Tuwanaye emisabe yetu

1. Yehova anzire abaghombe biwe ibabya bakakolaki? (Ulebaye n’epitsa.)

TWANGASABANDI obuwatikya n’obusondoli? Tunasi ekisubiryo oko ribulyo eryo. Yehova Mungu yo twangasaba. Yehova anzire itwakola ekyo. Anzire itwabya tukasaba “butsira eriumbya.” (1 Tes. 5:17) Tuwite obwiranda obw’eribya tukamusaba n’erisonda obusondoli bwiwe omo myatsi yosi y’omo ngebe yetu. (Emi. 3:5, 6) Kundi Yehova ni mwenge, akabugha ati twanganamusaba ngendo syosi ngoko twanzire.

2. Tukendikania okuki omo mwatsi ono?

² Tukasima Yehova yo kutsibu busana n’erituha akanya ak’eribya tukamusaba. Kundi tuwite ebingyi by’erikola, kyanganatukalako eribana endambi y’eribya tukasaba. Kandi twanganalangira ikyamatolera eryuwania emisabe yetu. Kyuwene kundi Amasako anganatukirania n’eritusondola. Omo mwatsi ono tukendilangira nga twanganigha tuti eky’erileberyako kya Yesu omwibya tukasondya endambi y’eribya tukasaba. Kandi tukendilangira nga twangayira tuti tutoke eryuwania emisabe yetu, kandi tukendilangira emyatsi itano eyo twanganabya tukahira omo misabe yetu.

YESU INYAKASONDEKENAYA ENDAMBI Y’ERISABA

3. Yesu mwayilangiriraki oko musabe?

³ Yesu abya asi ngoko Yehova akasikaya emisabe yetu. Embere sy’eryasa oko kihugho, Yesu inyakayilangirira ngoko Tata wiwe akasubiraya oko misabe y’abalume n’abakali bataleghula. Ng’eky’erileberyako, Yesu abya kughuma na Tata wiwe akasubirya oko misabe eyikalua oko mitima y’abaghombe biwe nga Hana, Dawidi, Eliya n’abandi. (1 Sam. 1:10, 11, 20; 1 Bam. 19:4-6; Esy. 32:5) Kyo kyaleka Yesu inyabwira abigha biwe ati babye bakasaba kangyi-kangyi kandi ibane n’obwikirirya!​—Mat. 7:7-11.

4. Emisabe ya Yesu yamatwighisyaki?

⁴ Yesu inyabeghere erisaba Yehova. Omwikola atya mwasighira abigha biwe eky’erileberyako eky’erikwama. Omughulu abya oko kihugho, Yesu inyakasaba kangyi-kangyi. Inyakayihiriraho endambi y’erisaba kundi inyawite ebingyi by’erikola kandi n’abandu bangyi ibakamutimbako. (Mar. 6:31, 45, 46) Inyakabuka omo tututu atoke eribana endambi y’erisaba inyane iyuwene. (Mar. 1:35) Kiro kighuma Yesu mwasiba omo kiro kyosi akasaba embere sy’eriyisogha omwatsi w’omughaso munene. (Luka 6:12, 13) Kandi embere ahole, Yesu mwasaba kangyi-kangyi omo kiro ky’ekiro ekyo.​—Mat. 26:39, 42, 44.

5. Twangakwama tuti eky’erileberyako kya Yesu omughulu tukasaba?

⁵ Eky’erileberyako kya Yesu kyamatwighisya ngoko nomo twangabya n’ebingyi by’erikola, litolere itwabya tukayihiriraho endambi ey’erisaba nga Yesu. Twanganabya tukabuka omo tututu neryo itwasaba kutse enyuma hake omwigholo. Omughulu tukakola tutya, tukakanganaya ngoko tukasima Yehova oko kihembo kibuya nga eky’omusabe. Mwali wetu mughuma oyukahulawa mo Lynne akibuka ngoko mwatsema kutsibu omughulu aminya ngoko anawite olusunzo olw’eribya akasaba. Akabugha ati: “Omughulu munigha ngoko nanganakania na Yehova mughulu wosi ekyo mukyaniwatikya erimulangira mo munywani waghe n’eritsuka eryuwania emisabe yaghe.” Abangyi b’okw’itwe bakanayowa batya. Ekyo ni kwenene. Neryo tulangire emyatsi itano eyo twanganabya tukahira omo misabe yetu.

