Fesoasoani i Fanau ina ia Auauna ia Ieova Mai le Loto

¹ Na folafola mai e Solomona faapea, “o le fanau, o le tofi lea mai ia Ieova.” (Sala. 127:3-5) O le mea moni, o i latou o se tofi e lē mafaatusalia le aogā. Ua iai i mātua se avega tauave mai le Atua ina ia aʻoaʻo, toleni, ma ia aʻoaʻi a latou fanau. E aofia ai, le toleniga i le faiva, ma le faalaeiauina o le fanau ina ia tautatala atu mai o latou loto e uiga ia Ieova ma le Malo.—Efe. 6:4.

² O le ā le matua e ao ai i mātua ona amataina lenei toleniga? O loo manino le tali a le Tusi Paia e faapea: E ao ona amata mai a o tamameamea. (2 Timo. 3:14,15) O le vave ona amata o le toleniga, o le sili atu ai foi lea ona foliga mai o le a atiina aʻe e le fanau se faavae mausalī i le upu moni, ma avea ai le faiva o se mea e sili ona tāua ia i latou. O le a avea foi lenei uluai toleniga o se puipuiga mo i latou mai mafaufauga ma manatu faalelalolagi.

³ Ua faaalia e le toatele o tamaiti e leʻi oo i tausaga aʻoga, le tomai tele i le taulimaina o ni matata faigata. O lenei avanoa mo le aʻoaʻoina i uluai tausaga, e ao ona taulai atu i le aʻoaʻoina o i latou i tomai e maua ai le faamaoniga a Ieova. (w88 8/1 itu. 15; w89 12/1 itu. 31) O le toatele o ē o loo iai i tausaga muʻa, ua agaʻi atu ina avea ma tagata talaʻi e leʻi papatisoina. Ua tuuina atu ma papatisoina nisi o fanau a o leʻi atoa le 13 o o latou tausaga. Ua tatalaina ai le avanoa mo i latou ina ia auauna o ni paeonia lagolago pe avea foi ma paeonia sauatoa a o leʻi maeʻa a latou aʻoga. Ina ia ausia na sini, e manaomia ona aʻoaʻoina i latou ina ia talatalanoa ma tagata i mataupu eseese o le Tusi Paia.

⁴ O nisi o tagata matutua o ē mafuli ina manatu i talavou o aso nei i le tulaga lautele faapea o ni ē e faasausili ma le lē faaaloalo, atonu e itiiti so latou naunau e talatalanoa ma se tagata talavou e asiasi atu i o latou fale. O le ā la atonu e fai atu ai se tagata talaʻi talavou i le fale, ina ia foia ai lena faalavelave ma faauaʻi mai ai manatu o se tagata matua o le aigā? Sa faaaogā e se tasi tagata talaʻi talavou se faaupuga faapenei: “Talofa, o loʻu igoa o ________. O loo oʻu asiasi mai i oʻu tuaoi i lenei aso ona o le toatele o loo popole e uiga i le lumanai. Ona o oe o se tagata matua, ua e mautinoa ai e sili atu lou iloa o mea e uiga i le olaga na i lo o aʻu. Peitai, e mafai ona faamafanafanaina i tatou uma lava i le mau lenei.” A uma ona faitau le Faaaliga 21:3,4, ona tataʻi atu loa lea o le talanoaga i le sāvali Olaga i se Lalolagi Fou Filemu.

⁵ O se isi manatu e faapea: “Talofa, o loʻu igoa o ________. O loo oʻu faia ni asiasiga pupuu i lo outou nuu, ona ou te iloa e toatele tagata matutua o loo popole i le ala e foliga mai ua uia e tagata talavou i aso nei. I nisi taimi e faaalia ai e tagata talavou le lē faaaloalo, e oo i uiga fouvale. Ae o loo oʻu faailoaina atu se mau o loo faaalia ai faapea, o le a aʻoaʻoina tagata uma ina ia ola faatasi i le filemu i se aso.” Ona faitau lea o le Salamo 37:11 ma fai i ai se faaopoopoga talafeagai. A faalogo tagata matutua o aiga i ni faamatalaga faamaoni faapena a o tatou tagata talaʻi talavou, e mautinoa o le a toatele i latou e maofa ma talilelei mai.

⁶ E faitau afe tagata talaʻi talavou o loo faaauau pea ona faia se sao lelei i le galuega talaʻi o le Malo ma le faia o soʻo. E ao ona faamālō atu ma le mafana ia i latou. O talavou e aʻoaʻoina a o tamameamea e o latou mātua o ē matataʻu i le Atua, ua sauni e tali atu i faalaeiauga faamaoni ina ia galulue e faia se sao atoatoa i vaega uma o le faiva. Ua iai ia te i latou o loo auai i aʻoga se avanoa tutasi o le molimau atu i uō i aʻoga, atoa ma faiaʻoga. E toatele ua olioli i mea tutupu e fiafia ai i le molimau atu i lenei oganuu faapitoa.

⁷ O lea, ia fesoasoani i tagata talaʻi talavou o la outou faapotopotoga ina ia faaaogā tatau le avanoa e auauna ai ia Ieova i le malosi o le talavou, ma vivii atu ia te ia mai le loto.—Fai. 12:1.