Xtaa xawii maraxtaa náa mbiʼi rí itháán gíʼdoo numuu ráʼ.

1. Índo̱ naguma riya̱a̱ʼ Conmemoración, ndíjkha rí nindxu̱u̱ mbiʼi kiejuunʼ rá. (Lucas 22:​19, 20.)

MBIʼI rí itháán gíʼdoo numuu eʼyáá ikháanʼ bi̱ nindxu̱lú testigos de Jeobá, mbiʼi dí naguma riya̱a̱ʼ Conmemoración mbiʼi rí nikháñuu Cristo. I̱ndó rígi̱, dí niʼthí Jesús dí ma̱ndoo muʼni riya̱a̱ʼ (atraxnuu Lucas 22:​19, 20). ¡Ra̱ʼkhá tháán nandulúʼ dí maʼga̱nú mbiʼi rúʼko̱, dí nindxu̱u̱ kiejuunʼ wéñuuʼ! Náá numuu rá. Guʼyáá.

2. Ndíjkha rí nandulúʼ wéñuuʼ marigá Conmemoración rá.

² Conmemoración nambáyulú mundxaʼwáá edxu̱lúʼ dí gíʼdoo numuu rí nijuiʼtsiwáánʼ. Naʼni marmáʼáan a̱jkiu̱lú rí ikhí náa ma̱ndoo musngajmá rí nuxnáa núma̱aʼ rí niʼni Jesús ga̱jma̱a̱ numulú (2 Cor. 5:​14, 15). Ma̱ngaa mbiʼi rúʼko̱ ma̱ndoo makuwáanʼ gajmiúlú a̱ngiu̱lú ga̱jma̱a̱ muxnámíjná tsiaki̱i̱ (Rom. 1:12). Ma̱ngaa xúgíʼ tsiguʼ, mbaʼin bi̱ niniña̱a̱nʼ ragún reunión, nagún náa Conmemoración ga̱jma̱a̱ tikhuun dí ikhiin natangiín, numuu rí nisngájmúún a̱ngiu̱lú dí nandún kuñúún. Mbaʼin xa̱bu̱ asndu naʼniún tsiánguá índo̱ nduyáá ga̱jma̱a̱ rí nudxawíín ikhí, ikhú nuraʼwi̱i̱ munigajma̱a̱ Biblia. Ikha jngóo, xúgíʼ rígi̱ naʼni dí Conmemoración mani̱ndxu̱u̱ mbá mbiʼi kiejuunʼ náa ikháanʼ.

3. Xú káʼnii eʼni makuwá mbá jnduʼ a̱ngiu̱lú Conmemoración dí narígá náa xúgíʼ numbaaʼ rá. (Atayáá ma̱ngaa xtiʼkhuu.)

³ I̱mba̱ numuu rí nandulúʼ maʼga̱nú mbiʼi rúʼko̱, numuu rí ikhú nandoo nduʼyáá rí xa̱bi̱i̱ Jeobá kúwá mbá jnduʼ. Náa mbá xúgíʼ numbaaʼ testigos de Jeobá nawi̱i̱n xó má na̱jkha̱ rajnguáan a̱jkha̱ʼ náa xuajin rí kúwi̱i̱n. Xúgiáanʼ nuʼdxawíín discurso náa naʼthí rí gíʼdoo wéñuuʼ numuu rí nijuiʼtsiwáánʼ, nuʼni a̱jma̱ ajmúú, nanújngoo pan ga̱jma̱a̱ vino ga̱jma̱a̱ asndu náa a̱jkiu̱lú nuʼthá “xúʼko̱ gáʼni” náa mbá a̱jkhu̱ rí najuiʼtájkáanʼ. Káaʼ má nanújngoo 24 horas, mbá xúgíʼ congregación dí rígá náa xúgíʼ numbaaʼ nindoo niniri̱ya̱a̱ʼ mangiin. Lá naʼngo̱o̱ nundxa̱ʼwa̱míjna̱ xóo gagi naxtáa Jeobá ga̱jma̱a̱ Jesús índo̱ nduyáá rí náa mbá xúgíʼ numbaaʼ nuxnún gamajkhu xáʼ.?

