Mû asandaga na Jéhovah na âme ti mo kue

“Aye kue so ala yeke sara, ala sara ni na âme ti ala kue mo bâ mo tene ala sara ni na Jéhovah.”​—ACOL. 3:23.

1-3. (a) So Jésus akui na ndo ti keke ti pasi aye ti tene so Jéhovah ahunda na e asandaga mbeni pëpe? Fa ndani. (b) Na ndo ti tënë ti mungo asandaga na Jéhovah laso, hundango tënë wa alondo?

NA NGOI ti akozo Chrétien, Jéhovah afa na azo ti lo so sandaga ti Jésus asara si Ndia ti Moïse ayeke na ngangu mbeni pëpe (aCol. 2:13, 14). Asandaga kue so aJuif amû teti angu ngbangbo mingi ayeke kota ye mbeni pëpe nga même tongana mbeni zo amû ni a yeke sara ye oko pëpe. A mû Ndia ti ga “zo ti bango ndo na ndo ti e ti gue na e na Christ,” na Ndia ni asara kusala ni so awe.​—aGal. 3:24.

² Ye so aye pëpe ti tene so aChrétien ayeke bi bê ti ala mbeni pëpe na asandaga. Me, bazengele Pierre afa nene ti “mû asandaga ti yingo so anzere na Nzapa na lege ti Jésus Christ.” (1 Pi. 2:5). Bazengele Paul afa nga ni polele tongana lo tene so fini ti mbeni Chrétien so amû tere ti lo na Nzapa, so ti tene ambage kue ti fini ti lo, a lingbi a bâ ni tongana mbeni “sandaga”.​—aRom. 12:1.

³ Ni la, mbeni Chrétien ayeke mû asandaga teti Jéhovah, atâa na lege so lo yeke mû ambeni offrande na Jéhovah wala na lege so lo yeke dö ambeni ye ti zia ndali ti Jéhovah. Na lege ti ye so e hinga na ndo ti aye so Jéhovah ahunda na azo ti Israël ândö, tongana nyen la e lingbi ti hinga biani so asandaga kue so e yeke mû na Jéhovah laso anzere na lo?

NA YÂ TI FINI TI E TI LÂ OKO OKO

4. Nyen la a lingbi e dabe ti e na ni na ndo ti akusala ti e ti lâ oko oko?

⁴ Na ngoi so e yeke sara akusala ti e ti lâ oko oko, a lingbi ti duti ngangu ti zia kamba na popo ti akusala ti e na asandaga so e yeke mû teti Jéhovah. Akusala so e yeke sara na yanga-da, na ekole, na place ti kua, na ngoi so e gue ti vo ye nga na ambeni ye tongaso alingbi ti kpa aye so alingbi pëpe ti sara ngangu na ndo ti songo ti e na Jéhovah. Ye oko, tongana mo mû fini ti mo na Jéhovah awe wala mo leke ti sara ni na yâ ti kete ngoi, a yeke kota ye ti dabe ti mo so akusala ti lâ oko oko so alingbi ti sara ye mingi na ndo ti songo ti mo na lo. Atâa na ngoi wa, a lingbi e fa lakue so e yeke aChrétien. A lingbi e sara ye alingbi na aye so Bible afa na yâ ti ambage kue ti fini ti e. A yeke ndani la Paul awa e lo tene: “Aye kue so ala yeke sara, ala sara ni na âme ti ala kue mo bâ mo tene ala sara ni na Jéhovah, me na azo pëpe.”​—Diko aColossien 3:18-24.

5, 6. Aye wa a lingbi asara ngangu lâ oko oko na ndo ti yungo bongo ti e nga na sarango ye ti e?

