Mintsika je eskaksïni Tata Diosï Jeoba jaiapanhentasïnga

1. ¿Ambeksï úpirini eratseni máru Tata Diosï Jeobaeri marhuariicha?

¡XÁNI enga sésiika míteni eska “Tata Diosï Jeoba kánikua sési pʼikuarherasïnga imeeri iretani jimbo”! (Sal. 149:4). Joperuksï máru uaati desanimarikuarhini ka eratseni: “Ísïisti eska Tata Diosï Jeoba sési pʼikuarherasïnga imeeri iretani jimbo, joperu ¿sési pʼikuarherajki jíndeni jingoni?”. Ióntki jarhasptiksï uánikua Tata Diosïiri marhuariicha engaksï ménisï niárapka úkua jukanchani jakajkuni eska Tata Diosï Jeoba jaiapanhentasïreenga (1 Sam. 1:​6-10; Job 29:​2, 4; Sal. 51:11).

2. ¿Ambechi jatsiski para úni parajtsïni Tata Diosï Jeoba jaiapanhentani?

² Biblia arhisïndi eskajtsïni Tata Diosï Jeoba uaaka jaiapanhentani nájkirukachi no perfektueka. Parajtsïni ima jaiapanhentani, ¿ambechi jatsiski para úni? Jatsiskachi para xarhatani eskachi mintsikasïnga tata Jesukristuni ka ístuchi jatsiska para itsï atakuarhini (Juanu 3:16). Engachi itsï atakuarhijka xarhatasïngachi iáminduechani japarini eskachi móantaskia ka eskachi aiakuskia Tata Diosïni eskachi uaaka ambe enga ima uéjka (Úku. 2:38; 3:19). Ka Tata Diosï Jeoba kánikua sési pʼikuarherasïndi enga exejka eskachi úsïnga ambe engajtsïni ima kurachijka parachi imeeri amigueni. Engachi jucha jánguarhintajka úni ambe engachi aiakukia, Tata Diosï Jeobajtsïni jaiapanhentasïndi ka ísïjtsïni exesïndi eska imeeri amiguecha (Sal. 25:14).

3. ¿Náki kurhamarhikuechanchi mókuantaua ini jorhenguarhikua jimbo?

³ ¿Andisïksï máru eratsejki eska Tata Diosï Jeoba no jaiapanheantasïnga? ¿Nénajtsïni xarhatachesïni eska sési pʼikuarherasïnga juchantsïni jingoni? ¿Ka ambejtsïni jarhuata seguru jarhani eskajtsïni jaiapanhentasïnga?

ANDISÏKSÏ MÁRU ERATSEJKI ESKA TATA DIOSÏ JEOBA NO JAIAPANHEANTASÏNGA

4, 5. Nájkirukachi ménisï ísï pʼikuarheraaka enajkichi no jukaparhakue, ¿ambeerichi uaa seguru jarhani?

⁴ Desde engachi sapiijka uánikuechachi ísï pʼikuarherasïnga enajkichi no jukaparhakue (Sal. 88:15). Erachi ma enga Adriáni arhinhajka uandantasïndi: “Méntkisï eratseska eskani no sáni jukaparhakueska. Engani sapichuepka miásïnga eskani arhisïreenga Tata Diosï Jeobani eska jurajkupiringa juchiiti familiani Paraisurhu irekani, joperuni ji ísï pʼikuarherasïreenga eskani no jukanchaspka jima jarhani”. Ka Tony uandantasïndi na engaksï tʼarhexerapka taati jémbeecha engaksï no Testiguepka, uandasïndi: “Nójtsïni méni arhispti eskaksï sési pʼikuarherasïreenga jíndeni jimbo níjtujtsïni méni arhipi eskajtsïni xénchasïreenga. Méntkisïjtsïni ísï pʼikuastasïreendi enajkini ji no méni úpirini úni imani ambe engaksï imeecha uékeenga”.

