“Mifala Laekem Kingdom Bilong Iu for Kam”—Waswe, Hem Klosap?
“Taem iufala lukim evri samting hia, iufala bae savve hem klosap for kam, hem aotsaed long door nao.”—MATT. 24:33.
1, 2. (a) Wanem nao savve mekem pipol olsem olketa blind? (b) Iumi savve long olketa wanem samting abaotem Kingdom bilong God?
MAET pipol lukim wanfala samting wea happen, bat plande taem samting wea wanfala man rememberim abaotem datwan savve difren from wanem narawan rememberim. Olsem tu, taem doctor talem man hem garem bigfala sik, maet hem no isi for man hia rememberim evri nara samting wea doctor talem. Or maet man lukaotem eyeglass bilong hem long tebol bat hem no lukim nomata datfala eyeglass stap nomoa. Why nao olketa samting olsem savve happen? Pipol wea duim research long diswan sei taem iumi trae for duim tu-thri samting long semtaem, datwan mekem iumi for olsem iumi blind. Diswan hem bikos brain bilong iumi savve tingim nomoa wanfala samting firstaem, then nara samting bihaen.
2 Staka pipol distaem tu no luksavve long olketa samting wea happen long world, so hem olsem olketa blind. Maet olketa agree start kam long 1914 world hem barava change, bat olketa no minim why nao hem olsem. From iumi studyim Bible, iumi savve Kingdom bilong God hem start for rul long 1914, taem Jesus hem kamap King long heven. Nomata olsem, no evri samting insaed prea for Kingdom bilong God hem kam and for hem duim wanem hem laekem long earth olsem hem duim long heven, hem kamap tru yet. (Matt. 6:10) Firstaem God mas finisim nogud world bilong Satan. Taem datwan happen nomoa, God savve duim wanem hem laekem long earth olsem hem duim finis long heven.
3. From iumi studyim Bible, wanem nao iumi luksavve long hem?
3 From iumi evritaem studyim Bible, iumi luksavve olketa Bible profesi gohed kamap tru distaem. Staka nara pipol nating savve long diswan! Olketa busy tumas long laef bilong olketa seleva and no luksavve long kliafala pruv wea showimaot Christ start for rul long 1914, and klosap nao bae hem finisim disfala nogud world. Sapos iu worshipim God for staka year finis, waswe, iu still barava bilivim world hem klosap for finis, and olketa samting wea happen long earth distaem pruvim datwan? Or sapos iu baptaes no longtaem go nomoa, wanem nao important long iu distaem? Nomata wanem nao ansa bilong iu, bae iumi storyim thrifala important reason why iumi savve Jesus klosap for duim wanem God laekem long earth.
OLKETA MAN WEA RAEDEM HORSE KAM NAO
4, 5. (a) Wanem nao Jesus duim start kam long 1914? (Lukim piksa long start bilong study.) (b) Wanem nao thrifala man wea raedem horse bihaen long Jesus Christ olketa piksarem, and wanem nao pruvim datfala profesi hem kamap tru?
4 Long 1914, Jesus Christ kasem wanfala kraon from God wea showimaot hem kamap King long Kingdom bilong God. Profesi long Revelation chapter 6 sei Jesus hem sidaon antap long wanfala horse wea kala bilong hem white. Stretawe bihaen hem kamap King, hem go for finisim nogud world bilong Satan. (Readim Revelation 6:1, 2.) Datfala profesi sei bihaen Kingdom bilong God hem start for rul, world bae kwiktaem gogo for worse. War, bigfala hangre, olketa nogud sik, and olketa nara samting wea killim dae pipol bae kamap big winim enitaem bifor. Thrifala man wea raedem horse bihaen long Jesus Christ piksarem olketa nogud samting hia.—Rev. 6:3-8.
