Toktok Bilong Jehovah Hem Laef
Olketa Main Point From Buk Bilong Acts
BUK bilong Acts long Bible hem talem staka samting abaotem firstfala Christian kongregeson and hao plande kongregeson kamap bihaen. Luke wea hem doctor, hem nao raetem disfala buk and hem storyim bigfala waka wea olketa Christian duim start long 33 C.E. go kasem 61 C.E.
Firstfala haf long buk bilong Acts hem storyim waka bilong aposol Peter, and narafala haf hem storyim waka bilong aposol Paul. Taem Luke talem olketa toktok “mifala” and “iumi,” datwan showimaot hem tu stap taem olketa samting hia happen. Sapos iumi ting raonem samting wea buk bilong Acts storyim, datwan bae helpem iumi for tinghae go moa long Bible and holy spirit wea God givim long iumi. (Heb. 4:12) Bae hem helpem iumi for no duim nomoa samting wea iumiseleva laekem, and bae hem helpem iumi biliv strong long samting wea Kingdom bae duim.
PETER IUSIM “OLKETA KEY BILONG KINGDOM”
Taem olketa aposol kasem holy spirit, olketa strong for preach. Firstaem wea Peter iusim “olketa key bilong kingdom bilong heven,” hem taem hem helpem olketa Jew and pipol wea no Jew wea “herem toktok bilong hem” for kasem savve and chance for rul long Kingdom. (Matt. 16:19; Acts 2:5, 41) Nomata olketa disaepol go long olketa difren ples taem pipol barava spoelem olketa, datwan mekem olketa duim preaching waka long staka nara ples moa.
Taem olketa aposol long Jerusalem herem pipol long Samaria biliv long God nao, olketa sendem Peter and John for kasem olketa. Mek-tu taem wea Peter iusim olketa key bilong kingdom hem taem hem helpem pipol long Samaria for kasem chance for rul long Kingdom. (Acts 8:14-17) Maet wanfala year bihaen Jesus laef bak, Saul wea kam from Tarsus hem changem wei bilong hem and kamap wanfala Christian. Long 36 C.E., hem nao mek-thri taem wea Peter iusim olketa key bilong kingdom. Long datfala taem, God givim holy spirit bilong hem long pipol wea no Jew and wea no circumcise.—Acts 10:45.
Ansa for Olketa Bible Kwestin:
2:44-47; 4:34, 35 —Why nao olketa Christian salem samting bilong olketa and givim datfala selen long olketa nara Christian? Staka wea kamap Christian stap farawe from Jerusalem, so taem olketa kam long Jerusalem for lanem gud niufala biliv bilong olketa and for preach long pipol, olketa laek stap lelebet longtaem long there. Bat olketa no garem inaf selen. Dastawe from samfala Christian laek helpem olketa, olketa salem samting bilong olketa and givim datfala selen for helpem olketa hia wea garem need.
4:13—Waswe, Peter and John no savve read or no skul gud? Nomoa. Bible talem olketa “man wea no skul gud and man nating” bikos olketa no go long skul bilong olketa Jew for lanem religion bilong olketa.
5:34-39—Hao nao Luke savve long samting wea Gamaliel talem long Hae Kot bilong olketa Jew nomata olketa no letem pipol kam insaed ples hia? Maet hem from thrifala samting: (1) Paul, wea Gamaliel tu lanem hem bifor, hem nao talem Luke; (2) Luke story witim wanfala man long Hae Kot bilong olketa Jew, olsem Nicodemus; (3) Holy spirit nao mekem Luke savve long diswan.
7:59—Waswe, Stephen hem prea long Jesus? Nomoa. Iumi mas worshipim Jehovah God and prea long hem nomoa. (Luke 4:8; 6:12) Sapos long narataem, Stephen bae prea long Jehovah long nem bilong Jesus. (John 15:16) Bat long datfala taem Stephen lukim wanfala vision wea “Son bilong man hem standap long raet saed bilong God.” (Acts 7:56) Stephen luksavve finis Jesus garem paoa for mekem man wea dae finis for laef bak. So taem Stephen hem story long Jesus, hem no prea long hem bat hem askem Jesus for tingim hem taem hem mekem pipol laef bak.—John 5:27-29.
Wanem Nao Iumi Lanem?
1:8. Hard tumas for pipol bilong Jehovah duim preaching waka long full world sapos olketa no kasem holy spirit for helpem olketa.
4:36–5:11. Nara nem bilong Joseph wea kam from Cyprus hem Barnabas, wea minim “Man wea mekem tingting bilong nara man feel gud moa.” Olketa aposol nemim hem Barnabas bikos hem kaenfala man wea laek helpem nara man. Iumi laek followim wei bilong hem and no followim wei bilong Ananias and Sapphira, wea laea and trikim pipol.
9:23-25. Sapos iumi ranawe from olketa wea againstim iumi mekem iumi savve gohed duim preaching waka, datwan no minim iumi man wea fraet.
9:28-30. Sapos ples wea iumi preach long hem, samfala pipol savve raf, laek duim nogud samting long iumi, or laek mekem iumi no fren gud witim Jehovah iumi mas tingting gud firstaem long ples wea iumi laek preach long hem and wanem taem long day nao iumi duim preaching waka.
9:31. Taem no eniwan againstim waka bilong iumi, iumi mas gohed studyim Bible and ting raonem for strongim faith bilong iumi. Taem iumi followim samting wea iumi lanem and strong for preach, diswan bae helpem iumi for duim samting wea Jehovah hapi long hem.
