Galatia

6 E TE au taeake ra, kia rokoia tetai e te apa ra, ka akaora kotou ko tei akono i ta te Vaerua ra i te reira, ma te ngakau maru; ma te manako ia koe uaorai, ko te timata katoaia aea koe.

2 Ka rave atu tetai i ta tetai apainga, kia pera kotou i te akatika i te ture a te Mesia.

3 Kia manako tetai iaia uaorai e, e tangata maata aia, e kare ua ana e puapinga, kua vavare aia iaia uaorai.

4 Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.

5 Ei runga iaia uaorai ta te tangata ravarai apainga.

6 E te tangata i apiiia i te tuatua ra, ka oronga aia i te au mea meitaki ravarai na tei apii mai.

7 Auraka e vavare; kare ua te Atua e vare: ko ta te tangata e ruru ra, ko tana ra ïa e kokoti.

8 Ko tei ruru i ta tona uaorai kopapa, ka rauka iaia te kino i taua kopapa ra; kareka te ruru i ta te Vaerua, ko te ora mutu kore tana e rauka i te Vaerua ra.

9 Auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu.

10 E kia rauka ta tatou ravenga, e takinga-meitaki tatou i te tangata ravarai, kia maata atura ki to te ngutuare o te akarongo ra.

11 Te kite na kotou i te maata anga o te leta taku i tata ia kotou i toku uaorai rima.

12 Te aronga katoa i inangaro i te akamanea ua i te akonoanga o te kopapa nei, te manono ra ratou ia kotou kia peritomeia; ko te takinga-kinoia aea ratou i te satauro o te Mesia, no reira anake oki.

13 Kare oki ratou uaorai ko tei peritomeia i akono i te ture; i inangaro ra ratou kia peritomeia kotou, kia akatietie ratou i to kotou kopapa.

14 Auraka rava ra toku ei akatietie anga ke, mari ra i te satauro a to tatou Atu a Iesu Mesia, i riro ei teianei ao ei mea akasatauroia iaku, e ko au oki i teianei ao.

15 Ia Iesu Mesia nei oki, kare o te peritome, kare o te peritome kore, tei te tangata ou ra.

16 E te tangata ravarai e aere i teianei aerenga, ei au to ratou, e te aroa, e ei runga katoa i te Iseraela o te Atua.

17 E teianei, eiaa rava ei tangata e akapekapeka mai iaku, e a muri ua atu: te apai nei au i te akairo a te Atu ra a Iesu ki runga i toku nei kopapa.

18 E te au taeake e, ei to kotou vaerua te aroa ua o to tatou Atu ra o Iesu Mesia. Amene.