Word Bilong Jehovah Hem Laef
Olketa Main Point From Buk Tu Bilong Psalms
IUMI olketa servant bilong Jehovah savve finis bae iumi kasem olketa hard taem and test. Aposol Paul raet olsem: “Evriwan wea laek garem fasin for lovem God wea join witim Christ Jesus bae kasem persecution tu.” (2 Timothy 3:12) Wanem nao bae helpem iumi for gohed strong and no givap taem iumi kasem olketa hard taem and persecution wea bae pruvim iumi faithful long God?
Buk Tu bilong faevfala buk bilong olketa psalm helpem iumi long datwan. Psalm 42 go kasem 72 showimaot hao sapos iumi laek for winim olketa hard taem, iumi mas trustim Jehovah evribit and lane for depend long hem for helpem iumi. Diswan hem wanfala important leson for iumi! Olsem full Bible, message insaed Buk Tu bilong Psalms hem “laef and garem paoa” kam kasem distaem.—Hebrews 4:12.
JEHOVAH HEM “PLES FOR HAED AND FOR IUMI KASEM STRONG”
Wanfala Levite hem stap long difren ples and hem no savve go bak long hom. Hem feel sorre tumas bikos hem kanduit go long temple bilong Jehovah for worship, so hem comfortim hemseleva and sei: “Soul bilong mi, why nao iu feel nogud, and why nao iu mek noise insaed long mi? Weit for God.” (Psalm 42:5, 11; 43:5) Disfala toktok hem joinim thrifala part bilong Psalm 42 and 43 for kamap wanfala poem. Psalm 44 hem wanfala prea for nation bilong Judah wea insaed trabol bikos army bilong Assyria plan for attakim datfala nation taem King Hezekiah hem rul.
Psalm 45 hem song abaotem marit bilong wanfala king wea piksarem datfala Messiah King. Psalm 46 go kasem 48 showimaot Jehovah hem olsem “wanfala ples for haed and for iumi kasem strong,” “wanfala nambawan King ovarem full earth,” and “wanfala sef ples.” (Psalm 46:1; 47:2; 48:3) Psalm 49 barava showimaot hao no eni man “savve baem bak brata bilong hem”! (Psalm 49:7) Olketa son bilong Korah nao raetem first eitfala psalm bilong Buk Tu. Mek-naen psalm wea hem Psalm 50, Asaph nao raetem.
Ansa for Olketa Bible Kwestin:
44:19—Wanem nao “datfala ples bilong olketa wild dog”? Maet man wea raetem psalm hia hem storyim wanfala ples for faet, wea olketa wild dog kaikaim olketa wea dae finis.
45:13, 14a—Hu nao “dota bilong king” wea bae “kam front long king”? Hem dota bilong Jehovah God, “King bilong olowe.” (Revelation 15:3) Hem piksarem kongregeson bilong 144,000 Christian wea kasem glory, wea Jehovah adoptim olsem pikinini bilong hem taem hem anointim olketa witim spirit bilong hem. (Romans 8:16) Disfala “dota” bilong Jehovah wea “hem redi olsem wanfala bride wea barava luk naes for hasband bilong hem,” bae kam front long Messiah King wea hem bae maritim.—Revelation 21:2.
45:14b, 15—Hu nao “olketa young gele” piksarem? Olketa nao datfala “big crowd” bilong olketa tru worshiper wea joinim and sapotim datfala anointed remnant. From olketa laef yet taem olketa “kamaot from datfala big trabol,” olketa bae stap long earth taem marit bilong Messiah King hem kamap long heven. (Revelation 7:9, 13, 14) Long datfala taem, olketa bae fulap witim ‘hapi.’
45:16—Long wanem wei nao olketa son bae changem olketa laen dadi bilong king? Taem Jesus born long earth hem garem olketa laen dadi long earth. Olketa bae kamap olketa son bilong hem taem hem resurrectim olketa from dae long Thousand Year Rul bilong hem. Samfala long olketa bae kasem appointment for kamap “olketa prince evriwea long earth.”
50:2—Why nao “lukluk bilong [Jerusalem] barava perfect”? Diswan hem no minim taon hia hem luk naes tumas. Bat, hem bikos Jehovah iusim taon hia and givim glory long datfala ples long wei for markem temple bilong hem for stap, and mekem hem kapitol taon for olketa anointed king bilong hem.
Olketa Leson for Iumi:
42:1-3. Olsem wei wea wanfala mere deer wea stap long drae ples hem barava laek for drink wata, datfala Levite hem barava laek for worshipim Jehovah. From hem no savve worshipim Jehovah long temple bilong Hem, disfala man hem barava feel sorre tumas, and hem no laek kaikai nao and ‘krae bilong hem kamap kaikai for hem day and naet.’ Iumi shud barava tinghae long wei wea iumi worshipim Jehovah witim olketa Christian brata bilong iumi!
