Papa no te Angaanga Evangeria i te 1990

TE AKAMATA nei tetai tuatau no te angaanga evangeria. Ma te au ngutupa no te angaanga e tuera nei i te au ngai ou, te aruaru nei te au Kite akono meitaki ravarai o Iehova kia tere atu ki mua no tetai angaanga maata.

No reira, kua tapapa tikai ma te putuputu atu te aronga apiipii e 24 o te pupu 89 o te Apii Puka Tapu o te Punanga Tiaki Anga o Gileada ki ta ratou porokarama no te ra oronga anga i te pepa ia Tepetema 9, 1990. Kua akaputuputu mai e tere atu i te 5,000 aronga matakitaki o te au manuiri tei patiia e te au mema o te ngutuare o Betela ki teia ra oronga anga i te pepa o teia aronga angaanga evangeria ou, tei rauka takere ta ratou au angaanga ki e tai ngauru au enua. Te akamata anga ki te Are Uipaanga no te Akaputuputuanga i te au Kite o Iehova i Jersey City, New Jersey, kua rongo katoaia te katoa anga o te porokarama e te aronga e putuputu ra ki te Betela i Brooklyn, e te Pama o te Punanga Tiaki Anga, e te Ngai Apiipii Anga no te Punanga Tikai Anga i Patterson, i New York.

Ma te papa tikai i te 10:00 i te popongi, kua kapiki a Theodore Jaracz, tetai mema o te Pupu Akaaere o te au Kite o Iehova e te tiamana no te ra, i tetai imene no te akatuera anga. I muri i teia, kua orongaia te pure e Arthur Worsley o te ngutuare o Betela i Brooklyn. E oti kua tuatua te tiamana no runga ia Angaanga 10:33, te ngai i tuatuaʼi te rangatira anere o Roma ko Korenelio kia Petero: “E teianei, teia anake matou tei mua i te aroaro o te Atua, kia kite matou i te au tuatua katoa ta te Atua i poroaki io kia koe ra.” Kua kiteaia mai e te au angaanga o te tuatua enua te tupu ra i to Petero tuatau kua akatuera te reira i te mataara no te tuatua meitaki kia akakiteia ki te au tangata o te pa enua ravarai.

Kua oronga a Philip D. Wilcox, no ko mai i te Pama o te Punanga Tiaki Anga, i te tuatua mua e itu e te oraora. Te tuatua anga no runga ia Philipi 4:7, kua rave aia ei tumu tuatua nana “E Tuku i te Au o te Atua kia Tauturu ia Koe i Taau Angaanga.” Kua tuatua aia: “Ko Iehova te Tumu o te au mou ravarai. Te rekareka ra aia i te au i roto i tona tu katoa me kore te ki katoa, e kare e kite ana i etai tu apiapi e te taitaia, te manako taitaia anga, me kore te akaangaroi kore i te pae o te manako. No reira, te vaira tetai tu maru e te au te takapini ra i to Iehova tu manea i tona terono, mei tei akaariia e te anuanua tarona e te matie tei kiteaia e Ioane i tana orama. (Apokalupo 4:2, 3) Te totoa ra tona tu au mei iaia e tere atu ki te aronga ravarai tei akatika i te reira kia tauturu ia ratou. Ka tuku ainei koe i te reira?” Kua tuatua te Taeake a Wilcox e rua nga tauturu puapinga, ko te pure e te anoano tikai i te tiaki kia Iehova. (Mika 7:7; Philipi 4:6) Kua kite aia, e kare e mea ta te Atua i tuku ua e akatupu i te mamae mutu kore kia tatou.

Tei aru mai ko Lloyd Barry, tetai mema o te Pupu Akaaere, no runga i te tumu tuatua “E Katakata Ua Atu Rai.” Kua akamata aia ma te tuatua, “E Vairakau Meitaki te Kata.” Kua maara iaia te reira tuatua no te mea i te 1955 ko te reira te tumu tuatua i mua i te kapi o te makatini ko te Awake! te ka tukuia mai i te reo Tiapani. Inara eaa te tu o te kata? Kare i “te kata [maniania e te puapinga kore] o te neneva ra.” (Koheleta 7:6) Mari ra, ko te kata oraora, te maru o te aronga angaanga evangeria e tetai pae te ka ariu mai ki ta Davida patianga ua rai e kia “rekareka . . . ia Iehova.” (Salamo 32:11) Kua akara te Taeake a Barry e noatu te au timata anga pakari, kua rauka ia Iobu i te katakata ua atu, no te mea kua kite aia e te tamou ra aia i te tu akono e te akaaka ki te Atua. Te aronga angaanga evangeria te ketaketa ra noatu te au kiteanga ngata mei to Iobu rai, ka rauka ia ratou te akameitakianga maata i te openga. (Iobu 29:24; 42:12) Kua taopenga te vaa tuatua: “E rave angaanga ua atu rai, e katakata ua atu rai, e ka kokoti katoa rai koe i to Iehova katakata mareka anga e te mutu kore.”

