Te Tau ra te Akapaapaa Mutu Kore no Iehova

“Ka akameitaki rai au ia koe i te au rā katoa nei; ka akapaapaa au i to ingoa e tuatau e tuatau ua atu.”​—SALAMO 145:2.

1. Eaa i manganui ei to Davida au tumu no te akapaapaaanga ia Iehova?

E MANGANUI te au tumu no te tavini tiratiratu o Iehova koia a Davida, kia akapaapaa i te Atua ra. Kua kite teia ariki rongonui o Iseraela i taito ra i to Iehova maata e tona meitaki e kua kite katoa aia e e mutu kore Tona tutaraanga ariki au. Te tau ra te akapaapaa no Tei Teitei Rava no tana akamerengoanga i te anoano o te au mea ora katoa e pera katoa oki te orongaanga i te aroa ki tona au tavini tiratiratu.

2. (a) Akapeea te akapapa anga i te Salamo 145? (e) Eaa te au uianga ta tatou ka uriuri manako?

² Kua oronga a Davida i te reira tu akapaapaa ki te Atua ia Salamo 145 ra. Kua akamataia te au irava tatakitai o te salamo akorotiki ma te reta no te piapa Epera, okotai rai reta ko te nun tei akarukeia. Penei ko te reira akanoonoo anga te akorotiki ei tauturu kia akamaaraia. Te akateiteiia ra a Iehova e te Salamo 145, mei tei tuatuaia: “Ka akameitaki rai au ia koe i te au rā katoa nei; ka akapaapaa au i to ingoa e tuatau e tuatau ua atu.” (Salamo 145:2) Inara eaa ta teia salamo ka akatupu kia tatou nei? Eaa tana ka akono no to tatou pirianga ki te Atua? E kite ei tatou, na mua tatou i te uriuri manako i nga irava 1 ki te 10.

Kitea Koreia to Iehova Maata

3. Mei ia Davida rai, eaa ta tatou kaiou ki to ‘tatou Atua koia te Ariki,’ e no teaa ra?

³ E ariki a Davida, inara kua akatika aia i to Iehova ngateitei anga ki runga ake iaia ra, i te na ko anga: “E akateitei au ia koe, e taku Atua, e te Ariki; ka akameitaki rai au i t[o]ou ra ingoa e tuatau e tuatau ua atu.” (Salamo 145:1) Ma te akatapu anga mei te reira rai, te taaki ra te au Kite o Iehova i te ingoa o te Atua e kua akapaapaa iaia i te ao katoa nei. Te akaapinganuiia ra to tatou oraanga ia tatou e rave ra i te reira angaanga. Mei ia Davida, te kaiou ra tatou i te akarongo e te kauraro kia Iehova ei ‘Atua no tatou e ei Ariki.’ Eaa oki ka kore ei? Ko ia te “Ariki no te tuatau mutu kore.” (Apokalupo 15:3, NW) Pera katoa, te Davida Maata, koia a Iesu Mesia, tei tutara maira mei Maunga Ziona i te rangi ra mei te 1914 mairai, te oronga maira kia tatou i te akaraanga meitaki roa no te kauraro anga ia Iehova, koia te Ariki Mutu Kore ra.

4. Akapeea tatou me ‘akameitaki i te ingoa o te Atua’?

⁴ Kua karanga a Davida e ka ‘akameitaki aia i te ingoa o te Atua.’ Akapeea te reira e raukai i te tangata ua nei? I roto i etai au apinga katoa, ko te akameitaki i tetai e mea tau kia tuatua meitaki nona. Te akameitakianga i te ingoa o te Atua te akakite maira e e akaperepere maroiroi to tatou iaia e tona ra ingoa tapu, koia a Iehova. Kare tatou e akaapa i te Atua, e kare e kimi i te tarevake nona, auraka katoa oki e ekoko i tona tu meitaki. Na to tatou akono anake mei te reira te tu, e kia akatapu i te oraanga kia Iehova, e kia tamou i te tiratiratu ei au Kite papetitoia nona ra e raukai ia tatou i te karanga ma Davida katoa ra e ‘ka akameitaki matou e te Atua i toou ingoa e tuatau ua atu.’ Me ka tamou tatou ia tatou uaorai ki roto i ta te Atua akaperepere anga, ka rauka ia tatou te apinga orongaia mai koia te ora mutu kore e na reira e raukai kia akameitaki ia Iehova e tuatau ua atu.​—Iuda 20, 21.

