Te Apii Uaorai te Akapapa ra ia Tatou ei Au Orometua

“Ka akamanako tikai i teianei au tuatua; ko taau ïa e rave auraka e tivata; kia kite te tangata katoa i te tupu anga o toou kite. Kia matakite ia koe, e taau e apii ra.”​—1 TIMOTEO 4:15, 16.

1. Eaa te tika ra no te taime e te apii uaorai?

“E ATIANGA to te au mea katoa nei,” ta te Pipiria i tuatua ia Koheleta 3:1. Te tika tikai ra te reira no te apii uaorai. E manganui te kite ra e mea ngata i te akamanako i te au apinga pae vaerua me kare i te taime tau e me i te ngai tarevake. Ei akatauanga, i muri ake i tetai ra maata te angaanga e tetai kaikaianga maata, ka manako inangaro ainei koe i te apii, mei te mea e te takoto ra koe i toou nooanga maru i mua i te tivi? Kare rava. No reira, eaa te mea meitaki? Te taka meitaki ra, ka tau tatou kia iki e aea e kiea oki te apii ma te manako anga kia rauka te puapinga maata mei ta tatou au tauta anga.

2. Eaa te taime meitaki no te apii uaorai?

² E manganui te kite ra e ko to ratou taime meitaki no te apii ko te mea mua ia i te popongi i te tuatau te matakite maata ra ratou. Ko etai atu te taangaanga ra i te tuatau akaangaroi anga i te avatea no tetai tuatau apii ma te poto ra. E akara i te taiku anga i te taime no te au angaanga puapinga i te pae vaerua i roto i te au akatauanga e aru mai nei. Kua tata te Ariki ko Davida o Iseraela i taito ra: “E akakite mai koe iaku i to aroa i te popongi; te irinaki nei oki au ia koe: e akakite mai koe kiaku i toku arataa kia aere ra; te apai atu nei oki au i toku vaerua kia koe.” (Salamo 143:8) Kua akakite te peroveta ko Isaia i te ariki anga aiteite i tana tuatua anga: “Kua oronga mai te Atu ra ko Iehova kiaku i te arero o te aronga i apiiia; kia tika iaku kia tauturu atu i tei roiroi ki te tuatua: te akaara nei aia iaku i tera popongi, i tera popongi: te akaara nei aia i toku taringa, kia akarongo au mei te aronga i apiiia ra.” Ko te tumu ka tau tatou kia apii e kia komunikeiti ma Iehova ia tatou e maroiroi ra te manako, noatu eaa te taime o te reira i te ra.​—Isaia 50:4, 5; Salamo 5:3; 88:13.

3. Eaa te au turanga te anoanoia ra no te apii meitaki?

³ Ko tetai atu tumu i te apiianga meitaki koia oki e kare tatou e tau kia iki i te noo ki runga i tetai nooanga maru me kare tetai topa. Kare e ko teia te mataara e vai matakite ei. Ia tatou e apii ra, ka tika kia akakeukeuia to tatou manako, e me maata roa te turanga reka ra i te pae kopapa i te akara anga ka akatupu i te tua patoi. Tei anoano katoaia no te apii e te tamanako anga kia kore te turituri e te au tu maniania. Te tautaanga i te apii ma te ratio, te tivi, me kare te tamariki te tauta ra kia peke toou manako e kare e riro ei meitaki. I to Iesu ra anoano anga kia tamanako, kua aere atu aia ki tetai ngai kare e turituri. Kua tuatua katoa aia i te puapinga i te kimianga i te ngai muteki no te pure anga.​—Mataio 6:6; 14:13; Mareko 6:30-32.

Te Apii Uaorai te Akapapa ra ia Tatou kia Pau

4, 5. I roto i teea au tu i riro ei te poroutia Umuumu ei tauturu anga tau?

