Why Nao Iumi Shud Fraet lo Jehovah?

1-2. Olsem Psalm 25:14 storyim, wat nao iumi mas duim if iumi laekem Jehovah for kamap klos fren blo iumi?

WAT nao samfala important wei wea iu tingse iu need for garem if iu laekem samwan for klos fren blo iu? Maet iu bae sei olketa gud frens shud lovem and sapotim each other. Maet iu no ting dat wei for fraet hem important for wanfala gud frenship. Bat olsem theme scripture blo disfala article storyim, samwan wea laekem Jehovah for kamap klos fren blo hem, hem mas “fraet lo Jehovah.”​—Readim Psalm 25:14.b

² Nomata iumi bin servem Jehovah for longtaem, iumi evriwan need for garem stretfala wei for fraet lo Jehovah. Bat wat nao hem minim for fraet lo God? Hao nao iumi savve lane for fraet lo Jehovah? Wat nao iumi savve lanem abaotem wei for fraet lo God from example blo Obadiah wea in charge lo palace blo King Ahab, Hae Priest Jehoiada, and King Jehoash?

WAT NAO HEM MINIM FOR FRAET LO GOD?

3. Storyim wat nao savve mekem iumi for fraet and hao datwan savve affectim iumi.

³ Maet iumi savve fraet if iumi luksavve nogud samting bae happen lo iumi. Diswan hem stretfala wei for fraet and hem savve helpem iumi for mekem wise disison. For example, from iumi fraet nogud iumi foldaon, iumi no wakabaot klosap tumas lo edge blo wanfala klif. From iumi fraet nogud iumi garekil, iumi ranawe from wanfala dangerous situation. From iumi fraet nogud iumi spoelem frenship blo iumi witim samwan wea iumi lovem, iumi no talem or duim samting wea bae mekem hem feel nogud.

4. Wat kaen wei for fraet lo Jehovah nao Satan laekem iumi for garem?

⁴ Satan laekem pipol for no garem stretfala wei for fraet lo Jehovah. Satan promotim idea blo Eliphaz wea sei Jehovah hem man for kros, hem laek for panisim iumi, and hard for eniwan mekem hem hapi. (Job 4:18, 19) Satan laekem iumi for fraetem tumas Jehovah gogo iumi stop for worshipim Jehovah. For no foldaon lo datfala trap, iumi need for garem stretfala wei for fraet lo God.

5. Wat nao hem minim for fraet lo God?

⁵ Samwan wea fraet lo God lo stretfala wei hem lovem God and no laek duim eniting wea bae spoelem frenship blo hem witim God. Jesus garem datkaen wei for “fraet lo God.” (Heb. 5:7) No enitaem Jesus garem negative wei for fraet lo Jehovah. (Isa. 11:2, 3) Bat hem barava lovem Jehovah and laek for obeyim hem. (John 14:21, 31) Olsem Jesus, iumi barava respectim and tinghae lo Jehovah bikos hem garem love, wisdom, justice, and bigfala paoa. Iumi savve tu Jehovah barava lovem iumi, and wanem iumi duim for followim teaching blo hem savve affectim hem. Iumi savve mekem Jehovah feel sorre or mekem heart blo hem hapi.​—Ps. 78:41; Prov. 27:11.

LANE FOR FRAET LO GOD

6. Wat nao wanfala wei wea iumi savve lane for fraet lo God? (Sams 34:11, SIPB)

⁶ From iumi no born witim wei for fraet lo Jehovah, iumi mas lane for duim datwan. (Readim Sams 34:11, SIPB.) Wanfala wei for duim datwan, hem for ting abaotem creation. Taem iumi luksavve creation blo God showim wisdom, paoa, and bigfala love blo hem for iumi, datwan mekem iumi for barava respectim and lovem hem. (Rome 1:20) Sista Adrienne sei: “Taem mi lukluk lo evriting wea Jehovah wakem and lukim hao Hem wise tumas, datwan helpem mi for luksavve Jehovah savve lo wanem hem best for mi.” From hem evritaem ting abaotem diswan, hem sei: “Why nao bae mi laek for duim eniting for spoelem frenship blo mi witim Jehovah wea givim mi laef?” Hao if iu spendem enitaem dis week for ting abaotem wanfala creation blo Jehovah? Taem iu duim olsem, bae iu barava respectim and lovem Jehovah.​—Ps. 111:2, 3.

