Waswe, Iu Redi for Bigfala Trabol?

1. Why nao hem wise for redi for olketa disaster?

FOR redi firstaem hem savve sevem laef. For example, taem wanfala disaster happen, pipol wea redi firstaem nao garem hae chance for sef and helpem olketa narawan. Wanfala humanitarian organization lo Europe sei: “For redi gud firstaem, datwan savve sevem laef.”

2. Why nao iumi shud redi for datfala big trabol? (Matthew 24:44)

² “Bigfala trabol” bae seknomoa hem start. (Matt. 24:21) Nomata olsem, iumi savve finis datfala big trabol bae happen, no olsem olketa nara disaster wea iumi no expectim. Samting olsem 2,000 year go finis, Jesus warnim olketa follower blo hem for redi for datfala day. (Readim Matthew 24:44.) If iumi redi, bae hem isi for iumi deal witim datfala hard taem and for helpem olketa narawan for duim sem samting.​—Luke 21:36.

3. Hao nao wei for no givap, sorre lo narawan, and love savve helpem iumi for redi for bigfala trabol?

³ Iumi need for garem thrifala fasin wea savve helpem iumi for redi for datfala big trabol. If olketa talem iumi for preachim datfala strong judgment message and pipol againstim iumi, wat nao bae iumi duim? (Rev. 16:21) Iumi need for no givap mekem iumi obeyim Jehovah, and trustim hao hem bae protectim iumi. If olketa brata and sista lusim samfala or evri material samting, wat nao bae iumi duim? (Hab. 3:17, 18) Iumi need for sorre lo olketa mekem iumi helpem olketa witim wat olketa needim. Taem olketa nation join tugeta for attakim iumi and iumi mas stay tugeta witim olketa brata and sista, wat nao bae iumi duim? (Ezek. 38:10-12) Iumi need for garem strongfala love for olketa mekem iumi savve deal witim datfala hard taem.

4. Hao nao Bible encouragem iumi for mas gohed lane for no givap, sorre lo narawan, and showimaot love?

⁴ Bible encouragem iumi for lane for no givap, sorre lo narawan, and showimaot love. Luke 21:19 sei: “Sapos iufala no givap, bae iufala sevem laef bilong iufala.” Colossae 3:12 sei iumi mas “sorre long pipol.” And 1 Thessalonica 4:9, 10 sei: “God nao teachim iufala for lovem narawan. . . . Bat olketa brata, mifala encouragem iufala for gohed showimaot diswan long bigfala wei moa.” Paul raetem olketa toktok hia for olketa disaepol wea garem finis wei for no givap, sorre lo pipol, and showimaot love. Nomata olsem, olketa need for gohed lane for showimaot olketa fasin hia. Iumi tu mas duim sem samting. For helpem iumi, iumi bae storyim hao olketa Christian lo first century lane for showimaot olketa wei hia. Then iumi bae lanem hao iumi savve followim example blo olketa. Taem iumi duim olsem, iumi pruvim iumi redi for datfala big trabol.

STRONGIM IUSELEVA FOR NO GIVAP

5. Wat nao olketa Christian lo first century duim wea helpem olketa for no givap?

⁵ Olketa Christian lo first century need for no givap. (Heb. 10:36) Olketa garem olketa sem problem wea olketa narawan garem, and olketa feisim tu olketa nara hard taem. For example, staka kasem persecution from olketa bigman blo Jew religion, olketa bigman blo Rome, and from famili blo olketa seleva tu. (Matt. 10:21) And insaed kongregeson, samfala taem olketa need for faet againstim teaching blo olketa apostate wea savve divaedem kongregeson. (Acts 20:29, 30) Nomata olsem, olketa gohed faithful and no givap. (Rev. 2:3) Wat nao helpem olketa? Olketa ting abaotem olketa Bible example bifor, olsem Job wea no givap. (Jas. 5:10, 11) Olketa prea for God strongim olketa. (Acts 4:29-31) And olketa gohed tingim hao if olketa no givap, Jehovah bae rewardim olketa.​—Acts 5:41.

