“Ke ‵Mautakitaki Koutou, sa Gasue‵sue”

1-2. I te auala fea e fakatusa ei se Kelisiano ki se fale maluga ‵ki? (1 Kolinito 15:58)

I TE fakaotiotiga o tausaga mai te 1970 o vau, ne faite i ei se fale maluga e 60 ana fata i Tokyo, Tiapani. Ne mafau‵fau a tino me ka mafai pefea o tu ‵mautakitaki ona ko te uke o mafuie e ‵poko sāle i te fakai tenā. Se a te mea ‵funa e uiga ki ei? Ne faite ne initinia a te fale maluga tenā ke ‵mautakitaki, ke mafai o gasuesue kae sē maofa māfai ko ‵poko a mafuie. E fai eiloa a Kelisiano e pelā mo te fale maluga tenā. I te auala fea?

² E ‵tau o fakatumau ne se Kelisiano a tena paleni ‵lei mai te ‵mautakitaki kae uiga faigofie. E ‵tau mo ia o ‵mautakitaki kae se gasuesue māfai ko fakaiku aka ke fakalogo a ia ki tulafono mo tulaga o Ieova. (Faitau te 1 Kolinito 15:58.) A ia e “toka o fakalogo” kae e se gutugutulua. I te suā feitu, e manakogina ke “loto malamalama,” io me uiga faigofie a ia, māfai e manakogina ke fai penā. (Iako. 3:17) A te Kelisiano telā ne tauloto ke maua ne ia te kilokiloga paleni tenei ka kalo kea‵tea mai te uiga faigata io me manatu māmā. I te mataupu tenei, ka sau‵tala tatou ki auala ke fai ei ke se gasue‵sue tatou. Ka onoono foki tatou ki auala e lima e fakaaoga ne Satani ke fakaseaoga ‵tou fakaikuga kae tauloto ki auala ke ‵teke ki ana taumafaiga.

E MAFAI PEFEA O ‵MAUTAKITAKI TATOU?

3. Ne a tulafono ne tuku mai ne te Tino Fai Tulafono Sili telā e maua ne tatou i te Galuega 15:28, 29?

³ E pelā me ko te Tino Fai Tulafono Sili, ne tuku mai faeloa ne Ieova a tulafono ma‵nino ki ana tino. (Isa. 33:22) E pelā mo te potukau pule i te senitenali muamua, ne fakasae aka ne latou a auala e tolu e ‵tau ei mo Kelisiano o tumau i te ‵mautakitaki: (1) mai te ‵teke ki te ifo ki tupua kae tapuaki atu fua ki a Ieova, (2) mai te āva ki te ‵malu o te toto, kae ko te (3) mai te faka‵logo ki tulaga ma‵luga o te Tusi Tapu ki mea tau amioga. (Faitau te Galuega 15:28, 29.) E mafai pefea o faka‵logo a Kelisiano ki a Ieova mai te ‵tu ‵mautakitaki i auala konei e tolu?

4. E tapuaki atu pefea tatou ki a Ieova fua tokotasi? (Fakaasiga 4:11)

⁴ E ‵teke ne tatou a te ifo ki tupua, kae tapuaki fua ki a Ieova. Ne fakatonu atu a ia ki te kau Isalaelu ke tapuaki atu fua ki a ia tokotasi. (Teu. 5:6-10) Kae i te taimi ne tofotofogina ei ne te Tiapolo, ne fai ‵tonu atu a Iesu ki ei me e ‵tau o tapuaki atu tatou ki a Ieova fua tokotasi. (Mata. 4:8-10) Tela la, e se tapuaki tatou ki mea fakatusa fakalotu. E se tapuaki foki tatou ki tino—faitalia me i a latou ne takitaki lotu, tino pule fakapolitiki, io me ne tino lauiloa i te lalolagi io me ko mea tau tafaoga mo fakafiafiaga—ke fai ne tatou a latou e pelā me ne atua. E ‵tu eiloa tatou i te feitu o Ieova kae tapuaki atu fua ki a ia tokotasi telā ne “faite ne [ia] a mea katoa.”—Faitau te Fakaasiga 4:11.

5. Kaia e faka‵logo ei tatou ki te tulafono a Ieova ke faka‵malu a te ola mo te toto?

⁵ E faka‵logo tatou ki te tulafono a Ieova e uiga ki te faka‵maluga o te ola mo te toto. Kaia? Me e fai mai a Ieova i te toto e sui ne ia a te ola, se meaalofa tāua mai i a ia. (Levi. 17:14) I te taimi muamua eiloa ne talia ne Ieova ke ‵kai a tino ki ‵kano o manu, ne fakatonu atu a ia ki a latou ke mo a ma ‵kai ki te toto. (Kene. 9:4) Ne toe fakafoki atu ne ia a te fakatonuga tenei i te taimi ne tuku atu ne ia te Tulafono faka-Mose ki te kau Isalaelu. (Levi. 17:10) Kae ne fakatonu ne ia a te potukau pule i te senitenali muamua ke fakailoa atu ki Kelisiano katoa ke “‵kalo faeloa kea‵tea . . . mai te toto.” (Galu. 15:28, 29) E ‵mautakitaki tatou o faka‵logo ki te fakatonuga tenei i te taimi e fai ei ‵tou fakaikuga ki togafiti fakatokita.b

6. Ne a taumafaiga e fai ne tatou ke ola e ‵tusa mo tulaga ma‵luga o Ieova i mea tau amioga?

⁶ E faka‵logo faka‵lei tatou ki tulaga ma‵luga o Ieova i mea tau amioga. (Epe. 13:4) Mai te fakaaogaga ne ia o pati fakatusa ma‵nino, ne fakailoa mai a te apositolo ko Paulo ki a tatou ke “tamate” a ‵tou foitino—ko tena uiga e ‵tau o ‵kalo kea‵tea tatou mai so se manakoga masei o te foitino. E ‵kalo kea‵tea tatou mai te onoono io me fai so se mea telā e mafai o iku atu ki amioga fakatauavaga sē ‵tau. (Kolose 3:5; Iopu 31:1) Kafai e fe‵paki tatou mo se tofotofoga, e ‵teke fakavave atu ne tatou so se mafaufauga io me se faifaiga telā e mafai o fakamasei i ei ‵tou va fakataugasoa mo te Atua.

7. Se a te fakaikuga e ‵tau o fai ne tatou, kae kaia?

⁷ E fakamoemoe a Ieova ko tatou ke ‘faka‵logo mo te loto kātoa.’ (Loma 6:17) A tena takitakiga e aoga faeloa ki a tatou, kae ko ana tulafono e se mafai o ‵fuli. (Isa. 48:17, 18; 1 Koli. 6:9, 10) E taumafai malosi tatou o fakafiafia a Ieova kae fakaasi atu foki te kilokiloga a te faisalamo telā ne folafola mai, penei: “Ko oti ne fakaiku aka ne au ke fakalogo ki au tulafono fo‵liki i taimi katoa, ke oko eiloa ki te fakaotiga.” (Sala. 119:112) Kae ka taumafai eiloa a Satani o fakaseaoga a ‵tou fakaikuga. Ne a auala e fakaaoga ne ia?

E FAKASEAOGA PEFEA NE SATANI A ‵TOU FAKAIKUGA?

8. E fakaaoga pefea ne Satani a fakasauaga i ana taumafaiga ke fakaseaoga a ‵tou fakaikuga?

⁸ Fakasauaga. E fakaaoga ne te Tiapolo a osomaiga i te feitu faka-te-foitino mo mea tau lagonaga ke fakaseaoga a ‵tou fakaikuga. E fakamoemoe a ia ke “folo” tatou, ke fakamasei ‵tou fesokotakiga mo Ieova. (1 Pe. 5:8) A Kelisiano i te senitenali muamua ne fakamatakutaku, ‵kini, kae tamate ona ko te lotou fakaikuga ke ‵tu ‵mautakitaki. (Galu. 5:27, 28, 40; 7:54-60) Koi tumau loa a Satani i te fakaaoga ne ia a fakasauaga i aso nei. E fakamaoni ne tatou te mea tenei i faifaiga fakasaunoa e fai ki ‵tou taina mo tuagane i Lusia mo nisi fenua mo fakasauaga mai tino ‵teke.

9. Fakamatala mai a te tāua ke fakaeteete i fakamalosiga fai lēmū.

⁹ Fakamalosiga fai lēmū. E fakaaoga ne Satani a “togafiti ma‵sei” i tafa o fakasauaga kolā e fai ‵tonu atu. (Efe. 6:11) Mafaufau ki te fakaakoakoga a se taina e igoa ki a Bob, telā ne faulu ki te fakaimasaki ke fai se ‵tipiga lasi ki ei. Ne fakailoa atu ne ia ki tokita me ka se talia lele ne ia a te fagai ki te toto. Ne talia mo te āva ne te tokita tipitipi a tena fakaikuga. Kae i te po mai mua o fai tena ‵tipiga, ne toe asi atu se suā tokita ki a Bob mai tua o te ‵fokiga o ana kāiga ki te fale. Ne fai atu a ia ki a Bob me ka se fakaaoga ne tokita a te toto kae fakatoka fua ne latou māfai e manakogina. Kāti ne mafaufau a te tokita me ka ‵fuli te mafaufau o Bob māfai ko sē ‵nofo atu ana kāiga i konā. Kae ne tu ‵mautakitaki eiloa a Bob, kae fai atu me ka se talia lele ne ia a te toto faitalia me se a te tulaga e oko a ia ki ei.

