Showim Loving-Kaeness Long Olketa wea Garem Need

“Go ahed for showimaot loving-kaeness . . . long each other.”—ZECHARIAH 7:9.

1, 2. (a) Why nao iumi shud showimaot loving-kaeness? (b) Wanem nao olketa kwestin wea iumi bae lukluk long hem?

WORD bilong Jehovah God encouragem iumi for lovem “loving-kaeness.” (Micah 6:8, footnote) Hem talem iumi reason tu why iumi shud duim datwan. Wanfala reason nao “man bilong loving-kaeness hem duim gudfala samting for soul bilong hemseleva.” (Proverbs 11:17) Datwan hem barava tru! Wei for showimaot loving-kaeness, or loyal love, hem strongim klos wei for fren witim nara pipol. From diswan, iumi bae garem olketa loyal fren—wea wanfala spesol reward!—Proverbs 18:24.

² Nara samting moa, Bible talem iumi: “Man wea aftarem raeteous fasin and loving-kaeness bae faendem laef.” (Proverbs 21:21) Tru nao, wei wea iumi aftarem loving-kaeness bae mekem God laekem iumi and bae givim iumi chance for enjoyim olketa blessing long future, insaed diswan hem laef olowe. Bat hao nao iumi savve showimaot loving-kaeness? Iumi shud showimaot diswan long hu? And waswe, loving-kaeness hem difren from kaenfala fasin wea planti man garem?

Kaenfala Fasin wea Planti Man Garem and Loving-Kaeness

3. Hao nao loving-kaeness hem difren from kaenfala fasin wea planti man garem?

³ Kaenfala fasin wea planti man garem and loving-kaeness tufala difren long samfala wei. Olsem example, planti taem pipol wea showimaot kaenfala fasin duim nomata olketa no fren long klos wei witim pipol wea olketa kaen long olketa. Bat, sapos iumi showimaot loving-kaeness long samwan, long loving wei iumi join witim datfala person. Long Bible, wei wea man showimaot loving-kaeness long narawan hem garem faondeson long wei wea tufala bin fren witim each other. (Genesis 20:13; 2 Samuel 3:8; 16:17) Or maet diswan start from samwan showimaot loving-kaeness bifor long narawan. (Joshua 2:1, 12-14; 1 Samuel 15:6; 2 Samuel 10:1, 2) For showim wei wea tufala hia difren, iumi bae markem tufala Bible example, wanfala bilong kaenfala fasin and wanfala bilong loving-kaeness wea planti man garem.

4, 5. Hao nao tufala Bible example long hia showimaot wei wea kaenfala fasin wea planti man garem hem difren from loving-kaeness?

⁴ Kaenfala fasin wea planti pipol garem hem showaot taem wanfala ship hem rek wea aposol Paul hem insaed. Olketa swim go kasem island bilong Malta. (Acts 27:37–28:1) Nomata pipol bilong Malta no garem responsibility or savve long olketa bifor, pipol long datfala island welkamim olketa stranger hia, showimaot “barava spesol kaenfala fasin” long olketa. (Acts 28:2, 7) Olketa showimaot kaenfala fasin for welkam, bat hem samting olketa no planim and olketa showim long olketa stranger. So, datwan hem kaenfala fasin wea planti man garem.

⁵ Markem diswan witim fasin for welkam wea King David showim long Mephibosheth, son bilong fren bilong hem Jonathan. David talem Mephibosheth: “Iu bae kaikaim bred long tebol bilong mi evritaem.” Taem hem talem why nao hem mekem disfala arrangement, David sei long hem: “Mi bae showimaot loving-kaeness long iu for saed bilong Jonathan dadi bilong iu.” (2 Samuel 9:6, 7, 13) Wei wea David go ahed for garem fasin for lukaftarem Mephibosheth, olketa kolem diswan wei bilong loving-kaeness, no kaenfala fasin wea planti man garem nomoa, bikos diswan pruvim hem go ahed for loyal long wei wea hem fren witim Jonathan bifor. (1 Samuel 18:3; 20:15, 42) Long sem wei distaem, olketa servant bilong God showimaot kaenfala fasin long olketa man. Nomata olsem, olketa showimaot loving-kaeness, or loyal love, long pipol wea God nao appruvim wei wea olketa fren tugeta.—Matthew 5:45; Galatians 6:10.