5 Olsem datfala profesi talem, war hem “aotem peace from earth.” Diswan hem happen nomata staka kantri promis for waka tugeta and stap long peace. World War I hem first wan nomoa long olketa war wea aotem peace from full earth. Nomata bihaen 1914 selen long olketa kantri hem kamap gud, and science faendem olketa niu samting, staka pipol no garem inaf kaikai. Evri year staka million pipol dae from sik, olketa natural disaster, and olketa nara nogud samting. Olketa samting hia happen staka taem tumas and killim dae moa pipol winim enitaem bifor. Waswe, iu luksavve wanem nao olketa samting hia showimaot?
From olketa man wea raedem horse kam nao, evri samting hem gogo for worse (Lukim paragraf 4, 5)
6. Hu nao savve Bible profesi bae kamap tru long 1914, and wanem nao olketa duim taem datwan hem happen?
6 World War I and datfala nogud sik Spanish flu stopem pipol for no luksavve 1914 hem wanfala important year. Bat olketa anointed Christian luksavve “taem wea olketa kantri rul” bae finis long 1914. (Luke 21:24) Olketa anointed Christian no savve hao datfala Bible profesi bae kamap tru, bat olketa savve long 1914 wanfala important samting bae happen saed long rul bilong God. Bihaen, taem olketa minim hao datfala profesi kamap tru, olketa no fraet for talemaot Kingdom bilong God hem start for rul. Pipol spoelem plande brata and sista wea talemaot datfala message, and datwan tu Bible sei bae hem happen. Long olketa year bihaen, olketa enemy kotem olketa brata, duim raf samting long olketa, putim olketa long prison, and killim samfala dae tu bikos olketa laek for stopem preaching waka.—Ps. 94:20; Rev. 12:15.
7. Why nao staka pipol no luksavve olketa samting wea happen long world distaem showimaot olketa Bible profesi kamap tru?
7 From staka samting pruvim Kingdom bilong God hem rul distaem long heven, why nao staka pipol no luksavve long datwan? Why nao olketa no luksavve olketa samting wea happen long world showimaot olketa Bible profesi kamap tru, wea hem nao pipol bilong God story abaotem for staka year finis? Waswe, hem bikos pipol long world no laek for luksavve long olketa samting wea happen? (2 Cor. 5:7) Or waswe, olketa busy tumas long laef bilong olketa dastawe olketa no luksavve long wanem God hem duim? (Matt. 24:37-39) Maet tingting and goal bilong pipol long world bilong Satan stopem samfala for no luksavve long samting wea happen. (2 Cor. 4:4) For luksavve wanem nao Kingdom bilong God hem duim, iumi mas garem faith and spiritual tingting. Iumi hapi tumas bikos iumi luksavve why evri samting hia happen!
WEI BILONG PIPOL HEM WORSE MOA
8-10. (a) Wanem nao pruvim 2 Timothy 3:1-5 hem kamap tru? (b) Wanem nao showimaot evri samting hem barava worse distaem?
8 Mek-tu reason why iumi savve klosap nao Kingdom bilong God bae rulim earth hem bikos wei bilong pipol long world distaem hem barava nogud tumas, and bae hem worse moa. For klosap wan handred year, olketa samting wea 2 Timothy 3:1-5 story abaotem hem kamap tru. Pipol evriwea long world nao duim olketa samting wea datfala scripture storyim. Waswe, iuseleva lukim olketa samting hia tu? Tingim samfala samting wea datfala scripture story abaotem.—Readim 2 Timothy 3:1, 13.
9 Tingim samting wea mekem pipol barava seke long olketa year bilong 1940 or 1950, and comparem datwan witim olketa samting wea happen distaem long ples for waka, and saed long hapitaem, sports, and kaleko and lukluk bilong pipol. Long evri ples distaem pipol barava raf and duim enikaen dirty samting winim bifor. Pipol raf tumas and duim olketa barava dirty samting for trae mekem olketa narawan seke long olketa samting wea olketa duim. Olketa program long TV wea pipol long olketa year bilong 1950 tingse hem nogud, distaem pipol sei hem gud nomoa for famili lukluk long hem. From staka homosexual nao insaed long olketa bisnis saed long kaleko, television, movie, music, and nara hapitaem, olketa mekhae long kaen laef wea olketa garem. Bat iumi savve long tingting bilong God abaotem olketa samting hia, so datwan protectim iumi!—Readim Jude 14, 15.
