Julho

Yezu akhatowezera mwadidi kakamwe manyerezero na mabvero a Babace mu pinthu pyonsene pikhalonga iye na pikhacita iye, kuphatanizambo pirengo pikhacita iye. (Juw. 14:9) Tinapfundzanji na pirengo pidacita Yezu? Cakutoma, Yezu na Babace asatifuna kakamwe. Pikhali iye pa dziko yapantsi, Yezu apangiza ufuni unoyu kuna anthu mukucita pirengo toera kuaphedza. Paulendo unango, maboliboli awiri adembetera kuna Yezu toera aphedzwe. (Mat. 20:30-34) Natenepa Yezu “aabvera ntsisi” mbaawangisa. Fala Yacigerego idaphatisirwa toera kulonga “kubvera ntsisi” isapangiza mabvero akuwanga kakamwe anakulumiza munthu toera kubvera ntsisi anango. Mabvero anewa a ntsisi akuti ndi njira yakupangiza ufuni, akulumizambo Yezu toera kudyesa anthu akhabva njala na kuwangisa anyamatanya. (Mat. 15:32; Marko 1:41) Ife tinakwanisa kukhala na cinyindiro cakuti Yahova, Mulungu wa “ntsisi zikulu” na Mwanace asatifuna kakamwe, pontho asatsukwala angationa mbatithabuka. (Luka 1:78; 1 Ped. 5:7) Mwandimomwene iwo asafuna kakamwe kumalisa nyatwa zonsene zinatamba anthu! w23.04 tsa. 3 ¶4-5

Ife tisafunika kuwangisira toera tikhonde kuleri na kubvesera maonero akuipa a dziko ino ya Sathani. Ife tinakwanisa kukhala na manyerezero adidi tingaleri na kupfundza Bhibhlya. Kugumanika pa misonkhano na kumwaza mphangwa kunatiphedzambo toera kutsidzikiza manyerezero athu. Tingacita pyenepi, Yahova anakwanirisa pikiro yace yakuti, nee anatawirisa kuti tithimbane na mayesero akuti nee tinakwanisa kuapirira. (1 Akor. 10:12, 13) Ife tisafunika kucita phembero ndzidzi onsene toera tikwanise kupitiriza kukhala akukhulupirika kuna Yahova ntsiku zino zakumalisa, zakuti ndi zakunentsa kakamwe. Yahova asafuna kuti ‘tifungule mitima yathu kuna iye’ m’phembero. (Mas. 62:8) Simbani Yahova, pontho perekani takhuta thangwi ya pyonsene pinacita iye. Phembani ciphedzo cace toera mukwanise kukhala na cipapo mu utumiki. Pontho phembani ciphedzo cace toera mukwanise kupirira nyatwa na mayesero akuti panango munathimbana nawo. Lekani tawirisa nee cinthu cibodzi cikucitiseni kusiya kucita phembero kuna Yahova ndzidzi onsene. w23.05 tsa. 7 ¶17-18

Thangwi yanji tisagumanika pa misonkhano ya mpingo? Thangwi yakutoma ndi toera kusimba Yahova. (Mas. 26:12; 111:1) Thangwi inango ndi yakuti tingagumanika pa misonkhano tisakwanisa kuwangisana unango na ndzace m’midzidzi ino yakunentsa. (1 Ates. 5:11) Natenepa, tingatawira pa misonkhano, ife tisacita pinthu pyenepi piwiri. Mbwenye pakufuna kutawira, panango tinathimbana na pinentso. Panango tinagopa kutawira peno panango tinafuna kakamwe kutawira, mbwenye midzidzi inango nee tinapaswa mwai toera kucita pyenepi. Tinakunda tani pinentso pyenepi? Mpostolo Paulu alonga kuti tisafunika ‘kuwangisana unango na ndzace.’ Tingakumbuka kuti anango anaphedzeka na ntawiro wathu, maseze ukhale wacigwagwa, ife tinakhala akusudzuka toera kutawira pa misonkhano. Pontho tingakhonda kupaswa mwai toera kutawira, ife tisafunika kukhala akutsandzaya thangwi anango mu mpingo anakhalambo na mwai wakutawira.—1 Ped. 3:8. w23.04 tsa. 20 ¶1-3

Mambo adziwisa kuti Ayuda akhali mu ubitcu mu Bhabhilonya mu pyaka 70, asudzulwa toera abwerere ku dziko yawo. (Esd. 1:2-4) Basi ene ndi Yahova akhafuna kucitisa kuti pyenepi pikwanisike. Thangwi Abhabhilonya kazinji kene nee akhasudzula mabitcu awo. (Iza. 14:4, 17) Mbwenye mambo akhadacinjwa mu dziko ya Bhabhilonya, pontho mambo unoyu mupswa akhadatawirisa Ayuda toera abuluke. Na thangwi ineyi, Ayuda onsene, makamaka misolo ya mabanja, akhafunika kucita cisankhulo: Kubuluka mu Bhabhilonya peno kupitiriza mwenemo. Panango cisankhulo ceneci cikhali cakunentsa kuna iwo. Panango anango akhadakalamba, pontho nee mbadakwanisa kucita ulendo wa nsindzo wakulapha kakamwe. Kusiyapo pyenepi, Ayuda azinji akhadabalwa m’Bhabhilonya, natenepa nee akhadziwa dziko inango kusiyapo Bhabhilonya. Kuna iwo, Izraeli nee ikhali dziko yawo, mbwenye ikhali dziko ya ambuyawo. Anango panango akhali na mpfuma m’Bhabhilonya, natenepa panango mbapidakhala pyakunentsa kuna iwo toera kusiya nyumba zawo zadidi na malonda awo mbaenda ku dziko yakuti nee akhaidziwa. w23.05 tsa. 14 ¶1-2

