ਇਬਰਾਨੀਆਂ

9 ਜਿੱਥੋਂ ਤਕ ਪਹਿਲੇ ਇਕਰਾਰ ਦੀ ਗੱਲ ਹੈ, ਇਸ ਦੇ ਕੁਝ ਕਾਨੂੰਨ ਹੁੰਦੇ ਸਨ ਜਿਨ੍ਹਾਂ ਉੱਤੇ ਪੁਜਾਰੀਆਂ ਨੂੰ ਪਵਿੱਤਰ ਸੇਵਾ ਕਰਦੇ ਸਮੇਂ ਚੱਲਣਾ ਪੈਂਦਾ ਸੀ ਅਤੇ ਧਰਤੀ ਉੱਤੇ ਭਗਤੀ ਕਰਨ ਲਈ ਇਕ ਪਵਿੱਤਰ ਥਾਂ ਵੀ ਹੁੰਦੀ ਸੀ। 2 ਇਸ ਪਵਿੱਤਰ ਥਾਂ ʼਤੇ ਇਕ ਤੰਬੂ ਬਣਾਇਆ ਗਿਆ ਸੀ ਅਤੇ ਇਸ ਤੰਬੂ ਦੇ ਪਹਿਲੇ ਹਿੱਸੇ ਵਿਚ ਸ਼ਮਾਦਾਨ, ਮੇਜ਼ ਅਤੇ ਰੋਟੀਆਂ ਰੱਖੀਆਂ ਜਾਂਦੀਆਂ ਸਨ ਅਤੇ ਇਸ ਨੂੰ “ਪਵਿੱਤਰ ਕਮਰਾ” ਕਿਹਾ ਜਾਂਦਾ ਸੀ। 3 ਤੰਬੂ ਦੇ ਦੂਸਰੇ ਹਿੱਸੇ ਨੂੰ “ਅੱਤ ਪਵਿੱਤਰ ਕਮਰਾ” ਕਿਹਾ ਜਾਂਦਾ ਸੀ ਜੋ ਦੂਸਰੇ ਪਰਦੇ ਦੇ ਪਿੱਛੇ ਹੁੰਦਾ ਸੀ। 4 ਇਸ ਕਮਰੇ ਵਿਚ ਸੋਨੇ ਦਾ ਧੂਪਦਾਨ ਤੇ ਸੋਨੇ ਨਾਲ ਪੂਰਾ ਮੜਿਆ ਇਕਰਾਰ ਦਾ ਸੰਦੂਕ ਹੁੰਦਾ ਸੀ ਅਤੇ ਇਸ ਸੰਦੂਕ ਵਿਚ ਮੰਨ ਨਾਲ ਭਰਿਆ ਸੋਨੇ ਦਾ ਮਰਤਬਾਨ ਅਤੇ ਹਾਰੂਨ ਦਾ ਡੰਡਾ ਜਿਸ ਉੱਤੇ ਡੋਡੀਆਂ ਨਿਕਲ ਆਈਆਂ ਸਨ ਅਤੇ ਇਕਰਾਰ ਦੀਆਂ ਫੱਟੀਆਂ ਰੱਖੀਆਂ ਗਈਆਂ ਸਨ; 5 ਅਤੇ ਇਸ ਦੇ ਢੱਕਣ* ਉੱਪਰ ਦੋ ਸ਼ਾਨਦਾਰ ਕਰੂਬੀ ਰੱਖੇ ਹੋਏ ਸਨ ਜਿਨ੍ਹਾਂ ਦਾ ਪਰਛਾਵਾਂ ਢੱਕਣ ਉੱਤੇ ਪੈਂਦਾ ਸੀ। ਪਰ ਹੁਣ ਇਨ੍ਹਾਂ ਚੀਜ਼ਾਂ ਬਾਰੇ ਖੋਲ੍ਹ ਕੇ ਗੱਲ ਕਰਨ ਦਾ ਸਮਾਂ ਨਹੀਂ ਹੈ।