5. Eaa te akatupu anga kia tatou te anoano ra kia akameitaki ia Iehova i te au “rā katoa ra”?

⁵ Me te inangaro tika ra tatou i Tei Oronga mai i te Ora no tatou, ka karanga katoa tatou, ma Davida ra e: “Ka akameitaki rai au ia koe i te au rā katoa nei; ka akapaapaa au i to ingoa e tuatau e tuatau ua atu.” (Salamo 145:2) Mei teaa ra te motutaa tetai ra me kare tatou i akameitaki ana i te Atua! Auraka tatou kia manako maata rava me kare kia apiapi no te au apinga kopapa ua nei e kia kore tatou e tuatua akameitaki i to tatou Metua i te rangi ra me kare kia pure kiaia i te au ra katoatoa. Kua akakite maira a Iesu e ka tau tatou kia pure i te au ra ravarai i tana tuatua anga i te pure akaraanga ra: “O mai i te kai e tau ia matou i tera rā i tera rā.” (Luka 11:3) E manganui te rave ra i te angaanga ia ratou e rave ra i te angaanga orometua ei Kerititiano. Inara noatu eaa to tatou turanga, ka tau kia akakeu to tatou ngakau kia akapaapaa i te Atua na tetai mataara i te au ra tatakitai. E tamanako ana! Ei au Kite akatapuia kia Iehova ma te manakonakoanga no te ora mutu kore, tei ia tatou rai te manakonakoanga no te akapaapaaanga i tona ingoa e tuatau ua atu.​—Ioane 17:3.

6. Eaa ra a Iehova “i tau ei kia akapaapaa maataia?”

⁶ E tumu tikai to tatou no te akapaapaa i te Atua i te ra roa katoa, no te mea kua kapiti atu a Davida: “E maatā Iehova e kia akapaapaa maataia; kare oki tona maata e kitea kia kimi.” (Salamo 145:3) No te maata o Iehova kare tetai e aite atu kiaia, e ko tona ngateitei nona anake ua ia. Kua akatika te ariki o Babulonia koia a Nebukanesa e: “Kare e tika i tetai kia tāpu atu i tona [to te Atua] rima, kare oki e karanga ua atu kiaia e, ‘Te akapeea ua ana koe?’” (Daniela 4:34, 35) “E akauru mataku oki a [Iehova] tei runga ake ia i te au atu ke ra.” (Salamo 96:4, NW) No reira rai “i maataʼi tona akapaapaaia.” Kare oki e au tuatua akapaapaa tei teitei rava no te akapaapaa anga ia Iehova! Te tau ra te akapaapaa anga mutu kore, e te kotinga koreia nona ra.

7. Eaa te akapapu maira e “e kitea koreia te kimi i to te Atua maata”?

⁷ “Kare oki [to Iehova] maata e kitea kia kimi.” Noatu rai e akapeea te maata o tona tu kopapa, ko tona maata te vaira i tona tu ei Atua. Ae, ko te au apinga tana i anga maira e mea umere maata rava no tatou kia kite, e kua anga “meitaki tikai” ia tatou. (Salamo 139:14, NW; Iobu 9:10; 37:5) No reira, mei teaa ra te meitaki o Iehova i te akono iaia uaorai! Te tamou tiratiratu ra aia i tana au taputou e te akakite aroa ua maira i tana au akakoroanga. Tera ra, kare rava tatou e kite i te au apinga ravarai no te Atua ra. E tuatau e tuatau ua atu, ka rauka ia tatou te tupu aere i te kite iaia, i tana au apinga i anga, e i tana au akakoroanga.​—Roma 11:33-36.

Akameitakiia ta Iehova au Angaanga

8. (a) Akapeea te tuatua meitaki anga i ta Iehova ra au angaanga mei tetai “uki ki tetai uki”? (e) Me apii tatou i ta tatou tamariki i ta Iehova ra au angaanga e tana au ravenga, eaa ta ratou ka manako no te akamorianga iaia ra? (ng) Ei “uki” rekareka, eaa ta te toenga o tei akatainuia ra i rave ana?

