August

En disen Psalm sent twee wichtje Lieren bennen. Ieeschtens: De Jerajchte haben Trubbels. Tweedens: Jehowa rat ons ut onse Trubbels. Woo deit Jehowa daut? Eent es, daut hee ons halpt to vestonen, daut wie nu noch nich een Läwen onen Trubbels haben kjennen. Hee vesprakjt, daut wie Freid haben woaren, wan wie am deenen, oba hee vesprakjt nich, daut wie nu aul een Läwen onen Sorjen haben (Jes. 66:14). Hee well, daut wie onse Hopninj em Uag hoolen – daut scheene Läwen, waut wie fa emma haben woaren (2. Kor. 4:16-18). Bat dan woat hee ons jieda Dach biestonen (Klg. 3:22-24). Waut kjenn wie von Jehowa siene true Deena lieren, waut enne Bibeltiet läwden, un uk von soone, waut en onse Tiet läwen? Doa kaun onverhofs irjentwaut oppkomen, oba Jehowa woat ons emma halpen, wan wie opp am vetruen (Psa. 55:23). w23.04 14-15 V. 3-4

Wie kjennen von Josef un Maria äa Biespel lieren, waut reed wieren, de Rejierunk to jehorchen, wan daut uk noch waut opp sikj haud (Luk. 2:1-6). Aus Maria rom näajen Moonat schwanga wia, wort daut oppe Proow jestalt, aus see un Josef jehuarsom wieren. De Harscha von daut Reemische Rikj, waut Augustus heet, velangd, daut aule sikj sullen en dee Staut enschriewen loten, wua see häastaumden. Josef un Maria musten doatoo derch de Boaj no Betlehem reisen, waut 150 Kilomeeta (93 Miel) auf wia. Dise Reis wudd sea ommaklich sennen, besonda fa Maria. Secha muaken dee sikj groote Sorjen doaräwa, woo ar un uk daut ojjebuarne Bäbe daut gonen wudd. Waut, wan see daut Bäbe hinjawäajes kjrieen wudd? Dit Bäbe sull je de Messias woaren! Oba leeten dee sikj von aul dit aufhoolen, de Rejierunk to jehorchen? Josef un Maria leeten sikj von aul dise Sorjen nich aufhoolen, daut Jesaz to jehorchen. Jehowa säajend äant doafäa. Maria kjeem goot en Betlehem aun un brocht doa een jesundet Bäbe to Welt un holp mau rajcht met, daut eene biblische Profezeiunk sikj kunn erfellen! (Micha 5:1). w23.10 8 V. 9; 9 V. 11-12

Waut, wan du die nich woachst, bie de Toopkomes eene Auntwuat to jäwen? Een Rot es biejlikj, fein väatostudieren (Spr. 21:5). Je bäta du weetst, om waut daut jeit, je leichta woat daut fa die sennen, Auntwuaten to jäwen. Un dan noch, doo korte Auntwuaten jäwen (Spr. 15:23; 17:27). Daut kaun die daut leichta moaken, wan du bloos eent ooda twee Saza sajchst. Wan du eene korte Auntwuat met diene ieejne Wieed jefst, wiest daut, daut du goot väastudieet hast un vesteist, om waut daut jeit. Waut, wan du proofst, disen Rot notokomen, oba die noch emma nich woachst, mea aus eent ooda twee Auntwuaten to jäwen? Dan hool em Denkj, daut Jehowa daut sitt, woo sea du die aunstrenjst, un daut schazt (Luk. 21:1-4). Dien Bastet jäwen meent nich, daut du die selfst sea unja Druck satst (Filip. 4:5). Äwalaj, waut dien Bastet es, un nemm die väa, daut uk to doonen. Bäd, daut Jehowa die kaun halpen, ruich to bliewen. Veleicht kaust du die ieescht mol väanämen, bloos eene korte Auntwuat to jäwen. w23.04 21 V. 6-8

De Apostel Paulus deit ons hia met Soldoten vejlikjen, waut reed sent fa dän Kjrich. Een Soldot mott aulentiet reed sennen to kjamfen, wan doa Kjrich es. Bie ons es daut uk soo. Gloowen un Leew, waut soo aus een Brostschilt sent, un de Hopninj, waut soo aus een Schutz-Hoot es, halpen ons, reed to bliewen fa Jehowa sienen Dach. Een Brostschilt deed daut Hoat von eenen Soldot beschitzen. Gloowen un Leew beschitzen ons bilteljet Hoat, daut wie kjennen wieda Gott deenen un Jesus nofoljen. Wan wie Gloowen haben, dan woa wie ons secha sennen, daut Jehowa ons doafäa beloonen woat, wiels wie am iernstlich sieekjen (Heb. 11:6). De Gloowen woat ons uk bat doa brinjen, onsen Leida Jesus Christus tru to bliewen, wan doa uk Schwoaret oppkjemt. Woo kjenn wie onsen Gloowen stoakjen, soo daut wie uthoolen kjennen? Wie kjennen biejlikj von true Breeda lieren, waut vefolcht worden ooda waut daut knaup jinkj. Un wan wie soone nodoonen, waut een eefachet Läwen fieren un daut Kjennichrikj aun de ieeschte Städ stalen, dan woa wie daut väabieejen, daut wie nom Jelt hinjaraun sent ooda een deel Sachen haben wellen. w23.06 10 V. 8-9