10 Comparem tu bighed wei bilong young pipol long bifor witim young pipol distaem. Olsem example, long olketa year bilong 1950, parents wari nogud pikinini bilong olketa smokem tobacco, drinkim alcohol, or duim olketa nogud dance. Bat distaem iumi herem olketa nogud samting long nius. Olsem example, wanfala student wea 15 year hem iusim gun for sutim olketa skulfren bilong hem. Hem killim dae 2-fala long olketa and 13-fala nao garekil. Wanfala grup teenager wea drunk killim dae wanfala gele wea naen year and killim nogud dadi and kasin bilong hem tu. Narafala report sei long wanfala kantri long Asia, olketa young pipol nao duim haf long evri criminal samting wea happen insaed tenfala year. Hem isi for luksavve evri samting hem barava worse distaem.
11. Why nao staka pipol no luksavve evri samting hem barava worse distaem?
11 Aposol Peter talem tru samting taem hem sei: “Long olketa last day pipol bae mekfani long olketa gudfala samting and olketa bae duim olketa nogud samting wea olketa seleva laekem. Olketa bae sei: ‘Hem promis for kam, bat wea nao hem? Start kam long taem wea olketa grani bilong iumi dae no eni samting hem change. Evri samting gohed semsem nomoa start kam long taem wea God wakem olketa man.’” (2 Pet. 3:3, 4) Why nao samfala pipol garem kaen tingting olsem? Plande taem, taem iumi lukim olowe wanfala samting, gogo hem olsem normal samting nao. Sapos wanfala gud fren bilong iumi hem seknomoa duim wanfala nogud samting, iumi bae seke fogud. Bat sapos tingting and wei bilong pipol long community isisi change insaed staka year, maet iumi no luksavve nomoa long datwan, and datwan savve spoelem iumi.
12, 13. (a) Why nao iumi shud no letem olketa samting wea happen long world for mekem iumi wikdaon? (b) Wanem nao bae helpem iumi for gohed strong nomata “evri samting hem hard tumas”?
12 Aposol Paul warnim iumi “evri samting [bae] hard tumas” long olketa last day. (2 Tim. 3:1) Nomata olsem, iumi mas stap long disfala world. Iumi savve winim eni sorre samting or hard taem wea kasem iumi. Iumi savve gohed faithful bikos iumi kasem help from Jehovah, holy spirit bilong hem, and Christian kongregeson. God bae givim iumi “strong wea winim strong bilong man.”—2 Cor. 4:7-10.
13 Long start bilong profesi wea Paul talem abaotem olketa last day, hem sei: “Iu mas savve.” Toktok hia showimaot samting wea hem talem long datfala profesi bae hem kamap tru. Iumi savve evri samting bae worse moa go kasem taem wea Jehovah finisim disfala world. Samting wea happen long history showimaot taem pipol changem tingting bilong olketa abaotem wanem hem stret and no stret, datwan savve spoelem community or full kantri. Winim enitaem bifor, pipol evriwea long world no savve wanem nao stret and no stret. Nomata pipol no laek luksavve, evri samting wea happen start kam long 1914 shud pruvim long iumi klosap nao Kingdom bilong God bae finisim evri nogud samting.
DISFALA GENERESON BAE LAEF YET
14-16. Wanem nao mek-thri reason why iumi bilivim Kingdom bilong God hem klosap for “kam”?
