Kwakwabaloo Kɛ̄ I Yere Kara Doo

1. Ena Jɛhova gbī kɔ pya a ye taāŋabah a doo a?

MƐƐ na i dap gbī egbɔ̄nyiɛ le tɔgɛ dee aābah a? I suā ye ture. I dap yere kara nɛ Jɛhova Bari. Taɛ nu Jɛhova kɔ i doolo. A kɔ i “aa ɔbɛ etaāŋa,” nyɔɔwo a sirapie kɔ a gbī kɔ i yere kara ye nɛ dɛ̄dɛɛ̄ sɔ̄. (1 Tɛs 5:17) I dap ye kɔ ue nɛ bu kara sa gbī leredee ye aābah dɛ̄dɛɛ̄ sɔ̄. (Kam 3:5, 6) Jɛhova naa kɔ kuma sɔ̄ i yere kara ye nɛ, nyɔɔbee alu Bari a wee dɔɔ̄nu bu yaaribah.

2. Ena i kɔnia bu ekobee ue ama a?

² Bu i ɛɛ loo dɔɔ̄nu i ɛrɛ, lo a le yere kara. Kerewo, a dap i agabah lo egbī sɔ̄ yeā kara nyɔɔbee pya nu edoo a i le bah. I dapnage gbī enyimɛ kɛ̄ i yere kara doo yereloo. Bu i ɛɛ kɔ pya ue a le bu Kpa Kaɛ dap i yere mɛm loo sa i leredeebah. Bu ekobee ue ama, i gaa le nɔ kɛ̄ i dap sere sɔ̄ lo eyere kara doo, tɛ̄maloo enɔ edoba Jizɔs. E i nɔnage kɛ̄ i dap nyimɛ i sīdee yere kara doo, tɛ̄maloo eyere o’oo nu alu gbɛnɛ bu i kara.

JIZƆS BEE SERE SƆ̄ LO EYERE KARA

3. Ena Jizɔs bee suā akiiloo yere kara a?

³ Jizɔs bee suā kɔ kara lu nu a kuī loo Jɛhova. Lɛɛ a gae lu a kɛnɛkɛ̄, a bee muɛ kɔ ye Tɛ wee dā kara pya nɛɛdam le nɛɛwa ba bɔ ture nyiɛ loo. Bu edoba, Jizɔs bee le kpaɛ̄ ye Tɛ sɔ̄ a bee agara kara Hana, Devid, le Elaija, gbaānage loo lo pya dɔɔ̄na ba bee bɔloo eture nyiɛ loo. (1 Sam 1:10, 11, 20; 1 Mɛnɛ 19:4-6; Yɔɔ 32:5) Nu anua a lo, Jizɔs bee tɔgɛ pya a wee ye nyɔɔnɛ dumɛ kɔ ba a kiisī lo eyere kara sa dɛrɛ nyiɛ nyɔɔ kɔ elu edā wa!—Mat 7:7-11.

4. Ena i nɔ aāloo pya kara Jizɔs bee yere a?

⁴ Tɛ̄maloo kɛ̄ Jizɔs bee yere kara nɛ Jɛhova doo, a bee sere edoba kɛ̄ nɛ pya a wee ye nyɔɔnɛ dumɛ kɔ ba a nyɔɔnɛ. Jizɔs wee yere kara dɛ̄dɛɛ̄ sɔ̄, sɔ̄ aa bee zue ue. A wee sere sɔ̄ lo eyere kara, nyɔɔbee a wee ɛrɛ gbɛnɛ-edo nu edoo sa pya nɛɛ wee ye le kpaɛ̄ gbɛnɛkpo sɔ̄. (Maak 6:31, 45, 46) A wee bagara aakɛ̄ lɔɔrɛ yere kara sɔ̄ a le aba ɛɛ lokwa lɔgɔ nu naa nɛ ye taāŋa. (Maak 1:35) A ɛrɛ sɔ̄ a bee su yube loo edɛɛ̄ yeā kara, sɔ̄ a bee ɛrɛ gbɛnɛ biaɛfii lo edoo. (Luk 6:12, 13) E uunɛ lɛɛ Jizɔs gae u, a bee yere kara gbɛnɛ-edo sɔ̄, sɔ̄ a bee kpesī nu finiabah a kuī eera bu ye esiatam a kɛnɛkɛ̄.—Mat 26:39, 42, 44.