6 ਇਸ ਤਰੀਕੇ ਨਾਲ ਇਹ ਚੀਜ਼ਾਂ ਬਣਾਏ ਜਾਣ ਤੋਂ ਬਾਅਦ ਪੁਜਾਰੀ ਪਵਿੱਤਰ ਸੇਵਾ ਦੇ ਕੰਮ ਕਰਨ ਲਈ ਵਾਰ-ਵਾਰ ਤੰਬੂ ਦੇ ਪਹਿਲੇ ਹਿੱਸੇ ਵਿਚ ਜਾਂਦੇ ਹੁੰਦੇ ਸਨ; 7 ਪਰ ਦੂਸਰੇ ਹਿੱਸੇ ਵਿਚ ਸਿਰਫ਼ ਮਹਾਂ ਪੁਜਾਰੀ ਸਾਲ ਵਿਚ ਇਕ ਵਾਰ ਜਾਂਦਾ ਹੁੰਦਾ ਸੀ ਅਤੇ ਉਸ ਨੂੰ ਲਹੂ ਲੈ ਕੇ ਅੰਦਰ ਜਾਣਾ ਪੈਂਦਾ ਸੀ ਅਤੇ ਇਹ ਲਹੂ ਉਹ ਆਪਣੇ ਪਾਪਾਂ ਲਈ ਤੇ ਲੋਕਾਂ ਦੇ ਅਣਜਾਣੇ ਵਿਚ ਕੀਤੇ ਪਾਪਾਂ ਲਈ ਚੜ੍ਹਾਉਂਦਾ ਹੁੰਦਾ ਸੀ। 8 ਇਨ੍ਹਾਂ ਪ੍ਰਬੰਧਾਂ ਦੇ ਜ਼ਰੀਏ ਪਵਿੱਤਰ ਸ਼ਕਤੀ ਇਹ ਗੱਲ ਸਾਫ਼ ਦੱਸਦੀ ਹੈ ਕਿ ਜਿੰਨਾ ਚਿਰ ਪਹਿਲਾ ਤੰਬੂ* ਖੜ੍ਹਾ ਸੀ, ਉੱਨਾ ਚਿਰ ਅੱਤ ਪਵਿੱਤਰ ਕਮਰੇ* ਵਿਚ ਜਾਣ ਦਾ ਰਾਹ ਨਹੀਂ ਖੁੱਲ੍ਹਿਆ ਸੀ। 9 ਇਹ ਤੰਬੂ ਉਨ੍ਹਾਂ ਚੀਜ਼ਾਂ ਦਾ ਨਮੂਨਾ ਹੈ ਜਿਹੜੀਆਂ ਹੁਣ ਇਸ ਸਮੇਂ ਹੋ ਰਹੀਆਂ ਹਨ ਅਤੇ ਇਸ ਪ੍ਰਬੰਧ ਅਨੁਸਾਰ ਭੇਟਾਂ ਅਤੇ ਬਲ਼ੀਆਂ ਚੜ੍ਹਾਈਆਂ ਜਾਂਦੀਆਂ ਹਨ। ਪਰ ਇਹ ਭੇਟਾਂ ਤੇ ਬਲ਼ੀਆਂ ਉਸ ਆਦਮੀ ਦੀ ਜ਼ਮੀਰ ਨੂੰ ਪੂਰੀ ਤਰ੍ਹਾਂ ਸ਼ੁੱਧ ਨਹੀਂ ਕਰਦੀਆਂ ਜਿਹੜਾ ਇਹ ਭੇਟਾਂ ਜਾਂ ਬਲ਼ੀਆਂ ਲਿਆਉਂਦਾ ਹੈ। 10 ਇਨ੍ਹਾਂ ਭੇਟਾਂ ਤੇ ਬਲ਼ੀਆਂ ਦਾ ਸੰਬੰਧ ਸਿਰਫ਼ ਖਾਣ-ਪੀਣ ਵਾਲੀਆਂ ਚੀਜ਼ਾਂ ਨਾਲ ਅਤੇ ਕਈ ਤਰ੍ਹਾਂ ਦੇ ਬਪਤਿਸਮਿਆਂ* ਨਾਲ ਹੈ। ਇਹ ਸਰੀਰ ਨਾਲ ਸੰਬੰਧਿਤ ਮੂਸਾ ਦੇ ਕਾਨੂੰਨ ਦੀਆਂ ਮੰਗਾਂ ਸਨ ਅਤੇ ਇਨ੍ਹਾਂ ਮੰਗਾਂ ਨੂੰ ਸਾਰੀਆਂ ਚੀਜ਼ਾਂ ਨੂੰ ਸੁਧਾਰੇ ਜਾਣ ਦੇ ਮਿਥੇ ਸਮੇਂ ਤਕ ਲਾਗੂ ਕੀਤਾ ਗਿਆ ਸੀ।