14 Mek-thri reason why iumi sure end hem klosap hem bikos long samting wea happen long pipol bilong God. Olsem example, bifor Kingdom bilong God start for rul long heven, wanfala grup bilong olketa faithful anointed Christian gohed worshipim God. Taem samfala samting wea olketa tingse bae happen long 1914 hem no kamap tru, wanem nao olketa duim? Plande long olketa gohed faithful for worshipim Jehovah nomata olketa kasem hard taem and pipol spoelem olketa. Staka long olketa anointed Christian hia olketa gohed faithful go kasem taem olketa dae.
15 Long profesi wea Jesus talem abaotem olketa last day bilong disfala world, hem sei: “Samfala long disfala genereson bae laef yet taem evri samting hia happen.” (Readim Matthew 24:33-35.) Taem Jesus talem toktok “disfala genereson,” iumi luksavve diswan hem olketa anointed Christian wea divaed long tufala grup. Firstfala grup laef long 1914 and olketa luksavve Christ hem kamap King long datfala year. And tu, Jehovah anointim olketa long holy spirit long 1914, or bifor long 1914.—Rome 8:14-17.
16 Evriwan long mek-tu grup bilong “disfala genereson,” olketa laef and Jehovah anointim olketa long holy spirit taem samfala long firstfala grup laef yet long earth. Diswan minim no evri anointed Christian distaem hem insaed long “disfala genereson” wea Jesus story abaotem. Distaem, olketa long datfala mek-tu grup gogo for olo. Nomata olsem, toktok bilong Jesus long Matthew 24:34 mekem iumi sure “samfala long disfala genereson bae laef yet” taem bigfala trabol hem start. Diswan mekem iumi barava sure klosap nao King long Kingdom bilong God bae finisim nogud pipol and mekem wanfala niu world wea evri samting hem raeteous.—2 Pet. 3:13.
KLOSAP NAO CHRIST BAE WIN
17. Olketa samting wea iumi story abaotem helpem iumi for luksavve long wanem samting?
17 Waswe, iu luksavve olketa Bible profesi wea iumi storyim gohed for kamap tru distaem? Olsem Jesus talem, iumi no savve long wanem day and taem nao end bae kam. (Matt. 24:36; 25:13) Bat Paul sei iumi savve long wanem taem nao olketa last day bae start. (Readim Rome 13:11.) Olketa last day hem start finis. Sapos iumi lukluk gud long olketa Bible profesi and samting wea Jehovah God and Jesus Christ duim distaem, bae iumi lukim kliafala pruv wea showimaot disfala nogud world hem gogo for finis.
18. Wanem nao bae happen long olketa wea no laek luksavve Jesus Christ hem King?
18 Klosap nao, olketa wea no laek luksavve long paoa bilong Jesus Christ, wea sidaon antap long horse wea kala bilong hem white, mas luksavve olketa nao rong. Olketa no savve ranawe from judgment wea olketa bae kasem. Taem datwan hem happen, staka long olketa bae fraet and sei: “Hu nao bae laef?” (Rev. 6:15-17) Revelation chapter 7 hem ansarem datfala kwestin. Olketa anointed Christian wea stap yet long earth, and datfala “big crowd” bae laef bikos God hem hapi long olketa. Then datfala “big crowd,” wea hem nao olketa nara sheepsheep, bae go insaed long niu world bilong God.—Rev. 7:9, 13-15.
19. From iu savve end hem klosap, wanem nao iu luk forward long hem?
19 Sapos iumi tingim evritaem olketa Bible profesi wea kamap tru long taem bilong iumi, world bilong Satan bae no mekem iumi busy long olketa samting wea no important, and bae no stopem iumi for luksavve long mining bilong olketa samting wea happen long world tu. Klosap nao long Armageddon, wea hem nao war bilong God wea raeteous, Christ bae win and finisim disfala nogud world. (Rev. 19:11, 19-21) Bihaen datwan, bae iumi hapi fogud!—Rev. 20:1-3, 6; 21:3, 4.