6. Wat nao iumi savve lanem from example blo Merita wea no givap taem famili againstim hem?

⁶ Iumi tu bae no givap if iumi studyim and ting raonem example blo olketa wea no givap wea Bible and olketa pablikeson blo iumi storyim. Taem Merita, wanfala sista lo Albania duim datwan, hem fit for deal witim hao famili barava raf for againstim hem. Hem sei: “Story blo Job lo Bible barava encouragem mi. Hem safa tumas and hem no savve hu nao kosim olketa test wea hem feisim. Nomata olsem, hem sei: ‘Go kasem taem mi dae, mi bae gohed faithful!’ (Job 27:5) Taem mi ting abaotem olketa test wea mi kasem, hem smol nomoa lo wanem Job feisim. Job no savve hu nao kosim olketa test wea hem kasem, bat mi savve hu nao bihaenem olketa test wea mi kasem.”

7. Nomata distaem iumi no feisim eni barava hard taem, wat nao iumi shud lane for duim?

⁷ If iumi prea evritaem lo Jehovah and storyim evri feeling blo iumi lo hem, datwan savve helpem iumi tu for no givap. (Phil. 4:6; 1 Thess. 5:17) Maet distaem iu no feisim eni barava hard taem. Nomata olsem, waswe, iu prea lo Jehovah and askem hem for helpem iu taem iu feel nogud, konfius, or wari tumas? If hem wei blo iu for prea lo God for helpem iu lo olketa challenge wea iu feisim evriday, bae hem isi for iu duim olsem taem iu feisim olketa big challenge lo future. Then, bae iu barava sure hao Jehovah savve lo barava taem for helpem iu and wat bae hem duim for helpem iu.​—Ps. 27:1, 3.

8. Hao nao example blo Mira showimaot hao taem iumi no givap lo olketa test distaem, iumi bae winim olketa test lo future? (James 1:2-4) (Lukim tu piksa.)

⁸ If iumi no givap lo olketa hard taem wea iumi feisim distaem, bae iumi no givap tu lo datfala big trabol. (Rome 5:3) Why nao olsem? Staka brata and sista sei each taem olketa no givap lo wanfala test, datwan helpem olketa for winim next wan. Wei for no givap hem strongim faith blo olketa hao Jehovah redi and willing for helpem olketa. And datfala faith helpem olketa for winim next test. (Readim James 1:2-4.) Mira, wanfala pioneer sista lo Albania, luksavve from hem no givap lo olketa test wea hem kasem bifor, datwan helpem hem tu for gohed strong and no givap distaem. Samfala taem hem tingse hem nomoa garem staka problem tumas. Bat then, hem tingim staka samting wea Jehovah duim for sapotim hem insaed 20 year wea go pas, and hem remindim hemseleva olsem: ‘Gohed faithful. No weistim hard waka blo iu and hao Jehovah helpem iu lo staka year wea go pas.’ Iumi tu savve ting raonem hao Jehovah bin helpem iumi for no givap. Gohed trustim hao hem lukim each taem wea iumi no givap and hem bae rewardim iumi. (Matt. 5:10-12) Then taem bigfala trabol hem start, bae iu disaed strong for gohed faithful bikos iu lane finis for no givap.

SORRE LO NARAWAN

9. Hao nao kongregeson lo Antioch lo Syria showimaot olketa sorre lo narawan?

⁹ Tingim wat hem happen taem bigfala hangere kasem olketa Christian lo Judea. Taem kongregeson lo Antioch lo Syria herem datwan, masbi olketa feel sorre lo olketa brata and sista lo Judea. Olketa no just feel sorre nomoa, bat olketa duim samting tu. Olketa “disaed for sendem relief supply for helpem olketa brata long Judea, fitim wanem man wanwan savve givim.” (Acts 11:27-30) Nomata olketa brata and sista wea kasem big hangere stap farawe, olketa Christian lo Antioch barava laek for helpem olketa.​—1 John 3:17, 18.

