Сости амэ сытювас анда лэ Исусостири смэрть?

1. Васо важно кажно бэрш тэ авас пэ лэ Христостири вечеря?

О ИЕГОВА стердя амэнди фартэ кучутно подарко. Во бишалдя пэ ԥув пэстирэ Шавэс, саво отдя и жызня важ амэндэ (2 Кр. 9:15). Через када амэ можэм тэ авас май пашэ каринг о Иегова, ай кадяжэ тэ жувас вечно. О Иегова потиндя кадэя особо цэмин, важ кода кай фартэ амэн любий (Римо 5:8). Кай амэ вся и время тэ авас блаӷодарни и тэ на бистрас, со стердэ важ амэндэ о Иегова и лэско Шаво, о Исусо приԥэндя кажно бэрш тэ справисарас и Вечеря (Лука 22:19, 20).

2. Со амэ роздиқаса андэ кадэя статья?

² Андо 2025 бэрш и Вечеря авэла в субботу, 12 апреля. И канешно, всаворэ амэ вместе стидасапэ андэ кадэва дес. Авелоп драго важ дэсавэ курте каринг кадэва дес и посли лэстэ драго тэ погиндосарасa пала кода, со стердэ важ амэндэ о Иегова и лэско Шаво. Андэ кадэя статья амэ роздиқаса, со пала Иегова и пала Исусо амэ уӷанас через и особо цэмин, сави вонэ потиндэ. Ай андэ авэр статья амэ подаса дума пала кода, саво лашымос амэндэ авэла через лэ Исусостири жэртва и сар амэ можэм тэ сыкавас, кай цэнисарас ла.

СО ЛЭ ИСУСОСТИРИ СМЭРТЬ ПОМОЖЫЙ АМЭНДИ ТЭ УӶАНАС ПАЛА ИЕГОВА

3. Сар еқэ манушэстири смэрть можэт тэ освободий лэ бэзэхэстар и ла смэртятар милионоря манушэн? (Кадяжэ диқэн и картинка.)

³ Через лэ Исусостири смэрть амэ ӷанас, кай о Иегова справедливо (Втор. 32:4). Кала о Адамо на кангля лэ Дэвлэс, во ашэля бэзэхэско и муля. Всаворэ амэ жылям лэстар, важ када амэнди пэрэдяпэ лэстар о бэзэх, через саво амэ тожэ мэрас (Римо 5:12). Кай тэ освободий амэн лэ бэзэхэстар и ла смэртятар, о Иегова закамля тэ потинэл особо цэмин — во бишалдя пэ ԥув лэ Исусос. Но сар еқэ манушэстири смэрть моӷла тэ спасый милионоря манушэн? О апостало Павло поможысардя када тэ полас: «Сар ек мануш [о Адамо] на кангля и бутэнди пэрэдяпэ о бэзэх, кадя ек мануш [о Исусо] кангля и бут ашэна найдошалэ» (Римо 5:19; 1 Тим. 2:6). Аврэ алавэнца, амэ попэлям андо рабство кай о бэзэх и кай и смэрть, важ кода кай ек идеально мануш на кангля лэ Дэвлэс. Вижал, кай амэ тэ ашас свободни, авэр идеально мануш трэбуй сас андэ вся тэ кандэл лэ Дэвлэс.

4. Васо о Иегова на домэкля лэ Адамостирэ бэятонэнди тэ жувэн вечно?

⁴ Чаче лэ Исусости трэбуй сас тэ мэрэл, кай тэ спасый амэн? Хэба о Иегова не моӷ тэ домэкэл лэ Адамостирэ бэятонэнди, савэ ритярэн лэско законо, тэ жувэн вечно? Амэ, сар мануша, можэм тэ погиндосарас, кай када само лащи решэния. Но хэба када авелоп справедливо? Тэ стердоп кадя о Дэл, лэсти прижылопэ тэ терэл муй, кай о Адамо нисо на стердя. Но када жэ най кадя!

5. Васо амэ можэм тэ патяс, кай о Иегова вся и время лэла тэ андярэл пэс справедливо?

⁵ Со авелоп, если о Иегова на линоп тэ витинэл лэ манушэн, ԥаглоп пэско жэ справедливо законо и домэклоп лэ Адамостирэ бэятонэнди тэ жувэн вечно? Тоди и мануша, возможно, линоп тэ на допатян лэ Дэвлэсти и тэ гиндон: ай на авэла инке еқвар кацаво, кай о Дэл жала против пэско законо? Например, лэла во вся и время тэ приритярдёл пэстирэ алавэсти? Амэнди на трэбуй пала када фартэ тэ загиндосавас. Васо? Важ кода кай о Иегова стердя кадя, сар сас справедливо, хоть када обжыляпэ лэсти фартэ куч — во отдя пэстирэ любимонэ Шавэс. Кочай амэ можэм тэ патяс, кай о Дэл вся и время лэла тэ приритярдёл пэстирэ законости.

