Hasambalö Alua Gohitö Dödö Yehowa!

1, 2. (a) Hadia nitutunö Yehowa khöda? (b) Hadia mbuʼusa li si so ba Yesaya 46:10, 11 hegöi 55:11?

NGAWUA wehede si oföna ba Zura Niʼamoniʼö no öna-öna, hizaʼi ebua sibai geluahania. Imane, ”Ba mböröta ifazökhi Lowalangi mbanua si yaŵa, awö danö.” (I Moze 1:1) Lö oya zi no taʼila moroi ba ngawalö hadia ia zi no ifazökhi Lowalangi ba gulidanö, ba ha maʼifu zi no aboto ba dödöda sanandrösa ba dalu mbanua, haga, hegöi gravitasi. (Zangombakha 3:11) Hizaʼi, itutunö khöda Yehowa hadia gohitö dödönia ba gulidanö hegöi ba niha. Ifazökhi niha si fakhili-khili khönia ba omasi ia na ohahau dödöra ba waʼauri ba gulidanö. (I Moze 1:26) Tola tobali ira iraononia, ba tobali ia Amara.

² Moroi ba faza tölu mbuku I Moze, ba daʼö aboto ba dödöda wa no tetandrawaisi gohitö dödö Yehowa. (I Moze 3:1-7) Hizaʼi, lö hadöi abula dödö si tebai iʼasiwai Yehowa. Lö hadöi si tola manaha hadia ia nifalua Yehowa. (Yesaya 46:10, 11; 55:11) Tola faduhu dödöda wa hasambalö alua gohitö dödö Yehowa ba mböröta. Ba alua ia ba ginötö si tefaudu!

3. (a) Hadia wamahaʼö sabölö moguna sanolo yaʼita enaʼö aboto ba dödöda duria moroi ba Zura Niʼamoniʼö? (b) Hana wa moguna tafahaʼö ita ba wamahaʼö daʼa? (c) Hadia manö wanofu-nofu nitutunöda?

³ Aboto ba dödöda hadia gohitö dödö Lowalangi ba gulidanö hegöi ba niha, ba taʼila göi hadia nifalua Yesu enaʼö alua gohitö dödö andrö. Daʼa zindruhu sabölö moguna moroi ba Zura Niʼamoniʼö. Daʼa göi zindruhu si oföna tafahaʼö ita ba Daromali Lowalangi. Iadaʼa, omasi ita tatolo niha böʼö enaʼö lafahaʼö ira ba wamahaʼö sabölö moguna andre. Tola tafalua ia ba ndröfi daʼa, na takaoni niha böʼö ba wangondrasi Fanörö Tödö waʼamate Yesu. (Luka 22:19, 20) Na laʼondrasi, oya wamahaʼö si tola lahalö sanandrösa ba gohitö dödö Lowalangi sahöli-höli dödö. Andrö, sökhi na tahenaigö taʼangeraigö wanofu-nofu niʼogunaʼöda ba wamarou tödöra enaʼö tola laʼondrasi. Ba wamahaʼö daʼa, so tölu wanofu-nofu nitutunöda: Hadia gohitö dödö Lowalangi ba gulidanö hegöi ba niha? Hana wa lö alua daʼö nasa? Hana wa höli nibeʼe Yesu tobali ono kusi ba wamokai mbawandruhö irege tola alua gohitö dödö Lowalangi?

HADIA GOHITÖ DÖDÖ ZOMBÖI?

4. Hewisa wa tola oroma ”lakhömi Lowalangi” ba niwöwöi andrö?

⁴ Yehowa no Somböi safönu faʼahöli-höli dödö. Fefu hadia ia nifazökhinia oi sökhi. (I Moze 1:31; Yeremia 10:12) Hadia wamahaʼö si tola tahalö moroi ba ngawalö niwöwöinia si sökhi hegöi si toföfö? Tafahaʼö ita wa fefu hadia ia niwöwöi Yehowa, side-ide irugi zebua, oi moguna daʼö fefu. Na öʼangeraigö sel-sel si so ba mboto niha si lö ikhamö fangera-ngera, iraono sawena tumbu, mazui na öfaigi hawaʼasökhi haga luo, hadia nirasoimö? Ahöli-höli sibai dödöda ba wamaigi daʼö fefu börö me ifazökhi ita Yehowa si fao faʼatua-tua enaʼö taʼila hadia zi sökhi.​—Baso Zinunö 19:2; 104:24.