Selfstbeharschunk meent, daut eena sien Denkjen un Feelen unja Kontroll haft. Daut es needich, om daut to volbrinjen, waut eena sikj väajenomen haft, besonda wan daut nich waut Eefachet es ooda soont, waut eenem nich jankat. Denkj doaraun, Selfstbeharschunk es Poat von de Frucht von dän Jeist. Doawäajen kaust du Jehowa doano froagen, daut hee die met sienen Jeist halpt, aun dise wichtje Ieejenschoft to schaufen (Luk. 11:13; Gal. 5:22-23). Wacht nich, bat du de jewenschte Omstend hast. En dise Welt woa wie kjeenmol de jewenschte Omstend haben. Wan wie doano luaren, woa wie nienich waut volbrinjen. Veleicht jankat ons daut nich, waut to doonen, waut meist ommäajlich lat. Wan daut bie die soo es, wurscht du die daut kjennen en kjlandre Bieta endeelen? Wan du biejlikj aun eene Ieejenschoft schaufen deist, wurscht du dee opp verieescht kjennen met eefache Sachen bewiesen? Wan du de gaunze Bibel derchläsen west, dan kaust du veleicht ieescht mol jieda Dach bloos fa eene korte Tiet läsen. w23.05 29 V. 11-13

En dise Tiet von de latste Doag haft Jehowa siene Organisazion jebrukt toom jeisteljet Äten reedmoaken, soo daut wie aula opp “dän heiljen Wajch” bliewen kjennen (Jes. 35:8; 48:17; 60:17). Jieda Mensch, waut doa aunfangt, de Bibel to studieren, haft soo to sajen de Jeläajenheit, opp “dän heiljen Wajch” nopptogonen. Eenje fangen aun, een wesset Enj opp dän Wajch to gonen, oba dan veloten dee dän. Aundre wada sent sikj gaunz eenich, bat aum Enj opp dän Wajch to bliewen. Oba wua fieet de Wajch verheipts han? Fa dee, waut de himlische Hopninj haben, woat de heilja Wajch no “Gott sien Paradies” em Himmel fieren (Opb. 2:7). Fa de aundre fieet de Wajch bat nom Enj von Christus sien dusentjoaschet Rikj, wua aule dan woaren volkomen sennen. Soo, wan du opp disen Wajch best, dan kjikj nich no daut, waut du trigjjeloten hast, un go nich von disen Wajch rauf, bat du ieescht enne niee Welt aunjekomen best. w23.05 17 V. 15; 19 V. 16-18

Wan du doaräwa nodenkjst, waut Jehowa aul aules fa die jedonen haft, dan woascht du dankboa sennen un die wellen am hanjäwen (Psa. 116:12-14). Daut sajcht je, von Jehowa komen “aule goode Sachen un aule volkomne Gowen” (Jak. 1:17). Daut jratste Jeschenkj, waut Jehowa ons jejäft haft, es daut Opfa von sienen Sän Jesus. Denkj mol han, derch dit Leesjelt kaust du een gooda Frint met Jehowa sennen. Doaderch hast du uk de Mäajlichkjeit, fa emma to läwen (1. Joh. 4:9-10). Wan du die Jehowa hanjäwen deist, dan bewiest du, daut du dankboa best fa daut jratste Jeschenkj un fa aul de aundre Säajnungen, waut Jehowa die jejäft haft (5. Mo. 16:17; 2. Kor. 5:15). w24.03 5 V. 8

Wan wie seenen, waut de Menschen fa een schlajchtet Läwen haben, jeit ons daut soo aus dän jerajchten Lott. De Schreft sajcht, daut hee “derch de gottloose äa schenteljet Läwen jekjwält wort”, wiels hee wist, daut sienen himlischen Voda daut sea jäajenaun wia, waut dee deeden (2. Pet. 2:7-8). Lott leewd Gott un fercht am un doawäajen stald hee sikj gaunz jäajen daut onmoralische Läwen, waut de Menschen rom am fieeden. Wie läwen uk mank Menschen, waut doa mau weinich ooda nuscht om romjäwen, waut Jehowa fa rajcht talt. Oba wie kjennen doawäajen een reinet Läwen fieren, wan wie Gott leewen un wieda lieren, am oppe rajchte Wajch to ferchten. En daut Bibelbuak Spricha finj wie gooden Rot von Jehowa, woo wie daut doonen kjennen. Aule Christen – Mana, Frues, junge un elre – kjennen von disen Rot grooten Nutzen kjrieen. Wan wie Jehowa ferchten, pauss wie sea opp, daut wie nich met soone Frind sent, waut Schlajchtet doonen. w23.06 20 V. 1-2; 21 V. 5