5. Bu mɛ sīdee na i dap nɔ Jizɔs sɔ̄ i yere kara a?

⁵ Edoba Jizɔs tɔgɛ i kɔ kaɛlɛɛ kɛ̄ i ɛrɛ gbɛnɛkpo nu edoo a i le bah doo, alu ebɛɛ̄ kɔ i nɔɔ sɔ̄ lo eyeā kara. Doodoo Jizɔs, alu ebɛɛ̄ kɔ i sere sɔ̄ lo eyeā kara. Naadaba i dap bagara aakɛ̄ lɔɔrɛ ale i yere kara uunɛ lɛɛ i gae daa. Sɔ̄ i doo wo, i tɔgɛ Jɛhova kɔ i tɔgɛe nia loo keebee dɔɔ̄nu ama. Ziī wuga nɛɛwa a kura Lynne nyɛŋiabu kɛ̄ bu ye bee ɛɛ doo tua sɔ̄ a bee nɔ nu akiiloo dee i ɛrɛ lo eyere kara. A bee kɔ: “Sɔ̄ m nɔ kɔ m dap yere kara nɛ Jɛhova ɛrɛgeba sɔ̄, doo kɔ m ɛp ye nua na kaāna Gbo sa gbī e’agɛrɛbah ye yere kara nɛ.” Bu kaka, kɛ̄ a tɔɔ̄nage loo gbɛnɛ-edo ii doo lo. Nyɔɔwo i naa kɛɛrɛbu o’oo nu i dap yere kara kumaloo.

O’OO NU A KUĪ I DAP YERE BU KARA

6. Dookɛ̄ kpa Mumuuna 4:10, 11 kɔ doo, ena a bɔloo kɔ i nɛ Jɛhova a?

⁶ Leera Jɛhova. Tɛ̄maloo ziī mɔmanudɛɛ̄ alu nyɛŋia, nɛɛ lɛɛratam Jɔn bee muɛ 24 pya kanɛɛ a le bunyɔɔ aa taāŋabah Jɛhova. Ba leera Bari, sa kɔ a bɔloo esu “ka le enwadɛɛ̄ le ekpo.” (Buū Mumuuna 4:10, 11.) Pya ɛnjɛl ba tɔɔ̄ agara ɛrɛnage gbɛnɛ-edo nu anua ba leera Jɛhova sa ye nɛ ka. Ba le ye kpaɛ̄ li bunyɔɔ, e ba suā ye loo leere. Ba muɛ pya ye elap dogo bu nu a doo. Mumuɛ pya dogo Jɛhova zū wa kɔ ba a leera ye.—Job 38:4-7.

7. Ena i dap yira nyɔɔ leera Jɛhova a?

⁷ A bɔnage loo kɔ i leera Jɛhova sɔ̄ i yere kara, kɔ taɛ kɛ̄ i ye wereloo sa ye tɔgɛ nia loo doo. Kuma sɔ̄ o gaa buū Baibol sa ye nɔ, piiga lo eyere nukuādɛɛ̄ loo pya elap dogo Jɛhova tɔgɛ lo a a nia kaāna. (Job 37:23; Rom 11:33) Lɛɛ o kɔ nɛ Jɛhova kɛ̄ pya ye elap dogo ama a tɔɔ̄loo doo. I dapnage leera Jɛhova loo kɛ̄ a i yerebah nɛ doo, le kɛ̄ a yerebah nɛ pya i butɔ bu edɔɔ̄ doo. A gaa kiisī lo ekuū i dɛɛ̄ loo sa i kpega.—1 Sam 1:27; 2:1, 2.

8. Pio ena anua i leera Jɛhova a? (1 Pya Tɛsalɔnaika 5:18)

⁸ Doo yaa Jɛhova. I ɛrɛ gbɛnɛ-edo nu anua i doo yaa Jɛhova bu kara. (Buū 1 Pya Tɛsalɔnaika 5:18.) I dap ye doo yaa loo ɛrɛgeba le nu i ɛrɛ; nyɔnɛbee dɛ̄dɛɛ̄ le dɔɔ̄nu aa ye bah. (Jem 1:17) Bu edoba, i dap tɔgɛ nia loo kɛ̄ kɛnɛkɛ̄ kpedɛɛ̄ doo le kɛ̄ pya nu alu edɛm lee doo. I dap tɔgɛ nia loo ilii dum, i butɔ, pya i gbo, le bɛābu i ɛrɛ. E i gbī edoo yaa Jɛhova kɔ a nɛ i dee kɔ i ɛrɛ ekpeloo lo eyii ye gbo.

