Te Au Kerititiano Mua e Teianei Ao

MEI te rua tauatini mataiti i topa, kua tupu tetai rave anga vavaria rava atu i te Itinga Rotopu. Kua tonoia mai te Tamaiti anau tai a te Atua mei tona ngai noo anga i te rangi no te noo i teianei ao o te au tangata no tetai tuatau poto. Akapeea te maata anga o te au tangata i te ariu anga atu? Te pau ra te apotetoro Ioane e: “I te ao nei aia [a Iesu], e nana i anga i teianei ao; kare ra to te ao i kite atu iaia. I aere mai nei aia i ona [kainga, NW] tikai [Iseraela], kare ra tona iti-tangata tikai i āriki atu iaia.”​—Ioane 1:10, 11.

Kare tikai teianei ao i ariki ana ia Iesu, te Tamaiti a te Atua. No teaa ra? Kua akamarama a Iesu i tetai tumu i tona karanga anga e: “Te ao . . . te riri mai nei ra iaku, i te mea kua akakite ua atu au e, e tuatua kino ta to reira.” (Ioane 7:7) I te openga, ko teianei rai ao​—tei komonoia e etai au arataki akonoanga ngati Iuda, tetai ariki Edoma, e tetai tangata Roma poritiki​—na ratou i tamate ia Iesu. (Luka 22:66–23:25; Angaanga 3:14, 15; 4:24-28) Akapeea te au pipi a Iesu? Ka papa atu ainei teianei ao i te ariki ia ratou? Kare. I muri poto ua ake i tona matenga, kua akamatakite a Iesu ia ratou: “Naringa kotou [ei tuanga, NW] no teianei ao, e inangaro mai to teianei ao i tona tikai: no te mea ra, kare kotou [ei tuanga, NW] i to teianei ao, ko au i iki ia kotou no roto i teianei ao, i riri mai ei teianei ao ia kotou.”​—Ioane 15:19.

I te Au Tuatau Apotetoro

Kua tika atura ta Iesu au tuatua. I nga mea epetoma ua i muri ake i tona matenga, kua tapekaia te au apotetoro, takinoia, e te papaia. (Angaanga 4:1-3; 5:17, 18, 40) I muri poto ua ake, kua kikaia atu a Setephano maroiroi ra ki mua i te Sunederi Ngati Iuda e oti kua peiia ki te toka kia mate. (Angaanga 6:8-12; 7:54, 57, 58) I muri mai, kua tamateia te apotetoro Iakobo e te Ariki ko Heroda Ageripa I. (Angaanga 12:1, 2) I te tuatau o tona au tere mitinari, kua takinokinoia a Paulo tei akamaroiroiia e te au ngati Iuda o te Totoa Anga.​—Angaanga 13:50; 14:2, 19.

Akapeea te au Kerititiano mua i te ariu anga ki teia tu patoi anga? I te au tuatau akamata anga, i te patoi anga te aronga akaaere akonoanga i te au apotetoro kia kore e tutu aere i roto i te ingoa o Iesu, kua akakite te au apotetoro e: “Ko te Atua ta matou e akarongo e tikaʼi auraka te tangata.” (Angaanga 4:19, 20; 5:29) To ratou tu tamou teia me tupu ake tetai ua atu patoi anga. Noatu rai, kua ako te apotetoro Paulo i te au Kerititiano i Roma ‘kia kauraro marie i te aronga mana taoonga’ kavamani ra. Kua ako katoa aia ia ratou: “Peneiake ko te tika, ko ta kotou ïa e aruaru e, kia noo au ua kotou i roto i te tangata katoa nei.” (Roma 12:18; 13:1) No reira, kua tau te au Kerititiano mua kia rave i tetai aiteite anga ngata. Kua akarongo ratou i te Atua ei Tutara tikai no ratou. I te reira taime rai, e tau ratou kia kauraro i te aronga mana taoonga pa enua e kua tauta i te noo au ua ma te au tangata katoa.

Te Au Kerititiano i Roto i te Ao Roma

I te oki anga ki te ao anere mataiti mua o te Patireia Roma, kare e ekoko anga kua puapingaia te au Kerititiano mei te Pax Romana, me kore te Au Roma, tei akonoia e te au vaeau Roma. Te tuku anga tau o te ture e te akaue anga, te au mataara meitaki, e te teretere anga mako meitaki o te moana e te mareva, kua akatupu te reira i tetai koropini anga tei mareka ra i te akamaata anga o te akonoanga Kerititiano. Ko te tika kua kite te au Kerititiano mua i ta ratou kaiou ki te au tangata e kua aru i ta Iesu akauenga “ka apai mari i ta Kaisara ra kia Kaisara.” (Mareko 12:17) I te tataanga ki te emepera Roma ko Antoninus Pius (138-161 T.N.), kua karanga a Justin Martyr e kua tutaki te au Kerititiano i ta ratou au tero “tei papa maata ake i te au tangata katoa.” (First Apology, pene 17) I te 197 T.N., kua akakite a Tertullian ki te au arataki Roma e “e kaiou akameitaki anga ki te au Kerititiano” ta te aronga koi tero no to ratou tu akava ngakau mako i te tutaki anga i ta ratou au tero. (Apology, pene 42) Ko teia tetai mataara i aru ei ratou i ta Paulo ako anga e kia kauraro ratou i te au mana taoonga.