4. Ndiéjuunʼ gúʼnigajma̱a̱ náa artículo rígi̱ rá.

⁴ Náa artículo rígi̱ muriʼña̱a̱ tikhuʼ graxe̱: Xú káʼnii gándoo muʼni ratamíjná mu makuwáanʼ náa Conmemoración rá. Xú káʼnii ma̱ndoo mumbáñún eʼwíinʼ rá. Ga̱jma̱a̱, xú káʼnii gúmbáñún bi̱ niniña̱a̱nʼ reunión rá. Índo̱ guʼyáá gaxtiʼña̱a̱, rúʼko̱ gámbáyulú mu makuwáanʼ xawii mbiʼi rúʼko̱ dí ra̱ʼkhá tháán gíʼdoo numuu.

XÚ KÁʼNII GÁNDOO MUʼNI RATAMÍJNÁ MAKUWÁANʼ NÁA CONMEMORACIÓN RÁ.

5. a) Ndíjkha rí gíʼmaa mundxaʼwáá edxu̱lúʼ náa rí nijuiʼtsiwáánʼ rá. (Salmo 49:​7, 8). b) Aratá rí nijmañaaʼ náa video Náa numuu nikháñu Jesús rá.

⁵ Mbá xóo ma̱ndoo muʼni ratháá a̱jkiu̱lú mu makuwáanʼ náa conmemoración, dí mundxaʼwáá edxu̱lúʼ rí niʼtsiwáanʼ Jesús. Ikháanʼ xajmáánʼ guʼni kawumijná náa aʼkhá ga̱jma̱a̱ rí nakháñulú (atraxnuu Salmo 49:​7, 8;a atayáá ma̱ngaa video Náa numuu nikháñu Jesús rá.)b Ikha jngóo Jeobá niraʼwi̱i̱ dí A̱ʼdióo bi̱ nandoo kaʼyoo makhañúu ga̱jma̱á numulú, mbá nájmi̱i̱n mba̱a̱ nini̱ numa̱a̱ ga̱jma̱á numulúʼ (Rom. 6:23). Índo̱ itháán gundxaʼwamíjna̱ rí Jeobá ga̱jma̱a̱ Jesús nini ga̱jma̱á numulú, itháán gájngajulú rí niʼtsiwáanʼ. Xúgi̱ mbuʼyáá tikhuʼ rí Jeobá ga̱jma̱a̱ Jesús nikúwá xawii muni ga̱jma̱á nindxu̱lú. Mú ginii, muʼthá ndiéjuunʼ ndiyóoʼ muni mu mutsiwáánʼ.

6. Xú káʼnii niʼngo̱o̱ nijuiʼtsiwáánʼ rá.

⁶ Rí nijuiʼtsiwáánʼ gíʼmaa maʼni ikháá má xóo rí maratsiriyaaʼ o mbi̱ya̱a̱ mbá. Timbáa xa̱bu̱, Adán nákha nigu̱ma̱a̱ na̱nguá ninindxu̱u̱ xa̱bu̱ aʼkhá. Mú índo̱ nikiéʼkhun, ikhú nindáti̱go̱o̱ rí maxtáa kámuu mbiʼi ga̱jma̱a̱ xúʼko̱ má e̱ji̱i̱n ma̱ngaa. Mu ma̱ndoo majuiʼtsiri̱ya̱a̱ʼ dí Adán nindáti̱go̱o̱, nixnájximinaʼ Jesús makhañúu numuu rí ikhaa na̱nguá gíʼdoo aʼkhá. Náa mbá xúgíʼ mbiʼi rí nixtáa náa tsu̱du̱u̱ Ku̱ba̱ʼ, Jesús “na̱nguá nikudaminaʼ nimbá aʼkhá ni má na̱nguá niʼni nduwaʼ” (1 Ped. 2:22). Ikhaa na̱nguá nigiʼdoo aʼkhá índo̱ nikháñúu, ikha jngóo ninindxu̱u̱ ikháá má xóo vida ndrígóo Adán (1 Cor. 15:45; 1 Tim. 2:6).