⁴ E akamerengoanga apii uaorai me taangaanga tatou i te au puka tauturu Pipiria tuketuke e raukai i te ko oonu atu ki roto i tetai tumu manako, koia tikai me rave tatou i te reira i te pauanga i te au uianga ngakau tae o etai ke ra. (1 Timoteo 1:4; 2 Timoteo 2:23) Ei ngai akamataanga, e manganui te aronga ou te apii ra i te poroutia Eaa ta te Atua e Umuumu Maira ia Tatou?,a te rauka nei i roto i te 261 reo. E puka mama ua inara e tau tikai kua akatumu takiriia ki runga i te Pipiria. Te tauturu maira te reira i te aronga tatau kia ariki viviki i ta te Atua e umuumu maira no te akamori anga mou. Inara, kare tona akapapaanga i akataka i tetai ngai no tetai apii anga tikai no te au tumu tataki tai. Me ka ui mai taau aronga e apii ra i te Pipiria i etai au uianga akatenga no etai au tumu Pipiria te uriuriia ra, akapeea e raukai ia koe i te kimianga i etai atu au akakite anga Pipiria te ka tauturu iaia kia pau i taua au uianga?

⁵ No te aronga e Watchtower Library ta ratou i roto i te CD-ROM i to ratou reo, e ngoie ua i te akara atu i te tumu akakite anga tuketuke maata i roto i te komopiuta. Inara ka akapeea te aronga kare ia ratou teia apinga komopiuta? E akara matatio tatou i e rua nga tumu tei akamanakoia i roto i te poroutia Umuumu kia kite ei tatou e akapeea e raukai ia tatou kia akatotoa atu i to tatou kiteanga e kia rauka te pau anga maata atu​—koia tikai me ka ui mai tetai i te au uianga e, Koai te Atua, e eaa tikai to Iesu ra tu?​—Exodo 5:2; Luka 9:18-20; 1 Petero 3:15.

Koai te Atua?

6, 7. (a) Eaa te uianga te tu maira no runga i te Atua? (e) Eaa te akaruke anga maata ta tetai orometua i rave i roto i te akoanga?

⁶ Te apiianga 2 i roto i te poroutia Umuumu te pau maira i te uianga puapinga maata, Koai te Atua? E tumu manako puapinga teia no te mea kare e rauka i tetai tangata i te akamori i te Atua mou ra me kare aia i kite Iaia me kare penei te ekoko ra i Tona vai anga mai. (Roma 1:19, 20; Ebera 11:6) Tera ra, te mou ra te au tangata i te ao katoa nei i te au manako anga e au anere ua atu e koai te Atua. (1 Korinetia 8:4-6) E tuke te pauanga a te au apiianga akonoanga ravarai ki te uianga no te tu akataka anga tikai i te Atua ra. I roto ia Kerititome te manako ra te maataanga o te au akonoanga e e Toru Tai te Atua. Kua oronga tetai orometua rongoia U.S. i tetai ako anga te ingoa “Kua Kite Ainei Koe i te Atua?” inara kare e okotai taime i taiku ei aia i te ingoa o te Atua i roto i tana akoanga, noatu rai e kua tuatua mai aia mei te au Tuatua Tapu Epera e maata te taime. Inara, kua tatau mai aia mei tetai urianga Pipiria tei taiku marama koreia e kare e ingoa te “Atu” kare ra ia Iehova me kare ia Yahweh.

⁷ Mei teaa ra tetai tumu puapinga maata tei ngere ra te orometua i tana taiku anga ia Ieremia 31:33, 34: “Kare oki ratou e apii akaou, ko te tangata ko tona tangata tupu, ko te tangata ko tona taeake, i te na ko anga atu e, “Kia kite kotou i te Atua” [Epera, “Kia kite ia Iehova”], e kite katoatoa oki ratou iaku, ko tei mea ngiti i o ratou, e tae ua atu ki tei maata i o ratou, te tuatua maira te Atu [Epera, Iehova].” Ko te urianga tana i taangaanga kua akakore atu i te ingoa tu-Atua taka meitaki, ko Iehova.​—Salamo 103:1, 2.