9. Ena anua alu ebɛɛ̄ kɔ i nɔ lo edoo yaa Jɛhova a?

⁹ A dap lu ebɛɛ̄ kɔ i piiga kaāna lo ekɛɛrɛbu pya nu anua i doo yaa Jɛhova. I tɔɔ̄ bu nyɔuwe pya nɛɛ a le bu naa ɛrɛ yaa. Pya nɛɛ sere ekɛɛrɛ nyɔɔ nu ba gbī, taā ba kɛɛrɛ nu ba edoo lokwa ba doo yaa loo nu ba ɛrɛ. Lo i bɔātɛ̄ nɔ wa elap dogo, aba nu i wee yere bu kara na nu i gbī kɔ alu edoo i nɛ. Lokwa lo ama naa sira, alu ebɛɛ̄ kɔ i kiisī lo ewee tɔgɛ nia loo dɛ̄dɛɛ̄ nu Jɛhova edora i nɛ.—Luk 6:45.

10. Bu mɛ sīdee na doo yaa bee yerebah nɛ ziī wuga nɛɛwa kɔ a egerebu a?

¹⁰ Ɛrɛ elap dogo doo yaa dap i yerebah nɛ kɔ i egerebu bu e’aga kɛ̄tɔɔ̄. Naa kɛɛrɛ nu a bee siraloo ziī wuga nɛɛwa a kura Kyung-sook, a le bu Watchtower January 15, 2015. Bee lu emuɛ kɔ a ɛrɛ kansa bu nyiɛ ye. A bee kɔ: “Dumɛloo ama bee mɛ ɔɛloo kaāna. M bee kɛɛrɛ kɔ m epeere dɛ̄dɛɛ̄ nu, e bɔɔ bee mɛ aa.” Ena a bee ye yerebah nɛ kɔ a egerebu a? A kɔ lɛɛ a gae daa ziī ziī uunɛ, a wee dɛɛ̄e kii dee nyɔɔ loo ye tɔ sa yere kara siā nyɔɔ kumaloo nu alu o’oo nu a tɔgɛ nia loo lo dee. Lo ama bee doo kɔ ye kɛ̄tɔɔ̄ aa ye taɛ̄ŋɛ na e a bee doo kɔ a tɔgɛ wereloo a ɛrɛ loo Jɛhova. A bee muɛ kɛ̄ Jɛhova wee kuūdɛɛ̄loo pya ye zooro a ye yira agɛrɛ nɛ sɔ̄ ba kpesī etɛɛrɛloo doo, e a bee suānage kɔ pya leelee i ɛrɛ bu dum eenyɔɔ pya taāŋa i kpesī. Doodoo Kyung-sook, i ɛrɛ gbɛnɛ-edo nu anua i doo yaa Jɛhova, kere i le bu taāŋa. Doo ye yaa dap i yerebah nɛ kɔ i egerebu sa kiisī lo e’ɛrɛ ɛɛbu.

11. Ena anua a bee lu ebɛɛ̄ kɔ pya a wee nyɔɔnɛ dumɛ Jizɔs a ɛrɛ e’agaloo sɔ̄ ekira bunyɔɔ a?

¹¹ Bara Jɛhova kɔ a nɛ a mɛm ezuema ue. Lɛɛ Jizɔs gae obia kii bunyɔɔ, a bee nyɛŋiabu pya a wee ye nyɔɔnɛ dumɛ kɔ ba a yira ekeebee a ye kiiloo “bu Jerusalɛm, le bu dɛ̄dɛɛ̄ Judia, le Sameria, le mmɛ kuma nyɔuwe.” (Doonu 1:8; Luk 24:46-48) Sɔ̄ ziī nwī sɔ̄ etɛ̄na, pya nɛɛbee pya Juu bee aa Pita le Jɔn kuma tɔ biaɛ Sanhedrin, sa yere bɔɔ bu pya nɛɛ a bee bɔ ture nyiɛ loo ama kɔ ba aa zuena ue. (Doonu 4:18, 21) Bu mɛ sīdee na Pita le Jɔn bee doo dogo kiiloo lo ama a?

12. Dɛɛa nyɔɔ nu a le bu kpa Doonu 4:29, 31, ena pya a wee nyɔɔnɛ dumɛ Jizɔs bee doo a?

¹² Pita le Jɔn bee agara ue kumaloo sɔ̄ pya zaāsī yigabari pya Juu bee gbī eyere wa bɔɔ bu kɔ: “Lo a lee kɛ̄ sī Bari, lo egbaɛ̄ i tɔ̄ loo ee Bari, bui biaraa; nyɔnɛbee ii dap aaloo ekɔ nu i bee muɛ sa dā.” (Doonu 4:19, 20) Sɔ̄ a bee lu e’iye Pita le Jɔn, pya a wee nyɔɔnɛ dumɛ Jizɔs bee yere kara dana muɛ̄ nɛ nyɔɔ nɛ Jɛhova kɔ a yereebah wa nɛ lokwa ba dap doo nu alu ye ekɛɛrɛ. Ba bee yere kara kɔ: “Doo kɔ pya o zooro a su e’agaloo kɔā o ue.” Jɛhova bee agara kara a wa aa nyiɛ ama.—Buū Doonu pya Nɛɛ lɛɛratam 4:29, 31.