EMYATSI ITANO Y’OMUGHASO EY’ERIHIRA OMO MUSABE

6. Ngoko kiri omo Eribisulirwa 4:10, 11, Yehova atolere eribanaki?

⁶ Ubye ukapipa Yehova. Omo nzoli nguma y’eriswekya, Omukwenda Yoane mwalangira abasyakulu 24 omo lubula bakaramya Yehova. Babya bakapipa oMungu n’eribugha bati atolere “eribana olukengerwa, n’erisikya n’obutoki.” (Soma Eribisulirwa 4:10, 11.) N’abamalaika bataleghula nabo banawite ebingyi ebyangaleka ibapipa Yehova. Kundi bikere naye elubula bamwasi ndeke. Bakaminya emibere yiwe omughulu bakalangira ebyo akakola, n’ekyo kikabakuna erimuramya.​—Yobu 38:4-7.

7. Twangapipa Yehova busana n’emyatsi yahi?

⁷ Netu litolere itwabya tukapipa Yehova omo misabe yetu, tukamubwira ebikaleka itwamwanza n’erimutsemera. Omughulu ukasoma n’erigha eBiblia uyikase kutsibu erilangira emibere ya Yehova, kutsibu-tsibu eyo ukatsemera. (Yobu 37:23; Rom. 11:33) Neryo ubwire Yehova ekikaleka iwatsemera emibere yiwe eyo. Kandi twanganapipa Yehova kundi akatuwatikaya itwe n’Abakristo bali kyetu b’omo kihugho kyosi. Biro byosi akakanganaya ngoko atutsomene n’erituteya.​—1 Sam. 1:27; 2:1, 2.

8. Ni myatsi milebe yahi eyikaleka itwasima Yehova? (1 Abanya Tesalonika 5:18)

⁸ Ubye ukasima Yehova. Tuwite emyatsi mingyi eyangaleka itwabya tukasima Yehova omo misabe. (Soma 1 Abanya Tesalonika 5:18.) Twanganasima Yehova busana n’emyatsi yosi eyuwene eyo tuwiteko; kundi ebihembo byosi ebyuwene bikalua okw’iye. (Yak. 1:17) Ng’eky’erileberyako, twanganasima Yehova busana n’obubuya bw’ekihugho kyetu n’ebindu bingyi ebyo ahangyika ebikaswekaya. Kandi twanganasima Yehova busana n’engebe yetu, ekihanda kyetu, abira betu n’amaha agho tuwite. N’akandi tukasima Yehova kundi abirituha akanya ak’eritsemera obwira haghuma naye.

9. Busanaki litolere itwakulya omubere w’eribya tukasima Yehova?

⁹ Kyanganatusaba eriyikasa kutsibu tutoke eribya tukalengekania oko ebikaleka itwasima Yehova. Munabwire abandu bangyi sibalisima. Abandu bakalengekanaya oko ebyo banzire eribana lisa omo mwanya w’eribya bakakangania erisima lyabo oko ebyo bawite. Netu twamabitsuka eribya n’omutsye oyo, erisaba lyetu ilikendibya likabya erisaba-saba lisa, butsira erisima. Twamanza tuti ekyo sikituhikire, litolere itwakulya n’erikangania omubere w’eribya tukasima oko byosi ebyo Yehova akatukolera.​—Luka 6:45.

10. Erisima mulyawatikya liti mwali wetu mughuma eriyiyinia? (Ulebaye n’epitsa.)

¹⁰ Omubere w’erisima anganatuwatikya eriyiyinia omo maligho. Tulebaye eky’erileberyako kya Kyung-sook, oyukanibweko omo Akaleberyo ak’Ekiro 15 Omwisi 1, 2015. Mubamusungamo akasere omo kikuba. Akabugha ati: “Obukoni obo mubwaleka inabunika mutima. Munayowa nga nabiriherya obuli kindu kandi munakwa obuba bunene.” Ekyamuwatikaya eriyiyinia niki? Akabugha ati embere sy’eriyato, inyakasambira omo kyumba ky’endata omo nyumba yiwe n’erisaba omo mulenge akasima Yehova oko myatsi itano eyo alyatsemera omo musibo oyo. Ekyo mukyamuwatikya eritendibya akahangya-hangya kutsibu. Omo mwanya w’ekyo, mwatsuka erikangania olwanzo n’erisima liwe oko Yehova. Mwayilangirira ngoko Yehova akawatikaya abaghombe biwe bataleghula omughulu bakalaba omo maligho mangyi, kandi mwayilangirira ngoko emiyisa eyo tukabana ni mingyi kwilaba amaligho agho tukalabamo. Nga Kyung-sook, tuwite bingyi eby’erisimirako Yehova, nomo twanganabya omo maligho awakalire. Eribya tukakangania Yehova erisima lyetu omo musabe kyanganatuwatikya eriyiyinia n’eritulera.