8. Eaa te akatutu maira i te puapinga maata o te taiku anga i te ingoa o te Atua?

⁸ Te akatutu maira Salamo 8:9 e eaa i puapinga maatai i te taangaanga i te ingoa Iehova: “E to matou Atu, e Iehova, kua teitei toou ingoa e pini ua ake te pa enua katoa nei?” E akaaite atu i te reira e: “E te ATU, to matou Atu, mei teaa ra te meitaki o toou ingoa i te enua katoa nei!” (King James Verison; e akara katoa i The New American Bible, The Holy Bible​—New International Version, Tanakh​—The Holy Scriptures) Inara, mei tei taikuia maira i te atikara i mua ake nei, ka rauka ia tatou “te kite tikai i te Atua” me ka tuku tatou i tana Tuatua kia akamarama mai ia tatou. Inara ko teea puka tauturu apii i te Pipiria te ka papa meitaki mai kia pau i ta tatou au uianga no te puapinga maata o te ingoa o te Atua ra?​—Maseli 2:1-6.

9. (a) Ko teea puka te ka tauturu ia tatou i te akataka i te puapinga maata no te taikuanga i te ingoa o te Atua ra? (e) Akapeea te aronga uri reo e manganui i kore ei e akaari i te akangateitei no te ingoa o te Atua?

⁹ E eeu atu tatou i te poroutia The Divine Name That Will Endure Forever, tei uriia ki roto i te 69 reo ke.b I te tuanga tei akatumuia ra “God’s Name​—Its Meaning and Pronunciation” (kapi 6-11) te akakite meitaki maira e te Tetarakaramatona Epera (mei te Ereni, te aiteanga “e a reta”) te mama maira e vaitata i te 7,000 taime i roto i te au tataanga Epera taito ra. Inara, kua akakoro te au orometua e te aronga uri reo o te akonoanga ngati Iuda ra e to Kerititome kia akakore i te reira mei te maataanga o ta ratou au urianga Pipiria.c Akapeea e raukai ia ratou kia karanga e te kite ra i te Atua e kua rauka te pirianga ariki kiaia me akakore ratou i te kapiki iaia ma tona ingoa? Te akatuera maira tona ingoa tikai i te aerenga kia kite e eaa tana au akakoro anga e koai oki aia. Pera katoa oki, eaa te puapinga o te tuanga o ta Iesu pure akaraanga “e to matou Metua i te ao ra, kia tapu toou ingoa” me kare te ingoa o te Atua ra e taikuia ana?​—Mataio 6:9; Ioane 5:43; 17:6.

Koai a Iesu Karaiti?

10. Na roto i teea au tu e raukai ia tatou kia kite atu i te oraanga e te angaanga orometua a Iesu ra?

¹⁰ Te apiianga 3 i roto i te poroutia Umuumu te tumu tuatua “Koai a Iesu Karaiti?” I roto ua i te parakarapu ono, te oronga maira te reira i tetai papaanga poto ua no Iesu, tona akamata anga, e tona akakoroanga i te aerenga mai ki te enua nei. Inara, me te anoano ra koe i tetai tataanga katoa no tona oraanga, kare atu e mea meitaki​—i te au tataanga uaorai o te Evangeria​—Te Tangata Maata Rava Atu Tei Ora Ana, te rauka ra i roto i te 111 reo.* Te oronga maira teia puka i tetai akapapaanga oti meitaki no te tataanga i to Karaiti oraanga e te au apiianga, tei akatumuia ki runga i nga Evangeria e a. Tona 133 pene te akakite ra i te au tupu anga o to Iesu oraanga e te angaanga orometua. No tetai atu akara anga akataka anga, tu tuke, ka rauka ia koe i te akara i te Insight, te Voriumu 2, i raro ake i te tumu tuatua “Jesus Christ.”