7. Hao nao prea savve helpem iumi for lane for fraet lo Jehovah?

⁷ Narafala wei iumi savve lane for fraet lo God, hem for prea evritaem. Each taem iumi prea lo Jehovah, iumi bae savve gud lo hem. For example, evritaem iumi askem Jehovah for strongim iumi for deal witim eni hard taem, datwan remindim iumi lo bigfala paoa blo hem. Taem iumi prea for talem thankiu for givim kam Son blo hem, datwan mekem iumi tingim hao hem lovem iumi. And taem iumi begim Jehovah for helpem iumi witim wanfala problem, iumi tingim hao hem barava wise. Olketa prea olsem helpem iumi for barava respectim Jehovah, and strongim iumi for no duim eniting wea bae spoelem frenship blo iumi witim hem.

8. Wat nao iumi savve duim for gohed fraet lo God?

⁸ Iumi savve gohed fraet lo God taem iumi studyim Bible witim aim for lane from olketa gud and nogud example wea Bible storyim. Distaem bae iumi storyim tufala faithful servant blo Jehovah: Obadiah, wea in charge lo palace blo King Ahab and Hae Priest Jehoiada. Then bae iumi storyim wanem iumi savve lanem from King Jehoash blo Judah wea hem gohed gud firstaem, bat gogo hem lusim Jehovah.

BRAVE OLSEM OBADIAH WEA FRAET LO GOD

9. Hao nao wei for fraet lo Jehovah helpem Obadiah? (1 Kings 18:3, 12)

⁹ Lo firstaem wea Bible storyim Obadiahc hem sei: “Obadiah hem man wea fraet lo Jehovah.” (Readim 1 Kings 18:3, 12.) Hao nao wei wea Obadiah fraet lo Jehovah helpem hem? From hem honest and pipol trustim hem, king appointim hem for in charge lo palace blo hem. (Comparem Nehemiah 7:2.) From Obadiah fraet lo God hem barava brave. Datwan hem important bikos hem stap lo taem wea King Ahab hem rul. Ahab “duim samting wea nogud lo eye blo Jehovah, wea worse winim olketa [king] wea rul firstaem lo hem.” (1 Ki. 16:30) And tu, Jezebel, waef blo Ahab wea worshipim Baal, heitim tumas Jehovah so hem trae for finisim tru worship lo ten-tribe kingdom lo Israel. Hem killim dae tu staka profet blo God. (1 Ki. 18:4) Tru nao, Obadiah worshipim Jehovah lo taem wea barava no isi.

10. Wat nao Obadiah duim wea showim hem barava brave?

¹⁰ Wat nao Obadiah duim wea showim hem barava brave? Taem Jezebel lukaotem olketa profet blo God for killim olketa dae, Obadiah tekem 100 lo olketa profet hia and haedem “50 lo wanfala cave, and nara 50 lo nara cave and gohed provaedem kaikai and wata for olketa.” (1 Ki. 18:13, 14) If Jezebel faendaot, hem bae killim dae Obadiah. Obadiah hem human being nomoa and hem no laek for dae tu. Bat Obadiah lovem Jehovah and olketa wea worshipim God winim laef blo hemseleva.