⁸ E maata te ka rauka kia tuatuaia ei akapaapaa i to tatou Atua tei kore ra tona maata e kitea kia kimi, e kua akakeu ia Davida kia karanga: “E akameitakiia taau au angaanga mei tetai uki e tae ua atu ki tetai, e na ratou e akakite i taau ra angaanga mana.” (Salamo 145:4) Kua akameitakiia ta Iehova au angaanga e kua akakiteia tana au angaanga mana mei tetai uki ki tetai uki. Mei teaa ra te meitaki kia akakite i teia au mea ki te aronga ta ratou e apii ra i te Puka Tapu i te ngutuare! Ei akatauanga, ka rauka ia tatou te akakite kia ratou e na te Atua i anga i te au mea ravarai. (Genese 1:1–2:25; Apokalupo 4:11) Ka rauka ia tatou te tuatua no tana au angaanga mana i te tuatau i akaoraʼi aia i to Iseraela mei te tuikaa anga i Aiphiti, te tauturu anga ia ratou i te takore atu i te au enemi Kanaana, e te akaora anga ia ratou kia kore e akapou takiriia i Peresia i taito ra, e te vai atu ra. (Exodo 13:8-10; Au Akava 4:15; Esetera 9:15-17) Kare ainei tatou e akakeuia kia akakite ki ta tatou au tamariki i ta Iehova ra au angaanga e tana au ravenga? Me ka oronga tatou i te reira apiianga ki ta tatou tamariki e ka akara ratou ia tatou te rekareka ra i te tavinianga i te Atua, ka manako ratou i te akamori iaia ei mea rekareka e ka tupu ake ma ‘te rekareka no ko ia Iehova ra ei punanga ketaketa no ratou.’ (Nehemia 8:10; Salamo 78:1-4) Ko te toenga o tei akatainuia ra tetai “uki” rekareka o te au Kite o Iehova te akameitaki atu ra i ta te Atua au angaanga ki te “urupu maata,” koia tetai tuanga o te uki te ka noo ki te enua Parataito.​—Apokalupo 7:9, NW.

9. Ia tatou e akamanako ra i te angaanga e te au ravenga mana a te Atua ra, eaa te mea ka papu ia tatou nei?

⁹ Ia tatou e tamanako ra i ta te Atua au angaanga e tana au ravenga mana, ka papu rava atu to tatou manako e “no tona ra ingoa maata e kore ei a Iehova e akaruke i tona iti-tangata.” (1 Samuela 12:22; Salamo 94:14) Ia tatou e aro atura i te au timataanga, te au tu ngata, te takinga kinoanga, ka rauka ua ia tatou te tu maru e te manako papu e “na te au o te Atua” e paruru i to tatou ngakau e to tatou manako. (Philipi 4:6, 7) No reira e mea tau no tatou kia akakite kia etai atu i to tatou Metua aroa te paruru maira ia tatou i te rangi!

10. Eaa te kapitiia ra ki ta Iehova au angaanga “meitaki tikai,” akapeea tatou ka puapingaiaʼi mei te akamaaraara anga ia ratou?

¹⁰ Ka tau tatou kia akataka i te tuatau no te tamanako i to Iehova tu ngateitei e tana au angaanga, no te mea kua karanga mai a Davida e: “E riro te kaka e te manea o toou ra ngateitei e te au mea a taau ra au angaanga meitaki tikai ei ravenga naku.” (Salamo 145:5, NW) E mea mataku tikai to te Atua ra mana tapu e te aite koreia. (Iobu 37:22; Salamo 148:13) No reira, kua akono a Davida i te ngateitei kaka o to Iehova ra mana tapu ei tuatua anga nana. Kua akono katoa te tata salamo iaia uaorai i te au tumu manako no ta te Atua ra “au angaanga meitaki tikai” ei tuatua anga nana. Kua kapiti katoa te reira i te tuatua tau o te Atua i te akapouanga i te aronga rave ara e te akaoraanga i te aronga akono i te Atua, mei to te vaipuke ra. (Genese 7:20-24; 2 Petero 2:9) Na te akamanako anga i te reira au tumu e akamaroiroi i to tatou pirianga ma Iehova e ka akakeu ia tatou kia tuatua atu kia etai ke no tona mana tapu e tana au angaanga meitaki tikai. I te 40 ra i te metepara ra, kua akamaroiroiia a Iesu kia kore e topa i te timataanga na te akamanako anga i te au mea ta te au rangi i mavete maira kiaia i apai mai ki tona manako. (Mataio 3:13–4:11) Kua tuatua atura aia kia etai ke no to Iehova mana tapu e tana au angaanga meitaki tikai.

11. (a) Eaa te mataku i tupu ei ki te au tangata o Ieriko ra? (e) Eaa te tu vaerua o ta te au Kite o Iehova tuatua anga no ta te Atua “ravenga mataku” e tona “maata” katoa oki?