6. Wanem nao olketa difren saed bilong loving-kaeness wea olketa man showim wea stap insaed Word bilong God?

⁶ For luksavve long samfala difren saed bilong loving-kaeness, iumi bae lukim thrifala story long Bible wea showimaot disfala fasin. From olketa hia iumi bae lukim hao man wea showimaot loving-kaeness hem (1) showimaot witim kliafala akson, (2) hem duim long willing wei, and (3) long olketa wea garem need. And tu, olketa story hia showim hao iumi savve showimaot loving-kaeness distaem.

Wanfala Dadi wea Showim Loving-Kaeness

7. Wanem nao servant bilong Abraham hem talem long Bethuel and Laban, and wanem nao wari wea datfala servant hem garem?

⁷ Genesis 24:28-67 storyim lastfala part long story abaotem servant bilong Abraham, wea iumi bin storyim long first article. Bihaen servant hia meetim Rebekah, hem invaetem hem for go long haos bilong dadi bilong hem, Bethuel. (Verse 28-32) Long there servant hia storyim full story abaotem wei wea hem lukaotem wanfala waef for son bilong Abraham. (Verse 33-47) Hem strongim hao hem lukim samting wea kasem hem finis olsem saen from Jehovah, “wea leadim mi long gogo bilong trufala wei for tekem dota bilong brata bilong masta bilong mi for son bilong hem.” (Verse 48) Luk olsem servant hia hope taem hem talem datfala story diswan bae mekem Bethuel and son bilong hem Laban bilivim hao Jehovah nao bihaenem disfala gogo bilong hem. Gogo, datfala servant sei: “Sapos iu showimaot loving-kaeness and trust long masta bilong mi, talem mi; bat sapos nomoa, talem mi, mekem mi tan go long raet saed or long left saed.”—Verse 49.

8. Wanem nao Bethuel hem talem saed long Rebekah?

⁸ Jehovah showim loving-kaeness long Abraham finis. (Genesis 24:12, 14, 27) Waswe, Bethuel bae willing for duim sem samting and letem Rebekah for go witim servant bilong Abraham? Waswe, loving-kaeness wea olketa man showimaot bae join witim loving-kaeness wea God showim for fulfillim purpose bilong hem? Or waswe, longfala gogo bilong datfala servant bae iusles nomoa? Servant bilong Abraham barava kasem comfort taem hem herem Laban and Bethuel sei: “Disfala samting hem kam from Jehovah.” (Verse 50) Olketa luksavve hao Jehovah hem insaed long diswan and stretawe acceptim disison bilong hem. Then, Bethuel showim loving-kaeness bilong hem taem hem sei: “Rebekah long hia front long iu. Tekem hem and go, and letem hem kamap waef long son bilong masta bilong iu, olsem Jehovah hem talem.” (Verse 51) Rebekah willing for go witim servant bilong Abraham, and hem kamap waef wea Isaac lovem tumas.—Verse 49, 52-58, 67.

Loving-Kaeness wea Wanfala Son Showim

9, 10. (a) Jacob askem son bilong hem Joseph for duim wanem for hem? (b) Hao nao Joseph showim loving-kaeness long dadi bilong hem?

⁹ Jacob, granson bilong Abraham kasem tu loving-kaeness. Olsem Genesis chapter 47 showim, Jacob hem stap long Egypt long datfala taem, and “gogo [hem] redy for dae.” (Verse 27-29) Hem wari bikos hem bae dae aotsaed long land wea God promisim long Abraham. (Genesis 15:18; 35:10, 12; 49:29-32) Jacob no want for olketa berem hem long Egypt, so hem mekem arrangement for olketa tekem dead body bilong hem go bak long land bilong Canaan. Son bilong hem, Joseph, wea garem paoa nao hem best wan for mek sure olketa duim disfala samting wea hem laekem.