11. (a) Eaa te akariro ra i te Au Kite o Iehova kia tuke i to ratou irinaki anga no Iesu ra? (e) Eaa etai au irava Pipiria te akataka meitaki maira i te tarevake o te apiianga Toru Tai, e eaa te puka tauturu i teianei tu?

¹¹ I roto ia Kerititome te maroanga no runga ia Iesu te vaira i rungao me koia “te Tamaiti a te Atua” pera katoa ko “te Atua te Tamaiti”​—i tetai atu tu, ko te maro anga no runga i ta te Catechism of the Catholic Church e karanga ra e ko “te mea ngaro maata o te akarongo Kerititiano ra,” koia te Toru Tai. I te tu takake anga mei te au akonoanga o Kerititome, te irinaki ra te Au Kite o Iehova e e akamata anga tu-Atua to Iesu inara kare aia i te Atua ra. Ko tetai atu uriuri anga meitaki no teia tumu manako te kitea ra i roto i te poroutia Should You Believe in the Trinity?, tei uriia ki roto i te 95 reo ke.d I roto i te au irava e manganui te taiku ra ei patoi i te apiianga Toru Tai ko Mareko 13:32 e 1 Korinetia 15:24, 28.

12. Eaa etai atu uianga te tau ra no ta tatou akamanako anga?

¹² Te au uriuri anga i mua akenei no te Atua e Iesu Karaiti te akono ra kia akatutu mai i te au aerenga e raukai ia tatou i te rave i te apii uaorai ma te manako kia tauturu atu i te aronga kare i kite i te tuatua mou o te Pipiria e raukai te kite tika. (Ioane 17:3) Inara, akapeea te aronga kua roa te taokotai anga ma te putuputuanga Kerititiano no te au mataiti e manganui? Ma to ratou akaputu anga kite no te Pipiria, te vaira ainei te tu tau no ratou kia akamanako ua atu i ta ratou apii uaorai i te Tuatua a Iehova?

Eaa ra “Kia Matakite” Ei?

13. Eaa te manako tarevake penei te manakoia ra e tetai papaki no te apii uaorai?

¹³ Kua riro tetai papaki ei au mema no te putuputuanga no te au mataiti e manganui penei ka topa ki roto i te peu no te irinaki ua anga ki runga i te kite Pipiria ta ratou i rauka i to ratou au mataiti mua ei Au Kite o Iehova. E mea ngoie ua kia tamanako e: “Kare au e tau kia apii maata mei te aronga ou ra. No te mea, e akara ana i te au taime i tatau ei au i te Pipiria e te au puka apii Pipiria i te au mataiti kua topa.” Ka riro teia kia aite ki te tuatuaanga: “Kare au e tika kia akamanako tikai i taku kaikaianga i teianei, no te mea e akara i te au kai taku i kai ana i te tuatau kua topa.” Kua kite tatou e te umuumu tamou ra te kopapa i te akamatutu anga mei te kai meitaki, tei akapapa meitakiia e raukai i te akono meitaki e te maroiroi i te reira. Mei teaa oki te maata atu te tika i te reira no te tamouanga i to tatou oraanga pae vaerua e te maroiroi oki!​—Ebera 5:12-14.

14. Eaa tatou i tau ei kia akamanako marie ia tatou uaorai?

¹⁴ No reira, ko tatou katoatoa, me e aronga roa i te apii i te Pipiria me kare ra, te tau ra kia akarongo i ta Paulo ra akoanga kia Timoteo, tei riro i reira ei akaaere tau e te pakari: “Kia matakite ia koe, e taau e apii ra; e tamou tika rai i te reira: tei te akapera oki e oraʼi koe, e te aronga katoa e akarongo mai ia koe ra.” (1 Timoteo 4:15, 16) Eaa tatou i tau ei kia akamanako i ta Paulo apiianga? Kia maara, te tou katoa maira Paulo e e tamaki anga ta tatou “i te ravenga pakari [“angaanga kikite”] a te diabolo” e “te au vaerua kikino i te reva nei.” E kua akamatakite te apotetoro ko Petero e “te kimi [ra te Tiaporo] i te tangata e pou iaia,” e ko taua “tangata ra” penei ko tetai o tatou. To tatou tu manako rapurapu kore ka riro e ko te tu ia tana e kimi ra.​—Ephesia 6:11, 12; 1 Petero 5:8.