Veleicht hast du daut beläft, daut du Jäajenstaunt enne Famielje hautst, ooda du hast must waut em Tieteljen oppjäwen, daut du daut Kjennichrikj kust aune ieeschte Städ stalen (Mat. 6:33). Wan daut soo wia, dan kaust du die secha sennen, daut Jehowa daut jeseenen haft, waut du aules fa am jedonen hast (Heb. 6:10). Veleicht hast du daut aul selfst beläft, daut et werkjlich soo es, aus Jesus säd: “Kjeena haft Hus ooda Breeda ooda Sestren ooda siene Mutta ooda sienen Voda ooda Kjinja ooda Flekja wäajen mie ooda wäajen de goode Norecht veloten, dee nich en dise Tiet aul woat 100 mol soo väl kjrieen – soo aus Hiesa, Breeda, Sestren, Mitta, Kjinja un Flekja; wan uk met Vefoljunk – un en de komende TIET daut eewje Läwen” (Mar. 10:29-30). De Säajnungen, waut du jekjräajen hast, sent väl jrata aus daut, waut du hast must oppjäwen (Psa. 37:4). w24.03 9 V. 5

Aus daut en Judäa eene groote Hungaschnoot jeef, worden de Breeda en de Vesaumlunk von Antiochia en Sierien “sikj eenich, de Breeda, waut en Judäa wonden, Help to schekjen, doano aus een jiedra daut kunn” (Apj. 11:27-30). De Christen en Antiochia wullen äare Breeda en Judäa onbedinjt halpen, wan daut uk wiet auf wia (1. Joh. 3:17-18). Vondoag dän Dach kjenn wie uk Metjefeel wiesen, wan wie daut enwoaren, daut onse Breeda un Sestren von een Owwada betroffen sent. Wie sent fuaz reed, waut to doonen. Veleicht froag wie de Eltestasch, aus wie wua methalpen kjennen. Wie jäwen wellich onse Gowen fa daut weltwiede Woakj ooda wie bäden fa dee, waut derch een Owwada Schoden jekjräajen haben. Veleicht woa wie onse Breeda un Sestren halpen motten, daut dee daut Needje haben kjennen. Wan ons Kjennich Jesus Christus ieescht komen woat, de Menschheit to rechten, woat hee ons dan uk doabie trafen, daut wie aundre Metjefeel wiesen? Wan jo, dan woat hee to ons sajen kjennen: “Oaft daut Kjennichrikj” (Mat. 25:34-40). w23.07 4 V. 9-10; 6 V. 12

Jesus deed Jehowa no un wia derchjedocht. Hee wort no de Ieed jeschekjt, “de veloarne Schop von Israel” to prädjen. Woo hee siene Oppgow nokjeem, wees, daut hee derchjedocht wia. Opp eene Sauz kjeem eene Fru no am, waut nich von de Israeliten wia, un prachad am, daut hee äare Dochta heelen sull, waut “grulich sea lieden” must, “wäajen see von eenen beesen Jeist besäten” wia. Jesus haud Metjefeel un deed daut (Mat. 15:21-28). See wie mol een aundret Biespel. Jesus haud ea mol en sienen Deenst jesajcht: “Wäa mie … aufwiest, dän woa ekj … uk aufwiesen” (Mat. 10:33). Oba deed hee daut uk bie Petrus, aus dee am dree mol veluach? Nä, wiels hee sach, daut Petrus daut leet wia un daut daut een trua Mensch wia. Aus Jesus vom Doot oppjestonen wia, leet hee sikj von Petrus seenen un wees am fuaz, daut hee am vejäft haud un noch leewd (Luk. 24:33-34). Jehowa Gott un Jesus Christus sent derchjedocht. Woo steit daut met ons? Jehowa well haben, daut wie uk sellen derchjedocht sennen. w23.07 21 V. 6-7