7. Ndiéjuunʼ dí niraʼnuu Jesús índo̱ nixtáa náa tsu̱du̱u̱ Ku̱ba̱ʼ rá.

⁷ Índo̱ Jesús nixtáa náa tsu̱du̱u̱ Ku̱ba̱ʼ, ikhaa niʼnimbo̱o̱ kájxi̱ kaʼyoo Anu̱u̱, maski ajndu niraʼnuu mbaʼa tsáʼkhá. Nákha ninindxu̱u̱ ada̱, ndiyóoʼ rí maʼnimbo̱o̱ kaʼyoo anu̱u̱ ga̱jma̱a̱ ru̱dúu̱ bi̱ nindxu̱ún xa̱bu̱ aʼkhá, maski ajndu ikhaa nindxu̱u̱ jmbii (Luc. 2:51). Índo̱ ni̱jkha̱ rakhi̱i̱, ndiyóoʼ maʼngo̱o̱ rí nutsudaaʼ eʼwíinʼ bi̱ nindúún rí xáʼnimbo̱o̱ kaʼyoo anu̱u̱ o ru̱dúu̱ ma̱ngaa rí xáwi̱ji̱ jmbu náa Jeobá. Índo̱ nikhi̱i̱ má, ndiyóoʼ maraʼnuu tsáʼkhá dí nigrui̱ga̱ Gixa̱a̱ náa inuu mu xáwi̱ji̱ jmbu náa Jeobá (Mat. 4:​1-11). Gixa̱a̱ niʼni xó má niʼngo̱o̱ mu maʼni rí makiéʼkhun Jesús mu xúʼko̱ xáʼtsiwáánʼ.

8. Ndiéjuunʼ imbo̱o̱ dí niraʼnuu Jesús rá.

⁸ Índo̱ nigíʼdu̱u̱ niʼtáraʼa, Jesús niraʼnuu i̱ʼwáʼ tsáʼkhá. Mbá xkri̱da, xa̱bu̱ bi̱ táʼndúún gúyáá nixkháá ga̱jma̱a̱ nindúún muxiyáa (Luc. 4:​28, 29; 13:31). Ndiyóoʼ rí maʼngo̱o̱ a̱jkiu̱u̱n kaʼñúún discípulos ndrígóo (Mar. 9:​33, 34). Índo̱ inu muxiyáa, nini gínáa ga̱jma̱a̱ nitsijmaa. Nda̱wa̱á nirajkhaa náa mbá ixi̱, nini̱i̱ xóo mbáa xa̱bu̱ bi̱ nagudíin a̱ngui̱i̱n, rígi̱ niʼni dí mamínuuʼ wéñuuʼ (Heb. 12:​1-3). Índo̱ inu makhañúu, ikhú Jeobá na̱nguá niña̱wu̱u̱n, ndiyóoʼ dí maraʼnuu mbáwíí tsáʼkhá rígi̱ (Mat. 27:46).c

9. Índo̱ nduʼyáá xúgíʼ rí niʼni Jesús, ndiéjuunʼ exkajxáánʼ muʼni rá. (1 Pedro 1:8.)

⁹ Nakujmaa kaʼwu rí Jesús ra̱ʼkhá tháán mba̱a̱ rí niʼni mu maʼtsiwáánʼlú. Índo̱ nundxa̱ʼwa̱míjna̱ xúgíʼ tsiaki̱i̱ rí ndiyóoʼ maʼni ga̱jma̱á numulú, naxkajxáánʼ rí maʼndulú kuʼyáá (atraxnuu 1 Pedro 1:8).

10. Xú káʼnii nikumu̱u̱ Jeobá, índo̱ nimínuuʼ A̱ʼdióo rá.

¹⁰ Ndiéjuunʼ nixtáa xawii maʼni Jeobá, mu Jesús maʼngo̱o̱ maʼtsiwáanʼ rá. Xó má eʼyáá, ndawa̱a̱ i̱mba̱a̱ xó Jeobá nandoo kaʼyoo wéñuuʼ A̱ʼdióo (Prov. 8:30). Gundxaʼwamíjna̱ xú káʼnii nikumu̱u̱ Jeobá índo̱ ndiʼyoo xóo nimínuuʼ wéñuuʼ Jesús índo̱ nixtáa náa tsu̱du̱u̱ Ku̱ba̱ʼ. Phú gajkhun dí rígi̱ niʼni gawúunʼ, índo̱ ndiʼyoo xú káʼnii eni̱ gínáa, táʼndúún gúyáá, ga̱jma̱a̱ nini rí mamínuuʼ A̱ʼdióo.