11 ਪਰ ਜਦੋਂ ਮਸੀਹ ਮਹਾਂ ਪੁਜਾਰੀ ਦੇ ਤੌਰ ਤੇ ਬਰਕਤਾਂ ਦੇਣ ਲਈ ਆਇਆ ਜੋ ਸਾਨੂੰ ਇਸ ਵੇਲੇ ਮਿਲ ਰਹੀਆਂ ਹਨ, ਤਾਂ ਉਹ ਉਸ ਤੰਬੂ ਵਿਚ ਗਿਆ ਜਿਹੜਾ ਜ਼ਿਆਦਾ ਮਹੱਤਵਪੂਰਣ ਤੇ ਉੱਤਮ ਹੈ ਤੇ ਜਿਸ ਨੂੰ ਇਨਸਾਨੀ ਹੱਥਾਂ ਨੇ ਨਹੀਂ ਬਣਾਇਆ ਯਾਨੀ ਇਸ ਧਰਤੀ ਉੱਤੇ ਨਹੀਂ ਹੈ। 12 ਉਹ ਬੱਕਰਿਆਂ ਜਾਂ ਵੱਛਿਆਂ ਦਾ ਲਹੂ ਲੈ ਕੇ ਅੱਤ ਪਵਿੱਤਰ ਕਮਰੇ ਵਿਚ ਨਹੀਂ ਗਿਆ, ਸਗੋਂ ਆਪਣਾ ਲਹੂ ਲੈ ਕੇ ਇੱਕੋ ਵਾਰ ਹਮੇਸ਼ਾ ਲਈ ਅੱਤ ਪਵਿੱਤਰ ਕਮਰੇ ਵਿਚ ਗਿਆ ਅਤੇ ਉਸ ਨੇ ਸਾਨੂੰ ਹਮੇਸ਼ਾ ਲਈ ਮੁਕਤੀ ਦੇ ਦਿੱਤੀ ਹੈ। 13 ਜੇ ਬੱਕਰਿਆਂ ਤੇ ਬਲਦਾਂ ਦੇ ਲਹੂ ਨਾਲ ਅਤੇ ਗਾਂ ਦੀ ਸੁਆਹ ਅਸ਼ੁੱਧ ਲੋਕਾਂ ʼਤੇ ਧੂੜੇ ਜਾਣ ਨਾਲ ਇਨਸਾਨ ਸਰੀਰਕ ਤੌਰ ਤੇ ਸ਼ੁੱਧ ਹੋ ਜਾਂਦੇ ਹਨ, 14 ਤਾਂ ਫਿਰ ਮਸੀਹ ਦਾ ਲਹੂ, ਜਿਸ ਨੇ ਹਮੇਸ਼ਾ ਰਹਿਣ ਵਾਲੀ ਪਵਿੱਤਰ ਸ਼ਕਤੀ ਅਨੁਸਾਰ ਆਪਣੇ ਮੁਕੰਮਲ ਸਰੀਰ ਨੂੰ ਪਰਮੇਸ਼ੁਰ ਸਾਮ੍ਹਣੇ ਚੜ੍ਹਾਇਆ, ਸਾਡੀ ਜ਼ਮੀਰ ਨੂੰ ਵਿਅਰਥ ਕੰਮਾਂ ਤੋਂ ਕਿੰਨਾ ਜ਼ਿਆਦਾ ਸ਼ੁੱਧ ਕਰ ਸਕਦਾ ਹੈ ਤਾਂਕਿ ਅਸੀਂ ਜੀਉਂਦੇ ਪਰਮੇਸ਼ੁਰ ਦੀ ਭਗਤੀ ਕਰ ਸਕੀਏ!

