Lumbuula nteko yoobe ikale i buwa

1. Yehowa akumiina’shi balanguidi baaye bakite nkinyi? (Tala dingi kifuatulo.)

NNANYI atudi balombene kuteka nsaa yatudi na lukalo na kunyingishibua na buludiki? Atuuku lualuulo ku lualua lunkonko. Tui balombene kuifubuila kui Yehowa Efile Mukulu mu luteko. Yehowa akumiina’shi tukite nka bino. Akumiina dingi’shi tumutekie nsaa yooso, ‘kuteka kushi kukôka.’ (1 Tes. 5:17, EEM) Tui na bulungantu bua kuifubuila kuadi mu luteko, na kukimba buludiki kuadi mu nshalelo eetu ooso. (Nki. 3:5, 6) Bu biadi Efile Mukulu sha kalolo, Yehowa ta muitutshibile bungi bua misuusa yatudi balombene kumuteka nya.

2. Nkinyi ki’atukataluula mu uno muisambo?

² Atuataa kia buntu kia luteko na muulo. Biabia kioso kiatudi balombene kukita, nkuikitshisha bua kupeta nsaa ya kuteka. Tui balombene dingi kukimba bia kulumbuula nteko yeetu ikale i buwa. Mu binyibinyi, tui balombene kupeta kukankamishibua kui bungi na buludiki mu Bifundue. Mu uno muisambo, atukataluula mushindo watudi balombene kulama nsaa ya kuteka pa kutaluula kileshesho kia Yesu. Atukesambila dingi mushindo watudi balombene kulumbuula nteko yeetu yekala i buwa, pa kutaluula ino mianda itano i na muulo.

YESU BAADI ALAMA NSAA YA KUTEKA

3. Yesu baadi auku kinyi pabitale luteko?

³ Yesu baadi auku’shi Yehowa aata nteko na muulo. Bipua bi bungi kumpala kuaye kufika pano pa nsenga, baadi amono Nshaye aluula ku nteko ya bana balume na bana bakashi baasha lulamato. Bu kileshesho, Yesu baadi ku lupese lua Nshaye, nsaa ibaadi Nshaye aaluula nteko ibaabadi abatekie na lulamato looso kui Aana, Davide, na Eliya, atutemuna nka penda ano mashina apeela. (1 Sam. 1:10, 11, 20; 1 Bf. 19:4-6; Mis. 32:5) Ngi buakinyi, Yesu balunguile balongi baaye buabadia kuteka na kishinkamiisho kioso!​—Mat. 7:7-11.

4. Nteko ya Yesu ayitulongiesha kinyi?

⁴ Yesu mmulekiele balongi baaye kileshesho ki buwa kiabadia kulonda, kukiila ku nteko yaye aye nabene ibaadi atekie Yehowa. Mu mudimo waye wa bulungudi, Yesu baadi atekie nsaa yooso. Baadi alama nsaa ya kuteka muanda baadi na bi bungi bia kukita, na babaadi bamuifunyishe kui bantu be bungi. (Mak. 6:31, 45, 46) Ku nakashika kooso baadi alama nsaa yadi mulombene kuteka paadi bupenka. (Mak. 1:35) Ingi misuusa, baadi atekie bufuku booso bushima kumpala kua kuata kitshibilo ki na muulo ukata. (Luk. 6:12, 13) Yesu baadi mutekie misuusa i bungi kumpala kua lufu luaye, aku namu baadi mutuule binangu mu kulombasha kipindi ki bukopo kia mudimo waye wa pano pa nsenga.​—Mat. 26:39, 42, 44.