15. Eaa to tatou paruru anga pae vaerua, e akapeea tatou i te tamou marie anga i te reira?

¹⁵ No reira, eaa ta tatou paruru anga? Te akamaaraara maira te apotetoro ko Paulo kia tatou: “Ka rave ana oki kotou i te rakei katoa a te Atua ra, kia tika ia kotou kia patoi atu i te enemi i te rā kino ra, e kia ope rava te au ravenga ra, kia tu rai.” (Ephesia 6:13) Te puapinga o taua rakei pae vaerua kare ia i runga anake i tona turanga mua mari ra tei runga i te akono anga putuputu. No reira, ko te rakei katoa mei ko mai i te Atua, te kapiti maira i te kite i te Tuatua a te Atua i teia tuatau nei. Te tou atura teia ki te puapinga o te akono anga i to tatou kite i te tuatua mou te akakiteia maira e Iehova na roto i tana Tuatua e na roto i te pupu tavini akono meitaki e te pakari. Te putuputu anga te apii uaorai i te Pipiria e te au puka apii Pipiria e puapinga maata i te tamou anga i to tatou rakei pae vaerua.​—Mataio 24:45-47; Ephesia 6:14, 15.

16. Eaa ta tatou ka rave kia papu ei e te angaanga meitaki ra to tatou “paruru ra i te akarongo”?

¹⁶ Kua akakite mai a Paulo i tetai tuanga meitaki o to tatou rakei “te paruru ra i te akarongo,” e raukai ia tatou kia akatapae ke kia tamate atu i te au tao ai a Satani no te akaapa anga pikikaa e te au apiianga apoteiti. (Ephesia 6:16) No reira e mea tau kia akapapu tatou i te maroiroi o to tatou paruru i te akarongo e eaa te au takainga ta tatou ka rave kia akamatutu e kia akamaroiroi i te reira. Penei ka ui koe, ei akatauanga: ‘Akapeea au i te teateamamao anga no te apii Pipiria i te epetoma ma te taangaanga anga i Te Punanga Tiaki? Kua rava ainei taku apii anga kia raukai kia “akamaroiroi atu ei ki te aroa, e i te angaanga memeitaki ra” na te orongaanga i te au pauanga manako meitakiia i te au uipaanga? Te eeu ra ainei au i te Pipiria e ka tatau i te au tuatua tapu tei akakiteia maira kare ra i tataia mai? Te akamaroiroi ra ainei au tetai i tetai na taku au pauanga oraora i te au uipaanga?’ E pakari ta tatou kai vaerua, e te anoanoia ra te takaviri anga meitaki no tatou kia puapinga maataia.​—Ebera 5:14; 10:24.

17. (a) Eaa te poitini ta Satani e tauta ra i te taangaanga kia akakino i to tatou pae vaerua? (e) Eaa te vairakau i ta Satani ra poitini?

¹⁷ Te kite ra a Satani i te au tu paruparu o te kopapa, e ko tana au ravenga e kikite ia. Ko tetai o te au ravenga te akatotoa ra aia i tona mana kino na te akariroanga kia ngoie ua te kite i te tu raveanga ainga tau kore i roto i te tivi, te Internet, te vitio, e i roto i te au puka tataia. Kua tuku tetai papaki au Kerititiano i teia poitini kia tomo atu ki roto i to ratou au paruru paruparu ra, e kua taki atu te reira kia ngere i te au angaanga takake i roto i te putuputuanga me kare i te au tupu anga kikino. (Ephesia 4:17-19) Eaa te vairakau ki ta Satani poitini pae vaerua? Auraka tatou e manako kore i ta tatou apii uaorai putuputu i te Pipiria, ta tatou au uipaanga Kerititiano, e te rakei katoa mei ko mai i te Atua ra. Kapiti katoaia, ka oronga mai teia i te kite kia tatou kia akataka i rotopu i te tika e te tarevake e kia makitakita atu i ta te Atua e makitakita ra.​—Salamo 97:10; Roma 12:9.

