Luka

9 KUA akaputuputu maira aia i te au pipi tino ngauru ma rua ra, kua tuku atura i te mana e te rangi no ratou, ki runga i te au demoni katoa, e kia akaora i te au maki.

2 Kua tono atura aia ia ratou kia tutu aere i te basileia no te Atua, e e akaora oki i te aronga maki.

3 Kua karanga atura aia kia ratou, Auraka ei apinga e apaiia atu i to kotou tere, auraka ei tokotoko, auraka ei pute, auraka ei manga, auraka ei moni; auraka kia taki rua pereue i te tangata okotai.

4 E te are ta kotou e tomo ra, ei reira noo ei, e ka aere atu ei.

5 E te kore e kite mai ia kotou, kia aere ra kotou ki vao i taua oire ra, ka ruru atu i te one o to kotou vaevae ei akakite atu ia ratou.

6 Aere atura ratou na roto i te au vila, i te tutu aere anga i te tuatua meitaki, e te akaora anga i te maki, kare e ngai toe.

7 Kite akera te teterareka ko Heroda i te rongo i te au mea katoa i raveia e ia ra; tumatetenga rava akera aia, no te mea te tuatua maira tetai pae e. Kua kitea mai a Elia; ta tetai pae, Kua tu akaou mai nei a Ioane mei te mate mai;

8 E ta tetai pae, Kua tu akaou mai tetai peroveta taito ra.

9 Kua na ko akerā Heroda, Kua tipuia e au te mimiti o Ioane; koai ra teia nona teianei tuatua taku e akarongo nei? Anoano atura aia kia akara iaia.

10 E oki maira te au aposetolo, kua akakite maira kiaia i te au mea katoa ta ratou i rave ra. Kua rave akera aia ia ratou, aere poiri atura ki tetai ngai motutaa, no te oire i tuatuaia ra e, ko Betesaida.

11 E kite akera te tangata tini, kua aru maira ratou iaia: e kua kapo atura aia ia ratou, tuatua maira kia ratou no te basileia o te Atua, e akaora akera i te aronga maki.

12 E parepare akera te rā, kua aere maira te tino ngauru ma rua ra kiaia, na ko maira, E tuku atu na i te pouou tangata nei, kia aere ana ki te au vila ra, e te au ngai are i vaitata mai nei, kia rauka ta ratou kai e te moe anga; e medebara oki teia ta tatou e noo nei.

13 Kua na ko atura aia kia ratou, Na kotou e apai atu i te kai na ratou. Kua na ko maira ratou, E rima ua a tatou manga, e rua oki ika, oti ra ua; kareka e aere matou e oko i te kai na teia aronga maata. E rima paa tausani te tane.

14 Kua karanga atura aia ki tana au pipi, E akatakoto pupu aere ia ratou ki raro, kia taki rima ngauru i te pupu okotai.

15 Kua pera atura ratou, akatakoto aere atura ia ratou ravarai ki raro.

16 Kua rave iora aia i nga manga e rima ra, e nga ika e rua, nānā akera ki runga i te rangi, akameitaki atura, vavaʼi iora, apai atura na te au pipi ra e tuku atu ki mua i te aroaro o taua aronga maata ra.

17 Kai anake iora ratou e pangia rava akera; akaputuputu iora te totoenga kai, e ki akera nga tapora raungauru ma rua.

18 E tei te pure aia anake uaorai ma tana au pipi; kua ui atura aia kia ratou, Koai au nei i ta te tangata nei tuatua anga?

19 Kua tuatua maira ratou, na ko maira, Ko Ioane bapetizo: te tuatua nei ra tetai pae, Ko Elia: Kua tu akaou tetai o te au peroveta taito ra, ta tetai aronga ra.

20 Kua karanga atura aia kia ratou, Koai ra au nei i ta kotou na tuatua anga? Kua tuatua mairā Petero, na ko maira, Ko te Mesia a te Atua.