Woo kjenn wie de Menschen daut vesechren, daut Gott sien Vespräakjen äwa daut Paradies krakjt soo romkomen woat? Ieeschtens: Jehowa muak daut Vespräakjen selfst. Daut Buak Openboarunk sajcht: “Dan säd dee, dee opp däm Troon saut: Kjikjt emol! Ekj moak aules nie.” Jehowa haft de Weisheit, de Krauft un dän Wunsch, sien Vespräakjen to erfellen. Tweedens: Fa Jehowa woat sikj daut soo secha erfellen, daut et fa am mau rajcht aul soo romjekomen es. Doawäajen sajcht hee: “Dise Wieed sent woarhauftich un opp to veloten” un “daut es jeworden”. Dreddens: Wan Jehowa met eene Sach aunfangt, woat hee dee uk to Enj brinjen; soo aus doa jeschräwen steit: “Ekj sie daut A [Alfa] un daut Oo [Omega]” (Opb. 21:6). Jehowa woat daut bewiesen, daut de Soton am doa nich von aufhoolen woat, sien Väanämen to erfellen, un daut de Soton een Läajna es. Soo, wan doa wäa sajcht: “Soon scheenet Läwen jeft daut nich mol!”, dan kaust du dänjanjen Openboarunk 21:5-6 wiesen. Wies dän, woo Jehowa dit Vespräakjen vesechren deit un soo to sajen selfst unjaschriewen deit (Jes. 65:16). w23.11 7 V. 18-19

Dit vespruak Jehowa Abraham, aus dee 75 Joa wia un kjeene Kjinja haud. Sach Abraham daut, woo sikj daut erfeld? Nich aules. Nodäm daut hee äwa dän Eufrat-Riefa jinkj, must hee 25 Joa wachten, bat sien Sän Isaak derch een Wunda jebuaren wort. Un dan noch mol 60 Joa lota kjeemen ieescht siene Grootkjinja Esau un Jakob to Welt (Heb. 6:15). Abraham haft daut nich beläft, daut siene Nokomen een grootet Volkj worden un daut vesproakne Launt orwen. Oba dis trua Maun wia doawäajen een gooda Frint met Jehowa (Jak. 2:23). Un wan Abraham ieescht vom Doot oppstonen woat, woat hee sea schaftich sennen to seenen, daut wäajen sienen Gloowen un siene Jedult aule Velkja jesäajent worden! (1. Mo. 22:18). Waut es de Lia? Veleicht woa wie nu jroz nich seenen, woo sikj aules erfelt, waut Jehowa vespruak. Oba wan wie jeduldich sent, soo aus Abraham, kjenn wie ons gaunz secha sennen, daut Jehowa ons nu aul beloonen woat un noch väl dolla enne vesproakne niee Welt (Mar. 10:29-30). w23.08 24 V. 14

De Kjennich Usija wia deemootich, aus hee junk wia. Hee lieed, “Gott sienen Wellen to foljen”. Hee läwd 68 Joa un de mieeschte Tiet säajend Jehowa am (2. Chr. 26:1-4). Usija haft väle Fiend jewonnen un hee sach uk doano, daut Jerusalem goot beschizt wort (2. Chr. 26:6-15). Usija wia secha sea schaftich, daut hee met Gott siene Help soo väl haud kunt doonen (Liera 3:12-13). De Kjennich Usija wia daut jewant, daut hee aundre kunn väasajen. Doawäajen docht hee veleicht, daut hee aules doonen kunn, waut hee wull. Eenen Dach jinkj Usija en Jehowa sienen Tempel nenn un wull doa opp dän Aultoa Weiruak vebrennen. Oba daut wia sea respakjtloos, wiels de Kjennichs hauden nich Frieheit doatoo (2. Chr. 26:16-18). De Huaga Priesta Asarja proowd am auftohoolen, oba Usija wort sea doll. Daut es schod, oba Usija bleef Jehowa nich tru. Doawäajen wort hee met de Leprakrankheit bestroft (2. Chr. 26:19-21). Woo väl aundasch wudd daut haben kunt utkomen, wan hee deemootich jebläwen wia! w23.09 10 V. 9-10

Wan de Apostel Petrus uk met dän heiljen Jeist jesaulft wia, must hee oba jäajen siene Schwakheiten kjamfen. Aune 36 n. Chr. schekjt Gott am no Kornelius, waut een Nichjud wia. Don saulwd Jehowa Kornelius met dän heiljen Jeist un daut bewees, “daut Gott kjeenen Unjascheet moakt” un daut de Nichjuden uk kunnen Poat von de Christenvesaumlunk sennen (Apj. 10:34, 44-45). Nodäm eet Petrus wellich met de Nichjuden toop, un daut wia soont, waut hee ea kjeenmol wudd jedonen haben. Oba eenje judische Christen hauden daut soo tohoolen, daut de Juden un de Nichjuden nich sullen toop äten. Aus eenje Breeda, waut soo dochten, no Antiochia kjeemen, wull Petrus dee nich beleidjen, un doawäajen eet Petrus nich mea met de Nichjuden toop. De Apostel Paulus sach, waut Petrus deed, un wees am ver aulem trajcht (Gal. 2:13-14). Oba Petrus jeef nich opp, wan hee uk disen Fäla jemoakt haud. w23.09 22 V. 8