⁵ Akusala so mbeni Chrétien ayeke sara lâ oko oko ayeke pëpe mbage ti kusala so lo yeke sara na Nzapa. Ye oko, so Paul awa e ti sara kua na ‘âme ti e kue mo bâ mo tene e sara ni na Jéhovah’ apusu e ti gbu li na ndo ti aye kue so e yeke sara na yâ ti fini ti e. Tongaso, tongana nyen la e lingbi ti sara ye alingbi na wango so? E yeke sara ye nga e yeke yü bongo na lege ni na ngoi kue? Wala na ngoi so e yeke sara akusala ti e ti lâ oko oko, sarango ye ti e wala yungo bongo ti e asara si kamene asara e ti fa tere ti e tongana Témoin ti Jéhovah? Zia ye tongaso asi lâ oko pëpe! Awakua ti Jéhovah ayeke ye pëpe ti sara mbeni ye so alingbi ti bi zonga na ndo ti iri ti Nzapa.​—És. 43:10; 2 aCor. 6:3, 4, 9.

⁶ Zia e bâ tongana nyen nzara so e yeke na ni ti sara kua na ‘âme ti e kue mo bâ mo tene e sara ni na Jéhovah’ alingbi ti sara ngangu na yâ ti ambage nde nde ti fini ti e. Na ngoi so e yeke bâ ni, zia e girisa pëpe so a lingbi asandaga kue so azo ti Israël amû lani na Jéhovah aduti ye ti ala so ayeke nzoni ahon atanga ni kue.​—Nom. 18:12.

NA NGOI SO E YEKE SARA YE NA YÂ TI FINI TI E

7. Tongana mbeni Chrétien amû tere ti lo na Nzapa, aye ti tene nyen?

⁷ Na ngoi so mo mû tere ti mo na Jéhovah, mo mû desizion ti sara na lo na fini ti mo kue, ni la ape? Biani, mo tene so na yâ ti aye kue so mo yeke sara na yâ ti fini ti mo, mo yeke zia Jéhovah na kozo ndo. (Diko aHébreu 10:7.) Desizion so ayeke lani mbeni nzoni desizion. Kite ayeke pëpe so mo bâ so na ngoi so mo gi ti hinga ye so bê ti Jéhovah aye na ndo ti mbeni tënë na mo sara ngangu ti sara ye alingbi na ni, mo wara aye ti nzoni mingi na pekoni (És. 48:17, 18). E yeke azo so ayeke nzoni-kue nga e yeke na ngia ndali ti so e yeke mû tapande ti Jéhovah so ayeke fa ye na e.​—Lév. 11:44; 1 Tim. 1:11.

8. So Jéhovah abâ asandaga ti azo ti Israël tongana mbeni ye so ayeke nzoni-kue aye ti tene nyen teti e?

⁸ Jéhovah abâ asandaga so azo ti Israël ayeke mû lani na lo tongana mbeni ye so ayeke nzoni-kue (Lév. 6:18; 7:1). Mbupa ti Hébreu so a kiri pekoni na “nzoni-kue” aye ti sara tënë ti mbeni ye so a zia ni nde, so a zia ni gi ndali ti Nzapa wala mbeni ye so a mû ni ti sara na kusala ti Nzapa. Ti tene Jéhovah ayeda na asandaga ti e, a lingbi e duti yongoro na aye kue ti dunia so ayeke sioni. E lingbi pëpe ti ndoye aye so Jéhovah ake ni. (Diko 1 Jean 2:15-17.) Biani, ye so aye ti tene so a lingbi e kpe ti lë ambeni songo wala ti bi tere ti e na yâ ti ambeni ye so alingbi ti sara si e ga sioni na lê ti Jéhovah (És. 2:4; Apoc. 18:4). A ye nga ti tene so e lingbi pëpe ti zia lê ti e aluti na ndo ti mbeni ye so ayeke sioni nga ti pensé pëpe na ndo ti aye tongaso.​—aCol. 3:5, 6.

9. Na lege wa sarango ye ti aChrétien na mbage ti azo ayeke kota mingi? Ngbanga ti nyen?

⁹ Paul awa amba ti lo aChrétien lo tene: “Ala girisa pëpe ti sara ye ti nzoni nga ti kangbi ye na zo, teti a yeke mara ti asandaga tongaso si anzere na Nzapa.” (aHéb. 13:16). Tongaso, tongana lakue e sara ye so ayeke nzoni nga e mû maboko na azo, Jéhovah ayeke bâ ni tongana mbeni sandaga so anzere na lo. Ndoye so e yeke na ni na mbage ti amba ti e ayeke ye so a hinga na atâ Chrétien.​—Jean 13:34, 35; aCol. 1:10.