42:4, 5, 11; 43:3-5. Sapos eni reason mekem iumi no fit for stap witim Christian kongregeson, wei for tingim olketa taem wea iumi kaban witim olketa insaed long kongregeson bifor savve strongim iumi. Maet firstaem diswan mekem iumi feel lonely go moa, bat hem bae remindim iumi tu hao God hem wanfala ples for haed and iumi mas depend long hem for kasem help.
46:1-3. Nomata wanem trabol maet kasem iumi, iumi mas barava trustim hao “God hem wanfala ples for haed and for iumi kasem strong.”
50:16-19. Eniwan wea talem laea toktok and gohed for duim olketa nogud samting, hem no garem right for stand for God.
50:20. Winim wei for story abaotem olketa wik point bilong narawan, hem moabeta for iumi no tingim olketa wik point bilong narawan.—Colossians 3:13.
“SOUL BILONG MI, STAP KWAET AND WEIT FOR GOD”
Disfala sekson bilong olketa psalm hem start witim prea wea David talem from heart bihaen hem duim sin witim Bath-sheba. Psalm 52 go kasem 57 showimaot hao Jehovah bae helpem olketa wea torowem hevi bilong olketa long hem and weit long hem for kasem salvation. Olsem Psalm 58-64 talemaot, Jehovah kamap sef ples bilong David taem hem kasem trabol. Hem sing olsem: “Tru tumas, soul bilong mi, stap kwaet and weit for God, bikos hem nao hope bilong mi.”—Psalm 62:5.
Wei for fren gud witim Man for sevem iumi shud muvim iumi for “singsing for givim glory long nem bilong hem.” (Psalm 66:2) Psalm 65 praisem Jehovah olsem man wea provaedem staka samting, Psalm 67 and 68 olsem God for sevem pipol, and Psalm 70 and 71 olsem Man wea provaedem sef ples for stap.
Ansa for Olketa Bible Kwestin:
51:12—David askem “willing spirit” bilong hu for sapotim hem? Diswan hem no holy spirit bilong Jehovah, or wei wea hem willing for helpem David, bat hem spirit bilong David seleva, wea minim tingting bilong hem. Hem askem God for givim hem gudfala tingting for duim stret samting.
53:1—Hao nao man wea ting God hem no stap, hem “no garem gudfala tingting”? Diswan hem no minim man no garem eni savve. Hem minim man no garem gudfala tingting saed long fasin, olsem barava nogud fasin wea Psalm 53:1-4 hem story abaotem.
58:3-5—Long wanem wei nao olketa wea wicked olsem wanfala snek? Olketa laea toktok wea olketa talem abaotem narawan hem olsem poison bilong wanfala snek. Wei wea olketa spoelem gudfala nem bilong narawan hem olsem poison bilong snek hem spoelem body bilong man. “Olsem wanfala cobra wea satem ear bilong hem,” olketa wea wicked no laek for lisin long kaonsel or discipline.
58:7—Hao nao olketa wea wicked “lus insaed wata wea ran”? Maet David hem tingim olketa wata wea ran long samfala valley long Promis Land. Nomata bigfala flood hem mekem wata ran big long samfala valley olsem, wata hia kwiktaem for go bak long graon. David hem prea for olketa wicked for kwiktaem finis.
68:13—Hao nao “silver kavarem olketa wing bilong kurukuru and gold wea yellow and green kavarem olketa feather bilong hem”? Samfala kurukuru wea blue and gray garem samfala feather wea luk braet and kala savve change. Hem olsem olketa feather bilong kurukuru hem shaen olsem metal taem sun shaen long hem. Maet David hem markem olketa Israelite wea winim wanfala faet witim kaen kurukuru wea strong for flae and lukluk bilong hem braet tumas. Samfala savveman sei hao lukluk bilong olketa maet hem olsem wanfala trophy tu wea olketa tekem bihaen olketa winim wanfala faet. Nomata wanem, David hem storyim hao Jehovah helpem olketa pipol bilong hem for winim olketa enemy.
68:18—Hu nao “olketa man wea olsem present”? Olketa hia samfala long olketa wea kamap prisoner taem pipol bilong God tekovarem Promis Land. Bihaen, olketa man hia kasem assignment for helpem olketa Levite long waka bilong olketa.—Ezra 8:20.
68:30—Wanem nao David minim taem hem askem God for ‘tok strong long olketa wild animal wea stap long grass wea grow long wata’? David story abaotem olketa enemy bilong pipol bilong Jehovah olsem olketa wild animal. Hem askem God for tok strong long olketa, wea minim for no letem olketa garem paoa for spoelem pipol bilong hem.
69:23—Wanem nao hem minim for ‘kosim olketa hip bilong enemy for seksek’? Man barava needim olketa masol long hip for duim olketa samting wea needim strong, olsem wei for pikimap and karem olketa hevi samting. Wei wea olketa hip seksek maet minim man lusim paoa bilong hem. David hem prea for olketa wicked lusim paoa bilong olketa.
Olketa Leson for Iumi:
51:1-4, 17. Taem iumi sin, maet datwan no minim iumi spoelem wei wea iumi fren witim Jehovah God. Sapos iumi repent, iumi trustim hao Jehovah bae showimaot mercy long iumi.