⁵ Engachi ménisï ísï pʼikuarherani jauaka enajkichi no jukaparhakue, ju je miáni eskajtsïni Tata Diosï Jeobasï juaka imeeri ireta jimbo (Juanu 6:44). Ka nájkirukachi jucha no exejka eskachi ambakiti kualidadichani jatsiaska ka eskachi ambakiti kʼuiripu máeska, Tata Diosï Jeoba kʼóru exesïndi indeni ambe (1 Sam. 16:7; 2 Crón. 6:30). Ísï jimbo, enga ima uandajka eskachi ambakiti kʼuiripuecheska, ju je jakajkuni (1 Juanu 3:​19, 20).

6. ¿Néna pʼikuarherasïreeni Pablu enga miánteenga ambe enga no sési úpka?

⁶ Jamberichi máru útasï no sési pʼikuarherajka imani ambe jimbo engachi ióntki úpka ante dechi míteni jurhimbikuani (1 Ped. 4:3). Ka máteruechaksï jamberi ióni páni jatiia sési marhuakuni Tata Diosï Jeobani, joperuksï útasï úkua jukanchani jarhani imani ambe jurajkuni enga no sési jaka. ¿Ka tʼujtu ménisï niáraski ísï pʼikuarherani enajkikini Tata Diosï no méni puáchentaa? Enga ísïika, kánikuaksïni uinhaperantaati míteni eskaksï máru Tata Diosï Jeobaeri marhuariicha májkueni pʼikuarheraspka. Pori ejemplu, apostoli Pablu kánikua no sési pʼikuarherasïreendi enga miánteenga ambe enga no sési úpka (Rom. 7:24). Nájkiruka móantapkia ka itsï atakuarhini, ima útasï ísï pʼikuarherasïreendi eska ima ‘sánderu sapichuespka iámindu apostoliichani jingoni’ ka eska “ima sánderu” pekadoriispka (1 Kor. 15:9; 1 Tim. 1:15).

7. ¿Ambeerichi uaa seguru jarhani engachi móantaska?

⁷ Juchaari Taati auandarhu anapu aiachisïndijtsïni eskajtsïni puáchentaaka engachi móantaska (Sal. 86:5). Ísï jimbo, engachi jucha mintsita jingoni móantaska uaakachi seguru jarhani eskajtsïni ima puáchentaskia ka nóchi eratseni jarhani eska ima no uaaka ambe engajtsïni aiachikia (Kol. 2:13).

8, 9. ¿Ambejtsïni jarhuataa parachi no eratseni eska Tata Diosï Jeoba no jukaparharasïnga ambe engachi újka imani jimbo?

⁸ Iáminduechachi uékasïnga Tata Diosï Jeobani imani ambe íntskuni enga sánderu ambakiti ambeeka. Joperu máruksï ísï pʼikuarherajti eska jukari sánititu ambeeska engaksï újka ka eska inde ambe no jarhuatauaka paraka Tata Diosï Jeoba jaiapanhentauaka. Pirenchi ma enga Amanda arhinhajka uandasïndi: “Ji eratsesïnga eskani jatsiska para méntkisï sánderu jánguarhintani jarhani parani ambakiti ambe íntskuni Tata Diosï Jeobani. Ísï jimbo, ménisï niárasïnga jukari jamberi uékani úni ambe ma. Ka engani, ‘no ísï újka’, niárasïnga kánikua no sési pʼikuarherani ka eratsesïnga eska Tata Diosï Jeobajtu májkueni no sési pʼikuarherasïnga”.