NA NGOI SO E YEKE VORO JÉHOVAH

10, 11. Jéhovah abâ kusala ti e ti fango tënë nga na vorongo so e yeke voro na lo tongana nyen? A yeke nzoni ye so asara nyen na ndo ti e?

¹⁰ Mbeni kota ye so na yâ ni e aChrétien e yeke sara nzoni na azo ayeke na lege ti “tënë ti beku ti e so e yeke sara tënë ni na lê ti azo dandara”. Mo yeke gbu alege kue so azi na mo ti fa tënë? Paul airi kota kusala ti aChrétien so “sandaga ti gonda, so ti tene lengo ti yanga so ayeke fa iri ti [Nzapa] na lê ti azo dandara.” (aHéb. 10:23; 13:15; Os. 14:2). A yeke nzoni ti gbu li ti e na ndo ti wungo ti ngoi so e yeke mû ti fa na nzoni tënë ti Royaume nga kode so e yeke sara na ni. A leke mingi ti ambage ti Bungbi ti Kusala ti pusu e ti gbu li na ndo ti tënë so. Na nduru tënë e lingbi ti tene so, teti so kusala ti fango tënë nga na fango tënë na alege kue so azi ayeke “sandaga ti gonda,” mbeni mbage ti aye so e yeke sara ti voro na Jéhovah, a lingbi sandaga ni aduti ye ti e so ayeke nzoni ahon atanga ni kue. Atâa so dutingo ti e ayeke nde nde, mingi ni wungo ti ngbonga so e yeke mû ti fa na nzoni tënë ayeke fa tongana nyen la e bâ aye ti yingo na nene ni.

¹¹ Lakue aChrétien ayeke mû ngoi ti voro Nzapa na yanga-da wala na congrégation. Jéhovah la ahunda na e ti sara ni. A yeke tâ tënë so a hunda na e mbeni pëpe ti bata lango ti Sabbat wala ti sara voyage lakue ti gue na Jérusalem ndali ti amatanga. Ye oko, e lingbi ti manda ye na lege ti andia so. Nzapa angbâ ti ku na mbage ti e ti tene e mû mbeni ngoi so e yeke sara na akusala ti e ti mitele ti manda Bible, ti sambela nga ti gue na abungbi. Nga amokonzi ti sewa ayeke mû li ni ti voro Nzapa legeoko na azo ti sewa ti ala wani (1 aThes. 5:17; aHéb. 10:24, 25). A yeke nzoni e hunda tere ti e na tënë so na ndo ti akusala ti yingo: ‘Mbi lingbi ti sara si lege so mbi yeke voro na Jéhovah akiri aga nzoni ahon ti kozo?’

12. (a) E lingbi ti haka mungo dukani so a yeke mû lani na Jéhovah na ngoi ti azo ti Israël na nyen laso? (b) Tongana nyen la hakango ye so alingbi ti sara ngangu na ndo ti atënë ti yâ ti asambela ti e?

¹² Gbia David ahe lani bia na Jéhovah lo tene: “Zia sambela ti mbi aga tongana yombo na gbele Mo.” (Ps. 141:2). Mû ngoi ti gbu li na ndo ti asambela ti mo: mo yeke sambela lakue nga aye wa la mo yeke sara tënë ni na yâ ti asambela ti mo? Mbeti ti Apocalypse ahaka “asambela ti azo so ayeke nzoni-kue” na dukani na lege so asambela ti ala so ayeke nzoni ayeke montê na Jéhovah tongana mbeni ye so fion ni afun pendere (Apoc. 5:8). Na Israël ti giriri, dukani so a yeke zö lakue na ndo ti gbalaka ti Jéhovah, a lingbi a leke ni nzoni. Jéhovah ayeke yeda na ni gi tongana a sara ni alingbi na aye so lo fa ndali ni (Ex. 30:34-37; Lév. 10:1, 2). Legeoko nga, tongana e sambela alingbi na aye so Jéhovah afa na e na ndo ti sambela nga e bâ ni tongana mbeni ye so ayeke nzoni-kue, e lingbi ti hinga biani so lo yeke yeda na asambela ti e.

