Tokoniʻi ʻa e Niʻihi Kehé ke Houngaʻia ʻi he Mahuʻinga ʻo e Tohitapú
1 Naʻe tokonaki ʻe Sīsū ʻa e meʻa ko ia naʻe fiemaʻu ki heʻene kau ākongá. ʻOku fakamatala ʻi he Luke 24:45: “Pea ne toki tatala honau loto ke nau ʻilo hono ʻuhinga ʻo e Tohitapu.” Naʻá ne ʻiloʻi kapau naʻa nau fiemaʻu ʻa e hōifua ʻa ʻene Tamaí, naʻe fiemaʻu kiate kinautolu ke ako mo maʻu ʻa e mahino ki he Folofola ʻa e ʻOtuá, ko e Tohitapú. (Sāme 1:1, 2) Ko ʻetau ngāue fakamalangá ʻoku taumuʻa tatau pē. Ko ʻetau koló ke kamata ha ngaahi ako Tohitapu, ʻa ia ʻe lava ke tau ‘akoʻi kinautolu ke tauhi ʻa e ngaahi meʻa kotoa pē naʻe tuʻutuʻuni ʻe Sīsuú.’ (Mt. 28:20) ʻI hono maʻu ʻeni ʻi he fakakaukaú, ko ha ngaahi fokotuʻu ʻeni ki ha meʻa ʻe tokoni nai ʻi hoʻo fai ʻa e ngaahi toe ʻaʻahí.
2 Kapau naʻá ke ʻuluaki fetalanoaʻaki ʻi he tohi “Fāʻūtaha ʻi he Lotu ki he ʻOtua Moʻoni Pē Taha” te ke hoko atu nai ʻa hoʻo fetalanoaʻakí ʻi he founga ko ʻení:
◼ “ʻOku ou saiʻia ke fakahā atu kiate koe ha toe meʻa kehe ʻokú ne fakatātaaʻi ʻa e ʻaonga mo e mahuʻinga ʻo e akonaki ʻa e Tohitapú. ʻOku ʻilo ʻe he kakai tokolahi ʻoku faingataʻa ke feangainga lelei mo e niʻihi kehé. Ko e hā ʻoku lava ke tau fai kae fakatupu ha vā lelei ange mo kinautolu ʻoku takatakai ʻiate kitautolú? [Hili ha tali, huke ki he peesi 134-137, palakalafi 6, 7 pea lau ʻa e Loma 12:17-21. Tānaki atu mo e ngaahi fakakaukau ʻoku fakahā ʻi he palakalafi 9.] Ko e fakatātā ia ʻe taha ʻo e poto ʻoku maʻu ʻi he akonaki ʻa e Tohitapú. ʻI heʻeku toe ʻaʻahi mai hono hokó, te u saiʻia ke fakahā kiate koe ʻa e fakahinohino ʻoku ʻomai ʻi he Tohitapú ke tokoni ki he ongo meʻa malí ke na maʻu ʻa e fiefia lahi ange ʻi heʻena feangaingá.” Fai ha ngaahi fokotuʻutuʻu ke toe foki ʻo fetalanoaʻaki ʻi he vahe 18, ʻa ia ʻoku fakahā ai ʻa e ngaahi fakamatala ʻi he Tohitapú ki he fāmili moʻui fiefiá.
3 Kapau naʻá ke lea ki ha tokotaha naʻe hā mei ai ha mahuʻingaʻia ʻi he Tohitapú, ko e lea kamata ko ʻení ʻe ola lelei nai ia ʻi hono kamata ʻo ha ako:
◼ “ʻOku meimei ko kinautolu hono kotoa kuó ke talanoa ki aí te nau tala atu kiate koe ʻoku nau saiʻia ke maʻu ha māmani melino mo malu ke nau nofo ai. Kapau ko e meʻa ia ʻoku fiemaʻu ʻe he tokotaha kotoa pē, ko e hā ʻoku tau maʻu ai ha māmani kuo fonu ʻi he māveuveu lahi mo e fakamālohí? [Tuku ke ne tali.] ʻOku lava ke ʻomai ʻe he Tohitapú kiate kitautolu ʻa e tali ki he fehuʻi ko iá.” Sio ki he Ngaahi Tuʻunga Lea Faka-Tohitapu Ke Fetalanoaʻaki Ai Fika 1F, “Ko e taha ʻokú ne fakatupunga ʻa e mamahi ʻa e māmaní.” Lau 2 Kolinitō 4:4. Fakamatala ki he founga ʻe fakaʻauha ai ʻe he ʻOtuá ʻa e Tēvoló pea ʻe hoko ai ha māmani ʻo e melino mo e fiefia ʻoku tolongá. Lau ʻa e Fakahā 21:3, 4. ʻE lava ke ke pehē leva: “ʻI heʻeku toe ʻaʻahi maí, te u saiʻia ke fakahā kiate koe ha ngaahi konga Tohitapu ʻoku nau fakamatala ki he ʻuhinga ʻoku lava ai ke ke hanga atu ki ha māmani ʻe ʻikai ke ʻi ai ha faingataʻaʻiá.”
4 Kapau naʻá ke ngāueʻaki ʻa e fakaafeʻi fakahangatonu ke kamata ha akó pea naʻe tali lelei, te ke leaʻaki nai ʻeni ʻi hoʻo toe fokí:
◼ “ʻI heʻeta talanoa ki muʻá, naʻá ta fetalanoaʻaki ai ki ha ngaahi ʻuhinga ʻoku ʻaonga ai ke ako ʻa e Tohitapú. Ko ha feinga loto-moʻoni ke fai ʻo lahi ange ʻa e meʻá ni ʻoku lava ke tokoni ia kiate kitautolu ke houngaʻia ʻi he meʻa ʻoku tauhi mai ʻe he ʻOtuá kiate kitautolú. [Lau Sione 17:3.] Kuo mau fai ha polokalama ako Tohitapu kuó ne tokoniʻi ʻa e laui afe ke ako ʻo lahi ange ʻo fekauʻaki mo e meʻa kuo talaʻofa ʻe he ʻOtuá, pea mo e founga te tau fakahōifua ai kiate iá.” Fakaʻaliʻali ʻa e tohi Fāʻūtaha ʻi he Lotu pe Moʻui Taʻengata, toe fakamatala ki he kaveinga ʻo e vahé, pea fakatātaaʻi ʻa e anga ʻo ʻetau fai ʻa e ako Tohitapú.
5 Kapau te ke lava ʻo tokoni ki he faʻahinga loto-moʻoní ke nau houngaʻia ʻi he mahuʻinga mahulu ange ʻo e Folofola ʻa e ʻOtuá, kuó ke tokoniʻi kinautolu ʻi he founga lelei taha ʻoku malavá. Ko e poto ʻoku lava ke nau ako mei hono ngaahi peesí, ʻe lava ke hangē ia “ko e ʻakau-ʻo e-moʻui,” ʻa ia te ne ʻomai kiate kinautolu ʻa e fiefia lahi.—Pal. 3:18.