Khalani odekha, Yahova ankukondwa namwe

1. Ko Atumiki anango wa Yahova achadekana kulimbana na maganizo yaponi?

NI VOLIMBIKISA maninge kudziwa vomwe viri pa lemba ya Salimo 149:4. Pa lemba mweyi Baibolo inena kuti: ‘Yahova akondwa na wanthu wake.’ Koma nthawe zinango anango akhala okwinyirira akambaganiza kuti: ‘Ko inepano panekha ndine wodekana kwa Yahova?’ Koma olo atumiki azinji okhulupirika wa Yahova podiya wa nthawe yakumbuyo, ambalimbanambo na maganizo yoipa mwaya.—1 Sam. 1:6-10; Yobu 29:2, 4; Sal. 51:11.

2. Ko mbani angakhale obvumizika kwa Yahova?

² Baibolo ifotokoza mobveka bwino kuti wanthu alibe ungwiro angakwanise kukondweresa Yahova na kukhala obvumizika kwa iye. Mwanjira yanyi? Tichadekana kuwonesa kuti tikhulupirira Yesu Khrisitu na kubatizika. (Yoh. 3:16) Mwanjira mweyi tiwonesa pagulu kuti talapa machimo yathu na kuti tamupolomisa Yahova kuti timbachite chifuniro chake. (Mac. 2:38; 3:19) Yahova akhala wokondwa maninge tikambachita vimwevi kuti timufenderere. Pomwe tinkuyesesa kuchita vomwe tingakwanise kuti tikwanirise lumbiro yomwe tidachita tidzakhale obvumizika kwa Yahova ndipo adzatione ninge azishamwali wake chaiwo.—Sal. 25:14.

3. Ko tipfunzire chani mu nkhani mweyi?

³ Ndawa chani anango aganiza kuti Yahova akondwalini nawo? Ko Yahova achita chani kuti awonese kuti ndise obvumizika kwa iye? Ko isepano tingalimbise tani chikhulupiriro chathu chakuti Yahova ankukondwa nase?

NDAWA CHANI ANANGO AGANIZA KUTI YAHOVA ANKUKONDWALINI NAWO?

4-5. Podiya mudziona kuti ndimwe osafunika, ko mungatsimikizire va chani?

⁴ Azinji mwa isepano tikhala na maganizo yodziona kuti ndise osafunika kundoyambira tiri wana. (Sal. 88:15) M’bale munango dzina yake Adrián adati: “Inepano nthawe zose nimbaganiza kuti ndine wosafunika ne pang’ono. Chinthu chakuyamba nimbandoganiza kuti nimbapemphere kuti azibale wangu adzangene mu dziko inyowani, koma inepano panekha nimbadziwona kuti ndine wosafunika kuti nidzangene mu dziko inyowani.” M’bale munango dzina yake Tony, yemwe alibe kukulira nchonadi adati: “Azibereki wangu akanati aniuzako kuti anikonda, olo kuniuzako kuti ameka nane, nthawe zose iwo ambawonesa kuti nimbadekana kuchita vinthu vabwino kuposha vomwe nimbachita.”

⁵ Peno imwepo nthawe zinango mudzibva kuti ndimwe osafunika, kumbukirani kuti ni Yahova chaiye osati munthu munango yemwe adakusalulani kuti mumutumikire. (Yoh. 6:44) Yahova awona vinthu vabwino kwa munthu aliyese. Iye adziwa bwino ntima wathu. Momwe ationera ndimolini momwe isepano tidziwonera. (1 Sam. 16:7; 2 Mbiri 6:30) Manje tingatsimikize kuti Yahova akuwonani kuti ndimwe odekana maninge.—1 Yoh. 3:19, 20.

