NIKODEMO I FAAITEHIA I TE HURU O TE FANAU FAAHOU.

3 Te parahi ra te hoê Pharisea o Nikodemo te iˈoa, e tavana no te ati Iuda: 2 o tei haere mai i te rui ia Iesu ra, e ua parau maira ia ˈna, E Rabi, ua ite matou e e orometua oe mai ǒ mai i te Atua ra; e ore hoi teie nei mau tapao ta oe e rave nei e tia i te taata, auaa te Atua atoa ra. 3 Ua parau atura Iesu, na ô atura ia ˈna, Amene, amene, e parau atu vau ia oe, Ia ore te taata ia fanau faahou ra, e ore oia e ite i te basileia o te Atua ra. 4 Ua parau maira Nikodemo ia ˈna, Eaha te taata paari e fanau ai? e ô faahou anei oia i roto i te opu o tana metua vahine a fanau mai ai? 5 Ua parau atura Iesu, Amene, amene, e parau atu vau ia oe, Ia ore te taata ia fanau i te pape e te Varua, e ore oia e ô i te basileia o te Atua ra. 6 Ta te tino e fanau nei, e tino ïa, ta te Varua e fanau ra, e varua ïa. 7 Eiaha oe e maere o vau i parau atu na e, Ia fanau faahou outou e tia ˈi. 8 Te farara nei te mataˈi i ta ˈna vahi i hinaaro ra, e te ite ra oe i to ˈna haruru, aita râ oe i ite i te vahi no reira mai oia ra, e te vahi e haerehia ˈtu e ana ra; oia hoi e taata atoa ta te Varua i fanau ra. 9 Ua parau maira Nikodemo ia ˈna, na ô maira, Eaha ïa mau mea e tia ˈi? 10 Ua parau atura Iesu ia ˈna, na ô atura, O te orometua hoi oe a Iseraela, aore â oe i ite i teie nei mau parau? 11 Amene, amene, e parau atu vau ia oe, O ta matou i ite ra ta matou ïa e parau nei, e ta matou i hiˈo ra ta matou ïa e faaite nei, e e ore â outou e farii mai i ta matou parau. 12 I parau atu na vau ia outou i te parau o teie nei ao, e aore outou i faaroo, eaha outou e faaroo ai ia parau atu vau ia outou i te parau o te raˈi? 13 Aore roa e taata i tae i nia i te raˈi, maori râ o tei haere mai i raro mai nia mai i te raˈi ra, o te Tamaiti a te taata i nia i te raˈi ra. 14 Mai ia Mose i faateitei i te ophi i te medebara ra, oia atoa te Tamaiti a te taata, e faateitei-atoa-hia ïa: 15 ia ore ia pohe te faaroo ia ˈna ra, ia roaa râ te ora mure ore. 16 I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore. 17 Aore hoi te Atua i tono mai i ta ˈna Tamaiti i te ao nei e faahapa mai i to te ao, ia ora râ to te ao ia ˈna. 18 Tei faaroo ia ˈna ra, e ore oia e faahapahia; tei ore i faaroo ra, ua faahapa-ê-hia na ïa, oia aore i faaroo i te iˈoa o te Tamaiti fanau tahi a te Atua ra. 19 Teie taua faahapa ra, o te maramarama ua tae mai i te ao nei, e hinaaro aˈenei te taata i te pouri, aore te maramarama, no te mea te ino ra ta ratou parau. 20 O tei mau i te parau ino ra, aore oia i hinaaro i te maramarama, e ore hoi oia e haere mai i te maramarama o te itea ta ˈna parau. 21 O tei haapao ra i te parau mau ra, e tae mai ïa i te maramarama ia itea-maitai-hia e, te au ra ta ˈna parau i te Atua.

22 E muri aˈera, haere atura Iesu e ta ˈna mau pǐpǐ i te hoê fenua i Iudea, parahi atura oia i reira e ratou atoa, e bapetizo ihora i te taata. 23 Te bapetizo atoa ra hoi Ioane i Aino i pihai iho i Salima, no te mea e rave rahi to reira pape, e ua haere maira te taata, e bapetizohia ihora. 24 Aore â hoi Ioane i hurihia i roto i te tapearaa ra.

25 Ua mârô ihora te mau pǐpǐ a Ioane e te hoê pae ati Iuda ra i te tâmaraa. 26 Haere atura ratou ia Ioane ra, e ua parau atura ia ˈna, E Rabi, te taata i parahi orua i te pae Ioridana ra, ta oe i arue ra, inaha te bapetizo ra oia, e te haere maira te taata atoa ia ˈna ra. 27 Ua parau maira Ioane, na ô maira, Aita o te taata e mana e noaa, maori râ o te horoahia mai no te raˈi ra. 28 O outou iho te ite ia ˈu, e ua parau atu vau e, E ere au i te Mesia, i tonohia mai râ vau e na mua ia ˈna. 29 O te tane ra te taata vahine, o te hoa râ o taua tane ra, o te tia i pihai iho i te faarooraa ia ˈna ra, e oaoa rahi to ˈna i te reo o taua tane ra; e teie nei, ua tia roa to ˈu oaoaraa. 30 E tupu oia i te rahiraa, e hoˈi râ vau i te itiraa. 31 O tei haere mai mai nia maira, o te hau ïa; o to te repo ra, no te repo ïa, e no te repo hoi ta ˈna parau: o to nia mai i te raˈi ra, o te hau â ïa. 32 O ta ˈna i hiˈo ra, e o ta ˈna i faaroo ra, o ta ˈna ïa e parau nei, e aore â e taata i farii mai i ta ˈna parau. 33 O tei farii i ta ˈna parau, ua parau ïa e, e parau mau ta te Atua. 34 O ta te Atua i tono maira, o ta te Atua â ïa parau ta ˈna e parau ra, aore hoi te Atua i horoa riirii mai i te Varua no ˈna. 35 Te here nei te Metua i te Tamaiti, e ua horoa mai i te mau mea atoa i tana rima. 36 O tei faaroo i te Tamaiti ra e ora mure ore to ˈna; e o tei ore i faaroo i te Tamaiti ra, e ore oia e ite i te ora; te vai ra ïa te riri o te Atua i nia iho ia ˈna.