Te vaa tuatua tei aru mai ko Richard E. Abrahamson, tei iki i te tumu tuatua “E tuku i Toou Tu Mako kia Kiteaia e te au Tangata Ravarai,” tei akatumuia ki runga ia Philipi 4:5. I tau ki te tuatua Ereni, te tuatua “mako” ka tuatuaia te reira e ko te “aru akaaka anga atu.” E maata ana to etai aronga angaanga evangeria au manamanata no te mea no ta ratou uaorai i inangaro i te rave. Tetai kua poitirere aia i te tu o tetai taeake evangeria tei tipu i tetai potonga titi i runga i te kainga kai. I muri ake i te 22 mataiti o te angaanga evangeria anga, kua akara tei poitirere ra e te maata anga o te au manamanata tei akamataia no runga ua ia i te au mea kare i maata atu i akapeea tetai i te tipu anga i te titi. Kua ako te vaa tuatua e: “E apii kia kite e akapeea i te akono atu, mei tetai tumu rakau rai i roto i tetai uriia. Te vaira te au puapinga na te aru akaaka anga atu, mei te rauka meitaki anga atu i te akakoromaki i te au timata anga e te tapiri atu ki ta tetai angaanga ma te au o te manako.”

Kua uriuri a Milton G. Henschel, o te Pupu Akaaere i te tumu tuatua “Te Ngaa ua ra Tetai Ngutupa Pararauare te Arataki Atura ki te Angaanga.” Kua kite te Taeake a Henschel e kua aroa a Iesu i te tangata, e kua tangi ia ratou, e kua apii i te au mea e manganui kia ratou. Mei Ephesia kua tata te apotetoro a Paulo ki te Korinetia: “E ngutupa maata e te meitaki tei kiritiia iaku nei: manganui ra te enemi.” (1 Korinetia 16:8, 9) Noatu teia patoi anga, kua apii a Paulo ki roto i te are no te apiipii anga o Tyrannus no tetai rua mataiti, i reira i kiteiaʼi te tuatua o te Patireia i te tapere o Asia. (Angaanga 19:9, 10) Kua arataki atu te tuera anga o te ngutupa ki te manuia anga o tana tutu aere anga. Te angaanga ra rai te putuputuanga o Ephesia i te openga o te anere mataiti mua.​—Apokalupo 2:1-7.

Kua tuatua a Jack D. Redford, tetai tangata ako i Gileada, no runga i te tumu tuatua “E Kimi Matatio ia Kotou Uaorai.” (2 Korinetia 13:5) Kua akatuera te aronga angaanga evangeria o Gileada i te au koro ou e kua akamaroiroi i te au putuputuanga tei akatupu takereia, te akakoromaki maata anga e te patoianga i te maunu ta te Tiaporo i tuku no te uri ke ia ratou. E te kapiti ua maira te aronga ou. Ma te nga kiteanga oraora, kua akatutu te tangata tei ako e mei teaa te puapinga no te akara matatio i to tetai akarongo. Kua ngere tetai tangata angaanga evangeria i tana au angaanga akameitaki anga i muri ake i tona kopae anga ma te ngakau parau i te ako e te akamatakite anga no runga i te kaveinga tarevake. I tetai tua, kua vai rai tetai i roto i tana angaanga ma te mataora, noatu e i tona nga toru marama mua i reira, kua makiia aia tei toe ua mai e pakiri e te ivi pera katoa kua pururu tona rauru e kua ngaro tona akarongo. Tei reira rai aia i muri ake i tetai 42 mataiti e na roto i tana au apii i te Puka Tapu, kua tauturuia e 156 au peretana ki te papetito anga. Kua taopenga te Taeake a Redford e: “E patoi i te Tiaporo e ka oro ke aia mei ia koe. Auraka e mou i tana maunu. E tamou ua rai i te akatika ia koe uaorai. Ka akono a Iehova ia koe.”