¹¹ Kia tuatua tatou i to te Atua mana tapu e tana au angaanga, te akakeu ra tatou ia etai ke atu kia tuatua katoa i te reira. Kua karanga a Davida: “E tuatua ratou i te ririnui anga o taau au ravenga mataku, ka akakite oki au i t[o]ou maata anga.” (Salamo 145:6) Kua tuatua a Rahaba i te mataku tei tupu ki te au tangata o Ieriko i to ratou rongo anga i akapeea ta Iehova akaora anga i to Iseraela i te Tai Muramura ra e kua akariro ia ratou kia autu ki rungao i nga ariki e rua o Amori ra. E mea tika e e mea maata te tuatua no te reira au “ravenga mataku” i Ieriko ra. (Iosua 2:9-11) E mea papu e ka tupu te mataku a te “mate maata” te vaitata mai nei. (Mataio 24:21) Inara ko te au mea mataku maataia e te aronga taka ke i te Atua ra ka akatupu i te akangateitei tau iaia ki roto i te au ngakau tuatua tika “ko te mataku ïa ia Iehova.” (Maseli 1:7) Ka tuatua te au Kite o Iehova no te au akakite anga i to te Atua mana ma te vaerua ngakau tapu. Eaa oki, e ko te tumu maata e te Angaanga Takake maata te tuatuaia ra i rotopu i tei akatainuia e to ratou au taeake no te enua nei. E noatu te takinokino anga kare e arai ia ratou kia kore e tuatua atu kia etai ke ra no teia au mea nei e to Iehova ra “maata anga.”​—Angaanga 4:18-31; 5:29.

Akapaapaa ia Iehova no Tona Meitaki

12. Akapeea te meitaki o Iehova i te akariro anga ia tatou kia “pupu anga”?

¹² Kare te akapaapaa i tau no to te Atua maata anake ua mari ra no tona meitaki maata e tana tuatua tika katoa. No reira a Davida i tuatuaʼi: “E tuatua rai ratou i te pupu anga i toou ra meitaki maata, ka kapiki oki ratou i te rekareka i taau ra tuatua tika.” (Salamo 145:7, NW) No te maata i to Iehova meitaki e kua “pupu” tatou i te au akakite anga rekareka i te reira. I te reo Epera, ko te manako e mei te vai e taʼe viviki maira no te punavai. Kia pupu katoa tatou i te akapaapaa e te akameitaki anga ki te Atua, mei te kauvai rai. (Maseli 18:4) Kua akangaropoina to Iseraela i to Iehova ra meitaki, e tupu akera te mate maata kia ratou i te pae vaerua. (Salamo 106:13-43) Inara ra, e tuku tatou kia ki maringiringi to tatou ngakau i te reira tu akameitaki anga kia tataraara etai atu ra i muri ake i te kite anga i to Iehova meitaki ki tona au Kite akatapuia ra.​—Roma 2:4.

13. Eaa te mea tau kia tupu kia tatou i te au akakitekite anga i te tuatua tau a te Atua e te tuatua tika?

¹³ Na te au akakite anga i te tuatua tau e te tuatua tika na te Atua e akakeu ia tatou kia kapiki nui i te rekareka. Me ka manako akapera tatou, ka kimi tatou na mua kare i te Patireia o te Atua anake mari katoa ra i te tuatua tika nona ra. Ka anoano tamou rai tatou kia apai mai i to tatou tu akono i te akapaapaa anga kia Iehova. Ae, ka rave putuputu tatou i te akakite anga i te Patireia ma te maata te rave anga i te angaanga a te Atua ra. Kare ta tatou akapaapaa ia Iehova e tanumia ki roto i te menema kia muteki.​—Mataio 6:33; 1 Korinetia 15:58; Ebera 10:23.

E Aroa a Iehova

14. Eaa te akapapu anga e “e takinga-meitaki a Iehova e te aroa”?

¹⁴ I te taikuanga mai i etai atu tu meitaki no te Atua, kua karanga a Davida: “E takinga-meitaki e te aroa to Iehova; kare e riri vave, e te akaperepere maata.” (Salamo 145:8) E takinga meitaki te Atua no te mea e meitaki katoa e te oronga ua. (Mataio 19:17; Iakobo 1:5) Te akono ra aia i te au mea meitaki no te aronga katoa kare ra i tavini atu iaia. (Angaanga 14:14-17) E aroa katoa oki a Iehova, e te ngakau aroa, “te maara ua ra aia e e one-pueu tatou.” Kare ua aia e akavaavaa i te ngakau paruparu me kare e akono ia tatou kia tau ki ta tatou au ara e maata atu ra tona aroa i to te metua tangata aroa ra. (Salamo 51:17; 103:10-14) Eaa ra, i te akakite anga maata i te aroa, kua tono maira aia i tana Tamaiti akaperepere kia mate no tatou kia raukaʼi te akaongi ia tatou ki te Atua ra e kia tongi oki i tona tu takinga meitaki!​—Roma 5:6-11.