11. Busakani abigha ba Yesu babya balaghire oko butubaha Yesu abisuba elubula?

¹¹ Ubye ukasaba Yehova obutubaha omo mubírí w’eritulira. Embere sy’erisuba elubula, Yesu mwibukya abakwenda biwe omubírí ow’abasighira ow’eritula engulu yiwe “eYerusalema, n’omo Yudea yosi n’eSamaria, n’erihika oko nduli-nduli y’ekihugo.” (Emi. 1:8; Luka 24:46-48) Mughulu muke enyuma waho, abakulu b’Abayuda mubaboha ye Petero na Yoane. Mubatwalabo embere sye Sanhedrini n’eryubahisya abalume bataleghula abo ambu baleke eritulira. (Emi. 4:18, 21) Neryo Petero na Yoane mubakolaki?

12. Ngoko kiri omo Emibiri 4:29, 31, abakwenda mubakolaki?

¹² Petero na Yoane mubasubirya abakulu b’ekisomo eky’Abayuda bati: “Inywe mubye batsweri nga linatunganene omo meso [w’oMungu] eribowa, kutse eriowa [oMungu]. Kusangwa sitwangatoka erileka eribuga ebyo twabirilolako n’ebyo twabiriowa.” (Emi. 4:19, 20) Petero na Yoane babere babiboholwa, abakwenda mubasaba Yehova abawatikaye erikola erisonda liwe. Mubasaba bati: “Uleke abagombe bawe babuge ekinywa kyawe n’eritendiubaha lyosi.” Yehova mwasubirya oko musabe oyo owalua oko mutima.​—Soma Emibiri 4:29, 31.

13. Eky’erileberyako kya Jin-hyuk ky’amatwighisyaki?

¹³ Netu abakulu b’eleta bamatusaba erileka eritulira itukendikola ng’abakwenda. Itukendilola embere eritulira. Tulebaye eky’erileberyako kya mughala wetu Jin-hyuk oyo baboha busana n’erighana erikola omubírí w’obusuda. Mubamuha omubírí w’erighabira akalyo n’eriwatikya abandi bandu ababohirwe bwabo. Mubamubwira bati abye akakania nabo oko myatsi eyo balaghireko misa. Mubamughania erikania nabo oko myatsi y’eBiblia. Mwabasa Yehova ati amuhe obutubaha n’amenge w’eritulira omo buli kanya akakendibya kakabanika. (Emib. 5:29) Akabugha ati: “Yehova mwasubirya oko misabe yaghe. Mwaniha obutubaha n’amenge w’eritsukisya amafunzo mangyi w’erisondola omo dakika itano oko buli mulango w’engomo. Obuli righolo-gholo iningahandika esyobaruha esyo ngendiha abandi abali omo ngomo engyakya.” Netu twanganayiketera ngoko Yehova akendituwatikya erikola ndeke omubírí wetu w’eritulira. Nga mughala wetu Jin-hyuk, netu twanganabya tukasaba Yehova y’amenge n’obutubaha.

14. Niki kyo kyangatuwatikya omughulu tuli omo maligho? (Esyonyimbo 37:3, 5)

¹⁴ Ubye ukasaba Yehova akuwatikaye eriyiyinia omo maligho waghu. Abangyi b’okw’itwe banemughalwa kutsibu busana n’obukoni bulebe, oluholo l’omwanzwa wabo, eribula obuholo omo kihanda, ery’endereribwa n’ebindi. Kandi ebihunzo n’esyovita bikaleka ikyatukalako eriyiyinia omo maligho ng’ayo. Neryo ubye ukabwira Yehova ngoko ukayowa. Umubwire emyatsi eyo ukalabamo ngoko wanganakania n’omunywani waghu. Uyiketere Yehova “naye asyakuwatikya.”​—Soma Esyonyimbo 37:3, 5.