Pera katoa, me ka tika i ta ratou au kaveinga Kerititiano, kua tauta te au Kerititiano mua i te noo au ua ma to ratou au tangata tupu. Inara kare teia i te mea ngoie ua. E ao akono kore tikai tei takapini ia ratou e kua oonu atu ki roto i te akamori anga Roma Ereni, koia oki koi kapitiia atu nei te akamori anga emepera. I te akamata anga e akonoanga Tutara Enua te akonoanga peikani Roma, no reira ko tetai ua atu patoi anga no te rave i te reira ka tamanakoia e te akaenemi ra i te Tutara Enua. I ea i reira teia te akaruke anga mai i te au Kerititiano?

Kua tata te poropeta Oxford ko E. G. Hardy e: “E manganui te au mea ta Tertullian i tare tei ngata ra no tetai Kerititiano akava ngakau mako, te oanga atu ki roto i te akamori itoro: ei akaraanga, te tia anga matauia no te au tataanga koreromotu; te akakaka anga i te au ngutupa i te au tamataora anga, e te vai atura; te au oroa akonoanga Peikani ravarai; te au kangakanga e te au akaariari anga; te angaanga karape o te apiianga i te au puka noa nei [etene taito]; te angaanga vaeau; te tuku anga taoonga.”​—Christianity and the Roman Government.

Ae, e mea ngata no te noo i roto i te ao Roma ma te kore e pikikaa i te akarongo Kerititiano. Kua tata te tata Varani Katorika ko A. Hamman e: “E mea ngata i te rave i tetai ua atu mea ma te kore e tu atu ki tetai mea atua. Kua apai mai to te Kerititiano turanga i te au manamanata kiaia i te au ra; kua noo aia i vao ake i te rave anga a te au tangata . . . Kua aro atu aia i te au manamanata tupu ua i te kainga, i te au mataara, i te makete . . . I runga i te mataara, me e tangata Roma e me kare, kia akaari tetai Kerititiano i tona upoko me pati i tetai iero me kore tetai tiki. Akapeea e raukaʼi iaia kia kore e rave i te reira ma te kore e akakeu i te tu tarotokaka, inara akapeea e raukaʼi iaia i te aru atu ma te kore e rave i tetai akangateitei anga? Me tei roto aia i te pitiniti e kua anoano i te rave mai i te moni no tetai tuatau poto, kua anoanoia e kia tia aia ki te tangata oronga moni na roto i te ingoa o te au atua. . . . I te mea ka ariki aia i tetai tuku anga taoonga, kua anoanoia aia kia oronga i tetai atinga. Me tukuia aia ki roto, akapeea e raukaʼi iaia i te kopae i te rave anga i te tia e te pirianga ki roto i te au peu a te angaanga vaeau?”​—La vie quotidienne des premiers chrétiens (95-197) (Te Oraanga o te Au Ra i Rotopu i te Au Kerititiano Mua, 95-197 T.N.).

E Au Tangata Meitaki, Inara Kua Akakinoia

Mei te 60 me kore 61 T.N., i to Paulo taime i Roma te tapapaanga i ta Emepera Nero akavaanga nona, kua karanga te au ngati Iuda puapinga no runga i te au Kerititiano mua e: “E tikai no runga i teia akapupu anga kua kiteaia e matou e te tuatua patoiia ra te reira i te au ngai ravarai.” (Angaanga 28:22) Te akapapu ra te papaanga tuatua enua e kua tuatua patoiia te au Kerititiano​—inara ma te tika kore tikai. I roto i tana puka The Rise of Christianity, kua karanga a E. W. Barnes e: “I roto i te au pepa mua tei akamanaia kua komonoia te neke anga Kerititiano ei mea tu akono tikai e te aru i te ture. Kua anoano tona au mema kia riro mai ei au tangata meitaki e te au tangata tiratiratu. Kua kopae ratou i te au tarevake e te au ravenga akonoanga peikani. I te oraanga takake kua anoano ratou kia riro mai ei au tangata tupu au e te au taeake tei tau ra kia irinakiia. Kua apiiia ratou kia mako, kia rave angaanga e kia ma te oraanga. I rotopu i te pikikaa e te tu viivii te autu ra, i te mea e e tiratiratu ratou ki ta ratou au kaveinga, e tuatua tika ratou e te tuatua mou. E teitei tikai ta ratou au turanga i te pae o te ainga: kua akangateiteiia te tapeka anga akaipoipoanga e e ma te oraanga ngutuare tangata. Ma te au tu akono mei teia, kare ratou, tei manakoia e tetai ra, i riro ana ei au tangata akatupu pekapeka. Inara no tetai tuatau roa kua akavaavaaia ratou, kua akakinoia e te makitakitaia.”