6. Ko Paulo ambabva tani akaganizira machimo yake?

⁶ Tikanati tapfunzira chonadi anango wa isepano tenze tidachita vinthu vomwe vitichitisa kuti manjeuno timbadziyimbe mulandu. (1 Pet. 4:3) Ndipo anango omwe akhala ankutumikira Yahova mokhulupirika kwa nthawe ikulu, angambalimbanembo na vofoka vinango. Manje tani imwepo? Nthawe zinango mungambaganize kuti Yahova alibe kukhululuka. Peno nteno, ni vabwino kukumbukira kuti olo atumiki wa Yahova wakalekale ambalimbanambo na maganizo yoipa mwaya. Mwakulinganiza, mtumi Paulo akambaganizira va vophonya vake ambadzibva wosafunika. (Aro. 7:24) Ni shuwadi kuti Paulo adalapa machimo yake ndipo adabatiziwa, olo nteno iye ambadziona kuti ‘ni wosafunika pakulinganiza na atumi ose’ ndipo ambadziona kuti ni wochimwa ‘maninge.’—1 Akor. 15:9; 1 Tim. 1:15.

7. Ko tichadekana kukumbukira va chani?

⁷ Yahova ankupolomisa kuti peno talapa, iye adzatikhululukire. (Sal. 86:5) Ndipomwapa tikalapadi machimo yomwe tidachita, tidzakhale na chitsimikizo chakuti Yahova adatikhululukira.—Akol. 2:13.

8-9. Ko tingalimbane tani na maganizo yakudziona kuti tinkuchitalini vizinji kuti tikondwerese Yahova?

⁸ Tose isepano tinkufuna kutumikira Yahova momwe tingakwanisire. Koma nthawe zinango tingambadzibve kuti tinkuchitalini vizinji kuti tikhale obvumizika kwa Yahova. Mulongo munango dzina yake Amanda adalewa kuti: “Inepano nimbaganiza kuti kupereka kwa Yahova vinthu vomwe ningakwanise kutanthauza nthawe zose kuchita vizinji. Ndipomwapa nimbadzikakamiza kuti nimbachite vizinji kuposha vomwe ningakwanise. Ndipo ‘nikakangira’ nimbakhumudwa ndipo nimbaganiza kuti Yahova wakhumudwambo.”

⁹ Ko tingamalise tani maganizo yakuti tinkuchitalini vizinji kuti tikondwerese Yahova? Kumbukirani kuti Yahova ambandonyang’anisisalini vomwe tinkuchita ndipo ni wosashupa. Iye atikumbiralini vinthu vizinji vomwe isepano tingakwaniselini kuvichita. Iye achalemekeza chilichose chomwe isepano takwanisa kuchita kundoyambira pomwe tinkuyesesa kuchita vomwe tingakwanise. Kuyingiziramwapa imwepo mungambaganizire vitsanzo va m’Baibolo va wanthu omwe adatumikira Yahova na ntima wose. Ganizirani chitsanzo cha Paulo, iye adaphata basa kwa magole yazinji, kufamba misenga ya makilometro mamidyau yazinji pa kuthandiza kukhazikisa mipingu yazinji. Koma pomwe vinthu vidachinja pa moyo wake iye ambakwanisalini kulalikira maninge ninge momwe ambachitira pa kuyamba. Ko Yahova adaleka kutembeja vomwe iye ambachita? Neye. Paulo adapitiriza kuchita vomwe angakwanise ndipo Yahova adamudalisa. (Mac. 28:30, 31) Mwanjira ibodzibodzi, vomwe tinkuchita kwa Yahova vingachinje kuyenda kwa nthawe. Koma chodekana maninge ni chinthu chomwe chitichitisa vimwevi. Manje naboni tiwone momwe Yahova atitsimikizirira kuti ndisedi obvumizika kwa iye.