15. Omusabe anganatuwatikya ati eriyiyinia “omo malige”? Teka eky’erileberyako.

¹⁵ Eribya tukasaba butumbya kikatuwatikaya eriyiyinia “omo malige.” (Rom. 12:12) Yehova anasi ngoko abaghombe biwe banemuyiyinia omo maligho, “ali hakuhi oko bosi abakamubirikira.” (Esy. 145:18, 19) Ye Kristie, omupainia w’emyaka 29, mwayilangirira ngoko ebinywa ebyo ni by’ekwenene. Mwahikako endwala eyo atabya ayilindirireko. Ekyo mukyamubuna mutima. N’oho nyuma, mubamubwira ngoko koyo wiwe naye ane n’obukoni obukendisyamwita. Kristie akabugha ati: “Iningasaba Yehova anihe akaghala ako nilaghireko obuli kiro. Munayikasa eribya n’eprograme eyuwene y’obunya-kirimu omwibya ngahindana n’eriyighisya.” Akatasyatomekako ati: “Omusabe mwaniwatikya eriyiyinia omo mughulu owakalire. Nabya nasi ngoko Yehova sy’anganilekerania, n’ekyo mukyaleka inatulera omo mutima. Nomo obukoni bwaghe mubwatalama luba, Yehova mwasubirya oko misabe yaghe. Mwaniwatikya eritulera omo bwenge n’omo mutima.” Kumbe isitwabirirawa n’ahake ebinywa bino: “[Yehova] anasi erilamya abakamukenga okwʼirengwako.”​—2 Pet. 2:9.

16. Busanaki tulaghire oko buwatikya bwa Yehova omughulu tukalengawako?

¹⁶ Ubye ukasaba Yehova y’obuwatikya omughulu wamalengwako. Kundi situhika-hikene, obuli kiro tukabya itunemulwa n’ebibi. Sitani anemuyikandanga erikalya amalwa ayo. Enzira nguma eyakakolesaya eritsandya obwenge bwetu, y’emyatsi ey’eriyitsemesyamo eyituwene. Emyatsi eyo eyituwene yanganasulya omo bwenge bwetu mwamalengekania awatuwene, awangaleka itwabya isitwerire omo meso wa Yehova n’eritukolya oko rilolo erikalire.​—Mar. 7:21-23; Yak. 1:14, 15.

17. Twabisaba Yehova y’obuwatikya, litolere itwakolaki eriyihighula okwilengwako? (Ulebaye n’epitsa.)

¹⁷ Tulaghire oko buwatikya bwa Yehova omughulu twamalengwako erikola emyatsi mibi. Omo musabe wiwe w’erileberyako, Yesu mwatekamo kino: “Sigutwingiraye omwʼirengwako, nikwa utulamaye oko mubi.” (Mat. 6:13) Yehova anzire erituwatikya, aliwe litolere itwasaba obuwatikya obo. N’enyuma sy’erisaba litolere itwayihighula oko myatsi yosi eyangaleka itwalengwako. Kumbe itwayikasa eritendibya tukahulikirira n’erisoma emyatsi eyituwene eyiswire omo kihugho kibi kino ekya Sitani. (Esy. 97:10) Twanganabya tukusulya omo bwenge bwetu mw’emyatsi eyuwene omwibya tukasoma eBiblia. Eribya tukahindana n’erisangira oko mubírí w’eritulira, nabyo bikatuwatikaya eribya n’amalengekania awuwene. Kandi Yehova akatulagha ati sy’endisyaligha tukalengwako kwilaba obutoki bwetu.​—1 Kor. 10:12, 13.

18. Oko mwatsi w’omusabe, itwe bosi litolere itwakolaki?

¹⁸ Erisighala bataleghula oko Yehova omo biro by’enduli bino, litolere eribya tukasaba kangyi-kangyi kwilaba embere. Obuli kiro, ubye ukayiririraho akatambi ak’erisaba erilua oko mutima. Yehova anzire itwamubwira “amalige [wetu] gosi” kutamusaba. (Esy. 62:8) Ubye ukapipa Yehova n’erimusima oko byosi ebyo akakola. Ubye ukamusaba akuhe obutubaha omo mubírí w’eritulira. Ubye ukamusaba obuwatikya bw’eriyiyinia omo maligho n’omughulu wamalengwako. Isiwalighira omundu kutse ekindu kyosi-kyosi erikukakirya eribya ukasaba Yehova yo kangyi-kangyi. Neryo, Yehova akasubiraya ati oko misabe yetu? Tukendikania okw’ekyo omo mwatsi ow’akwamire.