⁹ ¿Ambejtsïni jarhuataa parachi no eratseni eska Tata Diosï Jeoba no jukaparharasïnga ambe engachi újka imani jimbo? Miáni eskajtsïni ima kurhanguchisïnga, ka eska no nemani uinhamarhikusïnga ka ístu eskajtsïni no méni jukari ambe kurhacheaka. Tata Diosï Jeoba kánikua jukaparharasïndi imani ambe engachi jucha jánguarhintajka úni, nájkiruka sánititu ambeuaka o kánikua ambeni. Pori ejemplu, ju je eratseantani Tata Diosï Jeobaeri marhuariichani engaksï ióntki iámindu mintsita jingoni marhuakupka. Komu, apostoli Pablu kánikua jánguarhintaspti ka iauanisï nirasïreendi aianhpini ka uánikua kúnguarhikuechani uaxastaaspti. Joperu niáraspti ima tiempu enga nóteru májkueniipkia ka ima nóteru úsïreendia ísï aianhpini eska antesi. ¿No sési pʼikuarheraspi Tata Diosï Jeoba? Nómbe. Nájkiruka Pablu sánititu ambeterku ueengia Tata Diosï Jeoba seguirixapti újchakurani (Úku. 28:​30, 31). Ka májkueniisti juchantsïni jingoni, nóchi méntkisï uaaka májkueni ambe úni parachi Tata Diosï Jeobani marhuakuni, ka ambe enga sánderu jukaparharajka Tata Diosï Jeoba no jindeesti na engachi xáni marhuakujka sino andichisï ísï újki. Joperu ístu ju je exeni máru ambe enga Tata Diosï Jeoba xarhatajka eska sési pʼikuarherasïnga juchantsïni jingoni.

NÉNA XARHATASÏNI TATA DIOSÏ JEOBA ESKA SÉSI PʼIKUARHERASÏNGA JUCHANTSÏNI JINGONI

10. ¿Nénajtsïni xarhatachesïni Tata Diosï Jeoba eska sési pʼikuarherasïnga juchantsïni jimbo? (Juanu 16:27).

¹⁰ Bibliani jimbo. Tata Diosï Jeoba kánikua tsitisïndi xarhatakuani imeeri marhuariichani eska xénchaasïnga ka eska jaiapanheantasïnga. Bibliarhu tsimani xanhari uandantasïndi na enga Tata Diosï arhipka Jesúsini eska imeeri uájpeespka ka eska xénchasïreenga ka ístu eska jaiapanhentasïreenga (Mat. 3:17; 17:5). ¿Nénajtsï pʼikuarherapirini engaksïni Tata Diosï Jeoba arhipiringa eska ima sési pʼikuarherasïnga chánksïni jingoni? Míteskachi eskajtsïni no auandarhu uératini uandajpasïnga, sino imeeri Karakata jimbo. Engachi arhintajka ambe enga Jesúsi arhiapka imeeri chúxapatiichani xénchperakua jingoni, ísïchi pʼikuarherasïnga enajkijtsïni Tata Diosï Jeoba juchantsïni arhini jaki (arhinta je Juanu 16:27). Jesúsi xarhataspti eska meru ísïiska eska Taati jémba. Ísï jimbo, engachi arhintajka na enga Jesúsi arhiapka imeeri chúxapatiichani eska xénchaasïreenga nájkirukaksï no perfektuepka, úsïngachi eranhaskani eskajtsïni Tata Diosï Jeoba májkueni arhixaka juchantsïni (Juanu 15:​9, 15).

11. Engachi no sési ambe nitamakuarhini jauaka, ¿andichisï no jatsi para eratseni eskajtsïni Tata Diosï nóteru jaiapanhentasïngia? (Santiagu 1:12).

¹¹ Íntskusïndijtsïni ambe engachi uétarhinchajka. Tata Diosï Jeoba uékasïndijtsïni jarhuatani, jimbojtsïnisï íntskujti ambe engachi uétarhinchajka. Joperu ménisï jurajkusïndi eskachi no sési nitamakuarhiaka, ísï eska na úkuarhinchapka Jobu (Job 1:​8-11). Joperu engachi no sési ambe nitamakuarhini jauaka nóchi jatsiska para eratseni eskajtsïni Tata Diosï nóteru jaiapanhentasïngia, sánderu sési jiánchisï jatsika para xarhatakuni eskachi kánikua xénchasïnga ka eskachi mintsikasïnga (arhinta je Santiagu 1:12). Ka engachi no sési nitamakuarhini jauaka uaakachi exeni eska ima juchantsïni jingoni jarhaska ka eskajtsïni xénchasïnga ka inde ambejtsïni jarhuataati parachi tekaantani.