11. Gajmaaʼ mbá xkri̱da mu marata xú káʼnii nikumu̱u̱ Jeobá, índo̱ nikháñuu Jesús.

¹¹ Xa̱bu̱ bi̱ nikháñún e̱jñu̱ún nduyáá xú káʼnii gakhi̱i̱ wéñuuʼ nindxu̱u̱ rígi̱. Maski ajndu kuaʼdáá fe náa rí magabiín xa̱bu̱, mú rígi̱ tséʼni jngudi̱i̱ rí xóo nagawúnlúʼ índo̱ nakháñuu bi̱ nandulúʼ kuʼyáá. Xkri̱da rígi̱ nambáyulú mbuʼyáá xú káʼnii nikumu̱u̱ Jeobá nákha tsiguʼ 33, mbiʼi rí nimínuuʼ ga̱jma̱a̱ nikháñuu A̱ʼdióo bi̱ nandoo kaʼyoo (Mat. 3:17).d

12. Ndiéjuunʼ dí ma̱ndoo muʼni wapháá nákha xóó tsérígá Conmemoración rá.

¹² Náá numuu dí na̱nguá etriyaʼ mbiʼi matanigajma̱a̱ mbáwíín o mbá guʼwáanʼ rí nijuiʼtsiwáánʼ rá. Ga̱jma̱a̱ʼ Guía de estudio para los testigos de Jehová o Ikha rí munigajmaa xa̱bi̱i̱ Jeobá, o i̱ʼwáʼ i̱yi̱ʼ náa mataxkamaa itháán ga̱jma̱a̱ numuu rígi̱.e Ma̱ngaa atraxnuu texto ndrígóo Biblia dí kaʼyoo náa conmemoración dí na̱ʼkha̱ náa I̱yi̱i̱ʼ dí najmulú náa reunión Xóo kúwi̱i̱n ga̱jma̱a̱ xóo Etaraʼa Cristianos. Ga̱jma̱a̱ rí xámbumaaʼ ma̱ta̱ya̱a̱ video náa nagixnuu texto rí ka’yoo mbi’i conmemoración. Á mu nuʼni ratháá a̱jkiu̱lú dí makuwáanʼ mbiʼi rúʼko̱, xúʼko̱ ma̱ndoo mumbañún eʼwíinʼ ma̱ngaa (Esd. 7:10).

GÚMBÁÑÚN EʼWÍINʼ MAKUWÁ NÁA CONMEMORACIÓN

13. Ndiéjuunʼ ndayóoʼ muʼni ginii mu mumbañún eʼwíinʼ rá.

¹³ Xú káʼnii gándoo gúmbáñún eʼwíinʼ mu makuwá náa conmemoración rá. Ginii, ndayóoʼ dí muʼthúún magún. Raʼkháa i̱ndó ndayóoʼ dí muxná invitación, mbáa ma̱ndoo muʼni mbá lista ndrígu̱ún xa̱bu̱ bi̱ manigulúʼ muʼthán maʼga̱, xóo bi̱ kuʼñúún, bi̱ nuñajunʼ gajmiúlú, bi̱ nuʼnigajma̱a̱ gajmiúlú o eʼwíinʼ. Á mu dí naguámbulú invitación, ma̱ndoo muxuʼmá enlace náa celular ndrígu̱ún. ¡Tséʼyáá nguáthi̱i̱n gaʼndúún magún! (Ecl. 11:6).