6. Васо инке о Иегова закамля тэ витинэл лэ манушэн? (1 Иоано 4:9, 10).

⁶ Да, лэ Исусостири смэрть поможый амэнди тэ полас, кай о Иегова справедливо. Но инке вой поможый амэнди фэдэр тэ полас, пэскати дэ фартэ любий амэн о Дэл (Иоан. 3:16; проадинон 1 Иоано 4:9, 10). О Иегова камэл, кай амэ най кати тэ жувас вечно, но и тэ авас андэ лэско ери. Погиндосар: кала о Адамо стердя бэзэх, о Иегова видарадя лэс анда пэско ери. Важ када ни ек мануш на арақадёл андэ лэ Дэвлэско ери. Но важ кода кай о Исусо отдя пэстири жызня и витиндя амэн, о Иегова можэт тэ простий амарэ бэзэха. Через када всаворэ мануша, савэ патян андо Дэл и кандэн лэс, ашэна лэстирэ бэятонэнца. И дажэ адес амэ можэм тэ ашас лашэ друӷоря лэ Иеговаса и амарэ ԥралэнца и ԥэянца. Сар дэ фартэ о Иегова амэн любий! (Римо 5:10, 11).

7. Кай тэ витинэл амэн, о Исусо фартэ мучияспэ. Со амэнди када ԥэнэн пала Иегова?

⁷ Кай тэ полас, сар дэ фартэ о Иегова любий амэн, давайте погиндосараса, пэр со во жыля, кай тэ витинэл амэн. О Сатана камэл тэ доԥэнэн, кай ни ек мануш на виритярэла и ԥари время и парашэла тэ кандэл лэ Дэвлэс. Важ када о Иегова закамля тэ сыкавэл, кай вся када хохаимос, и домэкля, кай англа кода, сар лэско Шаво тэ мэрэл, во тэ пэрэандярэл баро ԥаримос (Иов 2:1—5; 1 Пёт. 2:21). О Иегова диқэлас, сар и барэдэра анда иудейско вера подасанаспэ лэ Исусостар. И халавдэ фартэ мардэ лэс чукняса и примардэ каринг о столбо. Потом лэс ашадэ тэ мэрэл ԥаря смэртяса (Матф. 27:28—31, 39). О Иегова моӷ андо любо маменто тэ спасый лэс. Например, кала и мануша ԥэндэ: «Мэк о Дэл спасый лэс акана, если во лэсти куч», о Иегова моӷ кадя и тэ стерэл (Матф. 27:42, 43). Но тоди лэстэ на вижылоп тэ витинэл лэ мирос и амэндэ на авелоп нисави надия. Важ када о Иегова домэкля, кай лэско Шаво тэ мучийпэ англа пэстири смэрть.

8. Катар амэ ӷанас, кай лэ Иеговасти сас фартэ дуқанэс тэ диқэл, сар мучияспэ лэско Шаво? (Кадяжэ диқэн и картинка.)

⁸ На трэбуй тэ гиндосарас, кай, если о Дэл само зорало, лэстэ нинай ди. Во стердя амэн пар пэстэ и дя амэнди жундо ди, через саво амэ вся промэкас. Ай када сыкавэл, кай лэстэ во тожэ исин. Андэ Библия ԥэнэнпэ, кай и мануша терэнас, «кай лэсти тэ авэл ԥарэс» и «кай лэ Дэвлэско ди тэ дуқал» (Пс. 78:40, 41). Погиндосарам важ кода, со сас андэ жызня кай о Авраамо и кай о Исако. О Дэл ԥэндя лэ Авраамости тэ анэн андэ жэртва пэстирэ еқэс шавэс (Быт. 22:9—12; Евр. 11:17—19). Кати прецтавь, сар лэ Авраамоско ди опшоласпэ ратэса, кала во тидэласпэ тэ зашынэл лэ Исакос. Пэскати жэ май ԥарэс сас лэ Иеговасти тэ диқэл, сар и жэстоки мануша марэнас лэстирэ Шавэс! (Диқэн о видео «Подражайте их вере. Авраам (часть 2)» (пэ руско шыб) по сайто jw.org.)

9. Со амэ уӷанас пала кода, сар амэн любий о Иегова, анда Римо 8:32, 38, 39?

