Ndo so A Lingbi ti Wara Akiringo Tene Dä

“Tene ti pasi ti lakue lakue ague nde na tene ti mabe so atene Nzapa andoye aye so lo créé. . . . Ti mä na bê na sengo âme lakue lakue teti aglisango lege so asala na yâ angu kete, na mungo pepe na lo lege ti gbian ye, ayeke ti gue nde na akpengba-ndia kue ti salango ye na lege ni.”—NIKHILANANDA, WASENDA-NDARA TI AHINDOU.

1, 2. Ndali ti atene ti mabe nde nde na ndo fini na peko ti kuâ, ahundango tene wa alondo?

LEGEOKO tongana Nikhilananda, wasenda-ndara ti aHindou, fango ye ti hungo pono teti lakue lakue anzere pepe na azo mingi laso. Na lege ti oko ye so, azo mingi ayeke na kpale ti gbu nda ti amara ti tene tongana singo na Nirvana nga dutingo beoko na Tao.

² Ye oko, ndali ti tene so atene âme alingbi ti kui pepe, alege ti vorongo ti Tö na ti Do amaï mbeni bungbi ti atene ti mabe so agbian kirikiri na ndo fini na peko ti kuâ. Lege ayeke dä ti hinga tâ tene na ndo ye so asi na e tongana e kui? Âme alingbi biani ti kui pepe? E lingbi ti wara akiringo tene na ndo wa?

Senda-ye na Senda-ndara

3. Senda-ye wala kode ti lo ti gingo nda ti ye akiri tene na ahundango tene so andu fini na peko ti kuâ?

³ Senda-ye wala kode ti lo ti gingo nda ti ye akiri tene na ahundango tene so andu fini na peko ti kuâ? Teti ala luti na ndo ti atene ti azo so aga ndulu na kuâ wala ti ala so aba atene ala sigigi na yâ poro ti tele ti ala, ambeni wagingo nda ti ye atara ti sala atene na ndo fini na peko ti kuâ. Na bango peko ti ambeni tene ti ala, na yâ diskur ti lo “Kuâ Ayeke Lege ti Lï na yâ Lumière?,” Hans Küng, wandara ti lege ti vorongo ti aCatholique, atene na nda ni: “Mara ti aye so asi tongaso afa pepe biani na gigi so fini alingbi ti duti na peko ti kuâ: na ndo so a yeke gi tene ti andangba nzere-ngbonga oku kozoni na kuâ na pepe mbeni fini ti lakue lakue na peko ti kuâ.” Lo kiri lo tene: “Tene ti fini so alingbi ti duti na peko ti kuâ ayeke kota ye mingi teti zo so ayeke na fini. A hunda mbeni kiringo tene so a lingbi agi ni na mbeni ndo nde tongana akota wanganga alingbi ti sala ni pepe.”

4. Senda-ndara alingbi ti mu maboko na e ti wara akiringo tene na popo ti gbâ ti alege ti duti na fini na peko ti kuâ so alege ti vorongo nde nde azia na gbele e?

⁴ Ti senda-ndara a yeke tongana nyen? Lo lingbi ti mu maboko na e ti wara akiringo tene na popo ti gbâ ti alege ti duti na fini na peko ti kuâ so alege ti vorongo nde nde azia na gbele e? Bertrand Russell, wasenda-ndara ti Grande-Bretagne ti siècle 20, atene gingo nda ti ye ti senda-ndara andu “kusala ti gbungo li.” Ti mbeni bakari (The World Book Encyclopedia), senda-ndara ayeke “mbeni mbage ti hundango ye: mbeni kode ti gingo nda ti ye, ti bango nene ti ye, ti fango nda ti tene, na ti gbungo li.” Na ndo tene ti mbeni fini na peko ti kuâ, yâ ti agbungo li ti senda-ndara ayeke nde nde, ambeni ahiri fini so alingbi ti kui pepe gi senge ye so bê ti zo aye, ambeni nde amu ni tongana ye so adü zo oko oko na ni ti wara.

Mbeni Lingu ti Akiringo Tene so Ayeke Nde

5. Buku so ayeke ngbele ni ahon atanga ni kue ayeke so wa?

⁵ Ye oko, mbeni buku ayeke dä so na yâ ni a wara atâ kiringo tene na akota hundango tene na ndo fini nga na kuâ. A yeke buku so ayeke ngbele ni ahon atanga ni kue, so a leke ambeni mbage ni a sala ndulu na angu 3 500 awe. A sû na mbeti kozo mbage ni asiècle kete kozoni si aleke aVeda, angbele bia ti sepela ti ambeti ti aHindou nga ndulu na ngu saki oko kozoni si adü Bouddha, Mahâvîra na Confucius. A hunzi ti sala buku so na ngu 98 N.E., ahon ngu 500 kozoni si Mouḥammad asigigi na Islam. Lingu ti ndara ti kota ahon so ayeke nde, ayeke Bible.a

6. Ngbanga ti nyen e lingbi ti ku Bible ti fa na e ye so âme ayeke?

⁶ A wara na yâ ti Bible mbaï ti giriri so ayeke tâ tene mingi ahon tanga ti ambeti kue ti sese. Mbaï so afa pekoni na yâ Bible akiri juska na tongo nda ti sewa ti azo na a fa tongana nyen e ba gigi na ndo sese so. Lo sala même tene ti ngoi so aga kozoni na lekengo azo. Mara ti buku tongaso alingbi biani ti mu na e lege ti hinga tongana nyen a leke zo nga na ye so âme ayeke.

7, 8. Ngbanga ti nyen na bê kue e lingbi ti bi lë na mbage ti Bible teti atâ kiringo tene so anzere na bê na ndo ye so asi tongana e kui?

⁷ Na ndo ni, Bible ayeke mbeni buku ti aprophétie so aga tâ tene lakue. Na tapande, lo sala tene kozoni ti londongo na tingo ti akodoro-togbia ti Médie na Perse nga na ti Grèce na yâ anzene nzene ye kue. Teti atene ni aga tâ tene mbilimbili, ambeni zo ti kasango ndo atara gba ti fa so asû atene so na peko ti so aye ni asi. (Daniel 8:1-7, 20 -22) Ambeni prophétie so asû ni na yâ Bible ayeke ga tâ tene na yâ anzene nzene ye na ngoi ti e mveni.b—Matthieu, chapitre 24; Marc, chapitre 13; Luc, chapitre 21; 2 Timothée 3:1-5, 13.

⁸ Mbeni zo, atä hingango ye ti lo ayeke tongana nyen, alingbi pepe ti sala tene ti aye tongaso mbilimbili kozoni si asi. Gi Wasalango ndagigi so ayeke na ngangu nga na ndara ti kota ahon kue si alingbi ti sala ni. (2 Timothée 3:16, 17; 2 Pierre 1:20, 21) Bible ayeke biani mbeni buku so alondo na Nzapa. Tâ tene, mara ti buku tongaso alingbi ti mu na e atâ kiringo tene so anzere na bê ti e na ndo ye so asi na e tongana e kui. Zia e ba kozoni ye so lo tene na ndo âme.

[Akete Tene na Gbe Ni]

[Foto na lembeti 18]

Buku so ayeke ngbele ni ahon atanga ni kue

[Foto na lembeti 18]

Mbeni buku so amu atâ kiringo tene so anzere na bê