14. Ndiéjuunʼ dí gaʼngo̱o̱ marigá, á mu naraxnáá invitación mbáa bi̱ natatsiniiʼ rá.

¹⁴ Dí maraxna̱a̱ invitación mbáa bi̱ natatsiniiʼ, maʼni rí maxkajxi̱i̱ a̱jkiu̱u̱n. Mbá mbiʼi, mbáa ndxájulú niʼniuu wéñuuʼ tsiánguá rí ajmbio̱o̱ bi̱ tséʼnigajma̱a̱ Biblia, niʼthúu̱n rí maʼga̱ ga̱jma̱a̱ náa Conmemoración. Náá numuu rí niʼniuu tsiánguá xá. Numuu rí ikhaa, mbaʼa nuthu niʼthún má maʼga̱ ga̱jma̱a̱, mú ajmbio̱o̱ na̱nguá ejkha̱. Ndíjkha dí niriʼkhu̱u̱ xóo nandxa̱ʼwáminaʼ xá. Ajmbio̱o̱ niʼthúu̱n dí mbáa bi̱ kayá edxu̱u̱ bi̱ naniniiʼ, mínaaʼ ikhaa nixnúu invitación. Ni̱jkha̱ náa Conmemoración tsiguʼ rúʼko̱ ga̱jma̱a̱ náa tsiguʼ nda̱wa̱á.

15. Ndiéjuunʼ gíʼmaa muʼni gajmiúlú xa̱bu̱ bi̱ na̱jkha̱ timbá aʼphu̱ náa Conmemoración rá.

¹⁵ Garmáʼáan a̱jkiu̱lú dí índo̱ nuʼtháán mbáa ma̱ʼkha̱ náa Conmemoración, mbáa gíʼdoo tikhuʼ graxe̱, itháán á mu dí na̱nguá ni̱jkha̱ nimbá reunión. Ikha jngóo májánʼ gáʼni dí mbuʼyáá ndiéjuunʼ dí xákro̱ʼo̱o̱ ga̱jma̱a̱ xú káʼnii gúriʼña̱a̱ (Col. 4:6). Mbáa xkri̱da, ma̱ndoo marajximínáʼ xóo rígi̱: “Ndiéjuunʼ eni̱ ikhí xá. Nguáthá mba̱yu̱u̱ʼ ndajyúuʼ reunión rá. Xú káʼnii xtíñúʼ gáguʼunʼ rá. Lá mbaʼyóoʼ mani̱ numa mu mato̱ʼo̱ʼ ráʼ. Lá mbaʼyóoʼ maxna̱ mbújkha̱a̱ índo̱ gáxtáá náa Conmemoración ráʼ.” Ikha jngóo ma̱ndoo murajxi̱i̱ bi̱ niʼtháán maʼga̱, á mu dí rígá tikhuʼ dí na̱nguá nikro̱ʼo̱o̱ o muʼtháán mbá rí ikhaa nandoo mbaʼyoo. Ma̱ngaa ma̱ndoo majmulú videos Guʼni ku̱ma̱a̱ dí xú nikháñúu Jesús ga̱jma̱a̱ Káʼnii erígá náa Guʼwá nagimbáanʼ rá. Ga̱jma̱a̱ náa kíxnuu 28 ndrígóo libro ¡Araxtaa gagi kámuu mbiʼi! na̱ʼkha̱ tikhuʼ rí ma̱ndoo maratha̱a̱n xa̱bu̱.

16. Ndiéjuunʼ i̱mba̱ graxe̱, ma̱ndoo maguaʼdáá bi̱ magún náa Conmemoración rá.

¹⁶ Nda̱wa̱á dí nixtáa náa Conmemoración, mbáa xa̱bu̱ marigá mbaʼa dí xákro̱ʼo̱o̱. Mbáa marajximínáʼ náá numuu rí nimbáa (o na̱nguá mbaʼin) ni̱ʼphu̱ pan ga̱jma̱a̱ niʼwa̱a̱n vino. Mbáa ma̱ngaa marajximínáʼ nguáthá nuthu eguma̱ri̱ya̱a̱ʼ Conmemoración. Mbáa asndu nandoo mbaʼyoo á mu náa xúgíʼ reunión dí naguáʼdáá, nuni̱ ikháá kayuuʼ. Maski ajndu náa discurso dí nijuixná náa Conmemoración, najuiʼthá ga̱jma̱a̱ numuu rígi̱, mú mbáa xa̱bu̱ nandoo mbaʼyoo itháán. Mu muriʼña̱a̱ graxe̱ ndrígóo, ma̱ndoo muraxnuu tikhuʼ artículo dí rígá náa jw.org “¿Por qué los testigos de Jehová celebran la Cena del Señor de forma diferente a otras religiones?”. Nandulúʼ dí mumbañún asndu xóo má gáʼngo̱o̱ nákha xóó, índo̱ ga̱jma̱a̱ nda̱wa̱á dí gárígá Conmemoración mu xúʼko̱ mumbañún xa̱bu̱, bi̱ gágún mbiʼi rúʼko̱ (Hech. 13:48).