5. Tui kuambula Yesu nsaa y’atutekie naminyi?

⁵ Kileshesho kia Yesu akitulongiesha’shi, sunga tuekala na bi bungi bia kukita naminyi, abitungu tulame nsaa ya kukita luteko. Anka bu Yesu abitungu tulame nsaa ya kukita luteko, bi kuikala ku nakashika sunga ku kiolua. P’atuele nteko atulesha Yehowa’shi tui na lutumbu bua kino kia buntu ki pa buakio. Mukuetu mukashi abetanyina bu Lynne atentekiesha bibaabidi bimukume kuishimba bua musuusa wa kumpala, nsaa ibaadi mulongie pabitale kineemo kia luteko. Atentekiesha’shi: “Nsaa inalongiele’shi ne mulombene kulungula Yehowa mianda yande yooso, bibaadi binkuashe bua kumumona bu Kuuku ande a p’eshimba na buandia kulumbuula nteko yande yekala i buwa.” Kushi mpaka atue booso atupushaa nka uno mushindo umune. Biabia tutaluulengieyi mianda itano i na muulo yatudi balombene kuela mu nteko yeetu.

MIANDA ITANO I NA MUULO YATUDIA KUELA MU NTEKO YEETU

6. Muyile mukanda wa Kibafumbwilwe 4:10, 11, Yehowa mmulombene kutambula kinyi?

⁶ Kutumbisha Yehowa. Mu kimunua kia kukaanya Yowano mutumibua bamuene bakulu 24 muiyilu, abalanguila Yehowa. Babaadi abatumbisha Efile Mukulu baukie’shi, mmulombene kutambula “ntumbo, na kineemo, na bukome.” (Badika Kibafumbwilwe 4:10, 11.) Na ba mikeyilu baasha lulamato namu’nyi be na tubingilo tui bungi tua kupa Yehowa ntumbo na kineemo. Be naaye muiyilu na abamuuku kalolo. Abamonaa ngikashi yaye ku bioso bi’akitaa. Bu bi’ababandilaa bi bikitshiino bia Yehowa, abibatakulaa bua kumutumbisha.​—Yob. 38:4-7.

7. Buakinyi tui balombene kutumbisha Yehowa?

⁷ N’atue namu atukumiina kutumbisha Yehowa mu nteko yetu, p’atumulesha kiatudi bamufudile na kiatumunemekielaa. Nsaa y’obadika na kuilongiela Bible, ekitshishe bua kumona ngikashi ya Yehowa ayikambaa nkukaka kuadi pa bupenka. (Yob. 37:23; Lom. 11:33) Akupu lungula Yehowa bi’opusha pabitale yaya ngikashi yooso. Tui balombene kutumbisha Yehowa muanda etukuashaa, na kukuasha bena Kidishitu neetu booso balume na bakashi. Kuete etupasukila nsaa yooso na kuitukaluila.​—1 Sam. 1:27; 2:1, 2.

8. Ntungi tubingilo kinyi tui bungi tua buakinyi tui balombene kutumbula Yehowa? (1 Bena-Tesalonika 5:18)

⁸ Tumbula Yehowa. Tui na tubingilo tui bungi tua kutumbula Yehowa mu luteko. (Badika 1 Bena-Tesalonika 5:18.) Tui balombene kumutumbula bua kintu kioso ki buwa kiatudi naakio, muanda kia buntu kioso ki buwa akifiki kuadi. (Shak. 1:17) Bu kileshesho, tui balombene kulesha lutumbu luetu bua nsenga i buwa yadi mupangie na bintu bia kukaanya biadi mupangie. Tui kumutumbula dingi bua muwa wetu, kifuko kietu, ba kuuku beetu, na lukulupilo luetu. Na dingi, atutumbulaa Yehowa bua biadi mukumiine bua’shi tuikale naaye mu kipuano ki buwa.