Mafala a Mulungu asatikulumiza toera kukulisa n’khaliro wakupirira, kubvera ntsisi anango na ufuni. Mwacitsandzo, lemba ya Luka 21:19 isalonga: “Mungapirira mpaka kunkhomo, munadzapulumusa umaso wanu.” Lemba ya Akolose 3:12 isalonga: “Khalani akubvera ntsisi.” Pontho lemba 1 Atesalonika 4:9, 10 isalonga: “Imwe musapfundziswa na Mulungu toera kufunana unango na ndzace. . . . Mbwenye ife tisakudembeterani abale, kuti pitirizani kucita pyenepi mwakuthimizirika kakamwe.” Malemba anewa onsene alemberwa anyakupfundza a Yezu akuti akhapangiza kale makhaliro akupirira, kubvera ntsisi anango na ufuni. Mbwenye iwo akhafunika kupitiriza kupangiza makhaliro anewa. Ife tisafunikambo kucita pyenepi. Toera kutiphedza kucita pyenepi, ife tinapfundza kuti Akristu a mu ndzidzi wa apostolo apangiza tani makhaliro anewa. Buluka penepo, tinaona kuti tinatowezera tani anyakupfundza anewa mbatipangiza kuti tiri akukhunganyika nyatwa ikulu mbidzati kufika. Natenepa nyatwa ikulu ingatoma, inakugumanani kuti muli wakukhunganyika toera kupirira. w23.07 tsa. 3 ¶4, 8

Mwakukhonda tsalakana khala ndife Akristu akudzodzwa peno “mabira anango,” ife tisafunika kupitiriza kufamba ‘Munjira Yakucena’ yakuti isatiphedza toera tipitirize kulambira Yahova mpaka ndzidzi unafuna ife kutambira nkhombo za Umambo wa Mulungu. (Juw. 10:16) Kutomera mu caka ca 1919, amuna, akazi na ana azinji kakamwe asabuluka mu Bhabhilonya Wankulu, wakuti ndi uphemberi wauthambi wa pa dziko yonsene yapantsi, mbatoma kufamba munjira ineyi yakuphipirisa. Yahova asasanyira njira ikhafuna kufamba na Ayuda akhafuna kubuluka ku Bhabhilonya. (Iza. 57:14) Ndiye tanimbo “Njira Yakucena” inafamba na atumiki a Yahova lero? Pyaka pizinji kakamwe nduli mbacidzati kufika caka ca 1919, Yahova aphatisira anthu anamulemedza toera kuphedzera basa yakusasanyira njira yakubuluka mu Bhabhilonya Wankulu. (Onani Izaiya 40:3.) Iwo aphedzera basa yakusasanyira njira yauzimu toera kuphedza anthu a mitima yadidi kusiya Bhabhilonya Wankulu mbapita mparaizu yauzimu, mwakuti anthu asalambira Yahova munjira yadidi. w23.05 tsa. 15-16 ¶8-9

Yahova asafuna kuti tintumikire mwakutsandzaya na mwakufuna. (2 Akor. 9:7) Kodi ife tisafunika kupitiriza kuwangisira toera kukwanirisa pifuno pyauzimu maseze tipibve kuti nee tiri na cifuno cakuwanga? Onani citsandzo ca mpostolo Paulu. Iye alonga: “Ndisasandika manungo anga, mbandiatsogolera ninga bitcu.” (1 Akor. 9:25-27, cidzindikiro capantsi) Paulu awangisira toera kucita pinthu pyadidi, maseze midzidzi inango nee akhali na cifuno toera kupicita. Mphapo Yahova akhakomerwa na basa ikhacita Paulu? Inde! Pontho Yahova ampasa nkhombo thangwi yakuwangisira kwace. (2 Tim. 4:7, 8) Munjira ibodzi ene, Yahova asatsandzaya angationa mbatiwangisira toera kukwanirisa pifuno pyathu maseze midzidzi inango nee tisakhala na cifuno cakuwanga toera kucita pyenepi. Iye asatsandzaya thangwi asadziwa kuti tisacita pyenepi thangwi ya ufuni wathu kuna iye, maseze midzidzi inango nee tisakhala na cifuno. Yahova apasa nkhombo Paulu thangwi yakuwangisira kwace, pontho Iye anacitambo pibodzi pyene kuna ife. (Mas. 126:5) Pontho tingaona kuti Yahova ali kutipasa nkhombo, tinatoma kukhala na cifuno cakuwanga. w23.05 tsa. 29 ¶9-10