⁹ Лэ Исусостири смэрть доԥэнэн, кай нико — ни амарэ чаче, ни амаро родо — на любий амэн кадя, сар о Иегова. (Проадинон Римо 8:32, 38, 39.) О Иегова любий амэн пэбутэстэ май фартэ, чем дажэ амэ екжэнэ. Ту камэс тэ жувэс вечно? О Иегова када камэл инке май фартэ. Камэс, кай во тэ простий тирэ бэзэха? Ту дажэ не прецтавляеш, сар када камэл о Иегова! Вся, со во тутар мангэл, — када тэ прилэс лэско подарко, тэ патяс лэсти и тэ кандэс лэс. Кала о Дэл отдя важ амэндэ пэстирэ Шавэс, во сыкадя, сар дэ фартэ во амэн любий. Ай андо раё пэ ԥув амэ инке май драго поласа, кай во па чачимастэ глаба пала амэндэ (Эккл. 3:11).

СО ЛЭ ИСУСОСТИРИ ЖЭРТВА ПОМОЖЫЙ АМЭНДИ ТЭ УӶАНАС ВАЖ ЛЭСТЭ

10. а) Пала со о Исусо пережывал англа кода, сар лэс тэ умарэн? б) Сар о Исусо фэрисардя лэ Иеговаско алав? (Кадяжэ диқэн и рамка «О Исусо отдя пэстири жызня, кай тэ зашолпэ пала лэ Иеговаско алав».)

¹⁰ О Исусо пережывает, со лэна тэ гиндон пала лэско Дад (Иоан. 14:31). О Исусо ӷанэнас, кай лэс умарэна сар кодэлэс, ко на стол патив по Дэл и зваздэл лэ мирос. Во фартэ пережывал, кай через када лэна найдраго тэ гиндон пала лэско Дад и кочай мангэласпэ: «Дадэ, если возможно, улэ мандар кадэва стакано» (Матф. 26:39). Жы кай пэстири смэрть о Исусо на ашадя лэ Иеговас и кадэлэса фэрисардя пэстирэ Дадэско лашо алав.

11. Андар со дицэля, сар дэ фартэ о Исусо любияс лэ манушэн? (Иоано 13:1).

¹¹ Лэ Исусостири жэртва поможый амэнди тэ полас, кай во заботийпэ пала мануша, но со май фартэ пала кодэла, ко лэс кандэл (Прит. 8:31; проадинон Иоано 13:1). О Исусо ӷанэнас, кай дэсави дила, сави лэсти трэбуй тэ стерэл пэ ԥув, авэла фартэ ԥари. Например, лэсти трэбуй сас тэ мэрэл ԥаря смэртяса. И всаек во пэ када жыля най важ кода, кай трэбуй сас. Кала о Исусо росԥэнэнас и лащи новость, сытярэлас лэ учениконэн и поможыяс аврэнди, во када терэлас анда вся ди. Дажэ андо дес, кала лэсти трэбуй сас тэ мэрэл, во виарақля время, кай тэ вихалавэл и пэрнэ пэстирэ апосталонэнди, тэ придэл лэнди зор алавэнца и тэ дэл лэнди годи (Иоан. 13:12—15). И дажэ кала во фартэ мучияспэ по столбо, о Исусо дя надия лэ чордэӷарести, саво амбладёлас по столбо паша лэстэ, и приԥэндя лэ Иоаности тэ заботийпэ пала Мария (Лука 23:42, 43; Иоан. 19:26, 27). О Исусо сыкадя, сар дэ фартэ во любий лэ манушэн, най кати кала муля пала лэндэ, но и кала драго лэнца обжаласпэ, пока жувэлас пэ ԥув.

12. Сар о Исусо на парашэл бут со тэ терэл важ амэндэ?

¹² Хоть о Исусо муля «еқвар», во на парашэл бут со тэ терэл важ амэндэ (Римо 6:10). Во тратий бут время и зор, кай лэ манушэнди тэ анэн лашымос лэстири жэртва. Соса о Исусо залэлпэ щас? Во амаро Царё, Пэрвосвященико и ла собранияко хулай (1 Кр. 15:25; Еф. 5:23; Евр. 2:17). Во диқэл пала кода, кай тэ стидэн лэ избранонэн и баро ӷурто манушэн — вся када трэбуй тэ авэл стердо, пока на прожала и бари бида (Матф. 25:32; Мар. 13:27)b. Кадяжэ во следий, кай лэ Иеговастирэ манушэндэ андэ кадэла послидни деса тэ авэл лашо дэвликуно хамос (Матф. 24:45). И кала во лэла тэ правий 1000 бэрш, во на парашэла тэ заботийпэ пала амэндэ. Да, о Иегова па чачимастэ отдя амэнди пэстирэ Шавэс!