5. Hadia zi no ifalua Yehowa enaʼö falulu fohalöwö fefu niwöwöinia?

⁵ No ihaogö sibai Yehowa wameʼe nola-ola ba niwöwöinia. Ihaogö goi-goi sanandrösa ba mbanua awö danö, ba ihaogö göi goi-goi soʼamakhaita ba mbua-bua. Ifalua daʼa enaʼö fefu zi so ba mbanua si yawa awö danö tola falulu fohalöwö ira. (Zinunö 19:8-10) Fefu hadia zi so ba gulidanö oi so nahiania hegöi gunania. Duma-dumania, tola molowu nasi, ba tola ahatö atmosfer ba gulidanö börö me so gravitasi. Lö tola auri niha ba gulidanö na lö hadöi gravitasi. Nola-ola si no ihenaigö Yehowa zi tola mangaʼasogö ulidanö si sökhi sibai. Daʼa zangoromaʼö wa so gohitö dödö Lowalangi ba gulidanö hegöi ba niha. Ba wanuriaigö, tola tatolo niha böʼö enaʼö laʼila haniha Zomböi ulidanö awö nösinia maʼafefu sahöli-höli dödö andre.​—Famaʼeleʼö 4:11.

6, 7. Hadia manö mbuala nibeʼe Yehowa khö Gadamo hegöi Khawa?

⁶ Ohitö dödö Yehowa yaʼia daʼö enaʼö fefu niha lasöndra waʼauri si lö aetu ba gulidanö. (I Moze 1:28; Zinunö 37:29) Oböwö sibai ia, ba ibeʼe khö Gadamo ba Khawa mbuala si sökhi sibai. (Baso Yakobo 1:17.) Ibeʼe khöra mbuala Yehowa ba wangai angetula samösa. Ibeʼe göi waʼabölö ba wangera-ngera, ba wangomasiʼö, hegöi enaʼö tola omuso dödöra ba wariawösa. Fahuhuo Zomböi khö Gadamo ba ibeʼe wanuturu lala ba wamalua hadia zi sökhi. Ifahaʼö ia Adamo ba wondrorogö mbotonia samösa, urifö hegöi ulidanö. (I Moze 2:15-17, 19, 20) Ibeʼe Yehowa khö Gadamo ba Khawa waʼabölö ba worasoi, wombabaya, wamaigi, wamondro-ndrongo, hegöi ba wangago hadia ia zi sökhi si no tehenaigö khöra. Moroi ba daʼö fefu tola lasöndra waʼohahau dödö ba nomora si sökhi. Oya halöwö si sökhi si tola lafalua. Tola lafahaʼö ira ba lasöndra ngawalö zi bohou sagötö faʼara.

⁷ Hadia nasa gohitö dödö Lowalangi tanö böʼö? Ibeʼe waʼabölö Yehowa khö Gadamo hegöi Khawa ba wangokhögö iraono soʼahonoa. Ba moʼono ndraonora andrö, irege lafönui gulidanö. Omasi Yehowa na laʼomasiʼö ndraonora ira satua, simane faʼomasinia khö Gadamo ba Khawa, niha siföföna soʼahonoa. Ibeʼe khöra gulidanö Yehowa hegöi fefu ngawalö zi sökhi. Tobali omora daʼö, ba lö irai lateha khöra.​—Zinunö 115:16.

HANA WA LÖ ALUA DAʼÖ NASA?

8. Hana wa ibeʼe Yehowa khö Gadamo hegöi Khawa huku si so ba I Moze 2:16, 17?

⁸ Lö iʼanemaiʼö alua fefu daʼa simane ba zomasi Yehowa. Hana? No ibeʼe Yehowa khö Gadamo hegöi Khawa sambua huku si öna-öna sanolo yaʼira irege aboto ba dödöra nola-ola ba mbuala nibeʼenia khöra. Imane, ”Öʼa saʼae mbua geu ba kabu fefu, ba bua geu famotokhi ba dödö si sökhi ba si lö sökhi, ba lö tola öʼa; öʼa siʼaikö daʼö, ba mate ndraʼugö!” (I Moze 2:16, 17) Huku nibeʼenia andre no salio aboto ba dödö, ba lö abua ba woloʼö yaʼia börö me oya nasa mbua geu si sökhi tanö böʼö si so ba kabu andrö.

9, 10. (a) Hadia niböbögö Zatana khö Yehowa? (b) Hadia gangetula nihalö Gadamo hegöi Khawa? (Faigi gambara ba wamobörö wamahaʼö.)

⁹ Iʼogunaʼö gulö Afökha Zatana ba wolimo Khawa enaʼö lalawa Yehowa si no tobali Amara. (Baso I Moze 3:1-5; Famaʼeleʼö 12:9) Ibeʼe waʼaombö-aombö dödö ba isofu hadia lö itehe Lowalangi ba niha ba wemanga ”mbua geu ba kabu fefu”. Te imane wangumaʼö, ’Hadia daʼö geluahania wa tebai öfalua hadia zomasiʼö?’ Aefa daʼö imane, ”Maʼifu sa lö mate ami.” No falimosa fefu daʼö. Aefa daʼö idönisi dödö Khawa ba wolawa hadia niwaʼö Lowalangi. Imane Satana, ”Iʼila sibai sa Lowalangi: miʼa siʼaikö ia, ba teboka hörömi.” Imane khöra Satana wa lö omasi Yehowa na laʼa mbua geu andrö börö me tola dania laʼokhögö waʼatua-tua si tohude. Ba gafuriata, ifabuʼu waya khöra imane, ”Tobali simane Lowalangi ami, saboto ba dödö si sökhi ba si lö sökhi.”