10. Hao nao iumi savve showimaot iumi sorre lo olketa brata and sista wea kasem disaster? (Lukim tu piksa.)

¹⁰ Iumi tu savve showimaot iumi sorre lo olketa brata and sista wea kasem disaster distaem. Iumi kwiktaem for givim sapot taem iumi askem olketa elder if iumi savve help lo wanfala project, givim donation for waka raonem world, or prea for olketa wea disaster affectim olketa.b (Prov. 17:17) For example, lo 2020, olketa markem winim 950 Disaster Relief Komiti evriwea lo world for lukaftarem olketa wea COVID-19 pandemic affectim olketa. Iumi barava tinghae lo olketa brata wea waka lo olketa relief komiti hia. From olketa sorre lo olketa brata and sista, olketa distributim relief supply, help lo spiritual wei, and samfala taem repairim or buildim bak olketa haos and ples for worship.​—Comparem 2 Corinth 8:1-4.

11. Hao nao samting wea iumi duim for showimaot iumi sorre lo olketa narawan hem mekhae lo Jehovah?

¹¹ Taem iumi showimaot iumi tingim olketa brata and sista lo taem blo disaster, olketa nara pipol lukim wanem iumi duim. For example, lo 2019, Hurricane Dorian distroem wanfala Kingdom Hall lo Bahamas. Taem olketa brata buildim bak datfala Kingdom Hall, olketa askem wanfala contractor wea no Witness for talem haomas nao kost blo samfala waka wea olketa laekem hem for duim. Hem sei: “Mi laek donatem . . . evri equipment, olketa wakaman, and olketa material. . . . Mi laek for helpem organization blo iufala. Mi barava tinghae lo hao iufala kea for each other.” Staka pipol no savve lo Jehovah. Bat staka lo olketa lukim wanem Olketa Jehovah’s Witness duim. Iumi hapi for savve taem iumi duim samting wea showimaot iumi sorre lo olketa narawan, datwan mekem pipol for laek savve lo Jehovah wea “garem bigfala mercy”!​—Eph. 2:4.

12. Taem iumi lane for sorre lo narawan distaem, hao nao datwan redyim iumi for taem blo bigfala trabol? (Revelation 13:16, 17)

¹² Why nao iumi need for sorre lo narawan lo taem blo bigfala trabol? Bible showimaot hao olketa wea no sapotim olketa gavman bae feisim olketa challenge distaem and lo taem blo bigfala trabol. (Readim Revelation 13:16, 17.) So olketa brata and sista maet needim help for kasem need blo olketa. Taem King blo iumi Christ Jesus kam for judgem pipol, iumi laekem hem for lukim iumi gohed tingim narawan and invaetem iumi for kasem gud samting from Kingdom.​—Matt. 25:34-40.

STRONGIM LOVE BLO IU

13. Olsem Rome 15:7 storyim, hao nao olketa Christian lo first century strongim love wea olketa garem for each other?

¹³ Lo first century, pipol luksavve lo olketa Christian from olketa lovem each other. Bat waswe, hem isi for olketa showimaot love? Tingim hao kongregeson lo Rome garem olketa brata and sista wea kam from olketa difren baekgraon. Samfala hem olketa Jew wea obeyim Law blo Moses, bat olketa narawan hem olketa Gentile wea baekgraon blo olketa barava difren. Maet samfala Christian olketa slave, samfala free, and olketa narawan maet olketa boss blo olketa slave. Hao nao olketa Christian hia savve gohed strongim love for each other nomata olketa garem difren baekgraon? Aposol Paul encouragem olketa for mas “acceptim narawan.” (Readim Rome 15:7.) Wat nao Paul minim? Word wea olketa transleitim “acceptim” hem minim for welkamim narawan or kaen lo hem, olsem for invaetem hem lo haos or for kamap fren blo hem. For example, Paul talem Philemon for “welkamim” Onesimus wea hem wanfala slave blo hem wea ranawe. (Philem. 17) Priscilla and Aquila tu welkamim Apollos, wea need for lanem moa samting abaotem Christ and tufala “tekem hem go long haos bilong tufala.” (Acts 18:26) Nomata olketa Christian hia garem olketa difren baekgraon, olketa no letem datwan for divaedem olketa, bat olketa acceptim and welkamim each other.