15. Eaa ka tau ei kia tuatuaia e “kare a Iehova e riri vave” e e “maata tona akaperepere”?

¹⁵ Kare e riri vave to tatou Metua i te rangi ra. Kare aia e tuku poitirere ua mai i te riri matapo ra. Pera katoa “te akaperepere maata” ia Iehova. I ko nei ko te tuatua Epera te akataka maira e ko te akaperepere te akatumuia maira no te aroa e ka akamou iaia uaorai ki tetai apinga. Ka rave ia i te reira kia oti roa tana akakoroanga no taua apinga ra. Ko tetai atu akatakaanga e “aroa tiratiratu.” I roto i etai au apinga katoa, ko te tu akaperepere i te Atua, me kare aroa tiratiratu, te akakiteia maira i te au ravenga akaora anga, akatinamou anga, paruru anga, tatara anga mei te au taitaia, e pera katoa te akaora anga mei te ara na roto i te oko. (Salamo 6:4; 25:7; 31:16, 21; 40:11; 61:7; 119:88, 159; 143:12; Ioane 3:16) Ko te tika e kare a Iehova i tuku mai ia Aramakito i muri ua ake i te ‘tamaki i te rangi ra’ e mano tini ua atu te ka rauka kia ora, e akakite anga maata ia i to te Atua ra akaperepere maata.​—Apokalupo 12:7-12; 2 Petero 3:15.

16. Akapeea i papu ei e “meitaki a Iehova ki te katoatoa”?

¹⁶ I te manako anga i to te Atua aroa, ka tau kia tuatuaia e e ngakau maata tona. Kua karanga a Davida: “Takinga-meitaki to Iehova ki te tangata ravarai; e te vai ra tona aroa akaperepere ki runga i tana katoa ra au angaanga.” (Salamo 145:9) Ae, e meitaki tikai te Atua ki to Iseraela ra. No tera tu, “te akaiti nei aia i tona rā ki rungao i te kino e te meitaki, e te akatopa mai nei aia i te ua ki runga i te tangata tuatua-tika e te tangata tuatua-tika kore.” (Mataio 5:43-45) I Edene, kua taputou mai a Iehova i tetai “uanga” te ka riro mai ei akameitakianga. I muri akera kua karanga aia kia Aberahama: “E ka meitaki te pa enua katoa o te ao nei i toou ra uanga.” (Genese 3:15; 22:18) I te maata i to te Atua ra meitaki i teia “tuatau openga” nei, e ka rauka i te au tangata ravarai ‘te aere mai e ka rave ua mai aia i te vai ora.’ (Daniela 12:4; Apokalupo 22:17) Te rekareka ua ra a Iehova i te rave meitaki ki te au mea ora kite katoa ra, e ka tau tona meitaki maata kia kika ia tatou kia vaitata atu kiaia.

17. Na teea tu i tau ei e te vai ra to Iehova ‘aroa i rungao i tana au angaanga ravarai’?

¹⁷ “Te vai ra [to Iehova] aroa akaperepere ki runga i tana katoa ra au angaanga” i te mea te oronga ra aia i te au apinga kia rava na te tangata e na te manu. “Nana i oronga mai i te kai ki te au mea katoa nei.” (Salamo 136:25; 147:9) Kare te Atua e akangateitei i te aronga apinganui e ka aviri atu i tei takaiia ki raro ra, e akateitei i te nengonengo e ka akakino atu i tei akaaka ra, e taaki i te neneva e ka akaiti i te pakari ra. Te rave akapera nei te aronga rave ara kare ra to tatou Metua aroa i te rangi e pera ana. (Salamo 102:17; Zephania 3:11, 12; Koheleta 10:5-7) Mei teaa ra te maata i to te Atua aroa, te meitaki, e te takinga meitaki i te akapapaanga kia rauka te ora na roto i te atinga oko o tana Tamaiti akaperepere!​—1 Ioane 4:9, 10.