Mpostolo Paulu alandanisa anthu anafuna kudzafudzwa pa ntsiku ya Yahova na ale anagona. Iwo nee asadziwa pinthu pinacitika, pontho nee asadziwa kuti ndzidzi uli kupita. Natenepa iwo nee asadziwa ndzidzi unafuna kucitika cinthu cakufunika kakamwe, pontho nee anakwanisa kucita cinthu pa ndzidzi unoyu. Anthu azinji lero ali kugona n’citulo cauzimu. (Aroma 11:8) Iwo nee asakhulupira kuti tiri kukhala “mu ntsiku zakumalisa,” pontho kuti nyatwa ikulu inafika mwakukhonda dembuka. (2 Ped. 3:3, 4) Mbwenye ife tisadziwa kuti uphungu unoyu wakupitiriza kukhala m’maso ndi wakufunika kakamwe. (1 Ates. 5:6) Natenepa tisafunika kupitiriza kukhala akukhurudzika. Thangwi yanji? Tingakhala akukhurudzika nee tinacita khundu mu ndale za dziko. Mu ndzidzi unafendedzera ife cifupi ntsiku ya Yahova, tinakakamizwa kakamwe toera kucita khundu mu ndale za dziko. Ngakhale tenepo, nee tisafunika kudzudzumika na pinthu pinafuna ife kulonga. Nzimu wa Mulungu unatiphedza toera kukhala akukhurudzika, kukhala na manyerezero adidi mbaticita pisankhulo pyadidi.—Luka 12:11, 12. w23.06 tsa. 10 ¶6-7

Ninji pinanyerezera imwe mungabva dzina ya Samisoni? Panango musanyerezera kuti iye akhali mamuna wamphambvu kakamwe. Unoyu ndi undimomwene. Mbwenye Samisoni acita pisankhulo pyakuipa pidam’bweresera nyatwa zizinji. Ngakhale tenepo, Yahova akumbuka kukhulupirika kwa Samisoni, pontho Iye alembesa citsandzo cace m’Bhibhlya toera kutiphedza. Yahova aphatisira Samisoni toera kuphedza Aizraeli. Pidapita pyaka pizinji pakumala kufa kwa Samisoni, Yahova aphatisira mpostolo Paulu toera kulemba dzina ya Samisoni pa ndandanda ya anthu akukhulupirika. (Aheb. 11:32-34) Citsandzo ca Samisoni cinatiwangisambo. Iye anyindira Yahova, ngakhale m’midzidzi ya nyatwa. Ife tinakwanisa kuwangiswa tingapfundza pinthu pinango na citsandzo cace. w23.09 tsa. 2 ¶1-2

Ife tinakwanisambo kuthimizira kupirira kwathu tingacita phembero kazinji kene mbatipanga Yahova pyonsene pinatidzudzumisa. (1 Ates. 5:17) Panango imwe nee mukuthimbana na nyatwa zakunentsa kakamwe cincino. Mphapo musasaka citsogolero ca Yahova mungakhala wakutsukwala peno mungakhonda kudziwa pinafunika imwe kucita? Mungacita phembero kuna Yahova toera akuphedzeni mu nyatwa zing’ono zinathimbana na imwe cincino, nee munadzanyinyirika toera kucita pyenepi mungathimbana na nyatwa zakunentsa kakamwe ntsogolo. Mungacita pyenepi, imwe munakhala na cinyindiro cakuti Yahova asadziwa ndzidzi unafuna iye kukuphedzani na njira inafuna iye kucita pyenepi. (Mas. 27:1, 3) Tingapirira nyatwa zinathimbana na ife cincino, pinakhala pyakukhonda nentsa toera kupirira pa nyatwa ikulu. (Aroma 5:3) Thangwi yanji tisalonga tenepo? Abale na alongo azinji alonga kuti mayesero adapirira iwo aaphedza toera akwanise kupirira pinentso pinango. Kupirira kwaaphedza toera kuthimizira cinyindiro cawo cakuti Yahova ali dzololo toera kuaphedza. Cikhulupiro caaphedzambo toera kupirira pinentso pinango.—Tiya. 1:2-4. w23.07 tsa. 3 ¶7-8

Kucepeseka kwa Yahova na kubvera kwace ntsisi kusancitisa kukhala wakulinganira. Mwacitsandzo, Yahova apangiza kucepeseka kwace mu ndzidzi ukhafuna iye kufudza anthu akuipa mu Sodhoma. Mukuphatisira aanju, Yahova apanga Loti wakuti akhali wakulungama toera athawire ku mapiri. Loti agopa kuthawira kweneko. Natenepa, iye aphemba Yahova toera iye na banja yace athawire ku Zoari, nzinda ung’ono wakuti ukhafuna kufudzwa na Yahova. Yahova mbadakakamiza Loti toera abvere pidampanga iye. Mbwenye iye atawirisa Loti toera athawire ku Zoari, pontho iye nee afudzabve nzinda unoyu. (Gen. 19:18-22) Mukupita kwa pyaka, Yahova abvera ntsisi anthu a ku Ninive. Iye atuma mprofeta Yona toera akadziwise kuti nzinda unoyu mbudafudzwa pabodzi na anthu akuipa. Mbwenye pidatcunyuka iwo, Yahova aabvera ntsisi, pontho nee afudzabve nzinda unoyu.—Yona 3:1, 10; 4:10, 11. w23.07 tsa. 21 ¶5