10. Kaia e fakamataku i ei a mafaufauga o tino? (1 Kolinito 3:19, 20)

¹⁰ Mafaufauga o tino. Kafai e maua ne tatou te kilokiloga a te tagata e uiga ki mea, kāti e mafai loa o fakaseaoga ne tatou a Ieova mo ana tulaga. (Faitau te 1 Kolinito 3:19, 20.) A te “poto o te lalolagi tenei” e fakamalosi faeloa ne ia a tino ke sē faka‵logo ki te Atua. Ne talia ne nāi Kelisiano i te fakai ko Pelekamo mo Tuatila a te ifo ki tupua mo amioga ma‵sei. Ne polopoloki ‵mafa ne Iesu a te avā fakapotopotoga konei me ne talia ne latou a amioga fakatauavaga sē ‵tau. (Faka. 2:14, 20) I aso nei, e fakafesagai tatou ki fakamalosiga ke talia a kilokiloga ‵se. Kāti e taumafai ‵tou kāiga mo taugasoa o fai ke tali‵tonu tatou me i a tatou ko tō uiga faiga‵ta kae e ‵tau o ofa ne tatou a tulafono a Ieova. E pelā me se fakaakoakoga, kāti ka fai mai latou me se mea ‵lei fua ke fakama‵lie aka ‵tou manakoga, me i tulaga o te Tusi Tapu ki mea tau amioga ne mea mua loa.

11. I te taimi e ‵tu ‵mautakitaki tatou, ne a mea e ‵tau o ‵kalo kea‵tea mai ei?

¹¹ I nisi taimi, kāti e fakasako‵sako atu tatou i fakatonuga mai i a Ieova e se ma‵nino. Kāti e mafai o tofotofogina tatou ke ‘silia ‵tou mea e fai i lō mea kolā ne tusi i te tusi.’ (1 Koli. 4:6) Ne agasala a takitaki lotu i aso o Iesu i te mea tenei. Mai te fakaopoopo ne latou a olotou tulafono totino ki te Tulafono, ko fakafaigata ne latou ki tino ke tau‵tali ki ei. (Mata. 23:4) E tuku mai ne Ieova ki a tatou a fakatonuga ma‵nino e auala i tena Muna mo tena fakapotopotoga. E seai se fakamasakoga ke fakaopoopo ne tatou a fakatonuga e tuku mai ne ia. (Faata. 3:5-7) Tela la, e se ‵tau o tō silia ‵tou mea e fai i lō mea ne tusi i te Tusi Tapu io me faite a tulafono mō ‵tou taina tali‵tonu e uiga ki mea totino.

12. E fakaaoga pefea ne Satani a “takolekolega sē aoga”?

¹² Manatu Fakaloiloi. E fakaaoga ne Satani a “takolekolega sē aoga” mo “kilokiloga fakavae o te lalolagi” ke takitaki ‵se kae fakamavae‵vae ei a tino. (Kolose 2:8) Ne aofia i te senitenali muamua a poto kolā ne fakavae ki manatu o tino, akoakoga a te kau Iutaia kolā e se fakavae ki te Tusi Tapu, mo te akoakoga me e ‵tau o faka‵logo a Kelisiano ki te Tulafono faka-Mose. A mea konei ne manatu fakaloiloi katoa me fai ne latou ke sē ‵saga atu a tino ki te Pogai tonu o te poto, ko Ieova. I aso nei, e fakaaoga ne Satani a mea fakasalalau mo te itaneti ke fakasalalau atu a tala mo lipoti sē ‵tonu kolā e fakamalosi aka ne takitaki fakapolitiki. Ne lavea ne tatou a mea penā i te taimi tenei o te masaki ‵pisi ko te COVID-19.c A Molimau a Ieova kolā ne faka‵logo ki fakatakitakiga ne tuku mai ne te ‵tou fakapotopotoga kātoa, ne seki sōna manava‵se e pelā mo tino kolā ne faka‵logo ki fakamatalaga sē ‵tonu.—Mata. 24:45.