MOMWE YAHOVA ATIWONESERA KUTI NDISE OBVUMIZIKA

10. Ko tingabve tani ‘mawu’ ya Yahova yakuti ndise obvumizika kwa iye? (Yohane 16:27)

¹⁰ Pakuphatisa basa Baibolo. Nthawe zose Yahova anyang’ana njira yowonesera atumiki wake kuti awakonda nakuti ni wokondwa maninge na vomwe iwo achachita. Baibolo ifotokoza va vochitika viwiri pomwe Yahova adauza Yesu kuti iye ni mwana wake wokondewa na wobvumizika. (Mat. 3:17; 17:5) Ko imwepo munkufunambo kuti Yahova ambakuwoneni tene? Ntsiku zino Yahova ayankhulalini na wanthu maso na maso. Koma iye ayankhula pakuphatisa basa Baibolo. Tingakwanise ‘kubva’ mawu ya Yahova yakuti ndise obvumizika kwa iye tikambawerenga mawu ya Yesu ya ntontholo wabwino. (Werengani Yohane 16:27.) Yesu adatewedzera mosaphonyesa makhalidwe ya Ababa wake. Manje tikambawerenga mawu yachifundo ya Yesu, yomwe iye adanena kwa wanthu ochimwa tingakwanise kudziwa kuti ni Yahova chaiye yemwe ankuyankhula mawu mwaya kwa isepano.—Yoh. 15:9, 15.

11. Ko ndawa chani kugumana na mabvuto kutanthauzalini kuti tasiya kukhala obvumizika kwa Yahova? (Yakobo 1:12)

¹¹ Vomwe iye achachita. Yahova nthawe zose ni wokonzeka kutithandiza pakutipasa vinthu vomwe tinkufunikira mwakuthupi. Nthawe zinango Yahova angabvume kuti tilimbane na bvuto inango ninge momwe vidachitikira na Yobu. (Yobu 1:8-11) Koma tikambagumana na mabvuto vinkutanthauzalini kuti tasiya kukhala obvumizika kwa Yahova. Ni vosiyana maninge, moyu ni mwayi wowonesa chikondi chathu kwa Mulungu na chikhulupiriro chathu kwa iye. (Werengani Yakobo 1:12.) Ndipo isepano tidzakwanise kuwona chikondi na mphanvu za Yahova pakuona thandizo yomwe iye atipasa kuti tikwanise kupirira.

12. Ko tingapfunzire chani pa chitsanzo cha Dmitrii?

¹² Onani chitsanzo cha m’bale munango waku Asia dzina yake Dmitrii. Iye adaluza basa yake ndipo padapita minyezi yazinji akanati wagumana basa inango. Ndipo adayamba kuganiza vogumanika kawirikawiri mu umboni, mwanjira mweyi iye adawonesa kuti achathemba Yahova. Minyezi yadapita ndipo basa imbagumanikalini. Patsogolo pake iye adayamba kukhala na bvuto ya thanzi ndipo vidafika mpaka nkumbandokhala ali gone pa mbeda. Iye adayamba kudzibva kuti ni wosafunika ninge mwamuna na baba. Ndipo nthawe zinango iye ambaganizira kuti panango adaleka kukhala wobvumizika kwa Yahova. Ntsiku inango usiku mwana wake nkazi adayenda pa mbeda pake ndipo adanyamula katsamba kanango komwe kenze na mawu ya pa lemba ya Yesaya 30:15, pomwe panena kuti: ‘Mudzakhale wamphanvu mukakhala osagunduzika na wachikhulupiriro.’ Pamwapo mwana muyo adati: “Ababa mukakhala wokwinyirira mumbakumbukire lemba mweyi mwa!” Dmitrii adabvesa kuti ndawa ya thandizo ya Yahova banja yake yenze na chakudya chokwana, vovala na malo yokhala. Iye adanena kuti: “Chinthu chomwe nimbadekana kuchita ni kukhala wosagunduzika na kupitiriza kuthemba Mulungu wangu.” Peno munkulimbana na mabvuto ninge mwaya thembani kuti Yahova adzakusamalireni imwepo kuti mukwanise kupirira.