¹⁰ Moguna lahalö gangetula hadia nifaluara ira Adamo hegöi Khawa. Hadia laʼoʼö niwaʼö Lowalangi, mazui lafondro-ndrongo niwaʼö gulö? Hizaʼi, lahalö gangetula ba wolawa hadia niwaʼö Lowalangi. Latimbagö Yehowa si tobali Amara ba fao ira khö Zatana. Iadaʼa hatö yaʼira, lö saʼae ilumöʼö ira Yehowa.​—I Moze 3:6-13.

11. Hana wa lö iʼolifugö manö Yehowa zala si no lafalua ira Adamo ba Khawa?

¹¹ Me lö laʼoʼö ira Adamo ba Khawa huku nibeʼe Lowalangi, taya saʼae khöra woʼahonoa. Tobali ira udu Lowalangi börö me lö omasi Lowalangi hadia ia zi lö sökhi. ”Yaʼugö andrö [Yehowa], si so hörö satulö, fa tebai öfaigi-faigi zi lö sökhi.” (Habakuki 1:13) Na lö ihuku ira Yehowa, tola manö lö faʼahono dödö ba niwöwöinia tanö böʼö. Tatu manofu-nofu dödö ndra malaʼika hegöi niha, hadia sindruhu-ndruhu tola lafaduhusi tödö wehede niwaʼönia. Hizaʼi, lö faröi Yehowa ba goi-goinia, ba lö irai isawö daʼö. (Zinunö 119:142) Hewaʼae tola lahalö samösa gangetula ira Adamo ba Khawa, hizaʼi tebai latimbagö lua-lua moroi ba walömoloʼöra khö Yehowa. Hasambalö mate ira, ba mangawuli ira ba danö.​—I Moze 3:19.

12. Hadia zalua ba ngaʼötö Gadamo?

¹² Me laʼa mbua geu ira Adamo ba Khawa, lö itema ira saʼae Yehowa tobali ösi nomonia. Iheta ira moroi ba kabu Edena, ba tebai saʼae mangawuli ira ba daʼö. (I Moze 3:23, 24) Itehegö khöra Yehowa ba worasoi hadia lua-lua gangetula nihalöra. (Baso V Moze 32:4, 5.) Tebai saʼae laʼoʼö mbua-bua Yehowa soʼahonoa. Taya saʼae waʼauri si sökhi ba zi so miföna khö Gadamo hegöi ba ngaʼötönia. Iröi khöra walömoʼahonoa, horö, hegöi faʼamate. (Roma 5:12) No itayaigö Adamo waʼauri si lö aetu. Lö moʼahonoa saʼae ndraonora ba simanö göi maʼuwura. Iʼotarai me ifaelungu Adamo hegöi Khawa Satana ba wolawa Lowalangi, omasi nasa ia ba wamaelungu fefu niha gulidanö ba wamalua simane daʼö.​—Yohane 8:44.

TOLA FAHUWU ITA KHÖ LOWALANGI BÖRÖ HÖLI SI NO IBEʼE

13. Hadia zomasi ifalua Yehowa ba niha?

¹³ Lö aetu iʼomasiʼö niha Lowalangi. Hewaʼae no lalawa ia ira Adamo ba Khawa, lö aetu omasi ia na laʼokhögö wahuwusa si sökhi niha gulidanö khönia. Ba lö omasi ia na mate ira. (II Fetero 3:9) Andrö wa ibeʼe lala irege tola ifuli fahuwu niha gulidanö khönia. Hewisa wa tola ifalua daʼö ba lö ilawa goi-goinia? Datatutunö.

14. (a) Moloʼö Yohane 3:16, hadia nifalua Lowalangi ba wangefaʼö niha moroi ba horö hegöi faʼamate? (b) Hadia wanofu zi tola tadunö-dunö ba niha?

¹⁴ Baso Yohane 3:16. Ato moroi ba gotalua niha nikaonida weʼamöi ba Wanörö Tödö, laʼila ayati daʼa. Hizaʼi, hewisa höli nibeʼe Yesu tola mangaʼasogö faʼauri si lö aetu? Tola tatolo niha böʼö enaʼö aboto ba dödöra wanema li ba wanofu daʼa na takaoni ira weʼamöi ba Wanörö Tödö, me fao ira khöda ba wangondrasi Fanörö Tödö, hegöi me ifuli tafalukhaisi ira. Tola itugu aboto ba dödöra sanandrösa ba höli, hewisa waʼomasi Yehowa ba niha hegöi hewisa waʼatua-tuania. Hadia zi tola tafaʼema khöra sanandrösa ba höli?