¹⁰ Story hem sei: “So [Jacob] kolem son bilong hem Joseph and sei long hem: ‘Sapos distaem, iu hapi long mi, . . . iu mas showim loving-kaeness and wei for trust long mi. (Plis, no berem mi long Egypt.) And mi mas leidaon witim olketa dadi bilong mi, and iu mas karem mi go aot from Egypt and berem mi insaed grev bilong olketa.’” (Genesis 47:29, 30) Joseph promis for duim disfala samting wea dadi bilong hem askem, and no longtaem bihaen Jacob hem dae. Joseph and olketa narafala son bilong Jacob karem body bilong hem “go long land bilong Canaan and berem hem long cave bilong field bilong Machpelah, datfala field wea Abraham baem.” (Genesis 50:5-8, 12-14) So Joseph showimaot loving-kaeness long dadi bilong hem.

Loving-Kaeness From Dota-in-Law

11, 12. (a) Hao nao Ruth showim loving-kaeness long Naomi? (b) Long wanem wei nao “mek-tu” taem wea Ruth showimaot loving-kaeness hem moabeta winim “firstaem”?

¹¹ Buk bilong Ruth storyim hao widow woman Naomi kasem loving-kaeness from Moabite dota-in-law bilong hem Ruth, wea hem wanfala widow woman tu. Taem Naomi disaed for go bak long Bethlehem long Judah, Ruth showim loving-kaeness and strong taem hem sei: “Ples wea iu go bae mi go tu, and ples wea iu sleep long naet bae mi sleep long there tu. Pipol bilong iu bae kamap pipol bilong mi, and God bilong iu bae kamap God bilong mi.” (Ruth 1:16) Bihaen, Ruth showim loving-kaeness taem hem willing for maritim Boaz, olo relative bilong Naomi.a (Deuteronomy 25:5, 6; Ruth 3:6-9) Hem talem Ruth: “Iu showimaot loving-kaeness bilong iu long wei wea moabeta long mek-tu taem winim long firstaem, taem iu no laekem olketa young man nomata olketa poor or rich.”—Ruth 3:10.

¹² “Firstaem” wea Ruth showimaot loving-kaeness hem minim taem wea hem lusim pipol bilong hem and go witim Naomi. (Ruth 1:14; 2:11) Bat “mek-tu” samting wea hem duim wea showim loving-kaeness hem winim firstaem—hem nao wei wea Ruth willing for maritim Boaz. Ruth hem fit nao for bornem wanfala pikinini for Naomi, wea olo tumas for garem pikinini. Tufala marit, and taem Ruth bornem pikinini bihaen, olketa woman bilong Bethlehem singaot olsem: “Wanfala son hem born for Naomi.” (Ruth 4:14, 17) Ruth hem barava “wanfala gudfala woman,” wea Jehovah givim hem nambawan reward wea hem nao privilege for kamap wanfala laen mami bilong Jesus Christ.—Ruth 2:12; 3:11; 4:18-22; Matthew 1:1, 5, 6.

Showimaot Witim Akson

13. Hao nao Bethuel, Joseph, and Ruth showimaot loving-kaeness bilong olketa?

¹³ Waswe, iu lukim hao Bethuel, Joseph, and Ruth showimaot loving-kaeness bilong olketa? Olketa duim no witim kaenfala toktok nomoa bat witim kliafala akson. Bethuel hem no sei nomoa, “Rebekah long hia” bat hem “sendem go Rebekah” tu. (Genesis 24:51, 59) Joseph no sei nomoa, “Mi bae duim samting wea iu talem” bat hem and olketa brata bilong hem “duim evri samting wea hem komandim long olketa” tu. (Genesis 47:30; 50:12, 13) Ruth no sei nomoa, “Ples wea iu go bae mi go tu” bat hem lusim tu pipol bilong hem and go witim Naomi, so “tufala wakabaot gogo tufala kasem Bethlehem.” (Ruth 1:16, 19) Long Judah, Ruth duim samting moa taem hem “duim evri samting wea mami-in-law bilong hem komandim hem for duim.” (Ruth 3:6) Tru nao, loving-kaeness bilong Ruth, olsem bilong olketa narawan, hem showaot long akson.