21 Kua ako ua atura aia ia ratou, akaue atura, auraka rava ratou e akakite ua atu ki te tangata i te reira tuatua; na ko atura,

22 E manganui to te Tamaiti a te tangata nei mate e tikaʼi, e e akarukeia aia e te aronga pakari, e te kau taunga nunui ra, e te au tata tuatua ra, e e tamate ravaia oki, e e akatu akaouia kia tae ki te po toru.

23 Kua karanga atura aia ia ratou ravarai, Kia inangaro te tangata i te aru mai iaku ra, e akaruke aia iaia uaorai, ka rave ei i tana satauro i tera rā i tera rā, ka aru mai ei iaku.

24 Ko tei anoano i te tāpu i tona ora, kua ngere ïa i te ora; e ko tei tika iaia i te tuku i tona ora iaku nei, e ora ïa tona.

25 Eaa oki ta te tangata nei puapinga, kia rauka iaia to teianei ao katoatoa, kia mate aia uaorai, e kia ngere i te ora?

26 Ko te tangata oki e akama iaku e taku nei tuatua, koia ta te Tamaiti a te tangata nei e akama, kia aere mai aia ma tona uaorai kakā e to te Metua, e to te au angela tapu ra.

27 Koia mou taku e akakite atu kia kotou nei, Kare ua tetai pae i teianei aronga e tu mai nei e rokoia e te mate, e kite ei ratou i te basileia o te Atua.

28 E po varu akera, i muri ake i teianei tuatua anga, kua arataki atura aia ia Petero, e Ioane, e Iakobo, ki runga i te maunga e pure.

29 E te pure ra aia, tu ke atura tona mata, teatea atura tona kakau e te kakā.

30 E i na, te tuatua maira kiaia e toko rua puke tangata, ko Mose e ko Elia;

31 I mama mai raua i roto i te kakā, e kua tuatua iora i te matenga nona ra, te ka tupu iaia i Ierusalema.

32 Kareka ko Petero ma, kua varea ïa e te moe; e ara akera ratou, kite atura ratou i tona kakā, e nga tangata ra i tu katoa i vaitata iaia.

33 E tei te riro ke anga raua iaia ra, kua karanga aturā Petero kia Iesu, E te Orometua e, e mea meitaki kia noo tatou i ko nei: e akatu matou i e toru are puakapa; noou tetai, no Mose tetai, no Elia oki tetai: kare aia i kite i tana tuatua.

34 Te tuatua ra aia, ko te tiao maira i te tapoki anga mai ia ratou; kua mataku akera ratou i to ratou o anga atu ki roto i te tiao.

35 E tetai reo maira no roto mai i taua tiao ra, i te na ko anga mai e, Ko taku Tamaiti akaperepere teia: ka akarongo iaia.

36 E i muri ake i taua reo ra, ko Iesu anake iora te toe. Kua munangaro iora ratou, kare rava i tuatua ua ake ki te tangata i taua au rā ra i te au mea katoa ta ratou i kite ra.

37 E ao akera, e urupu maata tei aravei maira iaia, i to ratou eke anga maira mei runga mai i te tuaivi ra.

38 E i na, kua kapiki maira tetai tangata o taua urupu maata ra, na ko maira, E te Orometua e, te pati atu nei au ia koe, e aroa mai koe i taku tamaiti nei: ko taku tamaiti anau tai ïa.

39 E i na, te opukia nei aia e tetai vaerua ra, e aue iora aia, e aeaia iora aia, ukaia iora te vaa, e kia maata tona paruparu, kua akaruke mamate ua mai aia iaia.

40 I tuatua ana oki au ki te au pipi naau e tuaru i te demoni; kare ra i tika ia ratou.

41 Kua karanga aturā Iesu, na ko atura, Aue ïa uki akarongo kore, e te māro e! mei te aa te roa o toku noo anga ki o kotou nei, e te akakoromaki anga atu kia kotou? Apai mai i to tamaiti ki ko nei.

