enaʼö tobali foʼomo ira matua si sökhi. Sindruhu-ndruhu tefaʼanö ndraʼugö wamalua noro dödömö tobali foʼomo ira matua hegöi högö yomo ba nomo.

18. Hadia zinangea ifalua talifusöda ono matua enaʼö tobali ia ama si sökhi?

¹⁸ Ama. Na no mangowalu ndraʼugö, te tobali ndraʼugö samösa ama. Hadia wamahaʼö nihalömö moroi khö Yehowa enaʼö tobali ndraʼugö ama si sökhi? (Ef. 6:4) Lö ibiniʼö Yehowa wamatunö khö Yesu wa iʼomasiʼö sibai ba omuso dödönia khö Nononia andrö. (Mat. 3:17) Na tobali ndraʼugö ama, böi tebulö fatunö khö nonou wa öʼomasiʼö sibai ira. Aseseʼö suno ira ba ngawalö zi sökhi nifaluara. Ama soloʼö duma-duma Yehowa latolo ndraonora enaʼö tobali niha Keriso saro ba wamati. Tola öfaʼanö ndraʼugö ba noro dödö andrö iʼotarai iadaʼa, yaʼia na öʼameʼegö tödö zoguna ba nösi nomomö hegöi ira talifusöda ba gangowuloa, ba öforomaʼö wa öʼomasiʼö ba öfosumange ira. (Yoh. 15:9) Daʼa zanolo yaʼugö enaʼö tobali foʼomo hegöi ama si sökhi ba zi so miföna. Iadaʼa, ebua sibai mbölimö föna Yehowa, ba tola tobali ndraʼugö fanolo sebua ba nösi nomomö hegöi ba mbanua niha Keriso.

HADIA NIFALUAMÖ IADAʼA?

19-20. Hadia zanolo talifusöda ono matua enaʼö tobali ia niha Keriso saro ba wamati? (Faigi gambara ba guli majalah.)

¹⁹ Ira talifusöma ono matua, tatu so niforegemi enaʼö tobali ami niha Keriso saro ba wamati. Moguna mifili duma-duma si sökhi sinangea miʼoʼö, miforege wangokhögö fangera-ngera si sökhi, tola mufaduhusi tödö, mifahaʼö ami ba waʼonekhe mazui ba nekhe-nekhe danga, ba mifaʼanö ami wamalua halöwö nitemami ba zi so miföna.

²⁰ Na öʼangeragö noro dödö nitemau dania ba zi so miföna, tola manö öwaʼö tödöu wa abua wamalua yaʼia. Hizaʼi, hasambalö tola öfalua daʼö. Törö tödöu wa omasi sibai Yehowa wanolo yaʼugö. (Yes. 41:10, 13) Tatu latolo göi ndraʼugö ira talifusöda ba gangowuloa. Na tobali ndraʼugö ono matua niʼomasiʼö Yehowa, hasambalö örasoi waʼomuso dödö ba faʼahono dödö ba waʼauri. Maʼomasiʼö sibai ami, yaʼami ira talifusöma ono matua! Yafahöna howu-howu nibeʼe Yehowa khömi sagötö miforege tobali niha Keriso saro ba wamati.—Amd. 22:4.