13. Kaia e ‵tau ei o fakaeteete tatou i mea kolā e mafai o fakalavelave mai ki a tatou?

¹³ Mea e fakalavelave mai. E ‵tau o ‵saga tonu tatou ki “mea kolā e sili atu i te tāua.” (Fili. 1:9, 10) Kafai e isi ne mea e fakalavelave mai, ko fakamāumāu ei ne tatou a ‵tou taimi mo malosi ki ei i lō mea tāua. A mea kolā e masani o fai ne tatou i te olaga—e pelā mo te ‵kai, inu, fakafiafiaga, mo galuega ‵togi—e mafai o fakalavelave mai māfai e fakamuamua ne tatou i ‵tou olaga. (Luka 21:34, 35) E se gata i ei, e lagona kae fai‵tau tatou i aso katoa ki tala e uiga ki kinauga fakafenua mo mea fakapolitiki. E ‵tau o fakamautinoa aka ne tatou me e se fakalavelave mai a kinauga konā ki a tatou. Me kafai e talia ne tatou, kāti ka kamata o ‵lago tatou ki se feitu e tasi i ‵tou mafaufau mo ‵tou loto. E fakaaoga ne Satani a auala katoa kolā ne ‵sae mai i luga ko te mea ke fakaseaoga ei ‵tou fakaikuga ke fai a te mea tonu. Ke na sau‵tala nei tatou ki te auala e mafai o ‵teke ne tatou a ana taumafaiga konā kae ‵tu ‵mautakitaki.

E MAFAI PEFEA O ‵TU ‵MAUTAKITAKI TATOU?

14. Se a te mea e tasi e mafai o fesoasoani mai ke ‵tu ‵mautakitaki tatou i te feitu o Ieova?

¹⁴ Mafaufau ‵loto ki tau tukuatuga mo te papatisoga. Ne fai ne koe a mea konā me ne manako koe o tu i te feitu o Ieova. Toe mafaufau ki mea kolā ne fesoasoani atu ki a koe ke talitonu me ko maua eiloa ne koe a te munatonu. Ne maua ne koe a te iloaga tonu e uiga ki a Ieova kae kamata o āva kae alofa koe ki a ia e pelā me ko tou Tamana faka-te-lagi. Ne ati aka ne koe a te fakatuanaki kae fakamalosi aka ei ke salamō koe. Ne loto malosi koe o tiaki a faifaiga ma‵sei kae ke ola e ‵tusa mo te loto o te Atua. Ne maua ne koe se fakatapūga i te laveaga ne koe te alofa fakamagalo o te Atua. (Sala. 32:1, 2) Ne kau koe ki fakatasiga Kelisiano kae kamata o fakailoa atu ki nisi tino a mea ‵gali ne tauloto ne koe. E pelā me se Kelisiano telā ne tukugina atu kae papatiso, ko sasale nei koe i te auala ki te ola, kae fakaiku aka ke tumau i te sasale i ei.—Mata. 7:13, 14.

15. Kaia e aoga ei a te sukesuke kae mafaufau ‵loto?

¹⁵ Sukesuke ki te Muna a te Atua kae mafaufau ‵loto ki ei. E pelā me se lakau telā e tu ‵mautakitaki ona ko te ‵solo o ana aka ki lalo i te laukele, e mafai o ‵tu ‵mautakitaki tatou māfai e malosi ‵tou fakatuanaki ki te Muna a te Atua. Kafai ko gasolo aka o lasi te lakau, ka ‵solo malosi ifo ana aka ki lalo kae salalau foki. Kafai e fai ‵tou sukesukega kae mafaufau ‵loto, e fakamalosi ne tatou a ‵tou fakatuanaki mo ‵tou loto tali‵tonu me i auala o te Atua ko te ‵toe mea ‵lei mō tatou. (Kolose 2:6, 7) Ke mafaufau ‵loto ki te auala ne fesoasoani atu ei a fakatonuga, takitakiga mo puipuiga a Ieova ki ana tavini i aso mua. E pelā mo te saga tonu atu o Esekielu i te taimi ne fakamatala faka‵lei atu ne se agelu te fuaga o te faletapu e auala i se fakaasiga. Ne fakamalosi aka ne te fakaasiga tenei a Esekielu, kae e tuku mai i ei ki a tatou a akoakoga aoga me e mafai o taofi ‵mau tatou ki tulaga o Ieova e uiga ki te tapuakiga ‵ma.d (Eseki. 40:1-4; 43:10-12) E maua foki ne tatou a mea aoga māfai e fakaavanoa ‵tou taimi ke suke‵suke kae mafaufau ‵loto ki mea ‵loto i te Muna a te Atua.