15 ਇਸੇ ਕਰਕੇ ਮਸੀਹ ਨਵੇਂ ਇਕਰਾਰ ਦਾ ਵਿਚੋਲਾ ਬਣਿਆ ਤਾਂਕਿ ਸੱਦੇ ਗਏ ਲੋਕ ਵਾਅਦਾ ਕੀਤੀ ਗਈ ਵਿਰਾਸਤ ਪ੍ਰਾਪਤ ਕਰ ਸਕਣ ਜੋ ਹਮੇਸ਼ਾ ਰਹੇਗੀ। ਇਹ ਸਭ ਕੁਝ ਉਸ ਦੀ ਮੌਤ ਦੇ ਜ਼ਰੀਏ ਹੀ ਮੁਮਕਿਨ ਹੋਇਆ ਹੈ। ਉਸ ਨੇ ਆਪਣੀ ਮੌਤ ਦੇ ਜ਼ਰੀਏ ਰਿਹਾਈ ਦੀ ਕੀਮਤ ਅਦਾ ਕਰ ਕੇ ਉਨ੍ਹਾਂ ਨੂੰ ਪਾਪਾਂ ਤੋਂ ਮੁਕਤ ਕੀਤਾ ਹੈ ਜਿਹੜੇ ਉਨ੍ਹਾਂ ਨੇ ਪੁਰਾਣੇ ਇਕਰਾਰ ਅਧੀਨ ਰਹਿੰਦਿਆਂ ਕੀਤੇ ਸਨ। 16 ਕਿਉਂਕਿ ਜਦੋਂ ਕੋਈ ਇਨਸਾਨ ਪਰਮੇਸ਼ੁਰ ਨਾਲ ਇਕਰਾਰ ਕਰਦਾ ਹੈ, ਤਾਂ ਉਸ ਇਨਸਾਨ ਲਈ ਮਰਨਾ ਜ਼ਰੂਰੀ ਹੁੰਦਾ ਹੈ। 17 ਇਕਰਾਰ ਦੇ ਲਾਗੂ ਹੋਣ ਲਈ ਉਸ ਦੀ ਮੌਤ ਜ਼ਰੂਰੀ ਹੈ ਕਿਉਂਕਿ ਜਿੰਨਾ ਚਿਰ ਇਕਰਾਰ ਕਰਨ ਵਾਲਾ ਜੀਉਂਦਾ ਹੁੰਦਾ ਹੈ, ਉੱਨਾ ਚਿਰ ਇਕਰਾਰ ਲਾਗੂ ਨਹੀਂ ਹੁੰਦਾ। 18 ਇਸੇ ਤਰ੍ਹਾਂ ਪੁਰਾਣਾ ਇਕਰਾਰ ਵੀ ਲਹੂ ਤੋਂ ਬਿਨਾਂ ਲਾਗੂ ਨਹੀਂ ਕੀਤਾ ਗਿਆ ਸੀ। 19 ਕਿਉਂਕਿ ਸਾਰੇ ਲੋਕਾਂ ਨੂੰ ਕਾਨੂੰਨ ਦਾ ਹਰੇਕ ਹੁਕਮ ਦੱਸਣ ਤੋਂ ਬਾਅਦ ਮੂਸਾ ਨੇ ਵੱਛਿਆਂ ਤੇ ਬੱਕਰਿਆਂ ਦਾ ਲਹੂ ਪਾਣੀ ਵਿਚ ਮਿਲਾਇਆ ਅਤੇ ਉਸ ਨੇ ਜ਼ੂਫੇ ਦੀ ਛਿਟੀ ਉੱਤੇ ਗੂੜ੍ਹੇ ਲਾਲ ਰੰਗ ਦੀ ਉੱਨ ਬੰਨ੍ਹ ਕੇ ਇਕਰਾਰ ਦੀ ਕਿਤਾਬ ਉੱਤੇ ਅਤੇ ਸਾਰੇ ਲੋਕਾਂ ਉੱਤੇ ਲਹੂ ਛਿੜਕਿਆ 20 ਅਤੇ ਉਸ ਨੇ ਕਿਹਾ: “ਇਹ ਇਕਰਾਰ ਦਾ ਲਹੂ ਹੈ ਜਿਸ ਦੀ ਪਾਲਣਾ ਕਰਨ ਦਾ ਪਰਮੇਸ਼ੁਰ ਨੇ ਤੁਹਾਨੂੰ ਹੁਕਮ ਦਿੱਤਾ ਹੈ।” 21 ਅਤੇ ਉਸ ਨੇ ਤੰਬੂ ਉੱਤੇ ਅਤੇ ਸੇਵਾ ਦੇ ਕੰਮ ਵਿਚ ਵਰਤੇ ਜਾਣ ਵਾਲੇ ਸਾਰੇ ਭਾਂਡਿਆਂ ਉੱਤੇ ਵੀ ਇਹ ਲਹੂ ਛਿੜਕਿਆ। 22 ਜੀ ਹਾਂ, ਮੂਸਾ ਦੇ ਕਾਨੂੰਨ ਅਨੁਸਾਰ ਤਕਰੀਬਨ ਸਾਰੀਆਂ ਚੀਜ਼ਾਂ ਲਹੂ ਨਾਲ ਸ਼ੁੱਧ ਕੀਤੀਆਂ ਜਾਂਦੀਆਂ ਹਨ ਅਤੇ ਜਿੰਨਾ ਚਿਰ ਲਹੂ ਨਹੀਂ ਵਹਾਇਆ ਜਾਂਦਾ, ਉੱਨਾ ਚਿਰ ਪਾਪਾਂ ਦੀ ਮਾਫ਼ੀ ਨਹੀਂ ਮਿਲਦੀ।

23 ਇਸ ਲਈ, ਸਵਰਗੀ ਚੀਜ਼ਾਂ ਦੇ ਨਮੂਨੇ ʼਤੇ ਬਣਾਈਆਂ ਚੀਜ਼ਾਂ ਨੂੰ ਜਾਨ­ਵਰਾਂ ਦੇ ਲਹੂ ਨਾਲ ਸ਼ੁੱਧ ਕੀਤਾ ਜਾਣਾ ਜ਼ਰੂਰੀ ਸੀ, ਪਰ ਸਵਰਗੀ ਚੀਜ਼ਾਂ ਨੂੰ ਉਨ੍ਹਾਂ ਬਲ਼ੀਆਂ ਨਾਲ ਸ਼ੁੱਧ ਕੀਤਾ ਜਾਂਦਾ ਹੈ ਜਿਹੜੀਆਂ ਜਾਨਵਰਾਂ ਦੀਆਂ ਬਲ਼ੀਆਂ ਨਾਲੋਂ ਉੱਤਮ ਹਨ। 24 ਕਿਉਂਕਿ ਮਸੀਹ ਇਨਸਾਨੀ ਹੱਥਾਂ ਨਾਲ ਬਣਾਏ ਗਏ ਅੱਤ ਪਵਿੱਤਰ ਕਮਰੇ ਵਿਚ ਨਹੀਂ ਗਿਆ, ਜੋ ਕਿ ਅਸਲ ਦੀ ਨਕਲ ਹੈ, ਸਗੋਂ ਸਵਰਗ ਵਿਚ ਗਿਆ ਤਾਂਕਿ ਉਹ ਹੁਣ ਸਾਡੀ ਖ਼ਾਤਰ ਪਰਮੇਸ਼ੁਰ ਦੇ ਸਾਮ੍ਹਣੇ ਪੇਸ਼ ਹੋਵੇ। 