14. (a) Hao nao olketa servant bilong God distaem showim loving-kaeness long akson? (b) Wanem samting wea showimaot loving-kaeness nao iu lukim midolwan olketa Christian long area bilong iu?

¹⁴ Hem gud tumas for lukim hao olketa servant bilong God distaem go ahed for showimaot loving-kaeness thru long akson. Olsem example, tingim olketa wea givim saport saed long feeling for olketa nara Christian wea sik, feel sorre, or sorre tumas from samwan wea olketa lovem hem dae. (Proverbs 12:25) Or tingim planti Witness bilong Jehovah wea faithful for tekem go olketa olo long Kingdom Hall evri week for attendim olketa kongregeson meeting. Anna, wea 82 year and garem arthritis, talem feeling bilong planti narawan taem hem sei: “Wei wea olketa brata and sista tekem mi go long evri meeting hem wanfala blessing from Jehovah. Mi thankiu from botom long heart bilong mi for hem givim mi olketa loving brata and sista olsem.” Waswe, iu share for duim olketa samting olsem insaed kongregeson bilong iu? (1 John 3:17, 18) Sapos iu duim olsem, iu savve sure hao evriwan tinghae tumas long loving-kaeness bilong iu.

Willing for Showimaot

15. Wanem saed bilong loving-kaeness nao hem showaot strong long thrifala Bible story wea iumi lukim?

¹⁵ Olketa story long Bible wea iumi lukim showimaot tu hao man wea showim loving-kaeness hem willing for duim, and no eniwan forcem hem. Bethuel willing for duim samting wea servant bilong Abraham talem, and Rebekah tu. (Genesis 24:51, 58) No eniwan forcem Joseph for showimaot loving-kaeness. (Genesis 50:4, 5) Ruth “hem ask strong for go witim [Naomi].” (Ruth 1:18) Taem Naomi sei for Ruth go long Boaz, loving-kaeness muvim datfala Moabite woman for sei: “Evri samting wea iu talem long mi bae mi duim.”—Ruth 3:1-5.

16, 17. Wanem nao mekem loving-kaeness bilong Bethuel, Joseph, and Ruth garem bigfala mining, and wanem nao muvim olketa for showimaot disfala fasin?

¹⁶ Loving-kaeness wea Bethuel, Joseph, and Ruth showimaot hem barava spesol bikos Abraham, Jacob, and Naomi no savve putim eni hevi long olketa. Nomata wanem, Bethuel no need for givim go dota bilong hem. Hem isi nomoa for hem sei long servant bilong Abraham: ‘Nomoa, mi no laek for sendem go farawe girl bilong mi wea savve waka hard.’ (Genesis 24:18-20) Olsem tu, Joseph hem free for disaed for duim or no duim samting followim wanem dadi bilong hem askem, bikos Jacob hem dae finis and no savve forcem hem for followim promis bilong hem. Naomi seleva talemaot hao Ruth hem free for stap long Moab. (Ruth 1:8) Ruth hem free tu for maritim wanfala long “olketa young man” and no Boaz wea olo finis.

¹⁷ Bethuel, Joseph, and Ruth showimaot loving-kaeness long willing wei; heart bilong olketa nao muvim olketa for duim olsem. Olketa feel olsem olketa garem responsibility for showim disfala fasin long pipol wea olketa fren witim, olsem King David feel hem garem responsibility for showimaot disfala fasin long Mephibosheth.

18. (a) Wanem tingting nao olketa Christian elder garem taem olketa “shepherdim olketa sheep”? (b) Wanfala elder feel hao taem hem helpem olketa nara brata?