12. ¿Ambejtsïni jorhendasïni Dimitriri eksperiensia?

¹² Ju je exeni ambe enga nitamakuarhipka Asia anapu erachi ma enga Dimitri arhinhajka. Nóteru jatsisptia ánchikuarhita. Ka nitamasptiksïa máru mesiicha ka ima útasï no jatsispti ánchikuarhita ma, tátsekua ueenaspti sánderu uérani aianhpini para xarhatakuni Tata Diosï Jeobani eska mintsikasïreenga. Joperu sánderu ióniisptia ka ima útasï no jatsispti ánchikuarhita. Tátsekua, ueenaspti uinhamu pʼamenchani ka nóteru úsïreendia jauarani. Ístu, ueenaspti eratseni eska nóteru sési kuidariuaxapkia uájpeechani ka nijtu témbani, ka eska indeni ambe jimbo Tata Diosï Jeoba nóteru jaiapanhentaxapkia. Joperu ma xanhari enga na chúripkia, imeeri nanaka sapichu imprimiriispti ambe enga arhijka Isaías 30:15: “Chájtsï uinhapiti jauaka engajtsï no sáni chéska ka engajtsï mintsinharhikua xarhataska”. Tátsekua, íntskuspti ka arhispti: “Pa, engari komu pʼikuarherani jauaka miá ambe enga i tekstu arhijka”. Dimitri kuenta íntskukuarhespti eska Tata Jeoba jarhuataxapka jimboka imeeri familia jatsispka xukuparhakua, t’irekua ka kʼumanchikua ma. Ima uandantasïndi: “Ambe engani ji jatsipka parani úni, jindeespti eskani no jatsispka para chéni ka seguiriini jarhani mintsikani Tata Diosïni”. Enga chá májkueni nitamakuarhini jaka, uaakajtsï seguru jarhani eska Tata Diosï Jeoba pendienti jarhaska chánksïni jimbo ka eskaksïni íntskuaka uinhapikua paraka chá uaaka tekaantani.

13. ¿Máteru ambe úrasïni Tata Diosï Jeoba parajtsïni xarhatacheni eskajtsïni jaiapanhentasïnga?

¹³ Úraasïndi erachiichani. Tata Diosï Jeoba imeeri marhuariichani úraasïndi parajtsïni ambakiti ambe arhini jiáni engachi sánderu uétarhinchani jarhajka. Indeni ambesï nitamakuarhipti pirenchi ma. Ima nóteru jatsisptia ánchikuarhita ka ístu uinhamu pʼamenchaspti. Tátsekua, uámba k’éri pekadu ma úspti ka nóteru orhejtsïkutisptia. Xáni k’éri problema máespti enga pirenchi uandapka: “No kurhangusïreenga andisïni indeni ambe nitamakuarhini japi. Eratsesïreenga eskani no sési ambe niátaspka ka eskarini Tata Diosï Jeoba nóteru jaiapanhentasïreengia”. Ka kurhakuspti Tata Diosïni eska xarhatakupiringa eska seguiriixapka xénchani ka ima mókukuntaspti. Pirenchi uandantasïndi: “Orhejtsïkutiichaksï uandontskuarhespti jíndeni jingoni ka jarhuatasptijtsïni exeni eskarini Tata Diosï Jeoba seguirixapka xénchani”. Ísï tátsekua ménderu pirenchi kómarhispti Tata Diosï Jeobani eska jarhuatapiringa. ¿Ambe úkuarhispi? Pirenchi uandantasïndi: “Indeni mismu jurhiatikua engani kómarhipka Tata Diosïni, uánikua erachiichajtsïni sési járhati kartechani karachiaspti. Engani arhiantapka, pʼikuarheraspka eskarini Tata Diosï Jeoba meru kurhajchaspka”. Ini eksperiensia jingoni exeskachi eska engajtsïni máteruecha sési jásï ambe arhijka, jindeeska jimbokajtsïni Tata Diosï Jeoba seguiriixaka jaiapanhentani (Sal. 10:17).