13. Ena i dap nɔ aāloo edoba Jin-hyuk a?

¹³ I dap nɔ edoba pya a wee nyɔɔnɛ dumɛ Jizɔs lo pya bɛbɛɛ kɔ i ɔbɛ zue ue. Naa ɛp edoba ziī wuga nɛɛdam a kura Jin-hyuk a bee lu eyere kpɔgɔrɔ nyɔɔ ye tɔɔ̄ kee. Bie lo kpɔgɔrɔ, a bee lu ekɔ ye nɛ kɔ a kuūdɛɛ̄loo pya alu esere kee lɛɛloo pya dɔɔ̄na ba le kpɔgɔrɔ, mɛ a naa bee lu elɛɛ ye baloo kɔ a nyɔɔnɛ wa dania lɔgɔ dɔɔ̄na nu kaɛlɛɛ pya nu a bee lu ekɔ a doo wa nɛ, kere kunɛ kɔ nu akiiloo Baibol. A bee yere kara bara e’agaloo le kari lo ezuema ue ɛrɛgeba sɔ̄ dee ye kpaānɛ lo edoo wo. (Doonu 5:29) A bee kɔ: “Jɛhova bee agara na kara tɛ̄maloo enɛ mɛ e’agaloo le suānu lo ebɔātɛ̄ gbɛnɛ-edo enɔānu Baibol bu o’oo minit bie ziī ziī nudee a le lo kpɔgɔrɔ. Lɛɛ sɔ̄ elua uunɛ, m wee ɛm lɛta m nɛ pya ba le lo kpɔgɔrɔ ye lɔɔrɛ.” Doodoo Jin-hyuk, ili dapnage yere kara bara e’agaloo le suānu, sa dɛrɛ nyiɛ nyɔɔ kɔ Jɛhova eyerebah i nɛ kɔ i si i tam zue ue gbɔ̄mɛɛ.

14. Ena edap i yerebah nɛ sɔ̄ i le bu taāŋa a? (Le-yɔɔ 37:3, 5)

¹⁴ Bara yerebah aābah Jɛhova lo etāma pya o taāŋa. Gbɛnɛ-edo ii aa egerebu kɛ̄bah eyɔloo, sɔ̄ nɛɛ i u loo, taāŋa butɔ, tɛ̄ŋaloo, ale pya dɔɔ̄na taāŋa. E pya dumɛloo a yaara le nɔ̄ edora kɔ pya taāŋa ama a aga etāma. Kɔ kɛ̄ nu a tɔɔ̄loo doo nɛ Jɛhova. Kɔ nu akiiloo o kɛ̄tɔɔ̄ ye nɛ, dookɛ̄ o bee kɔ nɛ o gbo a a tɔɔ̄ waɛloo doo. Suā leere kɔ Jɛhova “edoo” dogo kumaloo o kɛ̄tɔɔ̄.—Buū Le-yɔɔ 37:3, 5.

15. Mɛ sīdee na kara i dap yerebah nɛ kɔ i “egerebu bu etāŋiloo” a? Naa nɛ edoba.

¹⁵ Yere kara dɛ̄dɛɛ̄ sɔ̄ eyerebah i nɛ kɔ i dap “egerebu bu etāŋiloo.” (Rom 12:12) Jɛhova suā nu dɛ̄dɛɛ̄ pya a ye taāŋabah gaa tɛɛ̄bu, e “a dānage wa to.” (Yɔɔ 145:18, 19) Ziī wuga nɛɛwa a wee si tam sɛmdee a le 29 zua a kura Kristie muɛ kɔ lo ama lu kaka. A bee ɛrɛ e’agabah dumɛloo sɔ̄ a naa bee ɛmadɛɛ̄. E lo ama bee doo kɔ a bia bu ekiɛ̄nu. E sɔ̄ esaa, bee lu ekɔ ye nɛ kɔ ye ka ɛrɛ dumɛloo a ye dap fɛ. Kristie kɔ: “M bee yere kara nɛ Jɛhova kɔ a nɛ mɛ e’agaloo lokwa m dap tāma ziī ziī biradee. M bee kiisī lo edoo pya nu e’agɛrɛ mɛ loo bu edɔɔ̄, tɛ̄maloo esi enɔānu sa nɔ nu nyɔɔ na loo.” A bee kɔ yereloo kɔ: “Yere kara bee mɛ yerebah nɛ kɔ m egerebu kɛ̄bah pya taāŋa ama. M bee suā kɔ Jɛhova le mɛ loo dɛ̄dɛɛ̄ sɔ̄, e lo ama bee mɛ gbɔ̄nyiɛ kaāna. Kere na taāŋa sii tah anyaawo, Jɛhova agara pya na kara tɛ̄maloo enɛ mɛ efɛɛloo beenyiɛ le ziīnɛloo.” Aa i ibere kɔ “[Jɛhova] suā kɛ̄ ekpɔā pya a nwadɛɛ̄ Bari lɛɛ bu ɛma ɛp doo.”—2 Pit 2:9.