E YEKE MÛ YE NGA E YEKE WARA YE

13, 14. (a) Nyen la Épaphrodite na azo ti congrégation ti Philippes asara teti Paul? Paul abâ ni tongana nyen? (b) E lingbi ti mû tapande ti Épaphrodite na ti azo ti congrégation ti Philippes tongana nyen?

¹³ E lingbi ti haka offrande so e yeke mû ti mû maboko na kusala ti fango tënë na ndo ti sese kue na mbeni sandaga, atâa a yeke mingi wala kete (Marc 12:41-44). Na ngoi ti akozo Chrétien, congrégation ti Philippes atokua Épaphrodite na Rome ti bâ lege ti abezoin ti Paul na lege ti mitele. Kite ayeke pëpe so na guengo ti lo, lo gue na nginza so congrégation ti Philippes atokua ti mû maboko na Paul. A yeke pëpe kozoni la ti tene congrégation ni afa nzoni bê na Paul. Ala fa nzoni bê so na Paul ndali ti so ala ye pëpe ti tene lo gi bê ti lo na ndo ti nginza tongaso si lo lingbi ti mû ngoi mingi na fango tënë. Paul abâ matabisi so tongana nyen? Paul atene a yeke “mbeni ye so afun pendere, sandaga so a yeda na ni nga so anzere na lê ti Nzapa.” (Diko aPhilippien 4:15-19.) Biani, Paul abâ na nene ni nzoni bê ti azo ti congrégation ti Philippes so, na Jéhovah nga kue abâ ni na nene ni.

¹⁴ Laso nga kue, Jéhovah ayeke bâ na nene ni a-offrande so e yeke mû ndali ti kusala so a yeke sara ni na ndo ti sese kue. Lo mû nga zendo so tongana e ngbâ ti zia aye ti Royaume na kozo ndo na yâ ti fini ti e, lo yeke bâ lege ti abezoin ti e kue, na lege ti yingo nga na lege ti mitele.​—Mat. 6:33; Luc 6:38.

KIRI SINGILA

15. Fa ambeni ye so apusu mo ti kiri singila na Jéhovah.

¹⁵ E yeke na araison mingi ti kiri singila na Jéhovah. Lâ oko oko a yeke nzoni e kiri singila na Jéhovah ndali ti fini so lo mû na e, ni la ape? Lo mû na e aye kue so e yeke na bezoin ni ti ngbâ na ngangu: kobe, bongo, nga na ambeni ye so ayeke bata e, aye tongana pupu so e yeke wu. Na ndo ni, mabe ti e so aluti na ndo ti tâ hingango ye amû na e beku. A yeke na lege ni ti tene e voro Jéhovah nga e mû na lo asandaga ti gonda ndali ti so lo la lo sara aye kue nga ndali ti aye so lo sara teti e.​—Diko Apocalypse 4:11.

16. Nyen la a lingbi e sara ti kiri singila ndali ti sandaga ti Christ?

¹⁶ Tongana ti so e bâ na yâ ti article so ahon, mbeni kota matabisi so Jéhovah amû na azo ayeke sandaga ti Christ. Sandaga so afa kota ndoye ti Nzapa na mbage ti e (1 Jean 4:10). Nyen la a lingbi e sara ti kiri singila na lo? Paul atene: “Ndoye so Christ ayeke na ni apusu e ti sara ye, ngbanga ti ye so e bâ ayeke so: zo oko akui ndali ti azo kue; . . . na lo kui ndali ti azo kue si ala so ayeke na fini, ala lingbi ti ngbâ na fini ndali ti ala wani mbeni pëpe, me ndali ti lo so akui ndali ti ala na so a zingo lo na kuâ.” (2 aCor. 5:14, 15). Biani, Paul atene so tongana e bâ kota nzobe ti Nzapa so na nene ni, e yeke mû fini ti e ti gonda na lo nga na Molenge ti lo. E yeke fa so e ye Nzapa nga na Christ nga e kiri singila na ala na mango yanga ti ala nga na dutingo na nzara ti fa tënë na ti sara si azo aga adisciple.​—1 Tim. 2:3, 4; 1 Jean 5:3.