Siet opprechtich met junt selfst un kjikjt doano, wua jie junt vebätren kjennen, oba woat nich mootloos. “De Har [es] goot” un hee woat junt halpen, junt to vebätren (1. Pet. 2:3). De Apostel Petrus vesechat ons: “Gott [woat] junt selfst gaunz utlieren. … Hee woat junt halpen, Gloowen to hoolen”. Petrus docht eemol, daut hee daut nich wieet wia, met Jesus toop to sennen (Luk. 5:8). Oba Jehowa un Jesus stunden am leeftolich bie, un doaderch kunn hee Jesus tru nofoljen. Doawäajen kunn Petrus “en onsen Harn un Heilant Jesus Christus sien eewjet Rikj nenn” (2. Pet. 1:11). Daut wia werkjlich eene besondre Beloonunk! Wan jie junt wieda aunstrenjen un daut loten, daut Jehowa junt utlieet, woa jie uk met daut eewje Läwen beloont woaren. De “Loon fa jun Gloowen” woat sennen, “daut june Seelen jerat woaren” (1. Pet. 1:9). w23.09 31 V. 16-17

Daut ieeschtemmasche Aunbädungszelt haud eenen grooten Hoff met eenen Tun doa rom, un doa schauften de Priesta bennen. Opp disen Hoff wia de groota Aultoa un de Wauschkomm, wua de Priesta sikj wauschen deeden, ea dee äare heilje Oabeit doonen kunnen (2. Mo. 30:17-20; 40:6-8). Vondoag dän Dach deenen de Jesaulwde tru hia oppe Ieed en dän Bennahoff von dän jeisteljen Tempel, ea dee em Himmel komen. De groote Wauschkomm halpt dee un uk aule Christen doaraun denkjen, daut see sellen een reinet Läwen fieren un em Jeisteljen uk rein sennen. Oba wua deit de groote Häad Jehowa deenen? De Apostel Johanes sach, daut see “ver dän Troon” stonen un Gott “Dach un Nacht en sienen Tempel” deenen. De groote Häad deent hia oppe Ieed en dän Butahoff von dän jeisteljen Tempel (Opb. 7:9, 13-15). Woo dankboa sent wie nich, daut Jehowa ons de Jeläajenheit jeft, am en sienen grooten jeisteljen Tempel to deenen! w23.10 28-29 V. 15-16

Eene Wajch, woo Jehowa ons Moot jeft, es derch de Eltestasch (Jes. 32:1-2). Wan du die bedrekjt feelst, dan saj de Eltestasch daut. Un wan dee die Help aunbeeden, dan nemm dee wellich aun. Jehowa kaun die derch dee stoakj moaken. De Hopninj, waut wie derch de Schreft haben, fa emma em Himmel ooda em Paradies oppe Ieed to läwen, jeft ons uk väl Krauft (Reem. 4:3, 18-20). Onse Hopninj stoakjt ons, daut wie kjennen Schwoaret uthoolen, de goode Norecht prädjen un veschiedne Oppgowen enne Vesaumlunk nokomen (1. Tes. 1:3). Deeselwje Hopninj jeef uk dän Apostel Paulus Krauft. Hee wia “sea unjadrekjt” un wist sikj “nich Rot”, am wort “vefolcht” un “doljeschloagen”. Bieaun wia mau rajcht sien Läwen en Jefoa (2. Kor. 4:8-10). Paulus kjrieech doaderch Krauft, daut hee aun siene Hopninj docht (2. Kor. 4:16-18). Hee docht sea aun siene Hopninj, eewich em Himmel to läwen. Daut jeef am Krauft un hee feeld sikj soo, aus wudd hee aule Dach niejemoakt woaren. w23.10 15-16 V. 14-17

Wan du bätst, denkj doaräwa no, aus daut fa Jehowa de rajchte Tiet es, die daut to jäwen, wua du no frajchst. Ons feelt sikj daut veleicht soo, daut Jehowa ons Jebäd fuaz beauntwuaten saul. Oba Jehowa weet emma, wanea de baste Tiet es toom ons halpen (Heb. 4:16). Wan wie daut nich fuaz kjrieen, om waut wie bäden, dan denkj wie veleicht, daut Jehowa ons daut nich jäwen woat. Oba daut kaun sennen, daut hee ons daut bloos lota jäwen well. Een junga Brooda bäd biejlikj doarom, jesunt to woaren. Oba hee wort nich jesunt. Wan Jehowa dän derch een Wunda jeheelt haud, dan wudd de Soton sajen, daut dis Brooda Jehowa wieda deent, wiels hee dän jeheelt haud (Hiob 1:9-11; 2:4). Un dan noch, Jehowa haft aul eene Tiet bestemt, wanea hee aule Krankheiten heelen woat (Jes. 33:24; Opb. 21:3-4). Un ea daut bat doa es, kjenn wie nich doamet räakjnen, daut Jehowa ons derch een Wunda jesunt moaken woat. Soo, dis Brooda kaun leewa Jehowa doarom bäden, daut hee am Krauft un ennaliche Fräd jeft toom siene Krankheit uthoolen un Gott wieda tru deenen. w23.11 24 V. 13