15. Hadia gamaehuta Yesu khö Gadamo?

¹⁵ No ihenaigö Yehowa ndra matua soʼahonoa sanehegö faʼaurinia tobali höli. Yaʼia andre niha si lö faröi khö Yehowa. Itehegö waʼaurinia salahi niha gulidanö. (Roma 5:17-19) Ifawuʼa Yehowa waʼauri Yesu, niwöwöinia si oföna sibai, moroi ba zorugo möi ba gulidanö. (Yohane 1:14) Andrö wa moʼahonoa Yesu simane sibai Adamo. Hizaʼi, tenga simane Adamo, iʼoʼö Yesu fefu goi-goi niʼandrö Yehowa ba niha soʼahonoa. Hewaʼae abua wanandraigö salua khönia, lö irai isawö goi-goi Lowalangi.

16. Hana wa no buala sebua böli höli andrö?

¹⁶ Börö me moʼahonoa Yesu irugi waʼamatenia, tola iʼefaʼö niha gulidanö moroi ba horö hegöi faʼamate. Iʼokhögö waʼauri soʼahonoa Yesu simane niʼokhögö Gadamo. Lö faröi ba moloʼö ia khö Lowalangi. (I Timoteo 2:6) Mate ia salahida, tobali ia höli ba niha fefu irege lasöndra waʼauri si lö aetu, he ira matua, ira alawe, hegöi iraono. (Mataiʼo 20:28) Höli andrö no tobali onokusi ba wamokai mbawandruhö irege tola alua gohitö dödö Lowalangi.​—II Korindro 1:19, 20.

NO IBOKAI MBAWANDRUHÖ KHÖDA YEHOWA ENAʼÖ TOLA TAFULI ITA KHÖNIA

17. Hadia gunania khöda höli?

¹⁷ Ibeʼe höli sebua böli Yehowa. (I Fetero 1:19) Iʼomasiʼö sibai ita irege itehegö mate Nononia si hasambua salahida. (I Yohane 4:9, 10) Eluahania, Yesu zi tobali amada, tenga Adamo. (I Korindro 15:45) Ibeʼe khöda ginötö Yesu tenga ha enaʼö tasöndra waʼauri si lö aetu, hizaʼi enaʼö tola ifuli tobali ita ösi nomo Lowalangi. Moroi ba höli, tola ifuli moʼahonoa niha ba tola ifuli itemaʼö ira Yehowa tobali ösi nomonia, hewaʼae lö isawö goi-goinia. Khalaigö hawaʼasökhi na fefu niha si lö faröi khö Yehowa tobali moʼahonoa! Ba gafuriata, fefu hadia zi so ba zorugo hegöi ba gulidanö tola laʼokhögö wahasara dödö simane si sambua omo. Tobali ita ono Lowalangi.​—Roma 8:21.

18. Hawaʼara tobali ”Lowalangi ba khöra fefu” Yehowa?

¹⁸ Hewaʼae no lalawa niwaʼö Yehowa ira satuada siföföna, hizaʼi lö aetu iʼomasiʼö ita, ba no ihenaigö khöda höli. Hewaʼae lö moʼahonoa ita, tebai itenawa Satana waʼalöfaröida khö Yehowa. Moroi ba höli, itolo ita Yehowa enaʼö tola sindruhu-ndruhu atulö ita. Khalaigö hewisa niha ”zangila Ono fefu, samati khönia” tola laʼokhögö waʼauri si lö aetu! (Yohane 6:40) Hasambalö alua gohitö dödö Namada safönu faʼomasi hegöi satua-tua, ba itolo niha gulidanö enaʼö tola moʼahonoa ira. Ba daʼö dania tobali ia ”Lowalangi ba khöra fefu”.​—I Korindro 15:28.

19. (a) Fangandröda saohagölö ba höli andrö möi famarou dödöda ba wamalua hadia ia? (Faigi kotak ”Böi Aetu Alui Niha si Tola Mutolo”.) (b) Hadia wamahaʼö nidunö-dunöda ba migu fönada?

¹⁹ Fangandröda saohagölö ba höli andrö, zamarou tödöda ba wanutunö ba niha böʼö sanandrösa ba mbuala sebua böli andre. Moguna laʼila niha wa börö höli, itehegö Yehowa ba niha gulidanö enaʼö laʼokhögö waʼauri si lö aetu. Hizaʼi, so nasa mbua sabölö ebua niʼasogö höli. Daʼa zi tobali fanema li moroi ba wehede Zatana ba kabu Edena. Tadunö-dunö daʼa ba wamahaʼö migu fönada.