25 ਉਸ ਨੂੰ ਵਾਰ-ਵਾਰ ਆਪਣੀ ਬਲ਼ੀ ਚੜ੍ਹਾਉਣ ਦੀ ਲੋੜ ਨਹੀਂ, ਜਿਵੇਂ ਮਹਾਂ ਪੁਜਾਰੀ ਹਰ ਸਾਲ ਜਾਨਵਰਾਂ ਦਾ ਲਹੂ ਲੈ ਕੇ, ਨਾ ਕਿ ਆਪਣਾ ਲਹੂ ਲੈ ਕੇ, ਅੱਤ ਪਵਿੱਤਰ ਕਮਰੇ ਵਿਚ ਜਾਂਦਾ ਹੁੰਦਾ ਸੀ। 26 ਨਹੀਂ ਤਾਂ ਮਸੀਹ ਨੂੰ ਦੁਨੀਆਂ ਦੀ ਨੀਂਹ* ਰੱਖਣ ਦੇ ਸਮੇਂ ਤੋਂ ਵਾਰ-ਵਾਰ ਦੁੱਖ ਝੱਲਣਾ ਪੈਂਦਾ। ਪਰ ਉਹ ਯੁਗ ਦੇ ਅੰਤ* ਵਿਚ ਇੱਕੋ ਵਾਰ ਪ੍ਰਗਟ ਹੋਇਆ ਤਾਂਕਿ ਆਪਣੀ ਕੁਰਬਾਨੀ ਦੇ ਕੇ ਪਾਪ ਨੂੰ ਖ਼ਤਮ ਕਰ ਦੇਵੇ। 27 ਅਤੇ ਜਿਵੇਂ ਇਨਸਾਨਾਂ ਲਈ ਇਕ ਵਾਰ ਮਰਨਾ ਜ਼ਰੂਰੀ ਹੈ ਅਤੇ ਫਿਰ ਨਿਆਂ ਕੀਤਾ ਜਾਵੇਗਾ, 28 ਇਸੇ ਤਰ੍ਹਾਂ ਮਸੀਹ ਨੇ ਵੀ ਬਹੁਤ ਸਾਰੇ ਲੋਕਾਂ ਦੇ ਪਾਪਾਂ ਲਈ ਆਪਣੇ ਆਪ ਨੂੰ ਇੱਕੋ ਵਾਰ ਹਮੇਸ਼ਾ ਲਈ ਚੜ੍ਹਾਇਆ; ਅਤੇ ਜਦੋਂ ਉਹ ਦੂਸਰੀ ਵਾਰ ਪ੍ਰਗਟ ਹੋਵੇਗਾ, ਤਾਂ ਉਹ ਪਾਪ ਖ਼ਤਮ ਕਰਨ ਲਈ ਪ੍ਰਗਟ ਨਹੀਂ ਹੋਵੇਗਾ ਅਤੇ ਉਹ ਉਨ੍ਹਾਂ ਨੂੰ ਦਿਖਾਈ ਦੇਵੇਗਾ ਜਿਹੜੇ ਮੁਕਤੀ ਲਈ ਬੇਸਬਰੀ ਨਾਲ ਉਸ ਦੀ ਉਡੀਕ ਕਰ ਰਹੇ ਹਨ।