51:5, 7-10. From iumi garem sin taem iumi born, iumi savve askem Jehovah for forgivim sin bilong iumi. Iumi shud prea long Jehovah tu for mekem iumi kamap klin, for mekem iumi kamap gud moa, for helpem iumi aotem wei for laek duim sin wea stap insaed heart bilong iumi, and for stand strong and no givap.
51:18. Olketa sin bilong David klosap spoelem full nation. Dastawe hem prea for God favorim Zion. Taem iumi duim wanfala serious sin, plande taem diswan mekem nem bilong Jehovah and kongregeson kasem shame. Iumi need for prea long God for stretem eni nogud samting wea maet kamaot from wanem iumi duim.
52:8. Sapos iumi fren gud witim Jehovah and duim gud samting long service bilong hem, iumi savve “olsem wanfala olive tree wea garem staka frut insaed haos bilong God,” taem iumi obeyim hem and willing for acceptim discipline bilong hem.—Hebrews 12:5, 6.
55:4, 5, 12-14, 16-18. David barava feel sorre tumas taem son bilong hem Absalom followim nogud plan bilong hem, and wei wea Ahithophel wea hem trustim, duim nogud samting againstim hem. Nomata olsem, datwan no spoelem wei wea David trustim Jehovah. Iumi shud no letem wei for feel sorre tumas spoelem wei wea iumi trustim God.
55:22. Hao nao iumi torowem hevi bilong iumi long Jehovah? Iumi duim diswan taem (1) iumi prea long Jehovah abaotem wanfala samting wea affectim iumi, (2) iumi depend long Word bilong hem and organization bilong hem for leadim and sapotim iumi, and (3) iumi duim samting wea iumi fit for duim for stretem datfala problem.—Proverbs 3:5, 6; 11:14; 15:22; Philippians 4:6, 7.
56:8. Jehovah no luksavve long problem wea iumi kasem nomoa, bat hem luksavve hao datwan affectim feeling bilong iumi tu.
62:11. God no need for depend long eniwan or eni samting for givim paoa long hem. Hem nao garem evri paoa. ‘Strong hem bilong Jehovah.’
63:3. “Loving-kaeness bilong [God] hem moabeta winim laef.” Sapos iumi no garem datwan, laef hem no garem eni mining. Hem wise samting for iumi mekem grow wei for fren gud witim Jehovah.
63:6. Long naet nao hem gudfala taem for ting raonem samting from hem kwaet and no eni samting savve disturbim iumi.
64:2-4. Nogud gossip savve spoelem gudfala nem bilong samwan. Iumi shud no lisin or storyim kaen gossip olsem long narawan.
69:4. For iumi garem peace witim narawan, maet samfala taem hem wise for iumi ‘givim bak’ samting, wea minim for sei sorre long narawan, nomata sapos iumi tingse iumi duim stret samting.
70:1-5. Jehovah herem olketa strongfala prea wea iumi talem for askem help bilong hem. (1 Thessalonians 5:17; James 1:13; 2 Peter 2:9) Maet God letem datfala hard taem for gohed, bat hem bae givim iumi wisdom for deal witim datfala samting and strong for gohed and no givap. Hem bae no letem eni temptation kasem iumi wea iumi no fit for winim.—1 Corinthians 10:13; Hebrews 10:36; James 1:5-8.
71:5, 17. Bifor hem faetem datfala Philistine giant Goliath, David mekem grow fasin for strong and no fraet, bikos hem trustim Jehovah taem hem young. (1 Samuel 17:34-37) Hem gud for olketa young wan depend long Jehovah long evri samting wea olketa duim.
“Glory Bilong Hem Bae Fulimap Full Earth”
Lastfala song long Buk Tu bilong Psalms, Psalm 72, hem abaotem rul bilong Solomon, wea piksarem olketa samting wea bae kamap taem Messiah hem rul. Hem storyim nambawan living wea bae kamap olsem bigfala peace, no eni raf fasin and wei for safa, and staka kaikai long earth! Waswe, bae iumi wanfala long olketa wea enjoyim olketa samting hia and olketa nara Kingdom blessing tu? Olsem man wea raetem olketa psalm, iumi tu savve kasem olketa blessing hia sapos iumi hapi for weit long Jehovah, and mekem hem kamap ples for haed and for iumi kasem strong.
“Olketa prea bilong David . . . hem finis” witim disfala toktok: “Blessim Jehovah God, God bilong Israel, wea hem nomoa duim olketa nambawan waka. And blessim nambawan nem bilong hem for olowe, and glory bilong hem bae fulimap full earth. Amen and Amen.” (Psalm 72:18-20) Iumi tu laek for blessim Jehovah and praisem nambawan nem bilong hem witim full heart bilong iumi.
[Piksa long page 13]
Waswe, iu savve hu nao “dota bilong king” piksarem?
[Piksa long page 14]
Waswe, iu savve why nao olketa sei “lukluk bilong [Jerusalem] barava perfect”?