СТАРЫСАВ ТЭ УӶАНЭС МАЙ БУТ

13. Со поможыя тути инке май бут тэ уӷанэс пала кода, сар любий о Иегова и о Исусо?

¹³ Амэ можэм инке май бут тэ уӷанас, сар о Иегова и о Исусо любин амэн. Сар? Амэнди трэбуй тэ гиндосарас важ кода, со вонэ стердэ важ амэндэ. Например, андэ кадэва бэрш ту можэш тэ витидэс время англа Вечеря и посли латэ, кай внимательно тэ проадинос ек Евангелия или дажэ май бут. На старысав важ еқвар фартэ бут тэ проадинос. На грабисав и май драго полэ, васо амэ трэбуй тэ любисарас лэ Иеговас и лэ Исусос. И на бистэр тэ росԥэнэс аврэнди, со интересно ту виарақлян!

14. Кала ту май драго розуӷанэс и Библия, сар када поможыя тути? (Псалом 119:97). (Кадяжэ диқэн и картинка.)

¹⁴ Если ту болдо ужэ дэлмут, тоди ту можэш тэ гиндос, кай ужэ драго ӷанэс вся када — кай о Дэл справедливо, кай во любий амэн, кай отдя пэстирэ Шавэс важ амэндэ — и кай пала када ту нисо нэво ужэ на уӷанэса. Но ԥэнаса чаче, ту никала не сможэш вся тэ уӷанэс пала када. Со ту можэш тэ стерэс? Ԥэрнав амарэ публикацыи. Котэ ту виарақэса фартэ бут сомнак, саво никала на кончияпэ. Кала лэса тэ адинос и Библия и тути попэрдёла варисаво ԥаро гиндо, розуӷан лэс май драго. Посли када вся о дес гиндосар важ кода, со интересно ту уӷанглян. Кадяжэ гиндосар, со ту уӷанглян важ о Иегова, важ о Исусо и важ кода, сар вонэ тут любин. (Проадинон Псалом 119:97.)

15. Васо трэбуй тэ на умэкэс и вас и тэ на парашэс тэ родэс сомнак, саво загарадо андэ Библия?

¹⁵ На умэк и вас, если кажно разо, кала ту адинос и розуӷанэс и Библия, тутэ на вижал тэ виарақэс варисо нэво и интересно. Можно тэ ԥэнас, ту шоспэ по мануш, саво родэл сомнак андэ ԥув. Лэстэ можэт тэ ужал пэ када бут время и дажэ бут деса, и во кадя нисо на виарақэла. Но кацаво мануш на здэлпэ и фартэ лошавэл, кала лэсти попэрдёл дажэ фартэ цынёнё котороро сомнак. Пэскати жэ важ амэндэ май куч о сомнак анда Библия! (Пс. 119:127; Прит. 8:10). Важ када старысав тэ тэрпис, на параш тэ адинос и Библия и тэ родэс кода, со андэр латэ гарадо (Пс. 1:2).

16. Андэр со амэ можэм тэ лас примеро лэ Иеговастар и лэ Исусостар?

¹⁶ Старысав тэ прилэс андэ жызня кода, со ту уӷанэс анда Библия. Например, сар о Иегова обжалпэ всаворэнца справедливо и еқэндар. Лэ примеро лэ Исусостар: любисар пэстирэ небеснонэ Дадэс и лэ манушэн. Кадяжэ ав ӷотово тэ пэрэандярэс о ԥаримос через лэ Иеговаско алав и тэ отԥэндёс варисостар важ авэр. Ай инке росԥэн лэ мирости, со стердя важ лэндэ о Иегова, кай и вонэ тэ патян андэ лэ Исусостири жэртва.

17. Со амэ уӷанаса анда авэр статья?

¹⁷ Со май бут амэ ласа тэ уӷанас пала кода, сави цэмин потиндя о Иегова и лэско Шаво и тэ цэнисарас када, со май фартэ амэ ласа тэ любисарас лэн. И вонэ тожэ лэна тэ любин амэн инке май фартэ (Иоан. 14:21; Иак. 4:8). Важ када адиносар и Библия и амарэ публикацыи, савэ дэл о Иегова, кай май бут тэ уӷанэс пала лэ Исусостири жэртва. Андэ авэр статья амэ роздиқаса, саво лашымос амэндэ исин через лэ Исусостири смэрть и сар амэ можэм тэ сыкавас лэ Иеговасти, кай любисарас лэс.