Ko Iesu—Te Tutara “Mei Ito Mairai Oki Tona Au Aerenga”

KA TUPU te tu oraora ia koe e tatari ra i te taenga mai toou kopu tangata kua roa ra te ngaro anga. I te openga, kua aravei koe iaia e kua aroa maanaana atu iaia. Kua akarongo marie atu koe iaia e tuatua maira kia koe i te tumu i tono mai ei tona metua iaia kia aravei ia koe. I reira kua tae viviki mai te tuatau nona kia oki ki tona kainga. E mea mii, kua karanga atu koe kiaia e aere ra. Te ngere anga taau i manako ngakau ra i tona akaruke anga ka meangiti mai me tae mai te tuatua e kua tae meitaki atu aia ki te kainga.

I muri iora, ia koe e kimikimi ana i roto i etai pepa taito, kua maara koe i etai reta tei taiku poto ua maira i te au ravenga a to kopu tangata i mua roa ake i tona akamata anga i tona tere kia aravei ia koe ra. Ta taua au reta ra i akakite kia koe te oronga ra i te au kite oonu marekaanga i tona tupu anga mai e ka akamaata atu i toou ariki anga no tona aere anga mai kia aravei ia koe e tana angaanga oki i teianei.

“Mei Ito Mairai”

I roto i te au pepa taito ra tei vaira ki te au ngati Iuda o te anere mataiti mua ra ko te au tataanga a te peroveta ra ko Mika, tei tataia ra i etai itu anere mataiti i mua akera. Te tou ra teia ki te ngai anauiaʼi te Mesia. “E mea ngiti rai koe, e Betelehema Epharata, kia kapiti katoa ki roto i te au tausani i Iuda ra, e tae maira aia kiaku nei mei roto mai ia koe ra, ko te ka riro ei tutara i Iseraela nei; mei ito mairai oki tona au aerenga, mei tupua rava mai.” (Mika 5:2) Tau tikai ki teianei au tuatua, kua anauia mai a Iesu i te oire Iudea o Betelehema i te mataiti tei tapaia i teianei e 2 M.T.N. Inara akapeea e tau ei tona akamata anga e “mei ito mairai”?

I vai ana a Iesu i mua ake i tona riroanga ei tangata. I tana reta ki to te au Kerititiano i Kolosa, kua akataka mai te apotetoro ko Paulo ia Iesu ra ei “te tu tikai aia o te Atua akara koreia, ko te Tama mua aia o te au mea ravarai i angaia ra.”​—Kolosa 1:15.

Ko Iehova, te Tumu o te pakari, kua anga mai i tana Tama mua ei ‘ou tana au angaanga,’ kia taiku i ta te Ariki ko Solomona ra tuatua akauruia i tataia ra i te puka o Maseli. I muri ake i to Iesu ra aaere anga i runga i te enua nei e tona oki anga ki te rangi ra, kua akakite aia e koia tikai “te tumu o te au mea ravarai a te Atua i angaia ra.” Ei te tu pakari i akaperetanaia ra, kua akakite maira Iesu i mua ake i tona riro anga ei tangata e: “[Ia Iehova] i tamou i te au rangi ra, tei reira au.”​—Maseli 8:22, 23, 27; Apokalupo 3:14.

Mei te akamata anga mairai, kua orongaia ki te Tamaiti a te Atua ra tetai angaanga taka ke, koia oki ei tetai “pu rave angaanga” i te pae i tona Metua. Mei teaa ra te rekareka ta te reira i apai mai kia Iehova! “Kua riro ko au tana [ia Iehova] i rekareka tikai i te au ra ravarai,” ta te Maseli 8:30, (NW) i akakite, ma te kapiti anga mai, “kua rekareka tamou marie au ki mua i tona aroaro i te au tuatau katoa ra.”