Tisapfundzanji na citsandzo ca Yeowasi? Iye akhali ninga muti wakuti nee ukhali na mitcici yakuwanga, pontho ukhanyindira muti unango toera upitirize kulimira. Natenepa pidafa Yeoyadha wakuti akham’phedza toera akhale na makhaliro adidi, Yeowasi atoma kubvesera anthu akupanduka mbasiya kukhala wakukhulupirika kuna Yahova. Citsandzo ceneci cisapangiza kuti nee tisafunika kubvera Mulungu basi ene thangwi acibale athu peno anango mu mpingo ndi a citsandzo cadidi kuna ife. Toera kupitiriza kukhala akuwanga mwauzimu, tisafunika kukulisa ufuni wathu na cilemedzo kuna Yahova mukupfundza Mafalace, kunyerezera mwadidi pinapfundza ife na kucita phembero. (Yer. 17:7, 8; Akol. 2:6, 7) Yahova nee asatiphemba toera ticite pinthu pyakuti nee tinakwanisa kupicita. Pinthu pinatiphemba iye pyalongwa mwacigwagwa pa Ekleziaste 12:13 kuti: “Gopa Mulungu wandimomwene mbubvera mitemo yace, thangwi pyenepi ndi pinthu pyakuti munthu asafunika kupicita.” Tingagopa Mulungu tinakwanisa kupitiriza kukhala akukhulupirika kuna iye mwakukhonda tsalakana pinthu pinafuna citika ntsogolo. Natenepa, nee cinthu cibodzi cinakwanisa kufudza uxamwali wathu na Yahova. w23.06 tsa. 19 ¶17-19

Vesi 5 isatoma na mafala awa: “Ule akhali pa mpando waumambo alonga.” (Apok. 21:5a) Mafala anewa ndi akupambulika thangwi unoyu ndi ubodzi mwa maulendo matatu anagumanika m’bukhu ya Apokalipse akuti Yahova alonga mukuphatisira masomphenya. Mafala anewa nee alongwa na anju, nee na Yezu, mbwenye ndi Yahova adaalonga! Pyenepi pisapangiza kuti tinakwanisa kunyindira na ntima onsene mafala anango adalonga iye pa vesi ineyi. Thangwi yanji? Thangwi Yahova “nkhabe kulonga uthambi.” (Tito 1:2) Natenepa, mafala anagumanika pa Apokalipse 21:5, 6 ndi akunyindirika. Fala Yacigerego yakuti “ona!” yaphatisirwa kazinji kene m’bukhu ya Apokalipse. Ndi mafala api anatowera? Mulungu alonga: “Ine ndiri kucita pinthu pyonsene kudza pipswa.” Mwandimomwene Yahova ali kulonga pinthu pinafuna kucitika ntsogolo, mbwenye kuna iye pikiro ineyi iri kukwanirisika, thangwi mwakukhonda penula inakwanirisikadi.—Iza. 46:10. w23.11 tsa. 3-4 ¶7-8

Mpostolo Pedhru akhacita madodo. Mwacitsandzo, mu ndzidzi udalonga Yezu kuti mbadathabuswa na kuphiwa toera kukwanirisa maprofesiya a Bhibhlya, Pedhru ansandika. (Marko 8:31-33) Kazinji kene, Pedhru na apostolo anango akhaketesana kuti mbani nkulu pakati pawo. (Marko 9:33, 34) Namasiku Yezu mbadzati kufa, Pedhru agwanda khutu ya mamuna unango. (Juw. 18:10) Masiku mabodzi ene, thangwi yakugopa anthu, Pedhru akhonda Yezu katatu. (Marko 14:66-72) Pyenepi pyacitisa kuti Pedhru alire kakamwe. Yezu nee asiya mpostolo wace unoyu wakuti akhali wakutsukwala kakamwe. Pidalamuswa iye muli akufa, Yezu apasa Pedhru mwai wakupangiza ufuni wace kuna iye. Yezu apanga Pedhru toera atumikire mwakucepeseka ninga nkumbizi wa mabira ace. (Juw. 21:15-17) Pedhru akhali dzololo toera kucita pidalonga Yezu. Na thangwi ineyi, iye akhali ku Yerusalemu pa Pentekoste pabodzi na Akristu adatoma kudzodzwa na nzimu wakucena. w23.09 tsa. 22 ¶6-7

Mpostolo Pedhru apanga akulu a mpingo andzace kuti: “Kumbizani nkumbi wa mabira a Mulungu.” (1 Ped. 5:1-4) Khala ndimwe nkulu wa mpingo, ife tisadziwa kuti imwe musafuna abale na alongo anu, pontho musafuna kuatsalakana. Mbwenye midzidzi inango panango munakhala akuphatika kakamwe na mabasa anango peno munakhala akuneta mbamucimwana kucita basa ineyi. Pyenepi pingacitika munacitanji? Dziwisani Yahova pinthu pinakudzudzumisani. Pedhru alemba: “Khala munthu ali kutumikira, iye asafunika kunyindira mphambvu za Mulungu.” (1 Ped. 4:11) Panango abale na alongo anu asathimbana na nyatwa zakuti nee zinamala zonsene mu dziko ino. Mbwenye kumbukani kuti “nkumbizi wankulu,” Yezu Kristu, anaaphedza mwadidi kupiringana imwe. Iye anakwanisa kucita pyenepi cincino na mu dziko ipswa. Yahova asafuna kuti akulu a mpingo afune abale na alongo awo, aakumbize, pontho akhale ‘citsandzo cadidi kuna nkumbi wa mabira.’ w23.09 tsa. 29-30 ¶13-14