11. Hao nao olketa servant blo Jehovah distaem olsem Obadiah? (Lukim tu piksa.)

¹¹ Distaem staka servant blo Jehovah stap lo olketa kantri wea gavman banim waka blo iumi. Olsem Obadiah, olketa brata and sista hia showim respect lo olketa wea garem paoa, bat olketa no stop for worshipim Jehovah. (Matt. 22:21) Olketa showim olketa fraet lo God taem olketa obeyim God winim olketa man. (Acts 5:29) Olketa gohed for preach and duim olketa meeting lo secret wei. (Matt. 10:16, 28) And olketa mek sure olketa brata and sista kasem spiritual kaikai wea olketa needim. Tingim example blo Henri wea stap lo wanfala kantri lo Africa wea gavman banim waka blo iumi for samfala taem. Lo datfala taem Henri volunteer for givimaot spiritual kaikai lo olketa nara Witness. Henri sei: “Mi man for shame. So mi barava sure from mi garem big respect for Jehovah datwan nao mekem mi for brave.” Hao, bae iu savve brave olsem Henri? Iu savve brave, if iu garem stretfala wei for fraet lo God.

LOYAL OLSEM HAE PRIEST JEHOIADA WEA FRAET LO GOD

12. Wat nao Hae Priest Jehoiada and waef blo hem duim wea showim tufala barava loyal lo Jehovah?

¹² Hae Priest Jehoiada fraet lo Jehovah, and datwan mekem hem loyal lo Jehovah and sapotim tru worship. Datwan showaot klia taem dota blo Jezebel, Athaliah, mekem hemseleva for kamap queen lo Judah. Pipol garem reason for fraetem Athaliah. Hem raf tumas and hangere for paoa, so hem trae for killim dae evriwan lo laen blo king, wea hem olketa granson blo hem. (2 Chron. 22:10, 11) Jehoash, wanfala granson blo hem laef bikos waef blo Jehoiada, Jehoshabeath rescuim hem. Jehoshabeath and hasband haedem datfala pikinini and lukaftarem. From datwan, Jehoiada and Jehoshabeath help for protectim laen blo olketa king wea born lo laen blo King David. Jehoiada wea olo finis loyal lo Jehovah and nating fraetem Athaliah.​—Prov. 29:25.

13. Taem Jehoash seven years, wat nao nara samting wea Jehoiada duim wea pruvim hem loyal lo Jehovah?

¹³ Taem Jehoash seven years, Jehoiada duim nara samting wea pruvim hem loyal lo Jehovah. Hem mekem wanfala plan. If datfala plan succeed, Jehoash wea kam from laen blo David bae kamap king. Bat if datfala plan fail, for sure bae olketa killim dae Jehoiada. Jehovah blessim datfala plan and hem succeed. Olketa leader and olketa Levite sapotim Jehoiada and mekem Jehoash kamap king and olketa killim dae Athaliah. (2 Chron. 23:1-5, 11, 12, 15; 24:1) Then Jehoiada “mekem wanfala agreement witim Jehovah and king, and olketa pipol, mekem olketa gohed stap olsem pipol blo Jehovah.” (2 Ki. 11:17) Jehoiada “putim tu olketa wea gaedem gate for gaedem olketa gate lo haos blo Jehovah, mekem eniwan wea no klin no savve kam insaed.”​—2 Chron. 23:19.

14. Hao nao Jehovah showim hem tinghae lo Jehoiada?

¹⁴ Olsem Jehovah talem finis: “Olketa wea tinghae lo mi bae mi tinghae lo olketa.” Tru nao, Jehovah rewardim Jehoiada. (1 Sam. 2:30) For example, hem mek sure story blo Jehoiada stap lo Bible mekem iumi savve lane from datwan. (Rome 15:4) And taem Jehoiada dae hem kasem spesol privilege for olketa berem hem “lo Taon blo David witim olketa king, bikos hem duim gud samting lo Israel for tru God and for haos blo Hem.”​—2 Chron. 24:15, 16.