Kua pati atu a Iehova i muri iora ki tana Tama mua kia rave kapiti raua i te anga mai i te au tangata nei. ‘E anga taua i te tangata i to taua uaorai tu,’ tana i tuatua, ‘kia aite ki to taua uaorai tu.’ (Genese 1:26) Ei tetai tupu anga, kua tupu akaou mai tetai atu rekareka anga. “Tei te au tamariki a te tangata ra,” ta Iesu i akataka mai i mua ake i tona riro anga ei tangata, “toku mataora anga.” (Maseli 8:31) I te akamataanga i tana Evangeria, kua akakite te apotetoro ko Ioane i ta Iesu ra tuanga i rave i te anga mai anga i mua ake i tona riro anga ei tangata: “Nana i anga te au mea katoatoa; kare ua tetai mea i angaia, tei kore i angaia e ia.”​—Ioane 1:3.

To Iehova ra Vaa Tuatua

Te akaanga ra ta Ioane au tuatua i te manako anga ki tetai atu tu angaanga tei rekarekaia ra e te Tamaiti a te Atua, koia oki, tona riroanga ei vaa tuatua. Mei te akamataanga maira, kua rave aia ei te Logo. No reira, i ta Iehova ra tuatua anga kia Adamu, e i muri iora i tana tuatua anga kia Adamu raua ko Eva, penei kua rave aia i te reira na roto i te Logo ra. E koai oki e meitaki atu kia oronga i ta te Atua ra au apiianga no te meitaki o te tangata nei i tei rekareka ra ia ratou ra?​—Ioane 1:1, 2.

Mei teaa ra te mamae anga te Logo ra i te kite anga i to Eva e i to Adamu oki akarongo kore i Tei Anga mai ia raua ra! E mei teaa katoa oki tona anoano anga kia rapakau i te au kino ta to raua akarongo kore i apai mai ki runga i ta raua anaunga! (Genese 2:15-17; 3:6, 8; Roma 5:12) I te tuatuaanga kia Satani, tei akamaroiroi atura ia Eva kia meameaau, kua na ko atura Iehova: “Ka tuku oki au i te ke ia korua ko te vaine, e to uanga e tona uanga.” (Genese 3:15) I te kiteanga i tei tupu i Edene ra, kua kite te Logo e ei te tuanga maata o te “uanga” o te vaine ra, ka riro aia ei takete no tetai makitakita anga kino. Kua kite aia e e ta tangata a Satani.​—Ioane 8:44.

I to Satani akaekoko anga i to Iobu ra tu tiratiratu, e mea tika kua manako ngakau riri te Logo ra i te au akaapaanga akakino anga tei tukuia ra ki tona Metua. (Iobu 1:6-10; 2:1-4) E tika ra, i tana tuanga ei te angera maata ra, kua matauia te Logo ra e ko Mikaela, tera te aite anga o tona ingoa “Koai Tei Aite Atu ki te Atua?” e te akakite ra e akapeea tana akateitei ia Iehova ki runga ake i te aronga katoa tei rave ra kia riro ia ratou to te Atua ra tu ngateitei.​—Daniela 12:1; Apokalupo 12:7-10.

I te akakitea anga mai te tuatua enua o Iseraela ra, kua kite atu te Logo ra i te au tauta anga a Satani kia akaariu ke i te au tangata i te akamori ma ra. I muri mai i te Aerenga mai ki vao i Aiphiti, kua tuatua te Atua kia Iseraela na roto ia Mose: “I na, te tono nei au i tetai Angela i mua ia koe, e tiaki ia koe i te arataa ra, ei arataki oki ia koe i te ngai i akonoia e au ra. Kia matakite koe iaia, e akarongo i tona reo; auraka e akakoko atu iaia; kare oki aia e akakore i ta kotou ara; no te mea, tei iaia toku nei ingoa.” (Exodo 23:20, 21) Koai teia angera? Penei, ko Iesu i mua ake i tona riro anga ei tangata.