GÚMBÁÑÚN BI̱ NINIÑA̱A̱Nʼ RAGÚN REUNIÓN

17. Xú káʼnii ma̱ndoo mumbañún ancianos bi̱ niniñaaʼ ragún reunión rá. (Ezequiel 34:​12, 16.)

¹⁷ Xú káʼnii gándoo ancianos mumbañún bi̱ niniña̱a̱nʼ ragún reunión, índo̱ gárígá Conmemoración rá. Gaxmiéjunlú kuʼñúún (atraxnuu Ezequiel 34:​12, 16).f Ancianos, nákha xóó tségi̱ʼdu̱u̱ Conmemoración, aratamijná gajmiáanʼ asndu xó má naʼngo̱o̱. Arathún dí naxmiéjuanʼ xtañún ga̱jma̱a̱ rí nandaaʼ matani̱ asndu xó má naʼngo̱o̱ mu matambáñún. Arathún dí magún náa Conmemoración, á mu dí nagún, atriguíin ga̱jma̱a̱ májánʼ. Nda̱wa̱á dí gájngoo Conmemoración, aratamijná má xúʼko̱ gajmiáanʼ a̱ngiu̱lú bugi̱ ga̱jma̱a̱ gúmbáñún mu xúʼko̱ matangi̱ín mbu̱júu̱ náa Jeobá (1 Ped. 2:25).

18. Xú káʼnii gándoo gúmbáñún xúgíinʼ bi̱ niniñaaʼ ragún reunión rá.

¹⁸ Xúgíinʼ a̱ngiu̱lú bi̱ kúwá náa congregación ma̱ndoo mumbañún bi̱ niniñaaʼ ragún reunión náa Conmemoración. Xú káʼnii rá. Musngajmúún rí nandún kuñún, májánʼ a̱jkiu̱ún ga̱jma̱a̱ maguaʼdáá gamajkhu (atraxnuu Romanos 12:10). Garmáʼáan a̱jkiu̱lú dí mugiu̱u̱ Jeobá bugi̱, mbáa niʼniún gakhi̱i̱ matangíin náa reunión. Mbáa naxmiéjúún, xú káʼnii gúndríguiin a̱ngiu̱lú.g Ikha jngóo xúʼniu̱u̱n graxe̱ rí maʼni xakuwá májánʼ ni má xúʼthá nimbá rí maʼni gawúúnʼ (1 Tes. 5:11). Nindxu̱ún a̱ngiu̱lú ga̱jma̱a̱ nakuwáanʼ gagi rí natangiín mu̱ʼni̱ mbóó ñajuunʼ Jeobá gajmiúlú (Sal. 119:176; Hech. 20:35).

19. Ndiéjuunʼ rí májánʼ gundrígú á mu nuʼni riya̱a̱ʼ Conmemoración rá.

¹⁹ Rí ndiʼyáá xúgíʼ rígi̱, tséʼniulú tsiánguá rí Jesús niʼtáñajunlú dí muʼni riya̱a̱ʼ Conmemoración mambá tsiguʼ. Dí muʼni riya̱a̱ʼ, mbaʼa enii xóo nambáyulú, xó má ikháanʼ ma̱ngaa eʼwíinʼ xa̱bu̱ (Is. 48:​17, 18). Nambáyulú maʼndulú kuʼyáá itháán Jeobá ga̱jma̱a̱ Jesús. Ikhú ma̱ndoo musngajmá rí nuxníin núma̱aʼ ga̱jma̱a̱ numuu rí nini ga̱jma̱á nindxu̱lú. Naʼni rí makuwáanʼ itháán mbá kambájxulú gajmiúlú a̱ngiu̱lú ga̱jma̱a̱ eʼwíinʼ xa̱bu̱ mu xúʼko̱, ma̱ndoo mambáñún rí nijuiʼtsiwáánʼ. Ikha jngóo gúʼni ratamíjná mu makuwáanʼ náa Conmemoración mbiʼi rí itháán gíʼdoo numuu.