Aru mai ko tetai akaou tangata apiipii, ko Ulysses V. Glass, tei tuatua no runga i te tumu tuatua “Tei te Aronga Mako te Pakari.” (Maseli 11:2) Kua taangaanga aia i tetai uati ma tetai patiri tei taangaangaia e te ra no te akatutu e ka rauka i te marama o te Tuatua na te Atua i te “tiati” ua rai ia tatou. “Inara,” kua tuatua aia, “kare anake te kite e oronga mai i te pakari. Te anoano katoaia ra te tu mako e te Atua.” (Mika 6:8) Ka arataki te tu mako ia tatou kia mataku i te Atua, e “ko te akamataanga o te pakari ra, ko te mataku ïa ia Iehova.” (Maseli 9:10) E tikai, kia manako tatou i tetai mea no tatou; ka riro te manako tei akaapa ia tatou uaorai ei mea takore anga. Kua oronga mai a Iehova i tetai tu takake ki etai, mei tana i rave i te tuatau o te akatu anga o te ngai tapu, inara kia taangaangaia te tu akono meitaki ma te mako. Kua tuatua te Taeake a Glass ki te pupu e “i te tuatau o te raveanga, kua oronga mai kotou i te tika o te irinaki anga atu e te akangateitei. E akaari i teia tu akono meitaki mei teia i roto i ta kotou angaanga, e ka akameitaki te Atua ia kotou.”

Kua oronga a Albert D. Schroeder, o te Pupu Akaaere i te tuatua no runga i te “Papa Meitaki no te Angaanga Evangeria i te 1990.” Kua akamata aia: “Kua rauka takere tetai akamata anga maata no te 1990. Kua ruruia tetai au pa enua o Europa i te tua Itinga Ra. I te au marama e manganui i topa akenei, kua akatueraia te Paruru o Berlin. Kua apai The New York Times i te upoko tuatua: ‘Aukute 1990, te Marama tei Ruru i Teianei Ao.’ No reira, te noo nei kotou e te aronga apiipiiia i te tuatau ruruanga. Kua akateateamamao ainei te rima o te marama i te apii anga ia kotou no te reira? E tikai!” E oti kua taiku mai aia i etai au akara anga tauturu o te New World Translation of the Holy Scriptures​—With References e akapeea te apiianga i te reira te akatupu anga i te Tuatua na te Atua kia ora. Tetai apinga ririnui tei akapapa i te aronga apiipii ko te “All Scripture Is Inspired of God and Beneficial,” i teianei i roto i tona tataanga tei akaouia no te 1990. Te puka i nanai ua akenei ko te Mankind’s Search for God ka riro katoa rai te reira ei tauturu e te ririnui no te aronga angaanga evangeria. Kua taopenga te Taeake a Schroeder: “No reira e te au taeake, e akameitaki ia Iehova no te apiipiianga meitaki, e te puapinga tikai ta kotou i rauka​—e mea ketaketa te reira kare e rauka i te ruruia. E aere ki mua ma to Iehova akameitakianga e e irinaki papu iaia e to tatou Arataki meitaki ko Iesu Mesia. Ta tatou tuatua i roto i te au Tuatua Tapu e mea akauruia tikai te reira e ka arataki e te akatere ia kotou i roto i te angaanga evangeria.”

Kua tatauia te au turou anga mei te 11 au enua. Kua rauka i te aronga apiipii ta ratou pepa, e kua tatau tetai ia ratou i tetai reta ma te manako ngakau ki te Pupu Akaaere e te ngutuare tangata o Betela.

Kua kapitiia te uriuri anga i te aiai avatea ma tetai apii tei tapotoia o Te Punanga Tiaki Anga, tei raveia e David L. Walker, tetai mema o te Kumiti o te Punanga Tiaki Anga o te Pama. I reira kua taangaanga te aronga apiipii i te tumu tuatua akauruanga “Te Ririnui o te Pure i roto i te Tutu Aereanga” i te akatutuanga i te au kiteanga i te au koro. Kua oronga tetai putuputuanga i te reira ngai i tetai nuku oraora ko te Tukuia kia Matara no te Akamaata i te Akamori Mou, tei akatumuia ki runga i to Ezera oki anga ki Ierusalema no te akamata i te akamori mou. Kua taopenga te Taeake a Frederick W. Franz, te peretiteni o te Apii o Gileada, ma tetai pure ngakau tae.

[Tutu i te kapi 24]

Te Pupu 89 Apiipiiia o te Apii Puka Tapu o te Punanga Tiaki Anga o Gileada

I roto i te papaanga i raro ake, kua numeroia te au pa mei mua ki muri, e kua papaia te au ingoa mei te tua kaui ki te tua katau i roto i te pa okotai. (1) Ahr, K.; Johnston, L.; Ng Ying Kin, V.; Sukkau, A.; Rodriguez, A.; Myklebust, N. (2) Ahr, H.; Verbeek, P.; Verbeek, K.; DeBolt, S.; DeBolt, S. (3) Sukkau, W.; Ayala, L.; Ayala, S.; Jenson, R.; Ng Ying Kin, J.; Myklebust, T. (4) Rodriguez, C.; Ferlisi, G.; Ferlisi, L.; Tank, J.; Jenson, K.; Tank, J.; Johnston, P.