18. Akapeea “te koke o te vaerua ra” i te tauturu anga ia tatou i ta tatou tamaki anga pae vaerua ra?

¹⁸ Me akono tamou tatou i to tatou au tu matau i te apii putuputu i te Pipiria, ka rauka ia tatou kare anake i te paruru ketaketa tei orongaia maira e to tatou kite tika i te Tuatua a te Atua pera katoa te paruru meitaki a “te koke a te Vaerua ra, koia te tuatua a te Atua.” Te tuatua a te Atua ra “e kokoi maata oki to te reira i to te koke matarua ra, e te koputa mama takiri anga oki e taka ke ua atu te vaerua e te ngakau, e te paunga e te uo ivi ra; e te akara matariki oki i te manako e te vananga o te ngakau ra.” (Ephesia 6:17; Ebera 4:12) Me ka riro tatou kia karape i te taangaanga i taua “koke” ra, i reira me aro atu tatou i te au timataanga, ka rauka ua ia tatou i te tipu ke atu i tei akara anga ei mea kino kore, me kare te meitaki ra, e ka akakite ateaia atu te reira ei ereere tamateanga na tei rave kino ra. Ka rauka i ta tatou vairanga kite e te marama i te Pipiria kia tauturu ia tatou kia kopae ke i tei kino ra e kia rave i te meitaki. No reira ka tau tatou katoatoa kia ui kia tatou uaorai: ‘Te koikoi ra ainei taku koke, me kare te tutae auri ra ainei te reira? Te ngata ra ainei iaku kia maara i te au irava Pipiria te ka paruru atu i tei maro maira?’ Kia tamou marie tatou i to tatou au tu matau memeitaki no te apii uaorai i te Pipiria e na reira te arai anga i te Tiaporo ra.​—Ephesia 4:22-24.

19. Eaa te au puapinga ka rauka ia tatou me ka akono tatou i ta tatou apii uaorai?

¹⁹ Kua tata a Paulo: “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra. Kia apa kore te tangata o te Atua, ma te tau tikai i te au angaanga memeitaki katoa ra.” Me akono meitaki tatou i ta Paulo au tuatua kia Timoteo, ka rauka ia tatou kia akamaroiroi i to tatou uaorai tu pae vaerua e ka rauka ia tatou kia akariro kia meitaki atu ta tatou angaanga orometua. Te aronga pakari pae vaerua e te au tavini orometua ka riro kia maata te puapinga ki te putuputuanga, e ka vai maroiroi rai tatou katoatoa i roto i te akarongo.​—2 Timoteo 3:16, 17; Mataio 7:24-27.

[Au Tataanga Rikiriki i Raro]

Maara Ainei ia Koe?

• Eaa te au turanga te tauturu ra kia meitaki te apii uaorai?

• Eaa te tarevake te raveia ra e te au urianga Pipiria e manganui no runga i te ingoa o te Atua?

• Eaa te au irava Pipiria taau ka taangaanga ei akakite i te tarevake o te apiianga i te Toru Tai?

• Eaa ta tatou ka tika kia rave ei paruru ia tatou uaorai mei ta Satani au ravenga, noatu me e manganui to tatou mataiti ei Kerititiano mou?

[Au Tutu i te kapi 19]

No te apii uaorai kia meitaki ra, ka anoanoia te akanooanga tau ma te meangiti te au manamanata

[Au Tutu i te kapi 23]

Te koikoi ra ainei taau “koke” me kare te tutae auri ra?