Kauraro Anga Tiratiratu

Kua mate a Mose i te 1473 M.T.N., e kua tanumia tona kopapa “i tetai o, i te enua i Moabi ra, i vaitatao i Bete-peora.” (Deuteronomi 34:5, 6) I te akara anga kua anoano a Satani kia rave i te kopapa, penei kia tamata i te akamori itoro. Kua patoi a Mikaela i te reira inara kua akaariu kauraro atu ki te mana o tona Metua ko Iehova ra. ‘Kare i tapepe akakino atu ia Satani ra,’ kua akamatakite atu a Mikaela ia Satani ra e: “Na Iehova e patoi atu ia koe.”​—Iuda 9.

I muri mai kua akamata to Iseraela i te akavi i te Enua Taputouia o Kanaana. I vaitata i te oire o Ieriko ra, kua rauka ia Iosua te akapapu anga i te arataki anga marie a te Tuatua ra i te iti tangata. I reira kua aravei atu aia i tetai tangata te apai ra i tetai koke unuiia. Kua aere atura Iosua ki taua tangata ke ra e kua ui atura: “No matou aina koe, e no to matou au enemi ainei?” E tamanako ana i to Iosua ra poitirere i te akakite anga mai taua tangata ke ra i te akataka anga iaia, i te na ko anga: “Kare; i aere maira au ei Rangatira no te au nuku a Iehova nei.” No reira rai a Iosua i topaʼi ki runga i tona mata ki mua i teianei komono akateiteiia no Iehova ra, kare e ekoko anga e ko Iesu ia i mua ake i te riroanga ei tangata te ka riro i muri iora ei te “Mesia te Ariki ra.”​—Iosua 5:13-15; Daniela 9:25.

Kua raveia tetai atu maroanga ma Satani i te tuatau o te peroveta a te Atua ra ko Daniela. I teia atianga kua turu atu a Mikaela i tona oa angera i ‘tei tu patoi mai anga’ te ariki temoni o Peresia ra e toru epetoma. Kua akataka maira taua angera ra: “I na, ko Mikaela, tetai ariki maata, tei aere mai e tauturu iaku; i roaʼi oki au ki reira ki o te au ariki no Peresia ra.”​—Daniela 10:13, 21.

Kaka Anga i Mua Ake, e i te Riro Anga Oki ei Tangata

I te 778 M.T.N., te mataiti i mate ei te ariki Iudea ko Uzia, kua kite te peroveta a te Atua ra ko Isaia i tetai orama no Iehova i runga i tona terono teitei. “Koai taku e tono? koai te ka aere no tatou?” ta Iehova i ui. Kua oronga ua a Isaia iaia uaorai, inara kua akamatakite atura Iehova iaia e ko tona au tangata Iseraela ra ka akarongo kore ki tana au akakiteanga. Kua akaaite atu te apotetoro ko Ioane i te au ngati Iuda irinaki kore o te anere mataiti mua ra ki te au tangata o to Isaia tuatau ra, e kua akakite aia: “I pera mai a Isaia, i te kite anga aia i tona kakā.” I toai kaka? I to Iehova e to Iesu i te pae iaia i te paepae i te rangi ra i mua ake i tona riroanga ei tangata.​—Isaia 6:1, 8-10; Ioane 12:37-41.

I etai au anere mataiti i muri iora i tae mai ei ta Iesu ra angaanga maata tae roa mai ki taua tuatau ra. Kua tauiia mai e Iehova te mana oraanga o tana Tamaiti akaperepere mei te rangi mai ki roto i te vairanga tamariki o Maria. E iva marama i muri iora kua anau aia i tetai pepe tamaroa, ko Iesu. (Luka 2:1-7, 21) I te au tuatua a te apotetoro ko Paulo: “Kia tae rava akenei ra ki te tuatau tikai, kua tono maira te Atua i tana Tamaiti, na te vaine i anau.” (Galatia 4:4) Pera katoa oki, kua akakite te apotetoro ko Ioane: “I riro mai nei te Logo ei tangata, e kua puakapa mai ki o matou nei, (kua kite matou i tona kakā, te kakā e tau i te Tamaiti anau tai a te Metua ra) kua ki i te aroa ua e te tuatua-mou.”​—Ioane 1:14.