9. Buakinyi abitungu tuikale atutumbula Yehowa?

⁹ Abitungu tuikitshishe ngofu bua kunangushena ku tubingilo tuatudi naato pa bupenka bua kutumbula Yehowa. Bantu be bungi lelo uno ta be na lutumbu nya. Bantu bakuete kutuula binangu nka ku biabakumiina, pa mutue pa kutuula binangu ku kiabadi balombene kukita buabadia kuikala na lutumbu ku biabia biabadi nabio. Su tui babangie kuambula bino binangu, abitungu tuibiele mu mulongo wa mianda yatudi balombene kuelela mu nteko yeetu. Bua kupela’shi bino tabitufikilanga, abitungu tutungunukie na kukimba bia kuikala na lutumbu bua bioso bia bakuete kuitukitshiina kui Yehowa.​—Luk. 6:45.

10. Lutumbu ndukuashe ungi mukuetu mukashi buadia kunyingiila bibaadi apusha naminyi? (Tala dingi kifuatulo.)

¹⁰ Lutumbu ndulombene kuitukuasha buatudia kunyingiila nkalakashi. Tutaluuleyi muanda wabadi bamone kui mukuetu Kyung-sook watupete mu Kitenta kia Mulami kia mu 15/1/2015. Babaadi bamukuate na kancer ka mu mafuafua. Amba’shi: “Uno muanda ubaadi untape kuishimba ngofu.” Alombasha dingi’shi: “Napushiishe nka bu ami bashimisha bintu bioso, na naadi napusha moo ukile.” Biabia nkinyi kibamukuashiishe buadia kunyingiila? Bakuile’shi bufuku booso kumpala a kulaala naadi nakaamina ku kitenta kia nshibo yande buandia kuteka n’eyi dikata na kutumbula Yehowa, pabitale bintu bitano biadi mupete mu diadia efuku. Bino bibaadi bimukuashe buadia kuleka kuinyongola na kumutakula buadia kulesha kifulo kiaye bua Yehowa. Baadi mumone Yehowa biakuatshishenaa bafubi baaye baasha lulamato nsaa y’abafumankana na nkalakashi ya mu nshalelo, na aye nkushinkamisha’shi kui miabi i bungi mu nshalelo kukila nkalakashi. Nka bu Kyung-sook tui na tubingilo tui bungi tua kutumbula Yehowa, sunga tuekala munkatshi mua nkalakashi i naminyi. Kutumbula Yehowa mu luteko, akuitukuasha buatudia kunyingiila na kulama butaale bua mu binangu.

11. Buakinyi bibaadi abitungu’shi balongi ba Yesu bekale n’eshimba dinyingie kunyima kua Yesu kualukiila muiyilu?

¹¹ Teka Yehowa eshimba dinyingie nsaa y’olungula mukandu wi buwa. Kapindi kapeela kumpala kuaye kuenda muiyilu, Yesu batentekieshe balongi baaye mudimo ubaadi muibape wa kulungula mukandu wi buwa pa bimutale, “mu Yeelusaleme, mu Yuudeya mushima na mu Samariya, mpaa na kufudiile nsenga.” (Bik. 1:8; Luk. 24:46-48) Kunyima kua kapindi kapeela, bakata ba bena Yuda babakuatshile Mpiele mutumibua na Yowano benda naabo kumpala kua Sanedrine, balungula bano bantu baasha lulamato’shi, balekie kulungula mukandu wi buwa, mpaa na kuibakiengiesha. (Bik. 4:18, 21) Mpiele na Yowano babakitshiine naminyi?

12. Muyile mukanda wa Bikitshino 4:29, 31, balongi babakitshiine kinyi?

¹² Bua kualuula bano bakata ba bena Yuda, Mpiele na Yowano babambile’shi: “Sangulayi su mbikumbane ku meeso kw’Efile Mukulu kwinupushiisha’nwe, pe kupushiisha Efile Mukulu. Mwanda bw’atwe, tatwibalombeene kukutwa kwakula wa bintu biatudi bamone na biatudi bapushe.” (Bik. 4:19, 20, Kilombeeno Kipya 2014) Nsaa ibabafunguile Mpiele na Yowano balongi babatekiele Yehowa bua kukita kikiebe ki’eshimba diaye. Babatekiele’shi: “Ope bafubi boobe bukome bwa kuwukisha Eyi dyoobe na mashimba anyingye.” Yehowa baluluile luteko luabo lubabamutekiele na mashimba aabo ooso.​—Badika Bikitshino 4:29, 31.