Simson muak eenen grooten Fäla, oba hee jeef doawäajen nich opp. Hee kjikjt wieda doano, woo hee de Oppgow nokomen kunn, waut Jehowa am jejäft haud. Hee sull jäajen de Filista kjamfen (Rech. 16:28-30). Simson säd to Jehowa: “Ekj well mie aun de Filista rajchen”. De woara Gott horcht doano, waut Simson säd, un jeef am siene besondre Krauft trigj. Doaderch muak Simson opp dise Sauz mea Filista doot, aus hee verhäa haud. Wan Simson wäajen sienen Fäla uk sea lieden must, proowd hee doawäajen wieda, Jehowa sienen Wellen to doonen. Wan wie eenen Fäla moaken un doaderch eenen strenjen Rot kjrieen ooda een Väarajcht velieren, sell wie uk nich oppjäwen, wiels Jehowa jeft nich opp met ons (Psa. 103:8-9). Wan wie uk Fäla moaken, Jehowa kaun ons doawäajen Krauft jäwen, sienen Wellen to doonen, soo aus daut bie Simson wia. w23.09 6 V. 15-16

Jehowa es met ons tofräd, wan wie staunthauft sent. Dit meent nich, daut Jehowa daut jefelt, daut wie Schwierichkjeiten un Trubbels haben. Gott haft eenen Jefaulen aun die, wiels du staunthauft blifst. Jeft ons dit nich väl Moot? (Psa. 5:12). Denkj doaraun, daut Abraham bie Gott aunjenäm wia, wiels hee bie Schwierichkjeiten staunthauft bleef. Jehowa säd, daut Abraham sien Frint wia, un tald am fa jerajcht (1. Mo. 15:6; Reem. 4:13, 22). Krakjt soo kaun daut uk bie ons sennen. Aus Gott met ons tofräd es ooda nich, haft nuscht doamet to doonen, woo väl wie em Deenst fa am doonen ooda woo väl Väarajchten wie haben. Daut haft doamet to doonen, daut wie bie Schwierichkjeiten staunthauft bliewen. Wie aula kjennen daut, endoont woo oolt wie sent, met waut wie ons vestonen ooda en waut vonne Loag wie sent. Jeist du nu jroz waut Schwoaret derch un blifst staunthauft? Dan vejät nich, daut Jehowa eenen Jefaulen aun die haft. Wan wie daut weeten, daut wie bie Gott aunjenäm sent, dan woat onse Hopninj aun Jehowa siene Vespräakjungen noch stoakja sennen. w23.12 11 V. 13-14

Een christelja Brooda mott lieren, met aundre fein to räden. Daut meent, daut dee aundre goot toohorchen mott un vestonen mott, waut dee denkjen un feelen (Spr. 20:5). Daut kaun dee derch dän aundren siene Stemm enwoaren un woo dee kjikjt ooda woo dee sikj vehelt. Dit kaust du bloos lieren, wan du met aundre toop best. Oba wan du met aundre bloos derch E-Mail ooda Fon vetalst, dan kaun die daut schwanda sennen, met aundre perseenlich to vetalen. Doawäajen sieekj no Jeläajenheiten toom met aundre perseenlich räden (2. Joh. 12). Een riepa Brooda mott emstaund sennen, fa sikj selfst un fa siene Famielje to sorjen (1. Tim. 5:8). Dauts emma fein, wan eena sikj waut lieet, waut eenem woat halpen, eene Oabeit to finjen (Apj. 18:2-3; 20:34; Efs. 4:28). Strenj die sea aun, flietich to sennen un diene Oppgowen gaunz derchtofieren. Dan woascht du eenen gooden Nomen haben bie aundre un du woascht leichta kjennen eene Oabeit finjen un dee uk hoolen. w23.12 27 V. 12-13

Wan daut enne Bibel von Jehowa sienen Dach rät, dan meent daut soone Tiet, wua Jehowa siene Fiend rechten deit un siene Deena raden deit. Daut haft Jehowa aul foaken jedonen (Jes. 13:1, 6; Hes. 13:5; Zef. 1:8). Jehowa sien Dach en onse Tiet woat doamet aunfangen, daut se jäajen daut Groote Babel komen, un dee woat met dän Kjrich von Harmagedon opphieren. Om disen “Dach” to äwaläwen, mott wie ons nu aul reedmoaken. Jesus säd, daut wie fa de “groote Liedenstiet” motten “reed sennen” – daut meent, wie motten ons ieescht reedmoaken un uk reed bliewen (Mat. 24:21; Luk. 12:40). De Apostel Paulus brukt en sienen ieeschten Breef aun de Tessalonicha waut Jlikjnisen, om de Breeda doa to halpen, reed to sennen fa Gott sien Jerecht. Paulus wist, daut Jehowa sien Dach nich fuaz komen wudd (2. Tes. 2:1-3). Oba hee deed äant doawäajen sea tooroden, daut dee sikj sullen soo doaropp reedmoaken, aus wan dee dän näakjsten Dach komen wudd. Daut es uk een gooda Rot fa ons. w23.06 8 V. 1-2