14. ¿Ístu Tata Diosï Jeoba néna úraasïni erachiichani parajtsïni xarhatacheni eskajtsïni seguiriixaka jaiapanhentani?

¹⁴ Engajtsïni juchaari erachiicha niáraska konseju ma íntskuni jimbokachi uétarhinchaxapka jindeesti jimbokajtsïni Tata Diosï Jeoba seguiriixaka jaiapanhentani. Pori ejemplu, primeru siglurhu, úraspti apostoli Pabluni para 14 karteechani karakuani kristianuechani, indeni karteecha jimbo apostoli Pablu xénchperakua jingoni arhiaspti ambe engaksï jatsipka para úni ka ambeksï no jatsispi para úni. ¿Andisï Tata Diosï Jeoba jurajkupi eska Pablu indeni konsejuechani íntspiapiringa? Jimboka Tata Diosï Jeoba jurhimberantasïnga imeechani enga xénchajka, “ísï eska taati na újka imeeri uájpa jingoni” (Prov. 3:​11, 12). Ísï jimbo, engajtsïni nema konseju ma íntskuska Bibliani úraparini, ju je no eratseni eskajtsïni Tata Diosï nóteru jaiapanhentasïngia. Sánderu sési inde ambe arhikuekasïndi eskajtsïni ima seguiriixaka xénchani (Ebr. 12:6). ¿Ka máteru ambe jarhaski enga xarhatajka eskajtsïni Tata Diosï Jeoba seguiriixaka jaiapanhentani?

MÁTERU AMBE ENGAJTSÏNI XARHATACHEJKA ESKAJTSÏNI TATA DIOSÏ JEOBA JAIAPANHINTASÏNGA

15. ¿Neechani íntsaasïni Tata Diosï Jeoba imeeri espiritu santu, ka ambeerichi uaa seguru jarhani?

¹⁵ Tata Diosï Jeoba íntskuasïndi espiritu santu imeechani enga ima jaiapanheantajka (Mat. 12:18). Jiájkani, úpiringachi kurhamarhikuarhini: “¿Xarhatasïni ji imani kualidadichani engajtsïni espiritu santu jarhuatajka xarhatani?”. Pori ejemplu, ¿iásïjtsï sánderu tekaantasïnia eska ante de míteni Tata Diosï Jeobani? Engajtsï chá exejka eskaksïni espiritu santu jarhuataxaka indeni kualidadichani xarhatani, uaakajtsï seguru jarhani eska Tata Diosï Jeoba sési pʼikuarherasïnga chánksïni jingoni. (Exe je rekuadruni “Espiritu santu úsïndi eska ma arini ambe xarhataaka”).

16. Eska na uandajka 1 Tesalónika 2:​4, ¿Tata Diosï Jeoba neechani úraasïni paraksï aianhpini ambakiti aianhperakuani, ka nénaksïni pʼikuastasïni inde ambe?

