Vakai ki he Māmaní
ʻI he Lepupilika ʻo Siōsia ʻi he tonga-hahake ʻo ʻIulopé, “ko e lahi ai ʻo e ngaahi vete malí kuo meimei liunga ua ia ʻi he taʻu ʻe hongofulu fakamuimuí.” Ko e tokolahi taha ʻo e faʻahinga ko ia ʻoku veté ʻoku nau siʻi hifo ʻi he taʻu 20.—FINANCIAL, SIŌSIA.
ʻI ʻAilani, ko e pēseti ʻe 17 ʻo e taʻu 11-16 “kuo nau ʻoange honau hingoa kakató ki ha taha ʻi he ʻInitanetí ʻa ia kuo teʻeki ai ʻaupito ke nau fetaulaki mo ia.” Ko e pēseti ʻe hongofulu kuo nau toe ʻoange honau “tuʻasila ʻīmeilí, fika telefoni toʻotoʻó pe ko e laʻi tā.”—KO E SŌSAIETI ʻI ʻAILANI KI HONO TAʻOFI ʻO E FAKAMAMAHIʻI ʻO E FĀNAÚ.
Ko e pēseti pē nai ʻe 4 ʻo e vela vao ʻi māmani lahí ko hono ngaahi tupuʻangá ʻoku fakanatula pē. ʻI he kotoa ʻo e ngaahi tuʻunga kehé, ko e ngaahi velá ʻoku kamataʻi pē ia ʻe he tangatá—ʻi he taʻetokanga pe ko e loto-lelei pē ki ai.—PRESSEPORTAL, SIAMANE.
“Ko e meimei toko taha ʻi he toko 10 ʻo e kau ʻAmeliká [taʻu 12 pe lahi ange] ʻoku līpooti ki hono ngāueʻaki maʻu pē ʻa e ngaahi faitoʻo kona tapu taʻefakalaó, kau ai ʻa e maliuaná, kōkeiní, heloiní, ngaahi faitoʻo fakatupu ongo-halá, ngaahi faitoʻo kona tapu ʻoku mihi pe maʻu mei he kēmisí ʻo ngāueʻaki ʻi he fakafiefiá.”—USA TODAY, ʻAMELIKA.
Ko e Mapuleʻi-Kitá ʻa e Kī ki he Tuʻumaʻú
“ʻOku pehē ʻe he fakatotoló ko e ʻikai ha mapuleʻi-kita lolotonga ʻa e kei talavoú ʻoku tomuʻa tala ai ʻa e mahamahaki, siʻi ʻa e tuʻumaʻu fakapaʻangá mo ha lēkooti ʻo e faihia ʻi he fuʻu lahí,” ko e lau ia ʻa e Time. Laka hake he kakai ʻe toko 1,000 naʻe fai e fakatotolo mei honau fanauʻí ʻo aʻu ki heʻenau taʻu 32. ʻI heʻenau fuʻu lahí, “ko e faʻahinga ko ia [ʻi he tuʻunga ko e fānaú] naʻa nau loto-ʻoho lahi ange mo ongoʻi feifeitamaki vave ange pea faingataʻaʻia lahi taha ʻi hono toloiʻi ʻa hono fakatōliʻa ʻo ʻenau fiemaʻú pe tatali ki honau taimí” ngalingali ʻoku liunga tolu nai ʻa e līpooti ʻoku nau mahamahaki, siʻi ʻenau paʻanga hū maí, hoko ko e ngaahi mātuʻa taʻehoa, pe fakahoko ha hia. Neongo ia, “ko e mapuleʻi-kitá ʻe lava ke ako,” ko e lau ia ʻa e makasiní, pea hoko atu: “Ko e kau mai ki ai ʻa e akó mo e fāmilí ʻa ia ʻoku akoʻi ai ʻa e kau leká ke nau mapuleʻi kinautolu mei he kei siʻí ʻo faai mai aí ʻe iku nai ia ki he moʻui lelei ange pea hoko ko e kakai lalahi tuʻumaʻu ange.”
Akoʻi ha Lēsoni ki he Kau Fakaʻuli Koví
Ko e kau maʻu mafai ʻi ʻInitiá ʻoku nau ʻahiʻahiʻi ha ngaahi founga foʻou ke fakafeangaiʻaki ki he kau maumau-lao kovi taha ʻi he fefonongaʻakí ʻaki hono ʻai kinautolu ke nau ngāue ko e kau polisi ki he fefonongaʻakí. Ko e taumuʻá ke tokoniʻi ʻa e kau fakaʻulí ke nau mahinoʻi ʻa e ʻuhinga ke ngāue ai ki he faʻahinga palopalema ʻoku nau fakatupungá. Pea ʻi he ʻikai ke taʻofi pē ʻa e kau maumau-laó ʻo fakaʻilo kinautolú, ko e kau polisi ʻi Gurgaon ʻi he tokelau-hihifo ʻo ʻInitiá, ʻoku nau toe fiemaʻu ʻa e kau fakaʻulí ke nau kau ki he kau polisí ʻi ha haafe houa pe lahi ange ke fakahinohino ʻa e fefonongaʻakí. ʻOku fakahaaʻi ʻe he kau fakaʻuli ʻe niʻihi kuo liliu ʻe he lēsoní ʻa ʻenau fakakaukaú. “ʻOku mau fai ha [fakaʻilo] ʻe taha afe ki he ngaahi maumau-lao ʻi Gurgaon ʻi he ʻaho kotoa pē,” ko e lau ia ʻa Bharti Arora, ko e komisiona tokoni fakalotofonua ʻo e kau polisí. “ʻOku lava ke mau maʻu ʻa e ‘kau polisi’ lahi ange ʻe toko 1,000 ʻi he ʻaho kotoa pē.”