16. Ne puipui pefea a Bob ne te ‵mautakitaki o tena loto? (Salamo 112:7)

¹⁶ Ati aka se loto ‵mautakitaki. Ne folafola mai ne te tupu ko Tavita te ‵mautakitaki o tena alofa ki a Ieova i te taimi ne usu mai a ia, penei: “A toku loto e ‵mautakitaki, e te Atua.” (Sala. 57:7) E mafai foki o maua ne tatou se loto telā ‵mautakitaki, mai te tali‵tonu katoatoa ki a Ieova. (Faitau te Salamo 112:7.) Mafaufau ki te auala ne fesoasoani atu te mea tenei ki a Bob, telā ne fakasae atu muamua. I te taimi ne fakailoa atu ki a ia me ka tausi ne vaega o toto ke fakaaoga māfai e manakogina, ne tali fakavave atu a ia me kafai foki loa e isi se avanoaga ke fagai ne latou a ia ki te toto, ka tiaki fakavave ne ia te fakaimasaki. Fakamuli loa, ne fai mai a Bob, “Ne seki fakalotolotolua eiloa au kae seki manavase foki.”

17. Ne a mea e mafai o tauloto ne tatou mai te tala o Bob? (Onoono foki ki te ata.)

¹⁷ Ne ‵mautakitaki a Bob me ko oti ne fai tena fakaikuga ke tu ‵mautakitaki a koi tuai eiloa o ulu i te fakaimasaki. Muamua la, ne manako a ia o fakafiafia a Ieova. Te lua, ne sukesuke faka‵lei a ia ki te Tusi Tapu mo ‵tou tusi faka-te-Tusi Tapu e uiga ki te ‵malu o te ola mo te toto. Te tolu, ne loto talitonu a ia me i te fakalogo ki te fakatonuga a Ieova ka maua ei ne ia a fakamanuiaga se-gata-mai. E tonu, e mafai foki o ‵mautakitaki ‵tou loto faitalia a fakalavelave e mafai o fe‵paki mo tatou.

18. E akoako mai pefea i te fakaakoakoga a Palaka ke tali‵tonu tatou ki a Ieova? (Onoono ki te ata i te ‵kava.)

¹⁸ Talitonu ki a Ieova. Mafaufau ki te auala ne manuia ei a Palaka ona ko te talitonu ki te takitakiga a Ieova. E tiga eiloa ne seki lavea atu se talita io me se tao i te fenua kātoa, ne fakatonu atu a Ieova ki tou tagata ke fano o taua atu ki kautau a te takitaki kautau o Kanana ko Sesela kolā ne fakatoka faka‵lei. (Fama. 5:8) Ne fai atu te pelofeta fafine ko Tepola ki a Palaka ke fano ki lalo i te koga laugatasi o fakafetaui ki a Sesela mo ana kaliota tau e 900. E tiga loa ka faigata ‵ki ki te kau Isalaelu ke taua atu ki kaliota ma‵kini i te koga laugatasi tenā, kae ne fakalogo eiloa a Palaka. I te oloifoga a sotia mai te Mauga o Tapola, ne faka‵to ne Ieova a vaiua mai te lagi. Ne ‵lave a kaliota a Sesela i pela, kae ne tuku atu ne Ieova a te manumalo ki a Palaka. (Fama. 4:1-7, 10, 13-16) I se auala tai ‵pau, ka tuku mai ne Ieova ki a tatou a te manumalo māfai e tali‵tonu tatou ki a ia penā foki a fakatonuga e tuku mai ne ia e auala i ana sui.—Teu. 31:6.

KE NA FAKAIKU AKA KE ‵TU ‵MAUTAKITAKI FAELOA

19. Kaia e manako ei koe ke tu ‵mautakitaki faeloa?

¹⁹ Ka tumau eiloa tatou i te taua atu ke ‵tu ‵mautakitaki faeloa i te taimi koi ola ei tatou i te olaga tenei. (1 Timo. 6:11, 12; 2 Pe. 3:17) Ke na fakaiku aka ke mo a ma sōna manava‵se tatou i fakasauaga, fakamalosiga fai lēmū, mafaufauga o tino, manatu fakaloiloi mo mea kolā e fakalavelave mai. (Efe. 4:14) I lō te fai penā, ke na ‵tu ‵mautakitaki tatou i te ‵tou tapuaki atu ki a Ieova kae sa gasue‵sue i te ‵tou faka‵logo ki ana fakatonuga. I te taimi foki loa tenā, e ‵tau mo tatou o uiga faigofie. I te suā mataupu, ka sau‵tala tatou ki te auala e fai ei a Ieova mo Iesu e pelā me ne fakaakoakoga ‵lei katoatoa o te uiga faigofie.