Tisafunika kucalira kuphatisira Manyerezero a anthu anakhonda bvera Yahova. Tinganyerezera pinthu munjira inanyerezera anthu akuti nee asabvera Yahova, panango tinatoma kupwaza mitemo yace. (1 Akor. 3:19) “Udziwisi wa dziko ino” kazinji kene usacitisa anthu toera akhonde kubvera Mulungu. Akristu a ku Pergamo na a ku Tiyatira akhali na maonero aulukwali na akulambira madzimunthu ninga anthu a m’mizinda ineyi. Yezu asandika mipingo ineyi, thangwi iwo akhatawirisa makhaliro aulukwali. (Apok. 2:14, 20) Lero, anthu asayesera kuticitisa kukhala na maonero akuphonyeka. Acibale athu, andzathu akuxikola peno akubasa panango anayesera kutipanga toera ticite pinthu pyakuti nee pisakomeresa Yahova. Panango iwo anayesera kutipanga kuti nee ndi pyakuipa kucita pinafuna ife, peno kuti midida ya Bhibhlya ndi yakale kakamwe. Midzidzi inango panango tinanyerezera kuti pitsogolero pinatipasa Yahova nee ndi pyakubveka mwadidi. Panango tinayesera kucita pinthu pinango “kupiringana pire pidalembwa.”—1 Akor. 4:6. w23.07 tsa. 16 ¶10-11

Mariya, mai wace Yezu, akhafunika kukhala na mphambvu. Iye akhadzati kumanga banja; nee akhadakuza kale mwana, mbwenye akhafunika kutsalakana khombwani wakuti mbadadzakhala Mesiya. Kusiyapo pyenepi, nakuti cipo akhadapita m’mabonde, mbadapanga tani Zuze kuti akhali na mimba? (Luka 1:26-33) Mariya agumana mphambvu pidaphemba iye ciphedzo ca anango. Mwacitsandzo, iye aphemba anju Gabhriyeli toera ampange mphangwa zinango thangwi ya basa ineyi. (Luka 1:34) Buluka penepo, iye aenda kaona Elizabheti “ku cisa ca mapiri” ca Yuda. Elizabheti asimba Mariya, pontho na ciphedzo ca Yahova alonga profesiya yakuwangisa kuna Mariya thangwi ya mwana akhafuna kubalwa. (Luka 1:39-45) Mariya alonga kuti Yahova “acita pinthu pyamphambvu na nkono wace.” (Luka 1:46-51) Yahova aphatisira anju Gabhriyeli na Elizabheti toera kupasa mphambvu Mariya. w23.10 tsa. 14-15 ¶10-12

Anyakupfundza anango a Kristu adzodzwa na nzimu wakucena toera akhale na uxamwali wakupambulika na Yahova. Akristu anewa akukwana 144.000 anatumikira ninga anyantsembe kudzulu pabodzi na Yezu. (Apok. 14:1) Mbuto Yakucena ya tabhernakulo isapangiza kuti iwo asankhulwa toera akhale ana auzimu a Mulungu maseze aciri pa dziko yapantsi. (Aroma 8:15-17) Mbuto Yakucena Kakamwe isaimirira kudzulu kunakhala Yahova. “Nguwo ikulu” ikhagawa Mbuto Yakucena na Mbuto Yakucena Kakamwe isaimirira manungo aunyama a Yezu akuti akhampingiza kuenda kudzulu toera katumikira ninga Nyantsembe Wankulu wa templo yauzimu. Mukupereka umaso wace ninga ntsembe kuna anthu, Yezu afungula njira toera anyakudzodzwa onsene akwanise kuenda kudzulu. Anyakudzodzwa asafunikambo kusiya manungo awo aunyama toera atambire muoni wawo wakudzulu.—Aheb. 10:19, 20; 1 Akor. 15:50. w23.10 tsa. 28 ¶13

Jidhiyoni akhala wakukhurudzika mu ndzidzi udalongerwa iye na Aefraimu. (Aton. 8:1-3) Jidhiyoni nee atawira mwakuipirwa. Iye apangiza kuti akhali wakucepeseka mukubvesera pinthu pikhalonga Aefraimu, pontho mukulonga nawo mwaufuni; pyenepi pyaacitisa kukhala akukhurudzika. Akulu a mpingo anatowezera citsandzo ca Jidhiyoni angabvesera mwadidi na kutawira mwakukhurudzika angalongwa mwakuipa. (Tiya. 3:13) Angacita pyenepi, iwo anaphedzera mpingo toera upitirize kukhala muntendere. Ndzidzi udasimbwa Jidhiyoni na anthu anango thangwi yakukunda Amidhiyani, iye apasa mbiri Yahova. (Aton. 8:22, 23) Akulu a mpingo anatowezera tani citsandzo ca Jidhiyoni? Iwo asafunika kupasa mbiri Yahova mu pinthu pyonsene pinakwanisa iwo kucita. (1 Akor. 4:6, 7) Mwacitsandzo, khala nkulu wa mpingo asasimbwa thangwi ya maluso ace akupfundzisa, iye anakwanisa kulonga kuti pinapfundzisa iye pisabulukira m’Mafala a Mulungu, pontho kuti ife tonsene tisapfundziswa na gulu ya Yahova. Midzidzi inango, akulu a mpingo asafunika kunyerezera khala njira inapfundzisa iwo isapangiza kuti asapasa mbiri Yahova peno asafuna kupaswa mbiri na anthu. w23.06 tsa. 4 ¶7-8