¹⁸ Loving-kaeness hem still wanfala mark bilong pipol bilong God, and fitim tu olketa man wea shepherdim sheep bilong God. (Psalm 110:3; 1 Thessalonians 5:12) Olketa elder, or overseer hia, feelim hao olketa garem responsibility for live followim trust wea olketa garem taem olketa kasem appointment. (Acts 20:28) Nomata olsem, shepherding waka and nara samting wea showimaot loving-kaeness wea olketa duim for kongregeson hem samting wea olketa duim, ‘no from eniwan forcem olketa, bat long willing wei.’ (1 Peter 5:2) Olketa elder shepherdim olketa sheep bikos olketa garem responsibility for duim and want for duim tu. Olketa showimaot loving-kaeness long sheep bilong Christ bikos hem samting olketa shud duim and want for duim. (John 21:15-17) Wanfala Christian elder hem sei: “Mi laekem tumas for go visit long haos bilong olketa brata or ringim olketa just for showim mi tingim olketa. Wei for helpem olketa brata hem givim mi bigfala hapi and wei for satisfae!” Olketa elder wea kea evriwea long world agree long diswan.

Showim Loving-Kaeness Long Olketa wea Garem Need

19. Wanem tru samting abaotem loving-kaeness nao olketa story long Bible wea iumi lukim insaed disfala article showimaot?

¹⁹ Olketa story long Bible wea iumi lukim mekhae long wei wea iumi mas showim loving-kaeness long olketa wea garem need wea olketa seleva no savve duim. For mekem famili laen bilong hem go ahed, Abraham needim Bethuel for waka witim hem. For tekem body bilong hem go bak long Canaan, Jacob needim help bilong Joseph. And for garem pikinini, Naomi needim help bilong Ruth. Abraham, Jacob, and Naomi no savve kasem samting olketa needim sapos no eniwan helpem olketa. Olsem tu distaem, iumi mas showim loving-kaeness long olketa wea garem need. (Proverbs 19:17) Iumi shud followim Job, wea helpem “wan wea garem problem and singaot for help, and boy wea no garem dadi and eniwan wea no garem samwan for helpem hem” and tu “datwan wea redy for dae.” Job mekem tu “heart bilong widow woman for hapi” and kamap olsem “eye bilong blind wan and leg bilong datwan wea cripple.”—Job 29:12-15.

20, 21. Hu nao iumi mas showimaot loving-kaeness long olketa, and wanem nao each wan long iumi shud disaed strong for duim?

²⁰ For tok stret, ‘olketa wea garem problem and singaot for help’ stap insaed evri Christian kongregeson. Diswan maet kamaot from wei for feel lonely, wikdaon, feel iusles, feel nogud long nara pipol, bigfala sik, or samwan olketa lovem hem dae. Nomata wanem nao kosim, evriwan olsem garem need wea iumi savve givim and shud givim taem iumi willing for go ahed for duim samting wea showimaot loving-kaeness.—1 Thessalonians 5:14.

²¹ So, letem iumi go ahed for followim Jehovah God, wea “garem bigfala loving-kaeness.” (Exodus 34:6; Ephesians 5:1) Iumi savve duim olsem taem iumi willing for duim kliafala akson, for olketa wea garem need. And iumi bae givim honor long Jehovah and kasem bigfala hapi taem iumi ‘showimaot loving-kaeness long each other.’—Zechariah 7:9.

[Footnote]

Hao Nao Bae Iu Ansa?

• Hao nao loving-kaeness hem difren from kaenfala fasin wea planti man garem?

• Wanem nao olketa wei wea Bethuel, Joseph, and Ruth showim loving-kaeness?

• Wanem tingting nao iumi mas garem taem iumi showim loving-kaeness?

• Hu nao iumi mas showimaot loving-kaeness long olketa?

[Piksa long page 18]

Hao nao Bethuel showim loving-kaeness?

[Piksa long page 21]

Loyal love bilong Ruth hem olsem blessing for Naomi

[Olketa Piksa long page 23]

Loving-kaeness wea planti man garem hem samting wea man willing for showim, showimaot witim kliafala akson, showim long olketa wea garem need