Genese

3 E PAKARI maata to te ovi i to te au manu katoa o te enua, i ta te Atua ra ta Iehova i anga ra; e kua tuatua maira aia ki te vaine, Koia ïa, kua tuatua mai te Atua e, Auraka korua e kai i to te au rakau katoa o te kainga nei?

2 E kua karanga atura te vaine ki taua ovi ra, E kai maua i to te au rakau o te kainga nei;

3 Mari ra o to taua rakau i rotopu i te kainga nei, kua tuatua mai ïa te Atua e, Auraka korua e kai i to reira, auraka oki korua e arapaki atu, ka mate aea korua.

4 Kua tuatua maira taua ovi ra ki te vaine, Kare rava korua e mate:

5 Kua kite oki te Atua e, i te rā e kai ei korua i to reira, ka puera ïa to korua mata, e ka riro korua mei te Atua ra te tu, i te kite i te meitaki e te kino.

6 E kite akera te vaine e rakau meitaki ei kai, e te taurekareka no te mata, e te rakau anoano oki kia rauka te kite; kua rave iora aia i te kai no rungao ra, kai iora, apai atura oki ki tana tane, e kua kai katoa iora oki aia.

7 Puera akera to raua mata, kite akera raua e, te vai taaka ua ra raua; kua tui iora raua i te rau suke, ei pareu no raua.

8 Akarongo akera raua i te reo o te Atua ra o Iehova, iaia i aaere i roto i te kainga i te maru aiai ra: e kua pipini iorā Adamu raua ko te vaine i te aroaro o te Atua ra o Iehova, i roto i te vaorakau o te kainga ra.

9 Kua kapiki maira te Atua ra ko Iehova kia Adamu, na ko maira kiaia, Teiea koe?

10 Kua karanga atura aia, Akarongo akera au i to reo i roto i te kainga nei, e mataku akera au, ko au i vai taaka ua; e kua pipini akenei au.

11 Kua tuatua maira aia, Naai koe i akakite e, te vai taaka ua ra koe? Kua kai ainei koe i to te rakau, taku i karanga atu kia koe e, auraka e kai?

12 Kua karanga atura te tangata, Na te vaine taau i o mai ei tokorua noku ra, i oronga mai i to taua rakau kiaku ra, kai iora au.

13 Kua tuatua maira te Atua ra ko Iehova ki te vaine ra, Eaa koe i akaperaʼi? Kua karanga atura te vaine ra, I pikikaa mai te ovi iaku, kai iora au.

14 Kua tuatua maira te Atua ra ko Iehova ki taua ovi ra, Kia maata roa toou taumaa i to te au puaka katoa, e te au manu taae katoa o te enua nei, ko koe i akapera ra; ei raro to kopu totoro uaʼi koe, ka kai oki koe i te one-pueu, e ope roa ake toou puke ra i te ora anga na.

15 Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae. 16 Kua tuatua maira aia ki te vaine, E akamaata au i toou mamae tamariki ra; e ka anau mai taau tamariki ma te mamae; e ka kauraro koe ki taau tane, e ei runga ake aia ia koe.

17 Kua tuatua maira aia kia Adamu, No te mea kua akarongo koe i te reo o taau vaine na, e kua kai i to te rakau, i taku i karanga atu kia koe, i te na ko anga e, Auraka koe e kai i to reira: kia kino te enua ia koe; e kai koe i to te reira ma te aue, e ope roa ake toou puke rā i te ora anga na.

18 E ka tupuia ïa e te rakau taratara e te tataramoa; e ka kai koe i te rakau rikiriki o te enua nei;

19 E kai koe i taau kai ma te pata i te ou ki runga i to rae, e oki ua atu koe ki raro i te one; no reira mai oki koe: e one-pueu oki koe, e ka riro akaou rai koe ei one-pueu.

20 Kua tapa iorā Adamu i to tana vaine ra ingoa, ko Eva; no te mea, ko te metua vaine aia no te tangata ravarai.

21 E kua anga iora te Atua ra ko Iehova, i te kakau kiri, no Adamu ma tana vaine, e kua akakakau maira ia raua.

22 E kua tuatua iora te Atua ra ko Iehova, I na, te tangata nei, kua riro aia mei tetai o tatou nei, i te kite i te meitaki e te kino; e tenana, ko te akatika aea aia i tona rima, e rave katoa i te kai i runga i te rakau o te ora ra, kai iora, kia ora aia e tuatau ua atu;

23 Kua tuaru atura te Atua ra ko Iehova iaia ki vao i taua kainga i Edene ra, e tanu i te one no reira oki aia ra.

24 Kua tuaru atura aia i te tangata ki vao; kua tuku iora aia i te au Kerubi, ma te koke mura i te koraparapa ua anga, i te pae i te itinga o te ra i taua kainga i Edene ra, ei tiaki i te ara i te rakau o te ora ra.