Kua Mama Mai te Mesia

I tona tae anga ki te 12 mataiti, kua riro taua Iesu ou ra kia ariki e ka tika aia kia rave maata i te angaanga a tona Metua. (Luka 2:48, 49) I etai 18 mataiti i muri iora, kua aere mai a Iesu kia Ioane Papetito i te Kauvai i Ioridana ra e kua papetitoia. Ia Iesu e pure ra, mavete akera te au rangi, e kua eke maira te vaerua tapu ki rungao iaia. E tamanako ana i te vai anga te au maaraara anga tei aere mai ra ki tona manako i tona maara anga i te au tauatini ua atu mataiti kare ra e rauka kia tatauia iaia i angaangaʼi i te pae i tona Metua ei pu angaanga, ei vaa tuatua, ei rangatira o te nuku a te Atua ra, e ei angera maata ra, ko Mikaela. I reira kua tae mai te mareka anga i te akarongoanga i te reo o tona Metua i te tuatuaanga kia Ioane Papetito: “Taku tamaiti akaperepere teia kua mareka rava au iaia.”​—Mataio 3:16, 17; Luka 3:21, 22.

Kare rava a Ioane Papetito i ekoko i to Iesu ra vaianga mai i mua ake i tona riroanga ei tangata. I to Iesu ra akavaitata atuanga kiaia, kua na ko maira Ioane: “Ka akara na i te Punua-mamoe a te Atua, ko tei apai ke atu i te ara a to te ao!” E kua tuatua katoa aia: “Koia teia taku i karanga ra e, Te aere mai nei tetai tangata i muringao iaku nei, e kua riro aia i mua iaku: ko mua rai oki aia iaku.” (Ioane 1:15, 29, 30) Kua kite katoa oki te apotetoro ko Ioane i to Iesu vaianga mai i mua ana. “Ko te aere mai mei runga ra, ko tei maata ïa,” tana i tata, e: “Ko to runga mai i te rangi ra, ko tei maata ïa. Ko tana i akara ra, ko tana i akarongo ra, ko tana rai e tuatua nei.”​—Ioane 3:31, 32.

Vaitata i te mataiti 61 T.N., kua raurau atu te apotetoro ko Paulo i te au Kerititiano Epera kia ariki i te puapinga maata katoa o te taenga mai te Mesia ra ki runga i te enua nei e tana angaanga oki e Taunga Maata. I te taki atuanga i te manako ki ta Iesu ra tuanga ei Vaa Tuatua, kua tata a Paulo: “Ko te Atua . . . tei tuatua mai ïa kia tatou i teianei tuatau openga i tana Tamaiti, . . . e kua anga oki i nga ao katoa nei iaia.” Me te taiku ra teia i ta Iesu tuanga ei tetai “pu angaanga” i te anga maianga ra me kare ki tona o anga ki roto i ta te Atua akatupu anga akanoonoo anga no te akaongi anga i te tangata nei, kua tuatua katoa maira Paulo i konei i tana akakite anga i to Iesu ra vaianga i mua ake i te riroanga ei tangata.​—Ebera 1:1-6; 2:9.