¹⁶ Imani kʼuiripuechani enga Tata Diosï Jeoba jaiapanheantajka imeechani arhiasïndi eskaksï aianhpiaka ambakiti aianhperakuani (arhinta je 1 Tesalónika 2:4). Ka pirenchi ma enga Jocelyn arhinhajka uandaspti eska inde ambe ísïiska. Ma jurhiatikua ima no káni sési pʼikuarheraxapti. Uandantasïndi: “Xáni no sési pʼikuarheraxapka, engani ísï pʼikuarhereenga enajkini nóteru ma ambe úpirinia úni. Joperu prekursorespka ka ima jurhiatikua aianhpini uérapiringa. Ísï jimbo kómarhispka Tata Diosï Jeobani ka niraspka aianhpini”. Imani tsípa, Jocelyn uandontskuarhespti Mary jingoni, uarhiiti ma enga uékapka jorhenguarhini Biblieri ambe. Ísï sáni ióni jimbo, Mary aianguspti Jocelynini: “Jiáni engari ueenapka jurhani, ji kómarhixapka Tata Diosïni parakarini ima jarhuatapiringa”. ¿Néna pʼikuarheraspi Jocelyn indeni ambe míteparini? Ima uandantasïndi: “Ísï pʼikuarheraspka enajkirini Tata Diosï Jeoba arhini japi: ‘Jíkeni jaiapanhentasïnga’”. Ísïisti, nájkirukaksï no iámindu kʼuiripuecha kurhauaka ambe engachi jucha aianhpijka, uaakachi seguru jarhani eska Tata Diosï Jeoba kánikua sési pʼikuarherasïnga engajtsïni exejka na engachi xáni jánguarhintajka aianguani kʼuiripuechani ambakiti aianhperakuani.

17. ¿Ambeksïni jorhendasïni ambe enga Vicky uandajka tata Jesukristueri uarhikueri ambe? (Salmo 5:12).

¹⁷ Euajpintskua jimbo Tata Diosï Jeoba puákuantasïndi pekaduechani imani kʼuiripuechani enga ima jaiapanheantajka (1 Tim. 2:​5, 6). Ísïisti, juchachi mintsikasïngia euajpintskuani ka itsï atakuarhiskachia, joperuchi ménisï úkua jukanchasïnga jakajkuni eskajtsïni Tata Diosï Jeoba jaiapanhentasïnga. ¿Ambechi uaa úni? Ju je miáni eskachi no jatsiska para méntkisï kasu úkuni na engajtsïni pʼikuastani jarhajka juchaari mintsita, joperu kʼóruchi jatsiska para mintsikani Tata Diosï Jeobani. Para ima, ima kʼuiripuecha engaksï mintsikajka euajpintskuani sésiksï pʼikuastasïndi ka uandasïndi eska újchakurauaka (arhinta je Salmo 5:12; Rom. 3:26). Pirenchi ma enga Vicky arhinhajka eratsentaspti tata Jesukristueri uarhikuani ka inde ambe kánikua jarhuataspti. Nájkiruka no xáni jakajkuenga eska Tata Diosï Jeoba xénchasïreenga niáraspti ini ambe eratseni: “Tata Diosï Jeobareni ióni tekaachintaspti [...]. Nájkirukani ji antesi ísï eratseenga eskani ‘no jukanchaspka parareni xénchani. Ka eskarini no úpiringa puáchentani juchiiti pekaduechani imeeri Uájpeeri uarhikua jimbo’”. Engachi juchajtu eratsentaska Jesúsiiri uarhikuani ísï eska Vicky na úpka, niáraakachi pʼikuarherani na engajtsïni xénchajka Tata Diosï Jeoba ka seguruchi jauaka eskajtsïni ima jaiapanhentasïnga.

18. ¿Ambeerichi uaa seguru jarhani engachi méntkisï xénchaska juchaari Taati auandarhu anapuni?

¹⁸ Nájkirukachi jánguarhintaaka ísï úni eskachi na jorhenguarhikia, ménisï jauati engachi no sési pʼikuarheraaka ka niáranchi kurhamarhikuarhini sintsïni Tata Diosï Jeoba seguirixaki jaiapanhentani. Engachi niáraska ísï pʼikuarherani ju je miáni eska Tata Diosï Jeoba xénchaasïnga “imeechani engaksï seguiriini jaka xénchani imani” (Sant. 1:12). Ísï jimbo, seguirii je andarhierani Tata Diosï Jeobani ka jánguarhinta je exeni na engaksïni xarhatacheni jaka eska ima sési pʼikuarherasïnga chánksïni jimbo. Ka asï méni mirikurhi je eska Tata Diosï Jeoba “no iauani jarhaska juchantsïni jingoni” (Úku. 17:27).