Tingakhonda kupaswa cinthu cidaphemba ife m’phembero, tisafunika kubvundzika: ‘Kodi ndiri kuphemba munjira yadidi?’ Kazinji kene tisanyerezera kuti tisadziwa pinthu pyadidi kuna ife. Mbwenye pinthu pinaphemba ife, panango nee pinatiphedza mu ndzidzi uzinji. Khala tiri kucita phembero thangwi ya nyatwa inathimbana na ife, panango pana njira yadidi kakamwe yakumalisa nyatwa ineyi, kupiringana njira inaphemba ife. Pontho pinthu pinango pinaphemba ife panango nee pisabverana na cifuno ca Yahova. (1 Juw. 5:14) Onani citsandzo ca banja idaphemba Yahova toera mwanawo apitirize mu undimomwene. Phembo ineyi isaoneka ninga ndi yadidi. Mbwenye Yahova nee asatikakamiza toera tintumikire. Iye asafuna kuti tonsene, kuphatanizambo ana asankhule okha kumulambira. (Dheu. 10:12, 13; 30:19, 20) Natenepa anyakubala akhafunika kuphemba Yahova toera aaphedze kupfundzisa mwadidi mwanawo kuti afune Yahova mbakhala xamwali Wace.—Mis. 22:6; Aef. 6:4. w23.11 tsa. 21 ¶5; tsa. 23 ¶12

Thangwi yanji kubalangaza anango ndi kwakufunika kakamwe toera kupangiza ufuni? Mwakubverana na bukhu inango, fala idaphatisira Paulu yakuti “kubalangaza” isabveka “kukhala cifupi na munthu unango toera kumuwangisa mu ndzidzi unathimbana iye na nyatwa zizinji.” Natenepa tingabalangaza m’bale peno mulongo anathimbana na nyatwa, tinamphedza toera apitirize kutumikira Yahova mwakukhulupirika. Pontho ndzidzi onsene unabalangaza ife m’bale peno mulongo, tisapangiza kuti tisanfuna. (2 Akor. 7:6, 7, 13) Kubvera ntsisi anango kusabverana na kubalangaza anango. Munjira ipi? Ule anabvera ntsisi munthu anathimbana na nyatwa, iye asafuna kum’balangaza na kucita pinthu toera kumphedza. Natenepa, kubvera ntsisi anango kusatiphedza toera kuabalangaza. Paulu afokotoza kuti njira inabvera ntsisi Yahova anthu, isankulumiza toera kuabalangaza. Iye alonga kuti Yahova ndi ‘Baba wantsisi zikulu na Mulungu wacibalangazo.’—2 Akor. 1:3. w23.11 tsa. 9-10 ¶8-10

Mbwenye undimomwene ndi wakuti atowereri onsene a Kristu asadziwa kuti anathimbana na nyatwa. Onani citsandzo ca mpostolo Paulu. Iye apanga Akristu a ku Tesalonika kuti: ‘Pikhali ife pabodzi na imwe, ife tikhakupangani mwanyapantsi kuti mbatidathimbana na nyatwa, pontho ndi pyenepi pinacitika kuna ife.’ (1 Ates. 3:4) Pontho kuna Akorinto iye alemba: ‘Abale, ife nee tisafuna kuti imwe mukhale anthu akukhonda dziwa pya nyatwa idaona ife . . . Ife nee tikhadikhira kuti mbatidapulumuka.’ (2 Akor. 1:8; 11:23-27) Lero, Akristu asathimbanambo na nyatwa zibodzi zene. (2 Tim. 3:12) Mungakhulupira Yezu na kuntowezera, panango axamwali na acibale anu anakusingirirani. Iwo panango asakutsalakanani mwakuipa. Panango patrau wanu peno ndzanu wakubasa asakutcingani thangwi yakukhala kwanu wakukhulupirika. (Aheb. 13:18) Kodi imwe mwatcingwa na mautongi thangwi yakulonga pya cidikhiro canu kuna anango? Mwakukhonda tsalakana nyatwa zinathimbana na ife, Paulu alonga kuti tisafunika kutsandzaya. w23.12 tsa. 10-11 ¶9-10

Yakobe athimbanambo na pinentso pizinji. Ana a Yakobe awiri, Simeoni na Levi abweresa nyatwa panyumba pawo, pontho apswipisa dzina ya Yahova. Kusiyapo pyenepi, Rakeli, nkazi wa Yakobe akhafuna iye kakamwe, afa mu ndzidzi ukhabala iye mwanace waciwiri. Pontho thangwi ya njala, Yakobe afuluka mbaenda kakhala ku Ejitu mu ndzidzi ukhali iye nkhalamba. (Gen. 35:16-19; 37:28; 45:9-11, 28) Mu nyatwa zonsene zidathimbana na Yakobe, iye cipo asiya kukhulupira Yahova na mapikiro Ace. Pontho Yahova apangiza kuti Yakobe akhali wakutawirika kuna Iye. Mwacitsandzo, Yahova apasa nkhombo Yakobe. Pontho Yakobe apereka takhuta kakamwe kuna Yahova pidaonana iye pontho na Zuze, thangwi akhanyerezera kuti afa. Thangwi yakukhala na uxamwali wakuwanga na Yahova, Yakobe akwanisa kupirira nyatwa zenezi zonsene. (Gen. 30:43; 32:9, 10; 46:28-30) Tingakhala na uxamwali wakuwanga na Yahova, tinakwanisambo kupirira nyatwa zakukhonda dikhira. w23.04 tsa. 15 ¶6-7