13. Kileshesho kia Jin-hyuk akitulongiesha kinyi?

¹³ Tui kuambula batumibua p’atutungunuka na kulungula mukandu wi buwa, nsaa i bakata ba mbulamatadi betutekie bua’shi tulekie kuiwulungula. Tutaleeyi kileshesho kia mukuetu mulume Jin-hyuk abaabadi beele mu lukano muanda wa’shi, mmupele kutuelakana mu mianda ya ino nsenga. Mu lukano, babaadi bamupe mudimo wa kupasukila bangi bena lukano naaye, anka babaadi bamupe matalua a kulungula bena lukano mianda ipushene na mudimo wabadi bamupe, kadi ta babaadi bamupe matalua a kuibalungula mianda pabitale Bible. Belele luteko buadia kuikala n’eshimba dinyingie na kalolo bua’shi alungule mukandu wi buwa mu mushindo ooso aumueneka wawa. (Bik. 5:29) Bambile’shi: “Yehowa baluluile ku nteko yande pa kumpa eshimba dinyingie na binangu bia kubanga kulonga na bantu be bungi Bible mu minite itano ku kibelo kioso kia muntu e muamua mu lukano. Na dingi, bufuku naadi afundu mikanda yandi mulombene kupa bena lukano nami muifuku a dilondo.” N’atue namu, abitungu tukulupile’shi Yehowa etukuasha buatudia kulombasha mudimo wetu wa bulungudi. Anka bu Jin-hyuk, tui balombene kuteka eshimba dinyingie na binangu.

14. Nkinyi kilombene kuitukuasha nsaa y’atunyingiila nkalakashi? (Misambo 37:3, 5)

¹⁴ Teka Yehowa akukuashe nsaa y’onyingiila nkalakashi. Be bungi bakuatudi bakuete kunyingiila nkalakashi ya ku mbidi, sunga ya mu binangu, kufuisha muntu abadi bafule, nkalakashi ya mu kifuko, kubinguabingua, sunga ingi mianda. Na ingi mianda bu bipupa bia maladi, ngoshi, bikuete kunyiisha kuikasha ino nkalakashi bukopo ngofu biatushi balombene kuiyinyingiila. Lungula Yehowa bi’opusha muishimba diobe. Mulungule pabitale muanda oobe nka biodi mulombene kulungula kuuku oobe a p’eshimba. Ikala mushinkamishe’shi Yehowa “akukitshiina byooso.”​—Badika Misambo 37:3, 5.

15. Luteko lui kuitukuasha bua “kunyingiila mu mpombo” naminyi? Tuusha kileshesho.

¹⁵ Kuela nteko i bungi nkulombene kuitukuasha bua “kunyingiila mu mpombo.” (Lom. 12:12, NWT) Yehowa auku’shi balanguidi baaye bakuete kunyingiila, anka ‘ateemesha misaase yabo ebapashaa.’ (Mis. 145:18, 19) Mungi mbala-mashinda abetanyina bu Kristie e na bipua 29, mmusangane’shi bino mbia binyibinyi. Babangile kupeta maladi e bukopo mu mushindo wa shi baadi apuandikisha. Pa muanda wa biabia, bapetele lukalakashi lua mu binangu lu’abetanyina bu dépression. Kunyima, kua biabia baukile’shi nyinaaye mbamukuate na maladi alombene kumutuala mpaa na ku lufu. Kristie akula’shi: “Naadi natekie Yehowa nsaa yooso bua’shi ampe bukome bua kunyingiila efuku dioso. Naadi nekitshisha bua kulamanga biubishi bi buwa bia mu kikudi pa kutuelanga mu bisangilo na pa kuilongielanga pa bupenka.” Kristie akumbasha’shi: “Luteko ndukuashe buandia kunyingiila kino kipungo ki bukopo. Ne muukie’shi Yehowa e kuanka efuku dioso, na nnaaye nsulo yande ikata ya kunyingishibua. Sunga mbiabia nkalakashi yande ta ngipue nka paapa nya, Yehowa mmualuule ku nteko yande p’aye kumpa butaale bua mu binangu na bua muishimba.” Biabia tatukookanga, “Yehowa awuku kukalwila bantu balulame ku kutompibwa.”​—2 Mp. 2:9, Kilombeeno Kipya 2014.