13. Ko Yahova angaphatisire basa mbani pakutiwonesa kuti ndise obvumizika kwa iye?

¹³ Pakuphatisa basa abale na alongo. Yahova aphatisa basa abale na alongo pakufuna kutiwonesa kuti ndise obvumizika kwa iye. Mwakulinganiza, angachitise munthu kuti ayankhule mawu yabwino komasoti yolimbikisa kwa isepano pa nthawe yake. Ni vimweviretu vomwe vidachitikira mulongo munango waku Asia pa nthawe yomwe iye ambalimbana na nkhawa. Iye wenze adaluza basa yake ndipo wenze adadwala maninge. Mwamuna wake adachita chimo ikulu ndipo adasiya kutumikira ninge nkulu. Iye adanena kuti: “Nimbadziwalini kuti ndawa chani vose vimwevi vimbanichitikira ndipo nidayamba kuganiza kuti panango nenze nidachita chinthu choipa ndipo Yahova wakhumudwa nane.” Mulongo moyu adapemphera kwa Yahova kukumbira kuti amuonese peno amukondadi. Ko Yahova adachita chani? Iye adati: “Akulu wa mumpingu adacheza nane ndipo adanitsimikizira kuti Yahova anikonda maninge.” Nthawe pang’ono patsogolo pake iye adakumbira pomwe thandizo kwa Yahova. Iye adati: “Ntsiku mweyo yomwe nidapemphera kwa Yahova inepano nidatambira kalata ya abale wa mumpingu. Pomwe nimbawerenga kalata yolimbikisa mweire inepano nidawona kuti Yahova adanibva.” Nthawe zizinji Yahova atiwonesa kuti atikonda pakuphatisa basa mawu yachikondi yomwe anango angatiuze.—Sal. 10:17.

14. Ko ni njira inango iponi yomwe Yahova atiwonesera kuti ndise obvumizika kwa iye?

¹⁴ Yahova atiwonesa kuti ndise obvumizika pakuphatisa basa abale kuti atipase malangizo yomwe tinkudekana. Mwakulinganiza, Yahova adauzira mtumi Paulo kuti anembe makalata 14 yomwe adayatumiza mumipingu. M’makalata mwaya Paulo adapereka malangizo yolimbikisa komasoti yamphanvu. Koma ndawa chani Yahova adauzira Paulo kuti anembe malangizo mwaya? Ndawa yakuti Yahova ni Baba wachikondi chikulu. Iye alangiza wana wake ‘omwe awakonda.’ (Miy. 3:11, 12) Manje tikatambira malangizo yochokera m’Baibolo, vimwevi vitanthauzalini kuti tasiya kukhala obvumizika kwa Yahova koma viwonesa kuti iye atikonda. (Aheb. 12:6) Ni njira zinango ziponi zomwe Yahova atiwonesera kuti atinkonda?

MAUBONI YANANGO YOMWE YAWONESA KUTI YAHOVA ATIKONDA

15. Ko ni mbani angatambire mzimu uchena ndipo vimwevi vinkutitsimikizira va chani?

¹⁵ Yahova apereka mzimu uchena kwa wanthu omwe ni obvumizika. (Mat. 12:18) Tingadzibvunze kuti, ‘ko inepano nichakwanisa kuwonesa makhalidwe ya mzimu uchena pa moyo wangu?’ Ko manjeuno ndine wodekha kuposha pa nthawe yomwe nidakhala wa Mboni za Yahova? Pomwe munkukulisa makhalidwe yabwino ya mzimu uchena, mudzakhale otsimikiza maninge kuti ndimwe obvumizika kwa Yahova!—Onani bokosi yakuti “Vipatso va mzimu ni . . . ”

16. Ko Yahova aphatisira basa mbani kuti alalikire ntontholo wabwino, ndipo mudzibva tani mukambadziwa mwevi? (1 Atesalonika 2:4)