14. Hao nao Anna and hasband showimaot love lo olketa narawan?

¹⁴ Iumi tu savve showimaot iumi lovem olketa brata and sista taem iumi kamap fren blo olketa and spendem taem witim olketa. Staka taem datwan savve encouragem olketa tu for showimaot love lo iumi. (2 Cor. 6:11-13) Tingim experience blo Anna and hasband blo hem. No longtaem bihaen tufala muv lo niu missionary assignment blo tufala lo West Africa, COVID-19 pandemic hem start. From tufala just arrive, tufala no savve meet witim olketa brata and sista lo kongregeson. Hao nao bae tufala showimaot love lo olketa? Tufala iusim videoconferencing for story lo olketa, and talem hao tufala laekem tumas for savve gud lo olketa. Olketa famili hia tinghae tumas lo datwan, so staka taem olketa ringim and sendem message lo tufala. Why nao tufala duim datwan? Anna sei, “Mi no savve forgetim wanem olketa brata and sista duim for showimaot love lo mi and famili blo mi lo olketa gud taem and hard taem. Example blo olketa encouragem mi for showimaot love lo olketa narawan.”

15. Wat nao iumi lanem from example blo Vanessa abaotem wei for lovem evri brata and sista? (Lukim tu piksa.)

¹⁵ Staka lo iumi insaed olketa kongregeson wea olketa brata and sista garem difren baekgraon and garem olketa difren wei. Iumi savve strongim love blo iumi for evriwan lo olketa taem iumi gohed tingim olketa gudfala wei blo olketa. Sista Vanessa wea stap lo New Zealand faendem hard for fren gud witim samfala lo kongregeson. Bat gogo hem disaed for no avoidim olketa wea wei blo olketa savve pokem hem, so hem traem best for spendem taem witim olketa. Datwan helpem hem for luksavve why Jehovah lovem olketa. Hem sei: “From hasband blo mi kamap circuit overseer, mifala associate witim staka brata and sista moa wea garem olketa difren wei and mi faendem hem isi for fren witim olketa. Distaem mi lovem evri difren wan hia. Iumi savve Jehovah lovem evriwan hia tu bikos hem invaetem pipol from staka difren baekgraon for worshipim hem.” Taem iumi lane for garem sem tingting olsem Jehovah abaotem olketa narawan, datwan pruvim iumi lovem olketa.—2 Cor. 8:24.

16. Why nao iumi need for lovem olketa brata and sista lo taem blo datfala big trabol? (Lukim tu piksa.)

¹⁶ Iumi bae need for lovem olketa brata and sista lo taem blo bigfala trabol. Taem datfala trabol hem start, hao nao bae Jehovah protectim iumi? Tingim wanem Jehovah talem lo pipol blo hem for duim taem enemy attakim Babylon bifor. Hem sei: “Pipol blo mi, iufala go insaed olketa rum blo iufala, and satem kam door. Iufala haed insaed for lelebet taem go kasem taem kros blo God hem finis.” (Isa. 26:20) Luk olsem, bae iumi tu followim olketa instruction hia lo taem blo bigfala trabol. “Olketa rum” hia maet minim olketa kongregeson blo iumi. Lo taem blo bigfala trabol, Jehovah promisim hao hem bae protectim iumi if iumi gohed for wan mind witim olketa brata and sista. So iumi mas waka hard distaem, no for just acceptim nomoa olketa brata and sista, bat for lovem olketa tu. Maet laef blo iumi bae depend lo datwan!

REDI DISTAEM

17. If iumi redi distaem, wat nao iumi savve duim lo taem blo datfala big trabol?

¹⁷ Taem “bigfala day blo Jehovah” hem kam, laef bae hem barava hard for evriwan. (Zeph. 1:14, 15) Pipol blo Jehovah tu bae kasem hard taem. If iumi redi distaem, bae iumi no panic and iumi savve helpem olketa narawan. Iumi bae no givap lo eni challenge wea iumi feisim. Taem olketa brata and sista safa, iumi bae duim best for showimaot iumi sorre lo olketa and provaedem wanem olketa needim. And iumi bae fren gud witim olketa brata and sista wea iumi lovem finis distaem. Then, Jehovah bae rewardim iumi witim laef olowe lo wanfala world wea evri disaster and olketa hard taem bae nomoa nao.​—Isa. 65:17.