16. Buakinyi tui na lukalo na bukuashi bua Yehowa bua kunyingiila bitompuanga?

¹⁶ Teka Yehowa bukuashi bua kunyingiila bitompuanga. Bu biatudi bantu bashi bapuidikie, atuikitshishaa misuusa yooso bua kupela kukita mianda i bubi. Satana kuete ekitshisha na muaye mooso bua kuikasha kuikitshisha kuetu bua kukita bi buwa bukopo. Mushindo umune wakuete kuikitshisha bua kuluisha binangu bietu, nkukiila mu kukisha kapapi mu mushindo wi bubi. Kukisha kapapi mu uno mushindo nkulombene kuusha binangu bietu na mianda i butete. Na biabia binangu bi bubi, mbilombene kuituikasha be butete ku meeso kua Yehowa na kuitutakula mu kukita miluisho ikata.​—Mak. 7:21-23; Shak. 1:14, 15.

17. Kunyima kua kuteka bukuashi kui Yehowa abitungu tukite kinyi bua kukambila kitompuanga? (Tala dingi kifuatulo.)

¹⁷ Abitungu tutekie bukuashi bua Yehowa su atukumiina kukambila kitompuanga kia kukita muanda wi bubi. Yesu baadi muteemune uno muanda aulondo mu luteko luaye lua kileshesho amba’shi: “Twetufishanga mu kutompiibwa, anka etupaashe kwi mubi.” (Mat. 6:13) Yehowa akumiina kuitukuasha, anka abitungu tumutekie bukuashi. Abitungu dingi tukite mianda ipushene na nteko yeetu. Tui balombene kuikitshisha na muetu mooso bua kupela kubadika, sunga kuteemesha mianda i bubi yabakuete kupalakasha mu uno ndumbuluilo a Satana. (Mis. 97:10) Tui balombene kuusha mianda i buwa mu binangu bietu pa kubadika na kuilongiela Bible. Kuendanga mu bisangilo na kukitanga mudimo wa bulungudi, nbilombene kukaluila binangu bietu. Na dingi, Yehowa etulaa’shi ta mulombene kuitutadiila bua’shi tupete bitompuanga bikile bukome buetu nya.​—1 Kod. 10:12, 13.

18. Nkinyi akitungu’shi tukite pabitale luteko?

¹⁸ Abitungu’shi ooso akuatudi, atekie ngofu kukila kumpala bua kushaala na lulamato kui Yehowa, mu kino kipungo ki bukopo kia mafuku a ku mfudiilo. Ikala olama nsaa ya kukita luteko n’eshimba diobe dioso. Yehowa akumiina’shi ‘tumufungwile mashimba eetu’ mu luteko. (Mis. 62:8) Tumbisha Yehowa na omutumbule bua bioso bia kuete kukita. Mutekie bukuashi bodia kuikala n’eshimba dinyingie mu bulungudi. Muisendeele akukuashe bodia kunyingiila lukalakashi looso lualua, na kukambila kitompuanga kioso kiodi mulombene kufumankana nakio. Totadilanga kintu su nkimune sunga muntu buadia nkukutshishua kukitanga nteko efuku dioso kui Yehowa. Yehowa aluulaa nteko yeetu mushindo kinyi? Atukataluula luno lukonko lui na muulo mu muisambo aulondo.