¹⁶ Kuti akwanirise basa yodekana maninge yolalikira ntontholo wabwino, Yahova achathemba wale omwe ni obvumizika kwa iye. (Werengani 1 Atesalonika 2:4.) Onani momwe mulongo munango dzina yake Jocelyn adathandiziriwa ndawa yogumanika mu umboni. Ntsiku inango Jocelyn adamuka ali wofoka maninge. Iye adanena kuti: “Nimbadzibva wofoka ndipo nimbadziwona kuti nilibe na basa. Koma nenze mpainiya ndipo yenze pomwe ntsiku yakuti niyende mu umboni. Pamwapo nidapemphera ndipo nidayenda mu umboni.” Ntsiku mweyo machibese Jocelyn adadziwana na Mary, nkazi wodzichepesa ndipo adabvuma pfunziro ya Baibolo. Minyezi patsogolo pake Mary adanena kuti iye ambapemphera kwa Mulungu kukumbira thandizo pa nthawe yomwe Jocelyn adagogodza pa nsuwo wa nyumba yake. Ko Jocelyn adapfunzira chani pa chitsanzo mwechi? Iye adati: “Nidabva ninge Yahova ankuniuza kuti ‘iwepo ndiwe wobvumizika kwa inepano.’” Ni shuwadi kuti ni wanthulini ose omwe angabvume ulaliki wathu, koma tingakhale otsimikiza kuti Yahova akhala wokondwa maninge tikambachita vomwe tingakwanise kuti tiuze wanthu anango ntontholo wabwino.

17. Ko mwapfunzira chani pa chitsanzo cha Vicky pa nkhani ya dipo? (Salimo 5:12)

¹⁷ Yahova adapereka dipo pakufuna kuthandiza wale omwe ni obvumizika kwa iye. (1 Tim. 2:5, 6) Manje ko tani peno mu ntima mwanu mutsimikiziralini kuti ndimwe obvumizika kwa Yahova podiya kuti mukhulupirira dipo komasoti mudabatizika? Ganizirani ivi, tichadekanalini nthawe zose kumbathemba maganizo yathu. Koma tichadekana kuthemba Yahova. Kwa iye wanthu omwe akhulupirira dipo angawonewe kuti ni olungama pa maso pake ndipo iye ankupolomisa kuti adzawadalise. (Werengani Salimo 5:12; Aro. 3:26) Mulongo munango dzina yake Vicky adabvesa ubwino woganizira va ubwino wa dipo. Iye adati: “Inepano nidaganizira kuti Yahova ambawonesa kudekha kwa inepano kwa nthawe ikulu. . . . Koma chaivo ni vakuti nimbamunena kuti: ‘Dipo ya mwana wanu ni yosakwana kuti machimo yangu yangakhululukiriwe.’” Pomwe Vicky ambaganizira va mphaso ikulu ya dipo iye adayamba kudzibva kuti Yahova amukonda. Isepanombo tingadzibve kuti tikondewa na Yahova na kubva kuti ndise obvumizika kwa iye tikambaganizira va dipo.

18. Ko tingakhale na chitsimikizo chiponi tikapitiriza kukonda Ababa wathu wakudzulu?

¹⁸ Ni shuwadi kuti olo tichichita khama kuti tichite vose vomwe viri mu pfunziro mweyi, vingachitike kuti nthawe zinango tingambadzibve okhumudwa, nkumbakayikira kuti ndise obvumizika kwa Yahova. Vimwevi vikachitika kumbukirani kuti Yahova akonda ‘wanthu omwe ankupitiriza kumukonda.’ (Yak. 1:12) Pitirizani kumufenderera Yahova ndipo yesesani kubvesa njira zose zomwe iye awonesera kuti ndimwe obvumizika kwa iye ndipo ayi kuyebwa kuti Yahova ‘ali pafupi na aliyese payekha.’—Mac. 17:27.