Mei te ao taito ra tei kore i marama ana ia Iesu, kare te reira i marama ana i te au Kerititiano e kua makitakita ia ratou. I te mea e kua patoi ratou i te akamori i te emepera e te au atua peikani, kua akaapaia ratou ei aronga irinaki kore e atua tetai. Me tupu tetai tumatetenga, kua akaapaia ratou no te akariri anga i te au atua. No te mea e kare ratou i aere ana ki te au akatutu anga akono kore me kore te au akaariari anga tumutoa akamaringi toto ra, kua tamanakoia ratou e e aronga piri kore ki te au tangata, pera katoa ei ‘aronga makitakita i te au tu tangata.’ Kua karanga to ratou au enemi e kua akapueurikiriki te “akapupu anga” Kerititiano i te au kainga e kua riro te reira ei mea kino ki te turanga tau o te au tangata. Kua tuatua a Tertullian no runga i te au tane peikani tei inangaro i ta ratou au vaine kia akaturi i te mea e kia riro mai ei au Kerititiano.

Kua aviriia te au Kerititiano no te mea kua patoi ratou i te titiri anga pepe, tei rave uaia i te reira taime. Inara, kua akaapa to ratou au enemi ia ratou no te tamateanga i te au tamariki. Kua pikikaaia e kua inu ratou i te toto o te au tamariki tei akaatingaia i ta ratou au uipaanga. I te reira tuatau rai, kua tauta to ratou au enemi i te maro ia ratou kia kai i te totiti toto, noatu te kiteanga e te patoi ra teia i to ratou akava ngakau. No reira kua akatarevake rai teia aronga patoi i ta ratou uaorai akaapa anga.​—Tertullian, Apology, pene 9.

Akavaavaaia ei Akapupu Anga Ou

Kua tata te tata tuatua enua ko Kenneth Scott Latourette e: “Noatu rai ko tetai atu au akaapa anga tei tuku i te akonoanga Kerititiano kia akakinoia no tona akamata anga ou e kua tuke te reira ki te tu tika o tona au enemi aiteite ra [te akonoanga Iuda e te au akonoanga Roma Ereni peikani].” (A History of the Expansion of Christianity, Voriumu 1, kapi 131) I roto i te rua anere mataiti T.N., kua kapiki te tangata Roma tata tuatua enua ko Suetonius i te akonoanga Kerititiano ei “tetai ravenga mataku tau kore ou e te oripu ua.” Kua akatika a Tertullian e kua makitakitaia te ingoa Kerititiano e kua reka koreia te au Kerititiano ei akapupu anga. Te tuatuaanga no runga i ta te aronga akaaere o te Patireia Roma tamanako anga i te au Kerititiano i te rua anere mataiti, kua tata a Robert M. Grant e: “Ko te tamanako anga tumu ma te ngoie e e anoano koreia te akonoanga Kerititiano, penei e e akonoanga kino.”​—Early Christianity and Society.

Akaapaia no te Taui Anga Taumaro Ra

I roto i tana puka Les premiers siécles de l’Eglise (Te Au Anere Mataiti Mua o te Akonoanga), kua tata te poropeta Sorbonne ko Jean Bernardi e: “Kia aere [te au Kerititiano] ki vao no te tuatua i te au ngai ravarai e ki te au tangata ravarai. I runga i te au mataara maata e i roto i te au oire, i te au ngai tangata e i roto i te au kainga. Ma te arikiia mai e me kare e arikiia mai. Ki te aronga putaua, e ki te aronga apinganui tei akateiaaia ki ta ratou au apinga. Ki te aronga rikiriki e ki te au kavana o te au ngai Roma . . . Kua teretere ratou na runga i te mataara, te au pai, e te aere ki te au ope o te enua nei.”

Kua rave ainei ratou i teia? Ma te tika kua pera ratou. Kua tuatua te poropeta ko Léon Homo e i tau ki te manako tuatua a te au tangata kua patoiia ratou no te mea no ta ratou “ravenga taui anga ngakau tae tikai.” Kua akakite te poropeta ko Latourette e koi ngaro ei to te au ngati Iuda maroiroi no te akatupuanga i te tauianga, “i tetai tua, ko te au Kerititiano, e tu mitinari taumaro to ratou no reira i akakeu ei kia kore ratou e inangaroia mai.”