Masalmo 23 ndi nyimbo inapangiza kuti Yahova asatifuna, pontho asatitsalakana. Dhavidhi, ule adalemba bukhu ya Masalmo, apangiza uxamwali wakuwanga ukhali pakati pa iye na Nkumbizi wace, Yahova. Dhavidhi akhali wakutsidzikizika pikhatsogolerwa iye na Yahova, pontho iye akhanyindira kakamwe citsogolero cace. Dhavidhi akhadziwa kuti Yahova mbadanfuna mu umaso wace onsene. Ninji cikhampasa cinyindiro ceneci? Dhavidhi akhadziwa kuti Yahova akhantsalakana, thangwi ndzidzi onsene akhampasa pikhafuna iye. Dhavidhi akhadziwambo kuti Yahova akhali xamwali wace, pontho akhali wakutawirika kuna iye. Ndi thangwi yace, iye akhali na cinyindiro cakuti mwakukhonda tsalakana pikhafuna kuncitikira ntsogolo, Yahova mbadapitiriza kumpasa pyonsene pikhafuna iye. Nakuti Dhavidhi akhadziwa kuti Yahova akhantsalakana, pontho akhanfuna, pyenepi pyamphedza toera akhonde kukhala wakudzudzumika kakamwe, pontho pyamphedza toera akhale wakutsandzaya.—Mas. 16:11. w24.01 tsa. 29 ¶12-13

Kutomera mu ndzidzi wa Nkhondo Yaciwiri ya Dziko Yonsene Yapantsi, atumiki a Yahova a m’madziko mazinji asakwanisa kumwaza mphangwa mwaufulu. Mwandimomwene, basa yakumwaza mphangwa pa dziko yonsene ikuthimizirika. Lero, Mathubo Akutonga asapitiriza kutowezera pitsogolero pya Yezu. Iwo asacita pyenepi mukukhala na cinyindiro cakuti pisankhulo pyonsene pinacita iwo pisabverana na pinafuna Yezu. Kusiyapo pyenepi, ayang’aniri a cisa na akulu a mpingo asaphatisirwa toera kupereka pitsogolero m’mipingo. Akulu a mpingo akudzodzwa ali ‘n’djanja yamadyo’ ya Yezu. (Apok. 2:1) Ndimomwene kuti akulu a mpingo ndi akusowa ungwiro, pontho asacita madodo. Mose, Yoswa na apostolo akhacitambo madodo midzidzi inango. (Num. 20:12; Yos. 9:14, 15; Aroma 3:23) Ngakhale tenepo, ife tisakwanisa kuona kuti Yezu akupitiriza kutsogolera m’bandazi wakukhulupirika na akulu a mpingo. Iye anapitiriza kuphatisira amuna anewa. Natenepa tonsene tiri na mathangwi toera kunyindira pitsogolero pinapereka Yezu mukuphatisira amuna anewa akukhulupirika. w24.02 tsa. 23-24 ¶13-14

Ife tinakwanisambo kusimba Yahova tingalonga mwadidi thangwi ya iye, kupereka takhuta kuna iye na kunfuna. Tingakhala m’basa yakumwaza mphangwa tisafunika kukumbuka kuti cifuniro cathu cakutoma ndi kuphedza anthu toera akhale na uxamwali na Yahova na kumuona ninga Baba waufuni. (Tiya. 4:8) Kuna ife ndi mwai ukulu kakamwe kupangiza anthu m’Bhibhlya kuti Yahova ndi Mulungu waufuni, waulungami, waudziwisi, wamphambvu, pontho kuti iye ali na makhaliro anango adidi kakamwe. Njira inango yakusimba Yahova na kuntsandzayisa ndi kuwangisira toera kutowezera citsandzo cace. Tingacita pyenepi, anthu anango anakwanisa kuona kuti ndife akusiyana na anthu azinji. (Mat. 5:14-16) Tingakhala pabodzi na anthu anewa, panango tinakhala na mwai wa kuafokotozera kuti thangwi yanji ndife akusiyana na iwo. Natenepa anthu a mitima yadidi anakhala na cifuno cakupfundza thangwi ya Mulungu wathu. Tingasimba Yahova munjira zenezi, iye asatsandzaya kakamwe.—1 Tim. 2:3, 4. w24.02 tsa. 10 ¶7

Toera mukhale Nkristu wakukola, musafunika kupfundza pinthu pyakuti pinakuphedzani. Pyenepi pinakuphedzani toera kutawira mabasa mu mpingo, kugumana basa yakuti inakuphedzani toera kutsalakana banjanu na kucita uxamwali wadidi na anango. Mwacitsandzo, pfundzani kuleri na kulemba mwadidi. Bhibhlya isalonga kuti munthu wakutsandzaya na munthu wakuti pinthu pisanfambira mwadidi, asaleri Mafala a Mulungu ntsiku zonsene mbanyerezera mwadidi pinalonga iwo. (Mas. 1:1-3) Thangwi yakuleri Bhibhlya ntsiku zonsene iye asadziwa manyerezero a Yahova akuti anam’phedza toera kunyerezera mwadidi na kuphatisira pinalonga Bhibhlya. (Mis. 1:3, 4) Abale na alongo athu asafuna ciphedzo ca amuna akuti anakwanisa kuapfundzisa na kuapasa uphungu wa m’Bhibhlya. Khala imwe musakwanisa kuleri na kulemba mwadidi, munakwanisa kukhunganyika nkhani na mitawiro yakuti inakwanisa kuwangisa cikhulupiro ca abale na alongo. Imwe munakwanisambo kulemba mphangwa zakufunika zakuti zinakuphedzani toera kuwangisa cikhulupiro canu na ca anango. w23.12 tsa. 26-27 ¶9-11