42 E tei te aere anga mai aia, kua titiri takira atura te demoni iaia ki raro, kua aae maira iaia. Kua kauvae aturā Iesu i taua vaerua viivii ra, akaora atura i taua tamaiti ra, tuku atura ki tona metua tane ra.

43 Kua umere anake atura ratou i te mana maata o te Atua. E te va anake ra ratou i te au mea katoa ta Iesu i rave, kua karanga atura aia ki tana au pipi,

44 Kia tae tikai teianei au tuatua ki roto roa i o kotou pukai taringa: e riro oki te Tamaiti a te tangata nei i te tukuia atu ki te rima tangata.

45 Kare ra ratou i kite i taua tuatua ra, kua tapokiia ïa, kia kore ratou e kite: mataku oki ratou kia ui atu iaia i te reira tuatua.

46 Kua tupu akera te tauetono ia ratou uaorai, koai to ratou te ka maata.

47 Kua kite rā Iesu i te manako o to ratou ngakau, kua rave atura i tetai tamaiti iti, kua tuku maira ki tona pae.

48 Kua karanga atura aia kia ratou, Ko tei kite mai i teianei tamaiti iti no toku nei ingoa, kua kite mai ïa iaku: e te kite mai iaku, kua kite aia i tei tono mai iaku nei: e tei mea ngiti rava i roto ia kotou na, ko te ka maata ïa.

49 Kua tuatua mairā Ioane, na ko maira, E te Orometua, i akara ana matou i tetai tangata i te tuaru anga i te demoni i toou na ingoa; kua karanga atura matou kiaia, Auraka, no te mea kare aia i aru mai ia tatou nei.

50 Kua karanga aturā Iesu kiaia, Auraka te reira e akakoreia atu: ko tei kore i no ko maira, no tatou ïa.

51 E vaitata akera te au rā e riro ei aia ki runga, kua akakoro marie iora aia e aere ki Ierusalema.

52 Kua tono atura i te karere na mua iaia: e aere atura ratou e tomo atura ki tetai vila o to Samaria, e akamanea i tetai tapae anga nona.

53 Kare akera ratou i oo mai iaia, no te mea, te aere atura aia ki Ierusalema.

54 E akara akera nga pipi nana, ko Iakobo raua ko Ioane, i te reira, kua tuatua maira raua, E te Atu, e tika aina ia koe kia akaue atu maua i te ai no runga i te rangi, kia topa mai kia pou atu ratou, mei ta Elia ra?

55 Kua ariu atura aia, kua kauvae atura ia raua, na ko atura, Kare korua i kite i te tu o to korua na ngakau.

56 Kare oki te Tamaiti a te tangata nei i aere mai e ta i te tangata, ei akaora ra. E aere atura ratou ki tetai vila ke.

57 E te aere atura ratou na te arataa, kua karanga atura tetai kiaia, E te Atu, ka aru atu au ia koe i toou au aerenga ravarai.

58 Kua tuatua mairā Iesu kiaia, E ana to te suoli; e toanga to te manu o te reva; kareka te Tamaiti a te tangata nei, kare ona e urunga upoko.

59 Kua karanga atura aia ki tetai, Ka aru mai iaku. Kua na ko maira aia, E te Atu, e tuku ua ake koe iaku kia aere ana au e tanu i taku metua tane.

60 Kua karanga aturā Iesu kiaia, Vaio atu, na tei mate e tanu i to ratou i mate ra; e aere ra koe e tutu aere i te basileia no te Atua.

61 Kua tuatua maira oki tetai, E te Atu, e aru atu au ia koe; e tuku ana ra koe iaku, kia aere au e poroaki ana i toku kopu-tangata.

62 Kua karanga aturā Iesu kiaia, Kare rava e tangata i tuku i tona rima ki te arote, ka akaraʼi ki muri, e tau i te basileia o te Atua.