17, 18. Na lege wa ambeni zo amû na Jéhovah sandaga ti gonda mingi ahon ti kozo? Fa mbeni tapande ni.

¹⁷ Lege ayeke dä ti tene mo kiri mo mû sandaga ti gonda mingi na Nzapa ahon ti kozo? Na pekoni so ambeni ita mingi agbu li ti ala na ndo ti aye ti nzoni kue so Jéhovah asara ndali ti ala, bê ti ala apusu ala ti gbian aye na yâ ti fini ti ala tongaso si ala wara ngoi mingi ti fa tënë nga ti sara ambeni kusala na yâ ti bungbi ti Jéhovah. Ngu oko oko ambeni ayeke sara kusala ti pionnier auxiliaire teti nze oko wala nze mingi, nga ambeni awara lege ti sara kua ti pionnier permanent. Ambeni amû tere ti ala ti leke ada so bungbi ti Jéhovah ayeke sara na kusala. Aye so ayeke anzoni ye so mbeni zo alingbi ti sara ti fa so lo kiri singila. Tongana e sara akusala so na nzoni bibe, so ti tene ti kiri singila na Nzapa, lo yeke yeda na ye so e sara teti lo.

¹⁸ Bê ti aChrétien mingi apusu ala ti kiri singila na Jéhovah. Morena ayeke mbeni tapande ni. Lo kono na yâ ti Eglize Catholique, me lo yeke na gbâ ti ahundango tënë na ndo ti Nzapa nga na ndo ti ndani so e yeke na fini. Lo gi akiringo tënë ni na mbage ti Eglize Catholique nga na yâ ti senda-ndara ti azo ti Asie me lo wara nzoni kiringo tënë pëpe. A yeke gi na ngoi so lo to nda ti manda Bible na aTémoin ti Jéhovah la nzara ti lo na lege ti yingo akaï. Morena akiri singila mingi na Jéhovah ndali ti akiringo tënë so Bible amû na ahundango tënë ti lo kue nga akiringo tënë ni asara si gigi ti lo aga nzoni. Lo ye ti fa singila ti lo na Jéhovah na mungo ngangu ti lo kue ti sara na kusala ti lo. Hio na peko ti batême ti lo lo mû kua ti pionnier auxiliaire nga kete na pekoni lo mû kua ti pionnier permanent na ngoi so dutingo ti lo amû lege na lo. A sara ngu 30 awe me Morena angbâ lakue na yâ ti kusala ti ngoi kue.

19. Lege ayeke dä ti tene mo sara si sandaga so mo yeke mû na Jéhovah akiri aga kota?

¹⁹ Tâ tënë, dutingo ti awakua be-ta-zo ti Jéhovah mingi amû lege na ala pëpe ti sara kusala ti pionnier. Atâa ye wa la e lingbi ti sara na yâ ti kusala ti Jéhovah, e kue e lingbi ti mû na lo asandaga ti yingo so anzere na lo. Na yâ ti sarango ye ti e, a lingbi e sara ngangu ti sara ye alingbi na afango ye ti lo so ayeke mbilimbili, e girisa pëpe so e yeke awakua ti Jéhovah na ngoi kue. Mabe apusu e ti zia bê ti e kue na gango tâ tënë ti aye so Nzapa aleke ti sara. Na lege ti anzoni kusala e sara si nzoni tënë amû ndo. E kiri singila ndali ti aye kue so Jéhovah asara teti e. Tongaso, zia e ngbâ lakue ti mû asandaga na Jéhovah na âme ti e kue.

[Kete tënë na lembeti 25]

Nzoni bê ti Jéhovah apusu mo ti sara si sandaga ti gonda so mo yeke mû na lo akiri aga kota?

[Foto na lembeti 23]

Mo yeke gbu alege kue so azi ti fa tënë?