I te rua anere mataiti T.N., kua aviri te tangata Roma kite ko Celsus i te au ravenga tutu aere a te au Kerititiano. Kua akakite aia e ko te akonoanga Kerititiano na te aronga kite kore te reira e ka rauka te reira i te ‘akakeu anake i te neneva ra, te au tavini, te au vaine, e te au tamariki rikiriki.’ Kua akaapa aia i te au Kerititiano no te apiianga i “te au tangata irinaki ua,” te raveanga ia ratou kia “irinaki ma te kore e manako tau.” Kua tuatua aia e kua akakite ratou ki ta ratou au pipi ou e: “Auraka e ui i te au uianga; e irinaki ua.” Inara, i tau kia Origen, kua tuatua katoa a Celsus uaorai e “kare ko te aronga kite kore anake ua tei aratakiia e te apiianga o Iesu kia aru i Tana akonoanga.”

Kare e Kapiti Anga Akonoanga

Kua aviri maataia atu te au Kerititiano mua no te mea kua tuatua ratou e tei ia ratou te tuatua mou o te Atua mou okotai. Kare ratou e ariki i te kapiti anga akonoanga, me kore te kapiti anga akarongo. Kua tata a Latourette e: “Kare mei te maata anga o te au akarongo i te reira tuatau, kua akaenemi ratou [te au Kerititiano] i tetai atu au akonoanga. . . . Ei tuke ki te akakoromaki anga tau maata tei akatutuia e tetai atu au pupu akonoanga, kua akakite ratou e tei ia ratou te tuatua mou tikai.”

I te 202 T.N., kua tuku te Emepera Septimius Severus i tetai tuku anga ture te patoianga i te au Kerititiano mei te rave anga i te au taui anga. Inara kare teia i tapu ana ia ratou mei te akakitekiteanga i to ratou akarongo. Kua akatutu a Latourette i te tupu anga: “I tana patoi anga no te tuku ua atu ki te akonoanga peikani o te reira taime e ki te manganui o te au peu a te au tangata e te au rave anga tu akono o te reira tuatau kua akatupu te [akonoanga Kerititiano mua] i tetai taokotai anga e tetai akaaerenga tei akanoo ra i te reira kia patoi i te au tangata. Ko te akaatea anga mai mei te piri anga atu ki te reira, kua oronga mai ia i te akapapu anga ki tona aronga akarongo tei akatupu ra i tetai tumu anga maroiroi ei patoi i te takinokino anga e kia rauka te maroiroi i te reanga i te aronga tei taui.”

No reira te taka meitaki ra te papaanga tuatua enua. Ko te tuanga puapinga maata, i te au Kerititiano mua e tauta ra kia riro mai ei au tangata meitaki e te noo au ua ma te au tangata katoa, kua patoi ratou kia riro mai “[ei tuanga, NW] no teianei ao.” (Ioane 15:19) Kua akangateitei ratou i te aronga mana taoonga. Inara me patoi a Kaisara ia ratou mei te tutu aere anga, kare atu a ratou ravenga mari ra ko te tamou ua atu i te tutu aere. Kua tauta ratou i te noo au ua ma te au tangata katoa inara kua patoi i te tuku ua atu i te pae o te au turanga akono e te akamori anga peikani. No te katoa anga o teia au mea, kua akavaavaaia ratou, kua akakinoia, makitakitaia, e te takinokinoia, mei ta Karaiti i totou ra e ka peraia ratou.​—Ioane 16:33.

Kua tamou ua atu ainei to ratou tu takake mei teianei ao? Me kare ra ma te patianga o te tuatau, ko te aronga tei tuatua ra e kua rave i te akonoanga Kerititiano, kua taui ainei ratou i to ratou tu no runga i teia?

[Tataanga i te kapi 4]

“Kua apai mai to te Kerititiano turanga i te au manamanata kiaia i te au ra; kua noo aia i vao ake i te rave anga a te au tangata”

[Tataanga i te kapi 6]

“Te akonoanga Kerititiano [tei tukuia] kia akakinoia no tona akamata anga ou e kua tuke . . . ki te tu tika o tona au enemi aiteite ra”

[Tutu i te kapi 3]

I te mea e kua patoi te au Kerititiano i te akamori i te emepera Roma e te au atua peikani, kua akaapaia ratou ei aronga irinaki kore e Atua tetai

[Akameitakianga]

Museo della Civiltà Romana, Roma

[Tutu i te kapi 7]

Kua kiteaia te au Kerititiano o te anere mataiti mua ei aronga maroiroi i te tutu aere i te tuatua o te Patireia

[Akameitakianga no te Tutu i te kapi 2]

Cover: Alinari/​Art Resource, N.Y.