PAUL STRONG FOR PREACH
Long 44 C.E., Agabus hem kam long Antioch, ples wea Barnabas and Saul preach long hem “for wanfala year finis.” Agabus talem finis “wanfala bigfala hangre” bae kamap, and diswan hem kamap bihaen tufala year. (Acts 11:26-28) Bihaen Barnabas and Saul “finisim waka for helpem olketa long Jerusalem wea garem need,” tufala go bak long Antioch. (Acts 12:25) Long 47 C.E., wea hem 12-fala year bihaen Saul hem kamap Christian, holy spirit leadim Barnabas and Saul for duim missionary waka. (Acts 13:1-4) Long 48 C.E., tufala go bak moa long Antioch, ‘ples wea God markem olketa for duim waka bilong Hem.’—Acts 14:26.
Naenfala month bihaen, Paul (wea nara nem bilong hem tu Saul) chusim Silas for waka witim hem long mek-tu missionary gogo bilong hem. (Acts 15:40) Timothy and Luke tu go witim Paul. Taem Paul go long Athens and long Corinth, Luke stap long Philippi. Paul stap long Corinth witim Aquila and Priscilla for wan year and six month. (Acts 18:11) Long start long 52 C.E., Paul lusim Timothy and Silas long Corinth, and hem go long Syria witim Aquila and Priscilla long ship. (Acts 18:18) Bihaen datwan, thrifala go long Ephesus and Aquila and Priscilla stap nao long there.
Long 52 C.E., bihaen Paul hem stap lelebet taem long datfala taon Antioch long Syria, hem go long mek-thri missionary gogo bilong hem. (Acts 18:23) Taem hem stap long Ephesus, “toktok bilong Jehovah gohed kasem plande ples and staka pipol biliv long hem.” (Acts 19:20) Paul stap long there for thrifala year. (Acts 20:31) Long taem bilong Pentecost long 56 C.E., Paul stap long Jerusalem. Taem hem long prison, hem preach long olketa bigman long there. Long Rome hem stap prisoner long wanfala haos for tufala year (c. 59-61 C.E.), and long there hem preachim Kingdom and teachim pipol “olketa samting abaotem Lord Jesus Christ.”—Acts 28:30, 31.
Ansa for Olketa Bible Kwestin:
14:8-13—Why nao pipol long Lystra givim ‘disfala nem Zeus long Barnabas, and disfala nem Hermes long Paul’? Long kastom story bilong pipol long Greece, Zeus hem ruler bilong olketa god, and boy bilong hem Hermes, hem god wea savve tumas for toktok. From Paul nao main wan for story kam long pipol, olketa long Lystra nemim hem Hermes, and olketa givim nem Zeus long Barnabas.
16:6, 7—Why nao holy spirit stopem Paul and olketa wea go witim hem for preach long Asia and Bithynia? From olketa no staka dastawe holy spirit leadim olketa for go long samfala difren ples wea pipol bae laek herem story bilong olketa.
18:12-17—Why nao Gallio wea hem wanfala bigman long Rome nating stopem olketa man wea killim Sosthenes? Maet Gallio tingse hem fitim nao for olketa killim Sosthenes bikos luk olsem hem nao leadim pipol for againstim Paul. Bat gudfala samting nao kamaot nomata olketa duim datwan long Sosthenes. Sosthenes hem kamap Christian, and Paul sei hem “brata bilong iumi.”—1 Cor. 1:1.
18:18—Wanem samting nao Paul promis for duim? Samfala savveman tingse Paul promis for kamap wanfala Nazirite. (Num. 6:1-21) Bat Bible nating storyim wanem nao datfala samting wea Paul promis for duim. And tu, Bible no storyim sapos Paul talem datfala promis bifor hem kamap wanfala Christian or bihaen datwan, or sapos hem start for duim samting wea hem promis for duim or hem duim finis datwan. Nomata iumi no savve wanem nao hem promis for duim, iumi savve datwan no mekem hem sin.
Wanem Nao Iumi Lanem?
12:5-11. Iumi mas prea for olketa brata bilong iumi.
12:21-23; 14:14-18. Herod no mekhae long God bat hem mekhae long hemseleva nomoa. Paul and Barnabas no olsem Herod bikos taem pipol praisem tufala, semtaem nomoa tufala les and no letem olketa for duim datwan! Iumi mas no askem pipol for praisem iumi for waka wea iumi duim for Jehovah.
14:5-7. Sapos iumi tingting gud, datwan savve helpem iumi for gohed strong long waka for Jehovah.—Matt. 10:23.
14:22. Olketa Christian savve bae olketa kasem hard taem. Dastawe olketa no duim eni samting wea againstim wanem olketa bilivim taem olketa insaed long hard taem.—2 Tim. 3:12.
16:1, 2. Olketa young Christian mas waka hard insaed kongregeson and askem Jehovah for helpem olketa for garem gudfala nem.
16:3. Iumi mas duim samting wea fitim olketa mark long Bible for mekem pipol laek herem gud nius.—1 Cor. 9:19-23.
20:20, 21. Wanfala important part long ministry bilong iumi hem waka for preach long haos tu haos.
20:24; 21:13. For gohed faithful long God hem important winim for sevem laef bilong iumiseleva.
21:21-26. Iumi mas willing for herem gudfala toktok.
25:8-12. Olketa Christian distaem mas iusim “law for saedem gud nius.”—Phil. 1:7.
26:24, 25. Iumi mas talemaot “olketa samting wea tru and wea showimaot iumi garem gudfala tingting” nomata “olketa man” tingse diswan hem krangge samting.—1 Cor. 2:14.
[Piksa long page 30]
Wanem taem nao Peter iusim “olketa key bilong kingdom”?
[Piksa long page 31]
Sapos iumi no kasem holy spirit, bae hard tumas for preaching waka kasem full world