Phetogo Mabapi le Diiri Tšeo di Nyakegago tša Babulamadibogo
1 Ka moka ga rena re thabela go ba le babulamadibogo ba ka mehla le ba go thuša bao ba šomago ka thata phuthegong. Gaešita le tšhemong yeo e lekanyeditšwego le yeo e šongwago gantši, babulamadibogo ba beile mohlala o mobotse ka tirelo ya bona e mafolofolo ya Mmušo. Ba kgothaleditše bagoeledi ka moka gore ba tšwele pele ba tsoma bao ba ‘nago le tshekamelo e swanetšego.’—Dit. 13:48, bapiša le NW.
2 Mokgatlo o lemogile mathata a atago ao babulamadibogo ba lebeletšanago le ona, kudu-kudu mabapi le go hwetša mošomo wa nakwana wa go iphediša wo o tlago go ba dumelela go hlokomela dinyakwa tša bona tša motho ka noši ka mo go lekanego e le gore ba dule ba le tirelong ya nako e tletšego. Boemo bja tša boiphedišo bja gona bjale dinageng tše dintši le bjona bo dirile gore ba bangwe ba thatafalelwe kudu ke go tsenela modiro wa bobulamadibogo, gaešita le ge seo e le kganyogo ya bona ya go tšwa pelong. Dikgweding tša morago bjale, taba ye le dibopego tše dingwe di ile tša elwa hloko ka šedi.
3 Ka gona, ka baka la seo se boletšwego ka mo godimo, Mokgatlo o fokoditše diiri tšeo di nyakegago bakeng sa babulamadibogo ba ka mehla le ba go thuša. Go thoma ka ngwaga wa almanaka ya 1999, diiri tšeo di tlago go nyakega bakeng sa babulamadibogo ba ka mehla e tla ba tše 70 kgwedi e nngwe le e nngwe, goba palo-moka ya diiri tše 840 ka ngwaga. Diiri tšeo di nyakegago kgwedi le kgwedi bakeng sa babulamadibogo ba go thuša e tla ba tše 50. Diiri tšeo di nyakegago bakeng sa babulamadibogo ba kgethegilego le baromiwa ga se tša fetošwa ka ge go e-na le tokišetšo yeo Mokgatlo o e dirilego bakeng sa go thuša go hlokomela dinyakwa tša bona tša motheo tša dilo tše di bonagalago. Ka gona, ba ka lebiša tlhokomelo ka mo go tletšego kudu modirong wa bona wa go bolela le go dira barutiwa.
4 Go holofelwa gore phetogo ye ya mabapi le diiri tšeo di nyakegago e tla thuša babulamadibogo ba bantši gore ba swarelele tokelong ye e bohlokwa ya tirelo. Gape e swanetše go bula tsela bakeng sa bagoeledi ba oketšegilego gore ba tsenele modiro wa bobulamadibogo bja ka mehla le bja go thuša. Ye e swanetše go ipontšha e le tšhegofatšo e kgolo gakaakang go yo mongwe le yo mongwe ka phuthegong!