Puha Fehuʻi
◼ Ko e hā ʻa e tokanga ʻoku totonu ke fai ki he ngaahi nāunau ʻoku tau ngāueʻaki ʻi he ngāue fakamalangá?
1 Neongo ʻokú ne maʻu ha malanga Fakatohitapu feʻunga ʻi hono ʻatamaí, ko ha tokotaha malanga ʻo e ongoongo leleí ʻe hoko nai ʻo ʻikai ke teuteu lelei ʻi he aʻu mai ki he nāunau ʻokú ne ngāueʻakí. ʻI he taimi ʻokú ne ʻi he matapā aí, ʻoku ʻikai nai ke ne maʻu ʻa e ngaahi tohi ʻoku lolotonga tuʻuakí. Ko e ngaahi makasini, ngaahi polosiua, pea mo e ngaahi tuleki ʻi heʻene kato malangá ʻoku mingimingi nai pe mahaehae. ʻOku ʻikai nai te ne maʻu ha peni-vahevahe pe ko ha lekooti fale-ki-he-fale koeʻuhi ko e ʻikai ke faʻo maau ʻene kató. ʻOku mātuʻaki mahuʻinga ke fai ha tokanga lelei ki hoʻo ngaahi nāunaú ki muʻa pea ke toki kau ki he ngāue fakamalanga.
2 Ko e hā ʻa e ngaahi meʻa ʻoku faʻo ʻi he kato malanga ʻoku teuteu leleí? ʻOku fiemaʻu tefito ha Tohi Tapu. ʻOku kau atu ki ai mo ha ngaahi lekooti fale-ki-he-fale. Ke fakapapauʻi ʻokú ke maʻu ʻa e ngaahi tohi ʻa ia ʻoku tuʻuaki ki he māhiná. ʻOku toe fiemaʻu foki mo e ngaahi tatau lolotonga ʻo e ngaahi makasiní, mo e ngaahi tulekí mo e ngaahi polosiuá. ʻAve foki mo ha tatau ʻo e tohi Reasoning. Ko hono maʻu ʻa e tatau fakamuimui taha ʻo e Ko ʻEtau Ngāue Fakafaifekau ʻo e Puleʻanga ʻe lava ai ke ke toe vakai ki he ngaahi tuʻuaki kuo fokotuʻu aí ki muʻa ke ke ʻalu ki he matapaá. ʻI hono ngāueʻi ʻa e kauhalá ʻokú ke faʻa fetaulaki ai mo e kakai ʻoku lea ʻi ha lea mulí, ʻe lelei nai ke maʻu ʻa e kiʻi tohi ko e Good News for All Nations. ʻI hono maʻu ha taha ʻo ʻetau ngaahi tohi kuo pulusi fekauʻaki mo e faʻahinga kei talavoú ʻe tokoni ia kiate koe ke mateuteu ke lea ki he faʻahinga ʻoku nau ʻi he taʻu 13 ki he 19.
3 Ko e meʻa kotoa ʻoku ngāueʻakí kuo pau ke faʻo maau ia ʻi hoʻo kató. ʻOku ʻikai ke ʻuhinga ia ke maʻu ha kato foʻou, ka ʻoku totonu ke maʻa pea ʻi he tuʻunga lelei. Ko hoʻo kato malangá ko e konga ia ʻo hoʻo ngaahi nāunau ke ngāueʻaki ʻi hono talaki atu ʻa e ongoongo leleí. Tauhi ia ʻi he tuʻunga lelei.