ʻIsikeli
2 Naʻá ne folofola mai leva kiate au: “Foha ʻo e tangata,* tuʻu hake ka u lea atu kiate koe.”+ 2 ʻI heʻene folofola mai kiate aú, naʻe hoko mai kiate au ʻa e laumālié ʻo ne ʻai au ke u tuʻu hake+ koeʻuhí ke u lava ʻo fanongo ki he Tokotaha ʻoku folofola mai kiate aú.
3 Naʻá ne hoko atu ʻo ne folofola mai kiate au: “Foha ʻo e tangata, ʻoku ou fekauʻi atu koe ki he kakai ʻo ʻIsilelí,+ ki he ngaahi puleʻanga angatuʻu kuo nau angatuʻu mai kiate aú.+ Ko kinautolu mo ʻenau fanga kuí kuo nau faiangahala mai kiate au ʻo aʻu mai ki he ʻaho ko ení.+ 4 ʻOku ou fekauʻi atu koe ki he ngaahi foha ʻoku nau fakafetau* mo loto-fefeka,+ pea kuo pau ke ke pehē kiate kinautolu, ‘Ko e folofola eni ʻa e ʻEiki Hau ko Sihová.’ 5 Ko e meʻa kiate kinautolú, pe te nau fanongo pe fakafisi ke fanongo—he ko ha fale angatuʻu kinautolu+—te nau ʻiloʻi moʻoni naʻe ʻi ai ha palōfita ʻi honau lotolotongá.+
6 “Ka ko koe, foha ʻo e tangata, ʻoua naʻá ke ilifia ʻiate kinautolu,+ pea ʻoua naʻá ke ilifia ʻi heʻenau ngaahi leá, neongo ʻoku takatakaiʻi koe ʻe he talatalaʻāmoa mo e ʻakau talatala*+ peá ke nofo ʻi he lotolotonga ʻo e fanga sikopio. ʻOua naʻá ke ilifia ʻi heʻenau ngaahi leá,+ pea ʻoua naʻá ke manavahē ʻi honau matá,+ he ko ha fale angatuʻu kinautolu. 7 Kuo pau ke ke leaʻaki ʻa ʻeku ngaahi leá kiate kinautolu, pe te nau fanongo pe ʻikai, he ko ha kakai angatuʻu kinautolu.+
8 “Ka ko koe, foha ʻo e tangata, fanongo mai ki he meʻa ʻoku ou tala atu kiate koé. ʻOua naʻá ke hoko ʻo angatuʻu hangē ko e fale angatuʻu ko ení. Fakamanga ho ngutú peá ke kai ʻa e meʻa ʻoku ou ʻoatu kiate koé.”+
9 ʻI heʻeku sió, naʻá ku mamata ki ha nima naʻe mafao mai kiate au,+ pea naʻá ku sio ai ki ha takainga tohi.+ 10 ʻI heʻene folahi mai ia ʻi muʻa ʻiate aú, naʻe hiki ai ha meʻa fakatouʻosi ʻi muʻa mo mui.+ Naʻe hiki ai ʻa e ngaahi taʻanga tangi* mo e tengihia pea mo e tangilāulau.+