Tiratiratu “Mei Ito Mairai”

Ki te au Kerititiano i te anere mataiti mua ra i Philipi, kua tata atura Paulo i teia akamaroiroi anga: “Kia okotai rai o kotou tu ngakau e to te Mesia ra to Iesu: Ko te tu ïa aia no te Atua, e kare aia i manako e e apinga āru kia aite katoa aia i te Atua ra: Kua tuku ke atura ra aia i tona uaorai tu, e kua rave i to te tavini, i te riro anga mai mei te tangata nei te tu, kua taakaaka iaia uaorai i te akonoanga e tae ua atu ki te mate, ki te mate satauro ra.” (Philipi 2:5-8) Kua akono aroa ua atura Iehova ki to Iesu aerenga tiratiratu na te akatuakaou anga iaia e i reira kua turou akaou iaia ki te rangi ra. Mei teaa ra tetai akatauanga meitaki no te tiratiratu na roto atu i te tuatau roa ta Iesu i akaruke mai no tatou nei.​—1 Petero 2:21.

Mei teaa ra ta tatou akameitaki anga no te au akara anga ta te Pipiria i oronga mai no to Iesu ra oraanga i mua ake i te riroanga ei tangata! Te akamaroiroi tika maira i ta tatou akatika anga kia aru i tana akatauanga no te angaanga tiratiratu, e maata oki i teianei iaia e tutara nei ei Ariki i te Patireia Mesia o te Atua ra. Kia akapaapaa tatou i te “Ariki o te Au,” koia Iesu Karaiti, to tatou Kavana e te Tutara “Mei ito mairai oki tona au aerenga”!​—Isaia 9:6; Mika 5:2.

[Pia i te kapi 24]

Akakite Anga i Tetai Oraanga i Mua Ake i te Riro Anga ei Tangata

Ta Iesu uaorai au tuatua, i raro akenei, i akakite maata i tona ora anga i mua ake i te riro anga ei tangata:

◻ “Kare rava e tangata i tae ki runga i te rangi, mari ra ko tei aere mai ki raro mei runga mai i te rangi ra, ko te Tamaiti a te tangata.”​—Ioane 3:13.

◻ “Kare a Mose i oronga mai i te kai no te rangi na kotou; kua oronga maira taku Metua i te kai tikai o te rangi na kotou. Tera ta te Atua kai, ko tei eke mai mei te rangi, e ko tei oronga mai i te ora no to te ao. . . . I eke mai nei oki au mei te rangi mai, e akono i to tei tono mai iaku nei anoano, auraka ei toku uaorai anoano.”​—Ioane 6:32, 33, 38.

◻ “Ko te kai teia no te rangi mai, kia kaikai ua te tangata i te reira, e kia kore rava e mate. Ko au te kai ora, ko tei eke mai mei te rangi: ko te ka kai i teianei kai, ka tika ïa i te ora anga e tuatau ua atu.”​—Ioane 6:50, 51.

◻ “Naringa paa kotou e kite ana i te Tamaiti a te tangata i te oki akaou anga ki runga i te ngai tana i noo i muatangana?”​—Ioane 6:62.

◻ “Ka tika rai taku tuatua: kua kite oki au i te ngai no reira au nei, e te ngai taku e aere nei; . . . no raro nei kotou; no runga au: no teianei ao kotou; kare au no teianei ao.”​—Ioane 8:14, 23.

◻ “Naringa ko te Atua to kotou Metua ra, kua anoano mai kotou iaku: no reira oki au nei, mei reira mai au i te Atua ra; kare oki au i aere ua mai, nana oki au i tono mai.”​—Ioane 8:42.

◻ “Tika, tika tikai taku e karanga atu kia kotou, Kare a Aberahama i anau ra, Te noo nei au.”​—Ioane 8:58.

◻ “E taku Metua, ka akakakā mai koe iaku i mua i toou aroaro na, i te kakā noku ia koe ou ua teianei ao. E taku Metua e, kua anoano au i te aronga taau i o mai noku ra, ei vaitata katoao oki iaku, i te ngai taku e noo ra, kia akara mai ratou i toku kakā, i taau i o mai noku ra: kua akaperepere mai ana oki koe iaku ou teianei ao i angaiaʼi.”​—Ioane 17:5, 24.

[Tutu i te kapi 23]

Kua aravei atu a Iosua i te rangatira nuku o Iehova