Mungagopa, nyerezerani pinthu pinafuna kucita Yahova ntsogolo. Nyerezerani kutsandzaya kunafuna kukhala na imwe Sathani pabodzi na anthu akuipa angafudzwa mbasala anthu adidi basi, pontho kusowa ungwiro mbukumala mwapang’ono na pang’ono. Citsandzo cidalongwa pa nsonkhano wa gawo wa 2014 capangiza kuti tinanyerezera tani pinthu pinadikhira ife ntsogolo. Baba m’bodzi acedza na banjace kuti lemba ya 2 Timoti 3:1-5 mbidalembwa tani mbidakhala kuti iri kulonga pya dziko ipswa. Iye alonga: “Mu dziko ipswa inadzaoneka midzidzi yadidi kakamwe thangwi anthu anadzafunana unango na ndzace, anadzafuna undimomwene, anadzakhala akukhonda gaya, akucepeseka, akusimba Mulungu, anadzabvera anyakubalawo, akupereka takhuta, akukhulupirika, akufuna anthu a pabanja pawo, akufuna kukhazikisa cibverano na anango, analonga pinthu pyadidi kuna anango, akuphata ntima peno akudzitonga, akupfulika, akufuna pinthu pyadidi, akunyindirika, akubva pinalonga andzawo, akufuna Mulungu mbakhonda kufuna pinakomerwa na iwo basi, anadzaperekeka na ntima onsene kuna Mulungu, pontho khala pabodzi na anthu anewa.” Kodi imwe musacedza na banja yanu peno na abale na alongo kuti umaso unadzakhala tani mu dziko ipswa? w24.01 tsa. 6 ¶13-14

Ndi pyakuwangisa kakamwe kudziwa pinalonga lemba ya Masalmo 149:4. Iyo isalonga: “Yahova asakomerwa na mbumba yace.” Mbwenye midzidzi inango anango asatsukwala kakamwe mbatoma kunyerezera: ‘Kodi ine ndine wakufunikadi kuna Yahova?’ Atumiki azinji akukhulupirika a Yahova, kuphatanizambo a mu ndzidzi wakale akhalambo na mabvero ninga anewa midzidzi inango. (1 Sam. 1:6-10; Yobe 29:2, 4; Mas. 51:11) Bhibhlya isapangiza kuti anthu akusowa ungwiro anakwanisa kukomeresa Yahova mbakhala akutawirika kuna iye. Munjira ipi? Ife tisafunika kukhulupira Yezu Kristu mbatibatizwa. (Juw. 3:16) Tingacita pyenepi tinapangiza pakweca kuti tatcunyuka madawo athu, pontho tapikira kucita cifuno ca Yahova. (Mabasa 2:38; 3:19) Yahova asakomerwa kakamwe tingacita pinthu pyenepi toera kufendedzera kuna iye. Mu ndzidzi unawangisira ife toera kucita pidapikira ife, Yahova anationa ninga akutawirika kuna iye na axamwali ace a ponda ndipondembo.—Mas. 25:14. w24.03 tsa. 26 ¶1-2

Ife tinakwanisambo kutowezera citsandzo ca anyakupfundza mukupitiriza kumwaza mphangwa, mautongi angatikhondesa kucita pyenepi. Ife tisafunika kukhala na cinyindiro cakuti Yahova anatiphedza toera kucita basa yakumwaza mphangwa. Natenepa phembani cipapo na udziwisi. Phembani ciphedzo ca Yahova toera mukwanise kupirira nyatwa. Azinji a ife asathimbana na nyatwa za ungumi, kuferwa na nyakufunika wathu, nyatwa za m’banja, kutcingwa peno nyatwa zinango. Pinthu pinango ninga utenda unathapulisa anthu azinji na nkhondo pisacitisa kuti pikhale pyakunentsa kakamwe kupirira. Natenepa pangani Yahova nyatwa zanu zonsene. Mpangeni nyatwa zinathimbana na imwe ninga muli kupanga xamwali wanu wapantima. Khalani na cinyindiro cakuti Yahova ‘anakuphedzani.’ (Mas. 37:3, 5) Kucita phembero kunatiphedza toera ‘kupirira tingathimbana na nyatwa.’ (Aroma 12:12) Yahova asadziwa pinthu pinacitikira alambiri ace, pontho “iye asabva n’khuwo wawo wakuphemba ciphedzo.”—Mas. 145:18, 19. w23.05 tsa. 5-6 ¶12-15

Tingafuna kucita cisankhulo cakufunika kakamwe, tisafunika kubvesesa kuti “ninji pinafuna Yahova,” buluka penepo mbaticita pinthu pyenepi. (Aef. 5:17) Tingagumana midida ya Bhibhlya yakuti isabverana na pinthu pinaticitikira, mwandimomwene tagumana pinthu pinanyerezera Yahova. Natenepa tingaphatisira midida ya Yahova, tinakwanisa kucita pisankhulo pyadidi. “Nyakuipa” peno nyamalwa wathu Sathani, asafuna kuti ndzidzi onsene ticite pinthu pya dziko ino mbatikhonda kukhala na ndzidzi wakutumikira Yahova. (1 Juw. 5:19) Natenepa Nkristu angakhonda kucita mphole-mphole anatoma kufuna kakamwe kobiri, kupfundza kakamwe na basa, m’mbuto mwakusaka miyai toera kutumikira Yahova. Pyenepi pingacitika, pinapangiza pakweca kuti iye atoma kunyerezera ninga anthu a dziko. Ndimomwene kuti kobiri, kupfundza na pinthu pinango pyakumanungo nee ndi pyakuipa. Mbwenye pinthu pyenepi nee pisafunika kukhala pa mbuto yakutoma mu umaso wathu. w24.03 tsa. 24 ¶16-17