Aune 1978 buden se en Tokio, Jaupaun, een 60-stockjet Hus. Wiels daut doa soo foaken Ieedbäben jeft, wundaden de Menschen, woo soon huaget Hus wudd kjennen stonen bliewen. De Bumeista hauden daut soo jebut, daut daut faust steit, oba sikj uk jäwen kaun, wan de Ieed schedren wudd. Christen sent een bät soo aus dit Hus. Waut meent daut? Een Christ mott utjejlikjt sennen. Dee mott fauststonen un sikj oba uk jäwen kjennen. Wan daut met Jehowa siene Jesazen to doonen haft, dan mott dee fauststonen un sikj nich omschmieten loten. Dee “es reed to jehorchen” un blift emma tru. Oba noch mol jeft daut Loagen, wua dee mott derchjedocht sennen un “biejäwen” (Jak. 3:17). Een Christ, waut daut jelieet haft, utjejlikjt to sennen, woat nich too strenj sennen, oba uk nich too endoontich. w23.07 14 V. 1-2

Jesus haud jäajen dän Soton to kjamfen, waut am hinjalestich aufproowen wull ooda soogoa jlikjtoo säd, daut hee Gott ontru woaren sull (Mat. 4:1-11). Soton wull, daut Jesus onbedinjt eene Sind bejinkj, daut dee daut Leesjelt nich betolen kunn. En sienen Deenst oppe Ieed wort hee wieda aufjeprooft. Siene Jäajna vefoljden am un wullen am dootmoaken (Luk. 4:28-29; 13:31). Hee must uk met de Onvolkomenheit von siene Nofolja foadich woaren (Mar. 9:33-34). Un aus hee verem Jerecht wia, deeden se am sea vespotten un kjwälen. Dan wort hee opp eene sea grausome Wajch hanjerecht un must soo stoawen, daut et toom Schämen wia (Heb. 12:1-3). Un daut latste Stootskje aun dän Liedenspol must hee noch met sien Schwoaret auleen foadich woaren – onen Jehowa siene Help (Mat. 27:46). Om daut Leesjelt to betolen, haft Jesus secha sea väl must lieden. Kjrie wie doaderch nich eene groote Leew fa am, wan wie doaräwa nodenkjen, waut hee fa ons jedonen haft? w24.01 10-11 V. 7-9

Jeduldich sennen halpt ons, met aundre delenjd to komen, wiels wie dan goot toohorchen, wan aundre räden (Jak. 1:19). Daut halpt ons uk, met aundre Fräd to hoolen. Wan wie jeduldich sent, woa wie nich fuaz doll un sajen uk nich waut, waut aundre beleidjen kaun, wiels wie Stress haben. Un wie woaren uk nich leicht doll, wan aundre ons beleidjen. Enne Städ ons auftorajchnen, woa wie ons unjarenaunda vedroagen un vejäwen (Kol. 3:12-13). Jeduldich sennen kaun ons halpen, bätre Entscheidungen to trafen. Enne Städ daut wie ons fuaz wua nennjäwen, woa wie ons de Tiet nämen toom waut nosieekjen un seenen, waut daut Baste wudd sennen. Wan wie biejlikj no Oabeit sieekjen, kunn wie veleicht fuaz de ieeschte Oabeit aunnämen, waut ons aunjeboden woat. Oba wan wie jeduldich sent, woa wie ons de Tiet nämen toom doaräwa nodenkjen, aus onse Famielje daut em Jeisteljen wudd kjennen toosaten. Wan wie jeduldich sent, kjenn wie daut utem Stich gonen, eene schlajchte Entscheidunk to moaken. w23.08 22 V. 8-9

Wan du die mootloos feelst, wäajen die daut jankat, waut Orrajchtet to doonen, dan denkj doaräwa no, daut du Jehowa een Vespräakjen jejäft hast; daut woat die de Krauft jäwen, daut nich notogonen, wan du aufjeprooft woascht. Woo? Wan du die Jehowa hanjefst, läfst du nich mea fa die selfst. Daut bediet, daut du nich mea diene ieejne Wenschen nojeist, waut Jehowa nich jefaulen (Mat. 16:24). Wan du dan aufjeprooft woascht ooda derch waut Schwoaret jeist, woascht du nich mol doaräwa jreblen, waut du doonen saust. Du woascht die dan gaunz eenich sennen, waut du doonen woascht – daut es Jehowa tru bliewen un am jefaulen. Dan woascht du soo sennen aus Hiob. Wan hee uk waut sea Schwoaret derchjinkj, säd hee oba: “Ekj woa tru bliewen!” (Hiob 27:5). w24.03 9 V. 6-7