16. Ena anua i gbī yerebah Jɛhova lokwa i dap amana doā-ɛp a?

¹⁶ Bara Jɛhova kɔ a yerebah a nɛ kɔ o dap amana doā-ɛp. Kuma sɔ̄ i lu pya nɛɛ a naa mmana a, alu ebɛɛ̄ kɔ i kiisī lo e’amana sɔ̄ alu edoā i ɛp kɔ i doo nu a bee piya. Setan gaa doo ɛrɛgeba nu a dap lo edoo kɔ a aga i bah lo ekiī pya doā-ɛp ama. Ziī sīdee a doo wo na lo egbee i ekɛɛrɛ tɛ̄maloo pya nu ɛā ekpeloo a tɔgɛ dogo a naa ɛɛ. Pya nu ɛā ekpeloo a le doo wo dap gbee i ekɛɛrɛ, sa gbee taɛ nɛɛ i lu li bu, e a dapnage doo kɔ i si gbɛnɛ pɔrɔ.—Maak 7:21-23; Jem 1:14, 15.

17. Bu mɛ sīdee na i dap doo dogo a gbaaloo i kara lokwa ii dɔ bu doā-ɛp a?

¹⁷ I gbī yerebah Jɛhova lo i gbī ebe eebah sɔ̄ alu edoā i ɛp kɔ i doo nu a bee piya. Jizɔs bee kɔ pya ue ama sɔ̄ aa bee nɛ edoba loo kɛ̄ elu eyere kara doo, sɔ̄ a kɔ: “O aa i ture bu ɛma ɛp mɛ zuura i lɛɛbah pɔrɔ nɛɛ a.” (Mat 6:13) Jɛhova kpɛ̄naloo eyerebah i nɛ, mɛ i ɛrɛ edasī bara kɔ a yerebah i nɛ. I ɛrɛnage edoo dogo a gbaaloo kara i yere. I piiga lo e’ɔbɛ ebuū ale egbaɛ̄tɔ̄loo pya nu a tɔgɛ ekwɔ ekɛɛrɛ a mma bu nyɔuwe Setan ama. (Yɔɔ 97:10) I dap kɛɛrɛbu pya nu a lee tɛ̄maloo ebuū Baibol sa ɛrɛ ekɛɛrɛ nyɔɔ. Sisi enɔānu le si tam zue ue ekpeganage i ekɛɛrɛ. Jɛhova yira yii kɔ, a naale eyiga kɔ alu e’ɛma i ɛp emanyɔɔ kɛ̄ i ekpo toora doo.—1 Kɔr 10:12, 13.

18. Ena dɛ̄dɛɛ̄ ii i doo kumaloo yere kara a?

¹⁸ Lu ebɛɛ̄ kɔ ziī ziī ii i kiisī lo eyere kara lokwa i dap tɔɔ̄ agara nɛ Jɛhova bu kpɛdumɛ dee ama. Wee sere sɔ̄ ziī ziī dee lo eyere kara sa kɔ kɛ̄ nu a tɔɔ̄loo doo nɛ Jɛhova. Leera Jɛhova sa ye doo yaa loo pya nu edoora. Bara ye kɔ a yerebah a nɛ kɔ o ɛrɛ e’agaloo bie uwe zue ue. Bara yerebah ye aābah lo e egerebu bu ɛrɛgeba taāŋa, le lo ekiī ɛrɛgeba doā-ɛp o dap kpesī. O aa yiga kɔ lɔgɔ nu ale lɔgɔ nɛɛ a ɔbɛ a lɛɛ loo eyere kara nɛ Jɛhova dɛ̄dɛɛ̄ sɔ̄. Lo a le wo, mɛ sīdee na Jɛhova agara i kara a? I gaa le kɔ nu akiiloo ebip a kuī ama bu ekobee ue enyɔɔnɛ li.