15. Wat nao iumi savve lanem from story blo Jehoiada? (Lukim tu piksa.)

¹⁵ Story blo Jehoiada savve helpem iumi evriwan for lane for fraet lo God. Olketa Christian overseer savve followim example blo Jehoiada for redi and loyal for protectim sheepsheep blo God. (Acts 20:28) Olketa olo savve lane from example blo Jehoiada dat taem olketa fraet lo Jehovah and gohed loyal, Jehovah savve iusim olketa for duim samting wea hem laekem. Olketa still important lo hem. Olketa young wan savve lane from hao Jehovah treatim Jehoiada, and followim example blo Jehovah lo hao hem treatim olketa olo witim respect, especially olketa wea worshipim Jehovah for longtaem finis. (Prov. 16:31) And iumi evriwan savve lane from olketa leader and Levite wea sapotim Jehoiada. Iumi laek for loyal for sapotim ‘olketa wea lead’ taem iumi obeyim olketa.​—Heb. 13:17.

NO OLSEM KING JEHOASH

16. Wat nao showim King Jehoash hem man wea nating strong for servem Jehovah?

¹⁶ Jehoiada helpem King Jehoash for duim stret samting. (2 Ki. 12:2) From datwan, datfala young king laek for mekem Jehovah hapi. Bat bihaen Jehoiada dae, Jehoash lisin lo olketa prince wea kamap apostate. Bikos lo datwan, Jehoash and pipol “start for worshipim olketa post for worship and olketa idol.” (2 Chron. 24:4, 17, 18) Jehovah barava feel nogud, so hem “gohed for sendem olketa profet blo hem for helpem olketa kam bak lo hem . . . , bat olketa no laek for lisin.” Olketa les for lisin tu lo Zechariah son blo Jehoiada, wea hem profet and priest blo Jehovah and hem kasin blo Jehoash. Tru nao, King Jehoash nating tinghae lo wanem famili blo Zechariah duim for protectim hem, and hem killim dae Zechariah.​—2 Chron. 22:11; 24:19-22.

17. Wat nao happen lo Jehoash?

¹⁷ Jehoash no gohed garem stretfala wei for fraet lo Jehovah, so hem kasem nogud samting. Jehovah talem finis: “Olketa wea nating obeyim mi, bae mi les lo olketa.” (1 Sam. 2:30) Bihaen, wanfala smol army blo Syria winim “bigfala army” blo Jehoash, and Jehoash “garekil nogud.” Bihaen army blo Syria go bak, olketa servant blo Jehoash killim hem dae bikos hem killim dae Zechariah. Pipol no tinghae lo datfala wicked king tu, so “olketa no berem hem lo olketa burial ples blo olketa king.”​—2 Chron. 24:23-25; lukim “son of Barachiah” lo study note blo Matthew 23:35 lo English.

18. Olsem Jeremiah 17:7, 8 storyim, wat nao iumi savve duim for no olsem Jehoash?

¹⁸ Wat nao iumi savve lanem from example blo Jehoash? Jehoash hem olsem tree wea rut blo hem no go daon deep and needim stik for sapotim hem. Taem Jehoiada wea olsem datfala stik, hem dae, toktok blo olketa apostate wea olsem strong wind mekem Jehoash foldaon. Diswan showimaot klia hao wei wea iumi fraet lo God mas no depend lo sapot blo olketa nara Christian and famili member. For iumi gohed strong lo spiritual wei, iumiseleva mas strongim love and respect for God taem iumi evritaem duim personal study, ting raonem samting, and prea.​—Readim Jeremiah 17:7, 8; Col. 2:6, 7.

19. Wat nao Jehovah askem lo iumi?

¹⁹ Jehovah no askem tumas samting lo iumi. Wat hem askem nomoa Ecclesiastes 12:13 storyim. Hem sei: “Fraet lo trufala God and obeyim olketa law blo hem. Diswan nao hem wanem man mas duim.” Taem iumi fraet lo God, iumi savve feisim eni test lo future, and bae iumi olsem Obadiah and Jehoiada wea gohed loyal lo Jehovah. No eni samting savve spoelem frenship blo iumi witim Jehovah.