Jehowa, de leeftolja Gott, es met ons! (2. Kor. 13:11). Hee es om jiedrem eenen bekjemmat. Wie sent ons secha, daut hee “truhoatje Leew” fa ons haft (Psa. 32:10). Je dolla wie doaräwa nodenkjen, woo hee ons siene Leew jewäsen haft, je dietelja woat ons daut, daut hee om ons bekjemmat es, un je noda kom wie am. Wie kjennen gaunz op to am bäden un am sajen, woo sea ons daut aun siene Leew fält. Wie kjennen am uk sajen, waut ons Sorjen moakt, un ons uk secha sennen, daut hee ons vesteit un daut hee ons jieren halpen well (Psa. 145:19). Krakjt soo aus een Fia ons aun eenen kolden Dach oppwoamt, krakjt soo kaun Jehowa siene Leew ons berujen, wan wie derch Schwoaret gonen. Doawäajen well wie Jehowa siene Leew aunnämen, dee ons berujen un Fräd jäwen kaun. Un well wie aula sajen: “Ekj sie dän HARN goot”! (Psa. 116:1). w24.01 31 V. 19-20

Jesus deed noch mea, aus bloos de Menschen daut sajen, daut Gott sien Nomen Jehowa es. De Juden, dee Jesus lieed, wisten Gott sienen Nomen aul. Oba Jesus wia deejanja, “dee [äant] daut utjelajcht haft, woo de Voda es” (Joh. 1:17-18). Biejlikj sajcht daut en de Hebräische Schreften, daut Jehowa voll Jnod un Metleet es (2. Mo. 34:5-7). Jesus muak dise Lia soo kloa aus noch kjeenmol ea, aus hee daut Jlikjnis von dän veloarnen Sän un sienen Voda vetald. Wan wie daut läsen, woo de Voda sienen Sän, waut eenen Leetsennen haud, von “een langet Enj auf” sach un am entjäajen rand, am ompakt un am von Hoaten vejeef, see wie noch dietelja, woo väl Jnod un Metleet Jehowa haft (Luk. 15:11-32). Jesus muak gaunz dietlich, woo sien Voda werkjlich wia. w24.02 10 V. 8-9

Wan Jehowa wäm treesten deit, waut derch Schwoaret jeit, dan kjricht deejanja fresch Krauft. Woo kjenn wie Jehowa nodoonen un Metjefeel haben un aundre treesten? Wie motten aun soone Ieejenschoften schaufen, waut ons halpen woaren, daut to doonen. Waut sent daut biejlikj fa Ieejenschoften? Daut wie de Leew bewoaren kjennen, waut ons halpt, ons unjarenaunda wieda to treesten, mott wie biejlikj doaraun schaufen, Metleet to haben, ons unjarenaunda goot to sennen un leeftolich to sennen (Kol. 3:12; 1. Tes. 4:18; 1. Pet. 3:8). Woo woaren ons dise Ieejenschoften halpen? Wan wie soo met onse Breeda un Sestren metfeelen un werkjlich om dee bekjemmat sent, dan woa wie nich aundasch kjennen, aus daut wie dee treesten wellen, wan dee derch Schwoaret gonen. Dauts krakjt soo, aus Jesus säd: “Von waut daut Hoat voll es, rät daut Mul. De gooda Mensch holt von daut Goode, waut hee sikj oppbewoat haft, goode Sachen rut” (Mat. 12:34-35). Onse Breeda un Sestren to treesten es werkjlich eene sea goode Wajch, dee onse Leew to wiesen. w23.11 10 V. 10-11

Wan wie biblische Profezeiungen vestonen wellen, dan mott wie no Help froagen. See wie mol een Biespel. Denkj mol han, du foascht opp eene Städ, waut du nich kjanst. Oba du hast eenen Frint met, waut met dise Omjäajent goot bekaunt es. Hee weet krakjt, wua du best un wua jieda Wajch hanjeit. Gaunz secha best du schaftich, daut dien Frint reed wia, met die mettokomen. Krakjt soo weet Jehowa, en waut vonne Tiet wie läwen un waut noch ver ons es. Om Profezeiungen to vestonen, mott wie aulsoo deemootich sennen un Jehowa no Help froagen (Dan. 2:28; 2. Pet. 1:19-20). Krakjt soo aus aule goode Elren well Jehowa, daut siene Kjinja eene scheene Hopninj haben (Jer. 29:11). Oba waut Elren nich doonen kjennen, es verutsajen, waut noch komen woat; oba Jehowa kaun daut gaunz krakjt. Doawäajen haft hee en sien Wuat loten Profezeiungen oppschriewen, daut wie weeten kjennen, waut vonne wichtje Sachen lota komen woaren (Jes. 46:10). w23.08 8 V. 3-4