Akameitaki te Aronga Tiratiratu ia Iehova

18. (a) Akapeea te “akapaapaa” anga i ta te Atua au angaanga iaia ra? (e) Eaa te tuatau tau no tatou kia akakeuia i te akameitaki ia Iehova ra?

¹⁸ Te tau ra te akapaapaa i te Atua mei te au tuanga katoa mai. Mei ta Davida i tuatua ra: “Ka akapaapaa taau katoa ra au angaanga ia koe, e Iehova, e na toou aronga tapu e akameitaki ia koe.” (Salamo 145:10) Te “akapaapaa” ra ta te Atua au mea i anga maira iaia, mei te are meitaki rai te akatu anga e meitaki ia ki tei akatu ra mei te kapu manea ra ki tei maani karape maira i te reira. (Akaaiteia atu kia Ebera 3:4; Isaia 29:16; 64:8.) No te vavaria ta Iehova ra au mea i anga mai kua akakeu i te au angera e te au tangata kia akapaapaa iaia. Kua maeva rekareka katoa te au tamaroa angera a te Atua i tana akatumu anga i te enua. (Iobu 38:4-7) Kua karanga a Davida e ‘te tuatua nei te au rangi i te kaka o te Atua e te akakite nei te reva i te angaanga a tona rima.’ (Salamo 19:1-6) Ka tau katoa oki tatou kia akapaapaa ia Iehova me akara tatou i te neza i te rereanga i te au rangi ra me kare i tetai zabi i te orooro aere anga i runga i te au maunga ra. (Iobu 39:26; Te Imene na Solomona 2:17) Te tau ra te akapaapaa me kokoti tatou i te mou me kare kia rekareka i te kaikai anga ma te au oa ra. (Salamo 72:16; Maseli 15:17) To tatou au kopapa umere roa te maani angaia e mea tau katoa kia akakeu i te au tuatua akapaapaa akameitaki i te Atua ra.​—Salamo 139:14-16.

19. Koai ma te “aronga tiratiratu,” e eaa ta ratou angaanga?

¹⁹ I teia tuatau, te akameitaki ra te “aronga tiratiratu” a Iehova tei akatainuia ra i te vaerua i runga i te enua nei. Te tuatua meitaki ra ratou nona e kua inangaro kia kite i tona anoano i te akatupu angaia ki runga i te enua nei mei to te rangi katoa ra. (Mataio 6:9, 10) I te tuatua anga te aronga tei akatainuia ki etai ke atu no ta te Atua ra au angaanga umere, kua akarongo maira te urupu maata e tini ua atu to ratou numero. Kapiti atu ki te aronga tiratiratu tei akatainuia ra, te tavini totomapu ra ratou i te akakitekite i te Patireia. Te akakeu ra ainei taau akameitaki anga ia koe kia rave putuputu i teia angaanga ei akapaapaa i te Atua?

20. (a) Akapeea te akatapu anga i te ingoa o Iehova? (e) No runga ia Salamo 145, eaa te au uianga te vai ra no te uriuri manako anga?

²⁰ Ei au Kite no Iehova, te aite ra tatou kia Davida i te orongaanga akapaapaa ki te Atua. E au tumu maata i to tatou manako te akatapuanga i to Iehova ra ingoa tapu e te akapaapaaanga i te reira. I te mea ko te ingoa o te Atua ka riro na te Patireia o te Atua e akatapu, e tuanga maata teia apiianga o te Puka Tapu i te Patireia koia te tuatua meitaki ta tatou e tutu aere nei. Te oronga maira ainei te Salamo 145 i te akamarama anga i te pae vaerua i teia tu? Eaa ta te toenga o ta tatou ka uriuri manako no teia salamo te ka akakite mai? Na teea au mataara atu ta te reira e akapapu mai e te tau ra te akapaapaa mutu kore kia Iehova?

Eaa Taau au Pauanga?

◻ Akapeea tatou me akameitaki i te ingoa o Iehova?

◻ Eaa etai au angaanga meitaki na te Atua ra?

◻ Eaa ta tatou ka rave me te ariki ra tatou i to Iehova meitaki?

◻ Eaa te au tu i akakiteia mai ei to te Atua ra aroa?

[Tutu i te kapi 12]

Te akakite ra ainei koe ki taau tamariki i ta Iehova au angaanga mana, mei ta te au metua akono i te Atua i Iseraela i taito ra?

[Tutu i te kapi 15]

Mei te are meitaki ra te akatu angaia e meitaki ia no tei akatu ra, pera katoa ta Iehova au angaanga i maani ra ka apai mai i te akapaapaa anga Nona